ಅಕ್ಟೋಬರ್ ಮ್ಹಯ್ನೊ ಆಯ್ಲೊ ಮ್ಹಣ್ತಾನಾ, ಪಾವ್ಸ್ ರಾವೊನ್ ಯೆತಾ, ಫೆಸ್ತಾಂ, ಕಾಜಾರಾಂ-ಸೊಭಾಣಾಂಚೆಂ ಸೀಸನ್ ಸುರು ಜಾತಾ. ಕರ್ನಾಟಕಾಂತ್ ಇಸ್ಕೊಲಾಚ್ಯಾ ಭುರ್ಗ್ಯಾಂಕ್ ಅರ್ಧೆಂ ವರಸ್ ಆಖೇರ್ ಜಾವ್ನ್ ಮಧ್ಯ್-ವಾರ್‍ಶಿಕ್ ಪರೀಕ್ಶಾ ಸಂಪೊವ್ನ್ ದಸರಾ ರಜಾಚಿ ಮಝಾ ಭೊಗ್ತಾತ್. ವರ್‍ಸಾಕ್ ಏಕ್ ಪಾವ್ಟಿಂ ಘರ್ ಬೆಜ್ಮೆಂತ್ ಕೆಲ್ಲೆಬರಿ ಆಯುಧ ಪೂಜಾಚ್ಯಾ ದಿಸಾ, ಸರ್ವ್ ಇಗರ್ಜಾಂನಿ ವಾಹನಾಂ ಬೆಂಜಾರ್ ಕರ್‍ಚಿ ರಿವಾಜ್ ಸಬಾರ್ ವರ್‍ಸಾಂಥಾವ್ನ್ ಚಾಲ್ತೆರ್ ಆಸಾ. ತಶೆಂಚ್ ಚಡಾವತ್ ವೆಪಾರಿ, ಥರಾವಳ್ ವೆವ್ಹಾರಾಚೆ ಮನಿಸ್ ಹ್ಯಾಚ್ ವೆಳಾರ್ ಆಪ್ಲಿಂ ದುಕಾನಾಂ, ಫೆಕ್ಟರಿ ಇತ್ಯಾದಿ ಬೆಂಜಾರ್ ಕರ್‍ಚೆಂ ಸಾಮಾನ್ಯ್. ಪುಣ್ ಆನಿ ಥೊಡೆ ಪಾದ್ರ್ಯಾಬಾಂಕ್ ಆಪೊವ್ನ್ ಬೆಂಜಾರ್ ಕರಯ್ತಾತ್ ಮಾತ್ರ್ ನ್ಹಯ್, ಭೊಟಾಕ್ ಆಪೊವ್ನ್ ಹಾಡ್ನ್ ಪೂಜಾ ಕರೊಂವ್ಚೆಂಯ್ ಸಬಾರ್ ಕಡೆ ಚಲ್ತಾ. ತಶೆಂ ಜಾಲ್ಲ್ಯಾನ್ ಹಾಂವೆಂ ಹ್ಯಾ ಪಾವ್ಟಿಂ ಥೊಡ್ಯಾ ಆಮ್ಚ್ಯಾ ಇಶ್ಟಾಂಲಾಗಿಂ ಹ್ಯಾ ವಿಶಿಂ ಉಲೊವ್ನ್ ತಾಂಚಿ ಅಭಿಪ್ರಾಯ್ ಸಾಂಗಾತಾ ಘಾಲುಂಕ್ ಪ್ರಯತನ್ ಕೆಲಾಂ.

ಮ್ಹಜೊ ಸಂಪ್ರದಾಯ್ ಸೊಡ್ನ್ ದೀಂವ್ಕ್ ಹಾಂವ್ ತಯಾರ್ ನಾ

ಗುರ್ಪುರ್ ಫಿರ್ಗಜೆಚೊ ಎಲೆಕ್ಟ್ರಿಕಲ್ ಬಿಜ್ನೆಸ್ ಚಲೊವ್ನ್ ಆಸ್ಚೊ ಮ್ಹಣ್ತಾ: ಮ್ಹಜ್ಯಾ ಸಾಂಗಾತಾ ವಾವುರ್‍ಚೆ ಸರ್ವ್ ಧರ್ಮಾಚೆ ಮನಿಸ್ ಆಸಾತ್ ಆನಿ ಆಮಿ ಸರ್ವ್ ಸಾಂಗಾತ್ಪಾಣಾನ್ ಎಕ್ವಟಾನ್ ಕಾಮ್ ಕರ್‍ತಾಂವ್. ಮ್ಹಜ್ಯಾ ಸರ್ವ್ ವಾವ್ರಾಡ್ಯಾಂಕ್ ನಿತಿಪರ್ಮಾಣೆಂ ಕಿತೆಂ ದೀಂವ್ಕ್ ಆಸಾಂ ತೆಂ ದಿತಾಂ. ತಾಂಕಾಂ ವಾ ಆನಿ ಕೊಣಾಕೀ ಖುಶ್ ಕರುಂಕ್ ಹಾಂವ್ ಮ್ಹಜಿ ಸಮಡ್ತ್ ಸೊಡ್ನ್ ಹೆರ್ ಆಚರಣಾಂ ಕರುಂಕ್ ಮ್ಹಾಕಾ ಪಸಂದ್ ನಾ. ಆಯುಧ ಪೂಜಾ ದೀಸ್ ಭೊಟಾಕ್ ಹಾಡ್ನ್ ಪುಜಾ ಕೆಲಿ ತರ್, ಈದ್ ಸಂಭ್ರಮ್ತಾನಾ ಗಾಯ್ ವಾ ಬೊಕ್ರೊ ಮಾರಿಜೆ ನ್ಹಯ್‌ಗೀ? ಸರ್ವ ಧರ್ಮ ಸಮನ್ವಯ ತರ್, ಹರ್ ಜಾತಿಚೆಂ ಫೆಸ್ತ್ ಆಮಿ ತಾಂಚ್ಯಾ ತಾಂಚ್ಯಾ ಸಂಪ್ರದಾಯಾ ಪರ್ಮಾಣೆಂ ಕರಿಜೆ ಪಡತ್. ದೆಕುನ್ ಹಾಂವ್ ಸರ್ವಾಂಕ್ ಮಾನ್ ದಿತಾಂ, ಗವ್ರವ್ ದಿತಾಂ ಪುಣ್ ಮ್ಹಜಿ ರೀತ್ ನೀತ್, ಮ್ಹಜೊ ಸಂಪ್ರದಾಯ್ ಸೊಡ್ನ್ ದೀಂವ್ಕ್ ಹಾಂವ್ ತಯಾರ್ ನಾ, ಆನಿ ದೋನ್ ದೊಣಿಂಚೆರ್ ಪಾಂಯ್ ದವರ್‍ಲ್ಯಾರ್ ಪಡ್ಚೆಂ ಉದ್ಕಾಕ್ ಜಾಲ್ಲ್ಯಾನ್ ದೋನ್ ದೆವಾಂಚಿ ಪುಜಾ ಕರ್‍ಚೆಂ ಖಂಡಿತ್ ಜಾವ್ನ್ ಚೂಕ್.

ಮ್ಹಜ್ಯೆ ಫೆಕ್ಟರಿಂತ್ ವರ್‍ಸಾಕ್ ಏಕ್ ಪಾವ್ಟಿಂ ಬೆಂಜಾರ್ ಕರಯ್ತಾಂ

ಬಜ್ಪೆ ಫಿರ್ಗಜೆಚೊ ಎಕ್ಲೊ ಈಶ್ಟ್ ತಾಕಾ ರುಕಾಡಾಚೆಂ ತಶೆಂ ಫರ್ನಿಚರ್ ಬಿಜ್ನೆಸ್ ಕರ್‍ನ್ ಆಸ್ಚೊ ತೊ ಮ್ಹಾಕಾ ಮ್ಹಣ್ತಾ: ಮ್ಹಜೆಲಾಗಿಂ ದೋನ್ ಪಿಕ್-ಅಪ್ ಆಸಾತ್ ಆನಿ ತಾಚೆ ಡ್ರೈವರ್ ಹಿಂದೂ. ತ್ಯೊ ಗಾಡಿಯೊ ತಾಂಚ್ಯಾಚ್ ಹಾತಾಂತ್ ಆಸ್ತಾತ್. ತೆಚ್ ಘರಾ ವ್ಹರ್‍ತಾತ್, ಧುತಾತ್, ತಾಂಚ್ಯೊಚ್ ಗಾಡಿಯೊ ಮ್ಹಳ್ಳೆಬರಿ ಜಾಗ್ರುತ್ ಕರ್‍ತಾತ್. ಆಯುಧ ಪೂಜಾ ದೀಸ್ ತೆಚ್ ತ್ಯಾ ಗಾಡಿಯಾಂಕ್ ಫುಲಾಂ ಘಾಲ್ತಾತ್, ಪುಜಾ ಕರಯ್ತಾತ್ ಆನಿ ಹಾಂವ್ ತಾಂತುಂ ಮದೆಂ ಪಡೊಂಕ್ ವಚನಾ. ಪುಣ್ ಮ್ಹಜ್ಯೆ ಫೆಕ್ಟರಿಂತ್ ತಶೆಂ ಒಫಿಸಾಂತ್ ಹಾಂವ್ ವರ್‍ಸಾಕ್ ಏಕ್ ಪಾವ್ಟಿಂ ಬೆಂಜಾರ್ ಕರಯ್ತಾಂ ಆನಿ ಹ್ಯಾ ಸಂದರ್ಭಾರ್ ಮ್ಹಜ್ಯಾ ಕಾಮಾಚ್ಯಾಂಕ್ ಮಾಗ್ಣ್ಯಾಕ್ ಯೇಂವ್ಕ್ ಹಾಂವ್ ವಿಚಾರಿನಾ. ತಾಂಚೊ ಧರ್ಮ್ ತಾಂಚ್ಯಾ ಘರಾಂನಿ ತೆ ಪಾಳ್ತಾತ್ ಆನಿ ತಾಂಚಿ ಪಾತ್ಯೆಣಿ ಆಸಾ ಮ್ಹಣ್, ತಾಂಕಾಂ ಖುಶಿ ಕರುಂಕ್ ಹಾಂವ್ ತಾಂಚ್ಯೊ ರಿತಿ ರಿವಾಜಿ ಪಾಳುಂಕ್ ವಚನಾ. ಜ್ಯಾ ಕಾಮಾವರ್ವಿಂ ಹಾಂವ್ ಮ್ಹಜೊ ಗ್ರಾಸ್ ಜೊಡ್ತಾಂ, ತ್ಯಾ ಕಾಮಾಚೊ ಮ್ಹಾಕಾ ಮೋಗ್ ಆಸಾ ದೆಕುನ್ ಬೆಂಜಾರ್ ಕರೊವ್ನ್ ತ್ಯಾ ಕಾಮಾಚೆರ್ ದೆವಾಚೆಂ ಬೆಸಾಂವ್ ಹಾಂವ್ ಜೋಡ್ನ್ ಘೆತಾಂ, ಪುಣ್ ಸಮಾಜೆಕ್ ದಾಕಯ್ಜೆ ಮ್ಹಳ್ಳೆಖಾತಿರ್ ಭೊಟಾಕ್ ಆಪೊವ್ನ್ ಹಾಡ್ನ್ ಪುಜಾ ಕರೊಂವ್ಚ್ಯಾಕ್ ಹಾಂವ್ ಖಂಡಿತ್ ವಿರೋಧ್ ಉಚಾರ್‍ತಾಂ.

ಭೊಟಾಕ್ ಆಪೊವ್ನ್ ಪುಜಾ ಕರ್‍ಚೆಂ ಸವಾಲ್ ಬಿಲ್ಕುಲ್ ಉದೆನಾ

ಕೊಡ್ಯಾಳ್ ಕುದ್ರೋಳಿ ಲಾಗ್ಸಾರ್ ಪ್ರಿಂಟಿಂಗ್ ಪ್ರೆಸ್ಸ್ ಚಲೊವ್ನ್ ಆಸ್ಚೊ ಆಮ್ಚೊ ಏಕ್ ಈಶ್ಟ್, ತಾಚ್ಯಾ ಒಫಿಸಾಂತ್ ಧನಿ ಎಕ್ಲೊ ಮಾತ್ರ್ ಕ್ರಿಸ್ತಾಂವ್ ಆನಿ ಉರ್‍ಲಲೆ ಪೂರಾ ಹಿಂದ್ವಾಚೆ. ಆಯುಧ ಪೂಜಾ ವಿಶ್ಯಾಂತ್ ತಾಚೆಲಾಗಿಂ ಉಲಯ್ತಾನಾ ತಾಣೆಂ ಮ್ಹಾಕಾ ಸಾಂಗ್ಲೆಂ : ಏಕ್ ಪಾವ್ಟಿಂ ಖುರಿಸ್ ದವರ್‍ನ್ ಬೆಂಜಾರ್ ಕೆಲ್ಲ್ಯಾ ಒಫಿಸಾಂತ್ ದುಸ್ರ್ಯೆ ಕಸಲ್ಯೆಯ್ ರಿತಿಚಿ ಪುಜಾ ಹಾಂವ್ ಕರುಂಕ್ ಬದ್ಧ್ ವಿರುದ್ಧ್. ಭೊಟಾಕ್ ಆಪೊವ್ನ್ ಹಾಡ್ನ್ ಪುಜಾ ಕರ್‍ಚೆಂ ಸವಾಲ್ ಬಿಲ್ಕುಲ್ ಉದೆನಾ. ಪುಣ್ ಮ್ಹಜಿಂ ಕಾಮಾಚಿಂ ರಂಗೊಲಿ ಘಾಲ್ತಾತ್, ಫುಲಾಂ ಘಾಲ್ತಾತ್ ತಾಕಾ ಹಾಂವ್ ವಿರೋಧ್ ಕರಿನಾ. ಪುಣ್ ಕಸಲ್ಯೆಯ್ ರಿತಿಚಿ ಪುಜಾ ಕರುಂಕ್ ಕೊಣಾಯ್ಕಿ ಹಾಂಗಾ ಆವ್ಕಾಸ್ ಹಾಂವ್ ಕರ್‍ನ್ ದೀನಾ. ಕಾಮಾಚ್ಯಾಂಕ್ ಜಾಂವ್, ಕಸ್ಟಮರಾಂಕ್ ಜಾಂವ್ ಇಂಪ್ರೆಸ್ ಕರ್‍ಚೆಖಾತಿರ್ ಪುಜಾ ಚಲೊವ್ನ್ ಬಿಜ್ನೆಸ್ ಕರ್‍ಚೆಂ ಮ್ಹಳ್ಯಾರ್ ದೆವಾಕ್ ಆಮ್ಚ್ಯೆ ಗರ್ಜೆಕ್ ಜಾಯ್ ತಶೆಂ ವಾಪಾರ್‍ಚೊ ನಾಟಕ್ ಆಮಿ ಚಲಯ್ತಾಂವ್ ಜಾಲ್ಲ್ಯಾನ್ ಮ್ಹಾಕಾ ಹೆಂ ಸಾರ್ಕೆಂ ಮ್ಹಣ್ ಭೊಗನಾ.

ಲೊಕಾಕ್ ಖುಶಿ ಕರುಂಕ್ ಸೊಧ್ತಾಂ ತರ್ ಹಾಂವ್ ಏಕ್ ಹಿಪ್ಪೊಕ್ರಿಟ್

ಆಮ್ಚ್ಯೆ ಒಳ್ಕಿಚೊ ಏಕ್ ಬಿಜ್ನೆಸ್‌ಮ್ಯಾನ್, ಜಾತಿನ್ ಬ್ರಾಹ್ಮಣ್ ತೊ, ಕೊಡ್ಯಾಳಾಂತ್ ವ್ಹಡ್ಲಿಂ ದೋನ್ ಶೋರೂಮಾಂ ತಾಕಾ ಆಸಾತ್ ಆನಿ ಕೊಡ್ಯಾಳಾಂತ್ ಹರ್‍ಯೆಕ್ಲ್ಯಾಕ್ ಒಳ್ಕಿಚೊ ತೊ. ತಾಚೆಲಾಗಿಂ ಹಾಂವೆಂ ವಿಚಾರ್‍ಲೆಂಂ : ತುಕಾ ಸರ್ವ್ ಧರ್ಮಾಚೆ ಕಸ್ಟಮರ್ ಆಸಾತ್, ಕಾಮಾಚೆ ಆಸಾತ್, ತುವೆಂ ಕೆದಾಳಾ ತರೀ ತಾಂಕಾಂ ಖುಶಿ ಕರ್‍ಚೆಖಾತಿರ್ ತಾಂಚ್ಯಾ ಧರ್ಮಾಚಿಂ ಫೆಸ್ತಾಂ ಕರುಂಕ್ ವಾ ಯಾಜಕಾಕ್ ಆಪೊವ್ನ್ ತುಮ್ಚೆಂ ಪ್ರೊಜೆಕ್ಟ್ ವಾ ಒಫಿಸ್ ಆಶೀರ್ವದಿತ್ ಕರುಂಕ್ ಪುಣಿ ಚಿಂತ್ಲಾಂಯ್‌ಗೀ? ಸರ್ವ ಧರ್ಮ ಸಮನ್ವಯ ಮ್ಹಳ್ಯಾರ್ ತುಜಿ ಅಭಿಪ್ರಾಯ್ ಕಿತೆಂ? ತವಳ್ ತೊ ಮ್ಹಾಕಾ ಮ್ಹಣಾಲೊ: ಕೊಣಾಯ್ಕಿ ಇಂಪ್ರೆಸ್ ಕರ್‍ಚೆಖಾತಿರ್ ಮ್ಹಜಿ ಸಮಡ್ತ್ ಸೊಡ್ನ್ ಹೆರ್ ಲೊಕಾಕ್ ಖುಶಿ ಕರುಂಕ್ ಹಾಂವ್ ಸೊಧ್ತಾಂ ತರ್ ಹಾಂವ್ ಏಕ್ ಹಿಪ್ಪೊಕ್ರಿಟ್. ಮ್ಹಜ್ಯಾ ಲಾಭಾಖಾತಿರ್ ಹಾಂವ್ ಧರ್ಮ್ ಆನಿ ಜಾತಿಚೊ ಉಪ್ಯೊಗ್ ಕರ್‍ನ್ ಲೊಕಾಚ್ಯಾ ದೊಳ್ಯಾಂಕ್ ಮಾತಿ ಘಾಲಿನ್ ಪುಣ್ ದೆವಾಚ್ಯಾ ದೊಳ್ಯಾಂಕ್ ಮಾತಿ ಘಾಲುಂಕ್ ಸಾಧ್ ನಾ. ಆನಿ ಕೊಣೀ ಹೆಂ ಕರಿತ್ ತರ್ ತೊ ಫಟ್ಕಿರೊ ಜಾತಾ. ಸರ್ವ ಧರ್ಮ ಸಮನ್ವಯ ಮ್ಹಳ್ಯಾರ್ ತುಂ ಜಿಯೆ ಆನಿ ಹೆರಾಂಕ್‌ಯೀ ಜಿಯೆಂವ್ಕ್ ಸೊಡ್. ಸ್ವತಂತ್ರ್ ದೆಶಾಂತ್ ಸರ್ವಾಂಕ್ ಸೌಹಾರ್ದ್‌ಪಣಾಂತ್ ಜಿಯೆಂವ್ಕ್ ಆವ್ಕಾಸ್ ಆಸಾ ಆನಿ ಹಾಕಾ ಕೊಣೆಂಯ್ ಆಡ್ ಯೇನಾಯೆ. ದೆಕುನ್ ಹಾಂವ್ ಪಾದ್ರ್ಯಾಬಾಂಕ್ ಆಪೊವ್ನ್ ಮ್ಹಜ್ಯಾ ಒಫಿಸಾಂತ್ ಮಾಗ್ಣೆಂ ವಾ ಆಶೀರ್ವಚನ್ ಬಿಲ್ಕುಲ್ ಚಲೊಂವ್ಚೊಂನಾ.

ಕ್ರಿಸ್ತಾಂವ್ ಮ್ಹಣ್ ದಾಕಯ್ಜೆ ತರ್ ಭಾಯ್ಲ್ಯಾ ಗುರ್‍ತಾಂಚಿ ಗರ್ಜ್ ನಾ

ನಿಮಾಣೆಂ ಹಾಂವೆಂ ಏಕಾ ಸಮಾಜಿಕ್ ಬರೆಪಣಾಪಾಸತ್ ವಾವ್ರ್ ಕರ್‍ನ್ ಆಸ್ಚ್ಯಾ ಎಕಾ ಮಾನೆಸ್ತಾಲಾಗಿಂ ಹೆಂಚ್ ಸವಾಲ್ ವಿಚಾರ್‍ತಾನಾ ತೊ ಮ್ಹಾಕಾ ಮ್ಹಣಾಲೊ: ಹಾಂವ್ ಮ್ಹಜ್ಯಾ ಒಫಿಸಾಭಿತರ್ ಕಸಲೊಚ್ ಧರ್ಮ್ ಪಾಳಿನಾ. ಹಾಂವೆಂ ಮ್ಹಜೆಂ ಒಫಿಸ್ ಉಗ್ತಾವಣೆಕ್ ಕೊಣೀ ಧರ್ಮಿಕ್ ವ್ಹಡಿಲಾಕ್ ಆಪೊವ್ಣೆಂ ದೀಂವ್ಕ್ ನಾ. ಮ್ಹಾಕಾ ಹಿಂದ್ವಾಚೆ ಜಾಂವ್, ಮಾಪ್ಳ್ಯಾಚೆ ಜಾಂವ್ ತಾಂಚ್ಯಾ ದಿವ್ಳಾಂಕ್ ಆನಿ ವಿವಿಧ್ ಕಾರ್ಯಾಕ್ರಮಾಂಕ್ ಆಪೊವ್ಣೆಂ ದಿತಾತ್ ಆನಿ ಹಾಂವ್ ವೆತಾಂ. ದಿವ್ಳಾಂಭಿತರ್ ಹಾಂವ್ ಗೆಲಾಂ, ತಾಂಚಿ ಪುಜಾ ಚಲ್ತಾನಾ ರಾವೊನ್ ಹಾಂವೆಂ ಪಳೆಲಾಂ, ತಾಣಿಂ ದಿಲ್ಲೆಂ ಖಾಣ್ ಮ್ಹಾಕಾ ಪಸಂದ್ ಜಾಲ್ಯಾರ್ ಖೆಲಾಂ, ಪಸಂದ್ ಜಾವ್ನಾ ತರ್ ಸೊಡ್ಲಾಂ. ಪುಣ್ ಸಮ್ಜಣಿ ಆಸೊನ್, ಕೊಣಾಯ್ಕಿ ಖುಶಿ ಕರುಂಕ್ ಹಾಂವೆಂ ಅನ್ಯ್ ದೆವಾಂಕ್ ಬಿಲ್ಕುಲ್ ಆರಾಧನ್ ವಾ ನಮಸ್ಕಾರ್ ಎದೊಳ್ ಕರುಂಕ್ ನಾ, ಮುಕಾರೀ ಕರ್‍ಚೊಂನಾ ಆನಿ ಮ್ಹಜ್ಯಾ ಕಾಮಾಚ್ಯಾಂಕ್ ವಾ ಮ್ಹಜ್ಯಾ ಕಸ್ಟಮರಾಂಕ್ ಸಂತೊಸ್ ದೀಂವ್ಕ್ ಹಾಂವ್ ಜರ್ ತಶೆಂ ಕರಿನ್ ತರ್, ಹಾಂವ್ ನಾಟಕ್ ಕರ್‍ತಾಂ. ತಸಲೊ ನಾಟಕ್ ಹಾಂವ್ ಫಕತ್ ಮ್ಹಜ್ಯಾ ಲಾಭಾಖಾತಿರ್ ಕರ್‍ತಾಂ ಜಾಲ್ಯಾರ್ ಮ್ಹಜೆತೆದೊ ವ್ಹಡ್ ಕಪಟಿ ಮನಿಸ್ ದುಸ್ರೊ ಕೊಣೀ ಆಸ್ಚೊನಾ. ಹಾಂವೆಂ ಮ್ಹಜ್ಯಾ ಕಾರಾಕ್ ಜಾಂವ್, ಬೈಕಾಕ್ ಜಾಂವ್ ಬೆಂಜಾರ್ ಕರುಂಕ್ ನಾ, ವಾ ಖುರಿಸ್, ಕೋಂತ್ ಕಸಲೆಂಚ್ ಘಾಲುಂಕ್ ನಾ. ಕಿತ್ಯಾಕ್ ಮ್ಹಾಕಾ ಹಾಂವ್ ಕ್ರಿಸ್ತಾಂವ್ ಮ್ಹಣ್ ದಾಕಯ್ಜೆ ತರ್ ಭಾಯ್ಲ್ಯಾ ಗುರ್‍ತಾಂಚಿ ಗರ್ಜ್ ನಾ. ಹಾಂವೆಂ ಕ್ರಿಸ್ತಾಂವ್ ಮ್ಹಣ್ ಮ್ಹಜ್ಯಾ ಉತ್ರಾಂನಿ ಆನಿ ಕರ್‍ನ್ಯಾಂನಿ ದಾಕಯ್ಜೆ ಮ್ಹಣ್ ಖುದ್ದ್ ಕ್ರೀಸ್ತಾನ್ ಆಮ್ಕಾಂ ಸಾಂಗ್ಲಾಂ. ಆಮಿ ಭಾರತೀಯ್ ಸರ್ವ್ ಜಾತಿ-ಕಾತಿ-ಧರ್ಮಾಚೊ ಲೋಕ್ ಹಾಂಗಾ ಮೊಗಾನ್ ಆನಿ ಸಂತೊಸಾನ್ ಸಾಂಗಾತಾ ಜಿಯೆತಾಂವ್, ದೆಕುನ್ ಎಕಾಮೆಕಾಚಿ ಸಂಸ್ಕೃತಿ, ಜಾತ್, ಭಾಸ್ ಗವ್ರವಾನ್ ದೆಕ್ಚಿ ಗರ್ಜ್ ಆಸಾ. ತಶೆಂ ಮ್ಹಣೊನ್ ಮ್ಹಜಿ ಅಸ್ಮಿತಾಯ್ ವಿಸ್ರೊನ್ ಫಕತ್ ದುಸ್ರ್ಯಾಂಚ್ಯಾ ದೊಳ್ಯಾಂಕ್ ಮಾತಿ ಘಾಲುಂಕ್ ಅಸಲೆಂ ಕರ್‍ತಾಂವ್ ತರ್ ಆಮಿ ಕಪಟಿ ಜಾತಾಂವ್.

ತರ್ ಮೊಗಾಚ್ಯಾ ವಾಚ್ಪ್ಯಾಂನೋ, ಹರ್‍ಯೆಕಾ ಆಯುಧ ಪೂಜಾ ವೆಳಾರ್ ಆಮ್ಚ್ಯಾ ಇಗರ್ಜಾಂನಿ ಆಮ್ಚಿಂ ವಾಹನಾಂ ಬೆಂಜಾರ್ ಕರ್‍ಚಿ ರಿವಾಜ್ ಸಾರ್ಕಿ ವಾ ಚೂಕ್? ವಾಹನಾಂ ಬೆಂಜಾರ್ ಕರ್‍ನ್ ಕೋಂತ್ ಖುರಿಸ್ ಘಾಲ್ನ್ ಟ್ರಾಫಿಕ್ ರುಲಿ-ರೆಗ್ರೊ ಪಾಳಿನಾಂವ್ ತರ್ ಆಕ್ಸಿಡೆಂಟ್ ಜಾಯ್ನಾಶೆಂ ರಾಕೊನ್ ವ್ಹರುಂಕ್ ದೇವ್ ಖಂಡಿತ್ ಯೆಂವ್ಚೊನಾ. ಇತ್ಲ್ಯಾ ಜಣಾಂಚಿ ಅಭಿಪ್ರಾಯ್ ವಾಚ್ಲ್ಯಾ ಉಪ್ರಾಂತ್ ತುಮ್ಚಿ ಅಭಿಪ್ರಾಯ್ ಕಿತೆಂ? ಬರೆಂ ತರ್, ಆಯುಧ ಪೂಜಾ ಪಯ್ಲೆಂ ಆಮ್ಚ್ಯೊ ಗಾಡಿಯೊ ಸರ್ವಿಸ್ ಕರುಂಕ್ ದೀಂವ್ಕ್ ಆಸಾತ್, ಬಾಯ್ ಬಾಯ್.

——–

ಇತ್ಲ್ಯಾ ಜಣಾಂಚಿ ಅಭಿಪ್ರಾಯ್ ವಾಚ್ಲ್ಯಾ ಉಪ್ರಾಂತ್ ತುಮ್ಚಿ ಅಭಿಪ್ರಾಯ್ ಕಿತೆಂ?

✍️ –ಲೀಝಾ ರೊಡ್ರಿಗಸ್