ಅಕ್ಟೋಬರ್ ಮ್ಹಯ್ನ್ಯಾಂತ್ ಹಿಂದೂ ಭಾವ್-ಭಯ್ಣಿ ದಸರಾಚ್ಯೆ ಗದ್ದಾಳಾಯೆಂತ್ ಬುಡೊನ್ ವೆತಾತ್. ಆಮ್ಚೆತೆಣೆಂ ಪ್ರತ್ಯೇಕ್ ಜಾವ್ನ್ ಆಯುಧ ಪೂಜಾ, ಅಂಗಡಿ ಪೂಜಾ ತಸಲ್ಯೊ ಪುಜಾ ಹಿಂದೂ ಧರ್ಮಿಕಾಂ ಪಾಳ್ತಾತ್ ತರ್ ಆಮಿ ಕಥೊಲಿಕಾಂ ಆಮ್ಚ್ಯಾ ವಾಹನಾಂ, ವಾವ್ರಾ ಹಾತೆರಾಂಚೆರ್ ಆಶೀರ್ವಾದ್ ಮಾಗ್ತಾಂವ್. ಪಾಟಾಪಾಟ್ ಹಿಂದೂ ಧರ್ಮಿಕಾಂಚ್ಯಾ ಫೆಸ್ತಾಂನಿ ಭಾಗ್ ಘೆಂವ್ಕ್ ಆಮ್ಕಾಂಯ್ ಆಪೊವ್ಣೆಂ ಮೆಳ್ತಾ. ಸೆಜಾರಿ, ಈಶ್ಟ್ ಆನಿ ಒಳ್ಕಿಚೆ ಮ್ಹಣೊನ್ ತಾಂಚ್ಯಾ ಸಂತೊಸಾಂತ್ ಆಮಿಯ್ ವಾಂಟೆಲಿ ಜಾತಾಂವ್. ಫೆಸ್ತಾ ವೆವೆಗ್ಳ್ಯಾ ಧರ್ಮಾಚಿಂ ತರೀ ಸಂತೊಸ್ ಸಕ್ಡಾಂಚೊ. ಆಚರಣಾಂ ವೆವೆಗ್ಳಿಂ ತರೀ ಸಂಭ್ರಮ್ ಧರ್ಮಾತೀತ್. ಹ್ಯಾ ಪಾಟ್‌ಥಳಾರ್ ಥೊಡೆ ವಿಶಯ್ ಹಾಂಗಾಸರ್ ಉಲ್ಲೇಖ್ ಕರ್‍ತಾಂ.  

ಬಾವಾಡ್ತಾನ್ ವಿಂಗಡ್, ಮನ್ಶಾಪಣಾನ್ ಏಕ್: ಕ್ರಿಸ್ತಾಂವ್ ಸಮಡ್ತಿಚಿ ಬುನ್ಯಾದ್ – ಎಕಾ ದೆವಾಥಂಯ್ ಪಾತ್ಯೆಣಿ (Monotheism) ಪುಣ್ ಹಿಂದೂ ಧರ್ಮಿಕ್ ಬಹುದೇವತಾವಾದ್ (polytheism) ಮಾನ್ತಾತ್. ವಿವಿಧ್ ಧರ್ಮಾಂನಿ ಪಾಳ್ಚ್ಯೊ ರಿತಿ ರಿವಾಜ್ಯೊ ವಿವಿಂಗಡ್ ತರೀ ಹಾಚ್ಯಾ ಪಾಟ್ಲೊ ಉದ್ದೇಶ್ – ದೆವಾಚೆಂ ಹಾಜಿರ್‍ಪಣ್ ಅನ್ಭೋಗ್ ಕರ್‍ಚೊ ಆನಿ ಸರ್ವ್ ದೆಣ್ಯಾಂಕ್ ಉಪ್ಕಾರ್ ಆಟೊಂವ್ಚೊ. ಕಸೊ ಆಮ್ಚೊ ಧರ್ಮ್ ವೆಗ್ಳೊಗೀ ತಶೆಂಚ್ ಆಮ್ಚ್ಯೊ ಭಾಸೊ ವೆಗ್ಳ್ಯೊ. ಪುಣ್ ಆಮಿ ಉಲೊಂವ್ಚ್ಯೊ ಭಾಸೊ ಆಮ್ಚ್ಯಾ ಧರ್ಮಾಚೊ ಸಂಕೇತ್ ನ್ಹಯ್, ಬದ್ಲಾಕ್ ಆಮ್ಚ್ಯಾ ಬಹುತ್ವಾಚಿ ನಿಶಾನಿ. ಧರ್ಮ್ ಆನಿ ಆನಿ ಭಾಸಾಂಚಿ ವೈವಿಧ್ಯತಾ ಆಸೊನ್‌ಯೀ ಆಜ್ ಸಾಂಗಾತಾ ಜಿಯೆತಾಂವ್ ತರ್ ಆಮ್ಚೆಮದ್ಲೊ ಮನ್ಶಾಮೋಗ್ ಹಾಕಾ ಕಾರಣ್.

ಚೌತೆಕ್ ಕಾಡ್ದಿನಾಲಾಚೊ ಸಂದೇಶ್: ಬೊವ್ಶಾ ಮ್ಹಜ್ಯೆ ಝಳ್ಕೆಕ್ ಆಯಿಲ್ಲೆಪರ್ಮಾಣೆಂ ಪಯ್ಲೆಪಾವ್ಟಿಂ ಗೊಂಂಯ್ಚ್ಯಾ ಕಾಡ್ದಿನಲಾನ್ ಅಖ್ಖ್ಯಾ ಗೊಂಯಾಂಕ್ ಪಾಂವ್ಚೆಬರಿ ಎಕಾ ದಿಸಾಳ್ಯಾರ್ ಹ್ಯಾ ಪಾವ್ಟಿಂ ಚೌತೆಕ್ ಪರ್ಗಟ್ ಉಲ್ಲಾಸ್ ಪಾಟಯ್ಲೆ. ತಾಚೊ ಸಾರಾಂಶ್: ‘ಗಣೇಶ್ ಚೌತೆಚ್ಯಾ ವರ್ತ್ಯಾ ದಿಸಾ ಆಧಾರಿ ಬಿಸ್ಪ್ ಸಿಮಾಂವ್ ಫೆರ್ನಾಂಡಿಸ್ ಆನಿ ಹ್ಯಾ ಮ್ಹಾದರ್ಮ್ ಪ್ರಾಂತ್ಯಾಚ್ಯಾ ಕಥೊಲಿಕ್ ಸಮುದಾಯಾ ಸಾಂಗಾತಾ ಹುನ್‌ಹುನಿತ್ ಆನಿ ಸಂತೊಸ್ಭರಿತ್ ಪರ್ಬಿ ಹರ್ ಹಿಂದೂ ಸಮುದಾಯಾಚ್ಯಾ ಲೊಕಾಂಕ್ ಪಾಟಯ್ತಾಂ. ಸಕ್ಕಡ್ ಅಡ್ಕಳ್ಯೊ ಪಯ್ಸ್ ಕರುಂಕ್, ಜಾಣ್ವಾಯೆನ್ ವಾಡುಂಕ್ ಆನಿ ಸ್ವಾಭಿಮಾನ್ ಜಿಯೆಂವ್ಕ್, ಸಗ್ಳ್ಯಾಂಕ್ ಮಾನ್ ಮೆಳೊಂಕ್, ಸಮಾಜಿಕ್, ಸಂಸ್ಕೃತಿಕ್ ಅಖಂಡತಾಯ್ ವಾಡೊಂಕ್, ಶಾಂತಿತೆವ್ಶಿಂ ವಾಟ್ ತಯಾರ್ ಕರುಂಕ್ ಹಿ ಪರಬ್ ಖೆರಿತ್ ಉಲೊ ದಿತಾ. ಇಂಡೊನೇಶ್ಯಾಂತ್ ಆಸ್ತಾನಾ ಪಾಪಾ ಫ್ರಾನ್ಸಿಸಾನ್ ವೆವಗ್ಳ್ಯಾ ಧರ್ಮಾಚ್ಯಾ ಫುಡಾರ್‍ಯಾಂಸಂಗಿ ಲಾಗ್ಶಿಲಾನ್ ಸಂವಾದ್ ಕರ್‍ತಾನಾ ಸಂಪ್ಯಾ ಭಾಶೆನ್ ಮ್ಹಳ್ಳಿ ಉತ್ರಾಂ ಉಗ್ಡಾಸ್ ಕರ್‍ಯಾಂ. “ಆಮಿ ಸಗ್ಳಿಂ ಭಾವ್ ಭಯ್ಣಿ, ಸಗ್ಳಿಂ ಯಾತ್ರಿಕ್, ಸಗ್ಳಿಂ ದೆವಾಸರ್ಶಿಂ ವೆಚ್ಯೆ ವಾಟೆರ್ ಆಮ್ಕಾಂ ಮೆಳ್ತಲಿಂ ದೆಕುನ್ ವೆಗ್ಳೆಂಪಣ್ ಪಯ್ಸ್ ಕರ್‍ಯಾಂ”. ಸದಾಂಚ್ ಆಮ್ಚ್ಯಾ ಭಾವ್ ಬಾಂದವ್ಪಣಾಚೊ ಎಕ್ವಟ್ ಘಟ್ ಕರುಂಕ್ ಆನಿ ತೊ ನವ್ಸರುಂಕ್ ತಶೆಂಚ್ ಹರ್ ಏಕ್ ವೆಕ್ತಿಕ್ ಮೋಲ್, ಮಾನ್ ದೀವ್ನ್, ಥಿರ್‌ಪಣಾಚೊ ರಾಶ್ಟ್ರ್ ಬಾಂದುನ್ ಹಾಡುಂಕ್ ಹೊ ಉತ್ಸವ್ ಆಮ್ಕಾಂ ಆಧಾರ್ ಜಾಂವ್ದಿ ಮ್ಹಳ್ಳಿ ಮ್ಹಜಿ ಆಶಾ’.

ಸಿಂಗಾಪುರಾಚ್ಯೆ ಭೆಟೆಂತ್ ಪಾಪಾ ಫ್ರಾನ್ಸಿಸಾಚೊ ಸಂದೇಶ್: ಸಪ್ಟೆಂಬರ್ 11-13, ಪಾಪಾ ಫ್ರಾನ್ಸಿಸಾನ್ ಸಿಂಗಾಪುರಾಕ್ ಭೆಟ್ ದಿಲ್ಲಿ. ಥಂಯ್ಸರ್ 2020 ವ್ಯೆ ಸರ್ವೇ ಪ್ರಕಾರ್ ಬುದ್ದಿಸಮ್ (31.1%),  ಕ್ರಿಸ್ತಾಂವ್ (18.9%), ಮುಸ್ಲಿಮ್ (15.6%), ಹಿಂದೂ (5%) ಆನಿ 20% ಹೆರ್ ಧರ್ಮಾಕ್ ಸೆರ್ವಾಲ್ಲೊ ಲೋಕ್ ಆಸಾ. 3,95,000 ಲೊಕಾಮದೆಂ 10% ಪ್ರಾಸ್ ಉಣೊ ಕ್ರಿಸ್ತಾಂವ್ ಲೋಕ್ ಆಸ್‌ಲ್ಲ್ಯಾ ತ್ಯಾ ದೆಶಾಂತ್ ಪಾಪಾ ಫ್ರಾನ್ಸಿಸಾನ್ ಪಯ್ಲ್ಯಾ ದಿಸಾ ಅಂತರ್‌ಧರ್ಮಿಯ್ ಸಂವಾದ್ ಯುವಜಣಾಂಸಂಗಿ ಚಲಯ್ಲೊ. ತಾಣಿಂ ಉಲ್ಲೇಖ್ ಕೆಲ್ಲಿಂ ಉತ್ರಾಂ, “ವಿವಿಧತೆನ್ ಭರ್‌ಲ್ಲ್ಯೆ ಸಮಾಜೆಂತ್ ಆಮ್ಚೆಥಂಯ್ ಮತ್‌ಭಿನ್ನತಾ ಆಸ್ಲ್ಯಾರೀ ಹೊ ಅಂತರ್ ಪಯ್ಸ್ ಕರ್‍ನ್ ಎಕಾಮೆಕಾ ಜೊಕ್ತೊ ಮಾನ್ ಆನಿ ಗವ್ರವ್ ದೀವ್ನ್ ಮನ್ಶಾಪಣ್ ಉಕ್ಲುನ್ ಧರಿಜೆ. ಸಕ್ಕಡ್ ಧರ್ಮ್ ದೆವಾಥಂಯ್ ಪಾವೊಂಕ್ ವಾಟ್. ವಿವಿಧ್ ಭಾಸೊ ದೈವಿಕ್ ವಿಶಯ್ ವೆಕ್ತ್ ಕರ್‍ತಾತ್. ಪುಣ್ ದೇವ್ ತೊ ಸರ್ವಾಂಚೊ ಆನಿ ಆಮಿ ಸರ್ವ್ ದೆವಾಚಿಂ ಭುರ್ಗಿಂ. ದೇವ್ ಎಕ್‌ಚ್ ತರೀ ಧರ್ಮ್ ಆಮಿ ವಿವಿಧ್ ಭಾಶೆಕ್ ಸರಿ ಕರ್‍ಯೆತ್ ಆನಿ ಹ್ಯೊ ಭಾಸೊ ಎಕಾಚ್ ದೆವಾ ಥಂಯ್ ಪಾವೊಂಕ್ ವಾಟ್ ದಾಕಯ್ತಾತ್”.

ಧರ್ಮಿಕ್ ಬಾಂದವ್ಪಣಾವಿಶಿಂ ಗೊವ್ಳಿ ಬಾಪಾಚೆಂ ‘ಬಂಧುತ್ವ’: ಆಜ್‌ಕಾಲ್ ಜಿಬೆಕ್ ಲಗಾಮ್ ನಾಸ್ತಾನಾ ಧರ್ಮಿಕ್ ಮುಕೆಲ್ಯಾಂನಿ ಆನ್ಯೆಕಾ ಧರ್ಮಾಕ್ ತುಕ್ಲಾವ್ನ್ ಉಲೊಂವ್ಚೆಂ, ಕಮೆಂಟ್ ಪಾಸ್ ಕರ್‍ಚೆ, ಭ್ಯೆಂ ಉಬ್ಜೊಂವ್ಚೆಂ, ಚಾಲೆಂಜ್ ಕರ್‍ನ್ ಪುರ್ಶಾಂವ್ ಕಾಡ್ಚೊ, ಜಾಳಿ ಜಾಗ್ಯಾಂನಿ ಆನಿ ಮಾದ್ಯಮಾಂನಿ ಲೊಕಾಮತಿಕ್ ವೀಕ್ ವಾಂಟ್ಚೆಂ ಕಾಮ್ ವೆವ್ಯಸ್ಥಿತ್ ಜಾವ್ನ್ ಆಸಾ. ಆಪ್ಲ್ಯಾ ಧರ್ಮಾವಿಶಿಂ ಬರೆಂ ವಿಚಾರ್ ಒಂಪ್ಚೆ ಸೊಡ್ನ್ ಧರ್ಮಾವಿರೋಧ್ ಚಿಂತ್ಪಾಂ ಆಶಾರ್ ಪಾಶಾರ್ ಜಾವ್ನ್‌ಚ್ ಆಸಾತ್. ಅಸಲ್ಯಾ ವಿಕಾಳ್ ಸಂದರ್ಭಾರ್ ಪರತ್ ಮಂಗ್ಳುರ್‍ಚ್ಯಾ ಗೊವ್ಳಿ ಬಾಪಾಂನಿ 2018  ವ್ಯಾ ವರ್‍ಸಾ ಉಲ್ಲೇಖ್ ಕೆಲ್ಲೊ ‘ಬಂಧುತ್ವ’ (ನಮ್ಮ ನಡುಟು ಉಪ್ಪುನ ಧರ್ಮೊದ ಗೋಡೆಲೆನ್ ಒಂತೆ ತಗ್ಗ್ ಮಲ್ತ್‌ದ್ ಮಾನವ ಧರ್ಮೊನು ಎತ್ತರ ಮಲ್ತ್‌ದ್ ನಮ ಮಾತೆರ್ಲ ಪ್ರೀತಿಡ್ ಒಟ್ಟುಗು ಉಪ್ಪುಗಾ) ಚಿಂತಪ್ ಮತಿಂತ್ ಧರ್‍ಯಾಂ. ಧರ್ಮಾಂಮದೆಂ ಝಗ್ಡೆಂ ಲಾವ್ನ್ ಶಾಂತಿ ಆಪ್ಣಾಂವ್ಕ್ ಅಸಾಧ್. ಹೆರ್ ಧರ್ಮಾಂಚ್ಯಾ ಸಂಭ್ರಮಾಂಕ್ ಹಾಜಿರ್ ಜಾತಾನಾ ತಾಂಚ್ಯಾ ರಿತಿ ರಿವಾಜಿಂಕ್ ಗವ್ರವ್ ದಿವ್ಯಾಂ. ಆಮ್ಚೆಥಾವ್ನ್ ಚುಕಿಚಿ ದೇಕ್ ವೆತಾ ತರ್ ತಸಲ್ಯಾ ರಿವಾಜಿಂನಿ ಭಾಗ್ ಘೆತನಾ ಚತ್ರಾಯ್ ಸಾಂಬಾಳ್ಯಾಂ.

ಹ್ಯಾ ಅಂಕ್ಯಾಂತ್ ಹ್ಯಾಚ್ ವಿಶಯಾಕ್ ಲಗ್ತಿ ಜಾಲ್ಲಿಂ ಬರ್‍ಪಾಂ ಆಸಾತ್. ವಾಚುನ್ ತುಮ್ಕಾಂ ಕಿತೆಂ ಭೊಗ್ತಾ ತೆಂ ಆಮ್ಕಾಂ ಕಳಯಾ. ಸಕಯ್ಲ್ ಕಮೆಂಟ್ ಕರಾ.

ಬಾಪ್ ಐವನ್ ಸೊಜ್, ಕಾರ್ಮೆಲಿತ್