ಮಂಗ್ಳುರ್ ಶೆರಾಚ್ಯಾ ಜೆರೊಸಾ ಇಸ್ಕೊಲಾಚ್ಯೆ ಎಕ್ಯೆ ಶಿಕ್ಶಕಿ (ಧರ್ಮ್ ಭಯ್ಣ್) ರಾಮ ಆನಿ ಅಯೋಧ್ಯೆವಿರೋಧ್ ಕ್ಲಾಸ್ ರುಮಾಂತ್ ಆಪ್ಲ್ಯಾ ವಿದ್ಯಾರ್ಥಿಂಲಾಗಿಂ ಧರ್ಮ್ ಭೇದ್ ಕರ್‍ನ್ ಉಲಯ್ಲಿ ಮ್ಹಳ್ಳೊ ಆಡಿಯೊ ವೈರಲ್ ಜಾತಚ್ ಮತೀಯ್ ಪಂಗ್ಡಾಂನಿ ವಾಗಾನಾಚ್ ಸುರು ಕೆಲೊ. ಅಸಲೆಂ ಕಿತೆಂಯ್ ಘಡೊಂಕ್ ರಾಕೊನ್ ಆಸ್ಚೆ ಎಮ್ಎಲ್ಎ ಎದೊಳ್ ದಿಶ್ಟಿಕ್ ನಾತ್ಲಲೆ ಎಕಾಚ್ಚಾಣೆಂ ದಿಶ್ಟಿಕ್ ಪಡ್ಲೆ. ಶಿಕ್ಶಕಿಚೆರ್ ಘಾಲ್ಲ್ಯಾ ಹ್ಯಾ ಎಕಾ ಆರೊಪಾ ಪಾಟ್ಲ್ಯಾನ್ ಆನಿ ಫುಡೆಂ ಘಡೊನ್ ಗೆಲ್ಲ್ಯಾ ಸಂಗ್ತಿಂವಿಶಿಂ ಉದೆಂವ್ಚಿಂ ಸವಲಾಂ ಜಾಯ್ತಿಂ ತರೀ ಹೆರ್ ಸೊಡ್ಯಾಂ, ಕ್ರಿಸ್ತಾಂವ್ ಸಯ್ತ್ ಎಕ್’ಚ್ ಉಲಯ್ತಾತ್ – ’ಸಿಸ್ಟರಿಕ್ ಹೆಂ ಜಾಯಾಸ್ಲೆಂಗಿ! ತಿಣೆಂ ಕೆಲ್ಲಿ ಚೂಕ್”.

ಎಕ್ಯೆ ವಿದ್ಯಾರ್ಥಿಚಿ ಆವಯ್, ಪಂಪ್’ವೆಲಾಚ್ಯಾ ಎಕಾ ಮತೀಯ್ ಮುಕೆಲ್ಯಾಕ್ ಸಿಸ್ಟರಿನ್ ಧರ್ಮ್ ಭೇದ್ ಕೆಲೊ ಮ್ಹಣ್ ವೊಯ್ಸ್ ನೋಟ್ ಧಾಡ್ತಾ. ತಿಣೆಂ ತಿಚೆಚ್ ವಿಶ್ಯಾಂತ್ ಸಾಂಗ್’ಲ್ಲೆ ಪ್ರಕಾರ್ ’ತಿ ಸಭ್ಯ್ ನಾಗರಿಕ್’ ಶಿವಾಯ್ ಖಂಯ್ಚ್ಯಾಯ್ ಸಂಘಟನಾಚಿ ಮನಿಸ್ ನ್ಹಯ್ ಕಂಯ್. ಇತ್ಲೆ ಸಭ್ಯ್ ವೆಕ್ತಿಕ್ ಇಸ್ಕೊಲಾಂತ್ ಜಾಲ್ಲ್ಯಾ ಫರಾಮಸೆಕ್ ವಾ ಚುಕಿಕ್ ಖಂಯ್ ದೂರ್ ದೀಜೆ ಮ್ಹಣ್ ಕಳಿತ್ ನಾ! ಪಂಪ್’ವೆಲಾಚೊ ತೊ ಮುಕೆಲಿ ಕೆದಳಾ ಜೆರೊಸಾಚೊ ಮುಕೆಲ್ ಮೆಸ್ತ್ರಿ ಜಾಲ್ಲೊ ಹಾಂವ್ ನೆಣಾಂ! ಇತ್ಲೆ ಸಭ್ಯ್ ಸ್ತ್ರಿಯೆಕ್ ಇಸ್ಕೊಲಾಚೆರ್, ಶಿಕ್ಶಕಿಚೆರ್, ಥಂಯ್ ದಿಂವ್ಚ್ಯಾ ಶಿಕ್ಪಾಚೆರ್ ಅಭಿಮಾನ್ ಆಸಾ (ತಿಣೆಂ ಸಾಂಗ್ಲಲೆಪರ್ಮಾಣೆಂ) ತರೀ ಚೂಕ್ ಘಡ್ತಾನಾ ಇಸ್ಕೊಲಾವಯ್ಲ್ಯಾ ಅಭಿಮಾನಾನ್ ವಚೊನ್ ಮುಕೆಲ್ ಮೆಸ್ತ್ರಿಕ್ ಸಾಂಗಾಜೆ ಮ್ಹಳ್ಳಿ ಬುದ್ವಂತ್ಕಾಯ್ ನಾ ಬಗಾರ್ ಇಸ್ಕೊಲಾಕ್ ಸಂಬಂಧ್ ನಾತ್ಲಲ್ಯಾ ವೆಕ್ತಿಕ್ ಕಳಯ್ಜೆ ಮ್ಹಳ್ಳಿ ಕುತಂತ್ರ್ ಬೂದ್ ತಿಕಾ ಆಸ್ಚಿ ಸ್ಪಶ್ಟ್ ಜಾತಾ.

ಶಿಕ್ಶಕಿನ್ ಕ್ಲಾಸಿಂತ್ ಕಿತೆಂ ನಿಜಾಯ್ಕಿ ಸಾಂಗ್ಲಾಂ ತಾಚೊ ವಿವರ್ ತ್ಯಾ ಆಡಿಯೊಂತ್ ಶಿವಾಯ್ ಭಾಯ್ರ್ ಲಭ್ಯ್ ನಾತ್’ಲ್ಲೊ. ತಾಚಿ ತನ್ಖಿ ಜಾಂವ್ಕ್ ನಾತ್’ಲ್ಲಿ, ತನ್ಖಿ ಜಾಂವ್ಕ್ ವೇಳ್ ಘೆಂವ್ಕ್’ಯೀ ನಾತ್’ಲ್ಲೊ. ತೆಂ ಪುರಾ ಕಾಂಯ್ ಜಾಯ್ನಾಸ್ತಾನಾ, ಏಕ್ ಆಡಿಯೊ ಘೆವ್ನ್ ನೀತ್ ಮಾಗೊಂಕ್ ರಸ್ತ್ಯಾಕ್ ದೆಂವ್’ಲ್ಲ್ಯಾ ಮವಾಲ್ಯಾಂಚೆ ಬೊಬೆಕ್ ಭಿಯೆವ್ನ್ ಮ್ಹಳ್ಳೆಬರಿ ಉಟಾಉಟಿಂ ಶಿಕ್ಶಕಿಕ್ ಅಮಾನತ್ ಕರಿಜೆ ಪಡ್ಲೆಂ.  

ಜಾಲೆಂ, ಅಮಾನತ್ ಜಾಲೆಂ.. ನೀತ್ ಜಾಲಿ ಆನಿ ವಿಶಯ್ ಸಂಪ್ಲೊ ಮ್ಹಣ್ ಚಿಂತಿಜೆ ತರ್ ಎಮ್ಮೆಲ್ಲೆ ಧಾಂವೊನ್ ಯೇವ್ನ್ ಭುರ್ಗ್ಯಾಂಕ್ ಎಕ್ಟಾಂಯ್ ಕರ್‍ನ್ ತಾಂಚೆಕರ್‍ನಾ ’ವಿಜಯೋತ್ಸವ’ ಚಲಯ್ತಾ! ನಾ ಕಾಂಯ್ ದೂರ್, ನಾ ಕಾನೂನಿ ತನ್ಖಿ, ನಾ ಕಸಲಿಯ್ ಸಾಂವಿಧಾನಿಕ್ ವ್ಯವಸ್ತಾ… ಚಾರ್ ಜಣಾಂಚೆ ಬೊಬೆಕ್ ಶಿಕ್ಶಕಿಕ್ ಅಮಾನತ್ ಕರಿಜೆ ತರ್ ಹಿ ಕಸಲಿ ನೀತ್ ಜಾಲಿ?

ನಿಜಾಯ್ಕಿ ಕ್ಲಾಸ್ ರುಮಾಂತ್ ಘಡ್ಲೆಲೆಂ ಕಿತೆಂ ಮ್ಹಣ್ ಆಜ್ ಉಗ್ತಡಾಕ್ ಆಯ್ಲಾಂ.

ಕರ್ನಾಟಕ್ ರಾಜ್ಯಾಚ್ಯಾ ಶಿಕ್ಪಾವಿಧಿಖಾಲ್ ಯೆಂವ್ಚ್ಯಾ ಸಾತ್ವ್ಯಾ ಕ್ಲಾಸಿಚ್ಯಾ ಪಾಠ್ ಪುಸ್ತಕಾಂತ್ ರವೀಂದ್ರನಾಥ್ ಟಾಗೊರಾಚಿ work is worship ಮ್ಹಳ್ಳ್ಯಾ ಕವಿತೆಚೊ ವಿವರ್ ದಿತಾನಾ ಜಾಲ್ಲೆಂ ಅಚಾತುರ್ಯ್ ಹೆಂ! ಹಿ ಕವಿತಾ ವಯ್ಚಾರಿಕ್ ವಿಚಾರ್ ಉಕಲ್ನ್ ಧರ್‍ಚೆ ಸವೆಂ ಮೂಡ್ ಪಾತ್ಯೆಣೆಂಕ್ ಸವಾಲ್ ಕರ್‍ತಾ. ಹ್ಯಾ ಪಾಟ್ ಥಳಾರ್ ಶಿಕ್ಶಕಿನ್ ಕಿತೆಂ ವಿವರಣ್ ದಿಲಾಂ ತ್ಯಾವಿಶಿಂ ತಕ್ರಾರ್ ಉಲಂವ್ಕ್ ಜಾಯ್ನಾ. ಕಿತ್ಯಾಕ್ ಹೊ ಪಾಠ್’ಚ್ ಇಲ್ಲೊ ಕ್ಲಿಶ್ಟ್ ಆಸ್ಲೆಲ್ಯಾನ್ ವಿವರ್ ದಿಂವ್ಕ್ ಆನಿ ಸಮ್ಜುನ್ ಘೆಂವ್ಕ್ ತಿತ್ಲೆಂ ಸಲೀಸ್ ನ್ಹಯ್. ಹಿಂದುತ್ವಾಚೆಂ ಅಮಾಲ್ ಇತ್ಲೆಂ ಭಂವ್ತಣಿ ಆಸ್ತಾನಾ ಹಿ ಕವಿತಾ ಭಿಲ್ಕುಲ್ ಮತಿಕ್ ರಿಗ್ಚಿಚ್ ನಾ. ಮಾಗಿರ್ ತುಮಿ ಯುಟ್ಯೂಬಾಂನಿ ದುರಾಂ ದಿಲ್ಲ್ಯಾ ಆವಯಾಂಕ್ ತಶೆಂಚ್ ವಿದ್ಯಾರ್ಥಿಂಕ್ ವಿಚಾರ್ ಕೆಲ್ಯಾರ್ ತಿಂ ಮ್ಹಣ್ತಾತ್, “ಮೇಡಮ್ ಹಾಗೆ ಹೇಳಿದರಂತೆ.. ಹೀಗೆ ಹೇಳಿದರಂತೆ..” ಮ್ಹಳ್ಳಿ ಕಾಣಿ ಸಾಂಗ್ತಾತ್ ಶಿವಾಯ್ ಸ್ಪಶ್ಟ್ ಆರೋಪ್ ದಿಸನಾ. ಪ್ರಮುಖ್ ದೂರ್ ದಿಲ್ಲೆಂ ವಿದ್ಯಾರ್ಥಿ ’ತಿಣೆಂ ಎಕ್’ಚ್ ದೇವ್ ಮ್ಹಣ್ ಸಾಂಗ್ಲಾಂ – ಖಂಯ್ಚೊ ದೇವ್ ಮ್ಹಣ್ ಸಾಂಗೊನಾ’ ಮ್ಹಣ್’ಯಿ ಸಾಂಗ್ತಾ! ತರ್ ಚಿಂತುನ್ ಪಳೆಯಾ, ಏಕ್ ಪಾವ್ಟಿಂ ಬಾಂಯ್ಕ್ ಉಡೊನ್ ಜಾಲ್ಯಾ ಉಪ್ರಾಂತ್ ಕಶೆ ಪುಣಿ ಕರ್‍ನ್ ಉಪ್ಯೆವ್ನ್ ವಯ್ರ್ ಯೇಂವ್ಕ್ ಪ್ರಯತ್ನ್ ಕರ್‍ಚೆಂ ಹಾಂಗಾ ಸ್ಪಶ್ಟ್ ದಿಸ್ತಾ.

ಹಾಚೆವಯ್ರ್ ತುರ್ತಾನ್ ಎಮ್ಮೆಲ್ಲೆಚೊ ಏಜೆಂಟ್ ಮ್ಹಳ್ಳೆಬರಿ ವರ್ತನ್ ಕರುನ್ ಶಿಕ್ಶಕಿಕ್ ಅಮಾನತ್ ಕರುಂಕ್ ಕಾರಣ್ ಜಾಲ್ಲ್ಯಾ ಎಇಓ (ಶಿಕ್ಪಾ ಇಲಾಖ್ಯಾಚೊ ಅಧಿಕಾರಿ)ಕ್ ಎದೊಳ್’ಚ್ ಬೆಳಗಾವಿಕ್ ವರ್ಗ್ ಕೆಲಾ, ತಾಚ್ಯಾ ಜಾಗ್ಯಾಕ್ ದುಸ್ರ್ಯಾಕ್ ನೆಮ್ಲಾ, ಮ್ಹಣ್ತಚ್ ಹಾಂಗಾ ಕಳ್ತಾ – ಹಾಂತುಂ ವ್ಹಡ್ ಮಟ್ಟಾಚಿ ಏಕ್ ಘುಟ್ಮಳ್ ಜಾಲ್ಯಾ.

ಚಾರ್ ವೊಣ್ತಿ ಭಿತರ್ ಆನಿ ಸಂಬಂಧ್ ಜಾಲ್ಲ್ಯಾ ಅಧಿಕಾರಿ ಆನಿ ಇಲಾಖ್ಯಾನ್ ಇತ್ಯರ್ಥ್ ಕರಿಜೆ ಜಾಲ್ಲ್ಯಾ ಸಗ್ಳ್ಯಾ ಪ್ರಕರಣಾಂತ್ ಶಾಳಾಚಿ ಮರ್ಯಾದ್ ಭಿಗ್ಡಾವ್ನ್, ಭುರ್ಗ್ಯಾಂಕ್ ಚಾಳ್ವೊವ್ನ್ ಸಮಾಜಿಕ್ ಶಾಂತಿ ಪಿಡ್ಡ್ಯಾರ್ ಕೆಲ್ಲೊ ನೀಜ್ ಅಪ್ರಾಧ್ ಪಡೊಂಕ್ ಜಾಯ್ ಎಮ್ಮೆಲ್ಲೆಚೆರ್!

ಸ ದಶಕಾಂಚೊ ಇತಿಹಾಸ್ ಆಸ್ಲೆಲ್ಯಾ ಇಸ್ಕೊಲಾಕ್ ಕಶೆಂ ಸಲಿಸಾಯೆನ್ ವಿಲನ್ ಕೆಲೆಂ? ಎಕ್ಯೆ ಶಿಕ್ಶಕಿಚ್ಯಾ ಉತ್ರಾಂಕ್ ಲಾಗೊನ್ ಅಖ್ಖ್ಯಾ ಕಿರಿಸ್ತಾಂವಾಂಕ್, ಮಿಶನರಿಂಕ್, ಮುಸ್ಲಿಮಾಂತ್ ಮಧೆಂ ವೋಡ್ನ್ ಹಾಡ್ನ್ ದುಸ್ಮಾನ್ ಮ್ಹಣ್ ಬಿಂಬಿತ್ ಕೆಲೆಂ ಕಿತ್ಯಾ! ಶಿಕಪ್ ದಿಲ್ಲ್ಯಾ ಇಸ್ಕೊಲಾ ವಿರೋಧ್ ಥಂಯ್ಚ್ ಶಿಕ್ಚ್ಯಾ ವಿದ್ಯಾರ್ಥಿಂಕ್ ಉಭೆಂ ಕೆಲ್ಲೆಂ, ಅಲ್ಪ್ ಸಂಖ್ಯಾತಾಂಚ್ಯಾ ಇಸ್ಕೊಲಾವಿರೋಧ್ ಕೆಲ್ಲಿ ವ್ಹವಸ್ತಿತ್ ಘುಟ್ಮಳ್ ನ್ಹಯ್ ಆಸ್ತಾಂ ಹೆರ್ ಕಿತೆಂ?  ಬಸೊನ್ ಮರ್ಯಾದಿನ್ ಉಲಯ್ಜೆ ಜಾಲ್ಲೊ ಎಮ್ಮೆಲ್ಲೆ, ಎಕಾ ಗುಂಡಾಬರಿ ಆನಿ ಸಂಘಟನಾಚೊ ಸಾಂಧೊ ಜಾವ್ನ್ ಯೇವ್ನ್ ಧರ್ಮಿಕ್ ಭಯ್ಣಿಂಕ್ ವೊತಾಂತ್ ಉಭೆಂ ಕರ್‍ನ್ ತಾಂಕಾಂ ಸುಶೆಗಾತ್ ಕ್ಲಾಸ್ ಕಾಣ್ಘೆತಾ ತರ್ ತಾಚೊ ಕಸಲೊ ಹಂಕಾರ್ ಆಸ್ಯೆತ್? ಹೆಂ ಪರ್ಜೆರಾಜ್ ವಾ ಗೂಂಡಾರಾಜ್? ಕಾನುನಾಪ್ರಕಾರ್ ಜಾಯ್ಜೆ ಜಾಲ್ಲಿ ತನ್ಖಿ ಇಸ್ಕೊಲಾ ಆವರಣಾಂತ್ ಉಭೆಂ ರಾವೊವ್ನ್ ಜಾಲಿ ಕಿತ್ಯಾ? ಉಲವ್ಣ್ಯಾಂ ಮಧೆಂ ಜಾಲ್ಲ್ಯಾ ಪ್ರಕರಣಾಕ್ ಸೊಡ್ನ್ ದುಸ್ರ್ಯಾ ಕ್ರಿಸ್ತಾಂವ್ ಶಾಳಾಂನಿ ಕೆದಳಾಗಿ ಜಾಲ್ಲ್ಯಾ ಪ್ರಕರಣಾಕ್ ತಾಳ್ ಘಾಲ್ನ್ ಆಪ್ಣಾಚಿ ಬಹಾದೂರಿ ಉಲಂವ್ಕ್ ಲಜ್ ದಿಸನಾ ಎಮ್ಮೆಲ್ಲೆಕ್?

ಆತಾಂ ಅಲ್ಪ್ ಸಂಖ್ಯಾತ್ ಇಲಾಖೊ, ಭುರ್ಗ್ಯಾಂಚೊ ಕಲ್ಯಾಣ್ ಇಲಾಖೊ ಆನಿ ಸ್ತ್ರೀಯಾಂಚ್ಯಾ ಆಯೊಗಾನ್ ಹ್ಯಾ ಪ್ರಕರಣಾಚಿ ಪಾರದರ್ಶಕ್ ತನ್ಖಿ ಕರಿಜೆ ಮಾತ್ರ್ ನ್ಹಯ್ ಶಿಕ್ಶಕಿಂಚೆರ್ ಆನಿ ಭುರ್ಗ್ಯಾಂಕ್ ದುರುಪಯೋಗ್ ಕೆಲ್ಲ್ಯಾ ಎಮ್ಮೆಲ್ಲೆಚಿಯ್ ತನ್ಖಿ ಜಾಯ್ಜೆ ಮ್ಹಣ್ ಮಂಗ್ಳುರ್ ದಿಯೆಸೆಜಿನ್ ವಿನತಿ ಕೆಲ್ಯಾ ಮ್ಹಣ್ ಆಯ್ಕಾಲೆಂ.

ಇತ್ಲೆಂ ಕೆಲ್ಯಾರ್ ಪಾವಾನಾ. ಎದೊಳ್’ಚ್ ಶಿಕ್ಶಕಿಕ್ ಅಮಾನತ್ ಕೆಲಾಂ ಮ್ಹಣ್ ಸಂಭ್ರಮ್ ಚಲ್ಲಾ ತರ್ ಶಿಕ್ಶಕಿ ಏಕ್ ಧರ್ಮ್ ಭಯ್ಣ್ ದೆಕುನ್ ಇತ್ಲೊ ವ್ಹಡ್ ಸಂಭ್ರಮ್ ಜಾಲ ಮ್ಹಳ್ಳೆಂಯ್ ಉಡಾಸ್ ದವರ್‍ಚೆಂ. ದೆಕುನ್ ಚಾರಿಟಿ ಸಿಸ್ಟರಾಂನಿ ಆತಾಂ ಕಾಣ್ಘೆಜೆ ಜಾಲ್ಲೊ ನಿರ್ಧಾರ್ ಭೋವ್ ಮಹತ್ವಾಚೊ ಆನಿ ಇತಿಹಾಸಿಕ್ ಜಾಂವ್ಚ್ಯಾರ್ ಆಸಾ. ಶಿಕ್ಶಕಿ ಜರ್ ನಿರಾಪ್ರಾಧಿ ತಿಕಾ ಪಾಟಿಂ ಇಸ್ಕೊಲಾಂತ್ ನೇಮಕ್ ಕರಿಜೆಚ್! ಕಾವ್ಜೆವ್ನ್, ದಾಕ್ಶಣೆಕ್ ಪಡೊನ್ ತಿಕಾ ಟ್ರಾನ್ಸ್’ಫರ್ ಕರ್‍ನ್ ಪ್ರಕರಣ್ ಇತ್ಯರ್ಥ್ ಕೆಲೆಂ ಮ್ಹಣ್ ಹಾತ್ ಧುಂವ್ಚೆಂ ನಾಕಾ. ತಿಕಾ ಪಾಟಿಂ ನೇಮಕ್ ಕೆಲ್ಲ್ಯಾಂತ್ ಅಖ್ಖ್ಯಾ ಮಂಗ್ಳುರಾಕ್, ಪ್ರತ್ಯೇಕ್ ಜಾವ್ನ್ ಹಿಂದುತ್ವಾವಾದಿಂಕ್ ಉಡಾಸಾಂತ್ ದವರ್‍ಚೆ ತಸಲಿ ಜಾಪ್ ದಿಲ್ಲೆಬರಿ ಜಾತಾ. ಆನಿ ಹಿ ಜಾಪ್ ದೀಜೆಚ್!

________________________

ಚಾರಿಟಿ ಸಿಸ್ಟರಾಂನಿ ಆತಾಂ ಕಾಣ್ಘೆಜೆ ಜಾಲ್ಲೊ ನಿರ್ಧಾರ್ ಭೋವ್ ಮಹತ್ವಾಚೊ ಆನಿ ಇತಿಹಾಸಿಕ್ ಜಾಂವ್ಚ್ಯಾರ್ ಆಸಾ. ಶಿಕ್ಶಕಿ ಜರ್ ನಿರಾಪ್ರಾಧಿ ತಿಕಾ ಪಾಟಿಂ ಇಸ್ಕೊಲಾಂತ್ ನೇಮಕ್ ಕರಿಜೆಚ್!

✍️ –ಜೊ. ಸಿ. ಸಿದ್ದಕಟ್ಟೆ, ಕಾರ್ಮೆಲಿತ್