ಪಾಟ್ಲ್ಯಾ ಸಗ್ಳ್ಯಾ ವರ್‍ಸಾ `ಭರ್ವಶಾಚಿಂ ಯಾತ್ರಿಕಾಂ’ ಮ್ಹಳ್ಳ್ಯಾ ಧ್ಯೇಯಾಖಾಲ್ ಜುಬ್ಲೆವಾಚೆಂ ವರಸ್ ಆಮಿ ಸಂಭ್ರಮ್ಲೆಂ. ಹ್ಯಾಚ್ ಮ್ಹಯ್ನ್ಯಾಚ್ಯೆ ೬ ತಾರಿಕೆರ್ ಜೆಜುಚ್ಯಾ ಆಪ್-ಪರ್ಗಟ್ಣೆಚ್ಯಾ ವಾ ತೆಗಾಂ ರಾಯಾಂಚ್ಯಾ ಫೆಸ್ತಾ ದಿಸಾ ರೊಮಾಚ್ಯಾ ಸಾಂ. ಪೆದ್ರುಚ್ಯೆ ಬಾಸಿಲಿಕಾಚೆಂ `ಪವಿತ್ರ್ ದಾರ್’ ಧಾಂಪುನ್ ಪಾಪ್ ಸಾಯ್ಬ್ ಜುಬ್ಲೆವ್ ಸಮಾಪ್ತ್ ಕರ್‍ತಾ. ಹ್ಯಾ ಜುಬ್ಲೆವ್ ವರ್‍ಸಾಚ್ಯೆ ಸಂಪ್ಣೆಕ್ ವಿಂಚ್ಲಲೊ ದೀಸ್ ಬೊವ್ ಅರ್ಥಾಭರಿತ್. ಕಿತ್ಯಾಕ್ ಸರ್ಗಾ- ಸಂಸಾರಾಚೊ ರಾಯ್ ಧರ್‍ತೆರ್ ಜಲ್ಮ್ ಘೆತಾನಾ ತಾಕಾ ನಮಾನ್ ಕರ್‍ಚ್ಯಾಕ್ ಲಾಂಬ್ ಪಯ್ಣ್ ಕರ್‍ನ್ ಆಯಿಲ್ಲೆ ಪಯಿಲ್ಲೆ ಯಾತ್ರಿಕ್ ಮ್ಹಳ್ಯಾರ್ ತೆ ಉದೆಂತಿಚೆ ಜ್ಯೋತಿಶಿ.

ಕೋಣ್ ಹೆ ಉದೆಂತಿಚೆ ಜ್ಯೋತಿಶಿ?

ಮಾತೆವಾಚ್ಯಾ ವಾಂಜೆಲಾಚ್ಯಾ ದುಸ್ರ್ಯಾ ಅಧ್ಯಾಯಾಂತ್ ಬಾಳೊಕ್ ಜೆಜುಕ್ ನಮಾನ್ ಕರುಂಕ್ ಯೆಂವ್ಚೆ ಉದೆಂತಿಚೆ ಜ್ಯೋತಿಶಿ ಪ್ರಸ್ತುತ್ ಕಾಳಾಚ್ಯಾ ಸಮ್ಜಣೆಬರಿ ನೆಕೆತ್ರಾಂ ಆನಿ ಗ್ರಹಾಂ ಪಳೆವ್ನ್ ಬೊಲ್ಮೆಂ ಸಾಂಗ್ಚೆತಸಲೆ ಜ್ಯೋತಿಶಿ ನ್ಹಯ್. ತೆ ಜ್ಯೋತಿಶ್ಯ್‌ಶಾಸ್ತ್ರ್, ತತ್ವ್‌ಶಾಸ್ತ್ರ್ ಆನಿ ವಿವಿಧ್ ಪವಿತ್ರ್ ಗ್ರಂಥಾವಯ್ರ್ ಗೂಂಡ್ ಶಿಕಪ್ ಜೊಡುನ್ ಜಾಣ್ವಾಯ್ ಜೊಡ್ಲಲೆ, ಪರ್ಶಿಯಾ, ಬಾಬಿಲೊನ್ ಆನಿ ಅರೇಬಿಯಾ ಗಾಂವಾಂಥಾವ್ನ್ ಆಯಿಲ್ಲೆ ಯಾಜಕಿ ವರ್ಗಾಚೆ ಮ್ಹಾನ್ ಮನಿಸ್. ಸಂಸಾರಾಕ್ ಯೇಂವ್ಕ್ ಆಸ್ಚ್ಯಾ ಮಹಾನ್ ರಾಯಾವಿಶಿಂ ಹ್ಯಾ ಜೆಂತಿಲ್ ಜಾಣ್ತ್ಯಾಂಕ್ ಎದೊಳ್‌ಚ್ ಆಸ್‌ಲ್ಲಿ ಜಾಣ್ವಾಯ್ ಆನಿ ತಾಣಿಂ ಪಳೆಲ್ಲೆಂ ತೆಂ ವಿಶೇಸ್ ನೆಕೆತ್ರ್ ಎಕಾಮೆಕಾಕ್ ತಾಳ್ ಪಡ್ತಾಲೆಂ ಜಾಲ್ಲ್ಯಾನ್ ತ್ಯಾ ರಾಯಾಕ್ ಭೆಟ್ಚ್ಯಾಕ್ ತೆ ಆಯ್ಲೆ. ತೆ ತೇಗ್‌ಚ್ ಜಣ್ ಆಸ್‌ಲ್ಲೆ ವಾ ತಾಚ್ಯಾಕೀ ಚಡ್ ಜಣಾಂಚೊ ಏಕ್ ಪಂಗಡ್ ಆಸ್‌ಲ್ಲೊ ಮ್ಹಳ್ಳೆಂ ವಾಂಜೆಲಾಂತ್ ಸ್ಪಶ್ಟ್ ನಾ. ಮಾತೆವ್ “ಉದೆಂತಿಥಾವ್ನ್ `ಥೊಡೆ’ ಜ್ಯೋತಿಶಿ ಜೆರುಜಲೆಮಾಕ್ ಆಯ್ಲೆ” (ಮಾತೆ ೨:೨) ಮ್ಹಣ್ ಬರಯ್ತಾ. ಪುಣ್ ಇಗರ್ಜ್‌ಮಾತಾ ಸಂಪ್ರದಾಯಿಕ್ ಜಾವ್ನ್ ತಾಣಿಂ ಹಾಡ್ಲಲ್ಯಾ ತೀನ್ ಕಾಣಿಕಾಂ ಲೆಕಾರ್ ತೆ ತೇಗ್ ಜಣ್ ಆಸ್‌ಲ್ಲೆ ಜಾವ್ಯೆತ್ ಮ್ಹಣ್ ಮಾಂದ್ತಾ. ಕ್ರಮೇಣ್ ತಾಂಚಿಂ ನಾಂವಾಂ ಕಾಸ್ಪರ್, ಮೆಲ್ಕಿಯೊರ್ ಆನಿ ಬಾಲ್ತಾಜಾರ್ ಮ್ಹಣ್ ವೊಲಾಯಿಲ್ಲಿಂ ಆಸಾತ್.

ಜ್ಯೋತಿಶಿಂಕ್ ಕ್ರೀಸ್ತಾಚ್ಯಾ ಜಲ್ಮಾವಿಶಿಂ ಕಳ್ಳೆಂ ಕಶೆಂ?

ನೆಕೆತ್ರಾಂ ಆನಿ ಗ್ರಹಾಂಚ್ಯಾ ಚಲನಾಚಿ ಸಮ್ಜೊಣಿ, ಪುರಾತನ್ ಪ್ರವಾದ್ಪಣಾಂ ಆನಿ ತಾಂಕಾಂ ಲಾಬ್ಲಲ್ಯೆ ದೈವಿಕ್ ಜಾಣ್ವಾಯೆಕ್ ಲಾಗೊನ್ ಹೆಂ ಘಡಿತ್ ತಾಣಿಂ ಸಮ್ಜೊನ್ ಘೆತ್ಲೆಂ. ತ್ಯಾ ಕಾಳಾರ್ ನೆಕೆತ್ರಾಂ ಆನಿ ಗ್ರಹಾಂಚ್ಯಾ ಚಲನಾಂಚೆರ್ ಹೊಂದ್ವೊನ್ ದೈವಿಕ್ ಸಂದೇಶ್ ಸಮ್ಜೊಂಚೆಂ ಗಿನ್ಯಾನ್ ಆಸ್‌ಲ್ಲೆಂ. ಹ್ಯಾ ಜ್ಯೋತಿಶಿಂನಿ ಹೆರಾಂ ನೆಕೆತ್ರಾಂಚ್ಯಾಕಿ ವೆಗ್ಳೆ ಗೂಣ್ ಆಸ್‌ಲ್ಲ್ಯಾ ಎಕಾ ವಿಶೇಸ್ ನೆಕೆತ್ರಾಕ್ ಪಳೆವ್ನ್ ಕಿತೆಂಗೀ ವಿಶೇಸ್ ಘಡ್ಚೆಂ ಆಸಾ ಮ್ಹಳ್ಳೆಂ ಸಮ್ಜೊನ್ ಘೆತ್ಲೆಂ. ತ್ಯಾ ಶಿವಾಯ್ ಜುದೆವ್ ಪ್ರವಾದ್ಯಾಂಚ್ಯಾ ಗ್ರಂಥಾಂನಿ, ಯೇಂವ್ಕ್ ಆಸ್ಚ್ಯಾ ಸೊಡ್ವೊಣ್ದಾರಾ ವಿಶ್ಯಾಂತ್ಲೆ ಪ್ರವಾದ್ ಜೆಂತಿಲ್ ವಿದ್ವಾನಾಂ ಮದೆಂಯ್ ಚಾಲ್ತೆರ್ ಆಸ್‌ಲ್ಲ್ಯಾನ್ ತಾಂಕಾಂ ಜುದೆವಾಂಚ್ಯಾ ರಾಯಾಚ್ಯಾ ಜಲ್ಮಾಚಿ ಖಬರ್ ಸಮ್ಜೊನ್ ಆಯ್ಲಿ ಜಾವ್ಯೆತ್. ಹಾಚೊ ಅರ್ಥ್ ಕಿತೆಂಗೀ ಮ್ಹಳ್ಯಾರ್ ಇಸ್ರಾಯೆಲಾಭಾಯ್ರ್‌ಯೀ ದೆವಾನ್ ತಾಕಾ ಸೊಧ್ತಲ್ಯಾಂಚಿಂ ಕಾಳ್ಜಾಂ ತಯಾರ್ ಕೆಲ್ಲಿಂ; ಅಶೆಂ ಸಂಸಾರಾಚ್ಯಾ ಸೊಡ್ವೊಣ್ದಾರಾಕ್ ಫಕತ್ ಇಸ್ರಾಯೆಲ್ ಮಾತ್ರ್ ನ್ಹಯ್ ಬಗಾರ್ ಸಗ್ಳೊ ಸಂಸಾರ್ ರಾಕೊನ್ ಆಸ್‌ಲ್ಲೊ.

ಸಂಸಾರಾಚ್ಯಾ ಹೆರ್ ಧರ್ಮಾಂನಿ ಆನಿ ಸಂಸ್ಕೃತೆಂನಿ ಯೇಂವ್ಕ್ ಆಸ್ಚ್ಯಾ ಸೊಡ್ವೊಣ್ದಾರಾವಿಶಿಂ ಕಿತೆಂಯ್ ಆಸಾ?

ವ್ಹಯ್ ಆಸಾ; ಪುಣ್ ಬೈಬಲಾಂತ್ ಆಸ್‌ಲ್ಲೆಬರಿ ನ್ಹಯ್. ದೆವಾನ್ ಸಂಸಾರಾಕ್ ಯೇವ್ನ್ ಮನ್ಶಾಕ್ ಸೊಡೊಂವ್ಕ್ ಜಾಯ್ ಮ್ಹಳ್ಳೆಂ, ಮನ್ಶಾನ್ ಪಾತಕ್ ಆಧಾರ್‍ಲಲ್ಯೆ ಘಡಿಯೆಚ್ ಠರಾಯ್ಲೆಂ. ಮನ್ಶಾಚ್ಯೆ ಪಯ್ಲ್ಯೆ ಪಡ್ಣೆಕ್ ಬೈಬಲಾಂತ್ ಸಾಂಗ್‌ಲ್ಲೆಬರಿ, ಆದಾಂವ್-ಎವೆಚ್ಯಾ ಪಾತ್ಕಾ ರುಪಾರ್ ಹೆರ್ ಧರ್ಮಾಂನಿ ಪಿಂತ್ರಾಂವ್ಕ್ ನಾ ತರೀ, ಚಡಾವತ್ ಪ್ರಾಚೀನ್ ಧರ್ಮಾಚ್ಯಾ ಗ್ರಂಥಾಂನಿ ಏಕ್ ಸತ್ ಸ್ಪಶ್ಟ್ ದಿಸೊನ್ ಯೆತಾ – `ಮನಿಸ್ ಸರ್ವ್ ರಿತಿನ್ ಸಂಪೂರ್ಣ್ ಆಸ್‌ಲ್ಲೊ ಏಕ್ ಕಾಳ್ ಆಸ್‌ಲ್ಲೊ, ಖಂಯ್ಚ್ಯೆಗೀ ಎಕೆ ಘಡಿಯೆ ಕಿತೆಂಗೀ ಘಡೊಂಕ್ ನ್ಹಜೊ ಜಾಲ್ಲೆಂ ಮನ್ಶಾಗಿನ್ಯಾನಾ ಆನಿ ಸ್ವಖುಶೆಕ್ ಲಾಗೊನ್ ಘಡ್ಲೆಂ; ಅಶೆಂ ಸಂಪೂರ್ಣಾಯ್ ತುಟ್ಲಿ ಆನಿ ಮನ್ಶಾಕುಳ್ ಘಾಯೆಲೆಂ. ತಿ ತುಟ್ಲಲಿ ಸಂಪೂರ್ಣಾಯ್ ಪರತ್ ಸಂಪೂರ್ಣ್ ಕರುಂಕ್ ಮನ್ಶಾವರ್ವಿಂ ಕೆದಿಂಚ್ ಸಾಧ್ ನಾ ದೆಕುನ್ ಎಕೆ ದೈವಿಕ್ ಸಕ್ತೆನ್ ಸಂಸಾರಾಕ್ ಯೇವ್ನ್ ತಿ ಪರತ್ ಸ್ಥಾಪಿತ್ ಕರಿಜೆ’. ಹೆಂಚ್ `ಮುಳಾವ್ಯಾ ಪಾತ್ಕಾಚೆಂ’ ಸತ್ ತಾಂಚ್ಯಾ ತಾಂಚ್ಯಾ ಸಂಸ್ಕೃತೆಂಚ್ಯಾ, ಆಚರಣಾಂಚ್ಯಾ ಆನಿ ತಾಣಿಂ ಸಂಸಾರ್ ಪಳೆಲ್ಲ್ಯೆ ನದ್ರೆನ್ ತಾಂಚ್ಯಾ ಪವಿತ್ರ್ ಗ್ರಂಥಾಂನಿ ಕಾಣಿಯಾರುಪಾಂನಿ ಬರೊವ್ನ್ ದವರ್‍ಲಾಂ ಆನಿ ಯೇಂವ್ಕ್ ಆಸ್ಚ್ಯಾ ತ್ಯಾ ದೈವಿಕ್ ರಾಯಾಕ್ ವಿವಿಧ್ ನಾಂವಾಂ ದಿಲ್ಯಾಂತ್. ಥೊಡೆ ಧಾಕ್ಲೆ ದಿಂವ್ಚೆ ತರ್ – ಸಾಕ್ರೆಟಿಸ್ (ದೈವಿಕ್ ಮೆಸ್ತ್ರಿ), ಪ್ಲೇಟೊ (ಲೊಗೊಸ್), ಜೊರಾಶ್ಟರ್ (ಸಾ‌ಒಶ್ಯಾಂತ್), ಹಿಂದೂ ಧರ್ಮ್ (ವಿಶ್ಣುಚೊ ಕಲ್ಕಿ ಅವತಾರ್), ಬುದ್ದಿಸಮ್ (ಮೈತ್ರೆಯ) ಅಶೆಂ ಪಟ್ಟಿ ಲಾಂಬತ್ತ್ ವೆತಾ. ಹೆ ಸಗ್ಳೆಂ ನಿಟ್ಟ್ ಜೆಜು ಕ್ರೀಸ್ತಾತೆವ್ಶಿನ್ ಬೋಟ್ ಜೊಕಿನಾ ತರೀ, ಸಗ್ಳೆಂ ಮನ್ಶಾಕುಳ್, ಆಪ್ಣಾಚೆ ಘಾಯ್ ಬಾಂದ್ತಲೊ, ಆಪ್ಣಾಕ್ ಸಂಪೂರ್ಣ್ ಕರ್‍ತಲೊ ಎಕ್ಲೊ ಯೆಂವ್ಚೊ ಆಸಾ ಮ್ಹಣ್ ರಾಕೊನ್ ಆಸ್‌ಲ್ಲೆಂ ಮ್ಹಳ್ಳೆಂ ಸ್ಪಶ್ಟ್ ಕರ್‍ತಾ. ಹೆಂ ಮನಾಂತ್ ಧರ್‍ನ್ ದುಸ್ರಿ ವಾತಿಕನ್ ಸಭಾ ಆಪ್ಲ್ಯಾ ನೋಸ್ತ್ರಾ ಎತಾತೆ (Nostra Aetate) ಮ್ಹಳ್ಳ್ಯಾ ದಸ್ತಾವೆಜಾಂತ್ ಸಾಂಗ್ತಾ ಕೀ: “ಜೆಂ ಕಿತೆಂ ದುಸ್ರ್ಯಾ ಧರ್ಮಾಂನಿ ಸತ್ ಆನಿ ಪವಿತ್ರ್ ಆಸಾ ತೆಂ ಕಸಲೆಂಚ್ ಕಥೊಲಿಕ್ ಇಗರ್ಜ್‌ಮಾತಾ ತಿರಸ್ಕಾರ್ ಕರಿನಾ”. ಹ್ಯಾ ಆಧಾರಾರ್ ಏಕ್ ಸಂಗತ್ ಆಮ್ಕಾಂ ಗಮ್ತಾ: ಜೆಜು ಫಕತ್ ಆಪ್ಲ್ಯಾ ಪಾಟ್ಲಾವ್ದಾರಾಂಚೊ ಸೊಡ್ವೊಣ್ದಾರ್ ಮಾತ್ರ್ ನ್ಹಯ್, ಬಗಾರ್ ತೊ ಸೊಡ್ವೊಣ್ದಾರ್ ಸಗ್ಳ್ಯಾ ವಿಶ್ವಾಚೊ (Redeemer of the Universe).

ಜ್ಯೋತಿಶಿಂನಿ ಹಾಡ್ಲಲ್ಯಾ ಕಾಣಿಕೆಂಚೊ ಅರ್ಥ್ ಕಿತೆಂ?

ಭಾಂಗಾರ್: ಜೆಜುಚೆಂ ರಾಯ್ಪಣ್ – ರಾಯಾಂಚೊ ರಾಯ್‌ಮ್ಹಳ್ಳ್ಯಾಚೊ ಗ್ಹುರ್ತ್.

ಧುಂಪ್: ಜೆಜುಚೆಂ ದೇವ್ಪಣ್ – ಧುಂಪ್ ತೆಂಪ್ಲಾಂತ್ಲ್ಯಾ ಆರಾಧಾನಾ ವೆಳಾರ್ ವಾಪಾರ್‍ಚಿ ಪ್ರಮುಕ್ ವಸ್ತ್ – ಹೊ ದೇವ್ ಬಾಳ್ಕಾಕ್ ಸರ್ವ್ ಆರಾಧನ್ ಫಾವೊ ಮ್ಹಳ್ಳ್ಯಾಚೊ ಗ್ಹುರ್ತ್.

ರಗ್ತಾಂಬೊಳ್: ಜೆಜುಚೆಂ ಮರಣ್ – ರಗ್ತಾಂಬೊಳ್ ಏಕ್ ಸುಗಂಧ್ ದ್ರವ್ಯ್ (aromatic substance), ಮುಳಾವ್ಯಾನ್ ಆಫ್ರಿಕಾ ಆನಿ ಅರೇಬಿಯಾಚ್ಯಾ `ಕೊಮ್ಮಿಫೊರಾ ಮಿರ್ರಾ’ (Commiphora myrrha) ಮ್ಹಳ್ಳ್ಯಾ ರುಕಾಥಾವ್ನ್ ಕಾಡ್ಚೆಂ. ಮೆಲ್ಲ್ಯೊ ಕುಡಿ ನಿಕೆಪುಂಚ್ಯಾ ಪಯ್ಲೆಂ ಅಸಲ್ಯಾ ಸುಗಂಧ್ ದ್ರವ್ಯಾಂನಿ ಮಾಖ್ತಾಲೆ. ಜೆಜುಕ್ ನಿಕೆಪುಂಚ್ಯಾ ಪಯ್ಲೆಂ ನಿಕೊದೆಮ್, ರಗ್ತಾಂಬೊಳ್ ಆನಿ ಲೊಳಿಸರ್ ಭರ್‍ಸುನ್ ಕೆಲ್ಲಿ ತೀಸ್ ಕಿಲೊ ತಿತ್ಲಿ ಮಿಸ್ಳವ್ಣಿ ಘೆವ್ನ್ ಆಯಿಲ್ಲೊ ಮ್ಹಣ್ ಜುವಾಂವ್ ಉಲ್ಲೇಖ್ ಕರ್‍ತಾ (ಜುವಾ ೧೯:೩೯).

ಹ್ಯೊ ತಿನೀ ಕಾಣಿಕೊ ಸಾಂಗಾತಾ ಜೆಜು ರಾಯ್, ದೇವ್ ಆನಿ ಸೊಡ್ವೊಣ್ದಾರ್ ಮ್ಹಳ್ಳೆಂ ಸ್ಪಶ್ಟ್  ಕರ್‍ತಾತ್.

ತೆಗಾಂ ರಾಯಾಂಚೆಂ ಫೆಸ್ತ್ ಆನಿ ಜೆಜುಚಿ ಆಪ್-ಪರ್ಗಟ್ಣಿ ಕಿತ್ಯಾಕ್ ಮಿಸ್ಳಾಯ್ಲ್ಯಾ?

ಜೆಜುಚ್ಯಾ ಆಪ್-ಪರ್ಗಟ್ಣೆಚ್ಯಾ ಫೆಸ್ತಾಕ್ ಇಂಗ್ಲಿಶಾಂತ್ Epiphany ಮ್ಹಣ್ತಾತ್. ಹೊ ಸಬ್ದ್ `ಎಪಿಫಾನೆಯ’ ಮ್ಹಳ್ಳ್ಯಾ ಗ್ರೇಕ್ ಭಾಶೆಚ್ಯಾ ಸಬ್ದಾಥಾವ್ನ್ ಯೆತಾ; ತಾಚೊ ಅರ್ಥ್ `ಪರ್ಗಟ್ಣಿ ವಾ ದರ್ಶನ್’ – ಹೆಂ ಕ್ರೀಸ್ತಾಚೆಂ, ಸಂಸಾರಾಕ್ ಆನಿ ವಿಶೇಸ್ ರಿತಿನ್ ಜೆಂತಿಲಾಂಕ್ ಆಪ್ಣಾಚಿಚ್ ದಾಕೊವ್ಣಿ ಮ್ಹಣ್ ಜಾತಾ. ಜುದೆವ್ ನ್ಹಯ್ ಆಸ್ಲಲ್ಯಾ ಜ್ಯೋತಿಶಿಂನಿ ಜುದೆವಾಂಫುಡೆಂ ಜೆಜುಚೆಂ ದೈವಿಕ್ ರಾಯ್ಪಣ್ ಮಾಂದುನ್ ಘೆತ್ಲೆಂ. ಅಶೆಂ ಜೆಜು ಹರ್‍ಯೆಕಾ ಜನಾಂಗಾನ್, ಧರ್ಮಾನ್ ಆನಿ ಸಂಸ್ಕೃತೆನ್ ರಾಕೊನ್ ಆಸ್‌ಲ್ಲೊ, ಹೊಗ್ಡಾಯ್ಲಲಿ ಶಾಂತಿ ಆನಿ ಸಂಪೂರ್ಣಾಯ್ ಪುನರ್‌ಸ್ಥಾಪಿತ್ ಕರ್‍ಚೊ ತೊಚ್ ರಾಯ್ ಮ್ಹಣ್ ತಾಂಚ್ಯಾ ಪಯ್ಣಾನ್ ಪಾಚಾರ್‍ಲೆಂ.

ಚವ್ತ್ಯಾ ರಾಯಾಚಿ ಕಾಣಿ ಆಯ್ಕಾಲ್ಯಾಗೀ?

ಬಾಳ್ಕಾ ಜೆಜುಕ್ ನಮಾನ್ ಕರುಂಕ್ ಯೆತಾನಾ ವಾಟ್ ಚುಕೊನ್ ಗೆಲ್ಲ್ಯಾ ಚವ್ತ್ಯಾ ಜ್ಯೋತಿಶಿಚಿ ಕಾಣಿ ಏಕ್ ಆಸಾ. ಹೊ ಚವ್ತೊ ಜ್ಯೋತಿಶಿ ತಾಚ್ಯೆ ಕಾಣಿಕೆಸವೆಂ ಬಾಳ್ಕಾಕ್ ನಮಾನ್ ಕರುಂಕ್ ಭಾಯ್ರ್ ಸರ್‍ತಾ. ಪುಣ್ ವಾಟೆರ್ ಜಾಯ್ತ್ಯಾ ದುಬ್ಳ್ಯಾ-ಧಾಕ್ಟ್ಯಾಂಕ್ ಆನಿ ಆಧಾರಾಚಿ ಗರ್ಜ್ ಆಸ್‌ಲ್ಲ್ಯಾಂಕ್ ಪಳೆತಾ ಆನಿ ತಾಂಚ್ಯಾ ಆಧಾರಾಕ್ ತೊ ಪಾವ್ತಾ. ಅಶೆಂ ದುಬ್ಳ್ಯಾಂಚಿ ಸೆವಾ ಕರ್‍ನ್ ವರ್‍ಸಾಂ ಪಾಶಾರ್ ಜಾಲ್ಲಿಂಚ್ ತಾಕಾ ಕಳಾನಾಂತ್. ತರೀ ರಾಯಾಂಚ್ಯಾ ರಾಯಾಕ್ ನಮಾನ್ ಕರಿಜೆ ಮ್ಹಳ್ಳೆಂ ತೊ ಕೆದಿಂಚ್ ವಿಸ್ರಾನಾ. ಅಶೆಂ ವೇಳ್ ಕರ್‍ನ್ ತರೀ ತೊ ಪಾವ್ತಾನಾ ಸೊಮಿ ತಾಕಾ ಮೆಳ್ತಾ; ನ್ಹಯ್ ಖಾವ್ಣೆರ್, ಬಗಾರ್ ಖುರ್‍ಸಾರ್. ಅಶೆಂ ತಾಣೆಂ ಹಾಡ್ಲಲ್ಯೊ ಕಾಣಿಕೊ ತೊ ಖುರ್‍ಸಾಮುಳಿಂ ಅರ್ಪಿತಾ.

ಹಿ ಏಕ್ ಅತ್ಮೀಕ್ ನಿಯಾಳಾಕ್ ಆಧಾರ್ ದಿಂವ್ಚಿ ಕಾಣಿ ಶಿವಾಯ್ ಆಪೊಸ್ತಲಿಕ್ ಸಂಪ್ರದಾಯಾಂತ್ ಜಾಂವ್, ಇಗರ್ಜ್‌ಮಾತೆಚ್ಯಾ ಸುರ್‍ವಿಲ್ಯಾ ಬಾಪಾಂಚ್ಯಾ ಬರ್‍ಪಾಂನಿ ಜಾಂವ್ ದಿಸೊನ್ ಯೇನಾ. ತೆರಾವ್ಯಾ ಥಾವ್ನ್ ಸೊಳಾವ್ಯಾ ಶೆಕ್ಡ್ಯಾಚ್ಯಾ ಕಾಳಾರ್ ಹಿ ಕಾಣಿ ಚಾಲ್ತೆರ್ ಆಯ್ಲಿ ಮ್ಹಳ್ಳಿ ಸಮ್ಜೊಣಿ ಆಸಾ. ಪುಣ್ ೧೮೯೫ ವ್ಯೆ ಇಸ್ವೆಂತ್ ವಾನ್ ಡೈಕ್ ಮ್ಹಳ್ಳ್ಯಾ ಎಕಾ ದೇವ್‌ಶಾಸ್ತ್ರಿನ್ ಹಿ ಕಾಣಿ ಸಾರ್ಕಿ ಬರಯ್ಲಿ ಆನಿ ತ್ಯಾ ಚವ್ತ್ಯಾ ಜ್ಯೋತಿಶಿಕ್ `ಅರ್‍ತಾಬಾನ್’ ಮ್ಹಣ್ ನಾಂವ್ ದಿಲೆಂ. ಹ್ಯೆ ಕಾಣಿಯೆಚೊ ತೀರ್‍ಲ್ ಕಿತೆಂಗೀ ಮ್ಹಳ್ಯಾರ್ – `ಮೋಗ್‌ಚ್ ನೀಜ್ ಆರಾಧನ್, ಮೊಗಾನ್ ಕೆಲ್ಲೆಂ ಲ್ಹಾನಾಂತ್ಲೆ ಲ್ಹಾನ್ ಕಾಮ್ ಸಯ್ತ್ ಸೊಮಿಯಾ ಸಮೊರ್ ಪಾವ್ತಾ. ಜೆಜು ದುಬ್ಳೊ ಜಾವ್ನ್ ಜಲ್ಮಾಲೊ, ಜಿಯೆಲೊ. ದೆಕುನ್ ದುಬ್ಳ್ಯಾಂಚೊ ಹುಸ್ಕೊ ಆಸ್‌ಲ್ಲೊ ಮನಿಸ್ ವೇಳ್ ಕರ್‍ನ್ ಆಯ್ಲ್ಯಾರೀ ತೊ ತಾಕಾ ಮೆಳ್ತಾಚ್’.

ಹೆ ಜ್ಯೋತಿಶಿ ಪ್ರಸ್ತುತ್ ಕಾಳಾಕ್ ಕಿತೆಂ ಶಿಕಯ್ತಾತ್?

ಪ್ರಸ್ತುತ್ ಕಾಳಾರ್ ಸಂಸಾರ್‌ಭರ್ ಜಾತ್, ಧರ್ಮ್, ಅಧಿಕಾರ್, ಗ್ರೇಸ್ತ್‌ಕಾಯ್, ರಾಷ್ಟ್ರೀಯ್‌ವಾದ್ ಮ್ಹಣ್ ತುಟಾಫುಟ್ ಆಸ್ಲ್ಯಾರೀ ಸೊಮಿಯಾಚೊ ಉಜ್ವಾಡ್ ಹ್ಯೊ ಸರ್ವ್ ಗಡಿ ಮೆರೊ ಉತ್ರೊನ್ ವೆತಾ ಮ್ಹಣ್ ತೆ ಶಿಕಯ್ತಾತ್. ಸಾಂಗಾತಾಚ್ ಆಮಾಂ ಕ್ರಿಸ್ತಾಂವಾಂಕ್ ಕೊಣೀ ಮನಿಸ್ ತೊ ಜಾಂವ್, ಖಂಯ್ಚ್ಯಾಯ್ ಧರ್ಮಾಚೊ, ಗಾಂವಾಚೊ ತೊ ಜಾಂವ್, ದುಬ್ಳೊ ವಾ ಪಿಡೇಸ್ತ್ ಜಾಂವ್ ಹರ್‍ಯೆಕಾ ಮನ್ಶಾಥಂಯ್ ಕ್ರೀಸ್ತಾಚೆಂ ರುಪ್ಣೆಂ ಪಳೆವ್ನ್ ಹರ್‍ಯೆಕ್ಲ್ಯಾಥಂಯ್ ಉದಾರ್ ಜಾಂವ್ಕ್ ಆಪಯ್ತಾತ್. ಭೊಂವ್ತಣಿ ಅಂಧ್ಕಾರ್ ತರೀ ನೆಕೆತ್ರಾಚೆರ್ ದೀಶ್ಟ್ ಖಂಚೊವ್ನ್ ಶೆವೊಟಾಕ್ ಪಾವಜೆಚ್ ಮ್ಹಳ್ಳಿ ಥಿರಾಸಾಣ್ ಆಸ್ಲ್ಯಾರ್ ದೇವ್ ವಾಟ್ ದಾಕಯ್ತಾಚ್ ಮ್ಹಣ್ ತಾಣಿಂ ಘೆತ್‌ಲ್ಲೆಂ ಪಯ್ಣ್ ಆಮ್ಕಾಂ ದಾಕೊವ್ನ್ ದಿತಾ.

ಸಮಾಪ್ತ್

ಹೆ ಉದೆಂತಿಚೆ ಜ್ಯೋತಿಶಿ ಆಮ್ಚ್ಯಾ ಭಾವಾಡ್ತಾಚೊ ನೀಜ್ ಅರ್ಥ್ ಆಮ್ಕಾಂ ಶಿಕಯ್ತಾತ್. ಭಾವಾಡ್ತ್ ಮ್ಹಳ್ಯಾರ್ ದೆವಾನ್ ಆಪ್ಲ್ಯಾ ಉದಾರ್‍ಪಣಾನ್ ದಿಲ್ಲೆಂ ತೆಂ ದೆಣೆಂ ಘೆವ್ನ್ ವೊಗೊಚ್ ಬಸ್ಚೆಂ ನ್ಹಯ್. ಬಗಾರ್ ತ್ಯಾ ದೆಣ್ಯಾಚ್ಯಾ ಉಜ್ವಾಡಾನ್ ಆನಿ ಆಮ್ಕಾಂ ದಿಲ್ಲಿ ಸಮ್ಜೊಣಿ, ಗಿನ್ಯಾನ್ ಆನಿ ಹೆರ್ ದೆಣ್ಯಾಂಚ್ಯಾ ಆಧಾರಾನ್ ಆಮ್ಚ್ಯಾ ಸೊಮಿಯಾಕ್ ಸೊಧುಂಕ್, ತಾಕಾ ಮೆಳೊಂಕ್ ಆನಿ ನೀಜ್ ಮೊಗಾನ್ ತಯಾರ್ ಕೆಲ್ಲ್ಯೊ ಕಾಣಿಕೊ, ಲ್ಹಾನ್ ತರೀ ಸೊಮಿಯಾಕ್ ಅರ್ಪುಂಕ್ ಪ್ರಯತನ್ ಕರ್‍ಚೆಂ. ಭರ್ವಶಾಚಿಂ ಯಾತ್ರಿಕಾಂ ಆಮಿ ತೆಗಾಂ ರಾಯಾಂಚ್ಯಾ ಫೆಸ್ತಾ ದಿಸಾ ಜುಬ್ಲೆವಾಚೆಂ ವರಸ್ ಸಂಪಯ್ತಾನಾ ಆಮ್ಚೆಂ ಯಾತ್ರಿಕ್ ಪಯ್ಣ್ ಸಂಪೊಂವ್ಚೆಂ ನಾಕಾ. ಎದೊಳ್ ಪಾವ್‌ಲ್ಲೆಂ ಏಕ್ ನಿಲ್ದಾಣ್ ಮ್ಹಳ್ಳೆಂ ಸಮ್ಜೊನ್ ಭಾವಾಡ್ತಾಚ್ಯಾ ಪಯ್ಣಾಚ್ಯಾ ಮುಕ್ಲ್ಯಾ ನಿಲ್ದಾಣಾತೆವ್ಶಿನ್ ಚಮ್ಕೊವ್ಯಾಂ

ಫ್ರಾದ್ ಆರನ್ ಬಬುಶ್, ಕಾರ್ಮೆಲಿತ್