ಜೆಜುಚೆಂ ಜಿವಂತ್ಪಣ್ ಆಮ್ಚ್ಯಾ ಭಾವಾಡ್ತಾಚಿ ಬುನ್ಯಾದ್ ಆನಿ ಕ್ರಿಸ್ತಾಂವ್ ಧರ್ಮಾಚ್ಯಾ ಉಗಮಾಚೆಂ ಕೇಂದ್ರ್. “ಆಲ್ಲೆಲೂಯಾ, ಜೆಜು ಜಿವಂತ್ ಜಾಲಾ, ತೊ ಮರಣ್ ಜಿಕ್ಲಾ” ಮ್ಹಣ್ ಆಮಿ ಸಂತೊಸಾನ್ ಗಾಯ್ತಾಂವ್. ಹೊ ಆಮ್ಕಾಂ ಕಳಿತ್ ಆಸ್‌ಲ್ಲೊ, ಸಗ್ಳ್ಯಾ ಪಾಸ್ಕಾಂ ಕಾಳಾರ್ ಆಮಿ ಲಿತುರ್ಜೆಂತ್ ನಿಯಾಳ್ ಕರ್‍ಚೆತಸಲೊ ಆನಿ ಆಮಿ ಶಿಕೊನ್ ಆಯಿಲ್ಲೊ ಭಾವಾಡ್ತ್ ದೆಕುನ್ ಆಮ್ಕಾಂ ತೊ ಪಾತ್ಯೆಂವ್ಕ್ ಕಶ್ಟ್ ಭೊಗಾನಾಂತ್. ಪುಣ್ ಜೆಜುಚ್ಯಾ ಪಯ್ಲ್ಯಾ ಪಾಟ್ಲಾವ್ದಾರಾಂಭಾಶೆನ್ ವಾ ಜಿವಂತ್ಪಣಾವಿಶ್ಯಾಂತ್ ಪಯ್ಲೆಪಾವ್ಟಿಂ ಆಯ್ಕೊಂಚ್ಯಾ ವೆಕ್ತಿಭಾಶೆನ್ ಆಮಿ ಜೆಜುಚೆಂ ಜಿವಂತ್ಪಣ್ ಪಳೆಲೆಂ ತರ್, ಏಕ್ ರಾಸ್ ಸವಾಲಾಂ ಆಮ್ಚ್ಯೆ ಮತಿಂತ್ ಯೆತಿತ್ ಆನಿ ಜಾಯ್ತೆ ದುಬಾವ್ ಉಟ್ತಿತ್.

ನಿಮಾಣ್ಯಾ ಸುಕ್ರಾರಾ ಆನಿ ಜಿವಂತ್ಪಣಾಚ್ಯಾ ಆಯ್ತಾರಾ ಮದ್ಲ್ಯಾ ಸನ್ವಾರಾ ಕಿತೆಂ ಘಡ್ಲೆಂ?

ಜೊ ಕಿತೆಂ ಆಮಿ ಆಲ್ಲೆಲೂಯಾಚೊ ಸನ್ವಾರ್ ಮ್ಹಣ್ತಾಂವ್, ತ್ಯಾ ದಿಸಾ ಕಿತೆಂ ಕರ್‍ಚೆಂ ಮ್ಹಣ್ ಆಮ್ಕಾಂ ಚಡಾವತ್ ಜಣಾಂಕ್ ಕಳಿತ್ ನಾ. ತ್ಯಾ ದಿಸಾ ಮೀಸ್ ನಾ, ಇಗರ್ಜೆಚ್ಯೊ ಘಾಂಟಿ ವ್ಹಾಜನಾಂತ್, ಲಿತುರ್ಜಿಕ್ ಸಂಭ್ರಮ್ ನಾ. ಸಗ್ಳೆಂ ಮಾವ್ನ್. ಹಾಂವ್ ಲ್ಹಾನ್ ಆಸ್ತಾನಾ ಮ್ಹಜ್ಯೆ ದೊತೊರ್ನಿಚ್ಯಾ ಟಿಚೆರಿಲಾಗಿಂ ವಿಚಾರ್‌ಲ್ಲ್ಯಾ ವೆಳಾರ್ ತಿಣೆಂ ಮ್ಹಾಕಾ ಜಾಪ್ ದಿಲ್ಲಿ: “ಆಜ್ ಜೆಜು ಮೆಲಾ, ದೆಕುನ್ ಮಾಗೊಂಕ್ ನಾ!.” ಜಾಂವ್ಕ್ ಪುರೊ ತಿಕಾಚ್ ಹ್ಯಾ ದಿಸಾ ಕಿತೆಂ ಕರ್‍ಚೆಂ ಮ್ಹಣ್ ಕಳಿತ್ ನಾತ್‌ಲ್ಲೆಂ ವಾ ೭-೮ ವರ್‍ಸಾಂಚ್ಯಾ ಭುರ್ಗ್ಯಾಕ್ ಹೊ ಮಿಸ್ತೆರ್ ಕಸೊ ವಿವರ್‍ಸುಂಚೊ ಮ್ಹಳ್ಳೆಂ ತಿಕಾ ಕಳ್ಳೆಂನಾ ಜಾವ್ಯೆತ್.

ಸುಕ್ರಾರಾಚ್ಯಾ ದನ್ಪಾರಾಂ ಚಡುಣೆಂ ೩ ವೊರಾರ್ ಜೆಜುನ್ ಪ್ರಾಣ್ ಸೊಡ್ಲೊ ಆನಿ ಆಯ್ತಾರಾ ಫಾಂತ್ಯಾರ್ ಜೆಜು ಜಿವಂತ್ ಜಾಲೊ; ಮ್ಹಣ್ಜೆ ಚಡುಣೆಂ ೩೬ ವೊರಾಂಚೊ ವೇಳ್ ಕಿತೆಂ ಘಡ್ಲೆಂ ಮ್ಹಣ್ ರೂಪ್ ರೂಪ್ ಪಳೆಲ್ಲೊ ಕೊಣೀ ನಾ ಆನಿ ವಾಂಜೆಲಾಂತ್‌ಯೀ ಹ್ಯಾ ವಿಶಿಂ ಕಾಂಯ್ಚ್ ಉಲ್ಲೇಖ್ ನಾ. ಪುಣ್ ದೋನ್ ಸಂಗ್ತಿ ಆಮ್ಚೆಮುಕಾರ್ ಆಸಾತ್; ಜೆಜುನ್ ಉಜ್ವ್ಯೆ ಕುಶಿಚ್ಯಾ ಚೊರಾಕ್ ಮ್ಹಳ್ಳಿಂ ಉತ್ರಾಂ: “ಆಜ್‌ಚ್ ತುಂ ಮ್ಹಜೆಸಾಂಗಾತಾ ವೈಕುಂಟಾಂತ್ ಆಸ್ತಲೊಯ್” (ಲೂಕ್ ೨೩:೩೪) ಆನಿ ಆಪೊಸ್ತಲಾಂಥಾವ್ನ್ ದೆಂವೊನ್ ಆಯಿಲ್ಲೆಂ, ಸತ್ಮಾನ್ತಾಂ ಮಾಗ್ಳ್ಯಾಂತ್ ಆಮಿ ಮ್ಹಣ್ಚೆಂ ಸತ್- “ತೊ ಮೆಲ್ಲ್ಯಾಂಮದೆಂ ದೆಂವ್ಲೊ.” ಹ್ಯೊ ದೊನೀ ವೊಳಿ ಇಗರ್ಜ್‌ಮಾತಾ ಸಾಂಗಾತಾ ವಾಚ್ತಾ.

ಪಯ್ಲ್ಯಾನ್ ಪಯ್ಲೆಂ ಆಮಿ ಸಮ್ಜಜೆ ಜಾಲ್ಲಿ ಸಂಗತ್ ಕಿತೆಂಗೀ ಮ್ಹಳ್ಯಾರ್, ಸಂಸಾರಾಚೊ ವೇಳ್ (Chronos) ಆನಿ ದೆವಾಚೊ ವೇಳ್ (Kairos) ಎಕ್‌ಚ್ ನ್ಹಯ್. Chronos ಮ್ಹಳ್ಯಾರ್ ದೊನಾ ಉಪ್ರಾಂತ್ ತೀನ್, ತಿನಾ ಉಪ್ರಾಂತ್ ಚ್ಯಾರ್ ಅಶೆಂ ಆಮ್ಚೊ ವೇಳ್. ಪುಣ್ Kairos ಮ್ಹಳ್ಯಾರ್ ಮಿಲಿಯಾ ಬಿಲಿಯಾ ವರ್‍ಸಾಂ ಮುಕಾರ್ ಪಾಟಿಂ ಆಡ್ ಉಬಿಂ ಕಶೆಂಯ್ ವಚ್ಯೆತ್ ಜಾಲ್ಲೊ ದೆವಾಚೊ ‘ನೆಮ್ಲಲೊ ಕಾಳ್’. ಹ್ಯಾ ಪಾಟ್‌ಥಳಾರ್ ಆಮಿ ಹ್ಯೊ ದೊನೀ ಸಂಗ್ತಿ ಸಮ್ಜೊಂಕ್ ಪ್ರಯತನ್ ಕೆಲ್ಯಾರ್, ಪ್ರಾಣ್ ಸೊಡ್‌ಲ್ಲ್ಯೆ ತ್ಯೆ ಘಡಿಯೆ ಮನ್ಶಾ ಸಂಯ್ಬಾಥಾವ್ನ್ ಮುಕ್ತ್ ಜಾವ್ನ್ ಜೆಜು ಆಪ್ಣಾಚ್ಯಾ ದೇವ್ ಸಂಯ್ಬಾಂತ್ ಮಾತ್ರ್ ಆಸ್‌ಲ್ಲ್ಯಾ ನಿಮ್ತಿಂ ಎಕೆಚ್ ಘಡಿಯೆ ತ್ಯಾ ಚೊರಾಕ್ ಭಾಸಾಯಿಲ್ಲೆಬರಿ ಸರ್ಗಾರ್ ಆಸೊಂಕ್ ಆನಿ ಸಾಂಗಾತಾಚ್ ಎದೊಳ್‌ಚ್ ಮರಣ್ ಪಾವ್‌ಲ್ಲ್ಯಾಂಕ್ ಸೊಡೊಂವ್ಚ್ಯಾಕ್ ‘ಮೆಲ್ಲ್ಯಾಂಚ್ಯಾ ವಾ ವಿಶೆವಾಚ್ಯಾ ಸಂಸಾರಾಂತ್’ ಆಸೊನ್ ತಾಂಕಾಂ ಸುಟ್ಕಾ ದೀಂವ್ಕ್ ತಾಕಾ ಸಾಧ್ ಆಸಾ ಮ್ಹಣ್ ಆಮಿ ಸಮ್ಜೊವ್ಯೆತ್. ಸಂಸಾರಾಚ್ಯಾ ಜಾಗ್ಯಾ ಆನಿ ವೆಳಾಚ್ಯಾ ವರ್ತುಲಾಚ್ಯೆ ಬಂದಡೆಭಾಯ್ರ್ ಆಸ್‌ಲ್ಲ್ಯಾ ‘ದೆವಾಚ್ಯಾ ಪುತಾಕ್’ Kairos ವೆಳಾರ್ ಹೆಂ ಕರುಂಕ್ ಅಸಾಧ್ ನ್ಹಯ್.

ತ್ಯಾಚ್ ವೆಳಾರ್ ಆಪ್ಲ್ಯಾ ಮೆಸ್ತ್ರಿಚೆಂ ಅಕ್ಮಾನಾಚೆಂ ಆನಿ ಹಿಂಸಾತ್ಮಕ್ ಮರಣ್ ಪಳಯಿಲ್ಲ್ಯಾ ತಾಚ್ಯಾ ಶಿಸಾಂಚಿ ಅವಸ್ಥಾ ವೆಗ್ಳಿಚ್. ತ್ಯಾ ಮದ್ಲ್ಯಾ ದಿಸಾ ಮ್ಹಣ್ಜೆ ಸನ್ವಾರಾ ತಾಂಚೆ ತಳ್ಮಳೆ, ಆಕ್ಲಾಸ್, ಭ್ಯೆಂ, ಮಾವ್ನ್ ಹೆಂ ಸಗ್ಳೆಂ ವರ್ಣುಂಕ್ ಜಾಯ್ನಾ ತಸಲೊ ಧಕೊಚ್ಚ್ ಸಯ್. ತಾಚ್ಯಾ ವಯ್ಲ್ಯಾನ್ ತೊ ದೀಸ್ ಸಾಬ್ಬಾತಾಚೊ. ಮುಕಾರ್ ಕಿತೆಂ ಕಳಿತ್ ನಾ, ಭಾಯ್ರ್ ವಚೊಂಕ್ ನಾ, ಕಾಂಯ್ ಕರ್‍ಚೆಬರಿ ನಾ, ಆಪ್ಣಾಕ್‌ಯೀ ಲಗಡ್ ಕಾಡ್ತಲೆ ಮ್ಹಳ್ಳೆಂ ಭ್ಯೆಂ, ತಾಂಚಿಂ ಸಪ್ಣಾಂ, ತಾಂಚೊ ಭರ್ವಸೊ ಸಗ್ಳೆಂ ಕೊಸ್ಳೊನ್ ಪಡ್‌ಲ್ಲೊ ವೇಳ್. ಆಯ್ಚ್ಯಾ ಮನಾಶಾಸ್ತಿರಾಪ್ರಕಾರ್ ಸಮ್ಜೊಂಚೆಂ ಜಾಲ್ಯಾರ್ anxiety, stress, distress, crisis, shock, depression ಹೆಂ ಸಗ್ಳೆಂ ಸಾಂಗಾತಾ ಆಯ್ಲ್ಯಾರ್ ಕಶೆಂ ಆಸ್ತಾ ತಸಲಿ ಪರಿಗತ್! ಸಗ್ಳೆಂ ಸಂಪ್ಲೆಂ, ಆನಿ ಕಾಂಯ್ ಉರೊಂಕ್ ನಾ, ದೇವ್‌ಚ್ ನಾ ಮ್ಹಳ್ಳ್ಯಾ ಎಕಾ ಹಂತಾಕ್ ಎಕಾ ಸಾದ್ಯಾ ಮನ್ಶಾನ್ ಪಾಂವ್ಚೆತಸಲಿ ಸ್ಥಿತಿ! ಪವಿತ್ರ್ ಸನ್ವಾರ್ ಆಮ್ಕಾಂ ಶಿಕಯ್ತಾ ಕೀ, ಭಾವಾಡ್ತ್ ವಾಡ್ಚೊಚ್ ಅಸಲ್ಯೆ ಪರಿಗತೆಂತ್; ಜಾಪಿ ನಾತ್‌ಲ್ಲ್ಯಾ ಮಾವ್ನಾಂತ್, ಕಿತೆಂಚ್ ಉಗ್ತಾಡಾಕ್ ಹಾಡಿನಾತ್‌ಲ್ಲ್ಯೆ ದಿಶ್ಟಿಂತ್, ದೊಳ್ಯಾಂಕ್ ಬೊಟಾಂ ಘಾಲ್ಯಾರೀ ದಿಸಾನಾತ್‌ಲ್ಲ್ಯಾ ಕಾಳೊಕಾಂತ್!

ಮೆಲ್ಲ್ಯಾಂತ್ಲೊ ಜಿವಂತ್ ಜಾಲೊ ಮ್ಹಳ್ಯಾರ್ ಕಿತೆಂ?

ಲಾಜಾರಾಕ್ ಜಿವಂತ್ ಉಟಯಿಲ್ಲೆಂ ಆನಿ ಜೆಜುನ್ ಜಿವಂತ್ ಜಾಲ್ಲೆಂ ಎಕ್‌ಚ್ ನ್ಹಯ್. ಜಿವಂತ್ ಉಟಯಿಲ್ಲೊ ಲಾಜರ್ ಪರತ್ ಮೆಲೊ. ಪುಣ್ ಜೆಜು ಜಿವಂತ್ ಜಾಲ್ಲೊ ಆಪ್ಲೆಸ್ತಕಿಂ. ತೊಚ್ ಮ್ಹಣ್ತಾ: “ಮ್ಹಜೊ ಜೀವ್ ಪರ್ತ್ಯಾನ್ ಜೊಡ್ಚೆಖಾತಿರ್ ಹಾಂವ್ ತೊ ಒಪುನ್ ದಿತಾಂ. ಮ್ಹಜ್ಯೆ ಸ್ವಂತ್ ಖುಶೆನ್ ಹಾಂವ್ ತೊ ದಿತಾಂ. ತೊ ದೀಂವ್ಕ್ ಆನಿ ಪರ್ತ್ಯಾನ್ ಪಾಟಿಂ ಘೆಂವ್ಕ್‌ಯೀ ಮ್ಹಾಕಾ ಅಧಿಕಾರ್ ಆಸಾ” (ಜುವಾ ೧೦: ೧೭-೧೮). ಲಾಜರ್ ತಾಚ್ಯಾ ಮಾಸಾ-ರಗ್ತಾನ್ ಉಟ್ಲೊ ಆನಿ ಸಾಮಾನ್ಯ್ ಮನಿಸ್‌ಚ್ ಜಾವ್ನ್ ಆಸ್‌ಲ್ಲೊ. ಪುಣ್ ಜೆಜುಚಿ ಕೂಡ್ ವೆಗ್ಳ್ಯೆಚ್ಚ್ ರಿತಿಚಿ. ಮಾಗ್ದಾಲಾಚ್ಯಾ ಮರಿಯೆನ್ ತೊ ತೊಟಾಮಾಲಿ ಆಸ್ಯೆತ್ ಮ್ಹಣ್ ಚಿಂತ್ಲೆಂ, ಎಮ್ಮಾವ್ಸಾಚ್ಯೆ ವಾಟೆರ್ ಶಿಸಾಂಕ್ ತಾಚಿ ಒಳೊಕ್ ಮೆಳ್ಳಿನಾ, ಶಿಸ್ ತೊ ಕಾಂಯ್ ಮೆಲ್ಲೆಂ ಕೊಣ್ಣಾ ಮ್ಹಣ್ ಭಿಯೆಲೆ. ಪುಣ್ ತಾಣೆಂ ತಾಚ್ಯಾ ಶಿಸಾಂಕ್ ತಾಚೆ ಘಾಯ್ ದಾಕಯ್ಲೆ, ತೊಮಾಸಾಕ್ ಕಡ್ವಳಾಂತ್ ಹಾತ್ ಘಾಲುಂಕ್ ಸಾಂಗ್ಲೆಂ, “ಮ್ಹಾಕಾ ಹಾತ್ ಲಾವ್ನ್ ಪಳೆಯಾ, ಮ್ಹಾಕಾ ಆಸಾತ್ ತಶೆಂ ಮೆಲ್ಲ್ಯಾಕ್ ಮಾಸ್ ಹಾಡಾಂ ಆಸಾನಾಂತ್” (ಲೂಕ್ ೨೪:೩೯) ಮ್ಹಣ್ ಸ್ಪಶ್ಟ್ ಸಾಂಗ್ಲೆಂ, ತಾಂಚೆಸಮೊರ್ ಇಂಗ್ಳ್ಯಾರ್ ಭಾಜ್‌ಲ್ಲಿ ಮಾಸ್ಳಿ ಖೆಲಿ, ತಾಂಚೆರ್ ಸ್ವಾಸ್ ಸೊಡ್ಲೊ; ಅಶೆಂ ತಾಚಿ ಕೂಡ್ ತಿಚ್ ಮಾಸಾ-ರಗ್ತಾಚಿ ಮ್ಹಣ್ ರುಜು ಕರ್‍ನ್ ದಾಕಯ್ಲೆಂ. ಹಾಚೆ ಬರಾಬರ್, ದಾರಾಂ ಧಾಂಪುನ್ ಆಸ್ಲ್ಯಾರೀ ತೊ ತಾಂಚೆಮದೆಗಾತ್ ಉಬೊ ರಾವ್ಲೊ; ತಶೆಂ ಮ್ಹಳ್ಯಾರ್ ತ್ಯಾಚ್ ಪುಣ್ ಮ್ಹಯ್ಮೆವಂತ್ ಕುಡಿಂತ್ ತೊ ತಾಂಚೆಸಮೊರ್ ಆಸ್‌ಲ್ಲೊ ಮ್ಹಳ್ಳೆಂ ವಾಂಜೆಲಿಸ್ತ್ ಆಮ್ಕಾಂ ದಾಂಬುನ್ ಸಾಂಗ್ತಾತ್ (ಹ್ಯಾ ವಿಶಿಂ ಸವಿಸ್ತಾರ್ ಜಾವ್ನ್ ಹ್ಯಾಚ್ ಲೇಖನಾಂಚ್ಯೆ ಶಿಂಕ್ಳೆಂತ್ ‘ಕುಡಿಚೆಂ ಜಿವಂತ್ಪಣ್ ಆಸಾಗೀ? ಮ್ಹಳ್ಳ್ಯಾ ಅಂಕ್ಡ್ಯಾಂತ್ ಹಾಂವೆಂ ವಿವರ್‍ಸಿಲಾಂ (ಅಕ್ಟೋಬರ್ ೨೦೨೫).

ಜಿವಂತ್ಪಣ್ ಏಕ್ ಚಾರಿತ್ರಿಕ್ ಘಡಿತ್‌ಗೀ?

ಜೆಜುಚ್ಯಾ ಜಿವಂತ್ಪಣಾಚಿ ಘಡಿ ವಾಂಜೆಲಾಂನಿ ಧಾಕಲ್ ಕರುಂಕ್ ನಾ ಪುಣ್ ಸ್ತ್ರೀಯೊ ಆಯ್ತಾರಾ ಫಾಂತ್ಯಾರ್ ಫೊಂಡಾಸರ್ಶಿನ್ ಯೆತಾನಾ ವ್ಹಡ್ ಭುಂಯ್‌ಕಾಂಪ್ಣಿ ಜಾಲಿ ಆನಿ ಸರ್ಗಿಂಚೊ ಧುತ್ ಯೇವ್ನ್ ಸಮಾಧಿಸರ್ಶಿನ್ ಬಸ್ಲೊ; ತಾಕಾ ಪಳೆವ್ನ್ ಪಾರ್‍ಯಾಗಾರ್ ಮೆಲ್ಲ್ಯಾಂಬರಿ ಪಡ್ಲೆ ಆನಿ ಹ್ಯೊ ಸಂಗ್ತಿ ತಾಣಿಂ ಪ್ರಧಾನ್ ಯಾಜಕಾಂಕ್ ಕಳಯ್ಲ್ಯೊ. ಉಪ್ರಾಂತ್ ಮ್ಹಾತ್ಭಾರ್‍ಯಾಂನಿ ಶಿಪಾಯಾಂಕ್ ದುಡು ದೀವ್ನ್ ತಾಚ್ಯಾ ಶಿಸಾಂನಿ ಕೂಡ್ ಚೋರ್‍ನ್ ವ್ಹೆಲ್ಯಾ ಮ್ಹಣ್ ಫಟ್ ಖಬರ್ ಪ್ರಸಾರ್ ಕೆಲಿ (ಮಾತೆ ೨೮:೧-೧೫) ಮ್ಹಣ್ ಧಾಕಲ್ ಕೆಲಾಂ.

ಹೆಂ ನೀಜ್ ಜಾವ್ನ್ ಸತ್ ಮ್ಹಣೊಂಕ್ ಆಸ್ಚಿ ಪ್ರಮುಖ್ ರುಜ್ವಾತ್ ಮ್ಹಳ್ಯಾರ್ ಜಿವಂತ್ಪಣಾಚ್ಯೊ ಪಯ್ಲ್ಯೊ ಸಾಕ್ಶಿ- ಸ್ತ್ರೀಯೊ! ಹೆಂ ಕಿತ್ಯಾಕ್ ತಿತ್ಲೆಂ ಪ್ರಮುಖ್ ಮ್ಹಳ್ಯಾರ್, ತ್ಯಾ ಕಾಳಾಚ್ಯಾ ಜುದೆವ್ ಸಮಾಜೆಂತ್ ತಶೆಂಚ್ ನಿಯಮ್‌ಶಾಸ್ತ್ರಾಂತ್ ದೋಗ್ ಆನಿ ಚಡ್ ದಾದ್ಲ್ಯಾಂಚ್ಯೆ ಸಾಕ್ಶೆಕ್ ಮಾತ್ರ್ ಮೋಲ್ ಆಸ್‌ಲ್ಲೆಂ ಶಿವಾಯ್ ಸ್ತ್ರೀಯಾಂಚಿ ಸಾಕ್ಸ್ ಲೆಕಾಕ್ ಘೆನಾತ್‌ಲ್ಲೆ. ಜರ್ ಜೆಜು ಜಿವಂತ್ ಜಾಲಾ ಮ್ಹಣ್ ಘಡ್ಪಾಂ ಘಡೊನ್ ಪ್ರಸಾರ್ ಕರುಂಕ್ ಜಾಯ್ ಆಸ್‌ಲ್ಲೆಂ ತರ್ ತ್ಯಾ ಸಮಾಜೆಚ್ಯಾ ಚಿಂತ್ಪಾಕ್ ಲಾಗು ಜಾಂವ್ಚೆಬರಿ ತಾಚೆ ಶಿಸ್ ಸಾಕ್ಶಿ ಜಾವ್ನ್ ದಾದ್ಲ್ಯಾಂಕ್‌ಚ್ ತಯಾರ್ ಕರ್‍ತೆ ಆಸ್‌ಲ್ಲೆ. ಪುಣ್ ತೆ ತಶೆಂ ಕರಿನಾಂತ್; ಆಸ್‌ಲ್ಲೆಂ ಆಸಾ ತಶೆಂ, ದೆವಾನ್ ಖುಶಿ ವ್ಹೆಲ್ಲೆಬರಿ ಸಮಾಜಿಕ್ ನಿರೀಕ್ಶೆವಿರೋಧ್ ಸ್ತ್ರೀಯಾಂಚಿಚ್ ಸಾಕ್ಸ್ ಧೃಡ್‌ಪಣಿಂ ಸಾಂಬಾಳ್ತಾತ್. ಹಾಚೊ ಅರ್ಥ್: ಹಿ ಅಧಿಕಾರಾರ್ ಆಸ್ಲಲ್ಯಾಂನಿ ಪಾತ್ಯೆಂವ್ಚೆಬರಿ ಕರ್‍ಚ್ಯಾಕ್ ಸಾಂಗ್‌ಲ್ಲಿ ಕಾಣಿ ನ್ಹಯ್, ಬಗಾರ್ ತಾಣಿಂ ನೀಜ್ ಜಾವ್ನ್ ಅನ್ಭೋಗ್ ಕೆಲ್ಲಿ ಜಿಣಿ. ದೆಕುನ್ ಜೆಜುಚೆಂ ಜಿವಂತ್ಪಣ್ ಏಕ್ ಚಾರಿತ್ರಿಕ್ ಘಡಿತ್ ವ್ಹಯ್ ಆನಿ ತಾಚ್ಯಾಕೀ ವರ್ತ್ಯಾನ್ ತೆಂ ಚರಿತ್ರೆಚ್ಯಾಕೀ ವಯ್ಲ್ಯಾ ಸ್ಥರಾರ್ ಆಸ್ಚಿ ಹಕೀಗತ್. ತೆಂ ಕೋಣ್ ಪಾತ್ಯೆತಾ ಆನಿ ಕೋಣ್ ಪಾತ್ಯೆನಾ ಮ್ಹಳ್ಳ್ಯಾಚೆರ್ ಹೊಂದ್ವೊನ್ ಆಸ್ಚೆಂ ಘಡಿತ್ ಬಿಲ್ಕುಲ್ ನ್ಹಯ್.

ಮೆಸ್ಸೀಯಾಚ್ಯಾ ಜಿವಂತ್ಪಣಾವಿಶಿಂ ಆದ್ಲ್ಯಾ ತೆಸ್ತಾಮೆಂತಾತ್ ಸಾಂಗ್ಲಾಂಗೀ?

ಪರ್ನ್ಯಾ ಸೊಲ್ಲ್ಯಾಂತ್ ಕೀರ್ತನಾಂ, ಇಸಾಯಿಯಾ, ದಾನಿಯೆಲ್ ಆನಿ ಮಕ್ಕಬೆವಾಂಚ್ಯಾ ಗ್ರಂಥಾಂನಿ ಜಿವಂತ್ಪಣಾವಿಶಿಂ ಭರ್ವಸೊ ಆಸಾ ಶಿವಾಯ್ ಮೆಸ್ಸಿಯಾ ಜಿವಂತ್ ಜಾತಲೊ ಮ್ಹಳ್ಳೆಂ ಖಂಯ್ಸರೀ ಬರಯಿಲ್ಲೆಂ ಪಳೆಂವ್ಕ್ ಮೆಳಾನಾ. ತ್ಯಾ ದೆಕುನ್ ಶಿಸಾಂಕ್ ಜೆಜುಚೆಂ ಜಿವಂತ್ಪಣ್ ಸತ್ಮಾನುಂಕ್ ಕಶ್ಟ್ ಮಾರ್‍ತಾತ್. ಎದೊಳ್ ಆಯ್ಕೊಂಕ್ ನಾತ್‌ಲ್ಲ್ಯಾ ತಸಲಿಂ ವ್ಹಡ್ ಕಾಮಾಂ ಕರ್‍ನ್ ಆನಿ ನವ್ಯೆಚ್ ರಿತಿಚಿ ಶಿಕೊವ್ಣ್ ದೀವ್ನ್ ನವೆಸಾಂವ್ ಹಾಡ್ನ್ ಆಯಿಲ್ಲ್ಯಾ ದೆವಾಚ್ಯಾ ಮನ್ಶಾನ್ ತ್ಯೆ ರಿತಿನ್ ಖುರ್‍ಸಾರ್ ಮರ್‍ಚೆಂಚ್ ತಾಂಕಾಂ ಸಮ್ಜೊಂಕ್ ಜಾಯ್ನಾ ತಸಲೊ ಮಿಸ್ತೆರ್ ಜಾಲ್ಲೊ ಆಸ್ತಾಂ, ಆತಾಂ ಪರತ್ ತೊ ಜಿವಂತ್ ಜಾಲಾ ಮ್ಹಳ್ಳೆಂ ತಾಂಚ್ಯಾ ಗಿನ್ಯಾನಾ ವಯ್ಲ್ಯಾನ್ ವೆತಾ ಮ್ಹಣ್ಚ್ಯಾಕೀ ಖಂಯ್ಚ್ಯಾನೀ ತಾಂಚ್ಯೆ ಸಮ್ಜಣೆಕ್ ಲಾಗಿಂ ಸಯ್ತ್ ಯೇನಾ ಮ್ಹಣ್ ಸಾಂಗ್ಯೆತ್. ತ್ಯಾ ದೆಕುನ್ ಸ್ತ್ರೀಯಾಂಚಿ ಸಾಕ್ಸ್ ಆಯ್ಕಾಲ್ಯಾ ಉಪ್ರಾಂತ್‌ಯೀ ತಾಂಚಿ ತೊಂಡಾಂ ಬಾವೊನ್, ಜಾಲ್ಲ್ಯಾ ಘಡಿತಾಂವಿಶಿಂ ಚಿಂತುನ್ ಎಮ್ಮಾವ್ಸಾತೆವ್ಶಿಂ ತೆ ಚಲೊನ್ ವೆತಾತ್. ಪರ್ನ್ಯಾ ಸೊಲ್ಲ್ಯಾಂತ್ ಎದೊಳ್‌ಚ್ ಜಿವಂತ್ಪಣಾವಿಶಿಂ ಹಿಶಾರೊ ನಾತ್‌ಲ್ಲ್ಯಾನ್ ತೆಂ ಸಮ್ಜೊನ್, ಪಾತ್ಯೆಂವ್ಕ್ ಆನಿ ಪವಿತ್ರ್ ಪುಸ್ತಕ್ ನವ್ಯಾ ಉಜ್ವಾಡಾನ್ ವಾಚುಂಕ್ ತಾಂಕಾಂ ಪೆಂತೆಕೊಸ್ತಾಪಯ್ಲೆಂ ಲಾಂಬ್ ಕಾಳ್ ಲಾಗ್ತಾ.

ಜಿವಂತ್ಪಣ್ Happy Ending ವಾ New Beginning?

ಸಾದ್ಯೆ ದಿಶ್ಟೆನ್ ಪಳೆಲ್ಯಾರ್ ಜೆಜುಕ್ ನಾಸ್ ಕರುಂಕ್ ಪ್ರಯತನ್ ಕೆಲ್ಲ್ಯಾಂ ಮುಕಾರ್ ತೊ ಜಯ್ತೆವಂತ್ ಜಾಲ್ಲೆಂ ಸುಖಾಂತ್ಯ್ ಮ್ಹಣ್ ದಿಸ್ಲ್ಯಾರೀ, ಜಿವಂತ್ಪಣ್ ಏಕ್ ನವೊ ಆರಂಭ್ ಮ್ಹಣ್ಂಚ್ ಪಳಯ್ಜೆ. ಜೆಜುಚ್ಯಾ ಜಿವಂತ್ಪಣಾವಿಶಿಂ ಬರಯ್ತಾನಾ ಜುವಾಂವ್ ಉದ್ದೇಶ್‌ಪೂರ್ವಕಿಂ, ಉತ್ಪತ್ತಿ ಪುಸ್ತಕಾಚೊ ಪಯ್ಲೊ ದೀಸ್ ಮತಿಂತ್ ಧರ್‍ನ್ ‘ಪಯ್ಲ್ಯಾ ದಿಸಾ’ ಮ್ಹಣ್ ಬರಯ್ತಾ. ಹಾಂಗಾಥಾವ್ನ್ ನವೊ ಆರಂಭ್ ಮ್ಹಣ್ ಹಾಚೊ ಅರ್ಥ್. ಹಾಚೆ ಬರಾಬರ್ ಆನ್ಯೇಕ್ ಚಡ್ ಗುಂಡಾಯೆಚೊ ಅರ್ಥ್‌ಯೀ ಆಸಾ. ಅಪ್ರಾಧ್ಯಾಭಾಶೆನ್ ಖುರ್‍ಸಾಯಿಲ್ಲೊ ತೊಚ್ಚ್ ಜೆಜು ಆತಾಂ ಸೊಮಿ ಮ್ಹಳ್ಳೆಂ ಪರ್ಗಟ್ ಜಾಲಾಂ. ದೆಕುನ್ ಪಾತಕ್ ರಡಾನಾತ್‌ಲ್ಲ್ಯಾ ಹರ್‍ಯೆಕ್ಲ್ಯಾನ್ ಆಪಾಪ್ಲ್ಯಾ ಗುನ್ಯಾಂವಾಂಚೆಂ ಲೇಕ್ ದಿಂವ್ಚೆಂ ಪಡ್ತೆಲೆಂ. ಜಿವಂತ್ ಜೆಜು ಮ್ಹಯ್ಮೆವಂತ್ ಸೊಮಿ ಮಾತ್ರ್ ನ್ಹಯ್, ಬಗಾರ್ ಸರ್ವ್ ರಾಶ್ಟ್ರಾಂಚೊ ನ್ಯಾಯ್ ಕರ್‍ಚೊ ನಿತಿಕರ್ತ್ ಮ್ಹಳ್ಳೆಂಯ್ ಸತ್.

ಸಮಾಪ್ತ್

ಪಾಸ್ಕಾಂ ಫೆಸ್ತಾ ಉಪ್ರಾಂತ್ ಅಸಲಿಂ ಸವಾಲಾಂ ಆಮ್ಚ್ಯೆ ಮತಿಕ್ ಯೇಂವ್ಕ್ ಜಾಯ್. ತೊಮಾಸಾಕ್ ಆಯಿಲ್ಲೆಬರಿ ದುಬಾವ್ ಯೇಂವ್ಕ್ ಜಾಯ್. ತ್ಯಾ ದುಬಾವಾಂಕ್ ಜವಾಬ್ ಸೊಧುಂಕ್ ಜಾಯ್. ತೆದ್ನಾಂ ಮಾತ್ರ್ ಆಮಿ ಕಿತೆಂ ಪಾತ್ಯೆತಾಂವ್ ತ್ಯಾ ಭಾವಾಡ್ತಾಕ್ ಏಕ್ ಅರ್ಥ್ ಮೆಳ್ತಾ. ಜೆಜುಚೆಂ ಜಿವಂತ್ಪಣ್ ಆಮಿ ಏಕ್ ಪಾವ್ಟಿಂ ಸಮ್ಜೊನ್ ಆಖೇರ್ ಜಾಂವ್ಚೆತಸಲೆಂ ಘಡೊನ್ ಗೆಲ್ಲೆಂ ಘಡಿತ್ ನ್ಹಯ್ ಬಗಾರ್ ಶಿಸಾಂಬರಿ ಹಂತಾ ಹಂತಾರ್ ಆಮ್ಚೆಮುಕಾರ್ ಉಗ್ತೆಂ ಜಾಂವ್ಚೆತಸಲೆಂ ಆನಿ ಆಮಿ ಸಾಂಗಾತಾ ಘೆವ್ನ್ ಜಿಯೆಂವ್ಚೆತಸಲೆಂ. ಶಿಸಾಂಕ್‌ಯೀ ಪಯ್ಲೆಂ ಕಿತೆಂಚ್ ಸಮ್ಜೊಂಕ್ ನಾ, ತೆ ಗೊಂದೊಳಾಂತ್ ಆಸ್ಲೆ, ತಾಣಿಂಯ್ ದುಬಾವ್ ಕೆಲೊ, ಸವಾಲಾಂ ವಿಚಾರ್‍ಲಿಂ, ಪುಣ್ ಜೆದ್ನಾಂ, ಪರತ್ ಪರತ್ ತೆ ಚಾಳೀಸ್ ದೀಸ್ ಸೊಮಿ ತಾಂಕಾಂ ದಿಶ್ಟಿಕ್ ಪಡ್ಲೊ, ತಾಣೆಂ ತಾಂಚೆಂ ಮನ್ ಉಗ್ತೆಂ ಕೆಲೆಂ ಆನಿ ಪವಿತ್ರ್ ಅತ್ಮ್ಯಾಚ್ಯಾ ಉಜ್ವಾಡಾನ್ ತಾಂಕಾಂ ಸವ್ಕಾಸ್ ಸಂಗ್ತಿ ಸಮ್ಜೊಂಕ್ ಲಾಗ್ಲ್ಯೊ. ದೆಕುನ್ ಜರ್ ತುಂಯ್ ಆಜ್ ದುಬಾವ್ತಾಯ್, ಸವಾಲಾಂ ಕರ್‍ತಾಯ್ ಆನಿ ಸಮ್ಜೊಂಕ್ ಕಶ್ಟಾತಾಯ್ ವ್ಹಡ್ ನಾ, ತೊ ಕಾಂಯ್ ವ್ಹಡ್ ಗುನ್ಯಾಂವ್ ನ್ಹಯ್; ಸತ್ ಜಾಣಾಂ ಜಾಂವ್ಕ್ ತುಂ ಕಿತ್ಲೆಂ ಭುಕೆತಾಯ್ ತ್ಯಾಚ್ ಪ್ರಮಾಣಾರ್ ದೆವಾಚ್ಯಾ ವೆಳಾರ್ (Kairos) ಸಗ್ಳೆಂ ಸಮ್ಜತೆಲೆಂ. Happy Easter.

ಫ್ರಾದ್ ಆರನ್ ಬಬುಶ್, ಕಾರ್ಮೆಲಿತ್