ವರ್‍ಸಾನ್ ವರಸ್ ಪಾಸ್ಕಾಂಚೊ ಕಾಳ್ ಆಖೇರ್ ಜಾವ್ನ್ ಯೆತಾನಾ, ಮಾಯ್ ಆನಿ ಜೂನ್ ಮ್ಹಯ್ನ್ಯಾಂನಿ ಪಾಟಾಪಟ್ ಚಾರ್ ಆಯ್ತಾರಾ ಇಗರ್ಜ್‌ಮಾತಾ ಚಾರ್ ವ್ಹಡ್ ದಬಾಜೆ ಸಂಭ್ರಮ್ತಾ. ಜೆಜುಚೆಂ ಸರ್ಗಾರೋಹಣ್, ಪೆಂತೆಕೊಸ್ತ್, ಪವಿತ್ರ್ ತ್ರಿತ್ವೆಚಿ ಪರಬ್ ಆನಿ ಜೆಜುಚ್ಯಾ ಬೊವ್ ಪವಿತ್ರ್ ಕುಡಿ ಆನಿ ರಗ್ತಾಚಿ ಪರಬ್. ಹ್ಯಾ ಚಾರೀ ಪರ್‍ಬೆಂನಿ ಏಕ್ ಸಾಮ್ಯತಾ ಆಸಾ ಜಾಲ್ಯಾರ್ ತೊ ಪವಿತ್ರ್ ಅತ್ಮೊ. ಜೆಜು ಆಪ್ಲ್ಯಾ ಸರ್ಗಾರೋಹಣಾ ಪಯ್ಲೆಂ ಶಿಸಾಂಕ್, ‘ಹಾಂವ್ ಗೆಲ್ಯಾ ನಂತರ್ ತುಮ್ಕಾಂ ಏಕ್ ಮಜತ್‌ದಾರ್ ಯೆತೊಲೊ’ ಮ್ಹಣ್ ಭಾಸ್ತಾಯ್ತಾ. ಪೆಂತೆಕೊಸ್ತಾಚ್ಯಾ ಪರ್‍ಬೆ ದಿಸಾ ಪವಿತ್ರ್ ಅತ್ಮೊ ದೆಂವೊನ್ ಯೆತಾ. ಪರಮ್ ತ್ರಿತ್ವೆಚೊ ತಿಸ್ರೊ ಜಣ್ ಪವಿತ್ರ್ ಅತ್ಮೊ ಆನಿ ನಿಮಾಣೆಂ, ಹರ್‍ಯೆಕಾ ಮಿಸಾ ವೆಳಾರ್ ಯಾಜಕ್ ಉಂಡೊ ಆನಿ ವಾಯ್ನ್ ಜೆಜುಚೆಂ ಮಾಸ್ ಆನಿ ರಗತ್ ಜಾವ್ನ್ ಕೊನ್ಸೆಕ್ರಾರ್ ಕರ್‍ತಾನಾ ಮ್ಹಣ್ತಾ: “ಬಾಪಾ, ತುಜ್ಯಾ ಪವಿತ್ರ್ ಅತ್ಮ್ಯಾಕ್ ಧಾಡುನ್ ಹಿಂ ದೆಣಿಂ ಪವಿತ್ರ್ ಕರ್ ಮ್ಹಣ್ ಆಮಿ ಮಾಗ್ತಾಂವ್, ಜಾಂವ್ ತಿಂ ಆಮ್ಕಾಂ ಆಮ್ಚ್ಯಾ ಸೊಮಿಯಾ ಜೆಜು ಕ್ರೀಸ್ತಾಚಿ ಕೂಡ್ ಆನಿ ರಗತ್.” ಅಶೆಂ ಹೆ ಚಾರೀ ದಬಾಜೆ ಪವಿತ್ರ್ ಅತ್ಮ್ಯಾಸಂಗಿ ಶೀದಾ ಜುಳಯಿಲ್ಲೆ ಆಸಾತ್. ತ್ಯಾ ದೆಕುನ್ ಪವಿತ್ರ್ ಅತ್ಮ್ಯಾವಿಶ್ಯಾಂತ್ ಸವಾಲಾಂ ಕರುಂಕ್ ಆನಿ ಜಾಪಿ ಸೊಧುಂಕ್ ಹೊಚ್ ಅಂಕೊ ಜೊಕ್ತೊ ಮ್ಹಳ್ಳೆಂ ಭೊಗಪ್ ಮ್ಹಜೆಂ. 

ತರ್ ಆತಾಂ ಸವಾಲ್ ಹೆಂ: ಬಾಪಾಚೆ, ಪುತಾಚೆ ಆನಿ ಪವಿತ್ರ್ ಅತ್ಮ್ಯಾಚೆ ನಾಂವಿಂ ಆಮ್ಕಾಂ ಪವಿತ್ರ್ ಸ್ನಾನ್ ದಿತಾನಾ ಎದೊಳ್‌ಚ್ ಪವಿತ್ರ್ ಅತ್ಮ್ಯಾಕ್ ಆಮಿ ಘೆತ್ಲಾ ಆಸ್ತಾಂ ಪರತ್ ಥಿರಾವ್ಣೆಚ್ಯಾ ಸಂಸ್ಕಾರಾಚಿ ಗರ್ಜ್ ಕಿತೆಂ? ಪವಿತ್ರ್ ಸ್ನಾನಾಂತ್ ಅರ್ಧೊ ಆನಿ ಕ್ರೀಜ್ಮಾಂತ್ ಅರ್ಧೊ ಪವಿತ್ರ್ ಅತ್ಮೊ ಯೆತಾಗೀ? ಕ್ರೀಜ್ಮಾಚೊ ಸಾಕ್ರಾಮೆಂತ್ ಘೆನಾತ್ಲ್ಯಾರ್ ಕಿತೆಂ ಜಾತಾ? ಬಿಸ್ಪ್ ಸಾಯ್ಬಾನ್‌ಚ್ ಕಿತ್ಯಾಕ್ ಥಿರಾವ್ಣೆಚೊ ಸಂಸ್ಕಾರ್ ದೀಜೆ? ಯಾಜಕಾಂಕ್ ಆನಿ ದಿಯಾಕೊನಾಂಕ್ ಕಿತ್ಯಾಕ್ ತೊ ಅಧಿಕಾರ್ ನಾ? ಅಸಲ್ಯಾ ಥೊಡ್ಯಾ ಸವಾಲಾಂಕ್ ಜಾಪಿ ಸೊಧ್ಯಾಂ.

ಸಾಕ್ರಾಮೆಂತ್ ಆನಿ ಪವಿತ್ರ್ ಅತ್ಮೊ

ಹರ್‍ಯೆಕಾ ಸಾಕ್ರಾಮೆಂತಾಕ್ ಆನಿ ಪವಿತ್ರ್ ಅತ್ಮ್ಯಾಕ್ ಗಾಂಚ್ ಆಸಾ. ಪುಣ್ ವಿಶೇಸ್ ಜಾವ್ನ್ ಪವಿತ್ರ್ ಸ್ನಾನ್ ಆನಿ ಥಿರಾವ್ಣಿ ಹರ್‍ಯೆಕಾ ಭಾವಾಡ್ತ್ಯಾನ್ ಸ್ವೀಕಾರ್ ಕರ್‍ಚೆ ಪವಿತ್ರ್ ಅತ್ಮ್ಯಾಕ್ ಸಂಬಂದ್ ಜಾಲ್ಲೆ ದೋನ್ ಸಾಕ್ರಾಮೆಂತ್. ಹ್ಯಾ ದೋನ್ ಸಾಕ್ರಾಮೆಂತಾಂದ್ವಾರಿಂ ತೊಚ್ ಪವಿತ್ರ್ ಅತ್ಮೊ ತರೀ ದೋನ್ ವೆವೆಗ್ಳಿಂ ಕಾಮಾಂ ಆಮ್ಚೆಥಂಯ್ ಕರ್‍ತಾ. ಹೆಂ ಸಾರ್ಕೆಂ ಸಮ್ಜೊಂಕ್, ದೆವಾಚೆಂ ಉತರ್, ಸುರ್ವಿಲ್ಯೆ ಪವಿತ್ರ್ ಸಭೆಚಿ ದಸ್ತುರ್ ಆನಿ ಶತಮಾನಾಂನಿ ಸವ್ಕಾಸ್ ರೂಪಿತ್ ಜಾಲ್ಲಿ ಕಥೊಲಿಕ್ ಪವಿತ್ರ್ ಸಭೆಚಿ ಶಿಕವ್ಣ್ ಆಮಿ ಸಾಂಗಾತಾ ವಾಚಿಜೆ ಪಡ್ತಾ.

ಪವಿತ್ರ್ ಸ್ನಾನಾಂತ್ ಪವಿತ್ರ್ ಅತ್ಮ್ಯಾಚೆಂ ಕಾಮ್ ಕಿತೆಂ?

ಹ್ಯಾ ಸವಾಲಾಕ್ ಜೆಜುನ್‌ಚ್ ಜಾಪ್ ದಿಲ್ಯಾ: “ಉದ್ಕಾನ್ ಆನಿ ಪವಿತ್ರ್ ಅತ್ಮ್ಯಾನ್ ಜಲ್ಮಾಲ್ಲ್ಯಾ ಖರಿತ್ ಕೊಣ್‌ಚ್ ದೆವಾಚ್ಯಾ ರಾಜಾಂತ್ ಪ್ರವೇಸ್ ಜಾಂವ್ಕ್ ಸಕಾಸೊನಾ” (ಜುವಾ ೩:೫). ಬಾವ್ತಿಜ್ಮಾಂತ್ ಪವಿತ್ರ್ ಅತ್ಮೊ, ಆಮ್ಚೆಥಂಯ್ ಆಸ್ಚೆಂ ಆದಾಂವ್ ಆನಿ ಎವೆಚೆಂ ಮೊಡ್ಲಲೆಂ ಸಂಯ್ಬ್ ಕಾಡ್ನ್ ಜೆಜು ಕ್ರೀಸ್ತಾನ್ ಜೋಡ್ನ್ ದಿಲ್ಲ್ಯಾ ಸಾಲ್ವಾಸಾವಾಂತ್ ಆಮ್ಕಾಂ ಭಾಗಿದಾರ್ ಕರ್‍ತಾ. ಹಾಚೆದ್ವಾರಿಂ ಆಮಿ ಜೆಜುಚಿ ಪತಿಣ್ ಜಾವ್ನ್ ಆಸ್ಚ್ಯೆ ಪವಿತ್ರ್ ಸಭೆಚೆ ಸಾಂದೆ ಜಾತಾಂವ್.

ಥಿರಾವ್ಣೆಂತ್ ಪವಿತ್ರ್ ಅತ್ಮೊ ಕಿತೆಂ ಕರ್‍ತಾ?

ಸಾಮಾರಿಯಾಚ್ಯೆ ಸ್ತ್ರೀಯೆಲಾಗಿಂ ಉಲೊವ್ನ್ ಜೆಜು ಮ್ಹಣ್ತಾ: “ಖರ್‍ಯಾ ಆರಾಧಕಾಂನಿ ಅತ್ಮ್ಯಾನ್ ಆನಿ ಸತಾನ್ ಬಾಪಾಕ್ ಆರಾಧನ್ ಕರಿಜೆ” (ಜುವಾ ೪:೨೩-೨೪). ಪವಿತ್ರ್ ಸ್ನಾನ್ ಘೆವ್ನ್ ಜೆಜುಚ್ಯೆ ಕುಡಿಚೆ ಸಾಂದೆ ಜಾಲ್ಯಾ ಉಪ್ರಾಂತ್, ಕುಡಿಚಿ ವಾಡಾವಳ್ ಜಾತಾನಾ, ಗಿನ್ಯಾನ್ ವಾಡ್ತಾ ಆನಿ ಅತ್ಮೀಕ್ ಜಿಣಿಯೆಂತ್ ಆಮಿ ಕಿತೆಂ ಪಾತ್ಯೆತಾಂವ್ ತೆಂ ರಾಜಾಂವಾಚ್ಯಾ ಆಧಾರಾನ್ ಆಮಿ ಸಮ್ಜೊಂಕ್ ಸಕ್ತಾಂವ್. ಆಮ್ಚೊ ಭಾವಾಡ್ತ್ ಕುರ್ಡೊ ಭಾವಾಡ್ತ್ ನ್ಹಯ್ ಜಾಲ್ಲ್ಯಾನ್ ಜೆಂ ಆಮಿ ಪಾತ್ಯೆತಾಂವ್ ತ್ಯಾ ವಿಶ್ಯಾಂತ್ ಸವಾಲಾಂ ವಿಚಾರುಂಕ್ ಆರಂಭ್ ಕರ್‍ತಾಂವ್. ಹ್ಯಾ ಹಂತಾರ್ ಆಮ್ಚ್ಯಾ ವ್ಹಡಿಲಾಂನಿ, ಶಿಕ್ಶಕಾಂನಿ, ಅತ್ಮೀಕ್ ದಿರೆಕ್ತೊರಾಂನಿ ಆಮ್ಚೆಂ ಗಿನ್ಯಾನ್ ಉಜ್ವಾಡಾಯ್ಲ್ಯಾರೀ ಪವಿತ್ರ್ ಅತ್ಮ್ಯಾನ್ ಆಮ್ಚೆಂ ಮನ್ ಉಘಡ್ಲ್ಯಾ ಖರಿತ್ ಆಮಿ ಅತ್ಮೀಕ್ ಗುಂಡಾಯೆಚ್ಯೊ ಸಂಗ್ತಿ ಸಮ್ಜೊಂಕ್ ಸಕನಾಂವ್. ಭಾಯ್ಲ್ಯಾನ್ ಆಮ್ಕಾಂ ಕಳ್ನಾತ್ಲ್ಯಾರೀ ಆಮ್ಚೊ ಅತ್ಮೊ ಗುಂಡಾಯೆನ್ ಅತ್ಮೀಕ್ ಸಂಗ್ತಿ ಸಮ್ಜೊಂಕ್ ಪೆಚಾಡ್ತಾ. ಹ್ಯಾ ವೆಳಾರ್ ಪವಿತ್ರ್ ಅತ್ಮೊ ಥಿರಾವ್ಣೆಚ್ಯಾ ಸಂಸ್ಕಾರಾಂತ್, ಜಾಣ್ವಾಯ್, ಗಿನ್ಯಾನ್, ಬೂದ್, ಘಟಾಯ್, ಸಮ್ಜೊಣಿ, ಭಕ್ತ್ ಆನಿ ದೇವ್‌ಭಿರಾಂತ್ ಮ್ಹಳ್ಳ್ಯಾ ಆಪ್ಲ್ಯಾ ಸಾತ್ ದೆಣ್ಯಾಂದ್ವಾರಿಂ ಆಮ್ಕಾಂ ಅತ್ಮೀಕ್ ರಿತಿನ್ ಘಟ್ ಕರ್‍ತಾ.

ಪವಿತ್ರ್ ಅತ್ಮ್ಯಾಚಿ ಮ್ಹೊರ್ ಮ್ಹಳ್ಯಾರ್ ಕಿತೆಂ?

ಥಿರಾವ್ಣೆ ಸಂಸ್ಕಾರಾ ಮುಕಾಂತ್ರ್ ಅತ್ಮೀಕ್ ರಿತಿನ್ ಘಟ್ ಜಾಲ್ಲೊ ಭಾವಾಡ್ತಿ ಉಗ್ತ್ಯಾನ್ ಕ್ರೀಸ್ತಾಕ್ ಸಾಕ್ಸ್ ದೀಂವ್ಕ್ ವಿಶೇಸ್ ಕುರ್ಪಾ ಜೊಡುನ್ ಘೆತಾ. ತ್ಯಾಚ್ ದೆಕುನ್ ತೆಲಾನ್ ಮಾಖ್ತಾನಾ ಗೊವ್ಳಿ ಬಾಪ್ ಮ್ಹಣ್ತಾ: “ಘೆ ಮ್ಹೊರ್ ಪವಿತ್ರ್ ಅತ್ಮ್ಯಾಚ್ಯಾ ದೆಣ್ಯಾಚಿ.” ಹೆಂ ಚಿಂತಪ್ ಜುದೆವ್ ನಿಯಮ್‌ಶಾಸ್ತ್ರಾ ಥಾವ್ನ್ ಯೆತಾ. ನಿರ್ಗಮನ್ (೨೧:೫-೬) ಆನಿ ದ್ವಿತಿನಿಯಮ್ (೧೫:೧೬-೧೭) ಗ್ರಂಥಾಂನಿ ಮೊಯ್ಜೆ ಅಶೆಂ ಕಾನೂನ್ ದಿತಾ: ‘ಜರ್ ಏಕ್ ಗುಲಾಮ್ ಆಪ್ಣೆಂ ಗುಲಾಮ್ ಜಾವ್ನ್ ಆಸಜೆ ಜಾಲ್ಲೊ ವಾಯ್ದೊ ಸಂಪ್ಲ್ಯಾ ಉಪ್ರಾಂತ್‌ಯೀ ತ್ಯಾ ಧನಿಯಾಚ್ಯಾ ಮೊಗಾನ್ ಶಾಶ್ವಿತ್ ಜಾವ್ನ್ ತ್ಯಾಚ್ ಧನಿಯಾಚೊ ಗುಲಾಮ್ ಜಾವ್ನ್ ಉರೊಂಕ್ ಸ್ವಖುಶೆನ್ ಆಶೆತಾ ತರ್, ಧನಿಯಾಚೊ ಗುಲಾಮ್ ಮ್ಹಣ್ ದಾಕೊಂವ್ಕ್ ಮ್ಹೊರ್ ಮಾರ್‌ಲ್ಲೆಬರಿ ತಾಚೆ ಕಾನ್ ತೊಪುಂಕ್ ಜಾಯ್’. ತೆಂಚ್ ಚಿಂತಪ್ ಘೆವ್ನ್ ಸಾಂ. ಪಾವ್ಲ್ ಎಫೆಜ್‌ಗಾರಾಂಕ್ ಬರಯಿಲ್ಲ್ಯಾ ಪತ್ರಾಂತ್ (೧:೧೩ ಆನಿ ೪:೩೦) ದೋನ್ ಕಡೆ ‘ಪವಿತ್ರ್ ಅತ್ಮ್ಯಾಚಿ ಮ್ಹೊರ್’ ಮ್ಹಳ್ಳೊ ಉಲ್ಲೇಖ್ ಕರ್‍ತಾ. ಹಾಂಗಾಸರ್ ಮ್ಹೊರ್ ಗುಲಾಮ್‌ಪಣ್ ನ್ಹಯ್ ಬಗಾರ್ ಅಸ್ಮಿತಾಯ್, ರಾಕ್ವಣ್ ಆನಿ ಶಾಶ್ವಿತ್ ಸಂಬಂದ್ ಮ್ಹಳ್ಳೊ ಅರ್ಥ್ ಘೆತಾ.

ಹೆ ದೊನೀ ಸಂಸ್ಕಾರ್ ಸಾಂಗಾತಾ ದೀಂವ್ಕ್ ಜಾಯ್ನಾಂತ್‌ಗೀ?

ಖಂಡಿತ್ ಜಾತಾತ್. ಚಡಾವತ್ ಜಾವ್ನ್ ವ್ಹಡಾಂಕ್ ಬಾವ್ತಿಜ್ಮ್ ದಿತಾನಾ, ಬಾವ್ತಿಜ್ಮ್, ಕ್ರೀಜ್ಮ್ ಆನಿ ಕುಮ್ಗಾರ್ ಸಾಂಗಾತಾ ದಿತಾತ್. ಸುರ್ವಿಲ್ಯೆ ಇಗರ್ಜ್‌ಮಾತೆಂತ್ ಹಿಚ್ ದಸ್ತುರ್ ಆಸ್‌ಲ್ಲಿ; ಆಜೂನ್ ಉದೆಂತಿಚ್ಯಾ ಕಥೊಲಿಕ್ ಪವಿತ್ರ್ ಸಭೆಂನಿ ಹೆ ತಿನೀ ಸಾಕ್ರಾಮೆಂತ್ ಬಾಳ್ಶ್ಯಾಂಕ್ ಸಾಂಗಾತಾ ದಿತಾತ್. ದೆಕುನ್ ಥಿರಾವ್ಣೆಚೊ ಸಾಕ್ರಾಮೆಂತ್ ಕುಡಿಚ್ಯೆ ವಾಡಾವಳೆಂತ್ ಪರಿಪಿಕಾಯೆಕ್ ಪಾವ್‌ಲ್ಲ್ಯಾಂಕ್ ಮಾತ್ರ್ ದಿಂವ್ಚೊ ಸಂಸ್ಕಾರ್ ನ್ಹಯ್. ಗೊವ್ಳಿಕ್ ಉದ್ದೇಶಾಖಾತಿರ್ ಇಗರ್ಜ್‌ಮಾತೆನ್, ಎಕಾ ವೆಕ್ತಿನ್ ಸ್ವಖುಶೆನ್ ನಿರ್ಧಾರ್ ಘೆಂವ್ಕ್ ಸಕ್ಚ್ಯೆ ಪ್ರಾಯೆರ್ ತೊ ದೀಂವ್ಕ್ ಠರಾಯ್ಲಾ. ಕಿತ್ಯಾಕ್ ಬಾವ್ತಿಜ್ಮ್ ಘೆತಾನಾ ಕಿತೆಂ ಘಡ್ತಾ ತೆಂ ಆಮ್ಕಾಂ ಕಳಿತ್ ಜಾಯ್ನಾ. ಪುಣ್ ಯುವಪ್ರಾಯ್, ಗಿನ್ಯಾನಾಚ್ಯೆ ಸಮ್ಜೊಣೆನ್ ಆನಿ ಸ್ವಖುಶೆನ್ ಭಾವಾಡ್ತಾಕ್ ವೇಂಗ್ ಮಾರುಂಕ್, ಇಗರ್ಜ್‌ಮಾತೆಂತ್ ಆಪ್ಣಾಚೆಂ ಮಿಸಾಂವ್ ಸಮ್ಜೊಂಕ್ ಆನಿ ದೆವಾಚ್ಯೆ ಕುರ್ಪೆಕ್ ಖುಶೆಮನಾನ್ ಸಹಕಾರ್ ದೀಂವ್ಕ್ ಆಧಾರ್ ದಿತಾ. ಜೆಂ ಕಿತೆಂ ಪವಿತ್ರ್ ಸ್ನಾನಾಂತ್ ಆರಂಭ್ ಜಾಲ್ಲೆಂ, ಥಿರಾವ್ಣೆ ಸಂಸ್ಕಾರಾಂತ್ ಪವಿತ್ರ್ ಅತ್ಮ್ಯಾನ್ ಮ್ಹೊರ್ ಮಾರ್‌ಲ್ಲ್ಯಾನ್ ಥಿರ್ ಜಾತಾ ಮಾತ್ರ್ ನ್ಹಯ್ ಮುಕಾರ್ ಜೊಡುಂಕ್ ಆಸ್ಚ್ಯೆ ಸಂಪೂರ್ಣ್‌ಕಾಯೆಚೊ ರಾಜ್‌ರಸ್ತೊ ಜಾತಾ.

ಏಕ್ ಚಾಲ್ತೆಂ ಉದಾಹರಣ್ ದಿಂವ್ಚೆಂ ತರ್, ಜೆದ್ನಾಂ ಏಕ್ ಬಾಳ್ಶೆಂ ಜಲ್ಮಾತಾ, ತಾಚೆಥಂಯ್ ಜೀವ್ ಆಸ್ತಾ. ಮನಿಸ್ ನ್ಹಯ್ ಮ್ಹಣ್ಚೆತಸಲೆಂ ಕಸಲೆಂಯ್ ಉಣೆಂಪಣ್ ತ್ಯಾ ಬಾಳ್ಶ್ಯಾಥಂಯ್ ಆಸಾನಾ. ಪುಣ್ ತೆಂ ಬಾಳ್ಶೆಂ, ಬಾಳ್ಶೆಂ ಜಾವ್ನ್‌ಚ್ ಉರಾನಾ. ತೆಂ ವಾಡ್ತಾ ಆನಿ ಮುಕಾರ್ ಆಪ್ಲ್ಯಾ ದಾತಾರಾಂಭಾಶೆನ್ ಆಪುಣ್‌ಯೀ ಜವಾಬ್ದಾರಿ ಘೆಂವ್ಚ್ಯಾ ಹಂತಾಕ್ ಪಾವ್ತಾ. ತ್ಯಾ ಲ್ಹಾನ್ ಬಾಳ್ಶ್ಯಾಕ್ ಆವಯ್ಚೆಂ ದೂದ್ ಪಾವ್ತಾ; ಚಡಿತ್ ಘಟಾಯೆಚ್ಯಾ ಖಾಣಾಚಿ ಗರ್ಜ್ ತಾಕಾ ನಾ. ಪುಣ್ ವಾಡ್ತಾನಾ ಸವ್ಕಾಸ್ ಸವ್ಕಾಸ್ ಸೆಂವ್ಚ್ಯಾ ಖಾಣಾಂತ್‌ಯೀ ಬದ್ಲಾವಣ್ ಜಾಯ್ ಪಡ್ತಾ. ತಶೆಂಚ್ ಆಮ್ಚ್ಯಾ ಅತ್ಮ್ಯಾಕ್ ಘಟಾಯ್ ದಿಂವ್ಚೊ ತೊಚ್ ಅತ್ಮೊ ತರೀ ಆಮ್ಚ್ಯೆ ಗರ್ಜೆತೆಕೀದ್ ಆನಿ ವಾಡಾವಳೆತೆಕೀದ್ ತೊ ಆಮ್ಕಾಂ ಘಟಾಯ್ ದಿತಾ.

ಥಿರಾವ್ಣೆಚೊ ಸಂಸ್ಕಾರ್ ಬಿಸ್ಪ್ ಸಾಯ್ಬಾನ್‌ಚ್ ಕಿತ್ಯಾಕ್ ದೀಜೆ?

‘ಆಪೊಸ್ತಲಿಕ್ ಅನುಕ್ರಮ್’ (Apostolic Succession) ಇಗರ್ಜ್‌ಮಾತೆಂತ್ ಸುರ್ವೆರ್ ಥಾವ್ನ್‌ಚ್ ಬೊವ್ ಗಂಭೀರ್ ಜಾವ್ನ್ ಘೆತ್‌ಲ್ಲೆಂ ಆಮ್ಕಾಂ ಪಳೆಂವ್ಕ್ ಮೆಳ್ತಾ. ತೆ ಕೊಣೀ ಮನ್ಶಾನ್ ತೆಂ ಅಶೆಂಚ್ ಜಾಯ್ಜೆ ಮ್ಹಣ್ ಠರಾಯಿಲ್ಲೆಂ ನ್ಹಯ್. ಪವಿತ್ರ್ ಅತ್ಮ್ಯಾನ್‌ಚ್ ತೆಂ ಠರಾಯ್ಲಾಂ. ಹ್ಯಾ ವಿಶಿಂ ಧರ್ಮ್‌ಧುತಾಂಚ್ಯಾ ಕೃತ್ಯಾಂ ಪುಸ್ತಕಾಂತ್ (೮:೫-೧೭) ಆಮಿ ವಾಚ್ತಾಂವ್. ಸುರ್ವಿಲ್ಯೆ ಇಗರ್ಜ್‌ಮಾತೆಂತ್ ಹಂತಾಂ-ಹಂತಾಂನಿ ವಾಡೊಂಕ್ ಆರಂಭ್ ಜಾಲ್ಲ್ಯಾ ಸಾಕ್ರಾಮೆಂತಾಂಚ್ಯಾ ದೇವ್‌ಶಾಸ್ತ್ರಾಂತ್ ಬಾವ್ತಿಜ್ಮ್ ಆನಿ ಥಿರಾವ್ಣಿ ಸಾಂಗಾತಾ ಪಳೆಂವ್ಕ್ ಮೆಳ್ಚೊ ಪಯ್ಲೊ ಧಾಕ್ಲೊ ಹೊ. ಫಿಲಿಪ್ ಸುರ್ವಿಲ್ಯಾ ಸಾತ್ ದಿಯಾಕೊನಾಂಪಯ್ಕಿ ಎಕ್ಲೊ, ಸಾಮಾರಿಯಾಂತ್ ಸುವಾರ್ತಾ ಪರ್ಗಟ್ ಕರ್‍ನ್ ಥಂಯ್ಚ್ಯಾ ಲೊಕಾಕ್ ಜೆಜುಚ್ಯಾ ನಾಂವಾನ್ ಬಾವ್ತಿಜ್ಮ್ ದಿತಾ ಶಿವಾಯ್ ಪವಿತ್ರ್ ಅತ್ಮ್ಯಾಚ್ಯಾ ದೆಣ್ಯಾನ್ ನ್ಹಯ್. ಮ್ಹಣ್ಜೆ ದಿಯಾಕೊನ್ ಫಿಲಿಪ್ ಪವಿತ್ರ್ ಸ್ನಾನ್ ದಿತಾ ತರೀ ಪವಿತ್ರ್ ಅತ್ಮೊ ದೆಂವೊನ್ ಯೇನಾ. ಉಪ್ರಾಂತ್ ಜೆದ್ನಾಂ ಆಪೊಸ್ತಲ್ ಪೆದ್ರು ಆನಿ ಜುವಾಂವ್ ಮಾಗ್ಣೆಂ ಕರ್‍ನ್ ತಾಂಚೆರ್ ಹಾತ್ ದವರ್‍ತಾತ್ ತೆದ್ನಾಂ ತಾಂಚೆರ್ ಪವಿತ್ರ್ ಅತ್ಮೊ ದೆಂವ್ತಾ. ಅಶೆಂ ಸುರ್ವೆರ್ ಥಾವ್ನ್‌ಚ್ ಆಸ್‌ಲ್ಲಿ ಆಪೊಸ್ತಲಿಕ್ ಅಧಿಕಾರಾಚಿ ಶಿಂಕಳ್ ದೋನ್ ಹಜಾರ್ ವರ್‍ಸಾಂಚ್ಯೆ ಕಥೊಲಿಕ್ ಪವಿತ್ರ್ ಸಭೆಚ್ಯೆ ಚರಿತ್ರೆಂತ್ ಕೆದಿಂಚ್ ತುಟೊಂಕ್ ನಾ. ಬಿಸ್ಪಾಂಥಾವ್ನ್ ಬಿಸ್ಪಾಂಕ್ ತಾಂಚ್ಯಾ ಮಾತ್ಯಾರ್ ಹಾತ್ ದವರ್‍ಚೆಮುಕಾಂತ್ರ್ ತಿ ದೆಂವೊನ್ ಆಯ್ಲ್ಯಾ. ದೆಕುನ್ ಹೊ ಅಧಿಕಾರ್ ಬಿಸ್ಪ್ ಸಾಯ್ಬಾಕ್ ಮಾತ್ರ್ ಆಸಾ ಶಿವಾಯ್ ಯಾಜಕಾಂಕ್ ಆನಿ ದಿಯಾಕೊನಾಂಕ್ ನಾ. ತಶೆಂ ಜಾಲ್ಲ್ಯಾನ್ ಬಿಸ್ಪ್ ಸಾಯ್ಬಾನ್ ಅಧಿಕಾರ್ ದಿಲ್ಲ್ಯಾ ಶಿವಾಯ್ ಥಿರಾವ್ಣಿ ಆನಿ ಒಡ್ದಿಚೊ ಸಂಸ್ಕಾರ್ ಎಕಾ ಯಾಜಕಾನ್ ದೀಂವ್ಕ್ ಸಾಧ್ ನಾ.

ತರ್ ಬಾವ್ತಿಜ್ಮ್ ಕೊಣೆಂ ದಿವ್ಯೆತ್?

ಬಾವ್ತಿಜ್ಮಾಚೊ ಚಾಲ್ತೊ ಮ್ಹಣಿಯಾರಿ ಗೊವ್ಳಿಬಾಪ್, ಯಾಜಕ್ ಆನಿ ದಿಯಾಕೊನ್. ಪುಣ್ ತುರ್ತ್ ಪರಿಸ್ಥಿತೆಂತ್ ಮ್ಹಣ್ಜೆ ಬಾಳ್ಶೆಂ ವಾ ಬಾವ್ತಿಜ್ಮ್ ಘೆಜೆ ಜಾಲ್ಲಿ ವೆಕ್ತಿ ಮರ್‍ಣಾಚ್ಯೆ ತಣಿರ್ ಆಸಾ ತರ್ ಕೊಣೆಂಯ್- ಕಥೊಲಿಕಾನ್ ವಾ ಕ್ರಿಸ್ತಾಂವ್ ನ್ಹಯ್ ಆಸ್‌ಲ್ಲ್ಯಾನ್ ಸಯ್ತ್ ಬಾವ್ತಿಜ್ಮ್ ದಿವ್ಯೆತ್. ಪುಣ್ ಬಾವ್ತಿಜ್ಮ್ ದಿತೆಲ್ಯಾನ್ ಬಾವ್ತಿಜ್ಮಾವಿಶಿಂ ಇಗರ್ಜ್‌ಮಾತೆಚೊ ಇರಾದೊ ಕಿತೆಂ ಆಸಾ ತೆಂ ಮನಾಂತ್ ಧರುಂಕ್ ಜಾಯ್, ಉದಕ್ ತ್ಯಾ ಬಾಳ್ಶ್ಯಾಚ್ಯಾ ವಾ ವೆಕ್ತಿಚ್ಯಾ ಮಾತ್ಯಾರ್ ವೊತುಂಕ್ ಜಾಯ್ ಆನಿ “ಹಾಂವ್ ತುಕಾ ಪವಿತ್ರ್ ಸ್ನಾನ್ ದಿತಾಂ, ಬಾಪಾಚೆ, ಪುತಾಚೆ ಆನಿ ಪವಿತ್ರ್ ಅತ್ಮ್ಯಾಚೆ ನಾಂವಿಂ” ಮ್ಹಳ್ಳೆಂ ಸೂತ್ರ್ ಸಾಂಗೊಂಕ್ ಜಾಯ್. (ಕಥೊಲಿಕ್ ಧರ್ಮ್‌ಸಭೆಚಿ ಶಿಕೊವ್ಣ್ (ccc) ೧೨೫೬-೧೨೫೮, ಪವಿತ್ರ್ ಸಭೆಚೆಂ ಕಾನೂನ್ Code of Canon Law-೮೬೧). ಹ್ಯೊ ತಿನೀ ಸಂಗ್ತಿ ಸಾಂಗಾತಾ ಆಸೊನ್ ದಿಲ್ಲೊ ಪವಿತ್ರ್ ಸ್ನಾನ್ ಇಗರ್ಜ್‌ಮಾತಾ ಮಾಂದುನ್ ಘೆತಾ.

ಥಿರಾವ್ಣೆಚೊ ಸಂಸ್ಕಾರ್ ಘೆನಾತ್ಲ್ಯಾರ್ ಕಿತೆಂ ಜಾತಾ?

ಥಿರಾವ್ಣೆಚೊ ಸಂಸ್ಕಾರ್ ಮಿಸಾಂವಾಚೊ ಸಂಸ್ಕಾರ್. ಸಾಲ್ವಾಸಾಂವ್ ಜೊಡುಂಕ್ ಬಾವ್ತಿಜ್ಮ್ ದಾರ್‍ವಾಟೊ ಉಘಡ್ತಾ ತರ್, ಕ್ರಿಸ್ತಾಂವ್ಪಣಾಚೊ ಪುರ್‍ತೊ ಫಳ್ ಜೊಡುಂಕ್ ಆನಿ ತೊ ಫಳ್ ಹೆರಾಂಸಂಗಿ ವಾಂಟುನ್ ಘೆಂವ್ಕ್ ಥಿರಾವ್ಣೆಚೊ ಸಂಸ್ಕಾರ್ ಗರ್ಜ್. ಥಿರಾವ್ಣೆಚೊ ಸಂಸ್ಕಾರ್ ಘೆತ್ಲ್ಯಾ ಉಪ್ರಾಂತ್ ಭಾಯ್ಲ್ಯಾನ್ ಆಮ್ಚೆಥಂಯ್ ಕಾಂಯ್ಚ್ ಬದ್ಲಾವಣ್ ದಿಸಾನಾ ತರೀ, ಕಾಳೊಕೀ ಸಕ್ತ್ಯೊ ತ್ಯಾ ವೆಕ್ತಿಚೆರ್ ಆಸ್ಚಿ ಪವಿತ್ರ್ ಅತ್ಮ್ಯಾಚಿ ಮ್ಹೊರ್ ಪಾರ್ಕುಂಕ್ ಸಕ್ತಾತ್ ಆನಿ ತಿತ್ಲ್ಯೆ ಸುಲಬಾಯೆನ್ ತಾಚೊ ಅತ್ಮೊ ನಾಸಾಚ್ಯೆ ವಾಟೆಕ್ ವ್ಹರುಂಕ್ ಸಕನಾಂತ್. ಸೊಂಪ್ಯಾ ಉತ್ರಾಂನಿ ಸಾಂಗ್ಚೆಂ ತರ್, ಹಿ ಪವಿತ್ರ್ ಅತ್ಮ್ಯಾಚಿ ಮ್ಹೊರ್ ಖೊಟ್ಯಾ ಸಕ್ತಿಂವಿರೋಧ್ ವ್ಯಾಕ್ಸಿನ್ ಆಸ್‌ಲ್ಲೆಬರಿ. ತ್ಯಾ ದೆಕುನ್ ಜಾಣಾಸೊನ್ ಆನಿ ಸ್ವಖುಶೆನ್ ಕೊಣೀ ಹೊ ಸಂಸ್ಕಾರ್ ನಾಕಾರ್‍ತಾ ತರ್ ಕ್ರೀಸ್ತಾನ್ ತಾಕಾ ದೀಂವ್ಕ್ ಆಶೆಂವ್ಚಿ ಕುರ್ಪಾ ಆನಿ ರಕ್ಶಣ್ ನಾಕಾರ್‍ತಾ ಮ್ಹಣ್ ಪವಿತ್ರ್ ಸಭಾ ಶಿಕಯ್ತಾ.

ಸಮಾಪ್ತ್

ಸಂಸ್ಕಾರ್ ಆಸಾತ್ ಸಾತ್. ಪಯ್ಲೆ ತೀನ್ ಆನಿ ಉಪ್ರಾಂತ್ಲೆ ಚಾರ್ ಮ್ಹಣ್ ತೆ ವಿಂಗಡ್ ಕೆಲ್ಯಾತ್. ಬಾವ್ತಿಜ್ಮ್, ಕ್ರೀಜ್ಮ್ ಆನಿ ಕುಮ್ಗಾರ್ ಆಮ್ಚ್ಯಾ ಭಾವಾಡ್ತಾಕ್ ಬುನ್ಯಾದ್ ಜಶೆಂ ಕಾಮ್ ಕರ್‍ತಾತ್ ತರ್, ಕುಮ್ಸಾರ್, ಸಾಂತುಕ್ಸಾಂವ್, ಓಡ್ದ್ ಆನಿ ಲಗ್ನ್, ತೊ ಭಾವಾಡ್ತ್ ಆಮ್ಚ್ಯೆ ಜಿಣಿಯೆಂತ್ ಜಿಯೆಂವ್ಕ್ ಆಧಾರ್ ದಿತಾತ್. ಹೆ ಸಾತ್‌ಯೀ ಸಂಸ್ಕಾರ್ ಪವಿತ್ರ್ ತ್ರಿತ್ವೆಚ್ಯಾ ಅಪರಿಮಿತ್ ಮೊಗಾಚಿ ನಿಶಾನಿ ಜಾವ್ನಾಸೊನ್ ಇಗರ್ಜ್‌ಮಾತಾ ವಾಟಂವ್ಚ್ಯಾಕ್ ಆಮ್ಕಾಂ ಮಜತ್‌ದಾರ್ ಜಾವ್ನ್ ಪಾಟಯ್ಲಲ್ಯಾ ಪವಿತ್ರ್ ಅತ್ಮ್ಯಾಚ್ಯೆ ಸಕ್ತೆನ್ ಆಮ್ಕಾಂ ಪವಿತ್ರ್ ಕರ್‍ತಾತ್. ದೆಕುನ್ ಸಂಸ್ಕಾರ್ ವೆವೆಗ್ಳೆ ತರೀ ಎಕ್‌ಚ್ ಪವಿತ್ರ್ ಅತ್ಮೊ ತಾಂಚೆಮುಕಾಂತ್ರ್ ವಿವಿಧ್ ಕಾಮಾಂ ಕರ್‍ತಾ. ಜಶೆಂ ಆಮಿ ಖೆಲ್ಲೆಂ ಖಾಣ್ ಆಮ್ಚೆಭಿತರ್ ಕಶೆಂ ಆಮ್ಕಾಂ ಸಕತ್ ದೀಂವ್ಕ್ ಸಕ್ತಾ ಮ್ಹಣ್ ಆಮ್ಕಾಂ ಕಳ್ನಾ ತರೀ ಆಮ್ಚ್ಯಾ ಜಿವಾಂತ್ ತ್ಯಾ ಖಾಣಾಥಾವ್ನ್ ಲಾಬ್‌ಲ್ಲಿ ಸಕತ್ ಭೊಗುಂಕ್ ಸಕ್ತಾಂವ್, ತಶೆಂಚ್ ಹ್ಯಾ ಸಂಸ್ಕಾರಾಂ ಮುಕಾಂತ್ರ್ ಆಮ್ಚ್ಯಾ ಅತ್ಮ್ಯಾಂತ್ ಜಾಲ್ಲಿ ಬದ್ಲಾವಣ್ ಆಮ್ಕಾಂ ಕಳ್ನಾ ತರೀ ಪವಿತ್ರ್ ಅತ್ಮ್ಯಾಚ್ಯಾ ಫಳಾಂಮುಕಾಂತ್ರ್ ಆಮ್ಕಾಂ ಆನಿ ಹೆರಾಂಕ್ ಕಳೊನ್ ಯೆತಾ ಮ್ಹಳ್ಳೆಂ ಖಂಡಿತ್.

ಫ್ರಾದ್ ಆರನ್ ಬಬುಶ್, ಕಾರ್ಮೆಲಿತ್