ಜಲ್ಮ್ ಕೆದಳಾ ಆಮ್ಕಾಂ ಕಳಿತ್ ನಾ ತಶೆಂಚ್ ಮರಣ್ ಕೆದಳಾ ತೆಂ ಆಮಿ ನೆಣಾಂವ್. ಮರಣ್ ವಾ ಜಿವಿತ್ ಆಮ್ಕಾಂ ಹಾಚೆರ್ ಹಕ್ಕ್ ನಾ. ದೆವಾನ್ ಆಮ್ಕಾಂ ಹೊ ಜೀವ್ ದಿಂವ್ಚೊ ಆನಿ ತಾಕಾ ಮಾತ್ರ್ ಹ್ಯಾ ಜಿವಾಚೆರ್ ಹಕ್ಕ್. ‘ಬರೆಂ ಆನಿ ವಾಯ್ಟ್, ಜಿವಿತ್ ಆನಿ ಮರಣ್, ದುಬ್ಳಿಕಾಯ್ ಆನಿ ಗ್ರೇಸ್ತ್‌ಕಾಯ್ ಸರ್ವೆಸ್ಪರಾ ಥಾವ್ನ್ ಯೆತಾತ್’ ಮ್ಹಣ್ತಾ ಸಿರಾಖಾಚೊ ಗ್ರಂಥ್ (11:44). ಜುವಾಂವ್ಚ್ಯಾ ವಾಂಜೆಲಾಂತ್ಲಿಂ ಉತ್ರಾಂ ‘ಹಾಂವ್ ಆಯ್ಲಾಂ ತಾಂಕಾಂ ಜಿವಿತ್ ಮೆಳೊಂ ಮ್ಹಣ್; ಭರೊನ್ ವೊವ್ತೊಂಚ್ಯಾ ಮಾಪಾನ್ ತೆಂ ಮೆಳೊಂ ಮ್ಹಣ್’ (10:10). ಜಲ್ಮಾಕ್ ಆಯಿಲ್ಲ್ಯಾ ಹರ್‍ಯೆಕ್ಲ್ಯಾನ್ ಮರೊಂಕ್ ಆಸಾ. ಹ್ಯಾ ಸಂಸಾರಾಂತ್ ಶಾಶ್ವತ್ ಜಿಯೆಲ್ಲೊ ಕೊಣ್‌ಚ್ ನಾ. ಮೆಲ್ಯಾ ಉಪ್ರಾಂತ್ ಕಿತೆಂ ಆಸಾ ತೆಂ ಕೊಣಾಕ್‌ಚ್ ಕಳಿತ್ ನಾ, ಕಿತ್ಯಾಕ್ ಮರಣ್ ಪಾವ್‌ಲ್ಲೊ ಕೊಣೀ ಎದೊಳ್ ಪಾಟಿಂ ಆಯಿಲ್ಲೊನಾ. ಹ್ಯಾ ಸಂಸಾರಾಂತ್ ಜಲ್ಮಲ್ಲೊ ಹರ್‍ಯೆಕ್ಲೊ ಮೆಲಾ, ಫುಡೆಂ ಜಲ್ಮೊನ್ ಯೆಂವ್ಚೊಯ್ ಮರ್‍ತೊಲೊಚ್.

ಎಕೆ ಸಿಮಿಸ್ತ್ರೆಚ್ಯಾ ಮುಕ್ಲ್ಯಾ ದಾರ್ವಾಟ್ಯಾರ್ ಘಾಲ್ಲಿ ಉತ್ರಾಂ: ಕಾಲ್ ಆಮಿ ತುಮ್ಚೆಬರಿ ಆಸ್‌ಲ್ಲ್ಯಾಂವ್ ಆನಿ ಫಾಲ್ಯಾಂ ತುಮಿ ಆಮ್ಚೆಬರಿ ಜಾತೆಲ್ಯಾತ್. ನವೆಂಬರ್ ಮ್ಹಯ್ನೊ ಹ್ಯಾ ಮರ್‍ಣಾಚ್ಯಾ ಮಿಸ್ತೆರಾವಿಶಿಂ ಸಮ್ಜೊಂಕ್ ಪರತ್ ಆವ್ಕಾಸ್ ಕರ್‍ನ್ ದಿತಾ. ನವೆಂಬರ್ ಮ್ಹಯ್ನಾಚ್ಯೆ ದೋನ್ ತಾರಿಕೆರ್ ಸರ್ವ್ ಅಂತರ್‍ಲಲ್ಯಾ ಭಾವಾಡ್ತ್ಯಾಂಚೊ ಉಗ್ಡಾಸ್ ಕಾಡ್ತಾಂವ್ ಆನಿ ತಾಂಚೆಪಾಸತ್ ಮಾಗ್ತಾಂವ್. ಹ್ಯಾ ವೆಳಾರ್ ಪವಿತ್ರ್ ಸಭೆನ್ ಶಿಕಯಿಲ್ಲ್ಯೊ ಆನಿ ಆಮ್ಚ್ಯೆ ಮತಿಕ್ ಯೆಂವ್ಚೆ ವಿಶಯ್ ನಿಮಾಣ್ಯೊ ಚಾರ್ ಸಂಗ್ತಿ. ಮರಣ್, ಝಡ್ತಿ, ಯೆಮ್ಕೊಂಡ್, ಸರ್ಗ್.

ಮರಣ್: ಮರಣ್ ಮ್ಹಳ್ಯಾರ್ ಸಾಸ್ಣಿಕ್ ಜಿವಿತಾಕ್ ಭಿತರ್ ಸರ್‍ಚೆಂ.(ಕ.ಪ.ದೊ.1020). ಆನ್ಯೆಕಾ ಅರ್ಥಾನ್, ಮರಣ್ ಮನ್ಶಾಚ್ಯಾ ಪಾತ್ಕಾಂಚೆಂ ಫಳ್‌ಯೀ ವ್ಹಯ್.(ರೊಮಾ 6:23, ಉತ್ಪತ್ತಿ 2:17; ಕ.ಪ.ದೊ. 1008). ಮನ್ಶಾಕ್ ದೆವಾನ್ ಏಕ್ ಅತ್ಮೊ ಆನಿ ಕೂಡ್ ದೀವ್ನ್ ರಚ್ಲಾಂ ಆಸ್ತಾಂ ಮರ್‍ಣಾಚ್ಯಾ ವೆಳಾರ್ ಕುಡಿಥಾವ್ನ್ ಅತ್ಮೊ ವೆಗ್ಳೊ ಜಾತಾ. ವಿನಾಶಿ ಕೂಡ್ ಧುಳಿಕ್ ಪಾಟಿಂ ವೆತಾ ತರ್ ಅವಿನಾಶಿ ಅತ್ಮೊ ದೆವಾಚ್ಯೆ ಝಡ್ತೆಕ್ ವೆತಾ.

ಝಡ್ತಿ: ದೇವ್ ಜಾವ್ನಾಸಾ ಸಂಪೂರ್ಣ್ ಪವಿತ್ರ್ ಆನಿ ಸರ್ಗ್ ಸರ್ವ್ ನಿತಳ್. ಜೆಂ ಕಿತೆಂ ನಿತಳ್ ನಾ ತೆಂ ದೆವಾ ಮುಕಾರ್ ರಾವೊಂಕ್ ಅಸಾಧ್. ನಿತಳ್ ಮಾತ್ರ್ ದೆವಾ ಮುಕಾರ್ ರಾವ್ತಾ. ನಿಮಾಣೆ ದೇವ್ ಆಮ್ಚಿ ಝಡ್ತಿ ಕರ್‍ತಾ. ಸರ್ಗಿಂಚ್ಯಾ ಸಂತೊಸಾಕ್ ಪ್ರವೇಶ್ ಜಾಯ್ನಾ ತಾಂಕಾಂ ಶುದ್ದ್‌ಪಣಾಚಿ ಗರ್ಜ್ ಆಸಾ. ಹಾಕಾ ಆಮಿ ಪುಲ್ಗತ್ರ್ ಮ್ಹಣ್ತಾಂವ್.

ಯೆಮ್ಕೊಂಡ್: ಜರ್ ಮನಿಸ್ ಆಪ್ಲ್ಯಾ ಮರ್‍ಣಾಚ್ಯೆ ಘಡಿಯೆ ಮ್ಹಾಪಾತ್ಕಾಂತ್ ಆಸೊನ್, ಆಪ್ಲ್ಯಾ ಪಾತ್ಕಾಂಚಿ ದೂಕ್ ಧರಿನಾಸ್ತಾನಾ ದೆವಾಚ್ಯೆ ಕಾಕುಳ್ತಿಚೊ ಆನಿ ಭೊಗ್ಸಾಣ್ಯಾಚೊ ಇನ್ಕಾರ್ ಕರ್‍ತಾ ತರ್ ಮನಿಸ್‌ಚ್ ಸ್ವತಂತ್ರಾಯೆನ್ ದೆವಾಚ್ಯಾ ಎಕ್ವಟಾ ಆನಿ ಮೊಗಾಥಾವ್ನ್, ತಶೆಂಚ್ ಸಾಂತಾ-ಭಕ್ತಾಂಚ್ಯಾ ಸಾಂಗಾತ್ಪಣಾ ಥಾವ್ನ್ ಭಾಯ್ರ್ ವೆತಾ. ಹಾಕಾ ಯೆಮ್ಕೊಂಡ್ ಮ್ಹಣ್ಯೆತ್. (ಕ.ಪೊ.ದೊ. 1033-1035). ಯೆಮ್ಕೊಂಡಾಚಿ ಶಿಕ್ಶಾ ಮ್ಹಳ್ಯಾರ್, ಸಂಪೂರ್ಣ್ ಸಂತೊಸ್ ಆನಿ ಜಿವಿತ್ ಜಾವ್ನ್ ಆಸ್ಚ್ಯಾ ದೆವಾಥಾವ್ನ್ ವಿಂಗಡ್ ಸರ್‍ಚೆಂ.

ಸರ್ಗ್: ಸರ್ಗ್ ಮ್ಹಳ್ಯಾರ್ ಜಾಗೊ ನ್ಹಯ್ ಬಗಾರ್ ಪರಮೋನ್ನತ್ ಆನಿ ನಿಶ್ಚಿತ್ ಸಂತೊಸಾಚಿ ಏಕ್ ಸ್ಥಿತಿ. ಜಿಂ ಕೋಣ್ ದೆವಾಚ್ಯೆ ಕುರ್ಪೆಂತ್ ವಾ ಪವಿತ್ರ್‌ಸ್ಥಾನಾಚ್ಯೆ ನೆಣ್ತಿಕಾಯೆಂತ್ ಮರ್‍ತಾತ್ ಆನಿ ಜಾಂಕಾಂ ಸಂಪೂರ್ಣ್ ಥರಾನ್ ಶುದ್ದ್ ಕೆಲಾಂ ತಿಂ ಜೆಜು, ಮರಿ, ದೇವ್‌ದುತಾಂ ಆನಿ ಸಾಂತಾಂ-ಭಕ್ತಾಂ ಭೊಂವಾರಿಂ ಎಕ್ಟಾಂಯ್ ಜಾತಾತ್. ಥಂಯ್ಸರ್ ತಿಂ ದೆವಾಕ್ ಮುಕಾಮುಕಿ ಪಳೆತಾತ್.( 1 ಕೊರಿಂಥ್ 13:12).

ಮರ್‍ಣಾಕ್ ಪ್ರಾಯ್ ನಾ. ತರೀ ಪವಿತ್ರ್ ಪುಸ್ತಕಾಪರ್ಮಾಣೆಂ ಚಡಾವತ್ ಆಮ್ಚಿ ಪ್ರಾಯ್ ಸತ್ತರ್, ಚಡ್ ಮ್ಹಳ್ಯಾರ್ ಆಯ್ಶಿಂ(ಕೀ. 90:10). ಜಾಯ್ತೆಪಾವ್ಟಿಂ ಆಮಿ ಸಾಂಗ್ಚೆಂ ಆಸಾ ಮ್ಹಾಕಾ ವಳ್ವಳೊನ್ ಮರೊಂಕ್ ನಾಕಾ, ಮ್ಹಾಕಾ ಕೊಣಾಯ್ಕಿ ಕಶ್ಟ್ ದೀಂವ್ಕ್ ನಾಕಾತ್, ಮ್ಹಜೆಂ ಮರಣ್ ಉಟೊನ್ ಗೆಲ್ಲೆಬರಿ ಜಾಯ್ಜೆ. ಮ್ಹಜೆಂ ಜಿವಿತ್ ಹೆರಾಂಕ್ ವೊಜೆಂ ಜಾಂವ್ಕ್ ನ್ಹಜೊ. ನೀಜ್ ಸತ್ ಕಿತೆಂಗೀ ಮ್ಹಳ್ಯಾರ್ ಹ್ಯಾ ಸಂಸಾರಿಂ ಆಯಿಲ್ಲ್ಯಾ ಹರ್‍ಯೆಕ್ಲ್ಯಾಕ್ ಜಿಯೆಂವ್ಕ್ ಆಶಾ ಮರೊಂಕ್ ಕೊಣಾಯ್ಕಿ ನಾಕಾ.

ಎಪಿಕ್ಯೂರಾಸಾಚೆಂ ಚಿಂತಪ್ ಅಶೆಂ ಆಸಾ: “ಹಾಂವ್ ಆಸಾಂ ಪರ್ಯಾಂತ್ ಮರಣ್ ನಾ, ಮರಣ್ ಆಸಾ, ಥಂಯ್ ಹಾಂವ್ ನಾ. ಹಾಂವ್ ನಾತ್ಲಲ್ಯಾ ವೆಳಾರ್ ಅಸ್ತಿತ್ವ್ ದಾಕಂವ್ಚ್ಯಾ ಮರ್ಣಾಕ್ ಹಾಂವ್ ಕಿತ್ಯಾಕ್ ಭಿಯೆಂವ್” (If I am, then death is not. If Death is, then I am not. Why should I fear that which can only exit when I do not?). ಮರಣ್ ಆಸಾ ಮ್ಹಣ್ ಭಿಯೆವ್ನ್ ಜಿಯೆಂವ್ಚೆಂ ನಾಕಾ. ದೆವಾನ್ ದಿಲ್ಲೆಂ ಜಿವಿತ್ ಸಂಪೂರ್ಣ್ ರಿತಿನ್ ಜಿಯೆವ್ಯಾಂ. ಹರ್‍ಯೇಕ್ ದೀಸ್ ತಯಾರ್ ರಾವ್ಯಾಂ. ಸದಾಂಚ್ ಜಾಗ್ರುತ್ ರಾವೊಂಕ್ ಆನಿ ಪವಿತ್ರ್ ಪುಸ್ತಕಾಂತ್ಲಿಂ ಉತ್ರಾಂ ಆಮ್ಕಾಂ ಜಾಗ್ವಣಿ ದಿತಾತ್ ತರ್ ಸತಾನಿತಿಚೆಂ ಜಿವಿತ್ ಜಿಯೆಂವ್ಕ್ ಪ್ರಯತ್ನ್ ಕರ್‍ಯಾಂ. ಬರೆಂ ಕರ್‍ಯಾಂ ಆನಿ ವಾಯ್ಟಾಥಾವ್ನ್ ಪಯ್ಸ್ ರಾವ್ಯಾಂ. ಸರ್ಗ್ ಜಾಂವ್ದಿ ಆಮ್ಚ್ಯಾ ಜಿವಿತಾಚೊ ಶೆವೊಟ್.

ಮರ್‍ಣಾಚೊ ಮಿಸ್ತೆರ್ ಚಡಿತ್ ಗುಂಡಾಯೆನ್ ಸಮ್ಜೊನ್ ಘೆಂವ್ಚ್ಯೆ ದಿಶೆನ್ ಜೊಕ್ತಿಂ ಲೇಖನಾಂ ಹ್ಯಾ ಅಂಕ್ಯಾಂತ್ ಫಾಯ್ಸ್ ಕೆಲ್ಯಾಂತ್. ಹಿಂ ಲೇಖನಾಂ ಅತ್ಮೀಕ್ ಜಿವಿತಾಚ್ಯೆ ವಾಟೆನ್ ಚಮ್ಕೊಂಕ್ ಪ್ರೇರಣ್ ಜಾತೆಲಿಂ ಮ್ಹಣ್ ಪಾತ್ಯೆತಾಂ.

ಬಾಪ್ ಐವನ್ ಸೊಜ್, ಕಾರ್ಮೆಲಿತ್