✍️ – ಫ್ರಾದ್ ಆರನ್ ಬಬುಶ್, ಕಾರ್ಮೆಲಿತ್

ಆಂಕ್ವಾರ್ ಮರಿಯೆಚೆಂ ಸರ್ಗಾವ್ಹರಣ್ ಚಡಾವತ್ ಕ್ರಿಸ್ತಾಂವಾಂಕ್ ಏಕ್ ಮಿಸ್ತೆರ್. ಮರಿಯೆಕ್ ಕುಡಿ-ಅತ್ಮ್ಯಾಸಮೇತ್ ಸರ್ಗಾಕ್ ವ್ಹೆಲೆಂ ಮ್ಹಣ್ ಪವಿತ್ರ್‌ಸಭಾ ಶಿಕಯ್ತಾ ಆನಿ ತೆಂ ಭಾವಾಡ್ತಾಚೆಂ ಸತ್ ದೆಕುನ್ ಆಮಿ ತೆಂ ಸಮ್ಜನಾತ್ಲ್ಯಾರೀ ಪಾತ್ಯೆತಾಂವ್. ಜಾಯ್ತ್ಯಾಂಚ್ಯಾ ಮತಿಂತ್ ಸಬಾರ್ ಸವಾಲಾಂ ಆಸಾತ್: ಮರಿ ಮೆಲಿ ವಾ ಮರೊಂಕ್ ನಾ? ಕಶೆಂ ತಿಕಾ ಸರ್ಗಾಕ್ ವ್ಹೆಲೆಂ? ಖಂಯ್ ಥಾವ್ನ್ ಖಂಯ್ ತಿ ಪಾವ್ಲಿ? ಜೆಜು ಮಳ್ಬಾರ್ ವಯ್ರ್ ಚಡೊನ್ ನಪಂಯ್ಚ್ ಜಾಲ್ಲೆಬರಿ ತೀಯ್ ನಪಂಯ್ಚ್ ಜಾಲಿಗೀ? ತಿಕಾ ನಿಕೆಪಿಲಿಗೀ? ತಿಚಿ ಮಾಸಾ-ರಗ್ತಾಚಿ ಕೂಡ್ ಧರ್‍ನ್ ಕಾಣ್ಗೆಂವ್ಕ್ ಸರ್ಗ್ ಮ್ಹಳ್ಯಾರ್ ಭುಂಯ್‌ಪರಿಂ ಏಕ್ ಜಾಗೊಗೀ? ಅಶೆಂ ಸವಾಲಾಂ ಥಳ್ ನಾತ್‌ಲ್ಲ್ಯೆ ಗುಂಡಿಯೆಬರಿ ವಾಡೊನ್‌ಚ್ ವೆತಾತ್. ಹ್ಯಾ ಸರ್ವ್ ಸವಾಲಾಂಕ್ ಕಾಂಯ್ ಥೊಡ್ಯೊ ಜಾಪಿ ಸೊಧ್ಚೆಂ ಪ್ರಯತನ್ ಆಮ್ಚೆಂ.

ಪವಿತ್ರ್ ಪುಸ್ತಕ್ ಆನಿ ಮರಿಯೆಚೆಂ ಸರ್ಗಾವ್ಹರಣ್

ಪವಿತ್ರ್ ಪುಸ್ತಕಾಂತ್ ಮರಿಯೆಚ್ಯಾ ಮರ್‍ಣಾವಿಶ್ಯಾಂತ್ ಜಾಂವ್ ವಾ ತಿಕಾ ಸರ್ಗಾಕ್ ವ್ಹೆಲ್ಲ್ಯಾವಿಶ್ಯಾಂತ್ ಜಾಂವ್ ಕಸಲೊಚ್ ಉಲ್ಲೇಖ್ ನಾ. ಕಿತ್ಯಾಕ್ ಮ್ಹಳ್ಯಾರ್ ವಾಂಜೆಲ್ ಬರಯ್ಣಾರಾಂಚೊ ಉದ್ದೇಶ್ ಆಸ್‌ಲ್ಲೊ ಜೆಜುಚ್ಯೆ ಜಿಣಿಯೆವಿಶ್ಯಾಂತ್, ತಾಚ್ಯಾ ಕಶ್ಟಾಂವಿಶ್ಯಾಂತ್ ಆನಿ ಚಡ್ ಜಾವ್ನ್ ತಾಚ್ಯಾ ಜಿವಂತ್ಪಣಾವಿಶ್ಯಾಂತ್ ಬರೊಂವ್ಚೊ ಶಿವಾಯ್ ಮರಿಯೆವಿಶ್ಯಾಂತ್ ನ್ಹಯ್. ತ್ಯಾ ದೆಕುನ್ ಮರಿಯೆವಿಶ್ಯಾಂತ್ ಜೆಂ ಕಿತೆಂ ಪವಿತ್ರ್ ಪುಸ್ತಕಾಂತ್ ಬರಯ್ಲಾಂ ತೆಂ ಜೆಜುಚ್ಯೆ ಜಿಣಿಯೆಕ್ ಪೂರಕ್ ಜಾಲ್ಲೆಂ ಮ್ಹಣ್ ಪಯ್ಲ್ಯಾನ್ ಸಮ್ಜೊಂಕ್ ಜಾಯ್.

ಪವಿತ್ರ್ ಪುಸ್ತಕಾಂತ್ ಮರಿಯೆವಿಶಿಂ ಬರೊಂವ್ಕ್ ನಾ ತರೀ ಪಯ್ಲ್ಯಾ ಶೆಕ್ಡ್ಯಾಚ್ಯಾ ಜಾಯ್ತ್ಯಾ ಬರ್‍ಪಾಂನಿ (apocryphal sources) ಜೆರುಜಲೆಮಾಂತ್ ತಿಚ್ಯಾ ಮರ್‍ಣಾ ಆನಿ ನಿಕೆಪಾವಿಶ್ಯಾಂತ್ ವಿವರ್ ಆಸಾ. ಏಕ್ ದಾಖ್ಲೊ ದಿಂವ್ಚೊ ತರ್ Transitus Mariae ಮ್ಹಳ್ಳೆಂ ಬರಪ್. ಪವಿತ್ರ್‌ಸಭಾ ಅಸಲ್ಯಾ ಅಪೊಕ್ರಿಪಾ ಪುಸ್ತಕಾಂಕ್ ಮಾನ್ಯತಾ ದೀನಾ ತರೀ, ಲಿಯೊ ಸಿಗ್ನೆಲ್ಲಿ ಮ್ಹಳ್ಳೊ ಕಥೊಲಿಕ್ ಯಾಜಕ್ ಆನಿ ಬೈಬಲ್ ಪಂಡಿತ್, “ಹ್ಯಾ ಪುಸ್ತಕಾಂನಿ ದಿಲ್ಲೆ ವಿವರ್ ಸಗ್ಳೆ ದುಸ್ರ್ಯಾ ಶತಮಾನಾಚ್ಯಾ ಜೆರುಜಲೆಮಾಚ್ಯಾ ಇಗರ್ಜ್‌ಮಾತೆಂತ್ ಚಾಲ್ತೆರ್ ಆಸ್‌ಲ್ಲ್ಯಾ ಎಕಾ ಜುದೆವ್-ಕ್ರಿಸ್ತಾಂವ್ ದಸ್ತಾವೆಜಾಕ್ ಬೋಟ್ ಜೊಕ್ತಾತ್; ತಾಂತುಂ ಆಸ್‌ಲ್ಲೆ ವಿವರ್ ಮರಿಯೆಚ್ಯಾ ಫೊಂಡಾಲಾಗಿಂ ಲಿತುರ್ಜಿ ಸಂಭ್ರಮ್ತಾನಾ ವಾಪಾರ್‍ಚ್ಯಾಕ್ ಲುಸಿಯುಸ್ ಕಾರ್ನಿಕುಸ್ ಮ್ಹಳ್ಳ್ಯಾನ್ ತಯಾರ್ ಕೆಲ್ಲೆ ಆನಿ ಲುಸಿಯುಸ್ ಕಾರ್ನಿಕುಸ್, ವಾಂಜೆಲಿಸ್ತ್ ಜುವಾಂವ್ಚೊ ಸಹವಾವ್ರಾಡಿ ಜಾವ್ನಾಸ್‌ಲ್ಲೊ” ಮ್ಹಳ್ಳೊ ವಿವರ್ ದಿತಾ. Transitus Mariae ತಿಚ್ಯಾ ಮರ್‍ಣಾ ವೆಳಾರ್ ಮರಿಯೆಚಿ ಪ್ರಾಯ್ ಚಡುಣೆಂ ಪನ್ನಾಸ್ ವರ್‍ಸಾಂ ಮ್ಹಣ್ ಸಾಂಗ್ತಾ ಮಾತ್ರ್ ನ್ಹಯ್, ತಿಚ್ಯಾ ಮರ್‍ಣಾ ಆನಿ ಸರ್ಗಾವ್ಹರಣಾವಿಶ್ಯಾಂತ್ ವಿವರ್ ದಿತಾ.

ಏಕ್ ತಾರ್ಕಿಕ್ ಸವಾಲ್

ಮರಿಯೆಕ್ ಕುಡಿ-ಅತ್ಮ್ಯಾಸಮೇತ್ ಸರ್ಗಾಕ್ ವ್ಹೆಲೆಂ ಮ್ಹಳ್ಳ್ಯಾ ವಾದಾಕ್ ಪೂರಕ್ ಜಾವ್ನ್ ಟಿ.ಎಲ್. ಫ್ರೆಜಿಯರ್ ಮ್ಹಳ್ಳೊ ಬರಯ್ಣಾರ್ (ಹಾಣೆಂ ಕ್ರಿಸ್ತಾಂವ್ ಭಾವಾಡ್ತಾವಿಶ್ಯಾಂತ್ ವಿವರ್ ದಿಂವ್ಚೆ ಜಾಯ್ತೆ ಬೂಕ್ ಬರಯ್ಲ್ಯಾತ್) ಸಾಂಗ್ತಾ: “ಪವಿತ್ರ್ ಸಭೆಂತ್ ರೆಲಿಕೆಂಕ್ ಬೊವ್ ಮಾನ್ ಆಸಾ; ಜೆಜುಚ್ಯಾ ಖುರ್‍ಸಾವಾಟೆಚ್ಯೊ ಆನಿ ಖುರ್‍ಸಾಚ್ಯೊ ಸಯ್ತ್ ರೆಲಿಕೊ ಆಸಾತ್, ಪುಣ್ ಮರಿಯೆಚ್ಯೆ ಕುಡಿಚಿ ಮ್ಹಳ್ಳಿ ರೆಲಿಕ್ ಎಕ್‌ಚ್ ಏಕ್ ನಾ.” ಸಾಂತಾ-ಭಕ್ತಾಂಚ್ಯೊ ಆನಿ ಪಯ್ಲ್ಯಾ ಶೆಕ್ಡ್ಯಾಚ್ಯಾ ಮಾಡ್ತಿರಾಂಚ್ಯೊ ಸಯ್ತ್ ರೆಲಿಕೊ ಜರ್ ಭಾವಾಡ್ತ್ಯಾಂನಿ ಸಾಂಬಾಳ್ನ್ ದವರ್‍ಲ್ಯಾತ್ ತರ್ ಕಿತ್ಲ್ಯಾ ಚಡ್ ಮಾಪಾನ್ ಮರಿಯೆಚ್ಯೊ ರೆಲಿಕೊ ಸಾಂಬಾಳ್ನ್ ದವರ್‍ತೆನಾಂತ್? ಹೆಂ ಸವಾಲ್ ಮರಿಯೆಚ್ಯಾ ಸರ್ಗಾವ್ಹರಣಾಚ್ಯಾ ವಾದಾಕ್ ಪಾಟಿಂಬೊ ದಿತಾ.

ಭಾವಾಡ್ತಾಚ್ಯಾ ಸತಾಚೊ ವಿಕಾಸ್

ಮರಿಯೆಚ್ಯಾ ಸರ್ಗಾವ್ಹರಣಾಚೆಂ ಭಾವಾಡ್ತಾಚೆಂ ಸತ್ ಪವಿತ್ರ್‌ಸಭೆಚ್ಯಾ ಆರಂಬಾರ್‌ಚ್ ಚಾಲ್ತೆರ್ ಆಸ್‌ಲೆಂ. ಟೂರ್ಸಾಚೊ ಸಾಂ. ಗ್ರೆಗೊರ್ ಆನಿ ಸಾಂ. ಜುವಾಂವ್ ದಾಮಾಸಿನ್ ತಸಲ್ಯಾ ಪವಿತ್ರ್‌ಸಭೆಚ್ಯಾ ಸುರ್ವಿಲ್ಯಾ ಬಾಪಾಂನಿ ತಾಂಚ್ಯಾ ಬರ್‍ಪಾಂನಿ ತಿಚ್ಯಾ ಸರ್ಗಾವ್ಹರಣಾಚಿ ವ್ಹಡ್ವಿಕ್ ಉಚಾರ್‍ಲ್ಯಾ. ಪಾಂಚ್ವ್ಯಾ ಶೆಕ್ಡ್ಯಾಂತ್ ಉದೆಂತಿಚ್ಯಾ ಒರ್ಥೊಡೊಕ್ಸ್ ಇಗರ್ಜ್‌ಮಾತೆಂನಿ ‘ದೇವ್‌ಮಾತೆಚಿ ಗಾಢ್ ನೀದ್’ (Dormition of the Theotokos) ಮ್ಹಳ್ಳ್ಯೆ ಪಾತ್ಯೆಣೆಖಾಲ್ ಮರಿ ಸ್ವಾಭಾವಿಕ್ ಥರಾನ್ ಮರಣ್ ಪಾವ್ಲಿ ಆನಿ ಉಪ್ರಾಂತ್ ತಿಕಾ ಸರ್ಗಾಕ್ ಉಕಲ್ನ್ ವ್ಹೆಲಿ ಮ್ಹಳ್ಳೆಂ ಚಿಂತಪ್ ಥಿರ್ ಜಾಲೆಂ. ಪುಣ್, ತೆರಾವ್ಯಾ ಶೆಕ್ಡ್ಯಾಂತ್ ಸಾಂ. ತೊಮಾಸ್ ಅಕ್ವಿನಾಸಾಮುಕಾಂತ್ರ್ ಮರಿಯೆಕ್ ಕುಡಿ-ಅತ್ಮ್ಯಾಸಮೇತ್ ಸರ್ಗಾಕ್ ವ್ಹೆಲ್ಲ್ಯೆ ಪಾತ್ಯೆಣೆಕ್ ಚಡ್ ಪಾಟಿಂಬೊ ಲಾಬ್ಲೊ ಆನಿ ನಿಮಾಣೆಂ, ಪಾಟ್ಲ್ಯಾ ಶೆಕ್ಡ್ಯಾಂತ್ ಪಾಪಾ ಪಿಯುಸ್ ಬಾರಾವ್ಯಾನ್ ನವೆಂಬ್ರಾಚ್ಯಾ 1ವೆರ್ 1950, ಆಪ್ಣಾಚೆಂ ಆಪೊಸ್ತಲಿಕ್ ಪರಿಪತ್ರ್ Munificentissimus Deus ಹಾಂತುಂ ಮರಿಯೆಚೆಂ ಸರ್ಗಾವ್ಹರಣ್ ಕಥೊಲಿಕ್ ಭಾವಾಡ್ತಾಚೆಂ ಸತ್ (dogma) ಮ್ಹಣೊನ್ ಅಧಿಕೃತ್ ರಿತಿನ್ ಪಾಚಾರ್‍ಲೆಂ. ತಾಚ್ಯೆ ಹ್ಯೆ ಅಧಿಕೃತ್ ಪಾಚಾರ್‍ಣೆಕ್ ಪಾಪಾನ್ ಆಪ್ಣಾಚೊ ಪಾಪಾಲ್ ಅಧಿಕಾರ್, ಬಿಸ್ಪಾಂಚೊ ಸಹಮತ್ ಆನಿ ಲೊಕಾಚೊ ಭಾವಾಡ್ತ್‌ಚ್ ಬುನ್ಯಾದ್ ಮ್ಹಣ್ ಸಾಂಗೊನ್ ಹೆಂ ಸತ್ ದೈವಿಕ್ ಉಗ್ಡಾಪಣ್ ಕಶೆಂ ಹರ್‍ಯೆಕಾ ಭಾವಾಡ್ತ್ಯಾನ್ ಪಾತ್ಯೆಂವ್ಕ್ ಜಾಯ್ ಮ್ಹಣ್ ಪಾಚಾರ್‍ಲೆಂ.

ತರ್ ಮರಿ ಮೆಲಿ ವಾ ಮರೊಂಕ್ ನಾ?

ಮರಿ ಮೆಲಿ ವಾ ಮರೊಂಕ್ ನಾ ಮ್ಹಳ್ಳೆಂ ಸವಾಲ್ ಹರ್‍ಯೆಕಾ ಭಾವಾಡ್ತ್ಯಾಚ್ಯೆ ಮತಿಂತ್ ಆಸ್ಚೆಂಚ್. ಮರಿ ಆಮ್ಚೆಬರಿಚ್ ಆದಾಂವ್-ಎವೆಚಿ ಧುವ್. ಮರಿಯೆಕ್ ಆಮ್ಚೆಬರಿಚ್ ಕೂಡ್ ಆಸ್‌ಲ್ಲಿ ಆನಿ ಅತ್ಮೊ ಆಸ್‌ಲ್ಲೊ, ತ್ಯಾ ದೆಕುನ್ ತಿಚ್ಯೆ ಸಂಸಾರಿ ಜಿಣಿಯೆಕ್ ಅಂತ್ ಆಸಜೆಚ್. ಕೂಡ್ ನೈಸರ್ಗಿಕ್ ದ್ರವ್ಯಾಂ (matter)  ಥಾವ್ನ್ ರೂಪಿತ್ ಜಾಲ್ಯಾ; ಕುಡಿಕ್ ತಾಚೆಸ್ತಕಿಂ ಸಾಸ್ಣಾಚೆಂ ಜಿವಿತ್ ನಾ. ಜಲ್ಮಾಲ್ಲೆಂ ಹರ್‍ಯೇಕ್ ಮರೊಂಕ್‌ಚ್ ಜಾಯ್. ರೂಕ್-ಝಡಾಂ, ಮನ್ಜಾತಿ ವಾ ವೆಳಾ ಆನಿ ಜಾಗ್ಯಾಚ್ಯಾ (time and space)  ಪರಿಧೆಭಿತರ್ ಯೆಂವ್ಚ್ಯೆ ಹರ್‍ಯೆಕ್ ಸಂಗ್ತಿಕ್ ಏಕ್ ಅಂತ್ ಆಸೊಂಕ್‌ಚ್ ಜಾಯ್. ವೆಳಾಕಾಳಾರ್ ಜಲ್ಮಾಲ್ಲಿ, ರೂಪಿತ್ ಜಾಲ್ಲಿ ಕೂಡ್ ವೆಳಾಕಾಳಾರ್ ನಪಂಯ್ಚ್ ಜಾತಾ. ಹೆಂ ಸಂಸಾರಾಚೆಂ ನಿಯಮ್. ಮರಿಯೆಚಿ ಕೂಡ್‌ಯೀ ತಶಿಚ್: ಆನ್ನಾ ಥಂಯ್ ಜಲ್ಮಾಲಿ, ವಾಡೊನ್ ಆಯ್ಲಿ, ಪ್ರಾಯೆನ್ ಭರ್‍ಲಿ. ಹೆಂ ಸಗ್ಳೆಂ ಸ್ವಾಭಾವಿಕ್ ರಿತಿನ್ ಮರಿಯೆಥಂಯ್ ಘಡ್ಲಾಂ ಮ್ಹಣ್ತಾನಾ ತಿಣೆಂ ಮರೊಂಕ್‌ಯೀ ಜಾಯ್ ಮ್ಹಳ್ಳೆಂ ತರ್ಕ್ ಯೆತಾಚ್. ದೆಕುನ್ ಮರಿ ಮೆಲಿಗೀ ವಾ ಅತ್ಮೊ ಆನಿ ಕೂಡ್ ವೆಗ್ಳೆಂ ಜಾಂವ್ಚ್ಯಾ ಪಯ್ಲೆಂಚ್ ತಿಕಾ ಸರ್ಗಾರ್ ಘೆತ್ಲೆಂಗೀ ಮ್ಹಳ್ಳೆಂ ಸವಾಲ್ ಆಮ್ಚೆಮುಕಾರ್ ಉಬೆಂ ಜಾಂವ್ಚೆಂ ಸಹಜ್. ಪಾಪಾ ಪಿಯುಸ್ ಬಾರಾವ್ಯಾಚೆಂ ಆಪೊಸ್ತಲಿಕ್ ಪರಿಪತ್ರ್ Munificentissimus Deus ಹ್ಯಾ ವಿಶ್ಯಾಂತ್ ಕಿತೆಂಚ್ ಸಾಂಗನಾ ತರೀ, ಜಶೆಂ ಜೆಜುಚ್ಯಾ ಅತ್ಮ್ಯಾನ್ ತಾಚಿ ಕೂಡ್ ಸಾಂಡ್ಲಿಗೀ ತಶೆಂಚ್ ಮರಿಯೆಚ್ಯಾ ಅತ್ಮ್ಯಾನ್‌ಯೀ ತಿಚಿ ಸಂಸಾರಿ ಕೂಡ್ ಸಾಂಡಿಜೆ ಪಡ್ಲಿ ಮ್ಹಳ್ಳೊ ಸಂಪ್ರದಾಯ್ ಇಗರ್ಜ್‌ಮಾತೆಂತ್ ಆದಿಂಥಾವ್ನ್ ಜಿವೊ ಆಸಾ.

ಸ್ವಾಭಾವಿಕ್ ಮರಣ್ ಆನಿ ಪಾತ್ಕಾಚೊ ಪ್ರಭಾವ್

ಎದೊಳ್‌ಚ್ ವಯ್ರ್ ಸಾಂಗ್‌ಲ್ಲೆಬರಿ ಜಾಗೊ ಆನಿ ವೆಳಾಚ್ಯೆ ಪರಿಧೆಥಾವ್ನ್ ಮಾಸಾ-ರಗ್ತಾಚ್ಯೆ ಕುಡಿನ್ ಅತ್ಮ್ಯಾಥಾವ್ನ್ ಮೆಕ್ಳಿ ಜಾಂವ್ಕ್‌ಚ್ ಜಾಯ್, ಕಿತ್ಯಾಕ್ ಸರ್ಗ್ ಏಕ್ ಜಾಗೊ ನ್ಹಯ್ ಬಗಾರ್ ಏಕ್ ಸ್ಥಿತಿ. ಹೆಂ ಸಮ್ಜೊಂಕ್ ಹಾಂಗಾಸರ್ ದೋನ್ ವಿಶಯಾಂಕ್ ಆಮಿ ಗುಮಾನ್ ದಿವ್ಯಾಂ.

1. ಅತ್ಮ್ಯಾನ್ ಕುಡಿಕ್ ಸಾಂಡ್ಚೆಂ

ಹೆಂ ಘಡ್ತಾನಾ ಕೂಡ್ ನಿರ್ಜೀವ್ ಜಾತಾ, ಕುಡಿಚೊ ಎಕೇಕ್‌ಚ್ ವಿಸ್ವೊ ಜೀವ್ ಹೊಗ್ಡಾಯ್ತಾ ಆನಿ ಆಖ್ರೇಕ್ ಸ್ತಬ್ದ್ ಜಾತಾ. ಸೊಂಪ್ಯಾ ಉತ್ರಾಂನಿ ಸಾಂಗ್ಚೆಂ ತರ್ ಮನಿಸ್ ಮರ್‍ತಾ.

2. ಅತ್ಮೊ ಕೂಡ್ ಸಾಂಡ್ತಾನಾ ಕುಡಿಚೆ ಆನಿ ಅತ್ಮ್ಯಾಚೆ ಆಟೆವಿಟೆ

ಮರಣ್ ಆಸ್ಚೆಂ ಕುಡಿ ಆನಿ ಅತ್ಮ್ಯಾಮದ್ಲ್ಯಾ ವೆಗ್ಳಾಚಾರಾಂತ್. ಆಟೆವಿಟೆ ಆಸ್ಚೆ ತ್ಯೆ ಕುಡಿಚ್ಯಾ ವಾ ಅತ್ಮ್ಯಾಚ್ಯಾ ವಾ ಮನ್ಶಾಚ್ಯೆ ಜಿಣಿಯೆಚ್ಯೆ ಅಸ್ಕತ್ಕಾಯೆನ್. ಕೊಣೀ ಮನಿಸ್ ವಿಪ್ರೀತ್ ರಿತಿನ್ ಸಂಸಾರಿ ಸಂಗ್ತಿಂಕ್ ಲಬ್ದೊನ್ ಆಸಾ ತರ್ ತಾಕಾ ತೆಂ ಸಾಂಡುಂಕ್ ಜಾಯ್ನಾ; ತಾಚ್ಯೆ ಸಗ್ಳ್ಯೆ ಜಿಣಿಯೆಂತ್ ತೊ ಪುಜಾಂವ್ನ್‌ಚ್ ವೆತಾ ಆನಿ ಮರ್‍ಣಾಚಿ ಘಡಿ ಯೆತಾನಾ ಹೆಂ ಸಗ್ಳೆಂ ಕೊಣಾಚೆಂ ಜಾತೆಲೆಂ ಮ್ಹಳ್ಳಿ ಭಿರಾಂತ್ ತಾಕಾ ಧೊಸ್ತಾ. ಜರ್ ತಾಕಾ ಮೊಗಾಚಿಂ ಮನ್ಶಾಂ ಆಸಾತ್ ಜಾಂವ್ಕ್ ಪುರೊ; ತಾಚಿಂ ಬಾಯ್ಲ್-ಭುರ್ಗಿಂ, ತಾಂಕಾಂ ಸೊಡ್ನ್ ವಚೊಂಕ್ ತೊ ಮನ್ ಕರಿನಾ ತರ್ ತಾಕಾ ಸಮಾಧಾನಾನ್ ಮರೊಂಕ್ ಜಾಯ್ನಾ. ತಶೆಂಚ್ ಎಕ್ಲೊ ಪಾತ್ಕಿ ಮನಿಸ್; ಜರ್ ತಾಣೆಂ ತಾಚ್ಯಾ ಜಿವಿತಾಂತ್ ಕೊಣಾಕ್ ಅನ್ನ್ಯಾಯ್ ಕೆಲಾ, ಮಾಂಡ್ಡೊ ಮಾರ್‍ಲಾ, ಲುಟ್ಲಾಂ ತರ್ ಮರ್‍ಣಾಚ್ಯಾ ವೆಳಾರ್ ತಾಚೆಂ ಕೊಶೆಡ್ದ್ ತಾಕಾ ಕಾಂತಯ್ತಾ, ಆಪ್ಣಾಚೆಂ ಜಿವಿತ್ ಪಿಡ್ಡ್ಯಾರ್ ಜಾಲೆಂ ಮ್ಹಣ್ ತಾಕಾ ಭೊಗ್ತಾ. ಹೆ ಜಾವ್ನಾಸಾತ್ ಮತಿಚೆ ಆನಿ ಕಾಳ್ಜಾಚೆ ಆಟೆವಿಟೆ; ಹೊ ಪಾತ್ಕಾಚೊ ಪರಿಣಾಮ್.

ಅತ್ಮ್ಯಾ ಆನಿ ಕುಡಿಚೊ ವೆಗ್ಳಾಚಾರ್ ಆಮ್ಚ್ಯಾ ಸಂಯ್ಬಾಂತ್‌ಚ್ ಆಟಾಪುನ್ ಆಸಾ. ಜೆಜುಕ್‌ಯೀ ತೊ ಮೆಳ್ಳೊ, ಮರಿಯೆಕ್‌ಯೀ ಮೆಳ್ಳೊ. ಪುಣ್ ತ್ಯೆ ಘಡಿಯೆ ಆಸ್ಚೆ ಆಟೆವಿಟೆ ದೆವಾನ್ ಘಡ್‌ಲ್ಲೆ ನ್ಹಯ್ ಬಗಾರ್ ಮನ್ಶಾನ್ ಕೆಲ್ಲೆ. ಜರ್ ಆಟೆವಿಟ್ಯಾವಿಣೆಂ ಮರೊಂಕ್ ಜಾಯ್, ಕ್ರೀಸ್ತಾಚ್ಯಾ ಮಿಸ್ತೆರಾಂಕ್ ಲಬ್ದೊನ್ ರಾವಜೆ. ತರ್ ಸವಾಲ್ ಉದೆತಾ: ಜೆಜುಕ್ ಆಟೆವಿಟೆ ನಾತ್‌ಲ್ಲೆಗೀ? ಖಂಡಿತ್ ಆಸ್‌ಲ್ಲೆ – ಚಡ್‌ಚ್ ಆಸ್‌ಲ್ಲೆ. ಕಿತ್ಯಾಕ್ ಮ್ಹಳ್ಯಾರ್ ದುಸ್ರ್ಯಾಂಚೆಂ ಪಾತಕ್ ತಾಣೆಂ ಆಪ್ಣಾಚೆರ್ ಘೆತ್ಲೆಂ. ತ್ಯಾ ಶಿವಾಯ್ ತಾಚಿ ಕೂಡ್ ಫಾಪ್ಸಿಲ್ಲಿ. ಮಾಸಾ-ರಗ್ತಾಚಿ ಕೂಡ್ ಫಾಪ್ಸಿತಾನಾ ವಿಪ್ರೀತ್ ದುಕ್ತಾ. ದೆಕುನ್, ಕ್ರೀಸ್ತಾಚೆ ಆಟೆವಿಟೆ ತಾಚ್ಯಾ ಪಾತ್ಕಾವರ್ವಿಂ ನ್ಹಯ್ ಬಗಾರ್ ಮನ್ಶಾಕುಳಾಚ್ಯಾ ಪಾತ್ಕಾವರ್ವಿಂ ಆನಿ ಕೂಡ್ ಫಾಪ್ಸಿಲ್ಲೆವರ್ವಿಂ. ತರ್ ಕೊಣೀ ಮನಿಸ್ ಜಾಯ್ತೆ ಆಟೆವಿಟೆ ಸೊಸುನ್ ಮರ್‍ತಾ ತರ್ ತೊ ವ್ಹಡ್ ಪಾತ್ಕಿ ಮ್ಹಣೊನ್ ಅರ್ಥ್ ನ್ಹಯ್. ಪಾತ್ಕಾಚಿ ಸಾವ್ಳಿ ಹರ್‍ಯೆಕಾ ಮನ್ಶಾಚೆರ್ ಪಡ್ಲ್ಯಾ. ಕಾಳಿಜ್ ಆನಿ ಮನ್ ನಿತಳ್ ಆಸಾ ತರೀ ಪಾತ್ಕಾಚೊ ಪರಿಣಾಮ್ ಆಮ್ಚೆರ್ ಆಸಾ.

ಮರಿಯೆಕ್ ಆಪ್ಡುಂಕ್ ಸಕನಾತ್‌ಲ್ಲೊ ಪಾತ್ಕಾಚೊ ಪ್ರಭಾವ್

ವಯ್ರ್ ಸಾಂಗ್‌ಲ್ಲೊ ತೊ ಪಾತ್ಕಾಚೊ ಪರಿಣಾಮ್ ಮರಿಯೆಚೆರ್ ನಾತ್‌ಲ್ಲೊ. ತ್ಯಾ ದೆಕುನ್ ತಿಕಾ ಮರ್‍ಣಾಚೆ ಆಟೆವಿಟೆ ನಾತ್‌ಲ್ಲೆ; ಪಯ್ಲ್ಯೆ ಘಡಿಯೆಥಾವ್ನ್ ತಿ ಕುರ್ಪೆನ್ ಭರ್‌ಲ್ಲಿ, ಸಯ್ತಾನಾಚೆಂ ಮಸ್ತಕ್ ತಿಣೆಂ ಚೆಂಚ್‌ಲ್ಲೆಂ, ಕ್ರೀಸ್ತಾಚೊ ಮಿಸ್ತೆರ್ ತಿಚ್ಯಾ ಜಿವಿತಾಂತ್ ಸಂಪೂರ್ಣ್ ಥರಾನ್ ಜ್ಯಾರಿ ಜಾಲ್ಲೊ. ತಿಚ್ಯೆ ಕುಡಿನ್ ವಾ ಅತ್ಮ್ಯಾನ್ ಕಸಲೆಂಚ್ ಪಾತಕ್ ಕರುಂಕ್ ನಾ ದೆಕುನ್ ತಿಚ್ಯಾ ಅತ್ಮ್ಯಾನ್ ಸಂಸಾರಿ ಕುಡಿಕ್ ಸಾಂಡ್ತಚ್ ದೆವಾನ್ ತಾಚ್ಯೆ ವಿಚಿತ್ರ್ ಮಾಂಡಾವಳೆನ್ ತಿಚೊ ಅತ್ಮೊ ಪಾಟಿಂ ತಿಚ್ಯೆ ಕುಡಿಂತ್ ಹಾಡ್ಲೊ ಆನಿ ಅಶೆಂ ತಿ ಕ್ರೀಸ್ತಾಚ್ಯಾ ಜಿವಂತ್ಪಣಾಂತ್ ವಾಂಟೆಲಿ ಜಾಲಿ. ಆಮಿ ಮರ್‍ತಾನಾ ತಿ ಕೂಡ್ ನಿರ್ಜೀವ್ ಜಾತಾ, ತಿಚ್ಯಾನ್ ಕಾಂಯ್ಚ್ ಕರುಂಕ್ ಜಾಯ್ನಾ, ತಿ ಕುಸೊನ್ ವೆತಾ. ಪೂಣ್ ಮರಿಯೆಥಂಯ್ ಅಶೆಂ ಘಡ್ಲೆಂನಾ. ಮರಿಯೆನ್ ಆಪ್ಣಾಚಿ ಕೂಡ್ ಸಂಪೂರ್ಣ್ ಥರಾನ್ ದೆವಾಕ್ ಕೊನ್ಸೆಕ್ರಾರ್ ಕೆಲ್ಲಿ; ದೆವಾಕ್‌ಚ್ ಕುಸ್ವ್ಯಾಂತ್ ಆಟಾಪ್‌ಲ್ಲಿ ಕೂಡ್ ಧುಳಿಂತ್ ಕುಸೊಂಕ್ ಅಸಾಧ್. ಜೆಜುಚ್ಯೆ ಕುಡಿಕ್‌ಯೀ ಮರ್‍ಣಾಚಿ ಕುಸಾಡಾಯ್ ಲಾಗೊಂಕ್ ನಾ. ಜೆಜುನ್ ಲಾಜರಾಕ್, ಜಾಯಿರಾಚ್ಯೆ ಧುವೆಕ್, ವಿಧ್ವಿಚ್ಯಾ ಪುತಾಕ್ ಉಟಯ್ಲೊ, ತಿಂ ಸಕ್ಕಡ್ ಪರತ್ ಮೆಲಿಂ. ಪುಣ್ ಮರಿ ಉಟ್‌ಲ್ಲಿ ತ್ಯಾ ಥರಾನ್ ನ್ಹಯ್. ತಿಚಿ ಇತ್ಲಿಂ ವರ್‍ಸಾಂ ಜಿಯೆಲ್ಲಿ ಕೂಡ್ ನವಿ ಜಾಲಿ, ನವ್ಯಾ ಜಿವಾನ್ ಭರ್‍ಲಿ.

ಮರಿಯೆಚ್ಯಾ ಮರ್‍ಣಾಂತ್ ತಿಚಿ ಜಿಣಿ ಆಖೇರ್ ಜಾಯ್ನಾ, ಪುಣ್ ಸಂಪೂರ್ಣ್ ಜಾತಾ. ತ್ಯಾ ಮರ್‍ಣಾಮುಕಾಂತ್ರ್ ತಿಕಾ ಸರ್ಗಿಂಚೊ ದಾರ್‍ವಾಟೊ ಉಗ್ತೊ ಜಾಲೊ. ತಿಚ್ಯೆ ಸಗ್ಳ್ಯೆ ಜಿಣಿಯೆಂತ್ ರಾಕೊನ್ ಆಸ್‌ಲ್ಲಿ ಘಡಿ ಆಯ್ಲಿ ಆನಿ ತಿ ಹೊರೆತಾಕ್ ಮೆಳೊಂಕ್ ಆಯ್ತಿ ಜಾಲಿ. ತಿಚ್ಯೆ ನಿತಳ್ ನಿರ್ಮಳ್ ಜಿಣಿಯೆಕ್ ದೆವಾನ್ ದಿಲ್ಲೆಂ ಇನಾಮ್ ತೆಂ. ಪಾಪಾವೀಣ್ ಆನಿ ಖತಾವೀಣ್ ಆಸ್‌ಲ್ಲ್ಯೆ ಮರಿಯೆನ್, ತಿಚೆಂ ಜಿಣಿಯೆಚೆಂ ಪಯ್ಣ್ ಆಖೇರ್ ಜಾತಚ್ ಸಂಸಾರಾಚ್ಯಾ ಜಾಗ್ಯಾ ಆನಿ ವೆಳಾಚ್ಯೆ ಪರಿಧೆಥಾವ್ನ್ ವಿಶೆವ್ ಘೆತ್ಲೊ; ಶಾರೀರಿಕ್ ಸಂಸಾರಾಥಾವ್ನ್ ಅತ್ಮಿಕ್ ಸಂಸಾರಾಕ್ ತಿ ಉತರ್‍ಲಿ (transition).  ಮರಿಯೆಚೆಂ ಮರಣ್ ಏಕ್ ಮರಣ್ ನ್ಹಯ್. ತಿಚೆಂ ಮರಣ್ ಏಕ್ ಗಾಢ್ ನೀದ್ (dormition). ತ್ಯೆ ನಿದೆಂತ್ ಭ್ಯೆಂ ನಾತ್‌ಲ್ಲೆಂ, ಆಟೆವಿಟೆ ನಾತ್‌ಲ್ಲೆ, ಕಶ್ಟ್ ನಾತ್‌ಲ್ಲೆ, ಪುರಾಸಣ್ ನಾತ್‌ಲ್ಲಿ, ಮುಕಾರ್ ಕಿತೆಂ ಜಾತಾ ಮ್ಹಳ್ಳಿ ಕಾವ್ಜೆಣಿ ನಾತ್‌ಲ್ಲಿ. ತಿಚೊ ಪೂತ್ ಜೆಜುಚ್ ತಿಕಾ ವ್ಹರುಂಕ್ ಆಯ್ಲೊ.

ಸಂಪ್ಣಿ

ನಿಮಾಣೆಂ, ಮರಿಯೆಚ್ಯಾ ಸರ್ಗಾವ್ಹರಣಾಚ್ಯಾ ಭಾವಾಡ್ತಾಚ್ಯಾ ಸತಾವಿಶ್ಯಾಂತ್ ಆಮಿ ಸಮ್ಜಜೆ ಜಾಲ್ಲೆಂ ಇತ್ಲೆಂಚ್: ಮರಿಯೆಚೆಂ ಸರ್ಗಾವ್ಹರಣ್ ಕ್ರಿಸ್ತಾಂವ್ ಸಂಪ್ರದಾಯ್ ಆನಿ ದೇವ್‌ಶಾಸ್ತ್ರೀಯ್ ಮುಳಾಂನಿ ಥಿರ್ ಠಿಕ್ಲಲೆಂ ಆಸಾ. ಹೊ ವಿಶೇಸ್ ಮಾನ್ ತಿಚ್ಯೆ ಪಾಪಾವೀಣ್ ಜಿಣಿಯೆಕ್ ಲಾಗೊನ್, ಸಾಲ್ವಾಸಾಂವಾಚ್ಯೆ ಚರಿತ್ರೆಂತ್ ತಿಚಿ ದೇಣ್ಗಿ ವಿಶೇಸ್ ದೆಕುನ್ ಆನಿ ದೆವಾಚಿಚ್ ತಿ ಆವಯ್ ದೆಕುನ್ ತಿಕಾ ದೆವಾನ್‌ಚ್ ದಿಲ್ಲೊ. ಮರಿಯೆಚೆಂ ಸರ್ಗಾವ್ಹರಣ್ ಹರ್‍ಯೆಕಾ ಭಾವಾಡ್ತ್ಯಾಕ್ ಮೆಳೊಂಕ್ ಆಸಾ ತ್ಯಾ ಇನಾಮಾಚಿ ಸಾವ್ಳಿ. ಜೆಜುಚ್ಯಾ ದುಸ್ರ್ಯಾ ಯೆಣ್ಯಾವೆಳಾರ್ ಹರ್‍ಯೆಕ್ಲಿಂ ಆಮಿ ಆಮ್ಚ್ಯಾ ಕುಡಿ ಆನಿ ಅತ್ಮ್ಯಾ ಬರಾಬರ್ ಸಾಸ್ಣಾಚ್ಯಾ ಜಿವಿತಾಕ್ ಉಟ್ತೆಲ್ಯಾಂವ್ ಮ್ಹಳ್ಳ್ಯಾಚಿಂ ಖುಣಾ ತಿ. ಜೆಂ ಕಿತೆಂ ಆಮಿ ಜೊಡುಂಕ್ ಆಸಾ ತೆಂ ಮರಿಯೆನ್ ಎದೊಳ್‌ಚ್ ಜೊಡ್ಲಾಂ. ಹಿ ಪಾತ್ಯೆಣಿ ಆಮ್ಚೆಂ ಶಾರೀರಿಕ್ ಅಸ್ತಿತ್ವ್ ನಾಸ್ ಜಾಯ್ನಾ ಬಗಾರ್ ತೆಂ ರುಪಾಂತರ್ ಜಾವ್ನ್ ದೆವಾಥಂಯ್ ಏಕ್ ಜಾಂವ್ಚ್ಯಾ ಪಾಂವ್ಡ್ಯಾಕ್ ಉಬಾರ್‍ಲಲೆಂ ಜಾತಾ ಮ್ಹಳ್ಳೆಂ ದಾಕೊವ್ನ್ ದಿತಾ ಮಾತ್ರ್ ನ್ಹಯ್, ಮರಿಯೆಚ್ಯೆ ಜಿಣಿಯೆಚಿ, ತಿಚ್ಯಾ ಶೆಗುಣಾಂಚಿ ದೇಕ್ ಘೆವ್ನ್ ಕ್ರೀಸ್ತಾಥಂಯ್ ಆಮಿಂಯ್ ವಿಶೇಸ್ ಸಂಬಂದ್ ಜೊಡಿಜೆ ಮ್ಹಣ್ ಆಪೊವ್ಣೆಂ ದಿತಾ.