English 
Testimonials
ಬಾಳ್ಕಾ ಬೆಸಾಂವ್
ಹಾಂವ್ ಆನಿ ಮ್ಹಜೆಂ ಕುಟಮ್ ಮಂಗ್ಳುರ್‍ಚ್ಯಾ ದೆರೆಬೈಲ್ ಫಿರ್ಗಜೆಂತ್ ವಸ್ತಿ ಕರ್‍ನ್ ಆಸಾಂವ್. ಆಮಿ ಮುಳಾನ್ ಕೇರಳಾಚಿಂ ಪುಣ್ ಜಾಯ್ತ್ಯಾ ವರ್ಸಾಂಥಾವ್ನ್ ಮಂಗ್ಳುರಾಂತ್ ಆಮ್ಚೆಂ ಕುಟಮ್ ಆಮಿ ಬಾಂದುನ್ ಹಾಡ್ಲಾಂ. ಮ್ಹಜ್ಯಾ ಘೊವಾಕ್ ತಾಣೆಂ ಕಾಮ್ ಕರ್‍ಚೆ ಕಂಪ್ಣೆಥಾವ್ನ್ ತಾಕಾ ಮೆಳಜೆ ಜಾಲ್ಲೆ ಪಯ್ಶೆ ಮೆಳೊಂಕ್‌ನಾತ್ಲೆ. ತೆ ಜೊಡುಂಕ್ ಮೊಸ್ತು ತೇಂಪ್ ಜಾಲೊ ಆನಿ ಆಮಿ ಬಾಳ್ಕಾ ಜೆಜುಕ್ ಆಮ್ಚೆಂ ಮಾಗ್ಣೆಂ ಉಬಾರ್‍ಲೆಂ ಆನಿ ಪಾಂಚ್ ಮ್ಹಯ್ನ್ಯಾಂನಿ ತಾಕಾ ಕಿತೆಂ ಮೆಳಂವ್ಕ್ ಆಸ್ಲೆಂ ತೆಂ ಮೆಳ್ಳೆಂ. ಬಾಳ್ಕಾ ಜೆಜುಕ್ ಜಾಂವ್ ಆರ್ಗಾಂ.
- ಆಂಟನ್ಯಾ ಆನಿ ವಿನ್ಸೆಂಟ್, ದೆರೆಬೈಲ್
ಸುಮಾರ್ ದೇಡ್ ವರ್ಸಾಂಚೊ ಆಮ್ಚೊ ರೂಯೆಲ್ ವಿಶೇಸ್ ರಿತಿನ್ ಫೆಬ್ರೀಯೆಲ್ ಸೀಜರ್‍ಸ್ – ಹಾಂತುನ್ ಕಶ್ಟಾತಾಲೊ. ತಾಕಾ ತವಳ್ ತವಳ್ ತಾಪ್ ಯೆತಾಲೊ ಜಾಲ್ಲ್ಯಾನ್ ತಾಚ್ಯಾ ಭಲಾಯ್ಕೆಚಿ ವ್ಹಡ್ ಖಂತ್ ಆಮ್ಕಾಂ ದೊಸ್ತಾಲಿ. ಜಾಯ್ತಿ ಚಿಕಿತ್ಸಾ ಕೆಲಿ ಆನಿ ಬಾಳೊಕ್ ಜೆಜುಕ್ ಆಮಿ ಉಲೊ ಮಾರ್‍ಲೊ. ತಾಚೆಂ ಬೆಸಾಂವ್ ಕಶೆಂ ಆಮ್ಚ್ಯಾ ಬಾಳಾಕ್ ಸವ್ಕಾಸ್ ಭಲಾಯ್ಕಿ ಪಾಟಿಂ ಮೆಳ್ಳಿ. ಆತಾಂ ತಾಕಾ ಸುಮಾರ್ ಪಾಂಚ್ ವರ್ಸಾಂ ಪ್ರಾಯ್ ಆನಿ ತೊ ಬರ್‍ಯಾ ಭಲಾಯ್ಕೆನ್ ಆಸಾ ಮ್ಹಣ್ ಸಾಕ್ಸ್ ದೀಂವ್ಕ್ ಆನಿ ತ್ಯಾ ಮುಕಾಂತ್ರ್ ಬಾಳ್ಕಾ ಜೆಜುಕ್ ಅರ್ಗಾಂ ಆನಿ ಮಹಿಮಾ ದೀಂವ್ಕ್ ಆಮಿ ಸಂತೊಸ್ತಾಂವ್.
ರೋಶನ್ ಆನಿ ಮಿಶೆಲ್ ರೆಬೆಲ್ಲೊ, ರೂಯೆಲ್ ಮ್ಯಾಕ್ ರೆಬೆಲ್ಲೊ, ಕಲ್ಯಾಣ್‌ಪುರ್-ಉಡುಪಿ
ಮ್ಹಜೊ ಜಲ್ಮಾದೀಸ್ ಆಚರಣ್ ಕರ್‍ಚೆ ಸಂದರ್ಭಿಂ ಬಾಳ್ಕಾ ಜೆಜುಕ್ ಅರ್ಗಾಂ ಜಾವ್ನ್ ಹಾಂವೆಂ ಬಾಳ್ಕಾ ಜೆಜುಚ್ಯಾ ಇಮಾಜಿಕ್ ಏಕ್ ಸೊಭಿತ್ ಆಂಗ್ಲೆಂ ದೀಂವ್ಕ್ ಆಯ್ಲಿಂ. ಬಾಳೊಕ್ ಜೆಜು ಸದಾಂಚ್ ಮ್ಹಜ್ಯಾ ಜಿವಿತಾಂತ್ ಉಜ್ವಾಡಾಚೊ ಖಾಂಬೊ ಜಾವ್ನ್ ಮ್ಹಜಿ ವಾಟ್ ವ್ಹರ್‍ತಾ. ಮ್ಹಜ್ಯಾ ಕಶ್ಟಾಂನಿ ಮ್ಹಾಕಾ ಆಧಾರ್ ದೀಂವ್ಕ್ ತಾಣೆಂ ಕೆದಿಂಕ್‌ಚ್ ಪಾಟಿಂ ಪಳೆಯಿಲ್ಲೆಂ ನಾ. ತಾಚೊ ಸಾಂಗಾತ್ ಆನಿ ತಾಚಿ ಭಕ್ತ್ ಮ್ಹಾಕಾ ಮ್ಹಜ್ಯಾ ಜಿವಿತಾಂತ್ ಸಂತೊಸ್, ಸಮಾಧಾನ್ ಆನಿ ತೃಪ್ತಿ ಹಾಡ್ನ್ ಆಯ್ಲಾಂ. ಮ್ಹಜ್ಯಾ ಜಿವಿತಾಚೆರ್ ಆಶೀರ್ವಾದಾಂಚೊ ಶಿಂವೊರ್ ವೊತುನ್ ಮ್ಹಜೆಂ ಜಿವಿತ್ ಮಾರ್ಗದರ್ಶನ್ ಕರ್‍ಚ್ಯಾ ಬಾಳ್ಕಾ ಜೆಜುಕ್ ಆರ್ಗಾಂ ಆನಿ ಸ್ತುತಿ.
- ಪಮೆಲಾ ಕೊರ್ಡೆರೊ
ಲಾಲ್‌ಭಾಗ್-ಮಂಗ್ಳುರ್
ಹಾಂವ್ ಪ್ರಿಸಿಲ್ಲಾ ಡಿಸೋಜಾ ಆನಿ ಬಿಜೈ ಮ್ಹಜೊ ಗಾಂವ್. ಆಮಿ ಕುಟ್ಮಾ ಸವೆಂ ಬಾಳೊಕ್ ಜೆಜುಚ್ಯಾ ಪೂನ್‌ಶೆತಾಕ್ ಭೆಟ್ ದಿತೇ ಆಸ್ತಾಂವ್ ಆನಿ ಬಾಳೊಕ್ ಜೆಜುನ್ ಆಮ್ಕಾಂ ಕೆದಿಂಕ್‌ಚ್ ನಿರಾಶಿ ಕರುಂಕ್ ನಾ. ಮ್ಹಜೆಂ ಧು ಸುಮನ್ ಸಿ.ಎ. ಪರೀಕ್ಶಾ ಬರೊಂವ್ಚೆ ಸಂದರ್ಭಿಂ ತ್ಯಾ ಪರೀಕ್ಶೆಂತ್ ಉತ್ತೀರ್ಣ್ ಜಾಂವ್ಚೆ ಖಾತಿರ್ ಹಾಂವ್ ಮಾಗ್ತಾಲಿಂ. ಬಾಳೊಕ್ ಜೆಜುನ್ ಆಮ್ಚೆಂ ಮಾಗ್ಣೆಂ ಆಯ್ಕಾಲೆಂ ಆನಿ ಆಮ್ಕಾಂ ಪರ್ತ್ಯಾನ್ ತಾಚಿ ಮಜತ್ ಆನಿ ಬೆಸಾಂವ್ ದಿಲೆಂ. ತಾಚಿ ಮಹಿಮಾ ವರ್ತಿ, ತಾಕಾ ಜಾಂವ್ ಆರ್ಗಾಂ.
- ಪ್ರಿಸಿಲ್ಲಾ ಲಿಡ್ವಿನ್ ಡಿಸೋಜಾ, ಬಿಜೈ
ಮ್ಹಜ್ಯಾ ನಾತ್ವಾಚಿ ವಾಡಾವಳ್ ಇಲ್ಲಿಶಿ ಸವ್ಕಾಸ್. ತೊ ಚಲುಂಕ್ ಮೊಸ್ತ್ ವೇಳ್ ಕರ್‍ತಾಲೊ ಆನಿ ಕಶ್ಟಾತಾಲೊ. ಹ್ಯಾ ಸಂದರ್ಭಿಂ ಹಾಂವೆಂ ಬಾಳೊಕ್ ಜೆಜುಲಾಗಿಂ ಮಾಗ್ಲೆಂ. ಆನಿ ತಾಣೆಂ ಮ್ಹಜ್ಯಾ ನಾತ್ವಾಚಾ ಪಾಯಾಂಕ್ ಬಳ್ ದಿಲೆಂ ಆನಿ ತಾಣೆಂ ಚಲಶೆಂ ಕೆಲೆಂ. ತಾಕಾ ಜಾಂವ್ ಅರ್ಗಾಂ ಆನಿ ಸ್ತುತಿ.
- ಲೆತಿಶಿಯಾ ಕುಟಿನ್ಹಾ, ಪಡಿಲ್-ಮಂಗ್ಳುರ್
ಆರನ್ ಆನಿ ಹಾಂವ್ ಕೀರ್ತಿ ಮಂಗ್ಳುರ್‍ಚ್ಯಾ ಉರ್ವಾ ಫಿರ್ಗಜೆಚಿಂ ಆನಿ ಆಜ್ ಆಮ್ಚಿ ಕಾಳ್ಜಾಂ ಬಾಳ್ಕಾ ಜೆಜುಕ್ ಧಿನ್ವಾಸ್ಣೆಚ್ಯಾ ಭೊಗ್ಣಾಂನಿ ಭರ್‍ಲ್ಯಾಂತ್. ಚಾರ್ ವರ್ಸಾಂಚ್ಯಾ ಆಮ್ಚ್ಯಾ ಲಗ್ನಾಜಿವಿತಾಂತ್ ಜಾಯ್ತೊ ಸಂತೊಸ್ ಆಸ್‌ಲ್ಲೊ ತರೀ, ಭುಗ್ಯಾಚೆಂ ನಾಹಾಜಿರ್‍ಪಣ್ ಆಮ್ಕಾಂ ಮೊಸ್ತು ದೊಸ್ತಾಲೆಂ. ಆನಿ ಹ್ಯಾ ಖಾತಿರ್ ಆಮಿ ಮಾಗೊನ್ ಬಾಳೊಕ್ ಜೆಜುಚ್ಯಾ ಪೂನ್‌ಶೆತಾಕ್ ಆಯ್ಲ್ಯಾಂವ್ ಆನಿ ಆಮ್ಚಿಂ ಮಾಗ್ಣಿಂ ಬಾಳ್ಕಾ ಜೆಜು ಸಮೊರ್ ಅರ್ಪಿಲಿಂ. ಬಾಳ್ಕಾ ಜೆಜುನ್ ಆಮ್ಕಾಂ ನಿರಾಶಿ ಕರುಂಕ್ ನಾ. ತಾಣೆಂ ಆಮ್ಚ್ಯಾ ಜಿವಿತಾಂತ್ ಎಕಾ ಅಪುರ್ಬಾಯೆಚ್ಯಾ ಆಂಜಾಕ್ ಪರ್‍ಲಾಚಾ ರೂಪಾರ್ ದಾಡ್ಲೆಂ ಆನಿ ತ್ಯಾ ಮುಕಾಂತ್ರ್ ತಾಚಿಂ ಕುರ್ಪೆದೆಣಿಂಯೀ ವೊತ್ಲಿಂ. ತಾಚ್ಯಾ ಪಯ್ಲ್ಯಾ ಜಲ್ಮಾದಿಸಾ ಸಂದರ್ಭಿಂ ಆಮಿ ಪರ್ತ್ಯಾನ್ ಬಾಳ್ಕಾ ಜೆಜುಕ್ ಅರ್ಗಾಂ ಭೆಟಂವ್ಕ್ ಆಯ್ಲ್ಯಾಂವ್. ತಾಕಾ ಜಾಂವ್ ಮಹಿಮಾ ಆನಿ ಸ್ತುತಿ.
- ಆರನ್ ಆನಿ ಕೀರ್ತಿ ಸಿಕ್ವೇರಾ, ಉರ್ವಾ-ಮಂಗ್ಳುರ್
ಹಾಂವ್ ಡೆಲ್ಸನ್ ಲೋಯ್ ಡಿಸೋಜಾ. ಕೇಕ್ ತಯಾರ್ ಕರ್‍ಚ್ಯಾಂತ್ ಹಾಂವೆಂ ಊಂಚ್ಲೆಂ ಶಿಕಪ್ ಜೊಡ್‌ಲ್ಲೆಂ ಆನಿ ಹಾಂವ್ ಎಕಾ ಕಾಮಾಚ್ಯಾ ಸೊಧ್ನೆರ್ ಆಸ್‌ಲ್ಲೊ. ಜಾಯ್ತೆಂ ಪ್ರಯತನ್ ಕೆಲೆಂ ತರೀ, ಕಾಂಯ್ ಫಾಯ್ದೊ ಜಾಂವ್ಕ್ ನಾ. ಕೆನಡಾಂತ್ ಕಾಮ್ ಜೊಡುಂಕ್ ಪ್ರಯತನ್ ಕರ್‍ನ್ ಆಸ್‌ಲ್ಲೊ ತರೀ ಕಾಮ್ ಮೆಳ್ಚಿಂ ಕಾಂಯ್ ಸೂಚನಾಂ ನಾತ್ಲಿಂ. ಇತ್ಲ್ಯಾರ್ ಏಕ್ ಅಜ್ಯಾಪ್ ಕಶೆಂ ಕುವೈಟ್ ಥಾವ್ನ್ ಮ್ಹಾಕಾಚ್ ಸೊಧುನ್ ಮ್ಹಳ್ಳೆಬರಿಂ ಕಾಮ್ ಆಯ್ಲೆಂ ಆನಿ ತೆಂಯೀ ಹಾಂವ್ ಶಿಕ್‌ಲ್ಲ್ಯಾ – ಕೇಕ್ ಕರ್‍ಚ್ಯಾ – ಕ್ಶೇತ್ರಾಂತ್! ಆಮಿ ಥಂಯ್ ತಯಾರ್ ಕರ್‍ಚ್ಯೊ ಕೇಕಿ, ಲಾಕಾಂಚ್ಯಾ ಮೊಲಾಕ್ ವಿಕುನ್ ವೆತಾತ್. ಹೆಂ ಸರ್ವ್ ಬಾಳ್ಕಾಜೆಜುಚೆಂ ಬೆಸಾಂವ್ ಮ್ಹಣ್ ಹಾಂವೆಂ ಪರ್ತ್ಯಾನ್ ಸಾಂಗಜೆ ಮ್ಹಣ್ ನಾ! ಹಾಂವ್ ಆನಿ ಮ್ಹಜೆಂ ಕುಟಮ್ ಬಾಳ್ಕಾಜೆಜುಚಿಂ ವ್ಹಡ್ ಭಕ್ತಿಕಾಂ. ಹಾಂವ್ ತಶೆಂ ಮ್ಹಜೊ ವ್ಹಡ್ಲೊ ಭಾವ್ ರಜೆರ್ ಗಾಂವಾಕ್ ಯೆತಾಸ್ತಾನಾ, ಘರಾವೆಚ್ಯಾ ಪಯ್ಲೆಂ ಬಾಳ್ಕಾಜೆಜುಚ್ಯಾ ಪೂನ್‌ಶೆತಾಕ್ ಭೆಟ್ ದೀನಾಸ್ತಾನಾ ವಚನಾಂವ್. ಹೆಂ ದೆವಾಸಾಂವ್ ಆನಿ ಭಕ್ತ್ ಆಮ್ಚ್ಯಾ ಜಿಣ್ಯೆಚೊ ಅವಿಭಾಜ್ಯ್ ವಾಂಟೊ ಜಾಲಾ. ತಾಕಾ ಜಾಂವ್ ಆರ್ಗಾಂ ಆನಿ ಸ್ತುತಿ.
ಡೆಲ್ಸನ್ ಲೋಯ್ ಡಿಸೋಜಾ, ಅಂಜೆಲೊರ್-ಮಂಗ್ಳುರ್
ಆಮಿ ದೊಗಾಂಯ್ ಬಾಳ್ಕಾ ಜೆಜುಚ್ಯಾ ಪೂನ್‌ಶೆತಾಕ್ ಆಮ್ಚಿಂ ಆರ್ಗಾಂ ಭೆಟಂವ್ಕ್ ಆಯ್ಲ್ಯಾಂವ್. ಹಾಂವ್ ನೆಸ್ಲಿನ್ ಆಫ್ರಿಕಾಚ್ಯಾ ಎಕಾ ಗಾಂವಾಂತ್ ಎಕಾ ಮಿಲಿಟರಿ ಶಿಬಿರಾಂತ್ ಕಾಮ್ ಕರ್‍ತಾಲೊಂ. ಸುಮಾರ್ ಪಂದ್ರಾ ವರ್ಸಾಂ ಕಾಮ್ ಕರ್‍ತಚ್ ಅವ್ಚಿತ್ ಮ್ಹಜೆಂ ಕಾಮ್ ಗೆಲೆಂ. ಆತಾಂ ಕಿತೆಂ ಕರ್‍ಚೆಂ? ಜಿವಿತ್ ಕಶ್ಟಾಂಚೆಂ ಜಾಲೆಂ. ಕಾಮ್ ನಾಸ್ತಾನಾ ಬೆಕಾರ್ ಆಸ್ಚ್ಯಾ ಸಂದರ್ಭಿಂ ಬಾಳ್ಕಾ ಜೆಜುಲಾಗಿಂ ವ್ಹಡಾ ಭಕ್ತಿನ್ ಆಮಿ ಮಾಗ್ಲೆಂ. ಬಾಳೊಕ್ ಜೆಜು ಕೆದಿಂಕ್‌ಚ್ ನಿರಾಶಿ ಕರಿಸೊನಾ ಹೊ ವಿಶ್ವಾಸ್ ದೃಢ್ ಆಸ್ಲೊ. ದೋನ್ ವರ್ಸಾಂ ಉಪ್ರಾಂತ್ ಮ್ಹಾಕಾ ಖಂಯ್ಚ್ಯಾ ಕಂಪೆನಿನ್ ಕಾಮಾಂತ್ಲೆಂ ಕಾಡ್‌ಲ್ಲೆಂ ತ್ಯಾಚ್ ಕಂಪೆನಿನ್ ಪರ್ತ್ಯಾನ್ ಪಯ್ಲೆಂಚ್ಯಾಚ್ ಕಾಮಾಕ್ ಆಪಯ್ಲೆಂ. ಹೆಂ ಬಾಳ್ಕಾ ಜೆಜುಚೆಂ ಏಕ್ ವ್ಹಡ್ ಆಜಾಪ್‌ಚ್ ಸಯ್!
- ರೋಸ್ ಮೇರಿ ಆನಿ ನೆಸ್ಲಿನ್ ಡಿಸೋಜಾ, ಶಕ್ತಿನಗರ್-ಮಂಗ್ಳುರ್
ದುಖಿಸಾಯ್ಬಿಣಿಚಿ ಫಿರ್ಗಜ್ ಬೆಳಾ ಹಾಂಗಾಚೊ ಹಾಂವ್ ರೋಯ್ ರಾಯ್‌ಸ್ಟನ್ ಕ್ರಾಸ್ತಾ. ಮ್ಹಜೆಂ ಶಿಕಪ್ ಸಂಪಯ್ತಚ್ ಹಾಂವ್ ಕಾಮ್ ಸೊಧ್ತಾಲೊಂ. ಬಾಳ್ಕಾ ಜೆಜು ಮುಕಾರ್ ಹಾಂವ್ ದಿಂಬ್ಯೆರ್ ಪಡ್ಲೊ ಆನಿ ಮ್ಹಜೆಂ ತೆಸಾಂವ್ ಉಚಾರ್‍ಲೆಂ. ತಾಚ್ಯಾ ಬೆಸಾಂವಾನ್ ಪಯ್ಶಿಲ್ಯಾ ಮಾಲ್ಟಾಂತ್ ಏಕ್ ಅರ್ಪುಬಾಯೆಚೆಂ ಕಾಮ್ ಮೆಳ್ಳೆಂ. ಮಾಲ್ಟಾ ಏಕ್ ಕುದ್ರೊ – ದ್ವೀಪ್ ದೇಶ್ ಆನಿ ಹ್ಯಾ ಲ್ಹಾನ್ ದ್ವೀಪಾಂತ್ ಸುಮಾರ್ ೩೬೦ ಇಗರ್ಜೊ ಆಸಾತ್. ಮೆಟಾಂ ಮೆಟಾಂಕ್ ಮ್ಹಳ್ಳೆಬರಿ ಇಗರ್ಜೊ ಮೆಳ್ತಾತ್. ಹ್ಯಾ ಕಥೊಲಿಕ್ ಗಾಂವಾಂತ್ ಕಾಮ್ ಕರುಂಕ್ ಬಾರಿಚ್ ಬರೆಂ ಜಾತಾ. ಸುಮಾರ್ ದೇಡ್ ವರ್ಸಾಂಚೆಂ ಕಾಮ್ ಕರ್‍ನ್ ಹಾಂವ್ ಬಾಳೊಕ್ ಜೆಜುಚ್ಯಾ ಪೂನ್‌ಶೆತಾಕ್ ತಾಕಾ ಅರ್ಗಾಂ ಭೆಟಂವ್ಕ್ ಆಯ್ಲೊಂ. ಬಾಳ್ಕಾಜೆಜುನ್ ಮ್ಹಜೆರ್ ವೊತ್‌ಲ್ಲ್ಯಾ ಸರ್ವ್ ಬೆಸಾಂವಾಂಕ್ ಹಾಂವ್ ತಾಕಾ ಅರ್ಗಾಂ ಆನಿ ಮಹಿಮಾ ದಿತಾಂ.
- ರೋಯ್ ರೊಯ್‌ಸ್ಟನ್ ಕ್ರಾಸ್ತಾ, ಬೆಳಾ
ಹಾಂವ್ ಆನಿ ಮ್ಹಜೆಂ ಕುಟಮ್ ಮಂಗ್ಳುರ್‍ಚ್ಯಾ ದೆರೆಬೈಲ್ ಫಿರ್ಗಜೆಂತ್ ವಸ್ತಿ ಕರ್‍ನ್ ಆಸಾಂವ್. ಆಮಿ ಮುಳಾನ್ ಕೇರಳಾಚಿಂ ಪುಣ್ ಜಾಯ್ತ್ಯಾ ವರ್ಸಾಂಥಾವ್ನ್ ಮಂಗ್ಳುರಾಂತ್ ಆಮ್ಚೆಂ ಕುಟಮ್ ಆಮಿ ಬಾಂದುನ್ ಹಾಡ್ಲಾಂ. ಮ್ಹಜ್ಯಾ ಘೊವಾಕ್ ತಾಣೆಂ ಕಾಮ್ ಕರ್‍ಚೆ ಕಂಪ್ಣೆಥಾವ್ನ್ ತಾಕಾ ಮೆಳಜೆ ಜಾಲ್ಲೆ ಪಯ್ಶೆ ಮೆಳೊಂಕ್‌ನಾತ್ಲೆ. ತೆ ಜೊಡುಂಕ್ ಮೊಸ್ತು ತೇಂಪ್ ಜಾಲೊ ಆನಿ ಆಮಿ ಬಾಳ್ಕಾ ಜೆಜುಕ್ ಆಮ್ಚೆಂ ಮಾಗ್ಣೆಂ ಉಬಾರ್‍ಲೆಂ ಆನಿ ಪಾಂಚ್ ಮ್ಹಯ್ನ್ಯಾಂನಿ ತಾಕಾ ಕಿತೆಂ ಮೆಳಂವ್ಕ್ ಆಸ್ಲೆಂ ತೆಂ ಮೆಳ್ಳೆಂ. ಬಾಳ್ಕಾ ಜೆಜುಕ್ ಜಾಂವ್ ಆರ್ಗಾಂ.
- ಆಂಟನ್ಯಾ ಆನಿ ವಿನ್ಸೆಂಟ್, ದೆರೆಬೈಲ್