ಆಜ್ ಹರ್‍ಯೇಕ್ ಭುರ್ಗೆಂ ಸ್ಮಾರ್ಟ್‌ಪೊನ್ ವಾಪಾರ್‍ತಾ. ಆಜ್ ಘರಾಂನಿ ಭುರ್ಗಿಂ ತಾಂಚ್ಯಾಚ್ ಸಂಸಾರಾಂತ್ ಸ್ಮಾರ್ಟ್‌ಫೊನಾಂನಿ ವ್ಯಸ್ತ್ ಜಾಲ್ಯಾಂತ್. ಸ್ಮಾರ್ಟ್‌ಪೊನಾಂ ವಾಪಾರ್ನ್ ಥೊಡ್ಯಾ ಸಂಗ್ತಿಂನಿ ಸ್ಮಾರ್ಟ್ ಜಾಲ್ಯಾಂತ್ ಜಾಂವ್ಕ್ ಪುರೊ ಜಾಯ್ತಿಂ ತಾಚಿಂ ಗುಲಾಮ್ ಜಾಂವ್ಕ್ ಪಾವ್ಲ್ಯಾಂತ್. ಮೊಬಾಯ್ಲಾರ್ ಬರೆಂ ಆಸಾ ವ್ಹಯ್; ಶಿಕ್ಪಾಕ್, ಜಾಣ್ವಾಯೆಕ್ ಗರ್ಜೆಚೆಂ ಮೆಳ್ತಾ ವ್ಹಯ್ ಪುಣ್ ತಾಂತುನ್ ತಿತ್ಲೆಂಚ್ ಮ್ಹೆಳೆಂ ಭರೊನ್ ಗೆಲಾಂ. ಬರ್‍ಯಾ ಸಾಹೆತಿ ಸಾಂಗಾತಾ ಅಶ್ಲೀಶ್ ಸಾಹೆತ್ ಜಾಯ್ತಿ ಆಸಾ. ಆಧುನಿಕ್ ತಂತ್ರಗ್ಯಾನಾಚಿ ಪ್ರಗತಿ ಆಮಿ ನೆಗಾರುಂಕ್ ಜಾಯ್ನಾ ವ್ಹಯ್; ಪುಣ್ ಡಿಜಿಟಲ್ ಸ್ಕ್ರೀನಾ ಮುಕಾರ್ ಆಮಿ ಖುರ್ಚುಂಚ್ಯಾ ವೆಳಾವಿಶಿಂ ಆಮ್ಚೆಂ ಗಮನ್ ದವರ್‍ಚೆಂ ಗರ್ಜೆಚೆಂ. ಇಂಟರ್‌ನೆಟ್, ಸ್ಮಾರ್ಟ್‌ಫೊನಾಂ, ಮನ್ಶ್ಯಾ ಪ್ರಗತೆಚಿಂ ಫಳಾಂ ವ್ಹಯ್; ಪುಣ್ ಕುಟ್ಮಾ ಜಿವಿತ್, ಸಾಮಾಜಿಕ್ ಮೆತೆರ್‍ಪಣ್, ಖೆಳ್ ಮನೋರಂಜನ್ ಕೊನ್ಶ್ಯಾಕ್ ಲೊಟುನ್ ಮೊಬ್ಲಾಯ್ಲಾರ್‌ಚ್ ಚಿಡ್ಕೊನ್ ರಾವ್ಲ್ಯಾರ್ ತಿ ಏಕ್ ಮಾನಸಿಕ್ ಪಿಡಾ ಜಾಂವ್ಚ್ಯಾಂತ್ ದುಬಾವ್ ನಾ. ದೆಕುನ್ ದೆವಾದಿನ್ ಪಾಪಾ ಪ್ರಾನ್ಸಿಸಾನ್ ಸಾಂಗ್ಲೆಲಿ ಜಾಗ್ವಣೆಚಿಂ ಉತ್ರಾಂ “ಭುರ್ಗ್ಯಾಂಕ್ ಕಂಪ್ಯೂಟರ್ ದಿಯಾ, ಪುಣ್ ತಿ ಕಂಪ್ಯೂಟರಾಂ ಸಾಲಾಂತ್ ದವರಾ. ಸಕ್ಕಡ್ ಮೆಳ್ಚ್ಯಾ, ಭೊಂವ್ಚ್ಯಾ ಜಾಗ್ಯಾರ್ ತುಮ್ಚಿಂ ಭುರ್ಗಿಂ ಇಂಟರ್‌ನೆಟ್ ವಾಪಾರುಂದಿಂತ್”.

ಮೊಬಾಯ್ಲ್, ಇಚಿಟರ್ನೆಟ್, ಗೂಗಲಾಚ್ಯಾ ಸಂಸಾಂರಾಂತ್ ಆಜ್‌ಕಾಲ್ ಭುರ್ಗ್ಯಾಂಕ್ ಸಕ್ಕಾಡ್ ಲಾಭ್ತನಾ ವ್ಹಡಿಲಾಂಚಿ ಜವಬ್ದಾರಿ ಜೊಡ್ತಿ ಜಾಲ್ಯಾ. ಭುರ್ಗ್ಯಾಂನಿ ತಾಂಚೆಚ್‌ಸಕ್ತಿ ಲಂಯ್ಗಿಕತೆವಿಶಿಂ ಚೂಕ್ ಸಮ್ಜೊಣಿ ಜೊಡ್ಚ್ಯಾ ಪಯ್ಲೆಂ ಭುರ್ಗ್ಯಾಂ ಥಂಯ್ ಜೊಕ್ತ್ಯಾ ಪ್ರಾಯೆರ್ ಲಂಯ್ಗಿಕತೆಚೆಂ ಸಾರ್ಕೆಂ ಪರಿಕಲ್ಪಣ್ ರುತಾ ಕರ್‍ಚೆಂ ಚಡ್ ಆನಿ ಚಡ್ ಗರ್ಜೆಚೆಂ ಜಾಂವ್ಕ್ ಪಾವ್ಲಾಂ. ಭುರ್ಗಿಂ ವಾಡೊನ್ ಯೆತಾನಾ ತಾಂಚ್ಯಾ ಮಾನಸಿಕ್ ಆನಿ ದೈಹಿಕ್ ವಾಡಾವಾಳೆವಿಶಿಂ ಆನಿ ತ್ಯಾ ಬದ್ಲಾವಣೆಕ್ ಹೊಂದ್ವೊನ್ ಜಿಯೆಂವ್ಚೆವಿಶಿಂ, ಲಂಯ್ಗಿಕತೆಚೊ ಉದ್ದೇಶ್ ಆನಿ ಶೆವೊಟಾವಿಶಿಂ ತಾಂಕಾಂ ಸಾರ್ಕೆಂ ಕೌನ್ಸೆಲಿಂಗ್ ಆನಿ ಮಾರ್ಗದರ್ಶನಾಚಿ ಗರ್ಜ್ ಆಸಾ. ತಾಂಚೆಸಂಗಿಂ ಚಡ್ ಆನಿ ಚಡ್ ವೇಳ್ ಖರ್ಚುಂಚೊ ಗರ್ಜೆಚೆಂ. ಹಿ ಸಮ್ಜೊಣಿ ಮುಕಾರ್ ತಿ ವಾಡೊನ್ ವ್ಹಡ್ ಜಾತಾಚ್ ತಾಂಚ್ಯಾ ಮಿತ್ರಾಂಕ್, ಪ್ರೇಮಿ ವ ಪ್ರಮಿಕಾಕ್ ಆನಿ ಆನಿ ಶೆವೊಟಿ ಆಪ್ಲ್ಯಾ ಜಿಣ್ಯೆ ಸಾಂಗಾತಿಕ್ ಸಾರ್‍ಕೆಯೆ ರಿತಿನ್ ಸಮ್ಜೊಂಕ್, ಕುಡಿಕ್ ಆನಿ ಭೊಗ್ಣಾಂಕ್ ಗೌರವ್ ದಿಂವ್ಕ್ ತಿ ಶಿಕ್ತೆಲಿಂ.

ತರ್ ಭುರ್ಗಿಂ ವಾಡೊನ್ ವೆತಾನಾ ವ್ಹಡಿಲಾಂನಿ ಕಿತೆಂ ಕರುಂಕ್ ಜಾಯ್? ತುಮ್ಚ್ಯಾ ಭುರ್ಗ್ಯಾಂಕ್ ಸಮ್ಜೊನ್ ಘೆಯಾ: ಭುರ್ಗ್ಯಾಂ ಆನಿ ತುಮ್ಚೆ ಮದೆಂ ಮ್ಯೂಚಲ್ ಪಾತ್ಯೆಣಿ ಆಸಾ. ಕರಾ. ಭುರ್ಗ್ಯಾಂಚ್ಯಾ ಚಟುವಟಿಕೆಂನಿ ಪಾತ್ರ್ ಘೆಯಾ, ತಾಂಚೆ ಸಂಬಾಶಣ್, ತಾಣಚೆಂ ದೂಕ್ ವಾಂಟುನ್ ಘೆಯಾ ಆನಿ ತಾಂಚೆಂ ಭುರ್ಗೆಂಪಣ್ ಅರ್ಥ್ ಕರುನ್ ಘೆಯಾ. ಹ್ಯಾವರ್ವಿಂ ತುಮ್ಚ್ಯಾ ಭುರ್ಗ್ಯಾಂಸಂಗಿ ತುಮ್ಚೊ ಸಂವಾದ್ ಚಡ್ ಆನಿ ಚಡ್ ಫಳಾಭರಿತ್ ಜಾತಾಲೊ.

ಪರಸ್ಪರ್ ಗೌರವ್ ಆನಿ ಸಮಾನಾತಾ: ಭುರ್ಗ್ಯಾಂಚ್ಯಾ ಸವಾಲಾಂಕ್ ಸಮಂಜಸ್, ಸ್ಪಶ್ಟ್ ಆನಿ ನಿರ್ಧಿಶ್ಟ್ ಜಾಪಿ ದಿಯಾ. ಭುರ್ಗ್ಯಾಂಕ್ ಶೆರ್ಮಾಂವ್ ದಿಂವ್ಚೊ ನಾ ಬಗಾರ್ ತಾಂಕಾ ಅx ಜಾಂವ್ಚ್ಯೆ ರಿತಿನ್ ಸಮ್ಜಾಯಾ. ತಾಂಚೆರ್ ಹುಕುಮ್ ಚಲಯ್ನಾಕಾತ್. ಆಕ್ಮಾನ್ ಕರ್‍ಚೆ ತಸಲಿ ಭಾಸ್ ಸಂವಾಂಧಾಂತ್ ವಾಪಾರಿನಾಕಾತ್.

ಸೊಸ್ಣಿಕಾಯ್ ಆನಿ ಸಮ್ಜಿಕಾಯ್: ಭುರ್ಗ್ಯಾಂನಿ ಸವಲಾಲಾಂ ವಯ್ರ್ ಸವಾಲಾಂ ಕರ್‍ತಾನಾ ತಾಂಚೆರ್ ಶಿಣಾನಾಕಾತ್. ಲಂಯ್ಗಿಕ್ ಸಂಗ್ತಿವಿಶಿಂ ತುಮ್ಚಿ ನದರ್ ಆನಿ ತುಮ್ಚ್ಯಾ ಭುರ್ಗ್ಯಾಂಚಿ ನದರ್ ವೆಗ್ಳಿ ಆಸಾ ತರ್ ರಾಗಾರ್ ಜಾಯ್ನಾಕಾತ್. ಸಮಾಧಾನೆನ್ ತಾಂಕಾಂ ಆಯ್ಕಾ ಆನಿ ಸೊಸ್ಣಿಕಾಯೆನ್ ಸಮ್ಜಯಾ.

ಪ್ರಾಮಾಣಿಕ್ ಆನಿ ವಾಸ್ತವಿಕ್ ಜಾಯಾ: ಲಂಯ್ಗಿಕತೆವಿಶಿಂ ಭುರ್ಗ್ಯಾಂಚ್ಯಾ ಸವಾಲಾಂಕ್ ಜೊಕ್ತಿ ಜಾಪಿ ದಿಯಾ. ತಾಂಚಿ ಆಸಕ್ತ್ ನಿವಂಚೆಖಾತಿರ್ ತುಮ್ಚ್ಯೊಚ್ ಜಾಪಿ ದೀನಾಕಾತ್. ಆರ್ ತುಮ್ಕಾಂ ಜಾಪಿ ಕಳಿತ್ ನಾ ತರ್ ತಾಂಚೆಸಂಗಿಂ ಬಸೊನ್ ಸಾರ್ಕಿ ಜಾಪ್ ಸೊದುಂಕ್ ಪ್ರಯತ್ನ್ ಕರಾ.

ಭುರ್ಗ್ಯಾಂಚಿ ಸಾಮಾಜಿಕ್ ವರ್ತುಲಾಂ ವಾಡಯಾ: ಬರಿ ಇಷ್ಟಾಗತ್ ರುತಾ ಕರುಂಕ್, ಪಠ್ಯೇತರ್ ಚಟುವಟಿಕೆಂನಿ ವಾಂಟೊ ಘೆಂವ್ಕ್ ತಾಂಕಾ ಹುರುಪ್ ಆನಿ ಹುಮೆದ್ ದಿಯಾ. ಶಾಳಾಂತ್ ಮೆಸ್ತ್ರಿ-ಮೆಸ್ತ್ರಿಣೆ ಸಂಗಿ ಸಂವಾದ್ ಚಾಲು ದವರುಂಕ್ ಉತ್ತೇಜನ್ ದಿಯಾ. ಹೆರಾಂಸಂಗಿಂ ಭರ್‍ಸುನ್ ಜಿಯೆಂವ್ಕ್ ಪ್ರೋತ್ಸಾಹ್ ದಿಯಾ.

ಭುರ್ಗ್ಯಾಂಕ್ ಕಂಟ್ರೊಲ್ ಕರಿನಾಕಾತ್ ಬಗಾರ್ ಮ್ಯಾನೇಜ್ ಕರಾ. ಆರ್ ಘರಾಂಥ್ ಕಂಟ್ರೊಲ್ ಕೆಲೆಂ ತರ್, ತಸಲೊ ವಿಶಯ್ ಭುರ್ಗೆಂ ಬಾಯ್ರ್ ಥಾವ್ಮ್ ಶಿಕೊವ್ನ್ ವಾಯ್ಟ್ ಪರಿಣಾಮ್ ಜಾಂವ್ಚಿ ಸಾಧ್ಯತಾಯ್ ಆಸಾ. ಎಕಾ ಭುರ್ಗ್ಯಾಕ್ ಸಾರ್ಕ್ಯಾ ರಿತಿನ್ ವಾಡೊಂಕ್ ಖಾಣ್-ಜೆವಾಣ್, ಶಿಕಾಪ್ ಕಿತ್ಲೆಂ ಗರ್ಜೆಂಚೆಂಗೀ ಲಂಯ್ಗಿಕ್ ಶಿಕ್ಷಣ್ ತಿತ್ಲೆಂಚ್ ಗರ್ಜೆಚೆಂ ಮ್ಹಣ್ ಲೆಕುಂಕ್ ಜಾಯ್.

ನವೆಂಬರ್ ಮ್ಹಯ್ನೊ ಭುರ್ಗ್ಯಾಂಚೊ ಜಾಲ್ಲ್ಯಾನ್ ಭುರ್ಗ್ಯಾಂಕ್ ಸಂಬಂದ್ ಜಾಲ್ಲ್ಯಾ ಸಾದ್ಯಾ ಸಂಗ್ತಿಂವಿಶಿಂ ಚಿಂತುಂಕ್ ಆವ್ಕಾಸ್ ಕರ್‍ನ್ ದಿಲಾ. ಖಂಡಿತ್ ಜಾವ್ನ್ ಹೊ ಅಂಕೊ ತುಮ್ಕಾಂ ರುಚ್ತಲೊ ಮ್ಹಳ್ಳಿ ಮ್ಹಜಿ ಪಾತ್ಯೆಣಿ.

ಬಾಪ್ ಐವನ್ ಸೊಜ್, ಕಾರ್ಮೆಲಿತ್