1947, ಅಗೊಸ್ಟಾಚ್ಯೆ 15 ತಾರಿಕೆರ್ ಭಾರತಾಕ್ ಬ್ರಿಟಿಶಾಂಥಾವ್ನ್ ಸುಟ್ಕಾ ಲಾಭ್ಲ್ಯಾ ಉಪ್ರಾಂತ್ ದೇಶ್ ಪ್ರಗತೆಚ್ಯೆ ವಾಟೆನ್ ಚಮ್ಕುಂಕ್ ಲಾಗ್ಲೊ. ಸುಟ್ಕಾ ಲಾಬೊನ್ ರುಪ್ಯಾಳೊ ಸಂಭ್ರಮ್ ಆಚರಣ್ ಕರ್‍ತಾನಾ ಪ್ರಧಾನ್ ಮಂತ್ರಿ ಇಂದಿರಾ ಗಾಂದಿನ್ ಆಮ್ಚೊ ದೇಶ್ ಅಜೂನೀ ಬಲಿಶ್ಟ್ ಆಸಾ, ಲೋಕ್‌ಶಾಹಿಚಿಂ ಪಾಳಾಂ ಘಟ್ಟ್ ರೊಂಬ್ಲ್ಯಾಂತ್ ಆನಿ ಆಮಿ ಪ್ರಗತೆ ತೆವ್ಶಿಂ ಮೆಟಾಂ ಕಾಡುನ್ ಆಸಾಂವ್ ಮ್ಹಣ್ ದೆಶಾಕ್ ಆಪ್ಲೊ ಸಂದೇಶ್ ಪಾಟಯ್ಲೊ.

ತಾಚ್ಯಾ ಉಪ್ರಾಂತ್ ದೆಶಾಂತ್ ಸವ್ಕಾಸ್ ಪರಿಸ್ಥಿತಿ ಭಿಗಡ್ಲಿ. 1974-ಂತ್ ಗುಜ್ರಾತಾಂತ್ ರಾಶ್ಟ್ರ್‌ಪತಿ ಆಡಳ್ತೆಂ ಆಯ್ಲೆಂ. ಬಿಹಾರಾಂತ್ ವ್ಹಡ್ ಮಟ್ಟಾಚಿ ಚಳ್ವಳ್ ಸುರು ಜಾಲಿ. ಲೋಕ್ ರಸ್ತ್ಯಾಕ್ ದೆಂವ್ಲೊ. ತ್ಯಾಚ್ ವೆಳಾರ್ ದೇಶ್‌ಭರ್ ರಯ್ಲ್ ವಾವ್ರಾಡ್ಯಾಂಚಿ ಚಳ್ವಳ್ ಸುರು ಜಾಲಿ. ಲೋಕ್ ಕಶ್ಟಾಲೊ. 1971ವ್ಯಾ ವರ್‍ಸಾ ಲೋಕ್‌ಸಭಾ ಎಲಿಸಾಂವಾಂತ್ ರಾಯ್‌ಬರೇಲಿಂತ್ ಇಂದಿರಾಗಾಂಧಿ ಥೊಡ್ಯಾಚ್ ವೊಟಾಂನಿ ಜಿಕ್ಲೆಲ್ಯಾ ಉಪ್ರಾಂತ್ ತಿಚೆರ್ ದಾವೊ ಮಾಂಡ್ಲೊ ಆನಿ ರಾಜಕೀಂiiಂತ್ ಘುಸ್ಪೊಡ್ ಗೊಂದೊಳ್ ಉಬ್ಜಲೊ. ಅಸಲ್ಯಾ ಪರಿಸ್ಥಿತೆಂತ್ 1975 ಜೂನ್ ೨೫ವೆರ್ ಇಂದಿರಾಗಾಂಧಿನ್ ಎಮರ್ಜೆನ್ಸಿ ಜಾರಿಯೆಕ್ ಹಾಡ್ಲಿ. ಸರ್ಕಾರಾವಿರೋಧ್ ಉಲಯ್ತೆಲ್ಯಾಂಕ್ ಬಂಧ್ ಕೆಲೆಂ, ಲೊಕಾಂಕ್ ರಸ್ತ್ಯಾಕ್ ದೆಂವೊಂಕ್ ಆಡ್ಕಳ್ ಹಾಡ್ಲಿ. ಹಿ ಸ್ಥಿತಿ ಮಾರ್ಚಾಚ್ಯೆ 21 ಪರ್ಯಾಂತ್, 21 ಮ್ಹಯ್ನೆ ಉರ್‍ಲಿ. 1977ವ್ಯಾ ವರ್‍ಸಾ ಜನೆರಾಂತ್ ಲೋಕ್‌ಸಭಾ ಎಲಿಸಾಂವ್ ಘೋಶಿತ್ ಕೆಲೆಂ ಆನಿ ಹ್ಯಾ ಎಲಿಸಾಂವಾಂತ್ ಕೊಂಗ್ರೆಸ್ ಸಲ್ವಲೆಂ ಆನಿ ಮೊರಾರ್ಜಿ ದೇಸಾಯಿ ಕಾಂಗ್ರೆಸಾಭಾಯ್ಲೊ ಪಯ್ಲೊ ಪ್ರಧಾನಿ ಜಾಲೊ.

ಎಮರ್ಜೆನ್ಸಿಕ್ 50 ವರ್‍ಸಾಂ ಸಂಪ್ತನಾ ಮೋದಿನ್ ಹೆಂ ಕರಾಳ್ ಘಡಿತ್ ಪರತ್ ಉಡಾಸಾಕ್ ಹಾಡ್ಲಾಂ. ಪರ್ಜೆರಾಜಾಚ್ಯೆ ಚರಿತ್ರೆಂತ್ ಹೆಂ ಏಕ್ ಕಾಳೆಂ ಖತ್ ಮ್ಹಣ್ ಆಪ್ಲಿ ಅಭಿಪ್ರಾಯ್ ಉಚಾರ್‍ಲ್ಯಾ. ಪ್ರಧಾನ್‌ಮಂತ್ರಿ ಇಂದಿರಾಗಾಂಧಿನ್ ಎಮರ್ಜೆನ್ಸಿಚ್ಯಾ 21 ಮ್ಹಯ್ನಾಂನಿ ಸಂವಿಧಾನಾಚಿಂ ತತ್ವಾಂ ಸಂಪೂರ್ಣ್ ರಿತಿನ್ ತಿರಸ್ಕಾರ್ ಕೆಲ್ಯಾಂತ್. ಮನ್ಶಾಚಿ ಮುಳಾವಿಂ ಹಕ್ಕಾಂ, ಮಾಧ್ಯಮ್ ಸ್ವಾತಂತ್ರ್ಯ್, ಸ್ಥಗಿತ್ ಕರ್‍ನ್ ಪಾರ್ಲಿಮೆಂಟಾಂತ್ ಅಭಿಪ್ರಾಯ್ ವ್ಯಕ್ ಕರುಂಕೀ ಆವ್ಕಾಸ್ ದೀಂವ್ಕ್ ನಾ. ನ್ಯಾಯಾಂಗ್ ವ್ಯವಸ್ಥಾ ಆಪ್ಲ್ಯಾ ಮುಟಿಭಿತರ್ ಧವರ್‍ನ್ ಅಧಿಕಾರ್ ಚಲಯ್ಲಾ. ರಾಜಕೀಯ್ ಮುಕೆಲ್ಯಾಂಕ್, ಸಮಾಜ್ ಸೆವಕಾಂಕ್, ದುಬ್ಳ್ಯಾಂಕ್ ತಾಂಚೊ ಮಾನ್ ಕಾಡ್ನ್ ತಾಂಕಾಂ ಜಯ್ಲಾಂತ್ ಘಾಲಾಂ. ಹೊ ದೀಸ್ ಸಂವಿಧಾನಾಚಿಂ ತತ್ವಾಂ ಹತ್ತ್ಯಾ ಕೆಲ್ಲೊ ದೀಸ್ ಮ್ಹಣ್ ತಾಣೆಂ ವೊಲಾಯ್ಲಾಂ. ಹಾಚೆ ವಿರೋಧ್ ವಾವ್ರ್ ಕೆಲ್ಲ್ಯಾ ವ್ಯಕ್ತಿಂಚೊ ಉಗ್ಡಾಸ್ ಕಾಡುಂಕ್ ಆನಿ 1977ಕ್ ಕೊಂಗ್ರೆಸ್ ಸರ್ಕಾರ್ ಸಲ್ವೊಂಕ್ ವಾವುರ್‍ಲೆಲ್ಯಾ ಸರ್ವಾಂಚೊ ತಾಣೆಂ ಉಗ್ಡಾಸ್ ಕಾಡ್ಲಾ. ಎಮರ್ಜೆನ್ಸಿ ಕಾಳಾರ್ ಆಸ್‌ಲ್ಲ್ಯಾಂನಿ ತಾಂಚೊ ಕರಾಳ್ ಅನ್ಭೋಗ್ ಸಾಮಾಜಿಕ್ ಜಾಳಿಜಾಗ್ಯಾಂನಿ ವಾಂಟುನ್ ಘೆಜೆ ಮ್ಹಣ್ ಕಳಯಿಲ್ಲೆಂಯ್ ಆಸಾ. ಹಾಕಾ ದೆಶಾಚ್ಯಾ ವೆವೆಗ್ಳ್ಯಾ ಕೊನ್ಶಾಂ ಥಾವ್ನ್ ಬೈ ಪ್ರತಿಕ್ರಿಯಾ ದಿಲ್ಲಿಯ್ ಆಸಾ. ಆಪುಣ್ ಆರ್‌ಎಸ್ಸೆಸ್ಸಾಚೊ ಯುವ ಪ್ರಚಾರಕ್ ಜಾವ್ನ್ ವಾವ್ರ್ ಕರ್‍ನ್ ಪರ್ಜೆರಾಜ್ ರಾಕುಂಕ್ ಮೆಳ್‌ಲ್ಲೊ ಆವ್ಕಾಸ್ ಉಡಾಸ್ ಕಾಡ್ನ್ ಎಮರ್ಜೆನ್ಸಿಚೆ ದೀಸ್ ನೆರಾವ್ನ್ “The Emergency Diaries-Years that Forged a Leader”  ಮ್ಹಳ್ಳೊ ಬೂಕ್ ಉಜ್ವಾಡಾಕ್ ಹಾಡ್ಲಾ ಮಾತ್ರ್ ನ್ಹಯ್, ಆಪ್ಲೊ ಸರ್ಕಾರ್ ಭಾರತಾಚ್ಯಾ ಸಂವಿಧಾನಾಚಿಂ ತತ್ವಾಂ ರಾಕೊನ್ ವ್ಹರುನ್ ವಿಕಸಿತ್ ಭಾರತ್ ಸ್ಥಾಪಿತ್ ಕರ್‍ಚೆಂ ದಿಶೆನ್ ವಾವುರ್‍ನ್ ಆಸಾ ಮ್ಹಣ್ ಮೊದಿನ್ ಕಳಯ್ಲಾಂ.

ವ್ಹಯ್ ಭಾರತ್ 79 ವರ್‍ಸಾಕ್ ಪಾಂಯ್ ತೆಂಕುನ್ ಆಸಾ. ವಾಸ್ತವಿಕ್ ಸ್ಥಿತಿ ಪಳೆಂವ್ಕ್ ಪಾಟಿಂ ದೀಶ್ಟ್ ಘಾಲ್ಯಾರ್ ಕಳ್ತಾ, ಚಡಿತ್ ಕಾಂಯ್ ಬದ್ಲುಂಕ್ ನಾ. ಉತ್ರಾಂನಿ ಸಾಂಗ್‌ಲ್ಲೆಂ ಕಾರ್ಯಾಂನಿ ದಿಸನಾ. ಸ್ವಾರ್ಥಾನ್, ಭಶ್ಟಾಚಾರಾನ್ ದೇಶ್ ಲಾಚಾರ್ ಜಾಲಾ. ಭೋವ್‌ಸಂಸ್ಕೃತಿಕ್ ಆನಿ ಸೆಕುಲರ್ ಜಾವ್ನ್ ಆಸ್‌ಲ್ಲ್ಯಾ ಆಮ್ಚ್ಯಾ ದೆಶಾಚಿ ಸ್ಥಿತಿ ಭಿಗಡ್ಲ್ಯಾ. ದೆಶಾಚ್ಯಾ ಸಂವಿಂಧಾನಿಕ್ ಸಂಸ್ಥ್ಯಾಂಚೊ ವಾಯ್ಟ್ ವಾಪಾರ್ ಜಾವ್ನ್ಂಚ್ ಆಸಾ. ಪ್ರಸ್ತುತ್ ಏಕ್ ದೇಶ್, ಏಕ್ ಭಾಸ್ ಏಕ್ ಸಂಸ್ಕೃತಿ ಜಾಯ್ಜೆ ಮ್ಹಳ್ಳೆಂ ಚಿಂತಾಪ್ ಬಳಾಧಿಕ್ ಜಾವ್ನ್‌ಚ್ ಆಸಾ. ಹೆಂ ನೀಜ್ ಜಾವ್ನ್ ಮಾರೆಕಾರ್. ಧರ್ಮ್ ಆನಿ ರಾಜಕೀಯ್ ಏಕ್ ಜಾಲೆಂ ತರ್ ತೆಂ ಖಂಡಿತ್ ಜಾವ್ನ್ ಅಪಾಯಾಚೆಂ! ಗಾಂಧೀಜಿನ್ ಸಾಂಗ್‌ಲ್ಲಿ ಉತ್ರಾಂ “ಧರ್ಮ್ ರಾಶ್ಟ್ರೀಯತೆಚಿ ಪರಿಕ್ಶಾ ಕರ್‍ಚೆಂ ಸಾಧನ್ ನ್ಹಯ್, ಧರ್ಮ್ ದೆವಾ ಆನಿ ಮನ್ಶಾಮಧ್ಲಿ ವಯುಕ್ತಿಕ್ ಗಜಾಲ್”. ಭಾರತೀಯ್ ಸಂವಿಧಾನಾಚೊ ಶಿಲ್ಪಿ ಮ್ಹಣ್ ನಾಂವಾಡ್ಲಲೊ ಡಾ. ಬಿ. ಆರ್. ಅಂಬೇಡ್ಕರಾನ್ 1938-ಂತ್ ಬೊಂಬೆ ಅಸೆಂಬ್ಲಿತ್ ಸಾಂಗ್‌ಲ್ಲಿ ಉತ್ರಾಂ “ಭಾರತೀಯ್ ರಾಶ್ಟ್ರ್‌ವಾದಾಚೊ ಪ್ರಮುಖ್ ಉದ್ದೇಶ್, ಹರ್‍ಯೇಕಾ ಭಾರತಿಯಾಥಂಯ್ “ಹಾಂವ್ ಭಾರತೀಯ್’ ಮ್ಹಳ್ಳೆಂ ಬೊಗಪ್ ಉಬ್ಜಶೆಂ ಕರ್‍ಚೆಂ. ಆಮಿ ಸರ್ವ್ ಭಾರತೀಯ್. ಭಾರತ್ ದೇಶ್, ಹಾಂಗಾಸರ್ ಜಲ್ಮಲ್ಲ್ಯಾ ಆನಿ ಲ್ಹಾನ್‌ವ್ಹಡ್ ಜಾಲ್ಲ್ಯಾ ಹರ್‍ಯೆಕಾ ವ್ಯಕ್ತಿಚೊ ಜಾವ್ನಾಸಾ. ಸ್ವತಂತ್ರ್ ಭಾರತ್ ನ್ಹಯ್ ಏಕ್ ಹಿಂದೂ ರಾಜ್ಯ್ ವಾ ಬಹುಮತ್ ಆಸ್ಚ್ಯಾ ಖಂಯ್ಚ್ಯಾಕ್ ಎಕಾ ಪಂಗ್ಡಾಕ್ ಫಾವೊ ಜಾಲ್ಲೊ. ಭಾರತ್ ಸಕ್ಡಾಂಚೆಂ. ‘ವಿವಿಧತೆಂತ್ ಏಕತಾ’ ಮ್ಹಳ್ಳ್ಯಾ ಚಿಂತ್ಪಾನ್ ಮಾತ್ರ್ ಭಾರತ್ ಪ್ರಗತೆಚ್ಯಾ ಪಾಂವ್ಡ್ಯಾಕ್ ಪಾವೊಂಕ್ ಸಾಧ್. ಹೆಂ ಚಿಂತಾಪ್ ಹ್ಯಾ ವರ್‍ಸಾ ಸುಟ್ಕೆ ಸಂಭ್ರಮ್ ಆಚರಣ್ ಕರ್‍ತಾನಾ ಬಳಾಧಿಕ್ ಜಾಂವ್ದಿ.

ಸಮೇಸ್ತಾಂಕ್ ಮರಿಯೆಚ್ಯಾ ಸರ್ಗಿಂ ಘೆಣ್ಯಾಚೆ ಆನಿ ದೆಶಾಚ್ಯಾ ಸುಟ್ಕೆಚ್ಯಾ ಫೆಸ್ತಾಚೆ ಉಲ್ಲಾಸ್ ಪಾಟಯ್ತಾಂ.

ಬಾಪ್ ಐವನ್ ಸೊಜ್, ಕಾರ್ಮೆಲಿತ್