ರಸ್ತೊ ಕೇವಲ್ ಪಯ್ಣರ‍್ಯಾಂಕ್ ವಾವೊಯ್ತಾ ಮ್ಹಣ್ ತುಮಿ ಚಿಂತ್ತಾತ್‌ಗಿ? ಕೊಂಕಣಾಚೆ ರಸ್ತೆ ಕೇವಲ್ ಪಯ್ಣರ‍್ಯಾಂಕ್ ನ್ಹಯ್, ತಾಂಚ್ಯಾ ಸಾಂಗಾತಾ ಇತಿಹಾಸ್, ಕಾಣಿಯೊ, ಸಂಸ್ಕೃತಿ ಥಳಾಂತರಿ ಯಾದಿ ಆನಿ ಭಾವಾಡ್ತ್ ಸಾಂಗಾತಾ ಘೆವ್ನ್ ವೆತಾತ್. ತೆಂ ಪಯ್ಣ್ ಜರ್ ಯಾತ್ರಿಕಾಂಚೆಂ ಜಾಲೆಂ, ತರ್ ಹೆ ರಸ್ತೆ ಹರೇಕ್ ಥಾಂಬ್ಣಿ ನವ್ಯಾ ಅರ್ಥಾನ್ ಭರ‍್ತಾತ್.

ಗೊಂಯೆಂ ಕೆದ್ನಾಂಯ್ ಸರ್ವ್ ಲೊಕಾಕ್ ಏಕ್ ಆಕರ್ಶಣ್, ವೆವೆಗ್ಳ್ಯಾ ಕಾರಣಾಂಕ್! ಪುಣ್ ಕೆನರಾಚ್ಯಾ ಲೊಕಾಕ್ ಗೊಂಯೆಂ ಪುರ್ವಜಾಂಚೆಂ ಥಳ್. ಸಾರಸ್ವತ್ ಲೋಕ್ ಆಪ್ಲೆಂ ಮೂಳ್, ಗೊಂಯಾಂಕ್ ದಾಕಯ್ತಾ ತರ್ ಕೆನರಾಚೊ ಕಥೊಲಿಕ್ ಕೊಂಕ್ಣಿ ಲೋಕ್‌ಯೀ ಗೊಂಯಾಂಕ್ ಕಾಳ್ಜಾಂತ್ ವ್ಹಡ್ ಜಾಗೊ ದಿತಾ. ಕಿತ್ಯಾಕ್ ತಾಂಚೆಯ್ ಪುರ್ವಜ್ ಗೋಂಯ್ ಥಾವುನ್ ದೆಂವುನ್ ಆಯಿಲ್ಲೆ. ಗೋಂಯ್ ಸುಶೆಗಾಚೊ ಜಾಗೊ ಮ್ಹಣ್ ಹೆರ್ ಜಾಯ್ತೆ ಲೆಕ್ತಾತ್. ಪುಣ್ ಹಾಂವ್ ಗೊಂಯಾಂ ಹ್ಯೆ ಪಾವ್ಟಿಂ ವೆಗ್ಳ್ಯಾಚ್ ಉದ್ದೇಶಾನ್ ವಚುಂಕ್ ಭಾಯ್ರ್ ಸರ‍್ಲೊಂ.

ಏಕ್ ಚಾರ್ ದಿಸಾ ಆದಿಂ ಕಾರ್ಮೆಲ್ ಕಿರಣ್ ಸ್ಟುಡಿಯೊಚೆ ಬಾಪ್ ಕಿರಣ್ ಆನಿ ಹಾಂವ್ ಉಲೊವ್ನ್ ಆಸ್ತಾನಾ ‘ಗೊಂಯೆಂ ನಿಜಾಯ್ಕಿ ಸೊಭಿತ್ ಆನಿ ಭಾವಾಡ್ತಾಚ್ಯಾ ಸ್ವಾದಾನ್ ಭರ‍್ಲಾಂ, ತೆಂ ಭೊಗುನ್ ಕಳಾಜೆ’ ಮ್ಹಣ್ತಾನಾ ಆಮಿ ಕಿತ್ಯಾಕ್ ಗೊಂಯಾಂಕ್ ಮರಿಯಾಳ್ ಯಾತ್ರಿಕ್ ಪಯ್ಣ್ ಕರಿನಾಯೆ ಮ್ಹಣ್ ಭೊಗ್ಲೆಂ. ಬಾಪ್ ಕಿರಣ್ ಮಡ್ಗಾಂವಾಚ್ಯಾ ಕಾರ್ಮೆಲಿತ್ ಮೊನೆಸ್ಟ್ರಿಂತ್ ತೀನ್ ವರ‍್ಸಾಂ ಆಸೊನ್ ಹೆವ್ಶಿನ್ ಆಯಿಲ್ಲೆ ಜಾಲ್ಲ್ಯಾನ್ ‘ಜಾಗೆ ಹಾಂವ್ ದಾಕಯ್ತಾಂ’ ಮ್ಹಣಾಲೆ. ಹಾಂವೆಂ ಹಾಚ್ಯಾ ಆದಿಂ ಗೊಂಯಾಂತ್ ತರ್ಭೆತಿಚಿಂ ದೋನ್-ತೀನ್ ವರ‍್ಸಾಂ ಸರ್‍ಲ್ಯಾಂತ್. ಪುಣ್ ಭೊಂವ್‌ಲ್ಲೆಂ ಉಣೆಂ. ಸಾಂ ಫ್ರಾನ್ಸಿಸ್ ಸಾವೆರಾಚಿ ಕೂಡ್ ಪಳೆಂವ್ಕ್ ಗೆಲಾಂ ಆನಿ ಥೊಡ್ಯಾ ದರ್ಯಾ ತಡಿಂಕ್ ಪಾವ್ಲಾಂ ಸೊಡ್ಲ್ಯಾರ್ ಯಾತ್ರಿಕ್ ಪಯ್ಣ್ ಮ್ಹಣ್ ಚಿಂತುನ್ ಗೆಲ್ಲೊಂ ನಾ. ತಶೆಂ ಥಾಪಡ್ತಾಪ್ ಭಾಯ್ರ್ ಸರ್‍ಲ್ಯಾಂವ್ ಎಕಾ ಆಯ್ತಾರಾಚ್ಯೆ ಸಾಂಜೆರ್. ಆಮ್ಚ್ಯಾ ಸಾಂಗಾತಾ ಬಾಪ್ ಸ್ಟ್ಯಾನಿ ಆನಿ ಬಾಪ್ ಅಶ್ವಥ್, ಆಪುಣ್‌ಯೀ ಯೆತಾಂ ಮ್ಹಣಾಲೆ. ಅಶೆಂ ಚವ್ಗಾಂನಿ ಆಯ್ತಾರಾಚ್ಯೆ ಸಾಂಜೆರ್ ಕಾರ್ಮೆಲ್ ಗುಡ್ಯಾರ್ ಕಾರ್ಮೆಲ್ ಮಾಯೆಕ್ ನಮಾನ್ ಕರುನ್ ಏಕ್ ನಮಾನ್ ಮರಿ ಭೆಟೊವ್ನ್ ಆಮ್ಚೆಂ ಪಯ್ಣ್ ಶಾಬಿತಾಯೆಚೆಂ ಆನಿ ಅತ್ಮಿಕ್ ಘಟಾಯೆಚೆಂ ಕರ್ ಮಾಯೆ ಮ್ಹಣುನ್ ಸುಟ್ಲ್ಯಾಂವ್.

ಹಾಂವೆಂ ಆದ್ಲೆ ರಾತಿಂ ಬಸೊನ್ ಖಂಯ್ಚ್ಯಾ ಮರಿಯಾಳ್ ಇಗರ್ಜಾಂಕ್ ವಚಾಜೆ ಮ್ಹಣ್ ನೋಂದ್ ಕೆಲ್ಲ್ಯಾನ್ ಘುಸ್ಪೊಡ್ ನಾಸ್ತಾನಾ ಪಯ್ಣ್ ಸುರು ಜಾಲೆಂ. ಆಮಿ ಪಯ್ಲೆಂ ಭೆಟೊಂಕ್ ಆಶೆಲ್ಲಿ ರೊಜಾರ್ ಮಾಂಯ್, ಕುಂದಾಪುರಾಚಿ. ಕಾರಾರ್ ಬಸೊನ್ ಆಸ್ತಾನಾಂ – ಗೋಂಯ್ ಸಾಂಡುನ್ ಆಯ್ಲಿ ಮಾಂಯ್.. ರೊಜಾರ್ ಸಾಯ್ಭಿಣ್.. ಮೆಕ್ಳ್ಯಾ ಕೆಸಾಂನಿ ಮಾಂಯ್, ದೆಂವ್ಲಿ ಸಮ್ದಿರಾಕ್ – ಗುಮ್ಟಾಪದ್ ಅಚಾನಕ್ ಜಿವೆಂ ಜಾವ್ನ್ ಕಾನಾಂನಿ ಸಾದತ್ ರಾವ್ಲೆಂ. ಸುಮಾರ್ ಸಾತ್ ಮರಿಯಾಳ್ ಇಗರ್ಜಾಂಕ್ ಯಾತ್ರಿಕ್ ಭೆಟ್ ದಿಂವ್ಚಿ ಮಾಂಡಾವಳ್ ಕೆಲ್ಲ್ಯಾನ್ ಪಯ್ಲೆಂ ಆಮ್ಚಿಂ ಮೆಟಾಂ ಕುಂದಾಪುರಾಚ್ಯಾ ರೊಜಾರ್ ಮಾಯೆಚ್ಯಾ ಮುಳಾಂತ್ ಥಾಂಬ್ಲಿಂ.

ಕೋಟೆಬಾಗಿಲುಚಿ ರೊಜಾರ್ ಮಾಂಯ್

ಹ್ಯಾ ಮಂದಿರಾಮುಕಾರ್ ರಾವ್ತಾನಾ ಹ್ಯಾ ಜಾಗ್ಯಾರ್ ೪೫೦ ವರ‍್ಸಾಂನಿ ಕಿತ್ಲೊ ಲೋಕ್ ಯೇವ್ನ್ ಗೆಲಾ, ಮಾಗ್ಣಿಂ ಭೆಟಯ್ಲ್ಯಾಂತ್, ರೊಜಾರ್ ಮಾಯೆನ್ ಕಿತ್ಲೆಶ್ಯಾ ಭುರ್ಗ್ಯಾಂಕ್ ಹ್ಯಾ ತೆಂಪ್ಲಾಂತ್ ಪವಿತ್ರ್ ಸ್ನಾನ್ ದಿಲ್ಲೆಂ ಪಳೆಲಾಂ, ಬೆಸಾಂವಾಂ ವೊತ್ಲ್ಯಾಂತ್ ಆಸ್ತೆಲಿಂ.. ಅಶೆಂ ಭೊಗ್ಲೆಂ. ಹಿ ಕುಂದಾಪುರ್ ಫಿರ್ಗಜ್ ಘಡುನ್ ೪೫೦ ವರ‍್ಸಾಂ ಜಾವುನ್ ಆಯ್ಲಿಂ. ಪಯ್ಲೆಂ ಜೆದ್ನಾ ಪುಡ್ತುಗೇಜ್ ಆಪ್ಲ್ಯಾ ಸಯ್ನಾಸಂಗಿಂ ೧೫೭೦ ಇಸ್ವೆಂತ್ ದೆಂವುನ್ ಆಯ್ಲೆ, ತೆದ್ನಾಂ ಬಾರ್ಸೆಲೊರಾಂತ್ (ಬಸ್ರೂರ್) ತಾಂಚೆಂ ಕೊಟೆಂ ಬಾಂದ್ಲೆಂ. ಆತಾಂಚ್ಯೆ ಬರಿ ಹ್ಯಾ ಪ್ರದೆಶಾಕ್ ಕುಂದಾಪುರ್ ಮ್ಹಣಾನಾತ್ಲೆ, ಬಗಾರ್ ಸಕಯ್ಲೆಂ ಬಸ್ರೂರ್ ಮ್ಹಣ್ತಾಲೆ. (ವ್ಹಯ್ಲೆಂ ಬಸ್ರೂರ್, ಜೆಂ ಆಜೂನ್ ತ್ಯಾಚ್ ನಾಂವಾನ್ ಆಸಾ, ಥಳೀಯ್ ಆಡಳ್ತ್ಯಾಖಾಲ್ – ಕೆಳದಿ ವೆಂಕಟಪ್ಪ ನಾಯಕಾಚ್ಯೆ ಹಾತಿಂ ಆಸ್ಲೆಂ. ಪುಣ್ ಸಕಯ್ಲೆಂ ಬಸ್ರೂರ್ (ಆತಾಂ ಕುಂದಾಪುರ್) ಪುಡ್ತುಗೆಜಾಂಚ್ಯಾ ಆಡಳ್ತ್ಯಾಖಾಲ್ ಆಸ್ಲೆಂ) ಆಶೆಂ ಹಾಂಗಾ ಪುಡ್ತುಗೇಜಾಂನಿ ಹಿಂದು ರಾಯಾಂಕ್ ಸಲ್ವೊವ್ನ್ ಕೋಟೆ ಬಾಗಿಲು ಮ್ಹಳ್ಳೆಕಡೆ ಲ್ಹಾನ್ ಕೊಪೆಲ್ ಬಾಂದ್ಲೆಂ. ಹಾಚ್ಯಾ ಉಪ್ರಾಂತ್ಲ್ಯಾ ವರ‍್ಸಾ ಝುಜಾಂತ್ ಘಾಯೆಲ್ಲ್ಯಾ ಸೊಜೆರಾಂಚಿ ಜತನ್ ಘೆಂವ್ಕ್ ದೋಗ್ ಜೆಜ್ವಿತ್ ಯಾಜಕ್ (ಬಾಪ್ ಸೆಬಾಸ್ಟಿಯನ್ ಗೊನ್ಜಾಲ್ವೆಸ್ ಆನಿ ಬಾಪ್ ಮಾರ್ಟಿನ್ ಸಿಲ್ವಾ) ಆಯ್ಲೆ ಆನಿ ತಾಣಿಂ ಏಕ್ ಲ್ಹಾನ್ ಕೊಡ್ಕ್ಯಾಂತ್ ಚಿಕಿತ್ಸಾ ದಿಂವ್ಕ್ ಸುರು ಕೆಲಿ. ದೊಗಾಂಪಯ್ಕಿ ಎಕ್ಲೊ ಜೆಜ್ವಿತ್, ಬಾಪ್ ಮಾರ್ಟಿನ್ ಸಿಲ್ವಾ ಸೊಜೆರಾಂಕ್ ಚಿಕಿತ್ಸಾ ದಿತಾನಾ ಅಂರ‍್ಲೊ. ಮಾಗಿರ್ ಸುಮಾರ್ ೧೫೭೪ ಇಸ್ವೆಂತ್ ಗೊಂಯಾಂಥಾವ್ನ್ ಥೊಡ್ಯಾ ಕುಟ್ಮಾಂಕ್ ಹ್ಯೆ ಸುವಾತೆರ್ ವಸ್ತೆಕ್ ಹಾಡ್ಲೆಂ. ತಾಣಿಂ ಯೆತಾನಾ ತಾಂಚೊ ಭಾವಾಡ್ತ್, ಭಾಸ್, ಸಂಪ್ರದಾಯ್ ಹಾಡ್ಲೊ. ರೊಜಾರ್ ಮಾಯೆಚ್ಯಾ ಮಾಂತಾಖಾಲ್ ಹಿ ಪಿಳ್ಗಿ ವಾಡ್ಲಿ ಆನಿ ಚಡ್ಲಿ.

ಗ್ರೊಟ್ಟ್ಯಾಮುಕಾರ್ ಹ್ಯಾ ಥಳೀಯ್ ಭಾವಾಡ್ತ್ಯಾಂಪಾಸತ್, ಜೀವ್ ಜರಯಿಲ್ಲ್ಯಾ ತ್ಯಾ ದೊಗಾಂ ಜೆಜ್ವಿತ್ ಪಾದ್ರಿಂ ಹಾತಿರ್ ಆನಿ ಸರ್ವ್ ಲೊಕಾಪಾಸತ್ ಮಾಗ್ಣಿಂ ಆಮಿ ಭೆಟಯ್ಲಿಂ ಆನಿ ಥಂಯ್ ಥಾವ್ನ್ ಆಮಿ ಹೊನ್ನಾವರಾ ಮಠದಕೇರಿಂತ್ ಆಸ್ಚ್ಯಾ ಆಮ್ಚ್ಯಾ ಕೊವೆಂತಾಕ್ ರಾತ್ ಪಾಶಾರ್ ಕರುಂಕ್ ಪಾವ್ಲ್ಯಾಂವ್. 

ಗೋಕರ್ಣಾಚಿ ದರ್ಯಾಚಿ ಮಾಂಯ್

ದುಸ್ರ್ಯೆ ಸಕಾಳಿಂ ಮ್ಹಜಿ ಮತ್, ಕೂಡ್ ಕಾರಾರ್ ಬಸ್ಚೆ ಆದಿಂಚ್, ಗೋಕರ್ಣಚ್ಯೆ ವಾಟೆಕ್ ಲಾಗ್‌ಲ್ಲಿ. ಹಿಂದ್ವಾಂಕ್ ಗೋಕರ್ಣ ಏಕ್ ಪವಿತ್ರ್ ಜಾಗೊ, ಮ್ಹಣ್ತಚ್ ಹಾಂವೆಂ ಮ್ಹಜ್ಯಾ ಸಾಂಗಾತ್ಯಾಂಕ್ ಸಾಂಗ್ಲೆಂ, ‘ಆಮ್ಚೆಂ ಮುಕ್ಲೆಂ ಠಾಣೆಂ ಗೋಕರ್ಣ’ ತೆಗೀ ಜಣ್ ಮ್ಹಾಕಾಚ್ ಪಳೆಂವ್ಕ್ ಲಾಗ್ಲೆ, ಮರಿಯೆಚೆಂ ಯಾತ್ರಿಕ್ ಪಯ್ಣ್ ಮ್ಹಣುನ್ ಖಂಯ್ ದಿವ್ಳಾಕ್ ವ್ಹರ್ತಾಗಿ ಮ್ಹಣ್! ಹಾಂವೆಂ ಸಾಂಗ್ಲೆಂ, ‘ಗೋಕರ್ಣ, ಬಂಕಿಕೊಡ್ಲ ಮ್ಹಳ್ಳೆಕಡೆ ದರ್ಯಾಚಿ ಮಾಂಯ್ ಆಸಾ. ತಿಕಾ ಭೆಟುನ್ ಯೆವ್ಯಾಂ’. ಗೋಕರ್ಣಾಂತ್ ಇಗರ್ಜ್ ಆಸಾಗಿ? ಮ್ಹಳ್ಳ್ಯಾ ತಾಂಚ್ಯಾ ಪಾಟಿಂ ಸವಲಾಸಂಗಿಂ ಆಮ್ಚೆಂ ಕಾರ್ ಧಾಂವ್ಲೆಂ. ಥಂಯ್ ಪಾವ್ತಾನಾ ಸಕಾಳಿಂಚೆಂ ಮೀಸ್ ಜಾವ್ನ್ ಲೋಕ್ ಭಾಯ್ರ್ ಸುಟ್ತಾಲೊ ಮಾತ್ರ್. ವಿಗಾರ್ ಬಾಪ್ ಜೊಕಿಮ್ ಫುಟ್ತಾದಾನ್ ಆಮ್ಚ್ಯಾ ಪಯ್ಣಾಚೊ ವಿವರ್ ಘೆವ್ನ್ ದಾರಾಂ ಉಗ್ತಿಂ ಕರ್ನ್ ಭಿತರ್ ವಚೊಂಕ್ ಸೊಡ್ಲೆಂ.

ಭಿತರ್ ಸಾಯ್ಭಿಣ್ ಮಾಂಯ್, ದರ್ಯಾಚಿ ಮಾಂಯ್, ಉಭಿ ರಾವುನ್ ತಿಚ್ಯೆಲಾಗಿಂ ಯೆತೆಲ್ಯಾಂಕ್ ಹರ‍್ಸುನ್ ಧಾಡ್ತಾಲಿ. ಏಕ್ ಕಣ್ ತೇರ್ಸ್ ಥಂಯ್ ಭೆಟವ್ನ್ ಇಗರ್ಜೆ ಭಂವ್ತಣಿ ಭೊಂವ್ಡಿ ಮರ‍್ಲಿ. ಎಕಾ ವಿಸ್ತಾರ್ ಬಂಗ್ಲ್ಯಾಕ್  ಚಡೊನ್ ವಚೊಂಕ್ ಆಸ್ಚ್ಯಾ ನಿಸ್ಣೆಬರಿ ದೊನೀ ಕುಶಿನ್ ಥಾವ್ನ್ ಇಗರ್ಜೆಕ್ ಚಡೊನ್ ವಚೊಂಕ್ ಮೆಟಾಂ ಆಸಾತ್.

ಹಾಂ! ಹ್ಯಾ ದರ್ಯಾಚ್ಯೆ ಮಾಯೆಚಿ ಗಜಾಲ್ ತುಮ್ಕಾಂ ಸಾಂಗೊನಾ. ಸುಮಾರ್ ೧೯ವ್ಯಾ ಶತಮಾನಾಂತ್ ದರ್ಯಾಂತ್ ವಾದಾಳ್ ಉಟೊನ್ ಏಕ್ ತಾರುಂ ಉಚಾಂಬಳ್ ಲ್ಹಾರಾಂಕ್ ಸಾಂಪ್ಡಾಲ್ಲೆಂ. ಕಿತ್ಲೆಂ ಪ್ರಯತ್ನ್ ಕೆಲ್ಯಾರೀ ತಡಿಕ್ ಪಾವೊಂಕ್ ಅಸಾಧ್ ಮ್ಹಣ್ ತರ‍್ವಟ್ಯಾಂಕ್ ದಿಸ್ಲೆಂ. ಅಶೆಂ ಆಸ್ತಾಂ, ಉದ್ಕಾಂತ್ ಏಕ್ ವ್ಹಡ್ ಗಾತ್ರಾಚೊ ರುಕಾಡಾಚೊ ಕುಡ್ಕೊ ಉಪ್ಯೆವ್ನ್ ಯೆಂವ್ಚೊ ದಿಸ್ಲೊ. ಎಕ್ಲ್ಯಾನ್ ತೊ ಆರಾವ್ನ್ ವಯ್ರ್ ಕಾಡ್ತಾನಾ ತಿ ಆಸ್ಲಿ ರುಕಾಡಾಚಿ ಮರಿಯೆಚಿ ಇಮಾಜ್! ತಾಣಿಂ ಸಕ್ಡಾಂನಿ ದಿಂಬಿ ಘಾಲುನ್ ಆಪ್ಣಾಕ್ ತಡಿಕ್ ಪಾವಯ್ಲ್ಯಾರ್ ತಿಚ್ಯಾ ಮಾನಾಕ್ ಏಕ್ ಕೊಪೆಲ್ ಭಾಂದ್ತಾಂವ್ ಮ್ಹಣ್ ಆಡ್ದೊಸ್ ಮಾಗ್ಲೊ. ಕಿಣಾಕ್ ಸಗ್ಳೆಂ ವಾದಾಳ್ ಥಾಂಬ್ಲೆಂ. ಅಶೆಂ ತೆ ತಡಿಕ್ ಪಾವ್‌ಲ್ಲ್ಯಾ ದುಸ್ರ್ಯಾ ದಿಸಾಚ್ ತಿಚೆಖಾತಿರ್ ಲ್ಹಾನ್ ಎಕಾ ಕೊಪೆಲಾಚ್ಯಾ ನಿರ್ಮಾಣಾಚೆಂ ಕಾಮ್ ಸುರು ಜಾಲೆಂ. ಅಶೆಂ ಏಕ್ ಮಿಸಾಂವ್ ಠಾಣೆಂ ಜಾವ್ನ್ ಸುರು ಜಾಲ್ಲೆಂ. ಸಭಾರ್ ಪಾಗಿಂಚ್ಯಾ ಭಾವಾಡ್ತಾಕ್ ಸಾಕ್ಸ್ ಜಾವ್ನ್ ಮರಿ ಥಂಯ್ ಉಭಿ ಆಸಾ.

ದರ್ಯೊ ತಾಂಕಾಂ ಪೊಟಾಕ್ ಗ್ರಾಸ್ ದಿತಾ. ಪುಣ್ ತಾಂಕಾಂ ತೊ ಭೆಶ್ಟಾಯ್ತಾ ಸಯ್ತ್. ಪುಣ್ ಆತಾಂ ತೆ ಉದ್ಕಾಕ್ ದೆಂವ್ಚೆ ಆದಿಂ ಮರಿಯೆಚೆರ್ ದೀಶ್ಟ್ ಘಾಲ್ತಾತ್ ಆನಿ ದರ್ಯಾಚಿ ಮಾಂಯ್ ತಾಂಚೆ ಸಂಗಿಂ ಪಯ್ಣಾಕ್ ಲಾಗ್ತಾ.  

 ಪಾದ್ರೊವಾದೊ ಕಾಳಾಚಿ ಕಾರ್‌ವಾರಾಚಿ ಪಿಯಾದ್ ಮಾಂಯ್

ಥಂಯ್ ಥಾವ್ನ್ ಆಮಿ ಇಲ್ಲೆಂ ಪೊಟಾಕ್ ಘಾಲ್ನ್ ಕಾರ್ವಾರ್ ತೆವ್ಶಿಂ ಗಾಡಿ ಸೊಡ್ಲಿ. ಇಲ್ಲೊ ಪಾವ್ಸ್, ಇಲ್ಲಿ ಸುರ್ಯಾಚಿಂ ಕಿರ್ಣಾ ಅಪಾಲಿಪಾ ಖೆಳುನ್ ಆಸ್ತನಾ ಆಮಿ ‘ನೊಸ್ಸಾ ಸೆನ್ಹೊರಾ ದ ಪಿಯದಾದ್’ ಮಾಯೆಚ್ಯಾ ವ್ಹಡ್ ಇಗರ್ಜೆಚಿಂ ಮೆಟಾಂ ಚಡ್ಲ್ಯಾಂವ್. ಹಿ ಕಾರ್ವಾರಾಚ್ಯಾ ಕೋಣೆಕಾರ್ ವಾಡಾ ಮ್ಹಳ್ಳೆಕಡೆ ಉಭಿ ಆಸಾ. ಹ್ಯೆ ಹಳ್ಳೆಂತ್ ಮರಿಯೆಕ್ ಜೆಜು ಸಾಂಗಾತಾ ಸಂತೊಸ್ ಪಾವ್ಲಲಿ ಮ್ಹಣ್ ಮಾತ್ರ್ ನ್ಹಯ್, ತಾಚ್ಯಾ ಖರ‍್ಸಾಮುಳಿಂ ಕಶ್ಟಾಂತ್ ಭಾಗೆಲಿ ಜಾಲ್ಲಿ ದೆಕುನ್ ತಿಕಾ ಆಮ್ಚ್ಯೆಯ್ ಕಶ್ಟ್ ಸಮ್ಜತಾತ್ ಮ್ಹಣ್ ಮಾನ್ತಾತ್. ಹಿ ಇಗರ್ಜ್ ಕಾಂಯ್ ಪಾದ್ರೊವಾದೊ ಮಿಶನರಿಂಚ್ಯಾ ಕಾಳಾಚಿ ಆನಿ ಸುರ್ವಿಲ್ಯಾ ಕಾರ್ವಾರಿ ಪುರ್ವಜಾಂಚ್ಯಾ ಅಸ್ತಿತ್ವಾಕ್ ಏಕ್ ವ್ಹಡ್ ಸಾಕ್ಸ್. ತಿಕಾ ಹಾಂಗಾ ಸುಮಾರ್ ೧೯೪೨-೪೭ ಭಿತರ್ ಸ್ಥಾಪ್ಲೆಲೆಂ ವಾಚುಂಕ್ ಮೆಳ್ತಾ. ಹಿ ಇಗರ್ಜ್ ಅಖ್ಖ್ಯಾ ಕಾರ್ವಾರಾಂತ್ ನಿರ್ಮಾಣ್ ಜಾಲ್ಲೆಂ ಪ್ರಥಮ್ ‘ಕೊಂಕ್ರೀಟ್ ತೇಂಪ್ಲ್’ ಮ್ಹಣ್ತಾತ್.

ಪಿಯಾದ್ ಮಾಯೆ ಮುಕಾರ್ ರಾವ್ತಾನಾ ಸರ್ವ್ ದೂಕ್ ಗಳೊನ್ ವೆತಾ, ನಿರಾಶಾ ಕಡೊನ್ ವೆತಾ, ಹಂಕಾರಿಂ ಚಿಂತ್ನಾ ಜಡೊನ್ ವೆತಾತ್. ಹಿ ಮಾಂಯ್ ಕಶ್ಟಾತೆಲ್ಯಾಂ ಸಂಗಿಂ ಸದಾಂ ರಾವ್ತಾ.

ತ್ಯಾ ದಿಸಾಚೆಂ ಆಮ್ಚೆಂ ಪಯ್ಣ್ ಮಡ್ಗಾಂವ್ ಕಾರ್ಮೆಲಿತ್ ಕೊವೆಂತಾಂತ್ ದನ್ಪಾರಾಂ ಥಾಂಬ್ಲೆಂ. ಜೆವ್ಣಾ ಉಪ್ರಾಂತ್ ಥಂಯ್ಸರ್ ಇಗರ್ಜೆಕ್ ವೆತನಾ ಸಾಕ್ರಿಸ್ತಿಂತ್ ಫಾತ್ರಾಚಿ ವ್ಹಡ್ ಗಾತ್ರಾಚಿ ಕಾರ್ಮೆಲ್ ಸಾಯ್ಭಿಣಿಚಿ ಇಮಾಜ್ ಉಭಿ ಆಸ್ಲಿ ದಿಸ್ಲಿ. ಹಿ ಕಾಂಯ್ ಆಜ್ ಕಾಲ್ಚಿ ನ್ಹಯ್. ೧೬೧೯ ಇಸ್ವೆಂತ್ ಇಟೆಲಿಚ್ಯಾ ಕಾರ್ಮೆಲಿತ್ ಮಿಶನರಿಂನಿ ಪರ್ನ್ಯಾ ಗೊಂಯಾಂತ್ ‘ಚಿಂಬೆಲ್’ ಗಾಂವಾಂತ್ ಭಾಂದ್ಲೆಲೆಂ ಪಯ್ಲೆಂ ಕೊವೆಂತ್ ಆಸಾ. ತಾಕಾ ‘ಕೊನ್ವೆಂತೊ ದೊ ಕಾರ್ಮೊ’ ಮ್ಹಣ್ತಾಲೆ. ಆಜ್ ತಾಚ್ಯೊ ವೊಣ್ತಿ ಏಕ್ ಆಲ್ತಾರ್ ಆನಿ ತೀನ್ ಫೊಂಡ್ ಮಾತ್ರ್ ಉರ್ಲ್ಯಾತ್. ಅಸಲ್ಯಾ ಪವಿತ್ರ್ ಸುವಾತೆಚೆರ್ ಎಕಾ ಕಾಳಾರ್ ಮರಿಯೆಕ್ ವ್ಹಡ್ ಮಾನಾನ್ ಕುರೊವ್ ನ್ಹೆಸಯಿಲ್ಲೊ. ತೊ ಜಾಗೊ ಪಾಡ್ ಪಡ್ಲ್ಯಾರೀ ಮರಿಯೆನ್ ಗೊಂಯಾಂತ್ ‘ಕಾರ್ಮೆಲ್’ ಆಜೂನ್ ಜಿವಾಳ್ ದರ‍್ಲಾಂ.

ಪಣ್ಗಿಲ್ ದೊಂಗ್ರಾಚಿ ಮೊಂತಿ ಮಾಯ್

ದುಸ್ರ್ಯೆ ಸಕಾಳಿಂ ಆಮಿ ಅಸಲ್ಯಾ ಎಕಾ ಜಾಗ್ಯಾಕ್ ಚಡೊನ್ ಗೆಲ್ಯಾಂವ್, ತೊ ಜಾಗೊ ‘ಕೊನ್ವೆಂತೊ ದೊ ಕಾರ್ಮೊ’ ಪ್ರಾಸ್ ೧೦೦ ವರ‍್ಸಾಂಕ್ ಆಮ್ಕಾಂ ಪಾಟಿಂ ವ್ಹರಿಲಾಗ್ಲೊ. ಹೆಂ ಕೊಪೆಲ್ ಅಫೊನ್ಸೊ ದೆ ಅಲ್ಬುಕರ್ಕಾನ್ ಗೊಂಯೆಂ ಪುಡ್ತುಗೆಜಾಂಚೆ ಸ್ವಾಧೀನ್ ಕೆಲ್ಲೆಂಚ್ (೧೫೧೦) ಭಾಂದುಂಕ್ ಫರ್ಮಾಯಿಲ್ಲೆಂ ಪಯ್ಲೆಂ ಕೊಪೆಲ್. ಹ್ಯಾ ಕೊಪೆಲಾಕ್ ದೊಂಗ್ರಾವ್ಹಯ್ಲಿ ಸಾಯ್ಭಿಣ್ ವಾ ಅವರ್ ಲೇಡಿ ಆಫ್ ಮೌಂಟ್ ಮ್ಹಣ್ತಾತ್.

ಉಭಾರ್ ದೊಂಗ್ರಾರ್ ಉಭೆಂ ಆಸ್ಚೆಂ ಹೆಂ ವ್ಹಡ್ ಜಯ್ತ್ ಕೊಪೆಲ್ ಲ್ಯಾಟರೈಟ್ ಫಾತ್ರಾಂಚೆಂ. ೨೦೦೧ ವ್ಯಾ ವರ‍್ಸಾಂ ಪರ್ಯಾಂತ್ ಬಂಧ್ ಪಡ್ಲೆಲೆಂ ಆತಾಂ ತಾಚೆಂ ದುರಸ್ತೆ ಕಾಮ್ ಜಾತಾ ಜಾಲ್ಲ್ಯಾನ್ ಸರ್ಕಾರಾನ್ ಭಿತರ್ ವಚೊಂಕ್ ವಾ ತ್ಯಾ ಗುಡ್ಯಾಕ್ ಚಡೊನ್ ವಚೊಂಕ್ ಆಡ್ವರ್ಲಾಂ ತೆಂಚ್ ಕರ್ಚೆಂ ಆಮ್ಚೆಂ ಜನ್ಮಾಹಕ್ಕ್ ಮ್ಹಳ್ಳೆಬರಿ ಆಮಿ ದೊರೊ ಉಡ್ಲ್ಯಾಂವ್. ಕೊಪೆಲಾಕಡೆ ಪರ್ಯಾಂತ್ ಲ್ಯಾಟರೈಟ್ ಫಾತ್ರಾಂನಿ ಸುವಾತ್ ಚಲೊಂಕ್ ಸಲೀಸ್ ಕೆಲ್ಯಾ.

ಮೆಟಾಂ ಕಾಡುನ್ ವೆತಾನಾ ಪಡ್ಲೆಲ್ಯಾ ಬಾರಿಕ್ ಪಾವ್ಸಾಕ್ ಏಕ್ ಉಡಾಸ್ ಸಟ್ಟ್ ಕರ್ನ್ ಆಮ್ಚೆ ಮುಕಾರ್ ರಾವ್ಲೊ. ಬೊಶಿಯೆಂತ್ ಫುಲಾಂ ಘೆವ್ನ್ ಮರಿಯೆಕ್ ಹೊಗೊಳ್ಸಿಯಾಂ ಮ್ಹಣುನ್ ಆಮಿ ಪಾವ್ಸಾಡೆಂತ್ ಅಶೆಂ ಆಮ್ಚ್ಯಾ ಗಾಂವಾಂನಿ ಇಗರ್ಜೆಕ್ ವೆತಾಲ್ಯಾಂವ್. ಆನಿ ಆತಾಂ ಆಮಿ ಚಡೊನ್ ಆಸ್ಲಲೊ ಜಾಗೊಯ್, ತ್ಯಾಚ್ ಆಮ್ಚ್ಯಾ ಮೊಂತಿ ಫೆಸ್ತಾಚ್ಯಾ ಉಗಮಾಚೊ! ಹಿಚ್ ತಿ ಮೊಂತಿ ಮಾಂಯ್, ತಿಕಾ ಥಳಾಂತರಿ ಕ್ರಿಸ್ತಾಂವಾಂನಿ ಉಡಾಸಾಂತ್ ವಾವೊವ್ನ್, ಭಾವಾಡ್ತಾನ್ ಜಗವ್ನ್, ಆಪುಣ್ ಗೆಲ್ಲೆಕಡೆ ಮಾನಾನ್ ಲೆಕ್ಚೊ ಸಂಪ್ರಾದಾಯ್ ಸುರು ಕರುಂಕ್ ಕಾರಣ್ ಜಾಲ್ಲಿ. ಜಾಲ್ಲಿ ಏಕ್ ನಿರಾಶಾ ಮ್ಹಳ್ಯಾರ್ ಕೊಪೆಲ್ ಬಂಧ್! ಇತ್ಲೆ ಪಯ್ಸ್ ಯೇವ್ನ್ ಭಿತರ್ ವ್ಹಚೊನ್ ಆಯಿಲ್ಲ್ಯಾಂವ್ ತರ್ ಕಿತ್ಲೆಂ ಧಾದೊಸ್ಕಾಯೆಚೆಂ ಜಾತೆಂ ಮ್ಹಣ್ ಚಿಂತ್ತಾನಾ ಬಾಪ್ ಅಶ್ವಥ್ ಆನಿ ಬಾಪ್ ಸ್ಟ್ಯಾನಿನ್ ವ್ಹಡ್ ಗಾತ್ರಾಚ್ಯಾ ದಾರಾ ಇಡ್ಯಾಂತ್ ಎಕಾ ದೊಳ್ಯಾನ್ ತಿಳುಂಕ್ ಸುರು ಕೆಲೆಂ. ದೆಕುನ್ ಮ್ಹಾಕಾಯ್ ತಡ್ವುಂಕ್ ನಾ. ಹಾಂವೆಂಯ್ ಏಕ್ ದೊಳೊ ಬಾರೀಕ್ ಕರ್ನ್ ಪಳೆಂವ್ಕ್ ಲಾಗ್ತಾನಾ – ‘ನೀಚೆ ಆ ಜಾವೊ’ ಮ್ಹಳ್ಳೊ ಕಿಂದ್ರಿ ತಾಳೊ ಗುಡ್ಯಾ ಮುಳಾಥಾವ್ನ್ ದರ್ವಡೊನ್ ವಯ್ರ್ ಪಾವ್ಲೊ.

ಆಮಿ ಘಾಬರ್ಲ್ಯಾಂವ್! ಸಕಯ್ಲ್ ಡ್ಯೂಟೆಕ್ ಹಾಜಿರ್ ಜಾಲ್ಲೊ ವೊಚ್‌ಮೆನ್ ಪೆಂಕ್ಟಾಕ್ ಹಾತ್ ದೀವ್ನ್ ಸಕ್ಲಾ ಆಪಯ್ತ್ ಆಸ್ಲೊ. ತೊ ಗೊಲಿಯಾತಾಕ್ ಮಾರುಂಕ್ ತೀನ್ ಫಾತರ್ ಘೆವ್ನ್ ರಾವ್ಲಲ್ಯಾ ದಾವಿದಾಬರಿ ದಿಸ್ತಾಲೊ! ಆಮ್ಕಾಂ ಏಕ್ ಪಾವ್ಟಿಂಚ್ಯಾಕ್ ಕಾವ್ಜೆಣಿ ಭೊಗ್ಲಿ. ಆತಾಂ ಹಾಚ್ಯೊ ಗಾಳಿ ಆಯ್ಕಾಜೆ ಮ್ಹಣ್ ಚಿಂತುನ್‌ಚ್ ಬೆಜಾರ್ ಜಾಲೆಂ.

ಭಿಂವ್ಕುರಿಂ ಮೆಟಾಂ ಕಾಡ್ನ್ ಸಕಯ್ಲ್ ವೆತಾನಾ, ತೊ ಮ್ಹಣ್ತಾ, ‘ತುಮಿ ವಯ್ರ್ ಗೆಲ್ಯಾರ್ ವ್ಹಡ್ ನಾ. ಪುಣ್ ಥಂಯ್ ವಾಡ್ಲೆಲ್ಯಾ ತಣಾಂತ್ ವಿಕಾಳ್ ಜಿವ್ದಾಳಿ ಆಸಾತ್. ತುಮ್ಕಾಂ ಕಿತೆಂಯ್ ಜಾಲ್ಯಾರ್ ಆಸ್ಪತ್ರೆಕ್ ವ್ಹರುಂಕ್ ಹಾಂಗಾ ಕೊಣೀ ನಾ’. ತರ್ನಾಟೊ ವೊಚ್‌ಮೆನ್ ಸಮಾಧಾನೆನ್ ಉಲಯ್ಲೊ. ಆಮಿಯ್ ತಾಚೆಕಡೆ ಖುಶಾಲ್ ಉಲವ್ನ್ ಭಾಯ್ರ್ ಸರ್ನ್ ಆಯ್ಲ್ಯಾಂವ್. ಏಕ್ ಫೋಟೊಯ್ ಕಾಡುಂಕ್ ಜಾಯ್ನಾತ್ಲೆಂ ನಿರ್ಭಾಗ್ ಆಮ್ಚೆಂ!

ಜುವಾರಿಚೆ ತಡಿರ್ ಭಲಾಯ್ಕೆ ಮಾಂಯ್

ಜುವಾರಿ ನ್ಹಂಯ್ ತ್ಯಾ ದನ್ಪಾರಾಂ ಶಾಂತ್ ವ್ಹಾಳ್ತಾಲಿ. ತಿಚ್ಯಾ ಉಸ್ಕ್ಯಾರ್ ಆಮ್ಚೊ ಪುರ್ವಜ್ ಲೋಕ್ ಕಿತ್ಲೊ ಭಾವಾಡ್ತಾಚ್ಯಾ ಲ್ಹಾರಾಂನಿ ಉಪ್ಯೆಲಾ ತಿಕಾಚ್ ಗೊತ್ತು. ತಿಚ್ಯೆ ಪಾಸ್ಳೆಂತ್ ಇತಿಹಾಸ್‌ಕಾರಾಂಕ್ ಮೆಳ್ಳಲೆ ಅಪೊಸ್ತಲ್ ತೊಮಾಸಾಚ್ಯಾ ಕಾಳಾಚೆ ಖುರಿಸ್ ನಿಜಾಯ್ಕಿ ಪುಡ್ತುಗೆಜಾಂ ಆದಿಂಚ್ ದಕ್ಶಿಣ್ ಗೊಂಯಾಂತ್ ಕ್ರಿಸ್ತಾಂವಾಂಚಿ ಹಾಜ್ರಿ ಆಸ್ಲಿ ಮ್ಹಣ್ ಗವಾಯ್ ದಿತಾತ್. ಪಾಹ್ಲಾವಿ ಲಿಪಿಂತ್ (ಪರ್ಶಿಯನ್ ಭಾಸ್) ಲಿಖ್ಲಲೆ ಸಾಂ ತೊಮಾಸಾಚೆ ಖುರಿಸ್ ಪುರಾತನ್ ಕ್ರಿಸ್ತಿ ಭಾವಾಡ್ತಾಚಿಂ ಪಾವ್ಲಾಂ ಮೆಜುಂಕ್ ಶಿಕಯ್ತಾತ್. (ಸಾಂ ತೊಮಾಸಾಚ್ಯಾ ಖರ‍್ಸಾಚೆಂ ರಚನ್ ಇಲ್ಲೆಂ ವೆಗ್ಳೆಂ: ಖರ‍್ಸಾಚ್ಯಾ ಮುಳಾಂತ್ ಫುಲ್ಲೆಲ್ಯಾ ಬೊಂಗ್ಗ್ಯಾಂಚೆಂ ಚಿತ್ರ್ ಆಸೊನ್, ಖರ‍್ಸಾಚ್ಯಾ ಮ್ಹಾತ್ಯಾರ್ ಪಾರ್ವೊ ದೆಂವ್ಚೊ ಆಸ್ತಾ. ಖರ‍್ಸಾಚ್ಯಾ ಮುಳಾಕ್ ತೀನ್ ಮೆಟಾಂ ಕಾಲ್ವಾರಿಚಿಂ. ಹೆ ಖುರಿಸ್ ೭-೯ವ್ಯಾ ಶತಮಾನಾಚೆ) ಅಸಲ್ಯಾ ಸುವಾತೆಕ್ ಪಾವ್ತಾನಾ ಕಾಳಿಜ್ ದಿಂಬ್ಯೆರ್ ಪಡ್ಚೆಂ ಸಹಜ್.

ಜುವಾರಿ ತಡಿಚ್ಯೆ ತೆವ್ಶಿಲೆ ಕುಶಿನ್ ಉಭಿ ಆಸಾ, ಆಜೂನ್ ಆಪ್ಲೆಂ ಅಸ್ತಿತ್ವ್ ದಾಕವ್ನ್, ಸಾಂಕೊಲೆಚಿ ಭಲಾಯ್ಕೆ ಮಾಂಯ್! ಥಂಯ್ಸರ್ ಇಗರ್ಜೆಚೆಂ ಬಾಂದಾಪ್ ಮಾಯಾಗ್! ಆಸಾ ಮುಕ್ಲಿ ಕೂಸ್ ಮಾತ್ರ್. ಇಗರ್ಜೆಚೆಂ ಪ್ರವೇಶ್ ದಾರ್ ಆನಿ ತಾಚಿ ತೋರ್ ಮಾತ್ರ್ ಉರ್ಲ್ಯಾ ಆಮ್ಕಾಂ ಸಾಂಗೊ್ಂಕ್ ಕಾಣಿ ಭಲಾಯ್ಕೆ ಮಾಯೆಚಿ ಆನಿ ತಿಚ್ಯಾ ಎಕಾ ಸುಪುತ್ರಾಚಿ. ಗೊಂಯ್ಚೊ ಸುಪುತ್ರ್ ಸಾಂ ಜುಜೆ ವಾಜಾಕ್ ಆನಿ ಹಾಂಗಾಚ್ಯೆ ಭಲಾಯ್ಕೆ ಮಾಯೆಕ್ ಗುಂಡಾಯೆಚೊ ಸಂಬಂಧ್ ಆಸಾ. ಹ್ಯೆಚ್ ಇಗರ್ಜೆಂತ್ ಅಗೊಸ್ತ್ ೫, ೧೬೭೭ ಇಸ್ವೆಂತ್ ಜುಜೆ ವಾಜ್ ಆಲ್ತಾರಿ ಮುಕಾರ್ ಸರ್ಪಡ್ತಾ ಆನಿ ಮರಿಯೆಕಡೆ ಏಕ್ ಸೊಲ್ಲೊ ಕರ‍್ತಾ. ‘ಮರಿಯೆ, ಹ್ಯಾ ಫುಡಾಂ ಹಾಂವ್ ಸಗ್ಳೊಚ್ ತುಜೊ ಗುಲಾಮ್ ಜಾವ್ನ್ ರಾವ್ತಾಂ’ ಮ್ಹಣುನ್ ಬರವ್ನ್ ದಿತಾ. ಹೆಂ ಪತ್ರ್ ‘ಲೆಟರ್ ಆಫ್ ಬೊಂಡೆಜ್’ ಮ್ಹಣ್ ಫಾಮಾದ್. (ಹೆಂ ಪತ್ರ್ ಬರವ್ನ್ ಹ್ಯಾ ವರ‍್ಸಾಕ್ ೩೪೯ ವರ‍್ಸಾಂ ಭರ‍್ತಾತ್). ಹ್ಯಾಚ್ ಜಾಗ್ಯಾರ್ ಜುಜೆ ವಾಜಾನ್ ತಾಕಾಚ್ ಮರಿಯೆಚೆ ಹಾತಿಂ ದಿಲೆಂ. ಆಪ್ಲಿ ಕೂಡ್, ಅತ್ಮೊ, ಆಪ್ಲಿ ಖುಶಿ ಮರಿಯೆಕ್ ಸೊಡ್ನ್ ದಿಲಿ ಆನಿ ಆಪುಣ್ ತಿಣೆಂ ಸಾಂಗ್‌ಲ್ಲೆಂ ಕರ‍್ತಾಂ ಮ್ಹಣ್ ಸಪುತ್ ಘೆತ್ಲೊ! ೧೮೩೪ ಇಸ್ವೆಂತ್ ಉಜೊ ಪಡೊನ್ ಇಗರ್ಜೆಚಿ ಕೂಡ್ ಹುಲ್ಪಾಲಿ ಘೆತ್ಲಿ ತರೀ ಆಪ್ಲಿ ತಕ್ಲಿ ತಿಣೆಂ ಸಾಂಭಾಳ್ಳ್ಯಾ. ಹೆಂ ಘಡಿತ್‌ಯೀ ಮರಿಯೆ ಆನಿ ಜುಜೆ ವಾಜಾಚ್ಯಾ ಅತ್ಮಿಕ್ ಸಂಬಂಧಾಚೆಂ ಏಕ್ ರೂಪಕ್ ಜಾಯ್ತ್ಗಿ?

ವ್ಹಡ್ ರಾವ್ಳೆರಾಚ್ಯಾ ದಾರಾಂತ್ಲ್ಯಾನ್ ಮೂಂಯ್ ಗೆಲ್ಲೆಬರಿ ಪ್ರವೇಶ್ ದಾರ್ ಉತ್ರೊನ್ ಭಿತರ್ ಗೆಲೊಂ. ಬೊವ್‌ಶಾ ಹ್ಯಾ ದಾರಾಂಚಿ ಉಂಚಾಯ್ ಸಯ್ತ್ ಆಮಿ ಕಿತ್ಲೆ ಲ್ಹಾನ್ ಮ್ಹಳ್ಳೆಂ ವ್ಹಳ್ಕುಂಕ್ ಏಕ್ ನಿದರ್ಶನ್ ಜಾತಾತ್ ಕೊಣ್ಣಾ! ಇಗರ್ಜೆಚೆಂ ಬಾಂದಾಪ್ ಕೊಸ್ಳೊನ್ ಗೆಲಾಂ ಜಾಲ್ಲ್ಯಾನ್ ಪಾಟ್ಲ್ಯಾ ಕುಶಿನ್ ಲ್ಹಾನ್ ಏಕ್ ಕೊಪೆಲ್ ಭಲಾಯ್ಕೆ ಮಾಯೆಕ್ ಸಮರ್ಪಿಲ್ಲೆಂ ಪಳೆಂವ್ಕ್ ಮೆಳ್ಳೆಂ. ವರ‍್ಸಾನ್ ವರಸ್ ಹ್ಯಾ ಪೂನ್ ಜಾಗ್ಯಾರ್ ಕರೆಜ್ಮಾಂತ್ ಅಖ್ಖೆಂ ಗೋಂಯ್ ಮ್ಹಳ್ಳೆಬರಿ ಲಾಯಿಕ್-ಧರ್ಮಿಕ್ ಹಾಂಗಾ ಎಕಾ ದಿಸಾ ಖಾತಿರ್ ಜಮ್ತಾತ್, ಮಾಗ್ಣ್ಯಾಂತ್ ಆನಿ ಉಪಾಸಾಂತ್ ವೇಳ್ ಖರ್ಚಿತಾತ್. 

ಸಾಲಿಗಾಂವಾಚಿ ಮಾಯ್ ದೆ ದೆವುಸ್

ಸಾಲಿಗಾಂವ್ ಇತ್ಲೊ ಪಾಚ್ವೊ ಗಾಂವ್, ಮನ್ ಎಕ್ದಮ್ ಶಾಂತ್ ಕರುಂಕ್ ಥೆರಪಿ ದಿಂವ್ಚೆ ತಸಲೊ ಗಾಂವ್. ಸಾಲಿಸಾಲಿಂನಿ ಗಾದೆ, ಮಾಡ್, ಪಾಚ್ವಿ ಸಂಪತ್ತಿ, ಮಧ್ಯಾನ್ ಧಾಂವ್ತಾತ್ ರಸ್ತೆ ನಿತಳ್. ಸಕಾಳಿಂಚಿಂ ಮೊವಾಳ್ ಕಿರ್ಣಾಂ ಭುಂಯ್ಕ್ ದೆಂವ್ತಾನಾ ಲ್ಹಾಲ್ಹಾನ್ ಭುರ್ಗಿಂ ಚಲೊನ್ ತೆಣೆಂ ಇಸ್ಕೊಲಾಕ್ ವೆಚಿಂ ಪಳೆತಾನಾ ಆಮ್ಚ್ಯಾ ಗಾಂವಾಂತ್ ಇಸ್ಕೊಲಾಕ್ ಚಲೊನ್ ವೆಚೆ ಆಮ್ಚೆ ದೀಸ್ ಉಡಾಸ್ ಯೇವ್ನ್ ದೊಳ್ಯಾಂಕ್ ಫೆಸ್ತ್ ದಿಂವ್ಕ್ ಲಾಗ್ಲೆ. ಪಾಚ್ವ್ಯಾಪಣಾಮಧೆಂ ಧವೊ ಲೋಬ್ ಘಾಲ್ನ್ ರಾವ್ಲಲೆಬರಿ ಉಭಿ ಆಸಾ ಸಾಲಿಗಾಂವ್ಚಿ ಮಾಯ್ ದೆ ದೆವುಸ್ ಇಗರ್ಜ್.

ಹ್ಯಾ ಗಾಂವಾಚ್ಯಾ ನಾಂವಾಂತ್‌ಯೀ ಕಾಣಿಯೊ ಆಸಾತ್. ಕೋಣ್ ಮ್ಹಣ್ತಾ, ಆದಿಂ ಪುರ್ವಜ್ ಗಾಂವ್ ಸಾಂಡುನ್ ಯೆತಾನಾ ಹ್ಯಾ ಪ್ರದೆಶಾರ್ ‘ಸಾಲ್’ (ವೆಗ್ಯಾನಿಕ್ ನಾಂವ್: ಶೊರೆಯಾ ರೊಬುಸ್ತಾ) ರೂಕ್ ರೊಯ್ಲೆ ದೆಕುನ್ ಗಾಂವಾಕ್ ಸಾಲ್ ರುಕಾಚೊ ಗಾಂವ್ ಮ್ಹಳೆಂ. ತ್ಯಾ ರುಕಾಚ್ಯಾ ಫಳಾಚಿಂ ಭಿಯಾಂ ರಾಂದ್ಪಾ ತೇಲ್ ಜಾವ್ನ್ ವಾಪರ‍್ತಾಲೆ ಕಂಯ್. ತಶೆಂಚ್ ಆನಿ ಕೋಣ್ ಮ್ಹಣ್ತಾ, ಹ್ಯಾ ಗಾಂವಾಂತ್ ಭಾತಾಚಿ ಏಕ್ ತಳಿ ಆಸಾ, ‘ಸಾಲಿ’, ಜಿ ಉತ್ತೀಮ್ ಮಟ್ಟಾಚಿ ತಳಿ ಆಸೊನ್ ಹ್ಯಾ ಗಾಂವಾಂತ್ ಚಡಿತ್ ವಾಪರ‍್ತಾತ್.

ಹ್ಯಾ ಗಾಂವಾಕ್ ಮರಿ ಮಾಂಯ್ ಪಾವ್ಲಲ್ಯಾಚಿ ಕಾಣಿಯ್ ರೋಚಕ್. ಹ್ಯೆ ಇಗರ್ಜೆಂತ್ ಮರಿಯೆಚಿ ಭಾಂಗ್ರಾವರ್ಣಾಚಿ ಏಕ್ ಇಮಾಜ್ ಆಸಾ. ಹಿ ಕಾಂಯ್ ಸುಮಾರ್ ೪೦೦ ವರ‍್ಸಾಂ ಆದ್ಲಿ. ಹಿ ಇಮಾಜ್, ಪರ್ನ್ಯಾ ಗೊಂಯಾ್ಂತ್ ದಾವ್ಜಿಮ್ ಮ್ಹಳ್ಳೆಕಡೆ ಆಸ್ಲೆಲ್ಯಾ ಫ್ರಾನ್ಸಿಸ್ಕನ್ ಕೊವೆಂತಾಚಿ. ಕೊವೆಂತ್ ಪಾಡ್ ಪಡ್ಲಲ್ಯಾ ಉಪ್ರಾಂತ್ ಜಾಯ್ತ್ಯಾ ದಶಕಾಂನಿ ಥಂಯ್ಚ್ ತಿ ಉರ‍್ಲಿ. ಸಾಲಿಗಾಂವ್ಚ್ಯಾ ಲೊಕಾನ್ ತಿ ಆಪ್ಲ್ಯೆ ತಾಬೆನ್ ಹಾಡುನ್ ಇಗರ್ಜೆಂತ್ ದರ‍್ಚಿ ಅಶೆಂ ಚಿಂತ್ಲೆಂ. ಪುಣ್ ಭಂವ್ತಣಿಚ್ಯಾ ಫಿರ್ಗಜಾಂನಿ ಹಾಕಾ ವಿರೋದ್ ಕೆಲೊ ಆನಿ ತ್ಯೆ ಇಮಾಜಿಚೆರ್ ಹಕ್ಕ್ ಕೊಣಾಚೆಂ ಮ್ಹಳ್ಳೆಂ ಸವಾಲ್ ಪೊರ್ಚುಗಲಾ ಪರ್ಯಾಂತ್ ಪಾವ್ಲೆಂ. ರಾಯಾನ್ ೧೮೬೫ ಇಸ್ವೆಂತ್ ಅಧಿಕೃತ್ ಜಾವ್ನ್ ಹಿ ಇಮಾಜ್ ಸಾಲಿಗಾಂವ್ ಇಗರ್ಜೆಕ್ ದಿಲಿ. ತಿಕಾ ಮಾಂಡವಿ ನ್ಹಂಯ್ ಉತ್ರೊವ್ನ್ ಸುಂರ್ಗಾರಾಯ್ಲಲ್ಯಾ ಪಾಡ್ಯಾ ಗಾಡಿಯೆರ್ ಬೆಂಡಾ ತಂಬುರಾನ್ ಇಗರ್ಜೆಕ್ ಹಾಡ್ಲೆಂ. ಥಳೀಯ್ ಲೊಕಾನ್ ಉಡಾಸ್ ಕಾಡ್ಚೆಬರಿ, ತ್ಯಾ ದಿಸಾ, ರಾಯಾಚ್ಯೆ ಭೆಟೆಕ್ ಸೀಮಿತ್ ಆಸ್ಚೊ ಸರ್ಕಾರಿ ಮಾನ್ – ೨೧ ಗನ್ ಶಾಟ್ ಸೆಲ್ಯೂಟ್ – ಮರಿಯೆಕ್ ಪುಡ್ತುಗೇಜ್ ಸರ್ಕಾರಾನ್ ದಿಲೊ. 

ಆಜೂನ್ ಗಾಂವ್ ಬಾವಾಡ್ತಾನ್ ನಿತಳ್ ಆನಿ ನೈಸರ್ಗಿಕ್ ಜಾವ್ನ್ ಪಾಚ್ವೊ ಉರ‍್ಲಾ. ಮರಿಯೆಚ್ಯೆ ಪಾಸ್ಳೆಂತ್ ಸದಾಂನೀತ್ ಲೋಕ್ ಮಿಸಾಕ್ ಯೆತಾ, ಮಾಗ್ಣಿಂ ಭೆಟಯ್ತಾ. ಕೃಶಿಯೆಚ್ಯಾ ಕಾಮಾಕ್ ಲಾಗ್ತಾ ಆನಿ ಸಂತೊಸಾನ್ ಜಿಣಿ ಸರ‍್ತಾ.  

ದಿವಾರ್ ಕುದ್ರ್ಯಾಚಿ ಪಿಯಾದ್ ಮಾಂಯ್   

ಪುಡ್ತುಗೆಜಾಂಚಿ ಸಾವ್ಳಿ ಗೊಂಯಾಂಚೆರ್ ಪಡ್ಚೆ ಆದಿಂ ದಿವಾರ್ ಕುದ್ರೊ ಕದಂಬ ರಾಯಾಂಚೆ ಹಾತಿಂ ಆಸೊನ್, ತಾಕಾ ‘ದಿವಾದೆ ವಾ ದೀಪಾವತಿ’ (ದಿವ್ಯಾಂಚೊ ಕುದ್ರೊ) ಮ್ಹಣ್ತಾಲೆ. ಹಾಂಗಾಸರ್ ಹಿಂದು ತೆಂಪ್ಲಾಂ ಆಸ್ಲಿಂ. ೧೭-೧೮ವ್ಯಾ ಶತಮಾನಾಂತ್ ಪುಡ್ತುಗೆಜಾಂಚ್ಯಾ ಕಾಳಾರ್, ಪರ್ನ್ಯಾ ಗೊಂಯಾಂತ್ ತವಳ್ತವಳ್ ಮಲೇರಿಯಾ ಆನಿ ಕಾಲರಾ ವೊಸ್ಯಾಚಿ ಪಿಡಾ ಚಡ್ಲಿ. ಜಾಯ್ತೆ ಮರಣ್ ಪಾವ್ಲೆ. ವಾಂಚೊನ್ ಉರ‍್ಲೆಲ್ಯಾಂನಿ ಪರ್ನ್ಯಾ ಗೊಂಯಾಂಥಾವ್ನ್ ಪೊಳಾಪಳ್ ಘೆತ್ಲಿ ಆನಿ ನಿರ್ಜನ್ ಆಸ್ಚ್ಯಾ ಹ್ಯಾ ಕುದ್ರ್ಯಾ ವಸ್ತಿ ಸುರು ಕೆಲಿ.

ಪಿಯಾದ್ ದೊಂಗೊರ್ ಮ್ಹಣುನ್ ಪುಡ್ತಿಗೆಜಾಂನಿ ಹಾಕಾ ವೊಲಾಂವ್ಚೆ ಆದಿಂ ಹ್ಯಾ ಕುದ್ರ್ಯಾರ್ ಕದಂಬಾಂಚೆಂ ಸಪ್ತಕೋಟೇಶ್ವರಾ ತೇಂಪ್ಲ್ ಆಸ್ಲೆಂ, ತೆಂ ೧೫ವ್ಯಾ ಶತಮಾನಾಂತ್ ಡಕ್ಕನಾಚ್ಯಾ ಸುಲ್ತಾನಾಂನಿ (ಪುಡ್ತಿಗೇಜ್ ಯೆಂವ್ಚ್ಯಾ ಆದಿಂ) ಮಾರ್ನ್ ಕಾಡ್ಲೆಂ. ೧೫೧೫ ಇಸ್ವೆಂತ್ ಆಸ್ಲೆಲೆಂ ಏಕ್ ಪುಡ್ತುಗೆಜ್ ಘರ್ ಕೊಪೆಲ್ ಜಾವ್ನ್ ಬದ್ಲಿಲೆಂ. ೧೭೦೦-೧೭೨೪ ಚ್ಯೆ ಆವ್ದೆಂತ್ ಏಕ್ ಸೊಭಿತ್ ಭಾರತೀಯ್-ಬಾರೊಕ್ ಶಾಯ್ಲೆರ್ ಇಗರ್ಜ್ ಉಭಿ ಕೆಲಿ. ವಿಶೇಸ್ ಮ್ಹಳ್ಯಾರ್, ಪಯ್ಲೆ ಪಾವ್ಟಿಂ ಯುರೊಪಿ ಅರ್ಕಿಟೆಕ್ಟಾ ಬದ್ಲಾಕ್ ಎಕಾ ಗೊಂಯ್ಚ್ಯಾ ಪಾದ್ರಿನ್ ಹಿ ಇಗರ್ಜ್ ಬಾಂದ್ಲಿ!

ಆಮಿ ಫೇರಿಚೆರ್ ಕಾರ್‍ ದವರ್ನ್  ನ್ಹಂಯ್ ಉತ್ರೊನ್ ಕುದ್ರ್ಯಾಕ್ ರಿಗ್ಲ್ಯಾಂವ್. ಕಿತೆಂ ಸಾಂಗ್ಚೆಂ, ದೊನೀ ಕುಶಿಂನಿ ಪಾಚ್ವೆ ಗಾದೆ ಆನಿ ಉದಕ್, ಮಧೆಂ ರೆಡ್ ಕಾರ್ಪೆಟ್ ಘಾಲ್ನ್ ಸ್ವಾಗತ್ ದಿಲ್ಲೆಬರಿ ರಸ್ತೊ! ದಿವಾರ್ ಕುದ್ರ್ಯಾ ವ್ಹಯ್ಲ್ಯಾ ಪಿಯಾದ್ ಮಾಯೆಚ್ಯಾ ಇಗರ್ಜೆ ಮುಕಾರ್ ಆಮಿ ಪಾವವ್ಲ್ಯಾಂವ್. ಹ್ಯಾ ಇಗರ್ಜೆಚ್ಯಾ ಘಾಂಟಿಕ್ ಏಕ್ ಕಾಣಿ ಚಿಡ್ಕಾಲ್ಯಾ. ಏಕ್ ತಾರುಂ ದರ್ಯಾಂತ್ ಸಾಂಪ್ಡೊನ್ ತರ‍್ವಟಿ ದೆದೆಸ್ಪೊರ್ ಜಾತಾನಾ ಕಪ್ತಾನಾನ್ ‘ವಾಂಚೊನ್ ಉರ್ಲ್ಯಾರ್ ಹ್ಯಾ ತರ‍್ವಾಚಿ ಘಾಂಟ್ ಪಯ್ಲೆಂ ದಿಸ್ಲೆಲ್ಯಾ ಇಗರ್ಜೆಕ್ ದಿತಾಂ’ ಮ್ಹಣ್ ಆಂಗಯ್ಲೆಂ. ಶಾಬಿತಾಯೆನ್ ತಾರುಂ ದಿವಾರ್ ಯೇವ್ನ್ ತಡಿಕ್ ಲಾಗ್ಲೆಂ ಆನಿ ತರ‍್ವಾಚಿ ಘಾಂಟ್ ಹ್ಯೆ ಇಗರ್ಜೆಕ್ ಅಲಂಕಾರ್ ಜಾಲಿ.

ಹ್ಯಾ ಕುದ್ರ್ಯಾರ್ ಏಕ್ ವಿಶೇಸ್ ಕಾಲೆತಿಚೆಂ ‘ಬೊಂದೆರಾಂ ಫೆಸ್ತ್’ ಅಗೊಸ್ತಾಚ್ಯಾ ಚವ್ತ್ಯಾ ಸನ್ವಾರಾ ಗಮ್ಮತಾಯೆನ್ ಜಾತಾ. ಪುಣ್ ಹೆಂ ಫೆಸ್ತ್, ಝಗ್ಡ್ಯಾನ್ ಸರ‍್ವಾತ್ಲೆಲೆಂ ಮಾಯಾಮೊಗಾಚೆಂ ಫೆಸ್ತ್ ಜಾವ್ನ್ ಬದಲ್ಲೆಂ ಮ್ಹಳ್ಯಾರ್ ತುಮಿ ಪಾತ್ಯೆಜೆ. ಹ್ಯಾ ಕುದ್ರ್ಯಾರ್ ಪಿಯಾದಾದ್, ಮಲಾರ್ ಆನಿ ಗೊವಾತಿ ಗಾಂವ್ಕಾರಾಂಮಧೆಂ ಗಡಿ ಖಾತಿರ್ ಭಿರಾಂಕುಳ್ ರಿತಿಚೆಂ, ಎಕಾಮೆಕಾ ಕಾತ್ರುನ್ ಪಡ್ಚೆ ತಸಲೆಂ ಝಗ್ಡೆಂ ಜಾತಾಲೆಂ ಕಂಯ್. ದೆಕುನ್ ಪುಡ್ತುಗೇಜ್ ಸರ್ಕಾರಾನ್ ತಾಂಚಿ ಗಡ್ ನಿರ್ಧಾರ್ ಕರ್ನ್ ಬಾವ್ಟೆ ಘಾಲ್ಲೆ ಕಂಯ್. ಹೆಂ ವೊಪ್ವಾನಾತ್ಲ್ಯಾ ಗಾಂವ್ಕಾರಾಂನಿ ಬಾವ್ಟೆ ಹುಮ್ಟುನ್ ಕಾಡ್ನ್ ಪ್ರತಿಭಟನ್ ಕೆಲ್ಲೆಂ. ಆಜ್ ತೊಚ್ ಉಡಾಸ್ ಕಾಡ್ನ್ ತ್ಯಾ ಝಗ್ಡ್ಯಾಚಿಂ ನಕ್ಲಾಂ ಕರುನ್ ಬಾರಿಚ್ ಗದ್ದಾಳಾಯೆನ್ ಗಾಣಾಂ, ಸಂಗೀತ್, ಜೆವ್ಣಾಸಂಗಿಂ ಫೆಸ್ತ್ ಆಚರಿತಾತ್.

ಸಭಾರಾಂಚೆಂ ಭ್ಯೆಂ- ಭಕ್ತಿನ್ ಬದ್ಲುನ್, ನಿರಾಶಾ ಆಸ್ಲೆಲಿ ಧಯ್ರಾನ್ ಭರುನ್, ಝಗ್ಡ್ಯಾಚ್ಯಾ ಸುವಾತೆರ್ ಬಾಂದವ್ಪಣಾಚೊ ಸಾವೊಟ್ ಘಾಲುನ್ ಮರಿಯೆನ್ ತಿಚ್ಯಾ ಭುರ್ಗ್ಯಾಂಕ್ ಚಲಯ್ಲಾಂ. ಕಪ್ತಾನಾಚಿ ತಿ ಘಾಂಟ್ ಆಜ್ ಸಕ್ಡಾಂಕ್ ಮಾಗ್ಣ್ಯಾಕ್ ಆಪಯ್ತಾ. ಆಯ್ಲೆಲ್ಯಾಂಕ್ ಮಾಂಯ್ ಮೊಗಾನ್ ಭುಜಯ್ತಾ. ದ್ವೇಶ್-ರಾಗ್ ಜಲ್ಮಲ್ಲ್ಯಾ ಸುವಾತೆರ್ ಸಂತೊಸ್ ಆನಿ ದಯೆಚೊ ಪಾವ್ಸ್ ತಿ ವೊತ್ತಾ.

ಪಯ್ಣ್ ಸಂಪಯ್ತಾನಾ

ಯಾತ್ರಿಕ್ ಪಯ್ಣಾಚೆ ವಾಟೆರ್ ವೆವೆಗ್ಳ್ಯಾ ಜಾಗ್ಯಾಂನಿ ವೆವೆಗ್ಳ್ಯೊ ಕಾಣಿಯೊ, ಪುಣ್ ಮರಿ ಮಾಯೆಚಿ ಸಸಾಯ್ ಸಗ್ಳ್ಯಾಂನಿ ನಿರಂತರ್ ವ್ಹಾಳ್ಳ್ಯಾ ತೆಂ ಸತ್. ರಾಯ್-ಪ್ರಭುತ್ವಾಂ ಬದಲ್ಲ್ಯಾಂತ್, ಲೋಕ್ ಎಕಾ ಕಾಳಾಥಾವ್ನ್ ಅನ್ಯೇಕಾಕ್ ಥಳಾಂತರಿ ಜಾಲಾ, ರಸ್ತೆ ಬದ್ಲಲ್ಯಾತ್, ಇಗರ್ಜೊ ಬಾಂದ್ಲ್ಯಾತ್- ಮೊಡ್ಲ್ಯಾತ್, ಪುಣ್ ನ್ಹಂಯ್ ದೆಗೆರ್ ಆನಿ ಮರಿ ಮಾಯೆಚೆ ಪಾಸ್ಳೆಂತ್ ಬಾವಾಡ್ತಾಚೆಂ ಜಿವಿತ್ ಪಿಳ್ಗೆ ಥಾವ್ನ್ ಪಿಳ್ಗೆಕ್ ಹಾತಾಂತರ್ ಜಾಲಾಂ.

________________________

ತ್ಯಾ ಗುಡ್ಯಾಕ್ ಚಡೊನ್ ವಚೊಂಕ್ ಆಡ್ವಾರ್ಲಾಂ. ಪುಣ್ ಜೆಂ ಆಡ್ವಾರ್ಲಾಂ ತೆಂಚ್ ಕರ‍್ಚೆಂ ಆಮ್ಚೆಂ ಜನ್ಮಾಹಕ್ಕ್ ಮ್ಹಳ್ಳೆಬರಿ ಆಮಿ ದೊರೊ ಉಡ್ಲ್ಯಾಂವ್.

ಜೊ.ಸಿ.ಸಿದ್ದಕಟ್ಟೆ, ಕಾರ್ಮೆಲಿತ್