English 
ವೊಮ್ತಿಂ ಪಡ್ಲ್ಲಿಂ ಆಯ್ದಾನಾಂ ಆನಿ ವೊಮ್ತಿ ಪಡ್ಲ್ಲಿ ಮತ್
”ಮತ್ ಕಮೆಂಟ್ರಿಂತ್ ಘುಸ್ಲ್ಯಾರ್ ಆಯ್ದಾನಾಂ ವೊಮ್ತಿಂಚ್ ಉರ್ತಾತ್.”
ಭುರ್ಗ್ಯಾಪಣಾಚೊ ಉಡಾಸ್: ವೊಮ್ತಿಂ ಆಯ್ದಾನಾಂ
ಆಟಿಚ್ಯಾ ಪಾವ್ಸಾಕ್ ಆಮ್ಚಿ ಬಾಂಯ್ ಕೊಸ್ಳಾಲ್ಲಿ ಆನಿ ಉದಕ್ ಕದ್ವಳೊನ್ ಪಿಯೆಂವ್ಕ್ ಜಾಯ್ನಾತ್ಲ್ಲೆಂ. ತ್ಯಾ ವೆಳಿಂ ನಳ್ಯಾಚ್ಯಾ ಪಾವ್ಳ್ಯಾಂಚೆಂ ಉದಕ್ ಭರುಂಕ್ ಬಾಲ್ದ್ಯೊ, ಕೊಳ್ಸೆ, ತೊಪ್ಲಿಂ ಆನಿ ಹೆರ್ ಆಯ್ದಾನಾಂ ಜಾಲಾಂತ್ ದವರ್ನ್ ಆಮಿ ಉದ್ಕಾಚಿ ಗರ್ಜ್ ಸುದಾರ್ಸಿತೆಲ್ಯಾಂವ್. ಪಾವ್ಸ್ ಥಾಂಬೊನ್ ಇಲ್ಲೆಂ ವೋತ್ ಪಡ್ತಾನಾ, ತ್ಯಾ ಆಯ್ದಾನಾಂನಿ ಕೊಯ್ರ್ ಪಡ್ನಾಶೆಂ ತಿಂ ವೊಮ್ತಿಂ ಘಾಲ್ಚಿ ಸವಯ್.
ತ್ಯಾ ಎಕಾ ಶಾಳೆಚ್ಯಾ ರಜೆ ದಿಸಾ ಮಾಂಯ್ ಆನಿ ಬಾಬ್ ಕುಮೆರಿಕ್ ವೆತಾನಾ, ಪಾವ್ಸ್ ಯೆತಾನಾ ಉಡಾಸಾನ್ ಆಯ್ದಾನಾಂ ”ಉದಾರಿಂ ದವರ್” ಮ್ಹಣ್ ಮ್ಹಾಕಾ ಸಾಂಗೊನ್ ಗೆಲ್ಲಿಂ. ಮ್ಹಾಕಾ ರೇಡಿಯೊಚೆರ್ ಕ್ರಿಕೆಟ್ ಕಮೆಂಟ್ರಿ ಆಯ್ಕೊಂಚಿ ಪಿಸಾಯ್! ಬಾಬಾಚ್ಯಾ ಉತ್ರಾಂಚೊ ಉಡಾಸ್ ದವ್ರುನ್ ಏಕ್ ತೊಪ್ಲೆಂ ಉದಾರೆಂ ದವರ್ತಾನಾಂಚ್, ”ಗುಂಡಪ್ಪ ವಿಶ್ವನಾಥಾನ್ ಇಮ್ರಾನ್ ಖಾನಾಕ್ ಸ್ಕ್ವೇರ್ ಕಟ್ಟ್ ಫೋರ್ ಮಾರ್ಲೆಂ!” ಮ್ಹಣ್ ರೇಡಿಯೊರ್ ಕಮೆಂಟೇಟರಾಚಿ ಬೊಬಾಟ್ ಆಯ್ಕಾಲಿ. ತ್ಯಾ ಖುಶೆನ್ ರೇಡಿಯೊ ಲಾಗಿಂ ಧಾಂವ್ಲ್ಲೊಂ ಹಾಂವ್ ಪಾಟಿಂ ಆಯ್ಲೊಂಚ್ ನಾ. ಭಾಯ್ಲ್ಯಾನ್ ಪಾವ್ಸ್ ವೊತುನ್ ಆಸ್ಲ್ಲೊ, ಪುಣ್ ಹಾಂವ್ ಆಯ್ದಾನಾಂ ಉದಾರಿಂ ದವ್ರುಂಕ್ ಪುರ್ತೆಂ ವಿಸ್ರಾಲ್ಲೊಂ.
ದನ್ಪಾರಾಂ ಮಾಂಯ್ ಆನಿ ಬಾಬ್ ಪಾಟಿಂ ಯೆತಾನಾ, ಪಾವ್ಸ್ ರಾವೊನ್ ಎಕೇಕ್ ಥೆಂಬೆ ಆಯ್ದಾನಾಂಚ್ಯಾ ಮಾತ್ಯಾರ್ ಗಳೊನ್ ಆಸ್ಲ್ಲೆ ಆನಿ ಆಂಗ್ಣಾಂತ್ಲಿಂ ಆಯ್ದಾನಾಂ ವೊಮ್ತಿಂಚ್ ಉರ್ಲ್ಲಿಂ. ರಾಗಾರ್ ಜಾಲ್ಲ್ಯಾ ಮಾಂಯ್ಚ್ಯಾ ಚಿಂಚ್ಯೆಚ್ಯಾ ಆಡಾರಾಚ್ಯಾ ಮಾರಾಂನಿ ಗಳ್ಲ್ಲ್ಯಾ ಮ್ಹಜ್ಯಾ ದೊಳ್ಯಾಂತ್ಲ್ಯಾ ಥೆಂಬ್ಯಾಂನಿ ನಳ್ಯಾಂಚ್ಯಾ ಥೆಂಬ್ಯಾಂಕ್ ಸಾಂಗಾತ್ ದಿಲ್ಲೊ. ಪುಣ್ ತ್ಯಾ ದಿಸಾ ಬಾಬಾನ್ ಸಾಂಗ್ಲ್ಲೆಂ ಉತರ್ ಮ್ಹಜ್ಯೆ ಮತಿಕ್ ಆಜೂನ್ ಉಜ್ವಾಡ್ ದೀವ್ನ್ ರಾವ್ಲಾಂ:
”ಮತ್ ಕಮೆಂಟ್ರಿಂತ್ ಘುಸ್ಲ್ಯಾರ್ ಆಯ್ದಾನಾಂ ವೊಮ್ತಿಂಚ್ ಉರ್ತಾತ್.”
ವೊಮ್ತಿ ಪಡ್ಲ್ಲಿ ಪರಾಧೀನ್ ಮತ್
ಆಜ್ ಕಾಳ್ ಬದಲ್ಲಾ. ತುಳ್ವೆಂತ್ ‘ಪೋಪಿ ಕಾಲ’ ಮ್ಹಣ್ತಾತ್ ತಸೊ! ಕಮೆಂಟ್ರಿಚೊ ವಿಸ್ತಾರ್, ರೇಡಿಯೊಚ್ಯಾ ತರಂಗಾಂಥಾವ್ನ್ ಸಗ್ಳ್ಯಾ ಸಂಸಾರಾಕ್ ಆಪ್ಲ್ಯೆ ಮುಟಿಂತ್ ದವರ್ಚ್ಯಾ ಗ್ಲೋಬಲ್ ಅಲ್ಗೊರಿದಮಾಕ್ ಪಾವ್ಲಾ. ಕ್ರಿಕೆಟ್ ಕಮೆಂಟ್ರಿ ಮ್ಯಾಚ್ ರಾವ್ತಾನಾ ಸಂಪ್ತಾ. ಪುಣ್ ನಿರಂತರ್ ಅಲ್ಗೋರಿದಮಾನ್ ಮನ್ಶಾಕ್ ಅನಂತ್ ಅಂತ್ರಾಳ್ ದಾಕವ್ನ್, ತಾಚ್ಯಾ ಪಾಯಾಂಥಳಾಚಿ ಮಾತಿಚ್ ಕಾಡ್ನ್ ಉಡಯ್ಲ್ಯಾ. ಮನ್ಶಾನ್ ಮಾತಿ ವಿಕ್ಲ್ಯಾ. ಮತ್ಯೀ ವಿಕ್ಲ್ಯಾ. ಮನಿಸ್ ಧಾರಾಳ್ ಪಾವ್ಸಾಂತ್ ಉಬೊ ಆಸ್ಲ್ಯಾರೀ ತಾಚಿ ವಿಕುನ್ ಗೆಲ್ಲಿ ಪರಾಧೀನ್ ಮತ್ ವೊಮ್ತಿಚ್ ಪಡ್ಲ್ಯಾ. ತಾನೆನ್ ಅತ್ಮೊ ಸುಕ್ಲಾ. ಆಜ್ ಸಗ್ಳ್ಯಾಂನಿ ಮೊಬಾಯ್ ಸ್ಕ್ರೀನಾಚೆರ್ ದಿಸಾಚಿಂ ವೊರಾಂ ವೊರಾಂ ವ್ಯರ್ಥ್ ಕರ್ಚ್ಯಾ ಲಾಚಾರ್ ಮನ್ಶಾಂಕ್ ಪಳೆತಾನಾ ಬಾಬಾಚೆಂ ಉತರ್ ಚಡ್ ಪ್ರಸ್ತುತ್ ಲಾಗ್ತಾ. ಮನ್ಶಾ ಇತಿಹಾಸಾಂತ್ ಕೆದಿಂಚ್ ಇತ್ಲ್ಯಾ ಪ್ರಮಾಣಾರ್ ಲೊಕಾಂನಿ ಎಕಾಚ್ ವೆಳಾರ್ ತಕ್ಲಿ ಬಾಗ್ವೊಂಚ್ಯಾ ಆನಿ ಬೋಟ್ ವಯ್ರ್ ಹಾಲಂವ್ಚ್ಯಾ ಎಕ್ಯೆಚ್ ಕ್ರಿಯೆಂತ್ ಘುಂತುನ್ ರಾವ್ಲ್ಲೆಂ ನಾ! ಹಜಾರೊಂ ಆಪ್ಸಾಂನಿ ವಿಸ್ತಾರ್ಲ್ಲ್ಯಾ ನಿರಂತರ್ ಕಮೆಂಟ್ರಿಂತ್ ಆಯ್ಚೊ ಮನಿಸ್ ಬುಡೊನ್ ಗೆಲಾ. ಕಿತ್ಲೊಸೊ ಲೋಕ್ ಗೊಮ್ಟ್ಯೆ ದುಕಿಕ್ ವಕ್ತಾಂ ಕರ್ನ್ ಆಸಾ!
ಆಜ್ ಕಿತ್ಲೆಶ್ಯಾ ಮನ್ಶಾಂಚೆ ಹಾತ್ ಸಕಾಳಿಂ ಜಾಗ್ ಜಾಲ್ಲೆಂಚ್ ಆಪ್ಲ್ಯೆ ಕುಡಿಚೊ ಅಂಗ್ ಮ್ಹಳ್ಳೆಬರಿ ಹಾತ್ ಪಯ್ಲೊ ಮೊಬಾಯ್ಲಾಕ್ ಆರಾಯ್ತಾ. ತೆಂ ಮೊಬಾಯ್ಲ್ ತಾಚ್ಯೆಸಂಗಿಂ ಸರ್ವ್ ಕುಡಾಂನಿ ಭೊಂವ್ತಾ, ನಾಣ್ಯೆಕೀ ರಿಗ್ತಾ. ಸಕಾಳಿಂಚಿ ಭೆಟವ್ಣಿಂ, ಮೊಗಾಚಿಂ, ರಾಗಾಚಿಂ, ದುಖಿಚಿಂ ಸರ್ವ್ ವಿಧಾನಾಂ ರೀಲ್ಸಾಂನಿ, ವಿಡಿಯೊಂನಿ, ನಾಚಾಂನಿ, ಶೆರ್ಮಾಂವಾಂನಿ, ತರ್ಕಾಂನಿ ಪಾಶಾರ್ ಜಾವ್ನ್ ಮತಿಕ್ ಪಿಶ್ಯಾರ್ ಘಾಲ್ನ್ ಧಾಂವ್ತಾತ್. ನಕ್ಲಿ ವೀಡಿಯೊ, ಖಾಸ್ಗಿ ಆಸ್ಲಿ ವೀಡಿಯೊ, ಸಿ ಸಿ ಟಿವಿಂತ್ಲೊ ಆಪ್ರಾಧಾಚೊ ಕ್ಲಿಪ್.. ಇತ್ಯಾದಿ. ಆಮಿ ಕಿತೆಂ ಪಳೆಜೆ, ಕಿತೆಂ ಅಲೋಚನ್ ಕರಿಜೆ, ಕೊಣಾಚೆರ್ ರಾಗ್ ಧರಿಜೆ, ಕಶೆಂ ಸಂತೊಸ್ ಭೊಗಿಜೆ ಹ್ಯಾ ಸರ್ವ್ ಸಂಗ್ತಿಂಕ್ ಮಾರ್ಗದರ್ಶನ್ ಕರ್ಚೆಂ ಆಮ್ಚ್ಯಾ ಸ್ಕ್ರೀನಾಪಂದ್ಲ್ಯಾ ಅಲ್ಗೊರಿದಮಾನ್.
ಮನ್ಶಾಚೆ ದೊಳೆ ಸ್ಕ್ರಿನಾರ್ ಧಾಂವ್ಚ್ಯಾ ಬೊಟಾ ತುದ್ಯೆಚ್ಯೆ ಧಾಂವ್ಣೆಕ್ ಖಾಲ್ತಿಮಾನ್ ಘಾಲ್ತಾನಾ ಮತ್ ಎಕಾ ದೃಶ್ಯಾ ಥಾವ್ನ್ ಆನ್ಯೇಕಾಕ್ ಸೊದ್ತಾ, ಉಡ್ತಾ, ಉಸಳ್ತಾ ಆನಿ ಖಂಯ್ಚ್ಯಾಯ್ ಎಕ್ಯೆ ಸಂಗ್ತಿಕ್ ಥಿರ್ ರಾವೊಂಕ್ ಸಕಾನಾಸ್ತಾಂ ಕೊಸ್ಳೊನ್, ಗೊಂದೊಳಾಂತ್ ಮಿಸ್ಳೊನ್ ವೆತಾ. ಆಯ್ದಾನ್ ಉಳ್ಟೆಂ ಪಡ್ಲ್ಲೆಂ ಕಳನಾ. ದಿಸಾಕ್ ಚಾರ್ ವೊರಾಂ ಸ್ಕ್ರೋಲಿಂಗ್ ಕರ್ಚೊ ಮನಿಸ್ ವರ್ಸಾಚೆ ದೋನ್ ಮ್ಹಯ್ನೆ ವಿಬಾಡ್ತಾ. ಜಿವಿತಾಚೊ ಅಮೊಲಿಕ್ ವೇಳ್, ಕುರ್ಪಾ ಅನಿ ಜಾಣ್ವಾಯ್ ವೊಮ್ತ್ಯಾ ಆಯ್ದಾನಾಂಚೆರ್ ಪಡ್ಲ್ಲ್ಯಾ ಪಾವ್ಸಾಪರಿಂ ವ್ಯರ್ಥ್ ಜಾತಾ. ಪವಿತ್ರ್ ಅತ್ಮ್ಯಾಚ್ಯಾ ಸಾತ್ ದೆಣ್ಯಾಂಚಿ ವ್ಹಳಕ್ ವಿಸ್ರೊನ್ ವೆತಾ! ಜರೀ ಎಕ್ಲೊ ವ್ಹರೆವಿಂಗಡ್ ಬಸ್ಲಾ, ತೊ ಕಾಂಯ್ ಪ್ರೊಬ್ಲೆಮಾರ್ ಆಸಾ ಕೊಣ್ಣಾ’ ಮ್ಹಣ್ ಲೆಕ್ಚೆಂಯ್ ಆಸಾ.
ಆಮ್ಚ್ಯಾ ಮೆಂದ್ವಾಚೊ ಗೋಳ್
ಹ್ಯಾ ಡಿಜಿಟಲ್ ಕಮೆಂಟ್ರಿಂತ್ ಮನಿಸ್ ಕಯ್ದಿ ಜಾಂವ್ಕ್ ಏಕ್ ಮೂಳ್ ಕಾರಣ್ – ತಾಚ್ಯಾ ಮೆಂದ್ವಾಂತ್ಲಿ ಜೈವಿಕ್ ರಾಸಾಯನಿಕ್ ಕ್ರಿಯಾ. ವಿಗ್ಯಾನಾಚ್ಯೆ ದಿಶ್ಟಿನ್ ಸ್ಕ್ರೀನಾರ್ ಯೆಂವ್ಚೊ ಏಕ್ ಲೈಕ್, ನವೆಂ ನೋಟಿಫಿಕೇಶನ್ ವಾ ಸ್ಕ್ರೋಲ್ ಕರ್ತಾನಾ ದಿಸ್ಚೊ ನವೊ ವಿಡಿಯೊ ಮನ್ಶಾಚ್ಯಾ ಮೆಂದ್ವಾಂತ್ ಡೊಪಾಮಿನ್ ಮ್ಹಳ್ಳ್ಯಾ ರಸಾಯನಾಚೊ ಏಕ್ ಸ್ರಾವ್ ಪಾಜಾರ್ತಾ. ಡೊಪಾಮಿನ್ ಮನ್ಶಾಕ್ ‘ಅಳೆ! ಅನ್ಯೆಕ್ ನವಿ ಮಜಾ ರಾಕೊನ್ ಆಸಾ’ ಮ್ಹಣ್ ಸೊದಾಕ್ ಲಾಯ್ತಾ ಆನಿ ಮತಿಂತ್ ಆಬ್ಲೆಸ್, ಭ್ಯೆಂ, ರಾಗ್, ದ್ವೇಶ್ ನಿರಂತರ್ ವೊತ್ತಾ.
ಡೊಪಾಮಿನಾಚ್ಯಾ ಸಾಕ್ರಿ ಮೆಲಾಂತ್ ಮತ್ ಸಕ್ರೀಯ್ ಉರ್ತಾನಾ ಮನಿಸ್ ನಿರಂತರ್ ಸ್ಕ್ರೋಲ್ ಕರ್ತಾ. ಹ್ಯಾ ಜುಗಾರಿ ಖೆಳಾ ವೊಡ್ಣೆಂತ್ ಮತ್ ತೃಪ್ತಿ ಸಾಂಡುನ್ ಆಶಾಂತ್, ಉದ್ವೇಗಾಂತ್ ಉಚಾಂಬಳ್ ಉರ್ತಾ. ಹಿ ಆಮಿ ಆಮ್ಚ್ಯೆ ಮತಿಕ್ ದಿಂವ್ಚಿ ಇಜಾ. ಮನ್ಶಾಚೊ ಮೆಂದು ಸದಾಂಕಾಳ್ ಉಚಾಂಬಳ್ ರಾವೊಂಕ್ ರೂಪಿತ್ ಕೆಲ್ಲೊ ನ್ಹಯ್. ತೊ ಸೃಶ್ಟಿಸಂಗಿಂ ಆನಿ ತಾಂತ್ಲ್ಯಾ ಹರ್ ಜಿವಿಲಾಗಿಂ ಸಂಬಂಧ್ ಬಾಂದುಂಕ್, ಜಿವಿತಾಚೊ ಅರ್ಥ್ ಸೊದುಂಕ್ ಆನಿ ಜಾಣ್ವಾಯ್ ಆಪ್ಣಾಂವ್ಕ್ ಕೆಲ್ಲೊ. ಹಜಾರಾಂನಿ ವರ್ಸಾಂನಿ ಮನ್ಶಾಚಿ ಮತ್ ಅಶಿಚ್ ವಾಡ್ಲಿ, ಪುಣ್ ಆತಾಂ ಆಮಿ ತಿಚೆರ್ ಕರ್ಚೊ ಡಿಜಿಟಲ್ ಪ್ರಯೋಗ್ ಮನ್ಶಾಚ್ಯಾ ಚರಿತ್ರೆಂತ್ ಖಂಯ್ಚ್ಯಾಯ್ ಕಾಳಾರ್ ಜಾಂವ್ಕ್ ನಾ. ಹೊ ಹಲ್ಲೊ ಮನ್ಶಾಚೆಂ ಗುಮಾನ್ ಕುಡ್ಕೆ ಕುಡ್ಕೆ ಕರ್ನ್ ವೋಡ್ನ್ ಆಸಾ. ಮನ್ಶಾನ್ ತಂತ್ರಜ್ಞಾನಾಂತ್ ಪ್ರಗತಿ ಜೊಡ್ಲ್ಯಾ, ಪುಣ್ ಆಪ್ಲ್ಯಾ ಖಾಸ್ ಮೆಂದ್ವಾಚಿಚ್ ಸೂಕ್ಶ್ಮತಾ ಆನಿ ಜಿವಂತ್ ಸಕತ್ ಸಾಂಬಾಳುಂಕ್ ಸಲ್ವಲಾ.
ನಶ್ಟ್ ಜಾಲ್ಲೊ ಥಳೀಯ್ ಭೊಂವಾರ್
ಡಿಜಿಟಲ್ ಜಾಳಾಂ ಆಮ್ಚೊ ವೇಳ್ ಪೀಳ್ನ್ ಕಾಡ್ತಾನಾ, ಆಮ್ಚ್ಯಾ ಸಾಮ್ಕಾರ್ ಆಸ್ಚೊ ಥಳೀಯ್ ಸಂಸಾರ್ ನಶ್ಟ್ ಜಾವ್ನ್ ವೆತಾ. ಆಮ್ಚಿ ದೀಶ್ಟ್ ಗಾಂವ್ಚ್ಯೊ ಮೆರೊ ಉತ್ರೊನ್ ಧಾಂವ್ತಾ ಆನಿ ಜಾಗತಿಕ್ ಸಂಸಾರಾಂತ್ ಭೊಂವ್ತಾ. ವಿಸಾವ್ಯಾ ಶೆಕ್ಡ್ಯಾ ಮ್ಹಣಾಸರ್ ಮನ್ಶಾಚೆಂ ಧ್ಯಾನ್, ಮನ್ ಆನಿ ತುಲನ್ ಆಪ್ಲ್ಯಾಚ್ ಭೊಂವಾರಾಂತ್ ಸೀಮಿತ್ ಆಸ್ಲ್ಲೆಂ – ಆಪ್ಲೆಂ ಘರ್, ಕುಟಾಮ್, ದಾಯ್ಜಿ, ಸೆಜಾರಿ, ಗಾಂವ್, ಇಗರ್ಜ್, ಇಸ್ಕೊಲ್. ಪುಣ್ ಆತಾಂ ಆಮ್ಚೆಂ ಕನೆಕ್ಶನ್ ಜಾಗತಿಕ್ ಜಾತಾನಾ ಹಜಾರಾಂನಿ ಫ್ರೆಂಡ್ಸ್, ಫೊಲೊವರ್ಸ್ ಆಸ್ಲ್ಯಾರೀ ಗ್ಲೋಬಲ್ ಮ್ಹಳ್ಳ್ಯಾ ಆರ್ಸ್ಯಾಚ್ಯಾ ಭೊಂವಾರಾಂತ್ ಸಾಸ್ಪೊನ್ ಆಮಿ ಆಮ್ಕಾಂಚ್ ಹೊಗ್ಡಾವ್ನ್ ಆಸಾಂವ್. ಆಮ್ಚೆಂ ತುಲನ್ ಲಾಗ್ಸಿಲ್ಯಾ ಪ್ರತ್ಯಕ್ಶ್ ಮನ್ಶಾಲಾಗಿಂ ನ್ಹಯ್ ಇಂಟರ್ನೆಟಾಂತ್ಲ್ಯಾ ಪರ್ಕ್ಯಾಲಾಗಿಂ. ಸೋಶಿಯಲ್ ಮೀಡಿಯಾಚ್ಯಾ ಆರ್ಸ್ಯಾಂತ್ ದಿಸ್ಚ್ಯಾ ಕೃತಕ್ ಉಜ್ವಾಡಾಲಾಗಿಂ ಪಾವೊಂಕ್ ಧಾಂವ್ತಾನಾ ಆರ್ಸ್ಯಾಂಕ್ ಆಪ್ಟೊನ್ ದಪ್ಟೊನ್ ಖಾಲಿಪಣಾಚ್ಯಾ, ಎಕ್ಸುರ್ಪಣಾಚ್ಯಾ ಭೊಗ್ಣಾಂನಿ ಕರ್ಗೊಂಚೆಂ ಚಡ್ತಾವ್ ದಿಸ್ತಾ. ಡಿಜಿಟಲ್ ಮೆಜಾರ್ ಮಾಂಡುನ್ ದವರ್ಲ್ಲೆಂ ಜೆವಣ್ ಖಾಂವ್ಚೆಂ ತರೀ ಕಶೆಂ?
ಹ್ಯಾ ಉಜ್ವಾಡಾಚ್ಯಾ ಗಲಾಟ್ಯಾಂತ್ ಆಪ್ಲ್ಯಾ ಕಾಳ್ಜಾಂತ್ಲೊ ದಯಾಮಾಯಾಚೊ ದಿವೊ ಆನಿ ಮತಿಂತ್ಲ್ಯಾ ಉಜ್ವಾಡಾಚಿ ದಿವ್ಟಿ ಪಾಲ್ವೊನ್ ಗೆಲ್ಲಿ ಖಬರ್ ಸಯ್ತ್ ಆಸಾನಾ. ವಾಂಜೆಲಾಂತ್ಲ್ಯಾ ಆಂಜುರಾಚ್ಯಾ ರುಕಾಬರಿ ಸಗ್ಳ್ಯಾಂನಿ ದೊಳ್ಯಾಂಕ್ ಭುಲಂವ್ಚೊ ಭೆಶ್ಟೊ ಪಾಲೊಚ್ ದಿಸ್ತಾ. ಪಿಕಾವಳ್ ಆನಿ ಫಳಾಂ ನಾಂತ್!
ಆಮ್ಚ್ಯಾ ಸಾಮ್ಕಾರ್ ಆಸ್ಚಿಂ ಶಾಂತ್ ಖಿಣಾಂ, ಸತಾಂ ಆನಿ ವಿಸ್ಮಿತಾಂ ‘ಹೆಂಚ್ಗಿ, ಬೋರಿಂಗ್’ ಜಾವ್ನ್ ಕಾಂಠಾಳೊ ಹಾಡಯ್ತಾತ್. ಫಾಂತ್ಯಾಚಿಂ ಕಿರ್ಣಾಂ, ಸುಕ್ಣ್ಯಾಂಚಿ ಗಾಣಾಂ, ಸಾಂಜೆಚೊ ನಿಶಬ್ದ್ ಕೊಣಾಕ್ ಜಾಯ್? ಧ್ಯಾನ್ ಆನಿ ಏಕಾಗ್ರತಾ ನಾಸ್ ಜಾತಾನಾ ಸೃಜನಶೀಳತೆಚೆಂ ಚಿಂತಾಪ್ ಆನಿ ವಿಚಾರ್ ಆಪಾಪಿಂ ಆಲ್ಪೊನ್ ವೆಚೆಂ ದಿಸ್ತಾ. ಪಾವನಾತ್ಲ್ಯಾಕ್ ಕೃತಕ್ ಬುದ್ವಂತ್ಕಾಯೆಂತ್ಲ್ಯಾನ್ ಉಬ್ಜೊಂಚೆಂ ಉತ್ಪನ್ನ್ ಸೃಜನಾತ್ಮಕ್ ಸಾಹಿತ್ಯಾಚೆರ್ ಆಕ್ರಮಣ್ ಕರಿತ್ ಆಸಾ.
ಭುರ್ಗ್ಯಾಂಚೆ ಹಾತಿಂ ಮೊಬಾಯ್ಲ್ ದೀವ್ನ್ ಆಮಿ ತಾಂಕಾಂ ಸಮಾಧಾನ್ ಕರ್ಯೆತ್, ಆಮ್ಕಾಂ ಆರಾಮ್ ಮ್ಹಣ್ ಚಿಂತ್ಯೆತ್. ಪುಣ್ ಅಶೆಂ ಕರುನ್ ಆಮಿಚ್ ತಾಂಚ್ಯಾ ಕಲ್ಪನಾಸಕ್ತೆಕ್ ಶೆಳೆಂ ಉದಕ್ ವೊತ್ತಾಂವ್. ಭುರ್ಗ್ಯಾಂನಿಯ್ ವಗೆಪಣಾನ್ ರಾಂವ್ಚಿ ಗರ್ಜ್ ಆಸಾ, ತೆದ್ನಾಂಚ್ ತಾಂಚಿ ಕ್ರಿಯೆಟಿವಿಟಿ ಸಕ್ರೀಯ್ ಜಾತಾ.
‘ಫೇಸ್ ಟು ಫೇಸ್’ ಸಂಬಂಧ್ ಆನಿ ಫೇಸ್ಬುಕಾಚೊ ಮಾರ್ಕು
ಸುರ್ವಿಲ್ಯಾ ದಿಸಾಂನಿ ಫೇಸ್ಬುಕ್ ಸ್ಥಾಪಕ್ ಮಾರ್ಕ್ ಜುಕರ್ಬರ್ಗ್ ನಶ್ಟಾಕ್ ಸಾಂಪಡ್ತಾನಾ ಆಪಲ್ ಸಂಸ್ಥಾಪಕ್ ಸ್ಟೀವ್ ಜೊಬ್ಸಾನ್ ತಾಕಾ ಭಾರತಾಕ್ ವಚೊನ್ ಎಕಾ ಆಶ್ರಮಾಂತ್ ರಾವೊಂಕ್ ಸಲಹಾ ದಿಲ್ಲಿ ಕಂಯ್. ಅಶೆಂ ಭಾರತಾಚ್ಯಾ ಸಾಧ್ಯಾ ಎಕಾ ಆಶ್ರಮಾಂತ್ ಎಕ್ಸುರೊ ವೇಳ್ ಸಾರ್ತಾನಾ ಭಾರತಾಂತ್ ತಾಣೆಂ ಪಳೆಲ್ಲಿ ಅನ್ಮೋಲ್ ಗಜಾಲ್ ಮಾರ್ಕ್ ಉಚಾರ್ತಾ. ಲೋಕ್ ಹಾಂಗಾ ಎಕಾಮೆಕಾಕ್ ಭೆಟ್ತಾ ಆನಿ ಸ್ಪಂದನ್ ಕರ್ತಾ ತೆಂ ಪಳೆತಾನಾ ಜರ್ ಸಂಸಾರಾಂತ್ಲ್ಯಾ ಸಕ್ಡಾಂಕ್ ಎಕ್ಯೆ ವೆದಿರ್ ಕನೆಕ್ಟ್ ಕೆಲ್ಯಾರ್ ಹೊ ಸಂಸಾರ್ ಆನಿಕೀ ಕಿತ್ಲೊ ಬರೊ ಜಾಂವ್ಚೊನಾ!’ ಹ್ಯಾ ಆನ್ಭೋಗಾಂತ್ಲ್ಯಾನ್ ಆನಿ ಚಿಂತ್ಪಾನ್ ಫೇಸ್ಬುಕ್ ಉಬೊ ಕೆಲೊ ಅಶೆಂ ತಾಣೆಂ ಸಾಂಗ್ಲ್ಲೆಂ ಆಸಾ. ತಾಣೆಂ ಸಂಸಾರ್ ಕನೆಕ್ಟ್ ಕರುಂಕ್ ಚಿಂತ್ಲೆಂ, ಪುಣ್ ಲೋಕ್ ಹ್ಯಾ ಜಾಳಾಂತ್ ಶಿರ್ಕೊನ್ ಆಜ್ ಭಾಯ್ರ್ ಯೆಂವ್ಕ್ ವೊದ್ದಾಡ್ತಾ.
ಸಾಂಗಾತ್ಪಣಾನ್ ವಾಡೊನ್ ಆಯಿಲ್ಲಿಂ ಕುಟ್ಮಾಂ ಆಮ್ಚಿಂ ಆಜ್ ಎಕಾಚ್ ಘರಾ ಭಿತರ್ ಎಕ್ಸುರಿಂ ಜಾಲ್ಯಾಂತ್. ಘರಾ ಭಿತರ್ ಡಿಜಿಟಲ್ ಸಂಸಾರ್ ರಿಗ್ತಚ್ ಸಕ್ಡಾಂ ಡಿಜಿಟಲ್ ಸ್ಕ್ರೀನಾಚ್ಯಾ ಆಪ್ಲ್ಯಾಚ್ ಸಂಸಾರಾಂತ್ ವೆಸ್ತ್ ಜಾಲ್ಯಾಂತ್. ಜೆವ್ಣಾಚಿಂ ಮೆಜಾಂ ಡಿಜಿಟಲ್ ಕೇಂದ್ರಾ ಜಾಲ್ಯಾಂತ್. ಮತ್ ಹೆರಾಂಚ್ಯಾ ಕೃತಕ್ ಸಂಸಾರಾಂತ್ ಭೊಂವ್ತಾನಾ, ಆಪ್ಲ್ಯಾಚ್ ಲಾಗ್ಶಿಲ್ಯಾ ಮೊಗಾಚ್ಯಾ ಮನ್ಶಾಂಚ್ಯಾ ಕಾಳ್ಜಾಚಿ ದೂಖ್ ಆನಿ ಆಶಾ ಕಳಿತ್ ಜಾಯ್ನಾ. ಪ್ರಾಯೆಸ್ತಾಂಯ್ ಎಕ್ಸುರಿಂ ಜಾವ್ನ್ ಮೊಬಾಯ್ಲಾಂತ್ ಮಾಗ್ಣೆಂ, ಶೆರ್ಮಾಂವ್, ಆರಾಧಾನ್ ಆಯ್ಕೊನ್, ಲೈವ್ ಮರ್ಣಾವಿಧಿ ಪಳೆವ್ನ್ ಆಪ್ಲಿಂ ದುಕಾಂ ಪುಸುನ್ ಆಸಾತ್.
ಮೊಂತಿ ಫೆಸ್ತ್ ಆನಿ ಮೊಬಾಯ್ಲಾಕ್ ತಾಚ್ಯಾ ಜಾಗ್ಯಾರ್ ದವರ್ಚೊ ಸೊಲ್ಲೊ
ಹ್ಯಾ ವೊಮ್ತ್ಯಾ ಆಯ್ದನಾಂಚ್ಯಾ ಸಂಸಾರಾಂತ್ ಮೊಂತಿ ಫೆಸ್ತಾಚ್ಯಾ ನೊವೆನಾಚೊ ಆನಿ ಫೆಸ್ತಾಚೊ ಕಾಳ್ ನೀಜ್ ಜಿವಿತ್ ಪರ್ತ್ಯಾನ್ ಆಪ್ಣಾಂವ್ಕ್ ಆಮ್ಕಾಂ ಆಪವ್ಣೆಂ ದಿತಾ. ಮರಿಯೆಚೆಂ ಕಾಳಿಜ್ ಕೆದ್ನಾಂಯ್ ದೆವಾಚ್ಯೆ ಖುಶೆಕ್ ಉಗ್ತೆಂ ಆಸ್ಲ್ಲೆಂ.
ಮೊಬಾಯ್ಲಾಕ್ ತಾಚ್ಯಾ ಜಾಗ್ಯಾರ್ ದವರ್ನ್ ಆಮ್ಚಿಂ ‘ಆಯ್ದಾನಾ’ ದೆವಾಚೆಂ ಆನಿ ಸೃಶ್ಟಿಚೆಂ ಬೆಸಾಂವ್ ಸ್ವೀಕಾರ್ ಕರುಂಕ್ ‘ಉದಾರೆಂ’ ದವರುಂಕ್ ಏಕ್ ಬರೊ ಆವ್ಕಾಸ್.
ಸಂಸಾರಾಂತ್ಲಿ ವ್ಹಡ್ ಸಕ್ತೆವಂತ್ ‘ಸೋಶಿಯಲ್ ನೆಟ್ವರ್ಕ್’ ಆಸಾ ಕುಟಾಮ್ ಆನಿ ದಾಯ್ಜಿಪಣ್. ಸಾಂಗಾತಾ ಜೆಂವ್ಚೆಂ, ಮಾಗ್ಚೆಂ, ಉಲೊಂವ್ಚೆಂ, ಇಲ್ಲೊ ರಾಗ್, ಚಡ್ ಮೋಗ್ ಕರ್ಚೆಂ ಆನಿ ಸಹಜ್ ಬಾಂಧಾಂತ್ ಆಸ್ಚಿಂ ಕುಟ್ಮಾ ಆಮಿಂ ಜಾಂವ್ಚೆಂ. ಹ್ಯಾ ಖಾತಿರ್ ಮೊಬಾಯ್ಲಾಕ್ ಕುಟ್ಮಾ ಜಿಣ್ಯೆಂತ್ ಮೆತೆರ್ ಜಾಂವ್ಕ್ ಬಿಲ್ಕುಲ್ ಸೊಡಿನಾಸ್ತಾ ಕುಟ್ಮಾಚೆಂ, ಮಾಯಾಮೊಗಾಚೆ ಸೆಟ್ಟಿಂಗ್ಸ್ ಸದಾಂಚ್ ಸಾಂಬಾಳ್ತೆಲ್ಯಾಂವ್ ಮ್ಹಣ್ ಘಟ್ ನಿರ್ದಾರ್ ಕರಿಜೆ. ಸ್ಟೀವ್ ಜೋಬ್ಸಾನ್ ಮಾರ್ಕಾಕ್ ದಿಲ್ಲಿ ಸಲಹಾ – ‘ತೆಂಪ್ಲಾಕ್ ವಚ್ ಆನಿ ಡಿಜಿಟಲ್ ಗಲಾಟ್ಯಾಥಾವ್ನ್ ಪಯ್ಸ್ ರಾವ್’ ಆಮಿ ಘೆವ್ಯೆತ್. ನೊವೆನಾಚೆ ನೋವ್ ದೀಸ್, ಭುರ್ಗ್ಯಾಂಚ್ಯೆ ಹಾತಿಂ ಫುಲಾಂ ದಿತಾನಾ, ಸ್ಕ್ರೋಲಿಂಗ್ ಆನಿ ಸ್ಟ್ರೊಲಿಂಗ್ ಸಂಸ್ಕೃತೆಥಾವ್ನ್ ಪುರ್ತೆಂ ಪಯ್ಸ್ ರಾವೊನ್, ಮೊಬಾಯ್ಲಾಕ್ ತಾಚ್ಯಾ ಜಾಗ್ಯಾರ್ ದವರ್ಚೊ ಸೊಲ್ಲೊ ಕರುಂಕ್ ಆಯಿನ್ನ್ ವೇಳ್ ಹೊ. ಫೆಸ್ತಾ ದಿಸಾ ಕುಟ್ಮಾಚೊ ಹೊ ಸೊಲ್ಲೊ ಬರವ್ನ್ ದವರ್ನ್ ಸದಾಂ ವಾಚ್ಲ್ಯಾರ್ ಉಚಾರ್ನ್ ಸಾಂಗ್ಲ್ಯಾರ್, ಆಮ್ಚೊ ನಿರ್ಧಾರ್ ಪಾಳುಂಕ್ ಸಲೀಸ್ ಜಾತಾ. ತೆದ್ನಾ ಜಿವಿತ್ ಬೆಸಾಂವಾಂಚ್ಯಾ ಪಾವ್ಸಾಂತ್ ಭರೊನ್ ವೊಮ್ತೊನ್ ಧಾದೊಸ್ಕಾಯೆಚೆಂ ಜಾತಲೆಂ!
ಆಜ್ ಆಮಿ ಕಿತೆಂ ಪಳೆಜೆ, ಕಿತೆಂ ಆಲೋಚನ್ ಕರಿಜೆ, ಕೊಣಾಚೆರ್ ರಾಗ್ ಧರಿಜೆ, ಕಶೆಂ ಸಂತೊಸ್ ಭೊಗಿಜೆ ಹ್ಯಾ ಸರ್ವ್ ಸಂಗ್ತಿಂಕ್ ಮಾರ್ಗದರ್ಶನ್ ಕರ್ಚೆಂ ಆಮ್ಚ್ಯಾ ಸ್ಕ್ರೀನಾಪಂದ್ಲ್ಯಾ ಅಲ್ಗೊರಿದಮಾನ್.
ಆಂಡ್ರ್ಯೂ ಎಲ್ ಡಿ ಕೂನ್ಹಾ
