`ಮರಿ ಕ್ರಿಸ್ತಾಂವಾಂಚೊ ಆಧಾರ್’ ಮ್ಹಳ್ಳೆಂ ಬಿರುದ್ ಪವಿತ್ರ್ ಪುಸ್ತಕಾಂತ್ ಆಮ್ಕಾಂ ಪಳೆಂವ್ಕ್ ಮೆಳನಾ ತರೀ, ಇಗರ್ಜ್‌ಮಾತೆಚ್ಯಾ ಸಂಪ್ರದಾಯಾಂತ್ ಹಾಚಿಂ ಸಾಳಾಂ ಪಾಳಾಂ ಆಸಾತ್ ಮ್ಹಳ್ಳೆಂ ಸತ್. ಇಗರ್ಜ್‌ಮಾತೆಚ್ಯಾ ಸುರ್‍ವೇರ್ ಥಾವ್ನ್‌ಚ್ ಮರಿಯೆಚ್ಯೆ ವಿನವ್ಣೆಕ್ ಆನಿ ತಿಚ್ಯಾ ಆವಯ್ಪಣಾಕ್ ವರ್ತೆಂ ಸ್ಥಾನ್ ಆಸ್‌ಲ್ಲೆಂ. ಸಗ್ಳ್ಯೆ ದೇವ್‌ಪರ್ಜೆಚಿ ಆವಯ್ ತಿ ಮ್ಹಳ್ಳಿ ಸಮ್ಜಣಿ ಆಸ್‌ಲ್ಲಿ ಆಸ್ತಾಂ ಚೊವ್ತ್ಯಾ ಶೆಕ್ಡ್ಯಾಂತ್ ಸಾಂ. ಜುವಾಂವ್ ಕ್ರಿಸೊಸ್ತೊಮಾನ್ ಪಯ್ಲೆಪಾವ್ಟಿಂ ಮರಿಯೆಕ್ `ಕ್ರಿಸ್ತಾವಾಂಚ್ಯಾ ಆಧಾರಾ’ ಮ್ಹಣ್ ಉಲೊ ಕೆಲ್ಲೊ ಉಲ್ಲೇಖ್ ಆಸಾ. ೧೬ ವ್ಯಾ ಶೆಕ್ಡ್ಯಾಂತ್, ೧೫೭೧ ವ್ಯೆ ಇಸ್ವೆಂತ್ ಜಾಲ್ಲ್ಯಾ ಲೆಪಾಂತೊ ಝುಜಾಂತ್, ಕ್ರಿಸ್ತಾಂವ್ ಫೊವ್ಜ್ ಮರಿಯೆಚ್ಯೆ ವಿನವ್ಣೆನ್ ಜೆದ್ನಾಂ ಜಯ್ತೆವಂತ್ ಜಾಲಿ, ತೆದ್ನಾಂ ಪಾಪಾ ಪಿಯುಸ್ ಪಾಂಚ್ವ್ಯಾನ್ ಹೆಂ ಬಿರುದ್ ಮರಿಯೆಚ್ಯೆ ಲದಿನೆಂತ್ ಮೆಳಯ್ಲೆಂ. ಹಾಚ್ಯಾ ಉಪ್ರಾಂತ್ `ಮರಿ ಕ್ರಿಸ್ತಾಂವಾಂಚೊ ಆಧಾರ್’ ಮ್ಹಳ್ಳೆಂ ಬಿರುದ್ ಲೊಕಾಮೊಗಾಳ್ ಜಾಲೆಂ.

ಲೆಪಾಂತೊ ಝುಜಾಂತ್ ಕಿತೆಂ ಘಡ್ಲೆಂ?

ಸೊಳಾವ್ಯಾ ಶೆಕ್ಡ್ಯಾಂತ್ ಒಟ್ಟೊಮಾನಾಚ್ಯಾ ತುರ್ಕಾಂಥಾವ್ನ್ ಕ್ರಿಸ್ತಾಂವ್ ಸಂಸಾರಾಕ್ ವ್ಹಡ್ ಸಂಕಟ್ ಆಯಿಲ್ಲೆಂ. ತ್ಯಾ ವೆಳಾರ್ ಪಾಪಾ ಪಿಯುಸ್ ಪಾಂಚ್ವ್ಯಾನ್ ಮರಿಯೆಚೊ ಆಧಾರ್ ಮಾಗೊನ್ ಖಳಾನಾಸ್ತಾನಾ ತೆರ್ಸಾಚೆಂ ಭಕ್ತಿಪಣ್ ಆಧಾರುಂಕ್ ಉಲೊ ದಿಲೊ. ಹಾಕಾ ಲಾಗೊನ್ ಬಳಾಧಿಕ್ ತುರ್ಕಾಂಮುಕಾರ್ ಬೊವ್ ಆಲ್ಬಿ ಆಸ್‌ಲ್ಲ್ಯೆ ಕ್ರಿಸ್ತಾಂವ್ ಫೊವ್ಜೆನ್ ಮರಿಯೆಚ್ಯೆ ಮಜತೆನ್ ಅಜ್ಯಾಪಾಂನಿ ಜಯ್ತ್ ಆಪ್ಣಾಯ್ಲೆಂ.

ಫೆಸ್ತ್ ಕೆದಾಳಾ?

ಲೆಪಾಂತೊ ಝುಜಾ ಉಪ್ರಾಂತ್ ಮರಿಯೆಕ್ ತೆಂ ಬಿರುದ್ ದಿಲ್ಲೆಂ ಆನಿ ಲದಿನೆಂತ್ ಮೆಳಯಿಲ್ಲೆಂ ಮಾತ್ರ್ ಶಿವಾಯ್ ವಿಶೇಸ್ ಫೆಸ್ತಾಚೊ ದೀಸ್ ನಮಿಯಾರುಂಕ್ ನಾತ್‌ಲ್ಲೊ. ೧೮೦೯ ಥಾವ್ನ್ ೧೮೧೪ ಪರ್ಯಾಂತ್ ಪಾಪಾ ಪಿಯುಸ್ ಸಾತ್ವ್ಯಾಕ್, ತವಳ್ ಫ್ರಾನ್ಸಾಚೊ ರಾಯ್ ಜಾವ್ನಾಸ್‌ಲ್ಲ್ಯಾ ನೆಪೋಲಿಯಾನಾನ್ ಬಂದೆಂತ್ ಘಾಲ್ಲೊ. ತಾಚ್ಯೆ ಸುಟ್ಕೆ ಉಪ್ರಾಂತ್, ಮರಿಯೆಚ್ಯಾ ಆಧಾರಾನ್ ಆಪುಣ್ ಬಂದೆಂತ್ಲೊ ಸುಟ್ಲೊಂ ಮ್ಹಣ್ ಸಾಂಗೊನ್ ತ್ಯಾಚ್ ಪಾಪಾನ್ ೧೮೧೫ ಇಸ್ವೆಚ್ಯಾ ಮಾಯ್ ೨೪ ವೆರ್ `ಮರಿ ಕ್ರಿಸ್ತಾಂವಾಂಚೊ ಆಧಾರ್’ ಫೆಸ್ತಾಚೊ ದೀಸ್ ಠರಾಯ್ಲೊ. ವಿಶೇಸ್ ಜಾವ್ನ್ ಸಲೇಶಿಯನ್ ಮೆಳಾಚೆ ಯಾಜಕ್ ಆನಿ ಧರ್ಮ್ ಭಯ್ಣಿ ಹೆಂ ಫೆಸ್ತ್ ವ್ಹಡಾ ದಬಾಜಾನ್ ಸಂಭ್ರಮ್ತಾತ್.

ಇಗರ್ಜ್‌ಮಾತೆಕ್ ಆಧಾರ್ ದಿಂವ್ಚ್ಯಾಂತ್ ಮರಿಯೆಚೊ ಪಾತ್ರ್ ಕಿತೆಂ?

೧. ಜೆಜುನ್ ಖುರ್‍ಸಾರ್ ಥಾವ್ನ್‌ಚ್ ಮರಿಯೆಕ್ ಆಮ್ಚಿ ಆವಯ್ ಜಾವ್ನ್ ದಿಲ್ಯಾ (ಜುವಾಂವ್ ೧೯:೨೬-೨೭). ಹೆಂಚ್ ಮುಕಾರುನ್ ಪೆಂತೆಕೊಸ್ತಾ ದಿಸಾ ಸೆನೆಕ್ಲಾಂತ್ ಪವಿತ್ರ್ ಅತ್ಮೊ ದೆಂವ್ತಾನಾ ಆಪೊಸ್ತಲಾಂ ಸಾಂಗಾತಾ ತಿ ಆಸ್‌ಲ್ಲಿ (ಧ.ಕೃ. ೧:೧೪). ಮ್ಹಳ್ಯಾರ್ ಇಗರ್ಜ್‌ಮಾತೆಚ್ಯಾ ಜಲ್ಮಾಪಯ್ಲೆಂಚ್ ಮರಿಯೆನ್ ಆಪ್ಲ್ಯಾ ಆವಯ್ಪಣಾಚೆಂ ಸುಂಕಾಣ್ ಹಾತಿಂ ಘೆತ್‌ಲ್ಲೆಂ.

೨. ಲುಮೆನ್ ಜೆಂತ್ಸಿಯುಮ್, ದುಸ್ರ್ಯೆ ವಾತಿಕನ್ ಮ್ಹಾಸಭೆಚೆಂ ದಸ್ತಾವೇಜ್, ಶಿಕಯ್ತಾ ಕೀ: “ಮರಿ ಆಪ್ಲ್ಯಾ ಆವಯ್ಪಣಾಚ್ಯಾ ಮೊಗಾನ್ ಆಪ್ಲ್ಯಾ ಪುತಾಚ್ಯಾ ಭಾಂವ್ಡಾಂಚೊ ಪೋಸ್ ಕರ್‍ತಾ” (LG ೬೨). ತೊ ತಿಚೊ ಮೋಗ್ ಇತಿಹಾಸಾಂತ್ ಜಲ್ಮೊನ್ ಗೆಲ್ಲ್ಯಾ ಜೆಜುಕ್ ಮಾತ್ರ್ ಸೀಮಿತ್ ಜಾಲ್ಲೊ ನ್ಹಯ್, ಬಗಾರ್ ತಾಚ್ಯೆ ಮಿಸ್ತಿಕ್ ಕುಡಿಕ್ ಮ್ಹಣ್ಜೆ ಇಗರ್ಜ್‌ಮಾತೆಕ್ ತಗ್ತಾ ತಸಲೊ.

೩. ಇಗರ್ಜ್‌ಮಾತೆಚೆ ಬಾಪ್ ಸಾಂ. ಇರೆನಿಯುಸ್ ಆನಿ ಸಾಂ. ಅಂಬ್ರೊಜ್, ಹಾಣಿಂ ಮರಿಯೆಕ್ `ನವಿ ಏವ್’ ಮ್ಹಣ್ ವೊಲಾಯ್ಲಾಂ. ಕಿತ್ಯಾಕ್ ಪಯ್ಲ್ಯೆ ಎವೆಚ್ಯಾ ಅವಿಧೇಯ್ಪಣಾಕ್ ಲಾಗೊನ್ ಪಾತ್ಕಾಂತ್ ಪಡ್ಲಲ್ಯಾ ಸಂಸಾರಾಕ್ ನವಿ ಏವ್ ಆಪ್ಣಾಚ್ಯಾ ವಿಧೇಯ್ಪಣಾನ್ ಸಾಲ್ವಾಸಾಂವ್ ಹಾಡ್ಚೆಂ ಹಾತೆರ್ ಜಾತಾ.

ಸಂದಿಗ್ದ್ ಪರಿಸ್ಥಿತೆಂತ್ ಮರಿ ಕಶಿ ಆಧಾರಾಚಿ ಜಾಲ್ಯಾ?

ಇತಿಹಾಸಾಚಿಂ ಪಾನಾಂ ಪರ್‍ತುಂಕ್ ಗೆಲ್ಯಾರ್ ಹರ್‍ಯೆಕಾ ಗರ್ಜೆ- ಆಕಾಂತಾಂತ್ ಮರಿಯೆಚೊ ಆಧಾರ್ ಮಾಗ್ಚೊ ಇಗರ್ಜ್‌ಮಾತೆಕ್ ಸವೆಯೆಚೊ ಜಾಲಾ ತೆಂ ಆಮ್ಕಾಂ ಪಳೆಂವ್ಕ್ ಮೆಳ್ತಾ. ಝುಜ್, ಮಾರಿಚಿ ಪಿಡಾ, ದಗ್ಧವ್ಣಿ ವಾ ವಯಕ್ತಿಕ್ ಸಂಧಿಗ್ದಾಂನಿ ಮರಿಯೆಚೊ ಆಧಾರ್ ಭಕ್ತಿಕಾಂನಿ ಮಾಗ್ಲಾ ಆನಿ ತಾಂಕಾಂ ಉಪ್ಕಾರ್ ಮೆಳ್ಳ್ಯಾತ್. ಲೂರ್ಡ್ಸ್, ಫಾತಿಮಾ, ಗ್ವಾದಲುಪೆ, ಮೆಜುಗೊರಿ, ವೆಲಾಂಗಣಿ ಅಸಲ್ಯಾ ಜಾಗ್ಯಾಂನಿ ದಿಶ್ಟಿಕ್ ಪಡೊನ್ ಆಪುಣ್ ಆಪ್ಲ್ಯಾ ಭುರ್ಗ್ಯಾಂಕ್ ಲಾಗಿಂ ಆಸಾಂ ಆನಿ ಖರ್‍ಯಾನ್ ಆಧಾರ್ ದಿತಾಂ ಮ್ಹಣ್ ಮರಿಯೆನ್‌ಚ್ ಖುದ್ದ್ ರುಜು ಕರ್‍ನ್ ದಾಕಯ್ಲಾಂ.

ಮರಿ ಕಶಿ ಮದ್ಯಸ್ತಿಣ್?

ಇಸ್ರಾಯೆಲಾಚ್ಯಾ ರಾಯಾಂಚ್ಯಾ ಸಂಪ್ರದಾಯಾಂತ್, ರಾಯಾಂಚ್ಯೆ ಆವಯ್ಕ್ ವರ್ತೊ ಮಾನ್ ಆಸ್‌ಲ್ಲೊ. ಹಾಚೊ ಉಲ್ಲೇಖ್ ಆಮ್ಕಾಂ ರಾಯಾಂಚ್ಯಾ ಪಯ್ಲ್ಯಾ ಪುಸ್ತಕಾಂತ್ ಪಳೆಂವ್ಕ್ ಮೆಳ್ತಾ. ರಾಯ್ಪಣಾಚೊ ಪಾಟ್ ಚುಕ್‌ಲ್ಲ್ಯಾ ವಗ್ತಾ ಸಾಲ್ಮಾಂವ್ ರಾಯಾಲಾಗಿಂ ಉಪ್ಕಾರ್ ಮಾಗೊಂಕ್ ಅದೋನಿಯಾ, ಸಾಲ್ಮಾಂವ್ಚಿ ಆವಯ್ ಬೆತ್‌ಶೆಬಾಲಾಗಿಂ ಆಡ್ದೊಸ್ ಮಾಗ್ತಾ ಆನಿ ಬೆತ್‌ಶೆಬಾ ಅದೊನಿಯಾ ತರ್ಫೆನ್ ಸಾಲ್ಮಾಂವ್ ರಾಯಾಲಾಗಿಂ ವಿನತಿ ಕರ್‍ತಾ (೧ ರಾಯ್ ೨:೧೬-೨೧). ಅಶೆಂಚ್ ಮರಿಯೆನ್ ಕಾನಾ ಶ್ಹೆರಾಚ್ಯಾ ಲಗ್ನಾಂತ್ (ಜುವಾಂವ್ ೨:೧-೧೧) ಜೆಜುಲಾಗಿಂ ಉಪ್ಕಾರ್ ಮಾಗ್‌ಲ್ಲೊ. ಆಜೂನ್ ಮರಿ ಅಶೆಂಚ್ ಆಪ್ಣಾಚ್ಯಾ ಭುರ್ಗ್ಯಾಂಪಾಸತ್ ಆಪ್ಲ್ಯಾ ಪುತಾಲಾಗಿಂ ನಿರಂತರಿ ವಿನತಿ ಕರ್‍ತಾ ಮ್ಹಣ್ ಇಗರ್ಜ್‌ಮಾತಾ ಪಾತ್ಯೆತಾ. “ಮರಿಯೆಚಿ ಮದ್ಯಸ್ತಿ ಆಮ್ಕಾಂ ಸಾಸ್ಣಾಚ್ಯಾ ಜಿವಿತಾಚಿಂ ದೆಣಿಂ ಹಾಡ್ತಾ” (CCC ೯೬೯) ಮ್ಹಣ್ ಕಥೊಲಿಕ್ ಪವಿತ್ರ್ ಸಭೆಚಿ ಶಿಕೊವ್ಣ್ ಹೆಂ ಥಿರ್ ಕರ್‍ತಾ. ತಿಚೊ ಆಧಾರ್ ಆಮ್ಕಾಂ ಜೆಜುಚೆರ್ ಕೇಂದ್ರಿತ್ ಆಸೊನ್ ಆಮ್ಕಾಂ ತಿಚ್ಯಾ ಪುತಾಲಾಗಿಂ ಹಾಡ್ತಾ.

ಸಮಾಪ್ತ್

ಮರಿ ಕ್ರಿಸ್ತಾಂವಾಚೊ ಆಧಾರ್ ಹೆಂ ಬಿರುದ್, ತಿಚ್ಯಾ ಹೆರ್ ಸಬಾರ್ ಬಿರುದಾಂಬರಿ ಇಗರ್ಜ್‌ಮಾತೆಂತ್ ಅಥ್ವೆಂಚ್ ಸ್ಥಾನ್ ಘೆತಾ. ಹೆಂ ಬಿರುದ್ ಇತಿಹಾಸಾಂತ್ ರೊಂಬೊನ್ ಆಸೊನ್, ಇಗರ್ಜ್‌ಮಾತೆನ್ ಒಳ್ಕೊನ್ ಘೆವ್ನ್, ವಯಕ್ತಿಕ್ ಭಕ್ತಿಪಣಾನ್ ಫುಲ್ಲಾಂ. ಹ್ಯಾ ನಾಂವಾಖಾಲ್ ಮರಿ ಆಮ್ಚಿ ಆವಯ್ ಮಾತ್ರ್ ನ್ಹಯ್, ತಿ ಆಮ್ಚಿ ಮದ್ಯಸ್ತಿಣ್ ಆನಿ ಭಾವಾಡ್ತ್ಯಾಂಚಿ ರಾಕೊಣ್ದಾರ್ ಮ್ಹಣ್ ಥಿರ್ ಜಾಲಾಂ. ತಿಚೊ ಆಧಾರ್ ಆಮ್ಕಾಂ ಕ್ರೀಸ್ತಾಚ್ಯೆ ಕುರ್ಪೆಚ್ಯಾ ಬದ್ಲಾಕ್ ಆಸ್ಚೊ ನ್ಹಯ್; ಬಗಾರ್ ಸೊಮಿಯಾಚಿ ಕುರ್ಪಾ ಆಮ್ಚೆಥಂಯ್ ವ್ಹಾಳೊಂಕ್ ಏಕ್ ವಾಟ್ ಜಾತಾ. ಆಮ್ಚ್ಯಾ ಭೊಂವಾರಿಂ ಝುಜಾಚಿಂ ಕಾಳಿಂ ಮೊಡಾಂ ಮಾಂಡ್ಲ್ಯಾಂತ್ ಆಸ್ತಾಂ, ಸಂಸಾರ್ ನವ್ಯಾ ಪಂಥಾಹ್ವಾನಾಂಕ್ ಫುಡ್ ಕರುಂಕ್ ಮುಕಾರ್ ಸರ್‍ಲಾ ಆಸ್ತಾಂ ಕಾನಾ ಶ್ಹೆರಾಚ್ಯಾ ಲಗ್ನಾಂತ್ ಮ್ಹಳ್ಳಿಂ ತಿಂಚ್ ಉತ್ರಾಂ ಪರತ್ ಮರಿ ಆಮ್ಕಾಂ ಸಾಂಗ್ತಾಂ: “ತೊ ಕಿತೆಂ ಸಾಂಗ್ತಾ ತೆಂ ತುಮಿ ಕರಾ” (ಜುವಾಂವ್ ೨:೫).

ಫ್ರಾದ್ ಆರನ್ ಬಬುಶ್, ಕಾರ್ಮೆಲಿತ್