ಚೊರ್ ಚೊರ್ ಮ್ಹಣು ಗೊಂದಳ್ ಘಾಲ್ನ್ / ಚೊರಾಕ್ ಧರೂಕ್ ಧಾಂವ್ತಾ ಚೊರ್
ಭ್ರಶ್ಟಾಚಾರ್ ಭ್ರಶ್ಟಾಚಾರ್ ಮ್ಹಣು / ಗೊಂದಳ್ ಘಾಲ್ಚೆ ಆಮೀಯ್ ತಶೆಚ್ ನ್ಹಯ್?

ಕವಿ ಪಿ. ಜಿ. ಕಾಮತ್ (೧೯೨೬ – ೨೦೦೯)

ಭಾಯ್ಲ್ಯಾ ಸಂಸಾರಾಕ್ ಜನೆಲಾ ಪಾಟ್ಲ್ಯಾನ್ ಉಬೊ ಜಾವ್ನ್ ಪಳೆತಾನಾ ಸಮಾಜೆಂತ್ಲೆಂ ಕಸ್ತಾಳ್, ಲೊಕಾಚಿ ದಗಾಲ್ವಾಜಿ, ಅಧಿಕಾರಿಂಚಿ ವಶೀಲಿಬಾಜಿ ಆನಿ ವ್ಯವಸ್ಥೆಂತ್ಲೆಂ ಸರ್ವ್ ಖೊಟೆಂಪಣ್ ಆಮ್ಕಾಂ ಭೋವ್ ತೀಕ್ಷ್ಣ್ ಜಾವ್ನ್ ದಿಸ್ತಾ. ತ್ಯಾ ವೆಳಾ ಆಮ್ಚಿ ದೀಶ್ಟ್ ಏಕ್ ದುರ್ಬಿಣ್ ಜಾವ್ನ್ ಕಾಮ್ ಕರ್‍ತಾ. ಪಯ್ಸ್ ಆಸ್ಚ್ಯಾ ಆಪ್ರಾಧಾಂಕ್ ಜೊಕುನ್ ಜೂಮ್ ಕರ್‍ನ್ ಪಳೆತಾ. ಆಮಿ ತಾಚೆರ್ ವಿಶ್ಲೇಶಣ್ ಕರ್‍ತಾಂವ್. ಆಮ್ಚೊ ರಾಗ್ ದಾಕಂವ್ಕ್ ಸಾಮಾಜಿಕ್ ಮಾಧ್ಯಮಾಂನಿ ಪಯ್ಸ್ ಥಾವ್ನ್ ಫಾತೊರ್ ಉಡಂವ್ಕ್ ಸುರು ಕರ್‍ತಾಂವ್.

ಹ್ಯಾ ‘ಚೊರ್ ಚೊರ್’ ಗೊಂದೊಳಾಂತ್ ದಿಸ್ಪೊಡ್ತ್ಯಾ ಜಿವಿತಾಂತ್ ಭ್ರಶ್ಟಾಚಾರಾ ಸಂಗಿಂ ರಾಜಿ ಸಂದಾನ್ ಕೆಲ್ಲೊ ಆಮ್ಚ್ಯಾ ಭಿತರ್ಲೊ ಚೋರ್ ಲಿಪೊನ್ ಆಸ್ತಾ! ಜರ್ ಆಮ್ಚ್ಯಾ ಅಂತಸ್ಕರ್ನಾಂತ್ಲೊ ಮುನ್ಸುಬ್ದಾರ್ ಹ್ಯಾ ಜನೆಲಾಥಾವ್ನ್ ಆಮ್ಕಾಂ ಘುಂವ್ಡಾವ್ನ್ ಆಮ್ಚ್ಯಾಚ್ ಆರ್‍ಸ್ಯಾ ಮುಖಾರ್ ಉಬೆಂ ಕರಿತ್ ತರ್ ಆಮ್ಚ್ಯಾಚ್ ವಿದ್ರೂಪ್ ಮುಖಟ್ಯಾಚೊ ಬುರ್ಸೊ ಆವ್ತಾರ್ ದಿಸ್ತಲೊ. ಶೆಂಭರ್ ವರ್‍ಸಾಂ ಆದಿಂ ಜಲ್ಮಲ್ಲೊ ಕೊಂಕ್ಣಿ ಕವಿ ಪಿ. ಜಿ.ಕಾಮತ್ ಹಾಂಚ್ಯೊ ವೊಳಿ ಹ್ಯಾ ಆರ್‍ಸ್ಯಾ ಭಿತರ್‍ಲ್ಯಾ ಚೊರಾ ಸಂಗಿಂ ಮುಖಾಮುಖಿ ಕರ್‍ತಾತ್.

ಸುರಕ್ಷಿತ್ ಕ್ರಾಂತಿ ಆನಿ ನಯ್ತಿಕ್ ಸರ್ಟಿಫಿಕೇಟ್

ಆಮ್ಚ್ಯಾ ಮೊಬಾಯ್ಲಾಂನಿ ಯೆಂವ್ಚ್ಯಾ ಭೃಶ್ಟಾಚಾರಾಚ್ಯಾ ಖಬ್ರಾಂಕ್ ಜಳ್ತಾಂವ್. ಆಕ್ರೋಶಾಚ್ಯಾ ಆವಾಜಾಂತ್ ಆಮ್ಚೊಯ್ ಉದ್ಗಾರ್ ಮೆಳಯ್ತಾಂವ್. ಹೊ ಉಜೊ ಆಮ್ಚೆ ಭಿತರ್ ನಯ್ತಿಕತಾ ಜಿವಿ ಆಸಾ ಮ್ಹಳ್ಳಿ ರುಜ್ವಾತ್. ಪುಣ್ ಹಾಂಗಾ ಮನ್ಶಾಚೊ ದ್ವಂದ್ವ್ ಸ್ವಭಾವ್ ಉಗ್ತೊ ಪಡ್ತಾ. ಆಮಿ ಮೊಳ್ಬಾಕ್ ಫಾತೊರ್ ಉಡಯ್ಲ್ಯಾರ್ ಮೊಳ್ಬಾಕ್ ತ್ರಾಸ್ ಜಾಯ್ನಾ ಆನಿ ಫಾತೊರ್ ಯೇವ್ನ್ ಆಮ್ಚ್ಯೆಚ್ ತಕ್ಲೆಕ್ ಲಾಗ್ಚೊ ಅಪಾಯ್ ನಾ. ಹ್ಯಾ ವರ್ವಿಂ ಹೆರಾಂಕ್ ‘ಚೊರ್! ಚೊರ್!’ ಮ್ಹಣ್ ಬೊಬಾಟುನ್, ಆಪ್ಣಾಕ್‌ಚ್ ನಯ್ತಿಕ್ ಪ್ರಮಾಣ್-ಪತ್ರ್ ದೀವ್ನ್ ಧಾಂವ್ಚ್ಯಾ ಆಧುನಿಕ್ ಚೊರಾಕ್ ಏಕ್ ‘ನಕ್ಲಿ ಶಿಪಾಯ್’ ಜಾಂವ್ಚೊ ಆವ್ಕಾಸ್ ಮೆಳ್ತಾ. ಹ್ಯಾ ನಕ್ಲಿ ಝುಜಾಂತ್ ಆವಾಜ್ ಆಸಾ, ಪುಣ್ ರಗತ್ ನಾ; ನಾಟಕ್ ಆಸಾ, ಪೂಣ್ ತ್ಯಾಗ್ ನಾ.

ದೋನ್ ಮಾಪಾಂಚಿ ವೊಪಾರ್

ಆಮಿ ದೋನ್ ನಮೂನ್ಯಾಚಿಂ ಮಾಪಾಂ ಘೆವ್ನ್ ಭೊಂವ್ತಾಂವ್! ಏಕ್ ತೀರ್ಪ್ ದಿತಾ ಅನ್ಯೇಕ್ ಮಾಫ್ ಕರ್‍ತಾ! ಏಕ್ ಶಿಕ್ಶಾ ದಿತಾ ಅನ್ಯೇಕ್ ಸುರಕ್ಶಾ ದಿತಾ!

ಲೊಂಕ್ಡಾಚಿ ಟೇಪ್: ನಿಶ್ಟುರ್ ಥರಾನ್ ಮೆಜ್ಚಿ ಖಡಕ್ ಟೇಪ್ ಹಿ. ಹೆರಾಂ ಕಾಯ್ದೊ ಮೊಡ್ತಾನಾ ಬೋವ್ ವೆಗಿಂ ಭಾಯ್ರ್ ಯೆತಾ! ಹಾಂಗಾ ಆಮ್ಚೆ ಭಿತರ್‍ಲೊ ಜಡ್ಜ್ ನೀಟ್ ಬಸ್ತಾ. ದುಸ್ರ್ಯಾಂಕ್ ‘ಭೃಶ್ಟ್’, ‘ಸ್ವಾರ್ಥಿ’ ಆನಿ ‘ಚೋರ್’ ಮ್ಹಣ್ ತೀರ್ಪ್ ದೀವ್ನ್ ಕಠಿಣ್ ಶಿಕ್ಶಾ ಸುಚಯ್ತಾ.

ರಬ್ಬರಾಚಿ ಟೇಪ್: ಅಮ್ಚೆ ಖಾತಿರ್‌ಚ್ ಮ್ಹಣ್ ಆಸ್ಚಿ ಇಲಾಸ್ಟಿಕ್ ಜಾವ್ನ್ ವೊಡ್ಚಿ ದಯಾಮಾಯಾಚಿ ಟೇಪ್ ಹಿ. ಹಾಂಗಾ ಝಡ್ತಿ ಕರ್‍ಚೊ ಜಡ್ಜ್ ಮಾಯಾಗ್ ಜಾತಾ ಆನಿ ತಾಚ್ಯಾ ಜಾಗ್ಯಾರ್ ಭೋವ್ ಹುಶಾರ್ ವಕೀಲ್ ಜಲ್ಮಾತಾ! ತೊ ಆಮ್ಚ್ಯಾ ಹರ್‍ಯೆಕಾ ಭ್ರಶ್ಟ್ ಆಚಾರಾಂಕ್, ಲೊಂಚಾಕ್, ಸೊಡ್‌ದೊಡಿಂಕ್ ‘ಪ್ರಾಕ್ಟಿಕಲ್ ಗರ್ಜ್’ ಮ್ಹಣ್ ಸಮರ್ಥನ್ ದಿತಾ. ಆಮ್ಚ್ಯಾ ಅನ್ಯಾಯಾಂಕ್ ‘ಲ್ಹಾನ್’ ಮ್ಹಣ್ ಮಾಫ್ ಕರ್‍ತಾ.

ಉಣೆಂ ಅಂಕ್ ಮೆಳ್‌ಲ್ಲ್ಯಾ ಆಪ್ಲ್ಯಾ ಭುರ್ಗ್ಯಾ ಖಾತಿರ್ ಪ್ರಭಾವ್ ವಾಪಾರ್‍ನ್, ದುಡು ದೀವ್ನ್ ಶಿಕ್ಪಾಚಿ ಸೀಟ್ ವೋಡ್ನ್ ಘೆತ್‌ಲ್ಲೊ, ಆರ್ಹ್ ಭುರ್ಗ್ಯಾಕ್ ಜಾಂವ್ಚ್ಯಾ ಅನ್ಯಾಯಾವಿಶಿಂ ಚಿಂತಿನಾ; ದುಡು ಘೆತಲೊಯ್ ಚಿಂತಿನಾ. ‘ಬಾಪಯ್ಚೆಂ ಕರ್ತವ್ಯ್’ ‘ಸಂಸ್ಥ್ಯಾಚೆಂ ಬರೆಂಪಣ್’ ಅಶೆಂ ನಯ್ತಿಕ್ ಸರ್ಟಿಫಿಕೇಟ್ ದಿಲ್ಯಾರ್ ಜಾಲೆಂ! ಪುಣ್ ತೊಚ್ ಬಾಪುಯ್, ಪರಿಕ್ಶೆಚೆಂ ಪೇಪರ್ ಲೀಕ್ ಜಾವ್ನ್ ಆವಾಜ್ ಉಟ್ತಾನಾ, ಹ್ಯಾಶ್‌ಟ್ಯಾಗ್ ವಾಪಾರ್‍ನ್ ‘ಜಸ್ಟಿಸ್’ ಮ್ಹಣ್ ಎಕಾ ಕ್ಲಿಕಾಂತ್ ಸೋಶಿಯಲ್ ಮೀಡಿಯಾಂತ್ಲ್ಯಾ ಸುರಕ್ಶಿತ್ ಕ್ರಾಂತಿಂತ್ ಮುಖೆಲ್ ವಾಂಟೆಲಿ ಜಾತಾ. ಸರ್ಕಾರಾಚ್ಯಾ ಭೃಶ್ಟಾಚಾರಾವಿಶಿಂ ವಾಟ್ಸಾಪ್ ಫಾರ್ವರ್ಡ್ ಧಾಡ್ತೆಲ್ಯಾಲಾಗಿಂ, ಕಾರ್ಪೊರೇಶನಾಂತ್ ಹಕ್ಕಾನ್ ಮೆಳ್ಚ್ಯೆ ಸವ್ಲತೆಖಾತಿರ್ ಲೊಂಚ್ ಕಿತ್ಯಾಕ್ ದಿಲೊಯ್ ಮ್ಹಣ್ ವಿಚಾರ್‍ತಾನಾ, ‘ಸಿಸ್ಟಮ್ ತಶಿಚ್ ಸಾಯ್ಬಾ, ಆಮಿ ಎಡ್ಜಸ್ಟ್ ಜಾಯ್ಜೆ’ ಮ್ಹಣ್ ಮೌನ್ ಸಾಂಬಾಳ್ತಾ. ಲೊಕಾಯುಕ್ತಾ ಭೃಶ್ಟ್ ಅಧಿಕಾರಿಂಚೊ ಕರೊಡಾಂನಿ ದುಡು ಜಪ್ತಿ ಕರ್‍ತಾ. ಹೊ ದುಡು ದಿಲ್ಲೊ ಕೊಣೆಂ?

ಭಾಯ್ರ್ ಜಡ್ಜ್ ಜಾವ್ನ್ ಸಕ್ಡಾಂ ಪ್ರಾಸ್ ವ್ಹಡ್ ಬೋಬ್ ಘಾಲ್ಚೊ ಮನಿಸ್, ಭಿತರ್‍ಲ್ಯೆ ಕೊಡ್ತಿಂತ್ ಆಪ್ಲ್ಯಾಚ್ ಚೊರಾಕ್ ಸವ್ಲತೆನ್ ಮುಕ್ತ್ ಕರ್‍ತಾನಾ ಸಮಾಜಿಕ್ ವ್ಯವಸ್ಥೆಚ್ಯಾ ನ್ಯಾಯ್ ನಿತಿಚಿ ಆನಿ ವಿಶ್ವಾಸಾಚಿ ಬುನ್ಯಾದ್ ಹಾಲ್ತಾ. ಆಪ್ಲ್ಯಾ ಫಾಯ್ದ್ಯಾ ಖಾತಿರ್, ಕಾಮಾ ಖಾತಿರ್ ಒಳಕ್ ಆನಿ ಪ್ರಭಾವ್ ವಾಪಾರ್‍ಚೊ ನಾಗರಿಕ್ ಆನಿ ದೇಶಾಕ್ ಲುಟುನ್ ಖಾಂವ್ಚೊ ಮುಖೆಲಿ/ಅಧಿಕಾರಿ-ದೊಗಾಂಯ್ಚಿ ಮಾನಸಿಕ್ ಪ್ರಕ್ರಿಯಾ ಏಕ್ ಆಸ್ತಾ. ಮಾಸ್ಳೆಚೊ ಕಾಂಟೊ ಆನಿ ಮಾಜ್ರಾ ಗುಣ್ ಕಸಲೊ ಮ್ಹಣ್ ಕವಿ ಬಾಪ್ ಜೊಸಿ ಸಿದ್ದಕಟ್ಟೆ ಆಪ್ಲ್ಯಾ ಹಾಂವ್ ಮ್ಹೆಳ್ಯಾ ವೊಂಟಾಂಚೊ ಕವಿತೆಂತ್ ಸಾಂಗ್ತಾ:

ಮಾಜ್ರಾ ಪಿಲಾಂಕ್ ಕಿತ್ಲೆಂ ಗೊಪಾಂತ್ ಆರಾಯ್ಲ್ಯಾರಿ
ಮಾಸ್ಳೆ ಕಾಂಟೊ ದೆಖ್ಲ್ಯಾರ್ ಉಡೊನ್ ಧಾಂವ್ತಾತ್
ಶಿತ್ ಚಿಲ್ಲುನ್ ಕಾಂಟೊ ರುಚಿನ್ ಚಿಂವ್ತಾತ್

ಪಾಂಚ್ ವರ್‍ಸಾಂ ಆಮ್ಕಾಂ ಲುಟುನ್ ಖಾಂವ್ಚ್ಯೆ ವ್ಯವಸ್ಥೆಕ್ ಶಿರಾಪ್ಚಿಂ, ಚುನಾವಾವೆಳಾ ಎಕಾಚ್ ಫರಾ ಮಾಸ್ಳೆ ಕಾಂಟೊ ಚಿಂವುಂಕ್ ಶಿತ್ ಚಿಲ್ಲುನ್ ಧಾಂವ್ತಾತ್. ಭಿತರ್‍ಲೊ ಉಜೊ ಬರ್‍ಫಾಪರಿಂ ಥಂಡ್ ಜಾತಾ. ವೋಟ್ ಘಾಲ್ಚ್ಯಾ ನಿಮಾಣ್ಯಾ ಪಾಂಚ್ ದಿಸಾಂ ಪಯ್ಲೆಂ ಮಾಸ್ಳೆ ಕಾಂಟ್ಯಾಖಾತಿರ್, ಆಪ್ಲೆಂ ಸಗ್ಳೆಂ ದೂಖ್ ಆನಿ ಸ್ವಾಭಿಮಾನ್ ವಿಕುನ್ ವೋಟ್ ಘಾಲ್ತಾತ್. ತರ್ ಭೃಶ್ಟಾಚಾರಿ ಕೋಣ್? ದೇಶಾಚೊ ನಾಗರಿಕ್‌ಚ್ ಭೃಶ್ಟ್ ಜಾಲ್ಯಾರ್ ಝುಜ್ ಕೊಣಾಲಾಗಿಂ?

ಅಧಿಕಾರ್ ಅನಿ ಉಣೆಂಪಣಾಚೆಂ ಭೆಂ

ದೇಶಾಂತ್ ಜಲ್ಮಲ್ಲ್ಯೊ ಚಡ್ತಾವ್ ಚಳ್ವಳ್ಯೊ ಅರ್ದ್ಯಾರ್ ಕೊಸ್ಳಲ್ಯಾತ್ ಕಿತ್ಯಾಕ್ ಮ್ಹಳ್ಯಾರ್ ಅಧಿಕಾರಾಚೆಂ ಕದೆಲ್ ಮೆಳ್ತಾನಾ ತಾಂಚೊ ಆವ್ತಾರ್‌ಚ್ ಬದ್ಲಾತಾ. ಹ್ಯಾ ಖಾತಿರ್ ಕೊಕ್ರೊಚ್ ತಸಲಿ ನವಿ ಕ್ರಾಂತಿ ಜಲ್ಮಾತಾನಾಯ್ ತಾಂಚೆರ್ ಸವಲಾಂ ಉಟ್ತಾತ್. ಅಬ್ರಾಹಾಮ್ ಲಿಂಕನಾಚಿಂ ಉತ್ರಾಂ ಹಾಂಗಾ ಜೊಕ್ತಿಂ ಆಸಾತ್ ” If you want to test a man’s character, give him power” (ತುಮ್ಕಾಂ ಎಕಾ ಮನ್ಶಾಚೆಂ ಖರೊ ಸ್ವಭಾವ್ ಪಳಂವ್ಕ್ ಜಾಯ್ ತರ್, ತಾಚ್ಯಾ ಹಾತಾಂತ್ ಅಧಿಕಾರ್ ದಿಯಾ). ಅಧಿಕಾರ್ ಮನ್ಶಾಭಿತರ್ ಲಿಪೊನ್ ಆಸ್ಚೆಂ ನಕ್ಲಿ ರೂಪ್ ಭಾಯ್ರ್ ಕಾಡ್ತಾ. ಅಣ್ಣಾ ಹಜಾರೆಚ್ಯಾ ಆಂದೋಲನಾಚೆಂ ಹಣೆಬರಪ್ ಆಮಿ ಆತಾಂ ಭೊಗುನ್ ಆಸಾಂವ್.

ಅಧಿಕಾರಾಚ್ಯಾ ವಾಯ್ಟ್ ವಾಪಾರಾಚೊ ಭೃಶ್ಟಾಚಾರ್ ಹರ್ ಸಂಸ್ಥ್ಯಾಂನಿ ಝಳ್ಕತಾ. ಆಪ್ಲ್ಯಾ ವಿಚಾರಾಂಚೆರ್ ಸ್ವಾರ್ಥಾಚೆಂ ಗ್ರಹಣ್ ಯೆತಾನಾ ಉಡೊಂವ್ಚ್ಯಾ ಫಾತ್ರಾಂಚಿ ದಿಶಾ ಫಾಯ್ದ್ಯಾಂಚ್ಯಾ ರುಕಾಂವ್ಹಯ್ಲ್ಯಾ ಫಳಾಂ ಕುಶಿನ್ ಘುಂವ್ತಾ. ಆಂಬ್ಯಾ ರುಕಾಚ್ಯಾ ಪವಿತ್ರ್‌ಪಣಾಕ್ ಕಿತ್ಲೆ ಘಾಯ್ ಜಾಲ್ಯಾರೀ ಪರ್ವಾನಾ. ಪಿಕೊ ಆಂಬೊ ಆಪ್ಣಾಯ್ಜೆ! ಸತಾನ್ ತ್ಯಾ ಆಂಬ್ಯಾಕ್ ಥಂಯ್ಚ್ ಸೊಡ್ಲ್ಯಾರ್ ಆಪ್ಣಾಕ್ ಲಾಭ್ಚೆಂ ಹೆರ್ ವ್ಹರ್‍ತಲೆ ಮ್ಹಳ್ಳಿ ಭಿರಾಂತ್‌ಚ್ ಮನ್ಶಾಚ್ಯಾ ಭೃಶ್ಟಾಚಾರಾಚೆಂ ತಾತ್ವಿಕ್ ಸತ್! ಅಧಿಕಾರ್ ಅಸ್ತಾನಾಂಚ್ ಕರ್‍ಚೆಂ ಕರಿಜೆ – ಸಂಸಾರಾಂತ್ಲ್ಯಾ ಬಂಡ್ವಾಳ್‌ಶಾಹಿ ವ್ಯವಸ್ಥೆಚ್ಯಾ ಖೊಟ್ಯಾಪಣಾಕ್ ಹೆಂಚ್ ‘ಉಣೆಪಣಾಚೆಂ ಭೆಂ’ ಮೂಳ್ ಕಾರಣ್ ತರ್ ಸಮಾಜಿಚ್ಯಾ ರಗ್ತಾ-ಶಿರಾಂನಿ ಭೃಶ್ಟಾಚಾರ್ ರಿಗೊಂಕ್‌ಯೀ ಹೊಚ್ ಮಾನಸಿಕ್ ಆಕಾಂತಾಚೊ ಕಿಡೊ ಕಾರಣ್.

ಮುಂಬಯ್ ರಸ್ತ್ಯಾರ್ ಏಕ್ ಅವಯ್: ‘ತುಕಾ ತುಜೊ ತಾಳೊ ಆಸಾ!’

ಆಮ್ಚ್ಯಾ ಹಕ್ಕಾಂ ಖಾತಿರ್ ಆನಿ ವ್ಯವಸ್ಥೆಚ್ಯಾ ಖೊಟೆಂಪಣಾವಿರೋಧ್ ಝುಜೊಂಕ್ ಹೆರಾಂಕ್ ಹೀರೊ ಕರ್‍ನ್, ತಾಂಚಿಂ ಭುಜಾಂ ಸೊದುನ್ ಆಮ್ಚಿ ಜವಾಬ್ದಾರಿ ಚುಕಂವ್ಚಿ ಏಕ್ ಆಧುನಿಕ್ ಸವಯ್ ಜಾಲ್ಯಾ. ಮುಂಬಂಯ್ತ್ ಏಕ್ ಅವಯ್ ಆಪ್ಲ್ಯಾ ಭುರ್ಗ್ಯಾಕ್ ಶಾಳೆ ಥಾವ್ನ್ ಕಾರಾರ್ ಅಪವ್ನ್ ಹಾಡುಂಕ್ ವೆತಾನಾ, ರಸ್ತ್ಯಾರ್ ಚಲ್ಚ್ಯಾ ಎಕಾ ರಾಜಕೀಯ್ ಮೋರ್ಚಾವವಿಂ ಟ್ರಾಫಿಕ್ ಜಾಮಾಂತ್ ಸಾಂಪಡ್ಲಿ. ವ್ಯವಸ್ಥೆ ವಯ್ರ್ ತಿ ಖುಬಾಳ್ಳಿ ಆನಿ ಕಸಲೆಂಚ್ ಭ್ಯೆಂ ನಾಸ್ತಾನಾ ಎಕ್ಲಿಚ್ ಜಾವ್ನ್ ರಸ್ತ್ಯಾರ್ ಉಬೆ ಆಸ್ಚ್ಯಾ ಪೊಲಿಸ್ ಅಧಿಕಾರಿಂಕ್ ಆನಿ ಮಂತ್ರಿಂಕ್ ಶೀದಾ ಸವಲಾಂ ಘಾಲುಂಕ್ ಲಾಗ್ಲಿ. ತಿಚೊ ವಿಡಿಯೊ ಸಾಮಾಜಿಕ್ ಮಾಧ್ಯಮಾಂನಿ ಪ್ರಸಾರ್ ಜಾತಾನಾ, ಹಜಾರಾಂನಿ ಲೊಕಾಂನಿ ತಿಚೆರ್ ಹೊಗ್ಳಿಕ್ ಉಚಾರ್‍ಲಿ ಆನಿ ತಿಕಾ ಪರ್ಜೆಚೊ ತಾಳೊ ಮ್ಹಣ್ ವಾಖಣ್ಲೆಂ. ಪುಣ್ ತಿಣೆ ಆಪ್ಲ್ಯಾ ಖಾಂದಾವಯ್ರ್ ಬಂದೂಕ್ ದವರ್‍ತೆಲ್ಯಾಂಕ್ ಏಕ್ ವಿಡಿಯೊ ಕರ್‍ನ್ ಚಾಟಿ ಮಾರ್‍ಲಿ: ಹಾಂವೆಂ ಕಿತ್ಯಾಕ್ ತುಮ್ಚೊ ಆವಾಜ್ ಜಾಂವ್ಕ್ ಜಾಯ್? ತುಮ್ಕಾಂ ಸ್ವತಾಚೊ ತಾಳೊ ಆಸಾ “Why do i need to be your voice? You have a voice”. ಹೆಂಚ್ ಪರ್ಜೆರಾಜಾಚೆಂ ಖರೆಂ ಲಕ್ಶಣ್. ಹೆರಾಂಚೊ ರಾಗ್ ಉಸ್ಣೊ ಘೆಂವ್ಚೊ ನ್ಹಯ್; ಸ್ವತಾಚೊ ಆವಾಜ್ ಸೊಧುನ್ ಕಾಡ್ಚೊ.

ಸಾಮೂಹಿಕ್ ಸಮ್ಮತಿ ಆನಿ ಮೌನಾ ಸಂಗಿಂ ಖರಾರ್

ಭೃಶ್ಟಾಚಾರ್ ಆನಿ ಅನ್ಯಾಯಾ ಪಾಟ್ಲ್ಯಾನ್ ಏಕ್ ‘ಸಾಮೂಹಿಕ್ ಸಮ್ಮತಿ’ ಲಿಪೊನ್ ಆಸಾ. ಸಮಾಜೆಂತ್ಲ್ಯಾ ಕಪಟಾಕ್ ಉಗ್ತ್ಯಾನ್ ಸವಾಲ್ ಘಾಲ್ಚೆಂ ಥೊಡ್ಯಾಂನಿ ಮಾತ್ರ್. ನಿತಿನ್ ಜಿಯೆತೆಲ್ಯಾಂಕ್ ಗಾಂಧಿ ಮ್ಹಣ್ ನಕ್ಲಾಂ ಕರ್‍ನ್ ವೆಗ್ಳೆಂ ಕರ್‍ನ್ ಪಯ್ಸ್ ಕರುಂಕ್ ಭುಗಿಂ ಶಾಳೆನಿಂಚ್ ಶಿಕ್ತಾತ್. ಡೆಲ್ಲಿ ಥಾವ್ನ್ ಜಾಂವ್ಚ್ಯಾ ಭೃಶ್ಟಾಚಾರಾವಿಶಿಂ ಕಂಡಾಪಟ್ಟೆ ವಿಡಿಯೊ ಯೆತಾತ್ ತರ್, ಹಾಂಗಾಚ್ ಗಾಂವಾಂತ್ ಜಾಂವ್ಚ್ಯಾ ಭೃಶ್ಟಾಚಾರಾವಿಶಿಂ ಫೇಸ್ ಬುಕಾರ್ ಕೊಣೆಂಯ್ ಘಾಲ್ಯಾರ್ ಚುಕೊನೀ ಚಾರ್ ಲೈಕ್ಸ್ ಪಡಾನಾಂತ್. ವಾಟ್ಸಪ್ ಗ್ರೂಪಾಂನಿಂಯ್ ಅಶೆಂಚ್ ಘಡ್ತಾ. ಸಬ್ದ್ ಕಾಡ್ಲ್ಯಾರ್ ಕಸಲೊ ತರೀ ಫಾಯ್ದೊ ಚುಕಾತ್ ಮ್ಹಳ್ಳೆಂ ಭ್ಯೆಂ. ನಿಶ್ಟುರ್ ಜಾಂವ್ಕ್ ನಾಕಾ. ಕದ್ವಳ್ ಉದ್ಕಾಂತ್ ಮಾಸ್ಳಿ ಧರ್‍ಚ್ಯಾಂತ್‌ಚ್ ಸಕ್ಡಾಂಕ್ ಫಾಯ್ದೊ ಮ್ಹಳ್ಳೆಂ ಚಿಂತಾಪ್ ಆಮ್ಚೆಂ ಜಾಲಾಂ.

ಆಮಿ ಸತಾಚೆ ಅಭಿಮಾನಿ. ಆಮ್ಚ್ಯಾ ಉಲವ್ಣ್ಯಾಂತ್ ಆನಿ ಬರ್‍ಪಾಂನಿ ಸತಾಚೊ ಸಾಂಗಾತ್ ಸೊಡ್ನ್ ದೀನಾಂವ್. ಸತಾಚೊ ಉಲ್ಲೇಖ್ ಕೆಲ್ಯಾರ್ ಸಮಾಜಾಂತ್ ವ್ಹಡ್ಲಿ ನಯ್ತಿಕ್ ಪ್ರತಿಶ್ಟಾ ಫುಂಕ್ಯಾಕ್ ಮೆಳ್ತಾ. ಪುಣ್ ಸತ್ ಆಪ್ಲೆಂ ಮೋಲ್ ಸಾಂಗ್ತಾನಾ, ಆಮ್ಚ್ಯಾ ವೆಯಕ್ತಿಕ್ ಫಾಯ್ದ್ಯಾಂಚೊ ಆನಿ ಸುಖಾಚೊ ತ್ಯಾಗ್ ವಿಚಾರ್‍ತಾನಾ ಆಮ್ಚೆ ಪಾಂಯ್ ಸತಾಚ್ಯಾ ರಸ್ತ್ಯಾಥಾವ್ನ್ ಅಪಾಪಿಂ ಬೈಪಾಸ್ ರಸ್ತ್ಯಾ ಕುಶಿನ್ ಘುಂವ್ತಾತ್. ಕೊಣೀ ಸತಾಕ್ ಬುಡಯ್ನಾಂತ್, ಭಿಜತ್ ಘಾಲ್ತಾತ್. ತಿತ್ಲೆಂಚ್!

ಭೃಶ್ಟಾಚಾರಾ ವಿರೋಧ್ ಆವಾಜ್ ಉಟಂವ್ಚೊ ಭೋವ್ ಗರ್ಜೆಚೊ, ಪುಣ್ ತ್ಯಾ ಆವಾಜಾ ಪಾಟ್ಲ್ಯಾನ್ ಆಮ್ಚ್ಯಾಚ್ ಭಿರಾಂತೆಂತ್, ಆಬ್ಲೆಸಾಂತ್ ಆನಿ ಆಮ್ಚ್ಯೆ ಅಸುರಕ್ಶಿತಾಯೆಂತ್ ಜಿಯೆಂವ್ಚ್ಯಾ ಚೊರಾಚ್ಯಾ ದೊಳ್ಯಾಂತ್ ದೊಳೆ ಘಾಲ್ನ್ ಎನ್‌ಕೌಂಟರ್ ಕರುಂಕ್ ತಯಾರ್ ಆಸಾಂವ್‌ಗಿ? ಹಾಂಗಾ ಆಮಿ ಜಿಕ್ಲ್ಯಾಂವ್ ತರ್ ಭೃಶ್ಟಾಚಾರಾವಿರೋಧ್ ಝುಜೊಂಕ್ ಧಯ್ರ್ ಆನಿ ಬಳ್ ಮೆಳ್ತಾ! ಅಹಿಂಸಾತ್ಮಕ್ ಚಳ್ವಳ್ ಕರ್‍ನ್ ಜೀಕ್ ಜೊಡ್ಲಲ್ಯಾ ರಾಶ್ಟ್ರ್‌ಪಿತಾ ಮಹಾತ್ಮಾ ಗಾಂಧಿನ್ ಹೆಂಚ್ ಸಾಂಗ್ಲಾಂ. “Be the change that you wish to see in the world.”

highlight
ಆಮಿ ಸತಾಚೆ ಅಭಿಮಾನಿ. ಪುಣ್ ಸತ್ ಆಪ್ಲೆಂ ಮೋಲ್ ಸಾಂಗ್ತಾನಾ, ಆಮ್ಚ್ಯಾ ವೆಯಕ್ತಿಕ್ ಫಾಯ್ದ್ಯಾಂಚೊ ಆನಿ ಸುಖಾಚೊ ತ್ಯಾಗ್ ವಿಚಾರ್‍ತಾನಾ ಆಮ್ಚೆ ಪಾಂಯ್ ಸತಾಚ್ಯಾ ರಸ್ತ್ಯಾಥಾವ್ನ್ ಅಪಾಪಿಂ ಬೈಪಾಸ್ ರಸ್ತ್ಯಾ ಕುಶಿನ್ ಘುಂವ್ತಾತ್. ಕೊಣೀ ಸತಾಕ್ ಬುಡಯ್ನಾಂತ್, ಭಿಜತ್ ಘಾಲ್ತಾತ್. ತಿತ್ಲೆಂಚ್!

ಆಂಡ್ರ್ಯು ಎಲ್ ಡಿಕುನ್ಹಾ