ತ್ಯಾ ಬುಕಾಂತ್ಲೆಂ ಇಲ್ಲೆಂ ಚೋರ್‍ನ್, ಹ್ಯಾ ಬುಕಾಂತ್ಲೆಂ ಇಲ್ಲೆಂ ಫಾರ್‍ನ್ ನವಿಚ್ ಕಾಣಿ ಬರಂವ್ಚ್ಯಾ ಸಿಕೇರಾಮಾಚ್ಯೆ ಮತಿಂತ್ ಏಕ್ ನವಿಚ್ ಐಡಿಯಾ ಉದೆಲಿ. ದೆಕುನ್ ತಾಣೆಂ ಫಿರ್ಗಜೆಂತ್ಲ್ಯಾ ಮೊಂತಿ ಸಾಯ್ಭಿಣಿಕ್ ಚೋರ್‍ನ್ ಆನಿ ವಾಡ್ಯಾಂತ್ಲ್ಯಾ ಫೆಸ್ತಾಕ್ ಫಾರ್‍ನ್ ‘ವಾಡ್ಯಾಂತ್ಲೆಂ ಮೊಂತಿ ಫೆಸ್ತ್’ ಮ್ಹಣ್ ನವೆಂಚ್ ನಾಂವ್ ದೀವ್ನ್ ಎದೊಳ್ ವರೇಗ್ ಕುಟ್ಮಾಕ್ ಬಾಂಧುನ್ ಹಾಡ್‌ಲ್ಲ್ಯಾ ಮೊಂತಿ ಫೆಸ್ತಾಕ್ ವಾಡೊ ಬಾಂಧ್ಚೆಂ ನವೆಂ ಕಾಮ್ ದಿಲೆಂ; ಮ್ಹಣ್ಜೆ ಹ್ಯಾ ಪಾವ್ಟಿಂ ವಾಡ್ಯಾಂತ್ ಮೊಂತಿ ಫೆಸ್ತ್ ಕರಿಜೆ ಮ್ಹಣ್ ಸಿಕೇರಾಮಾಚ್ಯಾ ಮತಿಂತ್ ನವೆಂ ಬೆಳೆಂ ಉದೆಲೆಂ. ಕುಟ್ಮಾಂ ಕಶಿಂಯ್ ದಿಸಾನ್‌ದೀಸ್ ಬಿಸುಡ್ನ್ ವೆತಾತ್. ಹಾಂಚ್ಯೆ ಮಧೆಂ ವಾಡೊ ಪಯ್ಸ್ ಪಯ್ಸ್ ಜಾಂವ್ಚೊ ನಾಕಾ ಮ್ಹಳ್ಳೊ ಇರಾದೊ ಸಿಕೇರಾಮಾಚೊ ಆಸ್ಯೆತ್. ದೆಕುನ್ ಹ್ಯಾ ಪಾವ್ಟಿಂ ವಾಡ್ಯಾ ಲೆವೆಲಾರ್ ಮೊಂತಿ ಫೆಸ್ತ್ ಆಚರಣ್ ಕರ್‍ಚಿ ಆಲೋಚನ್ ಸಿಕೇರಾಮಾಚಿ. ತಶೆಂ ತೊ ಕಾಂಯ್ ಸಾಯ್ಭಿಣಿಚೊ ವ್ಹಡ್ಲೊ ಭಕ್ತ್ ನ್ಹಯ್. ತೆಂ ಕಿತೆಂಗೀ ಮ್ಹಳ್ಯಾರ್ ಸದಾಂನೀತ್ ಆಪ್ಣಾಚ್ಯೆಚ್ ‘ಬೋರ್’ಯೆ ಕಡೆನ್ ಉಲವ್ನ್ ಉಲವ್ನ್ ಸಿಕೇರಾಮ್ ರಾಂದ್ವಯ್ ಬೆಳ್ಶೆಲ್ಲ್ಯಾಬರಿ ಬೆಳ್ಶೆಲ್ಲೊ. ದೆಕುನ್ ಫೆಸ್ತ್ ಫಕತ್ ಏಕ್ ನೀಬ್. ತ್ಯಾ ಭಾಯ್ರ್ ತಾಂಚ್ಯಾ ವಿಶಾಲ್ ವಾಡ್ಯಾಂತ್ ನವಿಂ ನವಿಂ ಘರಾಂ ಆನಿ ಕುಟ್ಮಾಂ ಆಯಿಲ್ಲಿಂ. ಮಾತ್ರ್ ನ್ಹಯ್ ತ್ಯಾ ಕುಟ್ಮಾಂತ್ ಸೊಭಿತ್ ಸುಂದರ್ ‘ಬೊರಿ’ಯೊ ಆಸಾತ್ ಮ್ಹಳ್ಳಿ ಖಬರ್ ಸಿಕೇರಾಮಾಕ್ ಮೆಳ್‌ಲ್ಲಿ. ದೆಕುನ್ ತ್ಯಾ ಬೊರಿಯಾಂಕ್ ಭೆಟ್ಚ್ಯಾ ಆನಿ ತಾಂಚೆಲಾಗಿಂ ಸಳಾವಳ್ ಕರ್‍ಚ್ಯಾ ಉದ್ದೇಶಾನ್ ಸಿಕೇರಾಮಾನ್ ಮೊಂತಿಫೆಸ್ತಾಕ್ ಫಿರ್ಗಜೆಂತ್ ಥಾವ್ನ್ ಹಾಡ್ನ್ ವಾಡ್ಯಾಂತ್ ಚಿಡ್ಕಾಯಿಲ್ಲೆಂ.

ವಾಡ್ಯಾಂತ್ ಮೊಂತಿಫೆಸ್ತ್ ಕರ್‍ಯೆತ್. ಪೂಣ್ ತಾಕಾ ಆಸಾತ್ ದೋನ್ಂಚ್ ಅಡ್ಕಳ್ಯೊ. ಪಯ್ಲೆಂ ಸೊರ್‍ಪಾನ್ ಏವೆಕ್ ನಾಡ್‌ಲ್ಲ್ಯಾಬರಿ ಗುರ್ಕಾರಾಚ್ಯಾ ಕಾನಾಂತ್ ನಾಡ್ಚೆಂ ಆನಿ ದುಸ್ರೆಂ ವಾಡ್ಯಾಂತ್ಲ್ಯಾ ಲೊಕಾಕ್ ಎಕ್ಟಾಂಯ್ ಕರ್‍ನ್ ವ್ಹಯ್ ಕರ್‍ಚೆಂ. ನಾಡ್ಚೆಂ ಕಾಮ್ ಸುಲಭ್. ಕಿತ್ಯಾಕ್ ತೆಂ ದೆಂವ್ಚಾರಾಚೆಂ. ಅಶೆಂ ಎಕಾ ದೊನ್ಪಾರಾಂ ಸಿಕೇರಾಮ್ ಗುರ್ಕಾರ್ ಗಿರಾಮಾಚ್ಯಾ ಭಾಗಿಂತ್ ಘುಸ್ಲೊಚ್. ಗುರ್ಕಾರ್ ಗಿರಾಮ್ ತೆದ್ನಾಂಚ್ ಜೇವ್ನ್, ಎಪ್ಪಲ್ ಹಾತಾಂತ್ ಘೆವ್ನ್ ಜೆಮೆತಾನಾಂಚ್ ಸಿಕೇರಾಮಾನ್ ಖೊಂಚ್ ಮಾರ್‍ಲಿ.

“ಗುರ್ಕಾರ್ ಗಿರಾಮಾ, ಕಿತೆಂ ಚಾಪ್ಪೊ ಬಸ್ಲಾಯ್. ಕಿತ್ಯಾಕ್ ದೊಳೆ ಧಾಂಪ್ಲ್ಯಾಯ್. ಕಿತ್ಯಾಕ್ ಆವಾಜ್ ನಾ?”

“ಕಿತೆಂ ಮ್ಹಣ್ಚೆಂ ಸಿಕೇರಾಮಾ. ಗುರ್ಕಾರ್ ಜಾಲ್ಯಾ ಉಪ್ರಾಂತ್ ಹರ್‍ಯೇಕ್ಲೊ ತಾಣೆಂ ಸಾಂಗ್‌ಲ್ಲ್ಯಾಬರಿ ಕರ್ ಮ್ಹಣ್ತಾ ಶಿವಾಯ್ ಮ್ಹಜೆಂ ಕೊಣೀ ಆಯ್ಕಾನಾ”

“ಪೂಣ್ ಆತಾಂ ತುಕಾ ಗುರ್ಕಾರ್‍ಗಿ ಚಲಂವ್ಚೊ ಆವ್ಕಾಸ್ ಆಯ್ಲಾ.” ಸಿಕೇರಾಮಾನ್ ಗುರ್ಕಾರಾಚ್ಯಾ ಹಾತಾಂತ್ಲೆಂ ಎಪ್ಪಲ್ ಕಾಡ್ನ್ ತಾಚ್ಯಾ ವೊಂಟಾಕ್ ಲಾಯ್ಲೆಂ.

“ನಾಕಾ ಸಿಕೇರಾಮಾ, ಎಪ್ಪಲ್ ಖೆಲ್ಯಾರ್ ಮೋಶನ್ ಘಟ್ ಜಾತಾ ಆನಿ ಗುರ್ಕಾರ್‍ಗಿಚೊ ಉಡಾಸ್ ಕಾಡ್ಲ್ಯಾರ್ ಇಮೋಶನ್ ಲೂಸ್ ಜಾತಾ”.

“ಗಿರಾಮಾ, ಆಮ್ಚಿಂ ಭುರ್ಗಿಂ ಸಕ್ಕಡ್ ಲಂಡನ್-ಅಮೇರಿಕಾ ಸೆಟಲ್ ಜಾಲಿಂ, ಪ್ರಾಯ್ವಂತಾಂ ಸಕ್ಕಡ್ ಆಸ್ರ್ಯಾನಿಂ ಭರ್‍ತಿ ಜಾಲಿಂ. ಆಸ್‌ಲ್ಲಿಂ ಘೊವ್-ಬಾಯ್ಲಾಂ ಸಕಾಳಿಂ ಥಾವ್ನ್ ಸಾಂಜ್ ಪರ್ಯಾಂತ್ ಝಗಡ್ತಾತ್ ತುಜೆಬರಿ.”

ತಿತ್ಲ್ಯಾರ್ ಗಿರಾಮಾನ್ ಸಿಕೇರಾಮಾಕ್ ಪಳಯ್ಲೆಂ. ತೆದ್ನಾಂ ಸಿಕೇರಾಮಾನ್ ವಾಕ್ಯ್ ಘುಂವ್ಡಾಯ್ಲೆಂ -” ಮ್ಹಣ್ಜೆ ತುಜೆಬರಿ ಆನಿ ಮ್ಹಜೆಬರಿ.”

ಆಯ್ಕೊನ್ ಗಿರಾಮ್ ಖುಶ್ ಜಾಲೊ. “ತಾಕಾ ಹಾಂವೆಂ ಕಿತೆಂ ಕರಿಜೆ ಮ್ಹಣ್ಚೆಂ ತುವೆಂ?”

“ಆಯ್ಕ್.. ತುಜೆ ದೊಳೆ ಉಗಡ್. ಮೊಂತಿ ಫೆಸ್ತ್ ಯೆಂವ್ಚ್ಯಾರ್ ಆಸಾ. ಆಜ್‌ಕಾಲ್ ಘರಾಂತ್ ಕೊಣೀ ಮೊಂತಿ ಫೆಸ್ತ್ ಆಚರಣ್ ಕರಿನಾಂತ್. ದೆಕುನ್ ಮೊಂತಿ ಫೆಸ್ತ್ ಆಳ್ವೊನ್ ವೆಚ್ಯಾ ಆದಿಂ ತೆಂ ಸಾಂಬಾಳ್ನ್ ದವರ್‍ಚಿ ಗರ್ಜ್ ಆಸಾ. ದೆಕುನ್ ಹ್ಯಾ ಪಾವ್ಟಿಂ ವಾಡ್ಯಾಂತ್ ಮೊಂತಿ ಫೆಸ್ತ್ ಆಚರಣ್ ಕರ್‍ಚಿ ಗರ್ಜ್ ಆಸಾ. ಹ್ಯಾ ಮುಕಾಂತ್ರ್ ತುಂ ಹೆಂ ಕರ್, ತುಂ ತೆಂ ಕರ್ ಮ್ಹಣ್ ಹರ್‍ಯೇಕ್ಲ್ಯಾಕ್ ಫರ್ಮಾವ್ನ್ ತುಜೆಂ ಗುರ್ಕಾರ್‍ಪಣ್ ದಾಕಂವ್ಕ್ ಏಕ್ ಆವ್ಕಾಸ್ ಆಸಾ.”

ಆಯ್ಕೊನ್ ಗಿರಾಮಾಕ್ ಖುಶಿ ಜಾಲಿ. ತಾಣೆಂ ಸಂತೊಸಾನ್ ಎಪ್ಪಲಾಕ್ ಘಾಸ್ ಮಾರ್‍ಲೊ ಮಾತ್ರ್ ನ್ಹಯ್ ತಾಚಿ ನೀದ್ ಸುಟೊನ್ ದೊಳೆ ಉಗ್ತೆ ಜಾಲೆ. ಅಪುಣ್ ಅತಾಂ ಗುರ್ಕಾರಾಬರಿ ಜಾಲೊಂ ಮ್ಹಣ್ ತಾಕಾ ಭೊಗ್ಲೆಂ. ಅಖ್ಖೆಂ ಮೊಂತಿ ಫೆಸ್ತ್ ವಾಡ್ಯಾಂತ್ ಕಶೆಂ ಕರ್‍ಯೆತ್ ಮ್ಹಣ್ ಚಿತ್ರಣ್ ತಾಚ್ಯಾ ಮತಿ ಪಡ್ದ್ಯಾರ್ ಪಾಶಾರ್ ಜಾವ್ನ್ ಗೆಲೆಂ. ಹಿ ಬರಿ ಖಬರ್ ತೊ ತಾಚ್ಯಾ ಬಾಯ್ಲೆಕ್ ದಿಂವ್ಕ್ ಭಿತರ್ ಗೆಲೊ ಆನಿ ಹೆಣೆಂ ಸಿಕೇರಾಮ್ ಆಪ್ಣಾಚಿ ಲಾಂಬ್ ಜೀಬ್ ಭಿತರ್ ವೋಡ್ನ್ ಆಪ್ಣಾಚೆಂ ಕಾಮ್ ತಿರ್‍ಸಾಲೆಂ ಮ್ಹಣ್ ಘರಾ ಆಯ್ಲೊ.

ತರೀ ದುಸ್ರೊ ಪಾಡಾವ್ ಬಾಕಿ ಆಸ್‌ಲ್ಲೊ. ಆತಾಂ, ವಾಡ್ಯಾಂತ್ಲ್ಯಾ ಲೊಕಾಕ್ ಎಕ್ಟಾಂಯ್ ಕರ್‍ನ್ ಕಳಂವ್ಚೆಂ ಕಶೆಂ? ಹೆಂ ಚಿಂತುನ್ ಸಿಕೇರಾಮ್ ಆಂಗ್ಣಾಂತ್ ಪಾಸಾಯೊ ಮಾರ್‍ತಾನಾ ಏಕ್ ಖಬರ್ ಆಯ್ಲಿ. ತಾಂಚ್ಯಾ ವಾಡ್ಯಾಂತ್ಲಿ ನೊವೊದ್ ವರ್‍ಸಾಂಚಿ ಮೊಂತಿ ಮೆಂಡೊನ್ಸಾ ದೆವಾಧಿನ್ ಜಾಲಿ. ತಕ್ಶಣ್ ಸಿಕೇರಾಮಾಚ್ಯೆ ಮತಿಂತ್ ಏಕ್ ಉಪಾಯ್ ಝಳ್ಕಾಲೊ. ತಾಣೆಂ ಕೂಡ್ಲೆ ಗುರ್ಕಾರಾಮಾಕ್ ಫೋನ್ ಕೆಲೆಂ. ಸಾಂಜೆರ್ ಸರ್ವ್ ವಾಡ್ಯಾಗಾರಾಂನಿ ಮೊಂತಿ ಬಾಯೆಚ್ಯಾ ಘರಾ ತಿಚ್ಯಾ ಕುಟ್ಮಾಕ್ ಭುಜಂವ್ಕ್ ಸಾಂಗಾತಾ ಮೆಳುಂಕ್ ತಾಣೆಂ ಗುರ್ಕರಾಕ್ ಹಿಶಾರೊ ದಿಲೊ. ತ್ಯಾ ವೆಳಾರ್ ವಾಡ್ಯಾಂತ್ಲೊ ಲೋಕ್ ಜಮ್ತಾ ಆನಿ ಉಪ್ರಾಂತ್ ಫೆಸ್ತಾವಿಶಿಂ ಉಲವ್ಯೆತ್ ಮ್ಹಣ್ ತಾಣೆಂ ಗುರ್ಕಾರಾಕ್ ಉಪಾಯ್ ದಿಲೊ.

ಸಾಂಜೆರ್ ವಾಡ್ಯಾಂತ್ಲೊ ಲೋಕ್ ಮೊಂತಿಬಾಯೆಗೆರ್ ಮೆಳ್ಳೊ. ಲಂಡನ್ ಆಸ್‌ಲ್ಲೊ ಮೊಂತಿಬಾಯೆಚೊ ಮಾಲ್ಘಡೊ ಪೂತ್‌ಯೀ ಹಾಜಿರ್ ಆಸ್‌ಲ್ಲೊ. ಮಾಗ್ಣೆಂ ಸಂಪ್ತಚ್ ಸಿಕೇರಾಮ್ ಉಬೊ ರಾವೊನ್ ಮ್ಹಣಾಲೊ, “ಹಾಂಗಾ ಆಸ್‌ಲ್ಲ್ಯಾ ವಾಡ್ಯಾಗಾರಾಂನಿ ಏಕ್ ಘಡಿಭರ್ ವೋ ಥಂಯ್ ರುಕಾ ಮುಳಾಂತ್ ಮೆಳ್ಚೆಂ. ಸಕ್ಕಡ್ ವಾಡ್ಯಾಚೊ ಲೋಕ್ ಥಂಯ್ಸರ್ ಆಯ್ಲೊ. ಸಿಕೇರಾಮಾಚ್ಯಾ ಹಿಶಾರ್‍ಯಾಖಾಲ್ ಮೊಂತಿಬಾಯೆಚೊ ಮಾಲ್ಘಡೊ ಪೂತ್‌ಯೀ ಥಂಯ್ಸರ್ ಆಯ್ಲೊ. ವೊಡೊಲ್‌ಚ್ ಏಕ್ ಬರೊ ಪಾವ್ಸ್ ಯೇವ್ನ್ ಗೆಲಾ. ಕಾಂಯ್ ಸಿಕೇರಾಮ್ ಆಮಾಂ ಸರ್ವಾಂಕ್ ರುಕಾ ಮುಳಾಚ್ಯಾ ಫಾಂಟ್ಯಾಕಡೆನ್ ಆಪವ್ನ್ ಹಾಡ್ನ್ ಫಾಂಟೊ ವೋಡ್ನ್ ಪಾವ್ಸಾಚೆಂ ಉದಾಕ್ ಶೆಣಾವ್ನ್ ಫ್ರ್ಯಾಂಕ್ ಕರ್‍ತಾಗಾಯ್ ಮ್ಹಣ್ ಥೊಡಿಂ ಬಾಯ್ಲಾಂ ಭಿಯೆಲಿಂ. ದಾದ್ಲೆ, ಕಾಂಯ್ ಶೆಕುಂಕ್ ಆಪಯ್ಲಾಂ ಮ್ಹಣ್ ಯೆತಾನಾ ಕದೆಲಾಂ ಘೆವ್ನ್ಂಚ್ ಆಯ್ಲೆ. ಹೆಂ ಪಳೆವ್ನ್ ಭುರ್ಗಿಂಯ್ ಕಾಂಯ್ ಮ್ಯೂಸಿಕಲ್ ಚೇರ್ ಗೇಮ್ ಆಸ್ತಲೊ ಮ್ಹಣ್ ಧಾಂವಾಧಾಂವಿಂ ವಚೊನ್ ತಿಂಯ್ ಕದೆಲಾಂ ಹಾಡ್ನ್ ಆಯ್ಲಿಂ. ಥೊಡಿಂ ‘ಮೊಂತಿಬಾಯ್ ವಾಂಚುನ್ ಆನಿ ಕಾಲೆಂ ಕರ್‍ಚೆಂ” ಮ್ಹಣ್ತಾಲಿಂ ತರ್ ಬಾಕಿಚಿಂ ಮೊಂತಿಬಾಯ್ ಸೊಡ್ನ್ ಗೆಲ್ಲ್ಯಾ ಆಸ್ತ್ ಆನಿ ಭಾಂಗಾರಾವಿಶಿಂಚ್ ಖಂತ್ ಉಚಾರ್‍ತಾಲಿಂ ಸೊಡ್ಲ್ಯಾರ್ ಮೊಂತಿಬಾಯೆನ್ ಜಿವಾಂತ್ ಆಸ್ತಾನಾ ಕೆಲ್ಲ್ಯಾ ಜಾಯ್ತ್ಯಾ ಬರ್‍ಯಾ ಕಾಮಾವಿಶಿಂ ಕೊಣ್‌ಯ್ ಉಲಯ್ನಾತ್‌ಲ್ಲೊ. ಹೊಚ್ ವಿಶಯ್ ಪಾರ್ಕುನ್ ಸಿಕೇರಾಮ್ ವಾಡ್ಯಾಕ್ ಉದ್ದೇಸುನ್ ಮ್ಹಣಾಲೊ –

“ಮೊಗಾಚ್ಯಾನೊ, ಮೊಂತಿಬಾಯೆನ್ ವಾಡ್ಯಾಂತ್ ಆಸ್ತಾನಾ ಜಾಯ್ತಿಂ ಬರಿಂ ಕಾಮಾಂ ಕೆಲ್ಲಿಂ ತುಮ್ಕಾಂ ಉಡಾಸ್ ಆಸೊಂಕ್ ಪುರೊ. ತಿಚಿ ನಿಮಾಣಿ ಆಶಾ ಜಾವ್ನಾಸ್‌ಲ್ಲಿ ವಾಡ್ಯಾಂತ್ ಮೊಂತಿ ಫೆಸ್ತ್ ಕರಿಜೆ ಮ್ಹಣ್. ಹ್ಯಾ ಮಾರಿಫಾತ್ ತಿಕಾಯ್ ಮಾನ್ ಆನಿ ಸಾಸ್ಣಿಕ್ ವಿಶೆವ್ ಮೆಳ್ತಲೊ. ಹೆಂ ಫೆಸ್ತ್ ಕರ್‍ಚ್ಯಾಕ್ ತಿಚ್ಯಾ ಲಂಡನ್ಚ್ಯಾ ಪುತಾನ್ ಎದೊಳ್‌ಚ್ ಮೊಟೊ ಸಹಕಾರ್ ಭಾಸಯ್ಲಾ. ಫಕತ್ ತುಮಿ ವ್ಹಯ್ ಮ್ಹಳ್ಯಾರ್ ಹೆಂ ಫೆಸ್ತ್ ವಾಡ್ಯಾಂತ್ ಕರ್‍ಯೆತ್. ಎಕೆಕ್ಲ್ಯಾಕ್ ಎಕೇಕ್ ನಿಸ್ತಿಂ ಕರ್‍ಚೆಂ ಭಾಗ್. ಭುರ್ಗ್ಯಾಂಕ್ ಫುಲಾಂ ಹಾಡುಂಕ್. ಸಕ್ಡಾಂಕ್ ನವೆಂ ಜೇಂವ್ಕ್, ವೋರ್‍ನ್ ಖಾಂವ್ಕ್, ತ್ಯಾ ಭಾಯ್ರ್ ಮುಖೆಲ್ ಸಯ್ರೆ, ಪದಾಂ, ಡ್ಯಾನ್ಸಾಂ, ನಾಟ್ಕುಳೆ, ಗಮ್ಮತಾಂ.”

ಸಿಕೇರಾಮ್ ಸಾಂಗೊನ್ಂಚ್ ವೆತಾಲೊ. ಆಯ್ಕೊನ್ ವಾಡ್ಯಾಗಾರಾಂ ಸಂತೊಸಾನ್ ಕದೆಲಾಂ ಮಾತ್ಯಾರ್ ಉಕಲ್ನ್ ನಾಚ್ಲಿಂಚ್. ಮೊಂತಿ ಬಾಯೆಚ್ಯಾ ನಿರ್ಜಿವ್ ಕುಡಿಚೆರ್ ದೀಶ್ಟ್ ಘಾಲುಂಕ್ ಮ್ಹಣ್ ಆಯಿಲ್ಲೊ ವಿಗಾರ್ ಮಾತ್ರ್ ವಾಡ್ಯಾಚೊ ಲೋಕ್ ಪಯ್ಸ್ ರುಕಾ ಮುಳಾಂತ್ ಕಿತ್ಯಾಕ್ ಪಾಸುನ್ ಸಂಭ್ರಮ್ತಾ ಮ್ಹಳ್ಳೆಂ ಪಳೆವ್ನ್‌ಚ್ ಬಾಕಿ. ತಾಂಚೆ ಸಾಂಗಾತಾ ಮೊಂತಿ ಬಾಯೆಚ್ಯಾ ಲಂಡನ್ಚ್ಯಾ ಪುತಾಕ್‌ಯೀ ಪಳೆವ್ನ್ ವಿಗಾರಾಚಿ ಝಿಂಟ್ ಉಡ್ಲಿ. ‘ಮೊಂತಿಬಾಯೆನ್ ಆಸ್ತ್ ಕಾಂಯ್ ವಾಡ್ಯಾಗಾರಾಂಕ್ ವಾಂಟುನ್ ದಿಲ್ಯಾಗಾಯ್!’. ಆಪ್ಣಾಕ್ ಕಾಂಯ್ ಪುಣೀ ಉರ್‍ಲಾಂ ತರ್ ವಾಡ್ಯಾಚೊ ಲೋಕ್ ಪರತ್ ಜಮ್ಚ್ಯಾ ಆದಿಂ ಹಾಡ್ಯಾಂ ಮ್ಹಣ್ ವಿಗಾರ್ ತುರ್‍ತಾನ್ ಭಿತರ್ ಧಾಂವ್ಲೊ.

ಮೊಂತಿ ಬಾಯೆಚೆಂ ಮೋರ್‍ನ್ ಜಾವ್ನ್ ಹಫ್ತ್ಯಾಚೆಂ ಮೀಸ್ ಸಂಪ್ತಾನಾ ಮೊಂತಿ ಸಾಯ್ಭಿಣಿಚೆಂ ನೊವೆನ್ ಸುರು ಜಾಲೆಂ. ವಾಡ್ಯಾಂತ್ಲ್ಯಾ ಮೊಂತಿ ಫೆಸ್ತಾಕ್ ಆಪವ್ಣೆಂ ದಿಂವ್ಚ್ಯಾಕ್ ಗುರ್ಕಾರ್ ಗಿರಾಮಾ ಸಾಂಗಾತಾ ಸಿಕೇರಾಮಾನ್‌ಯೀ ಭೊಂವ್ಡಿ ಮಾರ್‍ಲಿ. ಹ್ಯಾ ವರ್ವಿಂ ನವ್ಯಾ ಘರಾಂಚಿ ಆನಿ ತ್ಯಾ ಘರ್‍ಚ್ಯಾ ‘ಬೊರಿ’ಯಾಂಚಿ ಭೆಟ್ ಜಾಲಿ. ಫೆಸ್ತಾಚಿ ತಯಾರಾಯ್ ಜಾವ್ನ್ ವಾಡ್ಯಾಂತ್ಲ್ಯೊ ಸ್ತ್ರೀಯೊ ಪಯ್ಲೆಂ ಕೊಡ್ಯಾಳ್ ವಚುನ್ ಆಪ್ಣಾಂಕ್ ನವಿಂ ಕಾಪ್ಡಾಂ ಘೆವ್ನ್ ಆಯ್ಲ್ಯೊ. ತ್ಯಾ ಭಾಯ್ರ್ ತೀನ್ ಚಾರ್ ಘರಾಂಕ್ ಏಕ್ ಕರ್‍ನ್ ಎಕೇಕ್ ಬೊಗಾ ನಿಸ್ತೆಂ ಕರುಂಕ್ ಫರ್ಮಾಯಿಲ್ಲೆಂ. ಮೂಗ್, ಚಣೆ, ಆಳುಂ-ದೆಂಟೊ, ಅಂಬಾಡೆ, ಘೊಸಾಳಿಂ, ಬೆಂಡಾಂ, ಕಿರಾತೆಂ, ಸಾಲಾದ್, ಶಿತ್ ಮ್ಹಣ್ ತಯಾರ್ ಕರ್‍ತಾಸ್ತಾನಾ ಪುರಾಸಾಣೆನ್ ಕೊಣೆಂಗೀ ಮ್ಹಳೆಂ, ಝೋಮ್ಯಾಟೊ ವಾ ಸ್ವಿಗ್ಗಿಕ್ ಒರ್ಡರ್ ದಿವ್ಯೆತೆಂ’.

ಅನ್ಯೇಕಾ ವಾಟೆನ್ ಗುರ್ಕಾರ್ ಗಿರಾಮ್ ಫುಲ್ಲ್ ಖುಶ್ ಆಸ್‌ಲ್ಲೊ. ಸಲಹಾ ಸೂಚನಾಂ ವಿಚಾರ್‍ನ್ ವಾಡ್ಯಾಗಾರಾಂಚಿ ಫೋನಾಂ ವಯ್ರ್ ಫೋನಾಂ ಯೇವ್ನ್ ಆಸ್‌ಲ್ಲಿಂ. ತೆಂ ಕರಾ, ಹೆಂ ಕರಾ ಮ್ಹಣ್ ಸಾಂಗೊನ್ ಆಪ್ಣಾಚ್ಯಾ ಗುರ್ಕಾರ್‍ಗೆಕ್ ನವೊ ಜೀವ್ ಆಯ್ಲೊ ಮ್ಹಣ್ ಗಿರಾಮ್ ಸರ್ಗಾರ್‌ಚ್ ಆಸ್‌ಲ್ಲೊ. ಇಗರ್ಜೆಂತ್ಲ್ಯಾ ಮೊಂತಿ ಫೆಸ್ತಾ ದಿಸಾ ಸಯ್ತ್ ವಾಡ್ಯಾಗಾರಾಂಚಿ ಮತ್ ವಾಡ್ಯಾಂತ್ಲ್ಯಾ ಮೊಂತಿ ಫೆಸ್ತಾಂತ್‌ಚ್ ಬುಡ್‌ಲ್ಲಿ.

ವಾಡ್ಯಾಂತ್ಲಿಂ ಕುಟ್ಮಾಂ ಸಕ್ಕಡ್ ವಾಂಟೆ-ಫಾಂಟೆ ಆಸ್‌ಲ್ಲ್ಯಾನ್ ವಾಡ್ಯಾಂತ್ಲ್ಯಾಂನಿ ಸಾಂಜೆರ್‌ಚ್ ವಾಡ್ಯಾಂತ್ಲ್ಯಾ ಮೊಂತಿ ಫೆಸ್ತಾ ವೆಳಾರ್ ನವೆಂ ಜೆಂವ್ಚೊ ನಿರ್ಧಾರ್ ಕೆಲ್ಲೊ. ಸಾಂಜೆರ್ ಭರ್‍ತಿ ಸ ವೊರಾರ್ ವಾಡ್ಯಾಂತ್ಲೆಂ ಮೊಂತಿ ಫೆಸ್ತ್ ಸುರ್ವಾತ್ಲೆಂ. ಸುರ್‍ವೆರ್ ಮಾಗ್ಣೆಂ, ಸ್ವಾಗತ್, ವೆದಿಂ ಕಾರ್ಯೆಂ, ನವೆಂ ಸೇವನ್, ಮನೋರಂಜನ್ ಕಾರ್ಯೆಂ, ಫೆಸ್ತಾಚೆಂ ಜೆವಾಣ್ ಹೆಂ ಸಕ್ಕಡ್ ಆನಿ ಹ್ಯಾ ಸರ್ವಾ ಸಾಂಗಾತಾ ವಾಡ್ಯಾಗಾರಾಂಚೊ ಮೋಗ್ ಆನಿ ಎಕ್ವಟ್ ಪಳೆವ್ನ್ ವಿಗಾರಾಚೆಂ ಕಾಳಿಜ್ ಕಡ್ಲೆಂ ಆನಿ ತೊ ಜೆಜುಬರಿಂ ತೀನ್ ಪಾವ್ಟಿಂ ರಡ್ಲೊ. ಅಸಲೆಂ ಫೆಸ್ತ್ ಆಯೋಜನ್ ಕೆಲ್ಲ್ಯಾ ಗುರ್ಕಾರ್ ಗಿರಾಮಾಕ್ ತಾಣೆಂ ಖೂಬ್ ಹೊಗೊಳ್ಸಿಲೆಂ. ಆನಿ ಗಿರಾಮಾನ್ ಸಿಕೇರಾಮಾಚಿಂ ಮಂತ್ರಾಂ ಗಾಯ್ಲಿಂ.

ಫೆಸ್ತ್ ಸಂಪ್ತಚ್ ಮುಖೆಲ್ ಸಯ್ರೆ ಆನಿ ಆಪವ್ಣೆಂ ಆಸ್‌ಲ್ಲೆ ಸಯ್ರೆ ಸಕ್ಕಡ್ ಪಾಟಿಂ ಗೆಲೆ. ವಾಡ್ಯಾಗಾರಾಂಯ್ ಜೆವ್ಲಿಂ. ಸಕ್ಕಡ್ ಸಂಪ್ತಚ್ ಜೆವ್ಣಾ ವಯ್ಲೆಂ ಉಟ್ತಾನಾ ತೆಂ ಕಿತೆಂಗೀ ಸಿಸಿಲ್‌ಬಾಯೆಚ್ಯಾ ತೊಂಡಾಥಾವ್ನ್ ಚುಕೊನ್ ಆಯ್ಲೆಂ. “ಜೆವಾಣ್ ಬರೇಂ ಆಸ್‌ಲ್ಲೆಂ ಪೂಣ್ ಆಳುಂ ದೆಂಟೊ ಮಾತ್ರ್ ಚಾಪ್ಪೆ ಜಾಲೊ”.

ಹೆಂ ತಿಚ್ಯಾ ಕುಶಿಕ್‌ಚ್ ಬಸ್‌ಲ್ಲ್ಯಾ ಆಳುಂ ಧೆಂಟೊ ವಯ್ಸಿಲ್ಲ್ಯಾ ಗ್ರೆಟ್ಟಾ ಬಾಯೆಚ್ಯಾ ಕಾನಾಂಕ್ ಪಡ್ಲೆಂ ಆನಿ ತಿಣೆಂ ತಕ್ಶಣ್ ಜಾಪ್ ದಿಲಿ. “ತುಜಿ ಬಿಪಿ ಡೌನ್ ಜಾಲ್ಯಾ, ತಶೆಂ ತುಕಾ ಆಳುಂ ದೆಂಟೊ ಚಾಪ್ಪೆ ಜಾಲೊ. ಬೆಂಡಾಂಚೆಂ ನಿಸ್ತೆಂ ಖೆಲ್ಲೆಂಯ್ ತರ್ ವೊಂಕೊನ್ ಸೊಡ್ತಿಯ್.”

“ಕಿತೆಂಗೊ ಬೆಂಡಾಂತ್ ಕಿತೆಂ ಗಮ್ಮ್ ಘಾಲ್ಲೊಗೀ, ಆಂಬಾಡೆ ಖೆಲ್ಲೆಯ್ ತರ್ ತುಜಿ ಡೌನ್ ಜಾಲ್ಲಿ ಬಿಪಿ ಚಡ್ತಿ. ತಿತ್ಲೆಯ್ ಖಾರ್ ಕೊಟ್ಟಾಸ್”.

ತಿತ್ಲ್ಯಾರ್ ಎಕ್ಲೊ ದಾದ್ಲೊ ಮ್ಹಣಾಲೊ. “ತುಮಿ ಅಶೆಂಯ್ ನಿಸ್ತ್ಯಾಚ್ಯೊ ಖೊಡಿ ಕಾಡಿನಾಕಾತ್. ಏಕ್ ಪಾವ್ಟಿಂ ವೋರ್‍ನ್ ಖಾಯಾ ಪಳೆಯಾಂ, ಶುಗರ್ ನಾತ್‌ಲ್ಲ್ಯಾಂಕ್‌ಯೀ ಶುಗರ್ ಚಡಾತ್”.

ತಿತ್ಲ್ಯಾರ್ ಮಾಟ್ವಾ ಭಾಯ್ರ್‌ಯೀ ಭಿತರ್ ಖೊಡಿ ಕಾಡ್ತೆಲ್ಯಾಂಚಿ ಖಬರ್ ಪಾವ್ಲಿ. ತ್ಯಾ ನಂತರ್ ಥಂಯ್ಸರ್ ಕಿತೆಂ ಜಾಲೆಂ ಮ್ಹಣ್ ಸಾಂಗೊಂಕ್‌ಚ್ ಕಶ್ಟ್. ಎಕಾಮೆಕಾಚ್ಯೊ ಖೊಡಿ ಕಾಡ್ಚೆಂ ಆನಿ ದುರ್‍ಸೊಣೆಂ ಜಾಲೆಂ ಮ್ಹಣ್ಯಾಂ. ಕೊಣೆಂಗೀ ಜೇವ್ನ್ ಶಿರೊತಿ ಮಾಡಾ ಮುಳಾಂತ್ ಉಡಯ್ತಾನಾ ತೆವ್ಶಿನ್ ಹಾತ್ ಧುಂವ್ಚ್ಯಾ ಚಾರ್ಲಿಚ್ಯಾ ಆಂಗಾರ್ ಪಡ್ಲಿ. ಮಾಗಿರ್ ಅಶಿ ಮಾರಾಮಾರಿ ಜಾಲಿ ಮ್ಹಳ್ಯಾರ್ ಉಶ್ಟ್ಯಾಚ್ಯೊ ಶಿರೆತ್ಯೊ ಎಕಾಮೆಕಾಚ್ಯಾ ಆಂಗಾರ್ ಉಡವ್ನ್ ಎಕಾಮೆಕಾ ನವೆಂ ಜೆವ್ಲಿಂ.

ಹ್ಯಾ ಮದ್ಗಾತ್ ಆಪ್ಣಾಕ್ ವೊಡೊಲ್ ವಾಡ್ಯಾಗಾರಾಂನಿ ಸನ್ಮಾನ್ ಕರ್‍ತಾನಾ ದಿಲ್ಲೆಂ ಶೊಲ್ ಥಂಯ್ಚ್ ಉರ್‍ಲೆಂ ಮ್ಹಣ್ ಹಾಡ್ಚ್ಯಾಕ್ ವಿಗಾರ್ ಪಾಟಿಂ ಆಯ್ಲೊ. ಅತ್ತಾಂ ವಾಡ್ಯಾಗಾರಾಂಥಂಯ್ ಪಳಯಿಲ್ಲೊ ಎಕ್ವಟ್ ಮೋಗ್ ಖಿಣಾನ್ ಅಶೆಂ ಮಾರಾಮಾರಿಂತ್ ಬದ್ಲಾಲ್ಲೊ ಪಳೆವ್ನ್ ವಿಗಾರ್ ಕಳ್ಳೆಂಕೀ ತಾಕಾ ಜೆಜು ಜಾಂವ್ಕ್ ಸಾಧ್ಯ್ ನಾ. ದೆಕುನ್ ಹ್ಯಾ ಪಾವ್ಟಿಂ ತೊ ಸಾಂ ಪೆದ್ರುಬರಿಂ ಗಳ್ಗಾಳ್ಯಾಂ ರಡ್ಲೊ. ಮೊಂತಿ ಫೆಸ್ತಾವರ್ವಿಂ ಜಾಲ್ಲೊ ಹೊ ಗಲಾಟೊ ಪಳೆವ್ನ್ ಗುರ್ಕಾರ್ ಗಿರಾಮ್ ಘರಾಮ್ ಜಾಲೊ. ಹೆಂ ಫೆಸ್ತ್ ಕರಿಜೆ ಮ್ಹಣ್ ನಾಡ್‌ಲ್ಲ್ಯಾ ಸೊರ್‍ಪಾ ಸಿಕೇರಾಮಾಕ್ ಮಾರ್‍ಚ್ಯಾಕ್ ದಾಂಡೊ ಘೆವ್ನ್ ತೊ ಭಾಯ್ರ್ ಆಯ್ಲೊ.

ಪೂಣ್ ಸಿಕೇರಾಮ್ ಮಾತ್ರ್ ವಾಡ್ಯಾಂತ್ ನವೆಂಚ್ ಒಕಾಲ್ ಜಾಲ್ಲ್ಯಾ ಸ್ತ್ರೀಯಾಂಕ್ ಘರ್ ಪಯ್ಸ್ ಆಸಾ ದೆಕುನ್ ರಾತಿಕ್ ಸೊರೊಪ್ ಜಿವ್ದಾಳ್ ಚಾಬ್ತಿತ್ ಮ್ಹಳ್ಳ್ಯಾ ನಿಬಾನ್ ಎಕಾ ಹಾತಾಂತ್ ಟೋರ್ಚ್ ಅನ್ಯೇಕಾ ಹಾತಾಂತ್ ತಾಂಚೊ ಹಾತ್ ಘೆವ್ನ್ ವಾಡ್ಯಾಂತ್ಲ್ಯಾ ಫೆಸ್ತಾಥಾವ್ನ್ ಪಯ್ಸ್, ಭೋವ್ ಪಯ್ಸ್ ತಾಂಕಾಂ ಪಾವಂವ್ಕ್ ಗೆಲ್ಲೊ.

ರೋಶು ಬಜ್ಪೆ