ಯಾಜಕಿ ತರ್ಬೆತೆ ವೆಳಾರ್ ದೇವ್‌ಶಾಸ್ತ್ರ್ ಶಿಕ್ತಾಸ್ತಾನಾ Eschatology (ನಿಮಾಣ್ಯೊ ಸಂಗ್ತಿ) ಮ್ಹಳ್ಳೊ ಏಕ್ ವಿಶಯ್ ಶಿಕೊಂಕ್ ಆಸಾ. ಹ್ಯಾ ಕ್ಲಾಶಿಂತ್ ಮೊರ್ನ್, ಝಡ್ತಿ, ಮುಕ್ಲೆಂ ಜಿವಿತ್ ಕಶೆಂ? ಸರ್ಗ್ ವಾ ಯೆಮ್ಕೊಂಡಾಚೆ ಸ್ವರೂಪ್ ಕಿತೆಂ? ಪುಲ್ಗತ್ರ್ ಮ್ಹಳ್ಯಾರ್ ಕಿತೆಂ? ಮೆಲ್ಯಾ ಉಪ್ರಾಂತ್ ಅತ್ಮೊ ಖಂಯ್ ವೆತಾ? ಅಸಲ್ಯಾಂ ಜಾಯ್ತ್ಯಾ ಸವಾಲಾಂಚೆರ್ ಆಮಿಂ ವಾದ್-ಪ್ರತಿವಾದ್ ಕರ್‍ತಲ್ಯಾಂವ್. ತಾಂತ್ಲ್ಯಾ ತಾಂತುಂ ಕುಡಿಚ್ಯಾ ಜಿವಂತ್ಪಣಾ ವಿಶ್ಯಾಂತ್ ಗಂಟೆಗಟ್ಲ್ಯಾನ್ ತರ್ಕ್ ಆನಿ ವಾದ್ ಆಮಿಂ ಕೆಲ್ಲೊ ಮ್ಹಾಕಾ ಅಜೂನ್ ಉಡಾಸ್ ಆಸಾ. ಜೆಜುಚ್ಯಾ ಜಿವಂತ್ಪಣಾಂತ್ ಪಾತ್ಯೆತೆಲ್ಯಾ ಆಮ್ಕಾಂ ಕುಡಿಚೆಂ ಮರಣ್ ಏಕ್ ಅಂತ್ಯ್ ನ್ಹಯ್ ಬಗಾರ್ ಅನ್ಯೆಕ್ ಆರಂಭ್; ಸಂಸಾರಿಂ ಕುಡಿಂತ್ ಜಿಯೆಲ್ಲೊ ಅತ್ಮೊ ದೆವಾಚ್ಯಾ ಹಾಜಿರ್‍ಪಣಾಂತ್ ಸಾಸ್ಣಾಚ್ಯಾ ಜಿಣ್ಯೆಕ್ ಉತರ್‍ತಾ ಹೆಂ ಆಮಿಂ ಪಾತ್ಯೆತಾಂವ್. ಪೂಣ್ ಆಮ್ಚಿ ಕೂಡ್‌ಯೀ ಏಕ್ ದೀಸ್ ಜಿವಂತ್ ಜಾತಾ ಮ್ಹಳ್ಳೆಂ ಸಮ್ಜೊಂಕ್ ಇಲ್ಲೆಂ ಕಶ್ಟ್. ಮನ್ಶಾ ಭಾಶೆನ್ ವಿವರುಂಕ್ ಜಾಯ್ನಾತ್‌ಲ್ಲೆ ಮಿಸ್ತೆರ್ ಆಮ್ಚ್ಯಾ ರಾಜಾಂವಾಚ್ಯಾ ಚೌಕಟ್ಟಾ ಭಿತರ್ ಸಮ್ಜೊಂಕ್ ಆಮಿಂ ಪ್ರಯತನ್ ಕೆಲ್ಯಾರೀ ಥೊಡಿಂ ಸವಾಲಾಂ ಅಧುರಿಂಚ್ ಉರ್‍ತಾತ್ ತೆಂ ಸತ್.

ಮನಿಸ್ ಮ್ಹಳ್ಯಾರ್ ಕೋಣ್

ಕುಡಿಚೆಂ ಜಿವಂತ್ಪಣ್ ಸಮ್ಜಾಜೆ ತರ್ ಪಯ್ಲೆಂ ಮನಿಸ್ ಮ್ಹಳಾರ್ ಕೋಣ್ ತಾಚೆಂ ಅಸ್ಥಿತ್ವ್ ಕಸಲೆಂ ಮ್ಹಳ್ಳೆಂ ಸಮ್ಜೊಂಚೆಂ ಚಡ್ ಗರ್ಜೆಚೆಂ. ಮನಿಸ್ ಮ್ಹಳ್ಯಾರ್ ಫಕತ್ ಕೂಡ್ ವಾ ಫಕತ್ ಅತ್ಮೊ ನ್ಹಯ್. ಅತ್ಮೊ ಆನಿ ಕೂಡ್ ದೆವಾಚ್ಯಾ ಸ್ಪಿರಿತಾಚ್ಯಾ ಸಾಂಗಾತ್ಪಣಾಂತ್ ಏಕ್ ಪುರ್ತೊ ಮನಿಸ್ ಜಾತಾ. ದೇವ್ ಏಕ್ ಸ್ಪಿರಿತ್; ತಾಕಾ ಜಾಗ್ಯಾಚಿ ಆನಿ ವೆಳಾಚಿ ಪರಿಧಿ ನಾಂ. ದೆಕುನ್ ಸರ್ಗ್ ಮ್ಹಳ್ಯಾರ್ ಆಮ್ಚ್ಯೆ ಧರ್‍ತೆ ಪರಿಂ ಏಕ್ ನಿರ್ದಿಷ್ಟ್ ಜಾಗ್ಯಾರ್ ಆಸಾ ಮ್ಹಣ್ ಸಾಂಗೊಂಕ್ ಜಾಯ್ನಾ. ದೆವಾಚ್ಯಾ ಸ್ಪಿರಿತಾಚ್ಯಾ ಸಕ್ತೆನ್ ಆಸಾ ಕೆಲ್ಲೊ ಅತ್ಮೊ ಏಕ್ ವಿಶಿಷ್ಟ್ ರಚನ್, ಏಕ್ ವಿಶಿಷ್ಟ್ ಅಸ್ತಿತ್ವ್. ಏಕ್ ಪಾವ್ಟಿಂ ರಚ್‌ಲ್ಲೊ ತೊ ಕೆದಿಂಚ್ ಮೊರಾನಾ ವಾ ಸರೊನ್ ವಚಾನಾ; ತೊ ಸಾಸ್ಣಾಕ್ ಜಿಯೆತಾ- ಜಾಂವ್ಕ್ ಪುರೊ ಸರ್ಗಾರ್, ಪುಲ್ಗತ್ರಿಂತ್ (ಥೊಡ್ಯಾ ಕಾಳಾಕ್) ವಾ ಯೆಮ್ಕೊಂಡಾಂತ್.

ಜೆದ್ನಾಂ ದಾದ್ಲ್ಯಾ ಆನಿ ಸ್ತ್ರಿಯೆಚ್ಯಾ ಎಕ್ತಾರಾನ್ ಸ್ತ್ರಿಯೆಚೊ ಗರ್ಭ್ ಫಳಾಧಿಕ್ ಜಾತಾ, ತ್ಯಾ ಪ್ರಪ್ರಥಮ್ ಘಡ್ಯೆ ಥಾವ್ನ್ಂಚ್, ಫುಡೆಂ ರಚನ್ ಜಾಂವ್ಕ್ ಆಸ್ಚ್ಯಾ ತ್ಯಾ ಕುಡಿಕ್ ಏಕ್ ಅತ್ಮೊ ದೇವ್ ದಿತಾ. ಅಶೆಂ, ಸ್ಪಿರಿತ್ ಜಾವ್ನ್ ಆಸ್‌ಲ್ಲೊ ಅತ್ಮೊ, ಮಾಸಾ-ರಗ್ತಾಚ್ಯಾ ಕುಡಿಚ್ಯಾ ಆಧಾರಾನ್ ಜಾಗ್ಯಾ ಆನಿ ವೆಳಾಚ್ಯಾ ಪರಿಧೆ ಭಿತರ್ ಸರ್‍ತಾ. ಹ್ಯಾ ಘಡ್ಯೆ ಥಾವ್ನ್ ಗರ್ಭಾಂತ್ಲೆ, ಸೂಕ್ಷ್ಮ್ ದರ್ಶಕಾಚ್ಯಾ ಆಧಾರಾನ್ ಮಾತ್ರ್ ದೊಳ್ಯಾಂಚ್ಯಾ ದಿಷ್ಟಿಕ್ ಪಡ್ಚೆಂ ತೆಂ ಲ್ಹಾನ್ ಪಿಂಪ್ರೆಂ, ಕೂಡ್, ಅತ್ಮೊ ಆನಿ ಸ್ಪಿರಿತ್ ಎಕ್ತಾರಾಂತ್ ಆಸ್ಚೊ ಏಕ್ ಸಂಪೂರ್ಣ್ ಮನಿಸ್ ಜಾವ್ನ್ ಅಸ್ತಿತ್ವ್ ಘೆತಾ. ಹ್ಯಾ ಕಾರಾಣಾಕ್ ಲಾಗೊನ್ ಗರ್ಭಾಪಾತ್ ಮ್ಹಳ್ಯಾರ್ ಏಕ್ ಖುನಿ ಮ್ಹಣ್ ಇಗರ್ಜ್‌ಮಾತಾ ಪಾತ್ಯೆತಾ ಆನಿ ತ್ಯಾ `ಸಂಪೂರ್ಣ್ ಮನ್ಶಾಕ್’ ಆಮ್ಕಾಂ ಸಕ್ಡಾಂಕ್ ಆಸ್ಚೆ ಪರಿಂ ಜಿಯೆಂವ್ಚೆಂ ಹಕ್ಕ್ ಆಸಾ ಮ್ಹಣ್ ಮಾಂದ್ತಾ.

ಅಶೆಂ ಏಕಾ ಕುಡಿಚ್ಯಾ ಆಧಾರಾನ್ ಸಂಸಾರಾಕ್ ಆಯಿಲ್ಲೊ ಅತ್ಮೊ ಎಕಾ ನಿರ್ದಿಶ್ಟ್ ಮಿಸಾಂವಾಕ್ ಲಾಗೊನ್ ದೆವಾನ್ ಆಪ್ಣಾಕ್ ದಿಲ್ಲೆ ತಿತ್ಲಿಂ ವರ್ಸಾಂ ಸಂಸಾರಾಂತ್ ಜಿಯೆತಾ ಆನಿ ಆಪ್ಣಾಚೊ ವೇಳ್ ಸಂಪ್ತಾನಾ ತಿ ಕೂಡ್ ಆನಿ ತಿಚೆ ಸಾಂಗಾತಾ ಜೊಡ್‌ಲ್ಲೆಂ ಸಗ್ಳೆಂ ಸಾಂಡುನ್ ಆಪುಣ್ ಆಯಿಲ್ಲೆ ಕಡೆ ಪರತ್ ಪಾಟಿಂ ವೆತಾ. ಹೆಂ ಇತ್ಲೆಂ ಸೊಂಪ್ಯಾ ರಿತಿನ್ ಸಮ್ಜೊವ್ಯೆತ್ ಜಾಲ್ಲೆಂ ಸಾಧೆಂ ದೇವ್‌ಶಾಸ್ತ್ರ್.

ತಾಚ್ಯೆ ಉಪ್ರಾತ್ ಯೆತಾ ದುಸ್ರೊ ಹಂತ್. ಅತ್ಮ್ಯಾ ಥಾವ್ನ್ ಮೆಕ್ಳಿ ಜಾಲ್ಲಿ ಕೂಡ್ ಕುಸ್ತಾ ಆನಿ ಮಾತ್ಯೆಂತ್ ಸಾರೆಂ ಜಾವ್ನ್ ವಾ ಉಜ್ಯಾಂತ್ ಗೊಬೊರ್ ಜಾವ್ನ್ ನಾಸ್ ಜಾತಾ. ಅಶೆಂ ನಪಂಯ್ಚ್ ಜಾಲ್ಲಿ ಕೂಡ್ ಪರತ್ ನಿಮಾಣ್ಯಾ ದಿಸಾ ಜಿವಂತ್ ಜಾಂವ್ಕ್ ಕಶೆಂ ಸಾಧ್ಯ್? ಪರತ್ ತಿ ಅತ್ಮ್ಯಾ ಸಂಗಿಂ ಎಕ್ವಟೊನ್ ಮಾಸಾ-ರಗ್ತಾಚಿ ಕೂಡ್ ಜಾತಾಗಿ? ವಾ ದುಸ್ರಿ ಖಂಯ್ಚಿಗೀ ಕೂಡ್ ಮ್ಹಜ್ಯಾ ಅತ್ಮ್ಯಾಕ್ ಮೆಳ್ತಾಗೀ? ತಿ ಕೂಡ್ ಕಶಿ ಆಸೊಂಕ್ ಪುರೊ? ತಿ ಕೂಡ್ ಮ್ಹಜ್ಯಾ ಮರ್‍ಣಾಚ್ಯಾ ವೆಳಾರ್ ಆಸ್‌ಲ್ಲ್ಯಾ ಕುಡಿಪರಿಂ ಆಸ್ತಾಗೀ? ತಿಕಾ ಪಿಡಾ ಯೆತಾಗೀ? ಅಶೆಂ ಜಾಯ್ತಿಂ ಸವಾಲಾಂ ಆದಿಂ ಮಾಗಾ ಥಾವ್ನ್ ತರ್ಕ್ ಕೆಲ್ಲಿಂ ಆಸಾತ್.

ಕುಡಿ ಆನಿ ಅತ್ಮ್ಯಾಚೊ ಗಾಂಚ್

ಮ್ಹಜಿ ಕೂಡ್ ಮ್ಹಜ್ಯಾ ಅತ್ಮ್ಯಾಚೆಂ ಕೊಟೆಂ; ತಿ ಮ್ಹಜಿ ಅಸ್ಮಿತಾಯ್. ಪರ್ನ್ಯಾ ತೆಸ್ತಾಮೆಂತಾಂತ್ `ದೆವಾಕ್ ಕೊಣೆಂಯ್ ಪಳೆಲ್ಲೊ ನಾಂ’ ಮ್ಹಳ್ಳೆಂ ಚಿಂತಾಪ್ ಆಸ್‌ಲ್ಲೆಂ. ಪೂಣ್ ಜೆಜು ಮ್ಹಣ್ತಾ: “ಜಾಣೆಂ ಮ್ಹಾಕಾ ಪಳೆಲಾ, ತಾಣೆಂ ಬಾಪಾಕ್‌ಯೀ ಪಳೆಲಾ” (ಜುವಾ ೧೪:೯). ಮ್ಹಣ್ಜೆ `ಮನ್ಶಾ ಪೂತ್’ ಜಾವ್ನ್ ಸಂಸಾರಾಕ್ ಆಯಿಲ್ಲೊ ದೇವ್ ಕುಡಿಚ್ಯಾ ಆಧಾರಾನ್ ಸಂಸಾರಾಂತ್ ಜಿಯೆಲೊ, ತ್ಯಾಚ್ಚ್ ಕುಡಿಂತ್ ಆಸ್‌ಲ್ಲ್ಯಾ ದೆವಾಕ್ ತಾಣಿಂ ಖುರ್‍ಸಾರ್ ಮಾರ್‍ಲೊ ಆನಿ ತ್ಯಾಚ್ಚ್ ಕುಡಿನ್ ತೊ ಜಿವಂತ್ ಜಾಲೊ. ಜಿವಂತ್ ಜಾಲ್ಯಾ ಉಪ್ರಾಂತ್ ಜೆಜು ದುಸ್ರೆಂ ಖಂಯ್ಚೆಗೀ ಏಕ್ ರೂಪ್ ಘೆವ್ನ್ ವಾ ತಾಣಿಂ ದೆಕಾನಾತ್‌ಲ್ಲೆಂ ದೆವಾಚೆಂ ರುಪ್ಣೆಂ ಘೆವ್ನ್ ತಾಚ್ಯಾ ಶಿಸಾಂಕ್ ತೊ ದಿಷ್ಟಿಕ್ ಪಡೊಂಕ್ ನಾಂ. ಖಿಳ್ಯಾಂ ಘಾಯ್ ಆಸ್‌ಲ್ಲಿ ಆನಿ ಕಡ್ವಳ್ ಉಗ್ತಿ ಜಾಲ್ಲಿ, ಪೂಣ್ ರುಪಾಂತರ್ ಜಾಲ್ಲಿ ತಿಚ್ಚ್ ಕೂಡ್ ಘೆವ್ನ್ ತೊ ತಾಂಕಾಂ ದಿಷ್ಟಿಕ್ ಪಡ್ಲೊ, ತಾಂಚೆ ಲಾಗಿಂ ಉಲಯ್ಲೊ, ತಾಂಕಾಂ ತಾಂಚೆಂ ಮಿಸಾಂವ್ ದಿಲೆಂ, ಉಪ್ರಾಂತ್ ತಿಚ್ಚ್ ಆನಿ ತಾಚಿಚ್ಚ್ ರುಪಾಂತರಿತ್ ಕೂಡ್ ಘೆವ್ನ್ ತೊ ಸರ್ಗಾರ್ ಚಡೊನ್ ಗೆಲೊ. ತಿಚ್ಚ್ ಕೂಡ್ ಆಸ್‌ಲ್ಲೆ ನಿಮ್ತಿಂ ತಾಕಾ ಪಳೆಲ್ಲೆ ತಾಚಿ ಒಳಕ್ ಧರುಂಕ್ ಸಕ್ಲೆ. ಹ್ಯಾ ಪಾಟ್‌ಥಳಾ ಥಾವ್ನ್ ಉಬ್ಜಾತಾ ಆಮ್ಚ್ಯಾಯ್ ಕುಡಿಚೆಂ ಪುನರ್‌ಜಿವಂತ್ಪಣ್.

ದುಸ್ರೆಂ ಯೆಣೆಂ ಆನಿ ಕುಡಿಚೆಂ ಜಿವಂತ್ಪಣ್

“ಜಸೊ ತುಮಿಂ ತಾಕಾ ಸರ್ಗಾಕ್ ಚಡೊನ್ ವೆತಾನಾ ಪಳೆಲಾ ತಸೊಚ್ಚ್ ತೊ ಪರ್ತ್ಯಾನ್ ಯೆತಲೊ” (ಧ.ಕೃ. ೧:೧೧). ಹಿಂ ಆಸಾತ್ ಜೆಜುಚೆಂ ಸ್ವರ್ಗಾರೋಹಣ್ ಜಾಲ್ಲ್ಯಾ ತಕ್ಷಣ್ ದೇವ್‌ದುತಾಂನಿಂ ಸಾಂಗ್‌ಲ್ಲಿ ಉತ್ರಾಂ. ಜೆಜುಚ್ಯಾ ದುಸ್ರಾ ಯೆಣ್ಯಾವಿಶಿಂ ಉಲ್ಲೇಖ್ ಹೊ. ಜೆದ್ನಾಂ ನಿಮಾಚ್ಯಾ ದಿಸಾ ಜೆಜು ಪರ್ತ್ಯಾನ್ ಯೆತಲೊ ತೆದ್ನಾಂ ಯೆದೊಳ್ ಮೊರೊನ್ ಭುಂಯ್ತ್ ಸಾರೆಂ ಜಾವ್ನ್ ಗೆಲ್ಲಿ ಆಮ್ಚಿ ಸಂಸಾರಿ ಕೂಡ್ ಜಿವಂತ್ ಜೆಜುಚ್ಯಾ ಕುಡಿ ಪರಿಂ ರುಪಾಂತರ್ ಜಾವ್ನ್ ಉಠ್ತಲಿ, ತ್ಯಾ ಕುಡಿಂತ್ ದೂಕ್, ಪಿಡಾ, ಮ್ಹಾತಾರ್‍ಪಣ್, ಕುಸ್ಡೆಂಪಣ್ ಕಿತೆಂಚ್ ಆಸ್ಚೆಂನಾಂ. ಜಶೆಂ ಜಿವಂತ್ ಜೆಜುಚಿ ವ್ಹಳಕ್ ತಾಚೆ ಶಿಸ್ ಧರುಂಕ್ ಸಕ್ಲೆ ತಶೆಂಚ್ ಆಮಿಂಯ್ ಎಕಾಮೆಕಾಚಿ ಒಳಕ್ ಧರುಂಕ್ ಸಕ್ತೆಲ್ಯಾಂವ್. ಹೆಂ ಏಕ್ ಭಾವಾಡ್ತಾಚೆಂ ಸತ್. ಆಮಿಂ ಹರ್‍ಯೆಕ್ ದೀಸ್ `ಸತ್ಮಾಂದ್ತಾಂ’ ಮಾಗ್ಣ್ಯಾಂತ್ ಹೊ ಭಾವಾಡ್ತ್ ಉಚಾರ್‍ತಾಂವ್: “…..ಸತ್ಮಾಂದ್ತಾಂ ಪವಿತ್ರ್ ಅತ್ಮ್ಯಾಕ್……….. ಪಾತ್ಕಾಂಚೆಂ ಭೊಗ್ಸಾಣೆಂ, ಕುಡಿಚೆಂ ಜಿವಂತ್ಪಣ್……….”. ಕಿತೆಂಚ್ ನಾಸ್ತಾನಾ ಆಮ್ಚೊ ಅತ್ಮೊ ರಚ್‌ಲ್ಲ್ಯಾ ಆನಿ ಕುಡಿಂತ್ ಘಾಲ್ನ್ ತ್ಯಾ ಕುಡಿಕ್ ಏಕ್ ರೂಪ್ ದಿಲ್ಲ್ಯಾ ದೆವಾಕ್ ಆಮ್ಚಿ ಸರೊನ್ ಗೆಲ್ಲಿ ಕೂಡ್ ಶೆಂಭರ್, ಹಜಾರ್, ಮಿಲಿಯಾ, ಬಿಲಿಯಾ ವರ್ಸಾಂ ಉಪ್ರಾಂತ್ ಪರತ್ ಜಿವಂತ್ ಕರ್‍ಚೆಂ ಅಸಾಧ್ಯ್‌ಗೀ? “ದೆವಾಕ್ ಅಸಾಧ್ಯ್ ಮ್ಹಣ್ಚೆಂ ಕಸಲೆಂಚ್ ನಾಂ” (ಲೂಕ್ ೧:೩೭).

ಕಥೊಲಿಕ್ ಪವಿತ್ರ್ ಸಭೆಚೆ ಶಿಕವ್ಣೆಂತ್ ಕುಡಿಚೆಂ ಪುನರ್‌ಜಿವಂತ್ಪಣ್

ಪವಿತ್ರ್ ಪುಸ್ತಕ್ ಆನಿ ಆದಿಂ ಥಾವ್ನ್ ದೆವೊನ್ ಆಯಿಲ್ಲಿ ಪಾತ್ಯೆಣಿ ಸಾಂಗಾತಾ ಘಾಲ್ನ್ ಪವಿತ್ರ್ ಸಭೆಚಿ ಶಿಕವ್ಣ್ (ಅಂಕೆ ೯೯೭-೧೦೦೪) ಕುಡಿಚ್ಯಾ ಜಿವಂತ್ಪಣಾ ವಿಶಿಂ ಅಸೊ ಸವಿಸ್ತಾರ್ ವಿವರ್ ದಿತಾ:

೧.    ಉಠ್ಚೆಂ ಮ್ಹಳ್ಯಾರ್ ಕಿತೆಂ?

ಮರ್ಣಾ ಮುಕಾಂತ್ರ್ ಕೂಡ್ ಕುಸೊನ್ ವೆತಾನಾ ಅತ್ಮೊ ದೆವಾ ಥಂಯ್ ಪಾಟಿಂ ಪರ್ತಾತಾ ಆನಿ ರುಪಾಂತರಿತ್ ಕುಡಿಂತ್ ಉಟ್ಚ್ಯಾಕ್ ರಾಕೊನ್ ರಾವ್ತಾ. ದೇವ್ ತಾಚ್ಯಾ ವ್ಹಡ್ ಪದ್ವೆನ್ ಆನಿ ಜೆಜುಚ್ಯಾ ಜಿವಂತ್ಪಣಾಚ್ಯಾ ಸಕ್ತೆನ್ ಆಮ್ಚ್ಯಾ ವಿನಾಶಿ ಕುಡಿನಿಂ, ಅತ್ಮ್ಯಾಕ್ ಪರತ್ ಎಕ್ಟಾವ್ನ್ ಅವಿನಾಶಿ ಜಿವಿತ್ ರುತಾ ಕರ್‍ತಾ.

೨.   ಕೋಣ್ ಜಿವಂತ್ ಜಾತಲಿಂ?

ಮೆಲ್ಲೊ ಹರ್‍ಯೆಕ್ ಮನಿಸ್ ಜಿವಂತ್ ಉಠ್ತಲೊ. “ಜಾಣಿಂ ಬರೆಂ ಕೆಲಾಂ ತಿಂ ಜಿವಿತ್ ಭೊಗುಂಕ್ ಆನಿ ಜಾಣಿಂ ವಾಯ್ಟ್ ಕೆಲಾಂ ತಿಂ ಖ್ಯಾಸ್ತ್ ಸೊಸುಂಕ್ ಉಠ್ತಲಿ” (ಜುವಾ ೫:೨೯) “ಪ್ರಥ್ವೆಚೆ ಧುಳಿಂತ್ ನಿದುನ್ ಆಸಾತ್ ತಾಂಚೆ ಮಧ್ಲಿಂ ಜಾಯ್ತಿಂ ಜಣಾಂ ಉಟ್ತಲಿಂ, ಥೊಡಿಂ ಸಾಸ್ಣಾಚ್ಯಾ ಜಿವಿತಾಕ್ ಆನಿ ಥೊಡಿಂ ಸಾಸ್ಣಾಚೆ ಲಜೆಕ್” (ದಾನಿ ೧೨:೨).

೩.    ಕಶಿಂ ಉಠ್ತಲಿಂ?

ಜಶೆಂ ಜೆಜು ತಾಚ್ಯಾ ಕುಡಿಂತ್ ಉಠ್ಲೊ ತಶೆಂಚ್ ತೊ ಆಮ್ಕಾಂ ಆಮ್ಚ್ಯಾ ಮಹಿಮೆಭರಿತ್ ಕುಡಿನಿಂ ಉಠಯ್ತಲೊ. ಸಾಂ ಪಾವ್ಲು ಹ್ಯಾ ವಿಶಿಂ ಉಲ್ಲೇಕ್ ಕರ್‍ತಾ: “ಸರ್ವ್ ವಸ್ತು ಆಪ್ಣಾಕ್ ಖಾಲ್ ಕರುಂಕ್ ಸಕ್ತಲೆ ಆಪ್ಲೆ ಪದ್ವೆನ್ ಆಮ್ಚಿ ಕಿರ್ಕೊಳ್ ಕೂಡ್ ರುಪಾಂತರ್ ಕರ್‍ನ್ ತಿ ಆಪ್ಲೆ ಮಹಿಮೆಭರಿತ್ ಕುಡಿಚೆ ಸುರುಪಾಯೆಕ್ ತೊ ಹಾಡ್ತಲೊ” (ಫಿಲಿ ೩:೨೧). ಕೊರಿಂಥ್‌ಗಾರಾಕ್ ಬರಯಿಲ್ಲ್ಯಾ ಪಯ್ಲ್ಯಾ ಪತ್ರಾಂತ್ ಎಕ್ ಸಗ್ಳೊ ಅಧ್ಯಾಯ್ ಜಿವಂತ್ಪಣ್ ವಿಶ್ಯಾಂತ್ ವಿವಿರುನ್ ನಿಮಾಣೆಂ ಕುಡಿಚ್ಯಾ ಜಿವಂತ್ಪಣಾ ವಿಶ್ಯಾಂತ್ ಅಶೆಂ ತೊ ಸಾಂಗ್ತಾ: “ಒಂಪ್ತಾತ್ ತಿ ಪ್ರಾಕೃತಿಕ್ ಕೂಡ್, ಜಿವಂತ್ ಉಠ್ತಾ ತಿ ಅತ್ಮೀಕ್ ಕೂಡ್. ಜರ್ ಪ್ರಾಕೃತಿಕ್ ಕೂಡ್ ಆಸಾ ತರ್ ಅತ್ಮಿಕ್ ಕೂಡ್‌ಯೀ‌ಆಸಾ” (೧ ಕೊರಿ ೧೫:೪೪).

೪.   ಕಸಲಿ ಕೂಡ್?

ಪ್ರಾಕೃತಿಕ್ ಕೂಡ್ ನ್ಹಯ್; ಅತ್ಮಿಕ್ ಕೂಡ್. ಪರತ್ ಮರ್‍ತಾ ತಸಲಿ ಕೂಡ್ ನ್ಹಯ್, ಸಾಸ್ಣಾಕ್ ಜಿಯೆತಾ ತಸಲಿ ಕೂಡ್. ಪಿಡಾ, ಭುಕ್, ಮ್ಹಾತಾರ್‍ಪಣ್ ಯೆತಾ ತಸಲಿ ಕೂಡ್ ನ್ಹಯ್, ರುಪಾಂತರಿತ್ ಕೂಡ್. ಜಾಗ್ಯಾ ಆನಿ ವೆಳಾಚ್ಯಾ ಬಂಧಡೆಂತ್ ಆಸ್ಚಿ ಕೂಡ್ ನ್ಹಯ್, ತ್ಯಾ ದೊನಾಂಯ್ಕಿ ಮಿಕ್ವಾಲ್ಲಿ ಸ್ವತಂತ್ರ್ ಕೂಡ್. ಸಾಂ ತೊಮಾಸ್ ಅಕ್ವಿನಾಸ್ ತಾಚ್ಯಾ “ಸುಮ್ಮಾ ತಿಥೊಲೊಜಿಕಾ” ಬರ್‍ಪಾಂತ್, ಜೆಜುಚ್ಯಾ ಜಿವಂತ್ ಜಾಲ್ಲ್ಯಾ ಕುಡಿಚ್ಯಾ ಆಧಾರಾರ್ ಆಮ್ಚಿ ರುಪಾಂತರಿತ್ ಕೂಡ್ ಕಶಿ ಆಸ್ತಲಿ ಮ್ಹಳ್ಳೆಂ ವಿವರಣ್ ದಿತಾ:

`ಜಿವಂತ್ ಉಠ್ತಾನಾ ಆಮ್ಕಾಂ ಮೆಳೊಂಕ್ ಆಸ್ಚಿ ಕೂಡ್, ದುಸ್ರಿಚ್ಚ್ ಏಕ್ ನ್ಹಯ್ ಆಸ್ತಾಂ ಆಮ್ಚಿಚ್ಚ್ ಕೂಡ್ ಜಾವ್ನ್ ಆಸ್ತಲಿ. ಆಮ್ಕಾಂ ಆಮ್ಚಿಚ್ಚ್, ಹೆರಾಂಚಿ ಆನಿ ಹೆರಾಂಕ್ ಆಮ್ಚಿ ಒಳಕ್ ಮೆಳ್ತಲಿ. ತಿ ಕೂಡ್ ಆಸ್ತಲಿ ಕಸಲೆಂಚ್ ಊಣ್ ನಾತ್‌ಲ್ಲಿ, ಸೊಭಾಯೆನ್ ಪರ್ಜಳಿಕ್, ಕಸಲೆಂಚ್ ಆಯ್ಬ್ ನಾಸ್ತಾನಾ ಸಂಪೂರ್ಣ್ ಜಾಲ್ಲೆ ತಸಲಿ ಆನಿ ಕೆದಿಂಚ್ ಬದ್ಲಾನಾ ತಸಲಿ. ಜಾಗ್ಯಾ ಆನಿ ವೆಳಾಚಿ ಬಂಧಡ್ ನಾತ್‌ಲ್ಲ್ಯಾನ್ ಚಿಂತ್ಪಾಚ್ಯಾ ವೆಗಾನ್ ಖಂಚ್ಯಾಯ್ ಜಾಗ್ಯಾರ್ ವಚೊಂಕ್ ಸಕ್ಚೆ ತಸಲಿ ಆನಿ ದೆವಾಚೊ ಪರ್ಜಳ್ ಪ್ರತಿಫಲಿತ್ ಕರ್‍ಚೆ ತಸಲಿ’.

೫.   ಹೆಂ ಕಶೆಂ ಆನಿ ಕೆದಾಳಾ ಘಡ್ತಾ?

ತೆಂ ಆಮ್ಚ್ಯಾ ಸಮ್ಜೊಣೆಕ್ ಮಿಕ್ವಾಲ್ಲೆಂ. ಜಶೆಂ ಎವ್ಕರಿಸ್ತ್ ಆಮ್ಚ್ಯಾ ಸಮ್ಜೊಣೆಕ್ ಮಿಕ್ವಾಲ್ಲೊ ಮಿಸ್ತೆರ್ ತರೀ ಆಮಿಂ ಪಾತ್ಯೆತಾಂವ್ ತಶೆಂಚ್ ಕುಡಿಚೆಂ ಜಿವಂತ್ಪಣ್‌ಯೀ. ಖಂಡಿತ್ ಜಾವ್ನ್ ತೆಂ ಘಡ್ತಾ “ನಿಮಾಣ್ಯಾ ದಿಸಾ” “ಸಂಸಾರಾಚ್ಯಾ ಅಂತ್ ಕಾಳಾರ್” (ಜುವಾ ೬:೩೯,೪೦,೪೪,೫೪, ೧೧:೨೪). “ಫರ್ಮಾಣಾಚೆ ಘರ್ಜೊವ್ಣೆಕ್, ಶ್ರೇಷ್ಟ್ ಭಡ್ಚ್ಯಾಚ್ಯಾ ಉಲ್ಯಾಕ್ ಆನಿ ದೆವಾಚೆ ತುತುರೆಚ್ಯಾ ಆವಾಜಾಕ್ ಸೊಮಿಂಚ್ ಸ್ವತಃ ಸರ್ಗಿಂ ಥಾವ್ನ್ ದೆಂವ್ತಲೊ. ತವಳ್ ಕ್ರಿಸ್ತಾ ಥಂಯ್ ವಿಶ್ವಾಸ್ ದವರ್ನ್ ಮರಣ್ ಪಾವ್‌ಲ್ಲಿಂ ಪಯ್ಲೆಂ ಉಠ್ತಲಿಂ” (೧ ಥೆಸ್ಸಾ ೪:೧೬).

ಸಮಾಪ್ತ್

ಹೆಂ ವಾಚುನ್ ಕಾಡ್ತಾನಾ ತುಕಾ ಕಾಲ್ಪನಿಕ್ ವಾ ಘಡೊನ್ ಬರಯಿಲ್ಲೆ ಪರಿಂ ದಿಸೊಂಕ್ ಪುರೊ; ಸತ್ ಮ್ಹಣ್ ಪಾತ್ಯೆಂವ್ಕ್ ಕಷ್ಟಾಂಚೆಂ ಜಾಂವ್ಕ್ ಪುರೊ. ಪೂಣ್ ಖಂಚೊಯ್ ವಿಶಯ್ ಸಂಪೂರ್ಣ್‌ಪಣಿಂ ವಿವರುಂಕ್ ಜಾಯ್ನಾತ್‌ಲ್ಲ್ಯಾ ವೆಳಾರ್ ತೊ ವಿಶಯ್‌ಚ್ಚ್ ಫಟ್ ಮ್ಹಣ್ ಸಾಂಗ್ಚೆಂ ಮೂರ್ಖ್‌ಪಣ್ ಜಾತಾ. ಪವಿತ್ರ್ ಪುಸ್ತಕಾಂತ್ ಹೆಂ ಬರವ್ನ್ ಘಾಲಾಂ ಆನಿ ಇಗರ್ಜ್‌ಮಾತೆನ್ ಪವಿತ್ರ್ ಅತ್ಮ್ಯಾಚ್ಯಾ ಮಜತಿನ್ ಆಪ್ಲ್ಯಾ ದೋನ್ ಹಜಾರ್ ವರ್ಸಾಂಚ್ಯಾ ಶಿಕವ್ಣೆ, ಸಂಪ್ರದಾಯ್ ಆನಿ ದೇವ್‌ಶಾಸ್ತಿರಾ ಮುಕಾಂತ್ರ್ ತೆಂ ಥಿರ್ ಕೆಲಾಂ. ಜೆಜುಚ್ಯಾ ಜಿವಂತ್ಪಣಾ ಉಪ್ರಾಂತ್ ಕುಡಿ ಆನಿ ಅತ್ಮ್ಯಾಚ್ಯಾ ಜಿವಂತ್ಪಣಾಚೊ ಧಾಕ್ಲೊ ಜಾವ್ನ್ ಮರ್‍ಯೆಚೆಂ ಸ್ವರ್ಗಾವ್ಹರಣ್ ಆಮ್ಚೆ ಮುಕಾರ್ ಆಸಾ. ತಿಚ್ಯಾ ಪಾಪಾವೀಣ್ ಆನಿ ಖತಾವೀಣ್ ಜಿಣ್ಯೆಕ್ ಲಾಗೊನ್ ಜೆಂ ಕಿತೆಂ ಆಮಿಂ ಮುಕಾರ್ ಕುಡಿಚ್ಯಾ ಜಿವಂತ್ಪಣಾ ವೆಳಾರ್ ಜೊಡುಂಕ್ ಆಸಾ ತೆಂ ಮರ್‍ಯೆನ್ ಎದೊಳ್‌ಚ್ಚ್ ಜೊಡ್ಲಾಂ. ಅಶೆಂ ಆಮ್ಚೆಂ ಶಾರೀರಿಕ್ ಅಸ್ತಿತ್ವ್ ನಾಸ್ ಜಾಯ್ನಾ ಬಗಾರ್ ತೆಂ ರುಪಾಂತರ್ ಜಾವ್ನ್ ದೆವಾ ಥಂಯ್ ಏಕ್ ಜಾಂವ್ಚ್ಯಾ ಪಾಂವ್ಡ್ಯಾಕ್ ಉಬಾರ್‍ಲೆಂಲೆಂ ಜಾತಾ ಮ್ಹಳ್ಳೆಂ ಆಮ್ಕಾಂ ಸ್ಪಷ್ಟ್ ಜಾಲಾಂ. ತ್ಯಾ ದೆಕುನ್ “ಪವಿತ್ರ್ ಅತ್ಮ್ಯಾಚೆಂ ಮಂದಿರ್” ಜಾವ್ನಾಸ್ಚಿ ಆನಿ ನಿಮಾಣ್ಯಾ ದಿಸಾ ಜಿವಂತ್ ಉಠೊಂಕ್ ಆಸ್ಚಿ ಆಮ್ಚಿ ಕೂಡ್ ಪವಿತ್ರ್ ಆನಿ ನಿಸ್ಕಳ್‌ಪಣಿಂ ಸಾಂಬಾಳ್ಚಿ ಆಮ್ಚೆ ಮುಕಾ‌ಎದ ಆಸ್ಚಿ ಏಕ್ ಮಾತ್ರ್ ವಿಂಚಚ್ನ್ ನ್ಹಯ್‌ಗೀ?

ಫ್ರಾದ್ ಆರನ್ ಬಬುಶ್, ಕಾರ್ಮೆಲಿತ್