ಜಾಂವ್ ತೊ ಘಟ್‌ಮುಟ್ ಪೈಲ್ವಾನ್ ವಾ ಚಾರ್ ಗಾಂವ್ಚೊ ಸುಲ್ತಾನ್, ಜರ್‍ಲ್ಯಾಂ ಥಾವ್ನ್ ಕರಂದಾಯ್ ಭೊಗನಾತ್‌ಲ್ಲೊ ಮನಿಸ್ ನಾ. ಏಕ್ ಪಾವ್ಟಿಂ ತಾಂಚಿ ಸಂತತ್ ಘರಾ ಭಿತರ್ ರಿಗತ್ ತರ್, ಆಮಿ ಜಾವ್ನ್ ಘರ್ ಖಾಲಿ ಕರಿಜಯ್ ಸೊಡ್ನ್ ಜರ್‍ಲೆ ಸಾಸ್ಣಾಚ್ಯಾ ಸಾಸ್ಣಾಕ್ ತಾಂಚೊ ಜಾಗೊ ಸೊಡ್ನ್ ದೀನಾಂತ್. ಅಶೆಂ ಜರ್‍ಲೊ ಪಳೆಯ್ಲ್ಯಾರ್ ಕಾಂಟಾಳ್ಚಿಂ-ತೊಂಡ್ ಘುಂವ್ಡೊಂವ್ಚಿಂ, ಹಾತಾಂತ್ ಸಾರಣ್ ವಾ ವ್ಹಾಣೊ ಘೆವ್ನ್ ಜರ್‍ಲ್ಯಾಂಚೊ ಅತ್ಮೊ ತಾಂಚ್ಯಾ ಕುಡಿಥಾವ್ನ್ ಮೆಕ್ಳೆಂ ಕರುಂಕ್ ಪೆಚಾಡ್ಚಿಂ ಮನ್ಶಾಂ ಆಯ್ಲೆವಾರ್ “ಹಾಂವ್ ಏಕ್ ಜರ್‍ಲೊ” ಮ್ಹಣ್ ಆಪ್ಲ್ಯಾ ಸಾಮಾಜಿಕ್ ಜಾಳಿ ಜಾಗ್ಯಾನಿ ಬರೊವ್ನ್ ಆಸಾತ್ ತರ್ ಹಾಚ್ಯಾ ಪಾಟ್ಲಿ ಕಾಣಿ ಕಿತೆಂಗಿ ವಿಶೇಷ್ ಮ್ಹಣ್ ತುಮಿ ಸಮ್ಜವ್ಯೆತ್. ಹ್ಯಾ ಜೆನ್‌ಝೀ ಜರ್‍ಲ್ಯಾನಿಂ ಸರ್ಕಾರಾಚಿ ನೀದ್ ಪಾಡ್ ಕೆಲ್ಯಾ ತರ್, ಸಬಾರ್ ತರ್ನಾಟ್ಯಾಂಕ್ ನಿದೆಂತ್ಲೆಂ ಜಾಗಯ್ಲಾಂ.

ಆಧುನಿಕ್ ಜರ್‍ಲ್ಯಾಂಚ್ಯಾ ಜನನಾಚಿ ಕಾಣಿ

ಮೇ ೧೫, ೨೦೨೬ ಭಾರತೀಯ್ ಸುಪ್ರೀಮ್ ಕೊಡ್ತಿಚ್ಯಾ ಪ್ರಧಾನ್ ನಿತಿಕರ್ತಾನ್, ಚಿಂತುನ್ ವಾ ಚಿಂತಿನಾಸ್ತಾನಾ ಏಕ್ ವಾಕ್ಮೂಲ್ ದಿಲೆಂ. ಚೀಫ್ ಜಸ್ಟೀಸ್ ಆಫ್ ಇಂಡಿಯಾ ಸೂರ್‍ಯಕಾಂತ್‌ಚಿ ಉತ್ರಾಂ ಅಶಿಂ ಆಸ್‌ಲ್ಲಿಂ “ಆಮ್ಚಾ ದೇಶಾಂತ್ಲೆ ಥೊಡೆ ತರ್ನಾಟೆ ಜರ್‍ಲ್ಯಾ ಪರಿಂ. ಕರುಂಕ್ ಕಾಮ್ ನಾಸ್ತಾನಾ, ಮಾಧ್ಯಮಾನಿಂ-ಸಾಮಾಜಿಕ್ ಜಾಳಿ ಜಾಗ್ಯಾನಿಂ ಬಸೊನ್ ವಾ ಆರ್.ಟಿ.ಐ (RTI) ಕಾರ್‍ಯಕರ್ತ್ ಜಾವ್ ಆಮ್ಚ್ಯಾ ವ್ಯವಸ್ಥೆಚೆರ್ ಹಲ್ಲೊ ಕರ್‍ತಾತ್.” ದೇಶಾಕ್ ವೊಜೆಂ ಜಾಲ್ಲೆ ಪರಾವಲಂಬಿ ಜಿವಿ ಮ್ಹಣ್ ತರ್ನಾಟ್ಯಾಂಕ್ ಬಿಲ್ಲೊ ಲಾಯ್‌ಲ್ಲ್ಯಾ ಹ್ಯಾ ವಾಕ್ಮುಲಾದ್ವಾರಿಂ ಆಮ್ಚೆ ಯುವಜಣ್ ಖುಬಾಳ್ಳೆ. ದುಸ್ರ್ಯಾ ದಿಸಾ ಸಿ.ಜೆ.ಐ (CJI) ಸೂರ್‍ಯಕಾಂತಾನ್ ಇಲ್ಲೆಂ ಪ್ಯಾಚ್ ವರ್ಕ್ ಕರ್‍ಚ್ಯಾ ಉದ್ದೇಶಾನ್ “ಮ್ಹಜೆಂ ವಾಕ್ಮೂಲ್ ನಕ್ಲಿ ಪ್ರಮಾಣ್ ಪತ್ರ್ ದಾಕೊವ್ನ್ ವಕೀಲ್ ಜಾಂವ್ಚ್ಯಾ ತರ್ನಾಟ್ಯಾವಿಶಿಂ ಆಸ್‌ಲ್ಲೆಂ.” ಮ್ಹಣ್ ಸ್ಪಶ್ಟೀಕರಣ್ ದಿಲ್ಯಾರಿ ಏಕ್ ಡಿಜಿಟಲ್ ಕ್ರಾಂತಿಚಿಂ ಕಿಟಾಳ್ ತೆದೊಳ್ಚ್ ಪೆಟೊನ್, ಉಜೊ ಜಾವ್ನ್ ಬದಲ್ಲೆಂ.

ಹಾಚೊ ಜಲ್ಮ್‌ದಾತಾರ್ ಅಭಿಜಿತ್ ದೀಪ್ಟೆ ಮ್ಹಳ್ಳೊ ೩೦ ವರ್‍ಸಾಂಚೊ ತರ್ನಾಟೊ. ಮಹಾರಾಷ್ಟ್ರಾಚ್ಯಾ ಪುಣೆಂತ್ ಪತ್ರಿಕೋದ್ಯಮ್ ಪದ್ವಿ ಜೋಡ್ನ್, ಪ್ರಸ್ತುತ್ ಅಮೇರಿಕಾಚ್ಯಾ ಬೋಸ್ಟನ್ ಯುನಿವರ್ಸಿಟಿಂತ್ ಸಾರ್ವಜನಿಕ್ ಸಂಪರ್ಕ್ಂತ್ (Public Relations) ಉಂಚ್ಲೆ ಶಿಕಾಪ್ ಶಿಕವ್ನ್ ಆಸ್ಚೊ ಯುವಕ್, ಥೊಡ್ಯಾ ವರ್‍ಸಾಂ ಆದಿಂ ಆಮ್ ಆದ್ಮಿ ಪಾಡ್ತಿಚೊ ಸಾಂದೊ. ಮೇ ೧೬ ತಾರೀಖೆರ್ ಅಭಿಜಿತ್ ಜಸ್ಟೀಸ್ ಸೂರ್‍ಯಕಾಂತ್‌ಚ್ಯಾ ಉತ್ರಾಂಕ್ ಏಕ್ ವ್ಯಂಗ್ಯ್ ಪ್ರತಿಕ್ರಿಯಾ ದೀವ್ನ್ “ಆಮಿಂ ಸರ್ವ್ ಜರ್‍ಲ್ಯಾನಿಂ ಸಾಂಗಾತಾ ಆಯ್ಲ್ಯಾರ್ ಕಶೆಂ?” ಮ್ಹಣ್ ಟ್ವೀಟ್ ಕರ್‍ತಾ. ಹ್ಯಾ ಟ್ವೀಟಾಕ್ ವ್ಹಡ್ ಮಾಪಾನ್ ತರ್ನಾಟ್ಯಾಂಚೊ ಪಾಟಿಂಬೊ ಲಾಭ್ತನಾ ಕಕ್ರೋಚ್ ಜನತಾ ಪಾರ್ಟಿ (CJP) ನಾಂವಾನ್ ಟ್ವಿಟರ್ ಆನಿ ಇನ್‌ಸ್ಟಾಗ್ರಾಂ ಪೇಜ್ ಪ್ರಾರಂಬ್ ಜಾತಾ. ಅಭಿಜಿತ್‌ನ್ ಧಾಡ್‌ಲ್ಲೆಂ ಗೂಗಲ್ ಫಾರ್ಮ್ ಭರ್ತಿ ಕರ್‍ನ್ ೩.೫ ಲಾಕ್ ಲೋಕ್ ಕೊಕ್ರೋಚಿ ಪಾರ್ಟಿಚೆ ಸಾಂದೆ ಜಾತಾತ್. “ಆಮಿಂ ಖಂಚ್ಯಾಯ್ ಎಲಿಸಾಂವಾಂತ್ ಸ್ಪರ್ಧೊ ಕರುಂಕ್ ನ್ಹಯ್, ಬಗಾರ್ ಅಂತರ್‌ಜಾಳಿಚ್ಯಾ ಜನಾಂದೋಲನಾದ್ವಾರಿಂ ಆಡಳ್ತೆಂ ಚಲಂವ್ಚ್ಯಾ ಮುಖೆಲ್ಯಾಂಕ್ ಸವಲಾಂ ವಿಚಾರುಂಕ್ ಚಿಂತ್ಲಾಂ” ಮ್ಹಣ್ ಹ್ಯಾ ಪಾರ್ಟಿನ್ ತಾಂಚೊ ಉದ್ದೇಶ್ ಸ್ಪಶ್ಟ್ ಕರ್‍ತಾನಾ ಸರ್ವ್ ವಿರೋಧ್ ಪಾಡ್ತಿಂಚೊ ಸಾಂಗಾತ್ ತಾಂಕಾ ಲಾಭ್ತಾ. ಅಲ್ ಜಜೀರಾ, ಬಿಬಿಸಿ ತಸಲಿಂ ಅಂತರಾಷ್ಟ್ರೀಯ್ ಮಾಧ್ಯಮಾಂ ಹಾಂಕಾ ಪ್ರಚಾರ್ ದಿತಾತ್. ಹಾಂಚ್ಯಾ ಇನ್‌ಸ್ಟಾಗ್ರಾಂ ಪೇಜಿಕ್ ಥೊಡ್ಯಾಚ್ ದಿಸಾಂ ಭಿತರ್ ೨ ಕೊರೊಡ್ ಪಾಟ್ಲಾವ್ದಾರ್ ಲಾಭ್ತಾತ್. ಹೊ ಸಂಖೊ ಬಿಜೆಪಿ ಧರ್ರ್ನ್ ದೇಶಾಚ್ಯಾ ಖಂಚ್ಯಾಯ್ ರಾಜಕೀಯ್ ಪಾಡ್ತಿಚ್ಯಾ ಇನ್‌ಸ್ಟಾಗ್ರಾಂ ಪಾಟ್ಲಾವ್ದಾರಾಂಚ್ಯಾಕಿ ಚಡ್ ಆಸಾ. ಇತ್ಲೆಂ ಸಕ್ಕಡ್ ಘಡ್ತಾನಾ, ಆನಿ ಮೌನ್ ರಾವ್ಲ್ಯಾರ್ ಉದಾಕ್ ಮಾತ್ಯಾ ವಯ್ಲ್ಯಾನ್ ವೆತೆಲೆಂ ಮ್ಹಣ್ ಸಮ್ಜಲ್ಲೊ ಮೋದಿ ಸರ್ಕಾರ್ “ಹ್ಯಾ ಕೊಕ್ರೋಚ್ ಪಾಡ್ತಿಚ್ಯಾ ಚಟುವಟಿಕೆನಿಂ ದೇಶಾಚ್ಯಾ ಆಂತರಿಕ್ ಭದ್ರತೆಕ್ ಭಿರಾಂತ್ ಆಸಾ” ಮ್ಹಳ್ಳೆಂ ನೀಬ್ ದೀವ್ನ್ ತಾಂಚೆ ಟ್ವಿಟರ್ ಅಕೌಂಟ್ ಬ್ಲಾಕ್ ಕರಯ್ತಾ. ಹೆಂ ಲೇಖನ್ ಬರಂವ್ಚ್ಯಾ ವಗ್ತಾ ಕೊಕ್ರೋಚ್ ಪಾಡ್ತಿಚೆಂ ಇನ್‌ಸ್ಟಾಗ್ರಾಂ ಅಕೌಂಟ್ ಸಯ್ತ್ ಬಂದ್ ಕರುಂಕ್ ಘುಟ್ಮಳ್ ಚಲವ್ನ್ ಆಸಾ ಮ್ಹಳ್ಳೊ ಖಬ್ರೊ ಆಯ್ಲ್ಯಾತ್. ಅಭಿಜಿತ್ ದೀಪ್ಟೆಕ್ ಖುನಿ ಕರ್‍ತಾಂ ಮ್ಹಳ್ಳಿ ಧಮ್ಕಿ ವಾ ಕಿತ್ಲೆ ಜಾಯ್ ತಿತ್ಲೆ ಪಯ್ಶೆ ಘೆವ್ನ್ ಬಿಜೆಪಿಕ್ ಭರ್ತಿ ಜಾವ್ನ್ ಹಿ ಚಳ್ವಳ್ ರಾವಯ್ ಮ್ಹಳ್ಳೆಂ ತೆಂತೆಸಾಂವಾ ಯೇವ್ನ್ ಆಸಾ.

ಜರ್‍ಲ್ಯಾಂಚ್ಯಾ ಪಾಡ್ತೆಚಿ ಕಾರ್‍ಯಶೈಲಿ

ಮೊಬಾಯ್ಲ್ ಫೊನಾ ಭಿತರ್, ಫಿಚಾರ್ ಜಾಲ್ಲೊ ಜರ್‍ಲೊ ಹ್ಯಾ ಪಾಡ್ತಿಚೊ ಘುರ್ತ್ ತರ್, ಆಲ್ಶಿ ಆನಿ ಬೆಕಾರ್ ತರ್ನಾಟ್ಯಾಂಚೊ ತಾಳೊ ಮ್ಹಳ್ಳೆಂ ಧ್ಯೇಯ್ ವಾಕ್ಯ್ ಹಾಣಿಂ ಘೆತ್ಲಾಂ. ಕಾಮ್ ನಾಸ್ತಾನಾ ಆಳ್ಶಿ ಜಾವ್ನ್ ಸಗ್ಳೊ ದೀಸ್ ಮೊಬಾಯ್ಲಾಂತ್ ಬಡೊನ್ ವ್ಯವಸ್ಥೆ ವಿರೋಧ್ ಆವಾಜ್ ಉಟಂವ್ಕ್ ಮನ್ ಆಸ್‌ಲ್ಲ್ಯಾನಿಂ ಕೊಕ್ರೋಚ್ ಪಾಡ್ತೆಚೆಂ ಸಾಂದೆಪಣ್ ಘೆವ್ಯೆತಾ. ಹಾಂಚ್ಯಾ ಮ್ಯಾನಿಫೆಸ್ಟೊ (Manifesto) ವಾ ಆಶ್ವಾಸನಾಂಚ್ಯಾ ಪಟ್ಟೆರ್ ೫ ಪ್ರಮುಖ್ ಸಂಗ್ತಿ ಆಸಾತ್.

೧.      ಕೊಡ್ತಿಚ್ಯಾ ನಿವೃತ್ತ್ ನಿತಿಕರ್ತಾಂಕ್ ಕಸಲೊಯಿ ಸರ್ಕಾರಿ ಹೊದ್ದೊ ವಾ ರಾಜ್ಯ್‌ಸಭಾ ಸೀಟ್ ಮೆಳೊಂವ್ಕ್ ನಜೊ.

೨.      ಖಂಚ್ಯಾಯಿ ರಾಜಕೀಯ್ ಪಾಡ್ತೆನ್ ಅನಾಮಿಕ್ ವ್ಯಕ್ತಿಂ ಥಾವ್ನ್ ಡೊನೇಶನ್ ಘೆಂವ್ಕ್ ಆಡ್ವಾರ್‍ಲಾಂ ಆನಿ ಆರ್.ಟಿ.ಐ (RTI) ಕಾಯ್ದ್ಯಾ ಖಾಲ್ ತಾಂಚ್ಯಾ ಆರ್ಥಿಕ್ ವಹಿವಾಟಾಚೊ ವಿವರ್ ಲೊಕಾ ಮೆರೆನ್ ಪಾವೊಂಕ್ ಜಾಯ್.

೩.      ಚಲಿಯಾಂಕ್ ರಾಜಕೀಯ್ ಶೆತಾಂತ್ ೫೦% ಮೀಸಲಾತಿ.

೪.      ಉದ್ಯಮದಪಾತಿಚ್ಯಾ ಸರ್ವಾಧಿಕಾರಾ ಥಾವ್ನ್ ಮಾಧ್ಯಮಾಂಕ್ ಸುಟ್ಕಾ ಆನಿ ಚೂಕ್ ಖಬ್ರೊ ವಾ ಘಡ್ಪಾಂ ಕರ್‍ನ್ ಲೊಕಾಚಿ ದಿಶಾ ಚುಂಕವ್ಚ್ಯಾ ಮಾಧ್ಯಮಾಂಚೆ ಲೈಸೆನ್ಸ್ ರದ್ಧ್ ಕರ್‍ಚೆಂ.

೫.     ಲೊಕಾಥಾವ್ನ್ ಎಲಿಸಾಂವಾಂತ್ ಜಿಕೊನ್ ಆಯ್ಲ್ಯಾ ಉಪ್ರಾಂತ್ ಪಕ್ಷಾಂತರ ವಾ ಪಾಡ್ತ್ ಬದ್ಲಿತಲ್ಯಾ (ರಾಘವ್ ಚಡ್ಡಾ ತಸಲ್ಯಾ) ಫುಡಾರ್‍ಯಾಂಕ್ ೨೦ ವರ್‍ಸಾಂಚೊ ರಾಜಕೀಯ್ ಬಹಿಷ್ಕಾರ್.

ಕೇವಲ್ ಹೆ ಕಾಗ್ದಾನಿಂ ಲಿಖ್‌ಲ್ಲೆ ಉದ್ದೇಶ್ ನಂಯ್ ಆಸ್ತಾ ಕೊಕ್ರೋಚ್ ಪಾಡ್ತಿಚೆ ಸಾಂದೆ ಕಾರ್‍ಯರುಪಾಕ್ ದೆಂವ್‌ಲ್ಲ್ಯಾತ್ ಆಪ್ಲ್ಯಾ ವಾಹನಾಂಕ್ ಜರ್‍ಲ್ಯಾಂಚೆ ಪಿಂತುರ್ ಘಾಲ್ನ್ ವಾಟೆ ವಯ್ಲೊ ಕಚ್ರೊ ನಿತಳ್ ಕರ್‍ಚೆಂ, ಬ್ಲಾಕ್ ಜಾಲ್ಲೆಂ ಗಟಾರ್ ಸಾಫ್ ಕರ್‍ಚೆಂ, ಮೆಳ್ಯಾನ್ ಬುಡೊನ್ ಗೆಲ್ಲ್ಯಾ ಯಮುನಾ ನ್ಹಂಯ್‌ಚೆಂ ಶುದ್ಧೀಕರಣ್ ಅಸಲಿಂ ಕಾಮಾಂ ಎದೊಳ್‌ಚ್ ಹಾತಿಂ ಘೆತ್ಲ್ಯಾಂತ್. ಆನಿ ಗರ್ಜೆಚೆಂ ಜಾವ್ನ್ ಸರ್ಕಾರಾಕ್ ಕೊಡು ಸವಾಲಾಂ ಲೀಕ್ ಜಾವ್ನ್ ಚಾರ್ ವಿದ್ಯಾರ್ಥಿನಿಂ ಜೀವ್ಘಾತ್ ಕರ್‍ನ್, ಲಾಕಾನಿಂ ವಿದ್ಯಾರ್ಥಿಕ್ ಮಾನಸಿಕ್ ಅಘಾತ್ ಜಾಲ್ಲ್ಯಾಕ್ ಕೋಣ್ ಜವಾಬ್ದಾರ್? ಕೇಂದ್ರ್ ಶಿಕ್ಷಣ್ ಸಚಿವ್ ಧರ್ಮೇಂದ್ರ ಪ್ರಧಾನ್ ಕೆದಾಳಾಂ ರಾಜೀನಾಮೊ ದಿತಲೊ? ಮೋದಿ ಸರ್ಕಾರಾನ್ ಹರ್‍ಯೇಕಾ ವರ್‍ಸಾಂ ದೋನ್ ಕೊರೊಡ್ ಉದ್ಯೋಗ್ ಆವ್ಕಾಸ್ ರಚ್ತಾಂ ಮ್ಹಳ್ಳಿಂ ಭಾಸಾವ್ಣಿ ಕಿತೆಂ ಜಾಲಿಂ? ದೀಸ್ ವೆತಾಂ ಶಿಕ್ಷಣ್ ಆನಿ ಭಲಾಯ್ಕಿ ಶೆತ್ ಧಂದೊ ಕಿತ್ಯಾಕ್ ಜಾಲಾ? ಚಡೊನ್ ಆಸ್ಚಿಂ ವಸ್ತುಂಚಿ ಮೊಲಾಂ ದೆಂವ್ಚಿಂ ಕೆದಾಳಾಂ ಅಸಲ್ಯಾ ಸವಾಲಾನಿಂ ಭಿಯೆಲ್ಲೊ ಕೇಂದ್ರ್ ಸರ್ಕಾರ್ ಎಕಾ ಸಂದಿಗ್ದ್ ಪರಿಸ್ಥಿತೆಂತ್ ಶಿರ್ಕಲಾ. ಕಿತ್ಯಾಕ್ ಸವಾಲಾಂಚಿ ಶಿಂಕೊಳ್ ಮುಕಾರೊನ್ ಗೆಲ್ಯಾರ್ ಮೋದಿ ಸರ್ಕಾರಾಚೊ ಬುನ್ಯಾದ್ ಹಾಲೊಂವ್ಕ್ ಸುರು ಜಾತೆಲಿ ತೆಂ ಖಂಡಿತ್. ತಶೆಂ ಮ್ಹಣ್ ಹ್ಯಾ ಜರ್‍ಲ್ಯಾಂಕ್ ಬ್ಲಾಕ್ ಕರ್‍ನ್ ನಾ ಕೈದ್ ಕರ್‍ನ್ ತಾಂಚೊ ಗಳೊ ಚಿರ್ಡುಂಚೆ ಪ್ರೇತನ್ ಕೆಲ್ಯಾರ್, ತಾಂಚೊ ರಾಗ್ ಜ್ವಾಲಾಮುಖಿ ಜಾವ್ನ್ ವಿಸ್ಫೋಟ್ ಜಾಯ್ತ್ ಆನಿ ನೇಪಾಳ್ ಶ್ರೀಲಂಕಾ, ಬಾಂದ್ಲಾದೇಶಾಂತ್ ಜಾಲ್ಲೆಪರಿಂ ತರ್ನಾಟೆ ಮಾರ್ಗಾಕ್ ದೆಂವ್ತಿತ್ ಮ್ಹಳ್ಳಿ ಭಿರಾಂತ್ ಆಸಾ. ಪೂಣ್ ಹ್ಯಾ ಜರ್‍ಲ್ಯಾ ಪಾಡ್ತಿಚ್ಯಾ ಸ್ಥಾಪಕ್ ಅಧ್ಯಕ್ಷಾನ್ ಖಂಚ್ಯಾ ಕಾರಣಾಕ್ ಲಾಗೊನ್ ಆಮಿ ಹಿಂಸಾ ವಾ ಅನೀತಿಚಿ ವಾಟ್ ಧರ್‍ಚೆನಾಂವ್ ಮ್ಹಣ್ ಕಳಯ್ಲಾಂ.

ಜರ್‍ಲೊ ಮ್ಹಳ್ಳೊ ಸಂಕೇತ್ ಕಿತ್ಯಾಕ್

ಖಂಚಿಯ್ ಚಳ್ವಳ್ ಸುರ್‍ವಾತಾನಾ ವಾಗ್, ಶಿಂವ್, ಹಸ್ತ್, ಘೊಡೊ ಅಸಲ್ಯಾ ಬಳಿಷ್ಠ್ ಮನ್ಜಾಮಾತಿಕ್ ಸಾಂಕೇತಿಕ್ ರಿತಿನ್ ವಾಪರ್‍ತಾತ್. ಶಾಂತಿಕ್ ಪಾರ್ವೊ, ಸೊಭಾಯೆಕ್ ಕೀರ್ ವಾ ಮೊರ್, ವಿಶ್ವಾಸಪಣಾಕ್ ಪೆಟೊ, ಮೊಗಾಕ್ ಲವ್‌ಬರ್ಡ್ಸ್ ಸಯ್ತ್ ಸಂಕೇತ್ ಜಾವ್ನ್ ಉಪ್ಯೋಗ್ ಕೆಲ್ಲೆಂ ಆಮಿ ಪಳೆಲಾಂ. ಪೂಣ್ ಜರ್‍ಲೊ ಕಿತ್ಯಾಕ್? ವಿಗ್ಯಾನಿ ಚಾರ್ಲ್ ಡಾರ್ವಿನ್ ಪ್ರಕಾರ್ “ಪೃಥ್ವೆಂತ್ ಬಳಿಷ್ಠ್ ಆಸ್ ಲ್ಲಿ ಜಿವಿ ಬಾಳ್ವತ ತೆಂ ಖರೆಂ. ಪೂಣ್ ತಾಚ್ಯಾಕಿ ವರ್ತೆಂ ಸತ್ ಮ್ಹಳ್ಯಾರ್ ಹ್ಯಾ ಭುಂಯ್ತ್ ನಿರಂತರ್ ಜಾಂವ್ಚ್ಯಾ ಬದ್ಲಾವಣೆಕ್ ಹೊಂದ್ವೊನ್ ವೆಚಿ ಜಿವಿ ಚಡ್ ಆವ್ದೆಕ್ ಜಿಯೆತಾ.” ಹೋಮೋಸೇಪಿಯನ್ ರುಪಾರ್ ಆಸ್ಚ್ಯಾ ಮನ್ಶ್ಯಾನ್ ಹ್ಯಾ ಸಂಸಾರಾಂತ್  ಪಾಯ್ ತೆಂಕುನ್ ಲಗ್ಬಗ್ ೩ ಲಾಕ್ ವರ್‍ಸಾಂ ಜಾಲಿ ತರ್, ಜರ್‍ಲೆ ೩೨ ಕೊರೊಡ್ ವರ್‍ಸಾಂ ತಿತ್ಲೆಂ ಪರ್ನೆ ಜಿವಿ. ವಿಗ್ಯಾನಾ ಪರ್ಮಾಣೆಂ ಹಿಮಾಲಯ್ ಪರ್ವತ್ ರಚನ್ ಜಾಂವ್ಚ್ಯಾ ಆದಿಂ, ಹ್ಯಾ ಭುಮಿ ವೈಕುಂಟಾಂತ್ಲೆ ಪಯ್ಲೆಂ ಫುಲ್ ಫುಲ್ಚ್ಯಾ ಪಯ್ಲೆಂ, ಜಲ್ಮಲ್ಲ್ಯಾ ಪಯ್ಲ್ಯಾ ಡೈನೋಸಾರಸ್‌ನ್ ಚಲಂವ್ಕ್ ಶಿಕ್ಚ್ಯಾ ಫುಡೆಂ ಜರ್‍ಲೆ ಆಮ್ಚ್ಯಾ ಪೃಥ್ವೆಂತ್ ನಿವಾಸ್ ಕರ್‍ತೆಲೆ ಮ್ಹಳ್ಳೆಂ ಪಾತ್ಯೆಂವ್ಕ್ ಕಷ್ಟ್ ಜಾಲ್ಯಾರಿ ಸತ್. ತಿತ್ಲೆ ವ್ಹಡ್ ಡೈನೋಸಾರಸ್ ಬದ್ಲಲ್ಲೊ ಹವೊ ವಾ ದುಸ್ರ್ಯಾ ಕಾರಣಾಕ್ ಲಾಗೊನ್ ನಪಂಯ್ಚ್ ಜಾಲ್ಯಾರಿ ಜರ್‍ಲೆ ಆಜೂನ್ ಆಸಾತ್. ಹಿಟ್, ಬೆಗಾನ್, ಲಕ್ಷ್ಮಣ ರೇಖೆ ತಸಲ್ಯಾ ಕಂಪ್ಣೆನಿಂ ಜರ್‍ಲ್ಯಾಂಕ್ ಮಾರ್‍ನ್ ತಾಣಿಂ ಜಿಯೆಂವ್ಚೆಂ ಉದ್ಯಮ್ ಸುರ್‍ವಾತ್ಲ್ಯಾರಿ ಜರ್‍ಲ್ಯಾಂಚಿ ಸಂತತ್ ನಿರ್ನಾಮ್ ಕರುಂಕ್ ಕೊಣಾಚ್ಯಾನಿ ಸಾಧ್ಯ್ ಜಾಂವ್ಕ್ ನಾ. ತಶೆಂ ಜಾವ್ನ್ ಜರ್‍ಲೊ Resistance ವಾ ಪ್ರತಿರೋಧ್‌ಪಣಾಕ್ ವರ್ತೆಂ ನಿದರ್ಶನ್ ಘರಾಂತ್, ಆಫೀಸಾಂತ್, ಕುಜ್ನಾಂತ್-ಕಾಕ್ಸಾಂತ್, ಧರ್‍ಣಿರ್-ವೊಣೊದಿರ್-ಆಲ್ತಾರಿರ್, ವಸ್ತುರಾಂ ದವರ್‍ಚ್ಯಾ ಗೋದ್ರೆಜಿಂತ್ ವಾ ಪಯ್ಶೆ ಲಿಪಯ್‌ಯ್ಲ್ಯಾ ಲಾಕರಾಂತ್, ರೈಲ್ವೆ ಸ್ಟೇಶನ್-ಬಸ್‌ಸ್ಟ್ಯಾಂಡ್-ಏರ್‌ಪೋರ್ಟ್, ದೋಣಿರ್ ವಾ ವಿಮಾನಾರ್, ಮರುಭೂಮಿಂತ್ ವಾ ಹಿಮಾಲಾಂತ್, ಸ್ವಿಚ್‌ಬೋರ್ಡಾಂತ್ ವಾ ಕಂಪ್ಯೂಟರ್ ಮರ್ ಬೋರ್ಡಾಂತ್ ದಿಷ್ಟಿಕ್ ಪಡ್ಚೆ ಜರ್‍ಲೆ ದೆವಾ ಸಾರ್ಕೆಂ ಸರ್ವಂತರ್ಯಾಮಿ. Save Tiger ಅಸ್‌ಲ್ಲ್ಯಾ ಪರಿಂ Save Cockroache ಮ್ಹಳ್ಳಿಂ ಅಭಿಯಾನ್ ಕೊಣೆಂಯಿ ಕೆಲ್ಲೆಂನಾ. ಖಂಚ್ಯಾಯಿ ಪ್ರಾಣಿ ದಯಾ ಸಂಘಚ್ಯಾನಿ “ಜರ್‍ಲ್ಯಾಂಕ್ ಉರಂವ್ಯಾಂ” ಮ್ಹಣ್ ಬೊಬಾಟ್ ಘಾಲಿನಾಂ. ತರೀಪುಣ್ ಜರ್‍ಲೆ ಸ್ವಂತ್ ಪಾಯಾನಿಂ ಉಬೆ ಜಾವ್ನ್ ಹರ್‍ಯೇಕ್ ಜಾಗ್ಯಾರ್ ಮಿಶಿಯೊ ರಿಗೊನ್ ಅಭಿಮಾನಾನ್ ಭೊಂವುನ್ ಆಸಾತ್.

ಸಂಪ್ಣಿ

ಹರ್‍ಯೇಕ್ ವ್ಯಂಗ್ಯ್ ವಾ ವಿಡಂಬನಾ ಪಾಟ್ಲ್ಯಾನ್ ಖಂತ್, ದೂಖ್, ಬೆಜರಾಯ್ ಆಸ್ತಾ. ಜರ್‍ಲ್ಯಾ ರುಪಾರ್ ಆಸ್ಚ್ಯಾ ತರ್ನಾಟ್ಯಾಂಕ್ ಮೊಸ್ತುಂಚ್ಯಾಕಿ ತಾಂಚೆ ಲಾಗಿಂ ಸಂವಾದ್ ಚಲಯ್ಲ್ಯಾರ್ ದೇಶಾಚ್ಯಾ ಉದಾರ್‍ಲತೆಕ್ ನವಿ ವಾಟ್ ನಿರ್ಮಾಣ್ ಜಾತೆಲಿ. ತೆಂ ಸೊಡ್ನ್ ಜರ್‍ಲ್ಯಾಂಕ್ ನಾಸ್ ಕರ್‍ತಾಂ ಮ್ಹಣ್ ಸರ್ಕಾರ್ ಭಾಯ್ರ್ ಸರ್‍ಲೊ ತರ್ ಬಿಜೆಪಿನ್‌ಚ್ ಘರ್ ಖಾಲಿ ಕರ್‍ಚೆ ದೀಸ್ ಆಯ್ಲ್ಯಾರಿ ಆಜಾಪ್ ನ್ಹಯ್.

ಮನೋಜ್ ಫೆರ್ನಾಂಡಿಸ್ ಕಿರೆಂ