📰ಡೆರೊಶ್, ಬಿಸಿ, ಕೆನಡಾ: ವ್ಯಾಂಕೊವಾಚಾ Deroche ಕಾರ್ಮೆಲ್ ಗುಡ್ಯಾರ್, ಜೆಜುಚ್ಯಾ ಲ್ಹಾನ್‌ಫುಲ್ ಕೊವೆಂತಾಚಿ (Little Flower Monasstery) ನವಿ ವೈಬಸೈಟ್ https://littleflowermonastery.com/ ಉಗ್ತಾವಣ್ ಕೆಲಿ. ಕೆನಡಿಯನ್ ಕಾರ್ಮೆಲೈಟ್ ಚಾರೀಟೇಬಲ್ ಸೊಸೈಟಿಚೊ ಅಧ್ಯಕ್ಷ್ ದೊ. ಬಾಪ್ ರುಡೋಲ್ಪ್ ಸೊಜಾಚ್ಯಾ ತಶೆಂಚ್ ಕೆನಡಾಂತ್ಲ್ಯಾ ಕಾರ್ಮೆಲಿತ್ (Canadian Carmelites) ಯಾಜಕಾಂಚ್ಯಾ ಮುಖೇಲ್ಪಣಾಖಾಲ್ ಸುರು ಕೆಲ್ಲಿ ಹಿ ವೆಬ್’ಸಾಯ್ಟ್ ಬಾಪ್ ಸ್ಟೀವನ್ ಲೋಬೊನ್ ವಿನ್ಯಾಸ್ ಕೆಲ್ಯಾ. ಬಾಪ್ ಜೆರೋಮ್ ಮೊರಾಸ್ ಆನಿ ಬಾಪ್ ಫ್ರ್ಯಾಂಕ್ ಶರ್ಮಾಚ್ಯಾ ಹಾಜರ್‍ಪಣಾಂತ್ ಹಿ ವೆಬ್‌ಸಾಯ್ಟ್ ಮೊಕ್ಳಿಕ್ ಕೆಲ್ಯಾ.

ಕರ್ನಾಟಕ್ ಗೋಂಯ್ ಪ್ರಾಂತ್ಯಾಚೊ ಕಾರ್ಮೆಲಿತ್ ವ್ಹಡಿಲ್ ಬಾಪ್ ಸಿಲ್ವೆಸ್ಟರ್ ಡಿಸೋಜಾಚ್ಯಾ ಆನಿ ಕೆನಡಾಂತ್ ಡೆಲೆಗೆಟ್ ಪ್ರೊವಿನ್ಸಿಯಲ್ ಜಾವ್ನಾಸ್ಚ್ಯಾ ಬಾಪ್ ಅಲೆಗ್ಸಾಂಡರ್ ಬ್ರಗಾಂಜಾಚ್ಯಾ ಮುಖೇಲ್ಪಣಾಖಾಲ್ ಹ್ಯಾ ಜಾಗ್ಯಾರ್ ಕಾರ್ಮೆಲಿತ್ ಉರ್ಭೆನ್ ಸೆವಾ ದೀವ್ನ್ ಆಸಾತ್. ಕಾರ್ಮೆಲಿತಾಂಚಿ ಬೆನೆಪಕ್ಟರ್‍ ಹೆಲೆನ್ ಚುವಾ ಟಿಯಾಂಪೊಚ್ಯಾ (Benefactor Helen Chua Tiampo) ಆಧಾರಾನ್ ಹ್ಯಾ ಜಾಗ್ಯಾರ್ ಏಕ್ ಸೊಭಿತ್ ಕೊವೆಂತ್ ಉಬಾರುಂಕ್ ಸಾಧ್ ಜಾಲಾಂ.

ಹ್ಯಾ ವೆಬ್‌ಸಾಯ್ಟಿಚೆಂ ಉಗ್ತಾವಣ್ ಕರ್‍ತಾನಾ ಕೊವೆಂತಾಚ್ಯಾ ವಿವರಾಸಾಂಗಾತಾ ವಿಭಿನ್ನ್ ಶೈಲೆನ್ ವೆಬ್‌ಸಾಯ್ಟ್ ತಯಾರ್ ಕೆಲ್ಲ್ಯಾಕ್ ಬಾಪ್ ರುಡೋಲ್ಫ್ ಡಿಸೋಜಾನ್ ಬಾಪ್ ಸ್ಟೀವನ್ ಲೋಬೊಚೊ ಉಪ್ಕಾರ್ ಆಟಯ್ಲೊ ಆನಿ ಹಾಂಗಸರ್ ಯೆಂವ್ಚ್ಯಾ ಭಕ್ತಿವಂತಾಕ್ ಜೊಕ್ತಿ ಮಾಹೆತ್ ಜೊಡುಂಕ್ ಆನಿ ಹ್ಯಾ ರೆತಿರ್ ಮಂದಿರಾಚೊ ಜೊಕ್ತೊ ಫಾಯ್ದೊ ಜೊಡುಂಕ್ ಹಿ ವೆಬ್’ಸಾಯ್ಟ್ ಆಧಾರ್ ಜಾತೆಲಿ ಮ್ಹಣ್ ಕಳಯ್ಲೆಂ.

ವೆಬ್‌ಸಾಯ್ಟಿಚಿ ವಿನ್ಯಾಸ್ ಕೆಲ್ಲ್ಯಾ ಬಾಪ್ ಸ್ಟೀವನ್ ಲೋಬೊನ್ ಮಿಸಾಂವಾಂಕ್ ಆಧಾರ್ ದೀಂವ್ಕ್ ತಶೆಂಚ್ ಹ್ಯಾ ಜಾಗ್ಯಾಚ್ಯಾ ಉದರ್ಗತೆಕ್ ವೆಬ್‌ಸಾಯ್ಟಿಚಿ ಜವಾವ್ದಾರಿ ದಿಲ್ಲ್ಯಾಕ್ ಬಾಪ್ ರುಡೋಲ್ಫ್ ಸೊಜಾಕ್ ಧಿನ್ವಾಸ್ ಪಾಟಯ್ಲೊ. ಹೆಂ ಕಾಮ್ ಯಶಸ್ವೆನ್ ಪೊಂತಾಕ್ ಪಾವೊಂಕ್ ಉತ್ತೇಜನ್ ಆನಿ ಸಾಂಗಾತ್ ದಿಲ್ಲ್ಯಾ ಕೊವೆಂತಾಚೊ ವ್ಹಡಿಲ್ ಬಾಪ್ ವಿನ್ಸೆಂಟ್ ಡಿಸೋಜಾ, ದಿರೆಕ್ತೊರ್ ಬಾಪ್ ಮಾರಿಯೊ ಫೆರ್ನಾಂಡಿಸಾಚೊ ಉಪ್ಕಾರ್ ಬಾವುಡ್ಲೊ.

ಹೆಂ ರೆತಿರ್ ಮಂದಿರ್ 18 ಸುಸಜ್ಜಿತ್ ಕುಡಾಂ ಆನಿ 45 ಬೆಡ್ಡಾಂ, ಏಕ್ ಮಲ್ಟಿಪರ್ಪಸ್ ಹೊಲ್ ಆಸೊನ್ 350 ಜಣಾಂಕ್ ರಾವುಂಕ್ ಮಾಂಡಾವಳ್ ಆಸಾ. ರೆತಿರ್‍ಯೊ, ಯುವಜಣಾಂಕ್ ತರ್ಭೆತಿ ಕಾರ್‍ಯೆಂ, ಕುಟ್ಮಾ ರೆತಿರ್ ತಶೆಂಚ್ ಕೌನ್ಸಿಲಿಂಗಾಕ್ ಹಾಂಗಸರ್ ಆವ್ಕಾಸ್ ಆಸಾ.

ಚಡಿತ್ ವಿವರಾಕ್ ವೆಬ್‌ಸಾಯ್ಟ್ ಲಿಂಕ್ ಉಗ್ತೆಂ ಕರ್‍ಯೆತ್: littleflowermonastery.com

ಪ್ರಸ್ತುತ್ ಹ್ಯಾ ಕೊವೆಂತಾಚೆ ಸಾಂದೆ ವ್ಹಡಿಲ್ ಬಾಪ್ ವಿನ್ಸೆಂಟ್ ಡಿಸೋಜಾ, ದಿರೆಕ್ತೊರ್ ಬಾಪ್ ಮಾರಿಯೊ ಫೆರ್ನಾಂಡಿಸ್ ಆನಿ ಸಹಾಯಕ್ ದಿರೆಕ್ತೊರ್ ಬಾಪ್ ಸ್ಟೀವನ್ ಲೋಬೊ ಆಪ್ಲಿ ಸೆವಾ ದೀವ್ನ್ ಆಸಾತ್.