📰 ದಕ್ಷಿಣ್ ಕೇರಳಚಾ ಕೋಥಮಂಗಳಂ ದಿಯೆಸೆಜಿಚ್ಯಾ ನಿರ್ಮಲ ಕೊಲೆಜಿಂತ್ ಸುಕ್ರಾರಾಚೆಂ ಮಾಗ್ಣ್ಯಾಚ್ಯಾ ಕುಡಾಂತ್ ಮುಸ್ಲಿಮ್ ವಿದ್ಯಾರ್ಥಿಂಕ್ ನಮಾಜ್ ಕರುಂಕ್ ಆವ್ಕಾಸ್ ಇನ್ಕಾರ್ ಕೆಲ್ಲ್ಯಾಕ್ ಚಲಿಯಾಂ ವಿದ್ಯಾರ್ಥಿಂನಿ ಪ್ರತಿಭಟನ್ ಕೆಲ್ಲೆಂ ಘಡಿತ್ ಉಗ್ತಾಡಾಕ್ ಆಯ್ಲಾಂ. ನಮಾಜ್ ಕರ್‍ನ್ ಆಸ್ಲೆಲ್ಯಾಂಕ್ ಕೊಲೆಜ್ ಆಡಳ್ತ್ಯಾನ್ ಆಡಯ್ಲೆಂ ಮ್ಹಳ್ಳೊ ಆರೋಪ್ ತಾಂಚೆರ್ ಮಾಂಡ್ಲಾ.

ಮುಸ್ಲಿಮ್ ಚಲಿಯಾಂ ವಿದ್ಯಾರ್ಥಿಂಕ್ ಸ್ಥಳೀಯ್ ಪಳ್ಳೆಕ್ ವಚೊನ್ ನಮಾಜ್ ಕರುಂಕ್ ಆವ್ಕಾಸ್ ನಾತ್’ಲ್ಲ್ಯಾನ್ ಸುಕ್ರಾರಾಚೆಂ ಕೊಲೆಜಿಂತ್’ಚ್ ಆವ್ಕಾಸ್ ಕರ್‍ನ್ ದೀಜೆ ಮ್ಹಣ್ ವಿನಂತಿ ಕೆಲ್ಲಿ. ’72 ವರ್ಸಾಂಚ್ಯಾ ಕೊಲೆಜಿಚ್ಯಾ ಇತಿಹಾಸಾಂತ್ ಅಸಲಿ ರಿವಾಜ್ ನಾತ್ಲಲ್ಯಾನ್ ಕಸಲಿಯ್ ನವಿ ರಿವಾಜ್ ಸುರು ಕರುಂಕ್ ಸಾಧ್ ನಾ’ ಮ್ಹಣ್ ಎ. ಜೆ. ಇಮ್ಮಾನುಯೆಲಾನ್ ಪರ್ವಣ್ಗಿ ಇನ್ಕಾರ್ ಕೆಲ್ಲಿ.

ಹೊ ವಿಶಯ್ ಭಾಯ್ರ್ ವಚೊನ್ ಕೊಲೆಜಿ ವಿರೋಧ್ ಭಾಯ್ಲ್ಯಾ ಸಂಘಟನಾಂನಿ ಆನಿ ವಿದ್ಯಾರ್ಥಿಂನಿ ಸಾಂಗಾತಾ  ಮೆಳೊನ್ ಆತಾಂ ಘುಟ್ಮಳ್ ಚಲಯ್ಲ್ಯಾ. ಕ್ರಿಸ್ತಾಂವಾಂ ವಿರೋಧ್ ಹಿ ಏಕ್ ವ್ಯವಸ್ಥಿತ್ ಫಿತೂರಿ’ ಮ್ಹಣ್ ಸಿರೋ ಮಲಬಾರ್ ಬಿಸ್ಪ್ ಥಾಮಸ್ ಥರಾಯಿಲಾನ್ ಬೆಜಾರಾಯ್ ಉಚಾರ್‍ಲ್ಯಾ.

ಕೇರಳಾಂತ್ 18% ಕ್ರಿಸ್ತಾಂವ್ ಆಸಾತ್. ಕ್ರಿಸ್ತಾಂವಾಬರಿ ಮುಸ್ಲಿಮ್ ಲೋಕ್’ಯೀ ಅಲ್ಪ್ ಸಂಖ್ಯಾತ್. ತರೀ ’ನಮಾಜ್’ ವಿಶಯ್ ಹಿಂಸಾತ್ಮಕ್ ಜಾಯ್ತ್ ದೆಕುನ್ ಸರ್ಕಾರಾನ್ ಸೂಕ್ತ್ ರಕ್ಶಣ್ ದೀಜೆ ಮ್ಹಣ್ ರಾಜ್ಯ್ ಸರ್ಕಾರಾಕ್ ಕೊಲೆಜ್ ಆಡಳ್ತ್ಯಾನ್ ವಿನತಿ ಕೆಲ್ಯಾ.

’ಮುಸ್ಲಿಮ್ ಸಮುದಾಯಾಂತ್ ಪಳ್ಳೆಂತ್ ಚಲಿಯಾಂಕ್ ನಮಾಜ್ ಕರುಂಕ್ ಆವ್ಕಾಸ್ ನಾ ತರ್ ಕೊಲೆಜಿಚ್ಯಾ ಆಡಳ್ತ್ಯಾಕ್ ಕಿತ್ಯಾಕ್ ಗುನ್ಯಾಂವ್ಕಾರ್ ಕರಿಜೆ? ಶಿಕ್ಪಾ ಸಂಸ್ಥ್ಯಾಂತ್ ಎದೊಳ್ ನಾತ್’ಲ್ಲಿ ರಿವಾಜ್ ಆತಾಂ ಜಾಯ್ ಮ್ಹಣ್ಚ್ಯಾಂತ್ ಕಿತೆಂ ಹುನ್ನಾರ್ ಆಸಾ?” ಮ್ಹಣ್ ಸ್ಥಳೀಯ್ ರಾಜಕೀಯ್ ಪಾಡ್ತಿಂನಿ ಸವಾಲ್ ಕೆಲಾಂ.