✍️ – ಫ್ರಾದ್ ಆರನ್ ಬಬುಶ್, ಕಾರ್ಮೆಲಿತ್

ಮಾತಾಳೊ ಪಳೆವ್ನ್ ಹೊ ಕಾಲೆಂ ದೇವ್‌ನಿಂದಾ ಉಲಯ್ತಾ ಮ್ಹಣ್ ಥೊಡ್ಯಾಂಚ್ಯೆ ಮತಿಕ್ ಕಿಡೊ ರಿಗ್ಲಾಸ್ತಲೊ. ಮನ್ಶಾಥಂಯ್ ಮೊಸೊರ್ ಸಹಜ್, ಕಿತ್ಯಾಕ್ ತೊ ಸಂಯ್ಬಾಚೊ ಗೂಣ್. ಪುಣ್ ಸರ್ವ್ ಪವಿತ್ರ್ ದೇವ್ ಮೊಸ್ರಿ ಜಾಂವ್ಚೊ ಕಸೊ? ಹಾಂಗಾಸರ್ ‘ಮೊಸೊರ್’ ಸಬ್ದಾಚೊ ಕಾಂಯ್ ಚೂಕ್ ಪ್ರಯೋಗ್ ಜಾಲಾಗಾಯ್ ಮ್ಹಳ್ಳೊ ದುಬಾವ್‌ಯೀ ಥೊಡ್ಯಾಂಕ್ ಉದೆಲಾ ಜಾಂವ್ಕ್ ಪುರೊ. ದುಬಾವ್ ಬರೊ. ದುಬಾವ್ ಆಸ್ಲ್ಯಾರ್ ಮಾತ್ರ್ ಜಾಪಿ ಸೊಧ್ಚಿ ಉರ್ಬಾ ಯೆತಾ.

ಮೊಸೊರ್ ಮ್ಹಳ್ಯಾರ್ ಕಿತೆಂ?

ಮೊಸೊರ್ ಸಾಮಾನ್ಯ್ ಜಾವ್ನ್ ಹರ್ ಜೀವಿಂಥಂಯ್ ದಿಸೊನ್ ಯೆತಾ. ಮನಿಸ್ ಮಾತ್ರ್ ನ್ಹಯ್, ಮನ್ಜಾತಿಯ್ ಮೊಸೊರ್ ಅನ್ಭೋಗ್ ಕರ್‍ತಾತ್. ಆಪ್ಣಾಚೊ ಧನಿ ಹೆರಾಂಚೊ ಚಡ್ ಮೋಗ್ ಕರ್‍ತಾ ಮ್ಹಣ್ ಭೊಗ್ತಾನಾ ಘರಾಂತ್ಲಿಂ ಸುಣಿಂ/ಮಾಜ್ರಾಂ ಧನಿಯಾಚೆಂ ಧ್ಯಾನ್ ಆಪ್ಣಾಥಂಯ್ ವೊಡುಂಕ್ ಜಾಯ್ತೆಂ ಕಸ್ರತ್ ಕರ್‍ತಾತ್. ಪುಣ್ ಹೊ ಕ್ಶಣಿಕ್ ಮೊಸೊರ್. ಪುಣ್ ಮನ್ಶಾತಸ್ಲಿ ಮೊಸ್ರಿ ಮನ್ಜಾತ್ ದುಸ್ರಿ ನಾ. ಆಮ್ಚ್ಯೆ ಚಾಲ್ತ್ಯೆ ಭಾಶೆಂತ್ ಮೊಸೊರ್ ಮ್ಹಳ್ಯಾರ್, ಕೊಣೀ ಎಕ್ಲೊ ಬರೊ ಜಾತಾನಾ ಆನ್ಯೆಕ್ಲ್ಯಾಕ್ ಬೆಜಾರ್ ಜಾಂವ್ಚೆಂ; ಮ್ಹಜೆಲಾಗಿಂ ನಾತ್‌ಲ್ಲೆಂ, ಆನ್ಯೆಕ್ಲ್ಯಾ ಕಡೆ ಆಸ್ತಾನಾ ಪೊಟಾಂತ್ ಉಜೊ ಪಡ್ಚೊ; ಮ್ಹಾಕಾ ಮೆಳಜೆ ಆಸ್‌ಲ್ಲೆಂ ಆನ್ಯೆಕ್ಲ್ಯಾಕ್ ಮೆಳ್ತಾನಾ ಭೊಗ್ಚಿ ದೂಕ್; ಮ್ಹಜೆಲಾಗಿಂ ಸಗ್ಳೆಂ ಆಸಾ ತರೀ ಮ್ಹಜೊ ಸೆಜಾರಿ ಇಲ್ಲೊ ಬರೊ ಜಾಯ್ತ್ ತರ್ ಮ್ಹಜ್ಯಾನ್ ತೆಂ ಸೊಸುಂಕ್ ತಾಂಕಾನಾ ಜಾಂವ್ಚೆಂ. ಸೊಂಪ್ಯಾನ್ ಸಾಂಗ್ಚೆಂ ತರ್ ಹಾಂವ್ ಮಾತ್ರ್ ಬರೊ ಜಾಯ್ಜೆ ಹೆರಾಂನಿ ಬರೆಂ ಜಾಂವ್ಕ್ ನ್ಹಜೊ ಮ್ಹಳ್ಳೆಂ ಚಿಂತಪ್.

ಮೊಸೊರ್ ಮ್ಹಾಪಾತಕ್‌ಗೀ?

ಖಂಡಿತ್ ವ್ಹಯ್. ಗರ್ವಾ ಉಪ್ರಾಂತ್ಲೆಂ ಮ್ಹಾಪಾತಕ್ ಮ್ಹಳ್ಯಾರ್ ‘ಮೊಸೊರ್’. ಜೆಫ್ ಕುಕ್ ಮ್ಹಳ್ಳೊ ಎಕ್ಲೊ ತತ್ವ್‌ಶಾಸ್ತ್ರಿ ಆಪ್ಲ್ಯಾ ‘Seven: The Deadly Sins and the Beatitudes’ ಮ್ಹಳ್ಳ್ಯಾ ಬುಕಾಂತ್ ಅಶೆಂ ಬರಯ್ತಾ:

“ಸಾತ್ ಮ್ಹಾಪಾತ್ಕಾಂಪಯ್ಕಿ ಬೊವ್ ಕೀಳ್ ಮ್ಹಾಪಾತಕ್ ಮ್ಹಳ್ಯಾರ್ ಮೊಸೊರ್; ಕಿತ್ಯಾಕ್, ಗರ್ವ್, ರಾಗ್, ಅಬ್‌ಸ್ವಾರ್ಥ್, ಕಾಮುಕ್ಪಣ್, ಪೊಟಾರ್ದ್‌ಪಣ್ ಆನಿ ಆಳ್ಸಾಯ್ – ಹಿಂ ಪಾತ್ಕಾಂ ಆಧಾರ್‍ತಾನಾ ಕ್ಶಣಿಕ್ ಸುಖ್ ಪುಣೀ ಮೆಳ್ತಾ; ಪುಣ್, ಕ್ಶಣಿಕ್ ಸುಖ್‌ಯೀ ದೀನಾಸ್ತಾನಾ, ತೆಂ ಆಧಾರ್‍ತಲ್ಯಾಕ್ ಫಕತ್ ದಳ್ದಿರ್‌ಪಣ್ ದಿತಾ ತೆಂ ಪಾತಕ್ ಮ್ಹಳ್ಯಾರ್ ಮೊಸೊರ್”.

ಹಾಚೊ ಅರ್ಥ್ ಪಾತಕ್ ಆಧಾರ್‍ತಾನಾ ಸಯ್ತ್ ಮನ್ಶಾಕ್ ಮಾನಸಿಕ್, ಶಾರೀರಿಕ್ ಆನಿ ಆಧ್ಯಾತ್ಮಿಕ್ ರಿತಿನ್ ಇಜಾ ದಿಂವ್ಚೆಂ ಪಾತಕ್ ಮ್ಹಳ್ಯಾರ್ ಮೊಸೊರ್. ತೊ ಭೊಗ್ತಲ್ಯಾಕ್ ಜಿವೊಚ್ ಲಾಸ್ತಾ, ಹೆರಾಂಚೆಂ ಬರೆಂಪಣ್ ದೊಳ್ಯಾಂಕ್ ತೊಪ್ತಾ ಆನಿ ಆಪ್ಣಾಚ್ಯಾ ಆನಿ ಹೆರಾಂಚ್ಯಾ ನಾಸಾಕ್ ಕಾರಣ್ ಜಾತಾ. ಆದಾಂವ್ ಎವೆನ್ ಗರ್ವಾನ್ ಪಾತಕ್ ಆಧಾರ್‍ಲೆಂ, ಪುಣ್ ತಾಂಚ್ಯಾ ಪುತಾ ಕಾಯ್ನಾನ್ ಮೊಸ್ರಾನ್ ಆಪ್ಲ್ಯಾ ಭಾವಾಚೊ ಜೀವ್ ಕಾಡ್ಲೊ. ಆದಾಂವ್ ಎವೆನ್ ತಾಂಚ್ಯಾ ಪಾತ್ಕಾಕ್ ತಾಣಿಂಚ್ ಶಿಕ್ಶಾ ಭೊಗ್ಲಿ ತರ್ ಕಾಯ್ನಾಚ್ಯಾ ಪಾತ್ಕಾನ್ ನಿರಾಪ್ರಾಧಿ ರಗತ್ ವಾರಯ್ಲೆಂ. ಮೊಸೊರ್ ಜರ್ ಇತ್ಲೊ ಮಾರೆಕಾರ್ ತರ್ ಪವಿತ್ರ್ ಪುಸ್ತಕ್‌ಚ್ “ಆಮ್ಚೊ ದೇವ್ ಮೊಸ್ರಿ ದೇವ್” ಮ್ಹಣ್ತಾನೆ? ಹೆಂ ಕಶೆಂ ಸಾಧ್? ಕುಛ್ ತೊ ಗಡ್ಬಡ್ ಹೈ.

ದೆವಾಚೊ ಮೊಸೊರ್ ಆನಿ ಮನ್ಶಾಚೊ ಮೊಸೊರ್ ಎಕ್‌ಚ್‌ಗೀ?

ನ್ಹಯ್. ಹಿ ಆಮ್ಚ್ಯೆ ಭಾಶೆಚಿ ಸೀಮಿತಾಯ್. ದೆವಾಚೊ ಮೊಸೊರ್ ವೆಕ್ತ್ ಕರ್‍ಚೆತಸಲೆ ಸಾರ್ಕೆ ಸಬ್ದ್ ಆಮ್ಚ್ಯಾ ಭಾಸಾಂನಿ ವಾಡೊಂಕ್ ನಾಂತ್ ಜಾಲ್ಲ್ಯಾನ್ ಆಸ್‌ಲ್ಲ್ಯಾ ಸಬ್ದಾಂನಿ ಆಮಿ ಸುಧಾರ್‍ಸಿಜೆ ಪಡ್ತಾ. ದೆವಾಚೊ ಮೊಸೊರ್ ತಾಚ್ಯಾ ಮೊಗಾಂತ್, ಸೃಶ್ಟೆಥಂಯ್ ತಾಕಾ ಆಸ್ಚ್ಯಾ ಸಂಬಂದಾಂತ್ ಆನಿ ಸೃಶ್ಟೆಕ್ ತಾಚೆಥಂಯ್ ಆಸ್ಚ್ಯೆ ಭಕ್ತೆಂತ್ ಲಿಪೊನ್ ಆಸಾ. ದೆವಾಚೊ ಮೊಸೊರ್ ಮ್ಹಳ್ಯಾರ್ ಆಪ್ಲ್ಯೆ ರಚ್ನೆಥಾವ್ನ್ ತಾಣೆಂ ಆಪೇಕ್ಶಾ ಕರ್‍ಚೆಂ ವಿಶ್ವಾಸಿಪಣ್ ಆನಿ ಆಪ್ಲ್ಯಾ ಮೊಗಾಕ್ ಪಾಟಿಂ ಮೋಗ್.

ದೆವಾಚ್ಯಾ ಮೊಸ್ರಾಕ್ ಪವಿತ್ರ್ ಪುಸ್ತಕಾಂತ್ ಕಿತೆಂ ದಾಖ್ಲೊ ಆಸಾ?

ದಾಖ್ಲೆ ಸಬಾರ್ ಆಸಾತ್. ದೆವಾಚ್ಯಾ ಮೊಸ್ರಾಕ್ ಮೊಸೊರ್ ಮ್ಹಣ್ ಆಪಯಿಲ್ಲೆ ಚಡ್‌ಶೆ ದಾಖ್ಲೆ ಆಮ್ಕಾಂ ಪರ್ನ್ಯಾ ಸೊಲ್ಲ್ಯಾಂತ್ ಮೆಳ್ತಾತ್. ದೆವಾಚ್ಯಾ ಮೊಸ್ರಾಕ್ ಬೊವ್ ವ್ಹಡ್ ಕಾರಣ್ ಮ್ಹಳ್ಯಾರ್ ಇಸ್ರಾಯೆಲ್ ಪರ್ಜೆನ್ ತಾಂಚ್ಯಾ ಭೊಂವ್ತಣಿಚ್ಯಾ ಲೊಕಾಂನಿ ಕರ್‍ಚಿಂ ಆಚರಣಾಂ ಪಳೆವ್ನ್ ತಾಣಿಂ ಕರುಂಕ್ ಆರಂಭ್ ಕೆಲ್ಲಿ ಬೊಂಬ್ಯಾ ಪುಜಾ. ದೆವಾನ್ ಕಾಂಟಾಳ್‌ಲ್ಲೆಂ ಬೊವ್ ವ್ಹಡ್ ಪಾತಕ್ ಹೆಂಚ್. ದೆವಾನ್ ತಾಚ್ಯೆ ಪರ್ಜೆಚೆಂ ಹರ್ ಪಾತಕ್ ಹರ್‍ಯೇಕ್ ಪಾವ್ಟಿಂ ಶರ್ತಾವೀಣ್ ವಾ ಕುಸ್ಕುಟ್ ಶಿಕ್ಶಾ ದೀವ್ನ್ ಭೊಗ್ಶಿಲೆಂ. ಪುಣ್ ಜೆದ್ನಾಂ ತಾಣಿಂ ಅನ್ಯ್ ದೆವಾಂಚಿ ಪುಜಾ ಕೆಲಿ ತಾಂಕಾಂ ತಾಣೆಂ ಕಠೀಣ್ ಶಿಕ್ಶಾ ದೀನಾಸ್ತಾನಾ ಸೊಡ್ಲೆಂನಾ. ದಾಖ್ಲ್ಯಾಕ್, ದಾವಿದ್ ರಾಯಾನ್ ಪ್ರದ್ವಾರ್, ಖುನಿ (2 ಸಾಮು 11) ಆನಿ ಜನಗಣತಿ (2 ಸಾಮು 24) ಅಸಲಿಂ ಬೊವ್ ವ್ಹಡ್ ಪಾತ್ಕಾಂ ಆಧಾರ್‍ಲಿಂ ತರೀ ದೆವಾನ್ ತಾಕಾ ಕಾಂಯ್ ಥೊಡಿ ಶಿಕ್ಶಾ ದೀವ್ನ್ ಭೊಗ್ಶಿಲೆಂ. ದಾವಿದಾನ್ ಕೆದಿಂಚ್ ಆಪ್ಲ್ಯಾ ದೆವಾಕ್ ಸಾಂಡುಂಕ್ ನಾ ದೆಕುನ್ ದಾವಿದಾಚೊ ಕೆದಿಂಚ್ ತಾಣೆಂ ತಿರಸ್ಕಾರ್ ಕರುಂಕ್ ನಾ. ಪುಣ್ ತೆಂಚ್ ತಾಚ್ಯಾ ಪುತಾ ಸಾಲ್ಮಾಂವ್ನ್ ಆಪ್ಲ್ಯೆ ಉತರ್ ಪ್ರಾಯೆರ್ ಅನ್ಯ್ ದೆವಾಂಚಿ ಪುಜಾ ಕೆಲಿ ದೆಕುನ್ ದೆವಾನ್ ತಾಚೊ ತಿರಸ್ಕಾರ್ ಕೆಲೊ ಮಾತ್ರ್ ನ್ಹಯ್, ತಾಚ್ಯಾ ಉಪ್ರಾಂತ್ ಅಖಂಡ್ ಇಸ್ರಾಯೆಲ್ ರಾಜ್ಯ್ ದೋನ್ ಅರ್ಧಾಂ ಕರ್‍ನ್ ವಾಂಟುನ್ ಸೊಡ್ಲೆಂ. ಪ್ರವಾದ್ಯಾಂಚ್ಯಾ ಪುಸ್ತಕಾಂನಿ ವಾಚ್ಲ್ಯಾರ್ ಆಮ್ಕಾಂ ಕಳ್ತಾ, ಜೆದ್ನಾಂ ಲೋಕ್ ಆಪ್ಣಾಕ್ ಸೊಡ್ನ್ ಹೆರಾಂ ದೆವಾಂಕ್ ಮಾನ್ ಬಾಗಾಯ್ಲಾಗ್ಲೊ, ತೆದ್ನಾಂ ದೆವಾನ್ ವೈರಿ ರಾಶ್ಟ್ರಾಂಕ್ ಇಸ್ರಾಯೆಲಾಚೆರ್ ದಾಢ್ ಘಾಲ್ನ್ ತಾಂಚೊ ನಾಸ್ ಕರ್‍ಚ್ಯಾಕ್ ಸೊಡ್ಲಿಂ.

‘ಮೊಸ್ರಿ ದೆವಾಕ್’ ಪರ್ನ್ಯಾ ಸೊಲ್ಲ್ಯಾಂತ್ ದಾಖ್ಲೆ:

1.“ಮ್ಹಜೆಶಿವಾಯ್ ದುಸ್ರೆ ದೇವ್ ತುಕಾ ಆಸ್ಚೆ ನ್ಹಯ್. ಮುರ್ತಿ ವಾ ಕಸಲೆಂಚ್ ರುಪ್ಣೆಂ ಕರಿನಾಕಾ……… ಕಿತ್ಯಾಕ್ ಹಾಂವ್ ತುಜೊ ದೇವ್, ಪ್ರತಿಸ್ಪರ್ಧ್ಯಾಂಕ್ ಸೊಸಿನಾತ್ಲಲೊ ದೇವ್…..” (ನಿರ್ಗ 20:3-5)

ಹಾಂಗಾಸರ್ ದೆವಾಚ್ಯಾ ಆವಯ್ ಸಾರ್ಕ್ಯಾ ಕಾಳ್ಜಾಚಿ ಒಳೊಕ್ ಆಮ್ಕಾಂ ಜಾತಾ. ಕೋಣ್ ತಿ ಆವಯ್ ಆಪ್ಲ್ಯಾ ಭುರ್ಗ್ಯಾಕ್ ಕಿತೆಂ ವಾಯ್ಟ್ ತೆಂ ಕಳಿತ್ ಆಸೊನ್‌ಯೀ ತ್ಯಾ ವಿಶಿಂ ಚತ್ರಾಯ್ ದೀನಾಸ್ತಾಂ ಜಾಯ್ ತಶೆಂ ಕರುಂಕ್ ಸೊಡ್ತಾ? ತಸೊಚ್ ದೇವ್‌ಯೀ ಆಪ್ಲ್ಯಾ ಭುರ್ಗ್ಯಾಂನಿ ದೇವ್ ನ್ಹಯ್ ಆಸ್‌ಲ್ಲ್ಯಾಚಿ ಪುಜಾ ಕೆಲಿ ತರ್ ಸಯ್ತಾನ್ ತಾಂಕಾಂ ಮುಟಿಂತ್ ಘೆತಾ ಮ್ಹಣ್ ಜಾಣಾಸೊನ್, ದೇವ್ ಜಾಂವ್ಕ್ ಪ್ರಯತನ್ ಕರ್‍ನ್ ಸಲ್ವೊಂಚ್ಯಾ ಪ್ರತಿಸ್ಪರ್ಧಿ ಸಯ್ತಾನಾಚ್ಯಾ ಪಾಸಾಂತ್ಲಿಂ ರಾಕ್ಚ್ಯಾಕ್ ಆನಿ ಸೊಲ್ಲ್ಯಾಚೊ ಬಾಂದ್ ಘಟ್ ದವರ್‍ಚ್ಯಾಕ್ ತಾಂಕಾಂ ಹಿ ಚೆತಾವ್ಣಿ ದಿತಾ.

2.“ತುಮಿ ಅನ್ಯ್ ದೆವಾಕ್ ನಮಸ್ಕಾರ್ ಕರ್‍ಚೊ ನ್ಹಯ್, ಮೊಸ್ರಿ ದೇವ್ ತಾಚೆಂ ನಾಂವ್; ಪ್ರತಿಸ್ಪರ್ಧ್ಯಾಂಕ್ ಸೊಸಿನಾತ್‌ಲ್ಲೊ ದೇವ್ ತೊ” (ನಿರ್ಗ 34:14)

ನಿರ್ಗಮನ್ ಗ್ರಂಥಾಚೊ ಬಾತ್ತಿಸಾವೊ ಅಧ್ಯಾಯ್ ಇಸ್ರಾಯೆಲಿತಾಂನಿ ಭಾಂಗಾರಾಚೆಂ ವಾಸ್ರುಂ ಪೆಟ್ಲಲೆಂ ವೃತ್ತಾಂತ್ ಸಾಂಗ್ತಾ. ತಾಚ್ಯಾ ಉಪ್ರಾಂತ್ ಯೆಂವ್ಚ್ಯಾ ಅಧ್ಯಾಯಾಂತ್ಲ್ಯಾ ಹ್ಯಾ ವಯ್ಲ್ಯೆ ವೊಳಿಂತ್ ಮೊಸ್ರಾಕ್ ವಾಪಾರ್‌ಲ್ಲೊ ಹಿಬ್ರೂ ಸಬ್ದ್ qanna (קַנָּא) ಖಾನ್ನಾ. ಹಾಚೊ ಅರ್ಥ್ ಆಪ್ಣೆಂ ವಿಂಚುನ್, ರಾಕೊನ್, ಸಾಂಬಾಳ್ನ್ ಹಾಡ್‌ಲ್ಲ್ಯಾ ಲೊಕಾಥಂಯ್ ದೆವಾಚೊ ಗೂಂಡ್ ಹುಸ್ಕೊ. ಆಪ್ಲ್ಯಾ ಲೊಕಾನ್ ಆಪ್ಣಾಕ್ ಮಾತ್ರ್ ಮಾನ್ ಕರಿಜೆ ಮ್ಹಳ್ಳಿ ಆಪೇಕ್ಶಾ. ಹೊ ದೆವಾಚೊ ಸ್ವಾರ್ಥ್ ನ್ಹಯ್ ಬಗಾರ್ ಆಪ್ಲ್ಯಾ ಲೊಕಾಥಂಯ್ ದಾಕಯಿಲ್ಲ್ಯಾ ಮೊಗಾಕ್ ಆಶೆಂವ್ಚೆಂ ವಿಶ್ವಾಸಿಪಣ್. 

3.“ಸರ್ವೆಸ್ಪರ್ ತುಮ್ಚೊ ದೇವ್ ಏಕ್ ಭಸ್ಮ್ ಕರ್‍ಪಿ ಉಜೊ, ಮೊಸ್ರಿ ದೇವ್” (ದ್ವಿತಿ 4:24)

ಹಾಂಗಾಸರ್ ದೆವಾಚ್ಯಾ ಮೊಸ್ರಾಕ್ ಸಗ್ಳೆಂ ಭಸ್ಮುನ್ ಸೊಡ್ಚ್ಯಾ ಉಜ್ಯಾಕ್ ಸರಿ ಕೆಲಾಂ. ಉಜೊ ದೆವಾನ್ ಮನ್ಶಾಲಾಗಿಂ ಕೆಲ್ಲ್ಯಾ ಸೊಲ್ಲ್ಯಾಚಿಂ ಖುಣಾಂ. ಇಸ್ರಾಯೆಲಾಚೊ ಪುರ್ವಜ್ ಆಬ್ರಾಹಾಮಾಲಾಗಿಂ ದೆವಾನ್ ಸೊಲ್ಲೊ ಕರ್‍ತಾನಾ ಅರ್ಧಾಂ ಕರ್‍ನ್ ಕಾತರ್‍ನ್ ದವರ್‍ಲಲ್ಯಾ ಮನ್ಜಾತಿಂಚ್ಯಾ ಮದ್ಲ್ಯಾನ್ ಧುಂವರ್‍ತ್ಯಾ ಉಜ್ಯಾಚ್ಯಾ ಆಗ್ಟ್ಯಾ ರುಪಾರ್ ತೊ ಉತ್ರೊನ್ ಗೆಲೊ. ಹ್ಯೆ ವಯ್ಲ್ಯೆ ವೊಳಿಂತ್ ವಾಪರ್‍ಲಲೆಂ ಉಜ್ಯಾಚೆಂ ರೂಪಕ್ ದೆವಾನ್ ಆಪ್ಲ್ಯಾ ಲೊಕಾಲಾಗಿಂ ಕೆಲ್ಲ್ಯಾ ಸೊಲ್ಲ್ಯಾಚೊ ಉಗ್ಡಾಸ್ ಕಾಡ್ತಾ. 

4.“…….ತೊ ಪವಿತ್ರ್ ಆನಿ ಪದ್ವೆದಾರ್ ದೇವ್ ಆನಿ ತೊ ಮೊಸ್ರಿ…..” (ಜೋಶ್ವಾ 24:19)

ಜೋಶ್ವಾ ಹಿಂ ಉತ್ರಾಂ ಸಾಂಗ್ತಾ. ಹಾಂಗಾಸರ್ ದೆವಾಚ್ಯಾ ಮೊಸ್ರಾಕ್ ಆನಿ ತಾಚ್ಯಾ ಪವಿತ್ರ್‌ಪಣಾಕ್ ಗಾಂಚ್ ಜೊಡ್ಲಾ. ದೆವಾಚ್ಯಾ ಪವಿತ್ರ್‌ಪಣಾಕ್ ಹೆರ್ ಕಿತೆಂಚ್ ಸರಿ ಜಾಯ್ನಾ ದೆಕುನ್ ಇಸ್ರಾಯೆಲಿತಾಂ ಥಂಯ್ ನೀಜ್ ದೆವಾಚ್ಯಾ ಪವಿತ್ರ್‌ಪಣಾಚ್ಯಾಕೀ ಉಣೆಂ ಪವಿತ್ರ್ ಆಸ್ಚ್ಯಾ ಖಂಯ್ಚ್ಯಾಕೀ ಮಾನ್ ಆಸಾ ತರ್ ತೊ ವ್ಹಡ್ ಆಪ್ರಾಧ್ ಮ್ಹಣ್ ತೊ ದಾಂಬುನ್ ಸಾಂಗ್ತಾ. ಇಸ್ರಾಯೆಲಾಚೆಂ ಪವಿತ್ರ್‌ಪಣ್ ತಾಂಚ್ಯಾ ವಿಶ್ವಾಸಿಪಣಾಂತ್ ಲಿಪೊನ್ ಆಸಾ ದೆಕುನ್ ಜರ್ ತಿಂ ದೆವಾಕ್ ವಿಶ್ವಾಸಿ ರಾವೊಂಕ್ ಚುಕ್ತಾತ್ ತರ್ ತಿಂ ದೆವಾಚ್ಯಾ ನಿತಿವಂತ್ ಮೊಸ್ರಾಕ್ ಬಲಿ ಜಾತಾತ್ ಮ್ಹಣ್ ತೊ ಚತ್ರಾಯ್ ದಿತಾ.

5.“ಹಾಂವ್ ತುಕಾ ಸಾಸ್ಣಾಕ್ ಮ್ಹಜಿ ಪತಿಣ್ ಕರುನ್ ಘೆತಲೊಂ; ಪ್ರಾಮಾಣಿಕ್ಪಣಾನ್ ಆನಿ ನ್ಯಾಯ್‌ನಿತಿನ್, ವಿಶ್ವಾಸಿ ಮೊಗಾನ್ ಆನಿ ಕಾಕುಳ್ತಿನ್ ಹಾಂವ್ ತುಕಾ ಮ್ಹಜಿ ಪತಿಣ್ ಕರುನ್ ಘೆತಲೊಂ” (ಹೊಸೆ 2:21)

ಹಾಂಗಾಸರ್ ದೆವಾಚ್ಯಾ ವಿಶ್ವಾಸಿಪಣಾಕ್ ಪತಿ-ಪತಿಣೆಚ್ಯಾ ವಿಶ್ವಾಸಿಪಣಾಕ್ ಸರ್ ಕೆಲಾಂ. ಕೋಣ್ ತಿ ಬಾಯ್ಲ್ ವಾ ಘೊವ್ ಆಪ್ಲ್ಯಾ ಪತಿಕ್ ವಾ ಪತಿಣೆಕ್ ಪರ್ಕ್ಯಾಸಂಗಿ ವಾಂಟುನ್ ಘೆಂವ್ಕ್ ರಾಜಿ ಜಾಯ್ತ್? ಹಾಂಗಾಸರ್ ಉದೆಂವ್ಚ್ಯಾ ಮೊಸ್ರಾಕ್ ಆಮಿ ವಾಯ್ಟ್ ಮೊಸೊರ್ ಮ್ಹಣೊಂಕ್ ಜಾತಾಗೀ? ಜಶೆಂ ಪತಿ-ಪತಿಣ್ ಆಪ್ಲ್ಯಾ ಜಿಣಿಯೆ ಸಾಂಗಾತ್ಯಾಥಾವ್ನ್ ವಿಶ್ವಾಸಿಪಣ್ ಆಶೆತಾಗೀ ತಶೆಂಚ್ ದೇವ್‌ಯೀ ಆಪ್ಲ್ಯೆ ಪರ್ಜೆನ್ ಪರ್ಕ್ಯಾಕ್ ಮಾಂದ್ಚೆಂ ಸೊಸುನ್ ವ್ಹರಿನಾ.

ನವ್ಯಾ ಸೊಲ್ಲ್ಯಾಂತ್ ಮೊಸ್ರಿ ದೇವ್ ಆಸಾಗೀ?

ಪರ್ನ್ಯಾ ಸೊಲ್ಲ್ಯಾಂತ್ ವಾಪರ್‌ಲ್ಲೆಬರಿ ಮೊಸ್ರಿ ದೇವ್ ಮ್ಹಳ್ಳೊ ಸಬ್ದ್ ನವ್ಯಾ ಸೊಲ್ಲ್ಯಾಂತ್ ವಾಪಾರುಂಕ್ ನಾ ತರೀ ಅವಿಶ್ವಾಸಿಪಣಾಚಿ ಚೆತಾವ್ಣಿ ಜರೂರ್ ಆಸಾ. ಹಿ ಚೆತಾವ್ಣಿ ಪರ್ನ್ಯಾ ಸೊಲ್ಲ್ಯಾಚೆಂಚ್ ಬೊಂಬ್ಯಾ ಪುಜಾಚೆಂ ಚಿಂತಪ್ ಮುಂದರುನ್ ವ್ಹರ್‍ತಾ. ಕೊರಿಂಥ್‌ಗಾರಾಂಕ್ ಬರೊವ್ನ್ ಸಾಂ. ಪಾವ್ಲ್ ಸಾಂಗ್ತಾ: “I am jealous for you with a godly jealousy. I promised you to one husband, to Christ, so that I might present you as a pure virgin to Him.” (2 Cor 11:2) (ಹಾಂಗಾಸರ್ ಕೊಂಕ್ಣಿ ತರ್ಜುಮೊ ದೀನಾಸ್ತಾನಾ ಇಂಗ್ಲಿಶ್ ತರ್ಜುಮೊ ಕಿತ್ಯಾಕ್ ದಿಲಾ ಮ್ಹಳ್ಯಾರ್, ಕೊಂಕ್ಣಿ ತರ್ಜುಮ್ಯಾಂತ್ ‘jealous’ ಸಬ್ದಾ ಬದ್ಲಾಕ್ ‘ಉರ್ಬಾ’ ಸಬ್ದ್ ವಾಪಾರ್‍ಲಲೊ ಆಸಾ. ಕಿತ್ಯಾಕ್ ಗ್ರೇಕ್ ಭಾಶೆಂತ್ ζηλῶ – ‘ಝೆಲೊ’ ಮ್ಹಳ್ಳೊ ಸಬ್ದ್ ವಾಪಾರ್‍ಲಾ ಆಸ್ತಾಂ ತಾಚೊ ಅರ್ಥ್ ಮೊಸೊರ್ ವಾ ಉರ್ಬಾ ಹ್ಯಾ ದೊನೀ ಅರ್ಥಾಂನಿ ಘೆವ್ಯೆತ್. ಹಾಂಗಾಸರ್ ಸಾಂ. ಪಾವ್ಲು ಕ್ರೀಸ್ತ್ ಹೊರೆತ್ ಆನಿ ಪವಿತ್ರ್ ಸಭಾ ಹೊಕಲ್ ಮ್ಹಳ್ಳ್ಯಾ ಅರ್ಥಾರ್ ಉಲಯ್ತಾ ಜಾಲ್ಲ್ಯಾನ್ ಸಾಂದರ್ಭಿಕ್ ಜಾವ್ನ್ ‘ಮೊಸೊರ್’ ಸಬ್ದ್ ‘ಉರ್ಬಾ’ ಸಬ್ದಾಚ್ಯಾಕೀ ಚಡ್ ಅರ್ಥಾಭರಿತ್). ಹಾಂಗಾಸರ್ ಪಾವ್ಲುಚೊ ಮೊಸೊರ್ ಕ್ರೀಸ್ತಾಥಂಯ್ ಪವಿತ್ರ್ ಸಭೆಚ್ಯಾ ವಿಶ್ವಾಸಿಪಣಾವಿಶಿಂ. ಜರ್ ಕಸಲ್ಯೆಯ್ ರಿತಿನ್ ಪವಿತ್ರ್ ಸಭಾ ಚೂಕ್ ಶಿಕೊವ್ಣೆಕ್ ಲಾಗೊನ್ ಕೊಣೀ ಭಾವಾಡ್ತ್ಯಾಕ್ ಕ್ರೀಸ್ತಾಥಾವ್ನ್ ಮೆಕ್ಳಿ ಕರಿತ್ ತರ್ ತೊ ಅತ್ಮೀಕ್ ಪ್ರದ್ವಾರ್‌ಚ್ ಸಯ್. ತ್ಯಾ ದೆಕುನ್ ಹಾಂಗಾಸರ್ ಪಾವ್ಲು ಕೊರಿಂಥ್‌ಗಾರಾಂಕ್ ಕಸಲ್ಯೆಚ್ ಚೂಕ್ ಶಿಕೊವ್ಣೆನ್ ಮತಿಭೃಶ್ಟ್ ಜಾಯ್ನಾಸ್ತಾನಾ ಕ್ರೀಸ್ತಾಕ್ ಚಿಡ್ಕೊನ್ ರಾವೊಂಕ್ ಚತ್ರಾಯ್ ದಿತಾ.

ಹ್ಯಾ ವಿಶಿಂ ಕಥೊಲಿಕ್ ಪವಿತ್ರ್ ಸಭೆಚಿ ಶಿಕೊವ್ಣ್ ಕಿತೆಂ ಮ್ಹಣ್ತಾ?

1.ಕಥೊಲಿಕ್ ಧರ್ಮ್‌ಸಭೆಚಿ ಶಿಕವ್ಣ್- 2113: ಬೊಂಬ್ಯಾಪುಜಾ

“ಬೊಂಬ್ಯಾಪುಜಾ ಮ್ಹಳ್ಯಾರ್ ಫಕತ್ ಪೊಕ್ಳ್ಯಾ ಅನ್ಯ್‌ದೆವಾಂಚಿ ಪುಜಾ ಮಾತ್ರ್ ನ್ಹಯ್. ದೇವ್ ನ್ಹಯ್ ಆಸ್‌ಲ್ಲ್ಯಾಕ್ ದೇವ್ ಕರ್‍ಚೆಂ ಹರ್‍ಯೇಕ್ ಬೊಂಬ್ಯಾಪುಜಾಚ್. ದೆವಾಚ್ಯಾ ಜಾಗ್ಯಾರ್ ಜರ್ ಕೊಣೀ ಮನಿಸ್ ಕಸಲ್ಯಾಯ್ ವಸ್ತುಕ್, ಜಿವಿಕ್, ಸಯ್ತಾನಾಕ್, ಪದ್ವೆಕ್, ಸುಖಾಕ್, ಪುರ್ವಜಾಂಕ್, ರಾಜ್ಯಾಕ್ ವಾ ಪಯ್ಶಾಂಕ್ ಮಾನ್ ಕರ್‍ತಾ ತರ್ ತೊ ಬೊಂಬ್ಯಾಪುಜಾ ಆಧಾರ್‍ತಾ”. ಹಾಚೊ ಅರ್ಥ್ ದೆವಾ ಶಿವಾಯ್ ದುಸ್ರ್ಯಾ ಖಂಯ್ಚ್ಯಾನ್‌ಯೀ ದೆವಾಚೊ ಜಾಗೊ ಘೆಂವ್ಕ್ ಸಾಧ್ ನಾ. ತ್ಯಾ ದೆಕುನ್ ಖರ್‍ಯಾ ದೆವಾಕ್ ಸಾಂಡುನ್ ಭೊಟಾಲಾಗಿಂ ವೆಚೆಂ, ಹೆರ್ ದೆವಾಂಕ್ ಮಾನ್ ಕರ್‍ಚೊ, ಬೆಂಜಾರ್ ಕರ್‍ನ್ ದೆವಾಕ್ ಸಮರ್ಪಿಲ್ಲ್ಯಾ ಜಾಗ್ಯಾರ್ ಹೆರ್ ಧರ್ಮಾಚ್ಯಾಂಕ್ ಹಾಡ್ನ್ ಪುಜಾ ಕರೊಂವ್ಚಿ ಆನಿ ತಾಂತುಂ ವಾಂಟೊ ಘೆಂವ್ಚೊ ಹೆಂ ಸಗ್ಳೆಂ ದೆವಾಚ್ಯಾ ಮೊಸ್ರಾಕ್ ವಾ ರಾಗಾಕ್ ಕಾರಣ್ ಜಾತಾ.

2.ಕಥೊಲಿಕ್ ಧರ್ಮ್‌ಸಭೆಚಿ ಶಿಕೊವ್ಣ್- 2141: ಇಮಾಜಿಂಕ್ ಮಾನ್

“ಪವಿತ್ರ್ ಇಮಾಜಿಂಕ್ ವಾ ಪಿಂತುರಾಂಕ್ ಮಾನ್ ದೆವಾಚ್ಯಾ ಸಬ್ದಾಚ್ಯಾ ಮನ್ಶಾರುಪಾಚ್ಯಾ ಮಿಸ್ತೆರಾಂತ್ ಆಟಾಪುನ್ ಆಸಾ. ಹೆಂ ದೆವಾಚ್ಯಾ ಪಯ್ಲ್ಯಾ ಮಂದಾಮೆಂತಾ ವಿರೋಧ್ ವಚನಾ”. ಇಮಾಜಿಂಕ್ ದಿಂವ್ಚೊ ಮಾನ್ ತ್ಯೆ ಇಮಾಜಿಚಿ ಪುಜಾ ನ್ಹಯ್ ಬಗಾರ್ ತ್ಯೆ ಇಮಾಜಿಮುಕಾಂತ್ರ್ ದೆವಾಚೊ ಆನಿ ತಾಕಾ ವಿಶ್ವಾಸಿ ರಾವ್‌ಲ್ಲ್ಯಾ ಸಾಂತಾ-ಭಕ್ತಾಂಚೊ ಉಗ್ಡಾಸ್ ಕಾಡ್ಚೊ. ತೊ ಫಕತ್ ಮಾನ್ (veneration) ಶಿವಾಯ್ ದೆವಾಕ್ ಮಾತ್ರ್ ಸೀಮಿತ್ ಜಾಲ್ಲೆಂ ಆರಾಧನ್ (adoration) ನ್ಹಯ್. ಹೊ ಮಾನ್ ಸಾಂತಾ-ಭಕ್ತಾಂನಿ ದೆವಾತೆವ್ಶಿಂ ಚಮ್ಕೊಂಕ್ ಚಲ್‌ಲ್ಲ್ಯೆ ಪವಿತ್ರ್ ಜಿಣಿಯೆವಾಟೆಚೊ ಆಮ್ಕಾಂ ಉಗ್ಡಾಸ್ ಕರ್‍ನ್ ದಿತಾ ಆನಿ ಆಮ್ಕಾಂ ದೆವಾಥಂಯ್ ಚಡ್ ಆನಿ ಚಡ್ ಲಾಗಿಂ ವಚೊಂಕ್ ಆಧಾರ್ ದಿತಾ. ಹಾಂಗಾಸರ್ ದೇವ್ ಕೇಂದ್ರ್ ಸ್ಥಾನ್ ಘೆತಾ ಆನಿ ಹರ್‍ಯೇಕ್ ಮಾಗ್ಣೆಂ, ರಜಾರ್ ಆನಿ ದೆವಾಸ್ಪಣ್ ದೆವಾಕ್ ಮಾತ್ರ್ ಪ್ರಾಮುಕ್ಯತಾ ದಿತಾ ಜಾಲ್ಲ್ಯಾನ್ ಹಿ ಬೊಂಬ್ಯಾಪುಜಾ ಜಾಯ್ನಾ.

ನಿಮಾಣೆಂ ಉತರ್

ಅರ್ವಿಲ್ಯಾ ವರ್‍ಸಾಂನಿ, ಪ್ರತ್ಯೇಕ್ ಜಾವ್ನ್ ಆಮ್ಚ್ಯೆ ಕರಾವಳೆಚ್ಯೆ ಇಗರ್ಜ್‌ಮಾತೆಂತ್ ದೆವಾಸ್ಪಣ್ ವಾಡ್ಲಾಂ. ಲೊಕಾಂನಿ ರೆತಿರೆಂಕ್ ವೆಚೆಂ, ಯೂಟ್ಯೂಬಾರ್ ಮಾಗ್ಣೆಂ ಕರ್‍ಚೆಂ, ದೆವಾಚ್ಯಾ ಉತ್ರಾಚೊ ನಿಯಾಳ್ ಕರ್‍ಚೊ ಚಡ್ಲಾ ಜಾಲ್ಲ್ಯಾನ್ ಮಾಟ್-ಮಂತ್ರಾಂ, ಫಿತಿಸ್ಪಣಾಂಕ್ ವಚೊನ್ ದೆವಾಚೊ ಮೊಸೊರ್ ಪೆಟಸೊ ಕರ್‍ಚ್ಯಾ ಕಥೊಲಿಕಾಂಚೊ ಸಂಖೊ ಇಲ್ಲೊಸೊ ದೆಂವ್ಲಾ ಮ್ಹಣ್ಯೆತ್. ಪುಣ್ ಜೆಜುಲಾಗಿಂ ಮಾಗ್‌ಲ್ಲೆಂ ಮೆಳೊಂಕ್ ನಾ ಮ್ಹಣ್ ಶೊರ್ಟ್‌ಕಟ್ ಮಾರ್‍ನ್ ಫಿತಿಸ್ಪಣಾಕ್ ಬಲಿ ಜಾವ್ನ್ ಆಸ್‌ಲ್ಲೆಂ ಸಗ್ಳೆಂ ಹೊಗ್ಡಾವ್ನ್ ಪರತ್ ಸೊಮಿಯಾಕ್ ಸೊಧುನ್ ಪಾಟಿಂ ಆಯಿಲ್ಲಿಂ ಕಾಂಯ್ ಉಣಿಂ ನಾಂತ್. ಥೊಡ್ಯಾಂಕ್ ಪವಿತ್ರ್ ಪುಸ್ತಕಾಚಿ ಆನಿ ಇಗರ್ಜ್‌ಮಾತೆಚ್ಯೆ ಶಿಕೊವ್ಣೆಚಿ ಸಾರ್ಕಿ ಸಮ್ಜಣಿ ನಾಸ್ತಾನಾ ವಾರ್‍ಯಾಕ್ ಉಬ್ಚ್ಯಾ ಪೊಲಾಭಾಶೆನ್ ಕೊಣೆಂಗೀ ಸಾಂಗ್‌ಲ್ಲೆಂ ಪಾತ್ಯೆವ್ನ್ ವಾಟ್ ಚುಕೊನ್ ಗೆಲ್ಲಿಂ ಆಸಾತ್. ಆನಿ ಥೊಡಿಂ ಪಕ್ಕಾ ಬಿಜ್ನೆಸ್‌ಮೆನ್ ಆನಿ ಪೊಲಿಟಿಶಿಯನ್. ಮಿಸಾಕ್ ವೆತಾತ್, ಸರ್ವ್ ರಿತಿನ್ ಕಥೊಲಿಕ್ ಕ್ರಿಸ್ತಾಂವ್ಪಣ್ ಪಾಳ್ತಾತ್ ಪುಣ್ ತಾಂಚ್ಯಾ ಹೆರ್ ಧರ್ಮಾಚ್ಯಾ ಕಸ್ಟಮರಾಂಕ್ ಆನಿ ತಾಂಚ್ಯಾ ವಯ್ಲ್ಯಾಂಕ್ ಆಕರ್ಶಿತ್ ಕರುಂಕ್ ತಾಂಚ್ಯಾ ಪುಜಾಂನಿ ಭಾಗ್ ಘೆವ್ನ್ ತಾಂಚ್ಯಾ ದೆವಾಕ್ ನಮಸ್ಕಾರ್ ಕರ್‍ತಾತ್. ಕಾಳ್ಜಾಥಾವ್ನ್ ತ್ಯಾ ದೆವಾಂಕ್ ಮಾಂದಿನಾಂತ್ ತರೀ ಆಪ್ಲ್ಯಾ ಫಾಯ್ದ್ಯಾಖಾತಿರ್ ಉಗ್ತ್ಯಾನ್ ಸೊಮಿಯಾಕ್ ವಿಕ್ರಿತ್ ಕರ್‍ತಾತ್. “ಮ್ಹಾಕಾ ಮ್ಹಜಿ ಪಾತ್ಯೆಣಿ ಆಸಾ, ಹೆರ್ ಧರ್ಮಾಚ್ಯಾ ಲೊಕಾಮದೆಂ ಮಾಯಾಮೋಗ್ ಬಾಂದುನ್ ಹಾಡುಂಕ್ ಹಾಂವ್ ಅಶೆಂ ಕರ್‍ತಾಂ” ಮ್ಹಣ್ ತಾಣಿಂ ಸ್ಪಶ್ಟೀಕರಣ್ ದಿವ್ಯೆತ್. ಪುಣ್ ಕಾಳೆಂ ತೆಂ ಕಾಳೆಂ ಧವೆಂ ತೆಂ ಧವೆಂ. ಹೆಂ ಕೊಣೆಂಯ್ ಇನ್ಕಾರ್ ಕರುಂಕ್ ಜಾಯ್ನಾ. 

ಪುಣ್ ಹಾಂಚೆಮದೆಂ, ಕಿತ್ಲೊಯ್ ವಿರೋಧ್ ಆಸ್ಲ್ಯಾರೀ, ಭಿರಾಂತ್ ಆಸ್ಲ್ಯಾರೀ, ಮಾರ್‍ನ್ ಬಡಯ್ಲ್ಯಾರೀ ಕ್ರೀಸ್ತಾ ಶಿವಾಯ್ ಹೆರ್ ದೇವ್ ನಾ ಮ್ಹಣ್ 2007-08 ವರ್‍ಸಾ ಒಡಿಶಾಚ್ಯಾ ಕಂದಮಾಲಾಂತ್ ರಗತ್ ವ್ಹಾರಯಿಲ್ಲೆ ಮಾಡ್ತಿರ್ ಆಮ್ಚ್ಯಾಚ್ ಕಾಳಾರ್ ಆಮ್ಚ್ಯಾಚ್ ದೊಳ್ಯಾಂ ಮುಕಾರ್ ಆಸಾತ್. ತ್ಯಾಚ್ ವರ್‍ಸಾ ಸಪ್ತೆಂಬರ್ ಮ್ಹಯ್ನ್ಯಾಂತ್ ಕೊಡ್ಯಾಳಾಂತ್ ಇಗರ್ಜಾಂಚೆರ್ ಹಲ್ಲೊ ಜಾವ್ನ್ ಪೊಲೀಸ್ ವೆಸಾರ್ ಆಸ್‌ಲ್ಲ್ಯಾ ಗೂಂಡಾಂಚೆ ಮಾರ್ ಖಾವ್ನ್ ಕ್ರೀಸ್ತಾಕ್ ಸಾಕ್ಸ್ ದಿಲ್ಲ್ಯಾ ಆಮ್ಚ್ಯಾ ತರ್ನಾಟ್ಯಾಂಚೊ, ಲಾಯಿಕ್ ಭಾವ್-ಭಯ್ಣಿಂಚೊ ಆನಿ ಮಾದ್ರಿಂಚೊ ಉಗ್ಡಾಸ್ ಆಮ್ಚ್ಯೆ ಮತಿಂತ್ ಖಂಚ್ಲಾ. ತಾಂಚೆಂ ಬಲಿದಾನ್ ಆನಿ ತಾಣಿಂ ಸೊಸ್‌ಲ್ಲಿ ದೂಕ್ ದೆವಾಚೊ ನಿತಿವಂತ್ ಮೊಸೊರ್ ಕಡಯ್ತಾ ತೆಂ ಖಂಡಿತ್.