ಪಾಟ್ಲ್ಯಾ ಪಾಂಚ್ ವರ್‍ಸಾಂಥಾವ್ನ್ ಇಜಯ್‌ಚ್ಯೆ ಫುಟ್‌ಪಾತಿರ್ ಚಲೊನ್ ವೆಚ್ಯಾ ಅಮೀರ್ ಭಾಯ್‌ಕ್ ಹಾಂವ್ ಪಳೆತಾಂ. ತಾಚ್ಯಾ ಎಕಾ ಕುಶಿಕ್ ಬಳ್ ಉಣೆಂ ತರೀ ಕಶೆಂ ಪುಣೀ ಬೇತ್ ತೆಂಕುನ್ ಸವ್ಕಾಸ್ ತೊ ಚಲ್ತಾ. ಭೆಟ್ಲ್ಯಾರ್ ಹಾಸೊನ್ ಉಲಯ್ತಾ. ಎಕಾ ದಿಸಾ “ಸ್ಮಾರ್ಟ್ ಸಿಟಿಂತ್ ಆಮಿ ಸಯ್ತ್ ಸ್ಮಾರ್ಟ್ ಜಾಯ್ಜೆ” ಮ್ಹಣ್ ತಾಣೆಂ ಮ್ಹಾಕಾ ಹಾಸೊನ್ ಸಾಂಗ್‌ಲ್ಲೆಂ. ಪುಣ್ ಥೊಡ್ಯಾ ದಿಸಾಂ ಆದಿಂ ಹಾಂವ್ ಮಾರ್ಕೆಟಿಕ್ ವಚೊನ್ ಪಾಟಿಂ ಯೆತಾಂ ಮ್ಹಣಾಸರ್ ಆಂಗ್ಡಿಚ್ಯಾ ಮೆಟಾರ್ ತೊ ಬಸ್‌ಲ್ಲೆಂ ಪಳಯ್ಲೆಂ. “ಕಿತ್ಯಾಕ್ ಚಲೊಂಕ್ ನಾಂಯ್ ಆಜ್?” ಮ್ಹಣ್ ವಿಚಾರ್‍ತಾನಾ ತಾಣೆಂ ಫಕತ್ ಹಾತ್ ಉದಾರೆ ಕೆಲೆ. ತಿತ್ಲ್ಯಾರ್ ಥಂಯ್ ಆಸ್‌ಲ್ಲ್ಯೆ ಎಕ್ಯೆ ಸ್ತ್ರೀಯೆನ್ ಕನ್ನಡಾಂತ್ ಸಾಂಗ್ಲೆಂ “ಅವರು ಹೇಗೆ ನಡೆಯುವುದು? ಬೈಕ್, ಕಾರ್ ಫುಟ್‌ಪಾತಿನಲ್ಲಿ ಪಾರ್ಕ್ ಮಾಡ್ತಾರೆ, ನೋಡಿ ಆ ಅಂಕಲ್ ಎರಡು ಕೈಯಲ್ಲಿ ಎರಡು ನಾಯಿಗಳನ್ನು ಇಡೀ ಫುಟ್‌ಪಾತಿನಲ್ಲಿ ನಡೆಸಿ ಹೋಗುವಾಗ, ಪಾಪಾ! ಅವರು ನಡೆಯುವುದು ಹೇಗೆ?”

ಆಮ್ಚಿ ಫುಟ್‌ಪಾತ್ ಕೊಣೆಂ ಚೊರ್‍ಲ್ಯಾ?

ಹೆಂ ಸವಾಲ್ ಫಕತ್ ಅಮೀರ್ ಬಾಯ್‌ಚೆಂ ನ್ಹಯ್. ಆಮ್ಚ್ಯಾ ಶಹರಾಚೆಂ, ಆಮ್ಚ್ಯೆ ಪೆಂಟೆಚೆಂ, ಸಮಾಜೆಚೆಂ ಆನಿ ಆಮ್ಚ್ಯಾ ಖಾಸ್ ಸಂಸಾರಾಚೆಂ. ಫುಟ್‌ಪಾತ್ ಕೊಣಾಚಿ? ತಿಕಾ ತುಜೆಂ ನಾಂವ್ ಕಳಿತ್ ನಾ. ತುಜಿ ಜಾತ್ ಆನಿ ಧರ್ಮ್ ಕಳಿತ್ ನಾ. ತುಜೆಂ ಶಿಕಾಪ್, ಪ್ರತಿಶ್ಟಾ? ವಾ ಗ್ರೇಸ್ತ್‌ಕಾಯ್ ಕಳಿತ್ ನಾ. ಫುಟ್‌ಪಾತ್ ಏಕ್ ಪ್ರಜಾಪ್ರಭುತ್ವಾಕ್ ಸಾಕ್ಸ್ ಜಾಂವ್ಚೊ ಜಾಗೊ! ತೊ ಸಮಾನ್ ರಿತಿನ್ ಭುರ್ಗ್ಯಾಂಕ್, ಮಾಲ್ಗಡ್ಯಾಂಕ್ ಚಲೊಂಕ್ ಕಶ್ಟಾತೆಲ್ಯಾಂಕ್, ಕುಲ್ಕಾರಾಂಕ್, ಅಧಿಕಾರಿಂಕ್ ಆನಿ ಸಾಮಾನ್ಯ್ ನಾಗರಿಕಾಂಕ್ ವಾಟ್ ಜಾತಾ.

ಪುಣ್ ಆಜ್ ಕಿತೆಂ ಜಾತಾ? ಆಂಗ್ಡಿಗಾರ್ ತಿಚ್ಯಾ ಉಸ್ಕ್ಯಾರ್ ಬಸ್ತಾ. ಎಕ್ಲೊ ಬೈಕ್ ತಿಚೆರ್ ಚಡಯ್ತಾ. ಎಸ್‌ಯುವಿ ತಿಚೆರ್ ಸುಶೆಗಾತ್ ರಾವ್ತಾ. ಬಿಲ್ಡರ್ ತಿಚೆರ್ ರೇಂವ್ ದವರ್‍ತಾ. ಎಕ್ಲೊ ಅಂಕಲ್ ಸುಣ್ಯಾಂಕ್ ಘೆವ್ನ್ ಫುಟ್‌ಪಾತಿರ್‌ಚ್ ಮ್ಹೆಳೆಂ ಕರವ್ನ್ ಭೊಂವ್ಡಾಯ್ತಾ. ಆನಿ ಆಖೇರಿಕ್ ಚಲ್ಚೊ ‘ಪಾದಾಚಾರಿ’ ಮನಾಂತ್ ಆಕಾಂತ್ ಘೆವ್ನ್ ಫುಟ್‌ಪಾತ್ ಸೊಡ್ನ್ ರಸ್ತ್ಯಾರ್ ಚಲ್ತಾ. ಆಮ್ಚಿ ಸಮಾಜ್ ಕಶಿ ಆಸಾ? ತಿ ಕೊಣಾಕ್ ಮಾನ್ ದಿತಾ? ಕೊಣಾಕ್ ಸೊಸ್ತಾ? ಆನಿ ಕೊಣಾಚ್ಯಾ ಹಕ್ಕಾಕ್ ಬಲಿದಾನ್ ದಿತಾ ಹೆಂ ಸರ್ವ್ ಆಮ್ಚಿ ಫುಟ್‌ಪಾತ್ ಪಳೆತಾನಾ ಕಳ್ತಾ.

ಪಾಟ್ಲ್ಯಾ ಎಕಾ ಮ್ಹಯ್ನ್ಯಾಥಾವ್ನ್ ಬೆಂಗ್ಳುರಾಂತ್ ಮುನ್ಸಿಪಾಲ್ ಅಧಿಕಾರಿ ಜೆಸಿಬಿ ವಾಪಾರ್‍ನ್ ರಸ್ತ್ಯಾ ದೆಗೆಚಿ ಫುಟ್‌ಪಾತ್ ನಿತಳ್ ಕರ್‍ಚಿಂ ದೃಶ್ಯಾಂ ಪಳೆಂವ್ಕ್ ಮೆಳ್ತಾತ್. ಮಂಗ್ಳುರಾಂತೀ ಫುಟ್‌ಪಾತಿರ್ ವಿಕ್ರೊ ಕರ್‍ತೆಲ್ಯಾಂಕ್ ಉಟಯ್ಲಾಂ. ಪೊಟಾ ಭುಕೆಖಾತಿರ್ ಅಶೆಂ ರಾಂದ್ವಯ್ ವಿಕ್ತಲ್ಯಾಂಚಿಂ ಸ್ಟಾಲಾಂ ಧರ್ಣಿಕ್ ಶೆವ್ಟಿತಾನಾ ತ್ಯಾಚ್ ಕುಶಿಚ್ಯಾ ರಸ್ತ್ಯಾಚ್ಯೆ ಫುಟ್‌ಪಾತಿರ್ ಗ್ರೆಸ್ತಾಂಚಿಂ ವ್ಹಡ್ ವ್ಹಡ್ ಕಾರಾಂ ಆರಾಮಾಯೆನ್ ಆನಿ ಗರ್ವಾನ್ ಸುಶೆಗಾತ್ ಉಭಿಂ ರಾವ್ಲ್ಯಾಂತ್.

ಅತಿಕ್ರಮಣ್ ಖರೆಂಚ್ ಕಿತೆಂ?

ಆಜ್ ‘ಅತಿಕ್ರಮಣ್’ ಮ್ಹಳ್ಯಾರ್ ಆಮ್ಚ್ಯಾ ದೊಳ್ಯಾಂಮುಖಾರ್ ಭುಂಯ್ಚೊ ಕುಡ್ಕೊ, ಅಕ್ರಮ್ ಕಟ್ಟೊಣ್ ವಾ ಫುಟ್‌ಪಾತಿಚೆರ್ ದವರ್‍ಲಲ್ಯೊ ಗೊಣಿಯೊ ಯೆತಾತ್. ಖರೆಂಚ್ ಅತಿಕ್ರಮಣ್ ಮ್ಹಳ್ಯಾರ್ ತೆಂಚ್‌ಗಾಯ್? ಅತಿಕ್ರಮಣ್ ಮ್ಹಳ್ಯಾರ್ ಆಪ್ಲೆಂ ನ್ಹಯ್ ಆಸ್ಲಲ್ಯಾಚೆರ್ ಆಪ್ಲೆಂ ಹಕ್ಕ್ ಸ್ಥಾಪುಂಕ್ ಪ್ರಯತ್ನ್ ಕರ್‍ಚೆಂ. ಹೆರಾಂಚ್ಯಾ ವಾಂಟ್ಯಾಚೆರ್ ಆಪ್ಲೊ ಪಾಂಯ್ ದವರ್‍ಚೊ. ಖಂಯ್ಚೆಂಯ್ ತಳೆಂ ಅಚಾನಕ್ ಮಾಯಾಗ್ ಜಾಯ್ನಾ. ರಾನಾಂತ್ ಅಚಾನಕ್ ಉಜ್ವಾಡಾಚೆಂ ಆವ್ರ್ ಯೇನಾ. ಉಜ್ವಾಡ್ ಇಲ್ಲೊ ಇಲ್ಲೊಚ್ ರಾನಾಕ್ ಗಿಳ್ತಾ ಆನಿ ಸಾವ್ಳಿ ಕುತಿಯೆಕ್ ಸಾಂಡುನ್ ಪೋಳ್ನ್ ಧಾಂವ್ತಾ. ಥಂಯ್ ನವೆಂ ರೆಸೊರ್ಟ್ ಉದೆತಾ. ಪರ್ಜೆರಾಜ್ ಹಜಾರ್ ಅತಿಕ್ರಮಣಾಂನಿ ಕೊಸ್ಳತಾ. ಹರ್‍ಯೆಕ್ ಭಾಯ್ಲೆಂ ಅತಿಕ್ರಮಣ್ ಪಯ್ಲೆಂ ಮನ್ಶಾಚ್ಯಾ ಭಿತರ್‍ಲ್ಯಾ ಮನಾಂತ್ ಜಾತಾ.

ಆಶಾ ಪಯ್ಲೆಂ ಕಾಳ್ಜಾಕ್ ಅತಿಕ್ರಮಣ್ ಕರ್‍ತಾ. ಉಪ್ರಾಂತ್ ವಿಚಾರಾಂಕ್, ಮಾಗಿರ್ ಸಾರ್ವಜನಿಕ್ ಸಂಗ್ತಿಂಕ್, ಸಂಸ್ಥ್ಯಾಭಿತರ್ ರಿಗುನ್ ಜಾಗೊ ಆಪ್ಣಾಯ್ತಾ. ಅಪಾರ್ಟ್‌ಮೆಂಟಾಚ್ಯಾ ಸಾಮೂಹಿಕ್ ಜಾಗ್ಯಾರ್ ಪಯ್ಲೆಂ ಏಕ್ ಕಪಾಟ್ ಯೆತಾ. ಮಾಗಿರ್ ವಾಶಿಂಗ್ ಮಿಶಿನ್, ಉಪ್ರಾಂತ್ ಗೊಣಿಯೊ ಆನಿ ನಿಮ್ಣೆಂ, ತೊ ಜಾಗೊ ಸರ್ವಾಂಚೊ ಜಾವ್ನ್ ಉರಾನಾ. ಅಶೆಂ ಇಲ್ಲೆಂ ಇಲ್ಲೆಂಚ್ ಮ್ಹಣ್ ಮನ್ಶಾಚೊ ಆಬ್ಲೆಸ್ ಆಪ್ಲಿ ಸಹಜ್ ಗಡ್ ಮಿರ್ವೊನ್ ಉಸಳ್ತಾನಾ ಅತಿಕ್ರಮಣಾಚೊ ಜಲ್ಮ್ ಜಾತಾ.

ಪ್ರಕೃತಿ ನೊಟಿಸ್ ದಿತಾನಾ

ಲೇಖಕ್ ಡೊ. ಚಾರ್ಲ್ ಲೋಬೊ ‘ಮ್ಹಜ್ಯಾ ವಾಂಟ್ಯಾಚೊ ಸುರ್ಯೊ’ ಕಾಣ್ಯೆಂತ್ ಸಾಂಗ್ತಾ ‘ಆಮ್ಚ್ಯಾ ಹಕ್ಕಾಂಚಿ ಚೊರಿ ಜಾಂವ್ಚಿ ಆಮಿ ನಿದೊನ್ ಪಡ್ತಾಂವ್ ತೆದ್ನಾಂ.ಮ್ಹಜ್ಯಾ ವಾಂಟ್ಯಾಚೊ ಸುರ್ಯೊ ಚೊರ್‍ಚ್ಯಾ ರಾಕ್ಸಾಂಕ್ ಮಾರುಂಕ್ ಕಸಲೆಂ ಬ್ರಹ್ಮಾಸ್ತ್ರ್ ಜಾಯ್? ಮ್ಹಜೊ ಸುರ್ಯೊ, ಮ್ಹಜೆಂ ವಾರೆಂ, ಮ್ಹಜೆ ರೂಕ್, ಮ್ಹಜೆ ಗುಡೆ, ಮ್ಹಜೆ ಪರ್ವತ್, ಮ್ಹಜ್ಯೊ ನ್ಹಂಯೊ, ಮ್ಹಜೆ ಥಾವ್ನ್ ಪಯ್ಸ್ ಕರ್‍ಚ್ಯಾ ಹ್ಯಾ ರಾಕ್ಕೊಸಾಂಸಾಂಗಾತಾ ಝಗ್ಡೊಂಕ್ ಸಾಧ್ ಆಸಾ?

ಆಮ್ಚ್ಯಾ ಶಹರಾಂನಿ ಆನಿ ಪೆಂಟೆಂನಿ ಹಾಚೆ ಪರಿಣಾಮ್ ಸ್ಪಶ್ಟ್ ಜಾವ್ನ್ ದಿಸ್ತಾತ್. ಬಿಲ್ಡರ್ಸ್ ಆನಿ ಕಾರ್ಪೊರೇಟ್ ಸಂಸ್ಥಾಂಚ್ಯಾ ಫಾಯ್ದ್ಯಾಖಾತಿರ್ ಉದ್ಕಾಚಿಂ ತಳಿಂ ಮಾತ್ಯೆಂತ್ ದಾಂಪ್ತಾತ್. ವ್ಹಾಳ್ ಗಟಾರ್ ಜಾವ್ನ್ ಬದ್ಲಾತಾತ್. ಲಕ್ಸುರಿ ವಿಲ್ಲಾಖಾತಿರ್ ಸುಂದರ್ ದೊಂಗರ್ ಪೊಕೊರ್‍ನ್ ಕಾಡ್ತಾತ್. ದುಬ್ಳ್ಯಾಚ್ಯಾ ಅಕ್ರಮಾಕ್ ಬುಲ್ಡೊಜರ್ ಜಾಗೆಂ ಜಾತಾ ತರ್, ಸಾವ್ಕಾರಾಂಚ್ಯಾ ಆಕ್ರಮಾಕ್ ಕಾನೂನ್ ದುರ್ಬಳೆಂ ಜಾತಾ ಆನಿ ಡೆವಲಪ್‌ಮೆಂಟ್ ಮ್ಹಣ್ ರಸ್ತೊ ರುಂದಾತಾ. ಬಳಾಧಿಕ್ ಸಕ್ತ್ಯೊ ಹರ್‍ಯೆಕಾ ಮನ್ಶಾಖಾತಿರ್ ಆಸ್ಚ್ಯೆ ಸಾರ್ವಜನಿಕ್ ಆಸ್ತಿಚೆರ್ ಚುಪ್‌ಚಾಪ್ ಆಪ್ಲೊ ಅಕ್ರಮ್ ಆದಾರ್‍ತಾನಾ ಅಮೀರ್ ಭಾಯ್ ತಸಲೆ ಸಾದೆ ಜೀವ್ ಭಿರ್ಮತ್ ಜಾವ್ನ್ ಹಾತ್ ಉದಾರೆ ಕರ್‍ತಾತ್.

ಆಮಿ ಆಮ್ಚ್ಯಾ ಭುರ್ಗ್ಯಾಂಕ್ ಬರೆಂ ಶಿಕಪ್, ಘರ್ ಆನಿ ಆಸ್ತ್ ದಿತಾಂವ್. ಪುಣ್ ಏಕ್ ಸವಾಲ್ ವಿಚಾರಿಜೆ ಪಡ್ತಾ. ಮುಕ್ಲ್ಯೆ ಪಿಳ್ಗೆಕ್ ಆಮಿ ಖರೆಂಚ್ ಕಿತೆಂ ಉರಯ್ತಾಂವ್? ಉದಕ್ ನಾಣಲ್ಲೆಂ ಶ್ಹೆರ್? ರೂಕ್ ನಾತ್‌ಲ್ಲೆಂ ರಾನ್? ನ್ಹಯೊ ನಾತ್‌ಲ್ಲೊ ಗಾಂವ್? ವಾರೆಂ ನಾತ್‌ಲ್ಲೆಂ ಮೊಳಾಬ್. ಮೌನ್ ನಾತ್‌ಲ್ಲೆಂ ಜಿವಿತ್?

ಕವಿ ಆಂಡ್ರ್ಯೂ ಎಲ್ ಡಿಕೂನ್ಹಾಚ್ಯಾ ಬಾಳಾ, ತುಜೆಂ ತಿ ಕಿತೆಂ ಲುಟ್ತಾತ್? ಕವಿತೆಂತ್ ನವೆಂ ಘರ್ ಬಾಂದುಂಕ್ ರೂಕ್ ಕಾತರ್‍ನ್ ಆಸ್ತಾನಾ, ರುಕಾಕ್ ಪಡ್ಚ್ಯಾ ಎಕೆಕಾ ಮಾರಾಕ್ ಗರ್ಭಾಂತ್ಲೆಂ ಬಾಳ್ ಉಡುನ್ ಪಡುನ್ ಗರ್ಭೆಸ್ತಿಣಿಕ್ ಭಿತರ್ ಖೊಟಾವ್ನ್ ರಾವ್ತಾ. ಪೊಟಾಂತ್ಲ್ಯಾ ಬಾಳಾಲಾಗಿಂ ಆವಯ್ ವಿಚಾರ್‍ತಾ, ತೆ ರೂಕ್ ಕಾತರ್‍ಚೆ ಮನಿಸ್ / ತುಜೆಂ ಕಿತೆಂ ಲುಟುನ್ ಅಸಾತ್ ಮ್ಹಣ್/ ಅಶೆಂಯ್ ಮ್ಹಜ್ಯಾ ಗಭಾಂತ್ ಖೊಟಾಯ್ತಾಯ್ ಬಾಳಾ? ಎದೊಳ್ ಜಲ್ಮೊಂಕ್ ನಾತ್‌ಲ್ಲ್ಯಾ ಮುಕ್ಲೆ ಪಿಳ್ಗೆಚ್ಯಾ ಉಸ್ವಾಸಾಚೆರ್ ಜಾಂವ್ಚಿ ಲೂಟ್ ಹಿ.

ಪ್ರಕೃತಿ ಆತಾಂ ಶೆಕ್ಡ್ಯಾಂಚ್ಯಾ ಅಕ್ರಮಾಚೊ ಹಿಶೊಬ್ ವಿಚಾರ್‍ನ್ ಆಸಾ. ವಾರೆಂ ವಾದಾಳ್ ಅನಿ ಆವ್ರಾಕ್ ಆಮಿ ನೈಸರ್ಗಿಕ್ ಸಂಕಟ್ ಮ್ಹಣ್ತಾಂವ್; ಪುಣ್ ಖರ್‍ಯಾನ್ ಸಾಂಗ್ಚೆಂ ತರ್ ಹರ್‍ಯೆಕ್ ವಾದಾಳ್ ಜಾಗೊ ಖಾಲಿ ಕರಾ ಮ್ಹಣ್ ಪ್ರಕೃತಿನ್ ದಿಲ್ಲ್ಲೆಂ ಇವಿಕ್ಶನ್ ನೊಟಿಸ್! ಮನ್ಶಾನ್ ನಂಯ್‌ಚಿ ನಕ್ಶಾ ಬದ್ಲಿಲ್ಯಾರೀ, ಉದಕ್ ಆಪ್ಲೊ ಉಡಾಸ್ ವಿಸ್ರಾನಾ. ಏಕ್ ದೀಸ್ ಉದಕ್ ಆಪ್ಲೊ ಜಾಗೊ ಪರತ್ ಪಾಟಿಂ ಘೆತಾ!

ಡಿಜಿಟಲ್ ಯುಗಾಚೆಂ ಅದೃಶ್ಯ್ ಅತಿಕ್ರಮಣ್

ಸಗ್ಳಿಂ ಅತಿಕ್ರಮಣಾಂ ದೊಳ್ಯಾಂಕ್ ದಿಸನಾಂತ್. ಆಧುನಿಕ್ ಅತಿಕ್ರಮಣಾಂ ಆಮ್ಚ್ಯಾ ವೆಳಾಕ್ ಆಮ್ಚ್ಯಾ ಜಿವಿತಾಚ್ಯಾ ಕಾಪಾಕ್‌ಚ್ ಘಾಸ್ ಘಾಲ್ತಾತ್. ಆಮ್ಚ್ಯಾ ಅತ್ಮ್ಯಾಚ್ಯೆ ಫುಟ್‌ಪಾತಿರ್ ಸಯ್ತ್ ಅತಿಕ್ರಮಣ್ ಜಾವ್ನ್ ಆಸಾ. ಆಮಿ ಪವಿತ್ರ್ ಮ್ಹಣ್ ಲೆಕ್ಚ್ಯಾ ಆರಾಧಾನ್ ಆನಿ ಮಾಗ್ಣ್ಯಾಂತ್ ಸಯ್ತ್ ರೀಲ್ಸಾಂ ಅನಿ ವಿಡಿಯೊಂಚಿ ಖಾತಡ್ ದಿಸ್ತಾ. ಪ್ರಿನ್ಸಿಪಾಲ್, ಟೀಚರಾಂ ರೀಲ್ಸಾಂ ಪಾಟ್ಲ್ಯಾನ್ ಪಡ್ತಾನಾ ಭುರ್ಗಿಂಯ್ ರೀಲ್ಸ್ ಪಳೆವ್ನ್ ಬಸ್ತಾತ್. ಜೆವ್ತಾನಾ, ಬಸ್ತಾನಾ, ಪಯ್ಣ್ ಕರ್‍ತಾನಾ, ಸಕಾಳಿಂ ಉಟ್‌ಲ್ಲ್ಯಾ ಕೂಡ್ಲೆ, ನಿದೊಂಕ್ ವೆತಾನಾ, ನಿಮಾಣೆಂ ಪವಿತ್ರ್ ತಂಬಾಚ್ಯಾ ಸುವಾತೆ ಭಿತರೀ ಸ್ಮಾರ್ಟ್ ಫೊನಾಂನಿ ಆಮ್ಚೆಂ ಮನ್ ಅನಿ ಧ್ಯಾನ್ ಅತಿಕ್ರಮಣ್ ಕೆಲಾಂ. ಆಮಿ ಫೋನ್ ವಾಪಾರ್‍ತಾಂವ್ ಅಶೆಂ ಆಮ್ಕಾ ದಿಸ್ತಾ. ಪುಣ್ ಖರ್‍ಯಾನ್ ಫೋನ್ ಆಮ್ಕಾಂ ವಾಪಾರ್‍ತಾ.

ಸಾಂಸ್ಕೃತಿಕ್ ಅತಿಕ್ರಮಣ್‌ಯಿ ಚಲ್ತಾ. ಭಾಸೊ ಮರೊನ್ ಆಸಾತ್. ಹರ್‍ಯೆಕಾ ಭಾಶೆಂತ್ ಮಾತ್ಯೆಚೊ ಪರ್ಮಳ್ ಅಸಾ ಆನಿ ಜಿವಿತಾಚೆಂ ಅಸ್ತಿತ್ವ್ ಪಳೆಂವ್ಚಿ ಏಕ್ ವೆಗ್ಳಿ ದೀಶ್ಟ್ ಆಸ್ತಾ. ಭಾಸ್ ಮರ್‍ತಾ ತೆದ್ನಾಂ ಸಬ್ದಾಂಸಂಗಿಂ ಹೊ ಪರ್ಮಳ್ ನಾಸ್ ಜಾತಾ ಆನಿ ಆಮ್ಚ್ಯಾ ಖಾಸ್ ಸಂಸಾರಾಕ್ ಪಳೆಂವ್ಚಿ ಏಕ್ ದೀಶ್ಟ್ ಕಾಳೊಕಾಂತ್ ಸಾಸ್ಪತಾ..

ಸಾಂಸ್ಥಿಕ್ ಅತಿಕ್ರಮಣಾಚೆರ್ ಜೆಜುಚೆಂ ಚಾಬೂಕ್

ಸಂಸಾರಾಚ್ಯಾ ದೊಳ್ಯಾಂ ಮುಖಾರ್ ಜೆಜು ಕ್ರಿಸ್ತಾಚೆಂ ರೂಪ್ ಮ್ಹಳ್ಯಾರ್ ಕಾಕುಳ್ತ್, ಭೊಗ್ಸಾಣೆಂ ಆನಿ ಮೋಗ್. ಪುಣ್ ಮ್ಹಜೊ ಅನ್ಯೇಕ್ ಜೆಜು ಆಸಾ ತೊ ಸತಾ ನಿತಿಖಾತಿರ್ ಝಜ್‌ಲ್ಲೊ ಜಾಗೃತ್, ಕ್ರಾಂತಿಕಾರಿ ಆನಿ ಅಸ್ತಿತ್ವ್‌ವಾದಿ ಜೆಜು. ಜೆಜು ಜೆರುಜಲ್ಯಾಚ್ಯಾ ಪವಿತ್ರ್ ದೆವಳಾಂತ್ ಪಾಂಯ್ ದವರ್‍ತಾನಾ ತ್ಯಾ ಜಾಗ್ಯಾರ್ ಸಾವ್ಕಾರ್, ವ್ಯಾಪಾರಿ ಆಪ್ಲೆ ಪಾಡೆ, ಶೆಳ್‌ಯೊ ಅನಿ ಪಾರ್ವೆ ವಿಕ್ತಾತ್. ದೇವ್ ಮಂದಿರ್ ಬಾಜಾರ್ ಜಾಲ್ಲೆಂ ತಾಕಾ ಸೊಸಾನಾ. ತೊ ಸುಂಬಾಚೆಂ ಏಕ್ ಚಾಬುಕ್ ವೊಳುನ್ ತಾಂಕಾಂ ಸಕ್ಡಾಂಕ್ ಭಾಯ್ರ್ ಧಾಂವ್ಡಾಯ್ತಾ. ಮೆಜಾಂ ವೊಮ್ತಿಂ ಘಾಲ್ತಾ. ದುಡು ಧರ್ಣಿರ್ ಶಿಂಪ್ಡಾಯ್ತಾ. ಮ್ಹಜ್ಯಾ ಬಾಪಾಚೆಂ ಮಂದಿರ್ ಚೊರಾಂಚೆಂ ಭುಂಯಾರ್ ಕೆಲಾಂ ಮ್ಹಣ್ ಸಕ್ಕಡ್ ಕಾಡ್ನ್ ವ್ಹರುಂಕ್ ತೊ ಧಯ್ರಾನ್ ಸಾಂಗ್ತಾ. ಜೆಜು ಹಾಂಗಾ ಕೇವಲ್ ವ್ಯಾಪಾರಿಂಕ್ ಧಾಂವ್ಡಾಯ್ನಾ. ತೊ ಝುಜ್ತಾ ಆಬ್ಲೆಶಾಚ್ಯಾ ಅತಿಕ್ರಮಣಾ ವಿರೋಧ್. ಜೆಜುನ್ ಸಾವ್ಕಾರಾಂಕ್ ಪಳೆವ್ನ್ ಕಾವ್ಜೆವ್ನ್ ‘ರಾಜಿಯೆಂತ್ ಕಾಡ್ಯಾಂ ಮ್ಹಣಾನಾ! ತಾಚ್ಯಾ ರಾಗಾಂತ್ ‘ಕಾಂಪ್ರೊಮಾಯ್ಸ್’ ನಾತ್‌ಲ್ಲೆಂ. ಸ್ಪಶ್ಟತಾ ಆಸ್‌ಲ್ಲಿ. ಹಿ ಸ್ಪಶ್ಟತಾ ಆಜ್ ಕೊಣಾಲಾಗಿಂ ಆಸಾ? ಆಮಿ ಅತಿಕ್ರಮಣ್ ಘರಾ ಭಿತರ್ ರಿಗ್ತಾ ಮ್ಹಣಾಸರ್ ಬೆಶ್ಟೆಂ ನಿಶ್ಟುರ್ ಜಾಂವ್ಚೆಂ ಕಿತ್ಯಾಕ್?’ ಮ್ಹಣ್ ವೊಗೆಂ ರಾವ್ತಾಂವ್ ನ್ಹಯ್‌ಗಿ?!

ಆಲ್ಪಿನೆಚೊ ನ್ಯಾಯ್!

ಕವಿ ಬಾಪ್ ಜೊಸಿ ಸಿದ್ದಕಟ್ಟೆ ಹಾಂಚ್ಯಾ ‘ತಿ ಅನಿ ಆಲ್ಪಿನ್’ ಕವಿತೆಂತ್ಲ್ಯಾ ಆಲ್ಪಿನೆನ್ ಅಸಲಿ ಸ್ಪಶ್ಟತಾ ದಾಕಯ್ಲ್ಯಾ! ಬಸ್ಸಾರ್ ಸ್ತ್ರಿಯೆಚ್ಯಾ ಕುಡಿಚ್ಯಾ ಪವಿತ್ರಾಯೆಚೆರ್ ಅತಿಕ್ರಮಣ್ ಜಾತಾನಾ, ತಿಣೆಂ ಚುಪ್‌ಚಾಪ್ ಸೊಸ್ಲೆಂ ಜಾಂವ್ಕ್ ಪುರೊ. ಅಶೆಂ ಸೊಸ್‌ಲ್ಲ್ಯಾನ್ ಮೊವಾಲ್ಯಾಂಚ್ಯಾ ಹಾತಾಂಕ್ ಬಳ್ ಮೆಳ್ತಾ. ಪುಣ್ ಬೆಂತಿಣೆಚ್ಯಾ ಕಾಳ್ಯಾ ನಾಡ್ಯಾಕ್ ಉಮ್ಕೊಳ್ ಘೆಂವ್ಚಿ ಆಲ್ಪಿನ್ ವೊಗಿ ರಾವೊಂಕ್ ನಾ! ‘ಪೋರ್ ಭರ್‌ಲ್ಲ್ಯಾ ಬಸ್ಸಾರ್ / ಮವಾಲ್ಯಾನ್ ಗುಪಿತ್ ತಿಚ್ಯಾ ಹರ್ದ್ಯಾಕ್ ಹಾತ್ ಘಾಲ್ಲೊಚ್ / ಆಲ್ಪಿನೆನ್ ಘಾಸ್ ಘಾಲ್ಲೊ’ ಆಲ್ಪಿನಿಚೊ ಪ್ರತಿರೋಧ್ ಸಮಾಜಾಕ್ ಸ್ಪಶ್ಟ್ ಸಂದೇಶ್ ದಿತಾ – ಆಕ್ರಮ್ ಪಳೆವ್ನ್ ವೊಗೆಂ ರಾಂವ್ಚೆಂ ನ್ಹಯ್. ವಿರೋಧ್ ಕರ್‍ನ್ ಸತಾಚ್ಯೆ ಪಾಡ್ತೆಕ್ ಉಬೆಂ ರಾಂವ್ಚೆಂ.

ಸತಾಪಾತ್: ಸರ್ಗಾಚಿ ವಾಟ್

ಅತಿಕ್ರಮಣಾವಿಶಿಂ ಉಲಯ್ತಾನಾ ಮ್ಹಜ್ಯಾ ಎಕಾ ವಳ್ಕಿಚ್ಯಾ ಕುಟ್ಮಾನ್ ಸಾಂಗ್‌ಲ್ಲಿಂ ಉತ್ರಾಂ ಹಾಂಗಾ ಸಕಾಲಿಕ್. ಸೆಜಾರ್‍ಚ್ಯಾಂಕ್ ತಾಂಚ್ಯಾ ಘರಾ ವಚೊಂಕ್ ಮಾರ್‍ಗಾಕ್ ಇಲ್ಲೊ ಜಾಗೊ ಆಮಿ ಸೊಡ್ನ್ ದಿಲೊ. ಆಮಿ ಅಶೆಂ ಕೆಲ್ಲೆಂ ಪಳೆವ್ನ್ ದುಸ್ರ್ಯಾಂನಿಯ್ ಕೆಲ್ಲೆಂ ಆಮ್ಚ್ಯಾ ಗುಮಾನಾಕ್ ಆಯ್ಲಾಂ. ಸಕ್ಡಾಂಚ್ಯಾ ತೊಂಡಾರ್ ಹಾಸೊ, ಸಂತೊಸ್ ಪಳೆತಾನಾ ಖುಶಿ ಜಾತಾ.

ಪೆಲ್ಯಾಕ್ ಸೊಡ್ನ್ ದಿಂವ್ಚೊ ಹೊ ದಯಾಳ್ ಗೂಣ್ ಅತಿಕ್ರಮಣಾಕ್ ಮುಖಾಮುಖಿ ಕರ್‍ತಾ. ಹ್ಯಾ ಸೊಡ್ನ್ ದಿಲ್ಲ್ಯಾ ಜಾಗ್ಯಾರ್ ಆಮ್ಚ್ಯಾ ನಾಗರಿಕತೆಚೊ ಖರೊ ಆರ್ಥ್ ಲಿಪೊನ್ ಅಸಾ. ಅಶೆಂ ಸೊಡ್ನ್ ದಿಂವ್ಚ್ಯಾ ಮನ್ಶಾಂಥಾವ್ನ್ ಆಮ್ಚಿ ನಾಗರಿಕತಾ ಸೊಭಿತ್ ಸುಂದರ್ ಜಾವ್ನ್ ಫುಲೊನ್ ರಾವ್ಲ್ಯಾ. ಹಿಚ್ ಸತಾಪಾತ್, ಸೆಜಾರ್‍ಯಾಚ್ಯಾ ಆಂಗ್ಣಾಥಾವ್ನ್ ಸರ್ಗಾರಾಜಾಕ್ ವೆಚಿ ವಾಟ್.

ಖಂಯ್ಚಿಯ್ ನಾಗರಿಕತಾ ಆಪ್ಣೆಂ ಕಿತೆಂ ಬಾಂದ್ಲಾಂ ಮ್ಹಳ್ಳ್ಯಾಚೆರ್ ನ್ಹಯ್, ಬಗಾರ್ ಕಿತೆಂ ಆಸಾ ತಶೆಂ ಮಾನಾನ್ ಉರಯ್ಲಾಂ ಮ್ಹಳ್ಳ್ಯಾಚೆರ್ ಜಿವಂತ್ ಉರ್‍ತಾ. ಫುಟ್‌ಪಾತ್, ತಳೆಂ, ನಂಯೊ, ರಾನ್, ಭಾಸ್, ಸಂಸ್ಕೃತಿ, ಮೌನ್, ಮಾಗ್ಣೆಂ, ಮನ್ಶಾಪಣ್ ಅಸಲ್ಯಾ ಸರ್ವ್ ಪವಿತ್ರ್ ಜಾಗ್ಯಾಂಚೆ ಆಮಿ ಮ್ಹಾಲಕ್ ನ್ಹಯ್. ಆಮಿ ತಾಂಚೆ ರಾಕೊಣ್ದಾರ್. ಖಾಸ್ ಸಂಸಾರಾಂತ್ಲ್ಯಾ ಫುಟ್‌ಪಾತಿಚೊ ಖರೊ ಅರ್ಥ್ ಹೊಚ್ – ಸಕ್ಡಾಂಕ್ ಚಲೊಂಕ್ ಜಾಗೊ ಆಸ್ಚೊ!

ಜೆವ್ತಾನಾ, ಬಸ್ತಾನಾ, ಪಯ್ಣ್ ಕರ್‍ತಾನಾ, ಸಕಾಳಿಂ ಉಟ್‌ಲ್ಲ್ಯಾ ಕೂಡ್ಲೆ, ನಿದೊಂಕ್ ವೆತಾನಾ, ನಿಮಾಣೆಂ ಪವಿತ್ರ್ ತಂಬಾಚ್ಯಾ ಸುವಾತೆ ಭಿತರೀ ಸ್ಮಾರ್ಟ್ ಫೊನಾಂನಿ ಆಮ್ಚೆಂ ಮನ್ ಅನಿ ಧ್ಯಾನ್ ಅತಿಕ್ರಮಣ್ ಕೆಲಾಂ.

ಆಂಡ್ರ್ಯೂ ಎಲ್ ಡಿಕುನ್ಹಾ, ಇಜಯ್