‘ಹ್ಯಾ ಪಾದ್ರಿಂಕಡೆ ಆರೆಂಜುನ್ ಪುರೊ ಪಡನಾ’ ಮ್ಹಣ್ ಕಳ್ಳ್ಯಾ ಉಪ್ರಾಂತ್ ಕೊಣ್ಣಾ ರೊಬಾಟಾಮಾನ್ ಏಕ್ ದೀಸ್ ಮೀಡಿಯಾ ಮುಕಾರ್ ಯೇವ್ನ್ ‘ತಾಂಕಾಂ ಪೂರಾ ಟ್ರೈನಿಂಗ್ ಸೆಮಿನರಿಂತ್‌ಚ್ ಮೆಳ್ತಾ, ಭಾಯ್ರ್ ಯೇವ್ನ್ ತೆ ಪುರಾಯ್ ಎಕ್‌ಚ್ ಭಾಸ್ ಉಲಯ್ತಾತ್’ ಮ್ಹಣ್ ಕೆದಾಳಾ ಸಾಂಗೊನ್ ಸೊಡ್ಲೆಂಗೀ ನಾ, ಹಾಂವ್ ಚಿಂತುನ್ ಚಿಂತುನ್ ಭಾಗ್ಲಾಂ! ಕಿತ್ಲೆಂ ಉಡಾಸ್ ಕಾಡ್ಲ್ಯಾರೀ ತೆರಾ ವರ್‍ಸಾಂನಿ ಸೆಮಿನರಿಂತ್ ಖಂಯ್ಚ್ಯಾ ಪ್ರೊಫೆಸರಾನ್ ಖಂಯ್ಚೊ ಪಾಠ್ ಶಿಕಯ್ಲಾ ಮ್ಹಣ್ ಆತಾಂ ವಿಚಾರ್‍ಲ್ಯಾರ್ ಮ್ಹಾಕಾ ಏಕ್ ಪಾವ್ಟಿಂಚ್ಯಾಕ್ ಅಮಿತಾಬ್ ಬಚ್ಚನಾನ್ ಎಕಾ ಲಾಖಾಚೆಂ ಸವಾಲ್ ವಿಚಾರ್‌ಲ್ಲೆಬರಿ ಜಾವ್ನ್ ‘ಇಶ್ಟಾಕ್ ಫೊನ್ ಕರ್‍ನ್’ ಜಾಪ್ ಸಾಂಗುಂಗೀ ಮ್ಹಣ್ತಾಂ.

ತಶೆಂ ಪಳೆಂವ್ಕ್ ಗೆಲ್ಯಾರ್ ಹಾಂವ್ ಜೆಪ್ಪುಂತ್ ಆತಾಂಚ್ಯಾ ಬಿಸ್ಪ್ ಸಾಯ್ಬಾಂಚೊ ಶಿಸ್. ತೆಂ ತಾಂಕಾಂಯ್ ಕಳಿತ್ ಆಸ್ಚೆಂನಾ, ಕ್ಲಾಸಿಂತ್ ಆಸ್ತಾನಾ ಹಾಂವ್ ಆಸಾಂಗೀ ನಾ ಮ್ಹಳ್ಳೆಬರಿ ಆಸ್ತಾಲೊಂ. ತಾಣಿಂ ರೋಮಾಂತ್ ಥಾವ್ನ್ ಯೇವ್ನ್ ಜೆಪ್ಪುಚ್ಯಾ ಬಂದ್ ಕುಡಾಂನಿ ಕುರ್ಪೊಣ್ಯಾಂತ್ ಆಮ್ಚೆಭಿತರ್ ಕಿತ್ಲಿ ಥಿಯೊಲಜಿ ವೊತ್ಲ್ಯಾರೀ ಮ್ಹಜಿ ತಕ್ಲಿ ಒಟ್ಟೆ ಕಟ್ಟಿ ಜಾಲ್ಲ್ಯಾನ್ ಸೊಧ್ಲ್ಯಾರ್ ತುಮ್ಕಾಂ ವಾಳ್ಚೆಬಾಜಿಯ್ ಮೆಳ್ಚಿನಾ. ಹಾಂ! ತುಮಿ ಆತಾಂ ವಚೊನ್ ತಾಂಕಾಂ ಉಡಾಸ್ ಕರಿನಾಕಾತ್! 

ಬಿಸ್ಪ್ ಮ್ಹಣ್ತಾನಾ ಉಡಾಸ್ ಆಯ್ಲೊ, ಪೋಯ್ರ್ ‘ಕಾರ್ಮೆಲ್ ಕಿರಣಾ’ರ್ ತಾಂಚೊ ಏಕ್ ಶೆರ್ಮಾಂವ್ ಆಯ್ಕಲೊ. ತಾಂತುಂ ಬಿಸ್ಪ್ ಸಾಯ್ಬಾಂನಿ ಮ್ಹಳೆಂ, ‘ಪಾಪಾ ಸಾಯ್ಬಾನ್ ಆಟ್ ಮಿನುಟಾಂಚೊ ಶೆರ್ಮಾಂವ್ ದೀಂವ್ಕ್ ಸಾಂಗ್ಲಾ.. ತಾಂಚೊ ಶೆರ್ಮಾಂವ್ ಥೊಡೆಪಾವ್ಟಿಂ ಕಿತ್ಲೊ ಲಾಂಬ್ತಾ ಜಾಣಾಂತ್?’ ವ್ಹಯ್‌ಗೀ ನ್ಹಯ್ ತರ್! ದೋನ್ ಮಿನುಟಾಂನಿ ತಯಾರ್ ಜಾತಾ ಮ್ಹಣ್ಚಿ ಮ್ಯಾಗಿ ಸಯ್ತ್ ದೋನ್ ಮಿನುಟಾಂನಿ ಶಿಜನಾ ಕಂಯ್ ಆನಿ ಆಟ್ ಮಿನುಟಾಂನಿ ಶೆರ್ಮಾಂವ್ ಶಿಜ್ತಾ?

ಪಾಪಾನ್ ಸಾಂಗ್ಚೆಂ ಸಾಂಗೊನ್ ಜಾಲಾಂ. ಹಾಂವ್ ಏಕ್ ದೆವೊತ್ ಆನಿ ಮೋಸ್ಟ್ ಒಬಿಡಿಯೆಂಟ್ ಯಾಜಕ್ ದೆಕುನ್ ಪೋಯ್ರ್ ಆಟ್ ಮಿನುಟಾಂನಿ ಶೆರ್ಮಾಂವ್ ಮುಗ್ದಿಲೊ. ಮೀಸ್ ಜಾವ್ನ್ ಸಾಕ್ರಿಸ್ತಿಕ್ ಯೇಜೆ ತರ್ ಮಿರ್ನ್ಯಾಮ್ ವಿಚಾರ್‍ತಾ, ‘ಕಾಲ್ ರಾತಿಕ್ ಶೆರ್ಮಾಂವ್ ಬರಯ್ತಾನಾ ಕೊಮಾ, ಪುಲ್‌ಸ್ಟಾಪ್ ಘಾಲುಂಕ್ ಚುಕ್ಲ್ಯಾತ್ ದಿಸ್ತಾತ್ ನೇ!’. ತೊಯ್ ಮ್ಹಜೆಬರಿಚ್ ಸಕ್ಡಾಂತ್ ‘ಕೊಂಕು’ ಸೊಧುಂಕ್ ಶಿಕ್ಲಾ. ‘ಶೆರ್ಮಾಂವ್ ಆಟ್ ಮಿಂಟಾಂನಿ ಜಾಲಾಗಿ ನಾ?’, ಹಾಂವ್ ಗರಮ್ ಜಾಲೊಂ. ‘ಎಕ್ದಮ್ ಆಟ್ ಮ್ಹಳ್ಯಾರ್ ಆಟ್ ಮಿಂಟಾಂ’ ತೊ ಮೆಚ್ವಾಲೊ. ‘ತರ್ ತುಜೆಂ ವೊಚ್ ಸಮಾ ಆಸಾ. ಸಮಾಧಾನಾನ್ ವಚ್’ ಮ್ಹಣ್ ತಾಕಾ ಧಾಡ್ಲೆಂ. ಉಣ್ಯಾರ್ ಪಂದ್ರಾ ಥಾವ್ನ್ ಆಟ್ರಾ-ವೀಸ್ ಮಿನುಟಾಂ ಶೆರ್ಮಾಂವ್ ಸಾಂಗೊನ್ ಸವಯ್ ಆಸ್ಚ್ಯಾ ಮ್ಹಾಕಾ ಎಕಾಚ್ ದಿಸಾನ್ ‘ಆಟ್ ಮಿಂಟಾಂಕ್’ ದೆಂವ್ಚೆಂ ಮ್ಹಳ್ಯಾರ್ ಜಾಕ್ಕೆವ್ ರೂಕ್ ದೆಂವೊನ್ ಆಯಿಲ್ಲೆತಿತ್ಲೆಂ ಸಲೀಸ್ ನ್ಹಯ್ ಕಳ್ಳೆಂಯೇ?  

ಲೋಕ್ ಮ್ಹಜೊ ಶೆರ್ಮಾಂವ್ ಆಯ್ಕೊನ್ ಕಿತೆಂ ಕಿತೆಂ ಚಿಂತ್ತಾ ಮ್ಹಾಕಾ ಗೊತ್ತುನಾ. ಪುಣ್ ಥೊಡೆಪಾವ್ಟಿಂ ನತಾಲ್ ಬಾಯ್ ಯೇವ್ನ್ ಸಾಂಗ್ತಾ, ‘ಆಜ್ ತುಮಿ ಶೆರ್ಮಾಂವ್ ಖಡಕ್ಕ್ ಸಾಂಗ್ಲಾ ಫಾದರ್’. ತಿಣಿಂ ಕೊಣಾಕ್ ಮತಿಂತ್ ಧರ್‍ನ್ ಶೆರ್ಮಾಂವ್ ಆಯ್ಕಲಾ ಮ್ಹಣ್ ಸಮ್ಜೊಂಕ್ ಹಾಂವ್ ಜೆಜು ನ್ಹಯ್. ನಾ ತರ್ ನಾಥಾನಾಯೆಲಾನ್ ಕಿತೆಂ ಚಿಂತ್ಲಾಂ ಮ್ಹಣ್ ರಪಕ್ಕ ಧರ್‍ತೊಂ ಆಸ್ಲೊಂ. ‘ಬೂಮರ್ ಚಿಂಗಮ್ ಪುಣೀ ಚಾಬೊನ್ ಚಾಬೊನ್ ಥುಕ್ಚೊ ಟಾಯ್ಮ್ ಯೆತಾ, ಆಮ್ಚ್ಯಾ ವಿಗಾರಾಚೊ ಶೆರ್ಮಾಂವ್ ಚಾಬೊನ್ ಮುಗ್ದಾನಾ’ ಮ್ಹಣ್ ಎಕಾ ವಿಗಾರಾವಿಶಿಂ ಸಾಂಗ್‌ಲ್ಲೆಂ ಆಯ್ಕಲ್ಯಾ ಉಪ್ರಾಂತ್ ಹಾಂವೆಂ ಚಿಂಗಮ್ ಖಾಂವ್ಚೆಂ ಸೊಡ್ಲಾಂ.

ಏಕ್ ದೀಸ್ ಭುರ್ಗ್ಯಾಂಚ್ಯಾ ಮಿಸಾಕ್ ಗೆಲ್ಲೊಂ. ಮಿಸಾ ಉಪ್ರಾಂತ್ ಆಲ್ತಾರ್ ಭುರ್ಗ್ಯಾಂಲಾಗಿಂ ದೇವ್ ಆಪೊವ್ಣ್ಯಾ ವಿಶ್ಯಾಂತ್ ಉಲೊವ್ನ್ ಎಕ್ಲ್ಯಾಕ್ ಪುಣೀ ‘ಫಿಕ್ಸ್’ ಕರ್‍ನ್ ಯೇಜೆ ಮ್ಹಣ್ ಮ್ಹಾಕಾ ಧಾಡ್‌ಲ್ಲೆಂ. ಮೀಸ್ ಜಾವ್ನ್ ಸಾಕ್ರಿಸ್ತಿಂತ್ ಜೆಜುಚೆಂ ಆಂಗ್‌ವಸ್ತ್ರ್ ಆಪ್ಡುಂಕ್ ಉಡ್ಡಲ್ಲೆಬರಿ ಬೆಸಾಂವ್ ಮಾಗೊಂಕ್ ಆಂಗಾರ್ ಪಡ್ಚ್ಯಾಂಕ್ ‘ಗೋಡ್ ಬ್ಲೆಸ್’ ಕರ್‍ನ್ ಘುಂವಜೆ ತರ್, ಎಕ್ಲೊ ಆಲ್ತಾರ್ ಭುರ್ಗೊ ‘ವಾಟ್ ಮ್ಯಾನ್, ದಿಸ್ ಪ್ರೀಸ್ಟ್ ಶೆಯೊ ದಾಂಬಿಂಗ್’ ಮ್ಹಣಜೆಗೀ! ಶೆರ್ಮಾಂವಾರ್ ಶೆಯೊ ದಾಂಬಿಂಗ್!! ಹಾಂವ್ ಆಯ್ಕನಾತ್ಲೆಬರಿ ಕರ್‍ನ್ ಗೆಲೊಂ. ಮ್ಹಾಕಾ ‘ಚುಯಿಂಕ್’ ಜಾಲ್ಲೆಂ ತಾಂಕಾಂ ಕಳೊನ್ ಗಾಂಡಿಕ್ ಪಾಂಯ್ ದೀವ್ನ್ ತೆ ಧಾಂವ್ಲೆ ಜಾಲ್ಯಾರ್ ದೇವ್ ಆಪೊವ್ಣ್ಯಾವಿಶಿಂ ಕೊಣಾಲಾಗಿಂ ಉಲೊಂವ್?

ಚಡಾವತ್ ಆಲ್ತಾರ್ ಭುರ್ಗೆ ಮಿಸಾವೆಳಾರ್ ಎಕ್ಟಿವ್ ಆಸ್ತಾತ್, ಎಕಾಮೆಕಾ ಕುಟ್ಟುಂಚ್ಯಾಂತ್, ದೊಳ್ಯಾಂನಿಚ್ ಸಿಗ್ನಲ್ ದೀವ್ನ್ ಹಾಸ್ಚ್ಯಾಂತ್, ಖಂಯ್ಚಿ ಕಾಂಪಿಣ್ ಕೊಣೆಂ ಮಾರ್‍ಚಿ ಮ್ಹಣ್ ಡಿಸ್ಕಸ್ ಕರ್‍ಚ್ಯಾಂತ್. ಪುಣ್ ಎಕ್ಲೊ ಮ್ಹಜ್ಯಾ ಮಿಸಾವೆಳಾರ್ ಸುಶೆಗಾತ್ ನಿದ್ಲಾ! ಮೀಸ್ ಜಾಲ್ಲೆಂಚ್ ಆವಯ್ ಸಂಗಿ ತಾಕಾ ಧರ್‍ಲೊ. ‘ಘರಾ ಹಾಕಾ ವೆಳಾರ್ ನಿದಾಯ್ಜೆ, ನಾ ತರ್ ಮಿಸಾಂತ್ ನಿದ್ತಾ’ ಮ್ಹಣ್ ಆವಯ್ಕ್ ಪುಕಾಟಾಕ್ ಸಲಹಾ ದಿಲಿ. ‘ಆನಿ ಕಾಲೆಂ ಫಾದರ್, ಕಿತ್ಲೆಂ ವೊಡ್ತಾತ್’ ತಿಣೆಂ ಗುಳೊಚ್ ಸೊಡ್ಲೊ. ತಿಕಾ ತಿಚ್ಯಾ ಪುತಾಚೆರ್ ವಿಶೇಸ್ ಮೋಗ್ ಆಸೊಂಕ್ ಪುರೊ, ಪುಣ್ ರಾತಿಂ ಬಸೊನ್ ಎಕೇಕ್ ವೋರ್ ನೀದ್ ಖಳ್ನ್ ಹಾಂವೆಂ ಕೆಲ್ಲಿ ತಯಾರಾಯ್ ವೋಡ್ನ್ ಕಾಡ್ನ್ ನೇತ್ರಾವತಿ ಸಾಂಕ್ಯಾಥಾವ್ನ್ ಪುಳ್ಕ್ ಉಡಯ್ಲಿನೇ!  

ಎಕಾ ಮೊರ್‍ನಾಚ್ಯಾ ಮಿಸಾಕ್ ಶೆರಾಚ್ಯೆ ಫಿರ್ಗಜೆಕ್ ಗೆಲ್ಲೊಂ. ಭಿತರ್ ರಿಗಜೆ ತರ್ ‘ಶೆರ್ಮಾಂವ್ ತುಜೊಗಿ?’ ಮ್ಹಣಾಲೊ ವಿಗಾರ್! ಹಾಕಾ ಮ್ಹಜ್ಯಾ ಶೆರ್ಮಾಂವಾವಿಶಿಂ ಪಯ್ಲೆಂಚ್ ಖಬರ್ ಪಾವ್ಲ್ಯಾಗೀ ಕಿತೆಂ ಮ್ಹಣ್ ಏಕ್ ಪಾವ್ಟಿಂ ಘಾಬಾರ್‍ಲೊಂ. ‘ಶೆರ್ಮಾಂವ್ ಆಟ್ ಮಿಂಟಾಂ ಮಾತ್ರ್, ಬಿಲ್ಕುಲ್ ಲಾಂಬೊಂವ್ಕ್ ನ್ಹಜೊ’. ಹಾಂವೆಂ ‘ಯುವರ್ಸ್ ಒಬಿಡಿಯಂಟ್ಲಿ’ ಮ್ಹಳೆಂ. ಮೊರ್‍ನಾಚ್ಯಾ ಮಿಸಾ ಉಪ್ರಾಂತ್ ಸನ್ವಾರಾಚೆಂ ಸಾಂಜೆಚೆಂ ಮೀಸ್ ಸುರು ಜಾಲೆಂ. ಹಾಂವ್ ಭಾಯ್ರ್ ಸಯ್ರ್ಯಾಂಕಡೆ ಉಲೊವ್ನ್ ರಾವ್‌ಲ್ಲೊಂ ಥಂಯ್ಚ್ ಬಾಕಿ. ಮ್ಹಾಕಾ ‘ಆಟ್ ಮಿಂಟಾಂ’ ಮ್ಹಳ್ಳ್ಯಾ ವಿಗಾರಾಕ್ ಮಾಗಿರ್ ಸಿಸ್ಟರಿನ್ ಮಿರ್ನ್ಯಾಮಾಕಡೆ ಚೀಟ್ ಧಾಡಿಜೆ ಪಡ್ಲಿ.

ಪಾಪಾ ಸಾಯ್ಬ್ ಇಂಡಿಯಾಕ್ ಯೇವ್ನ್ ಆಮ್ಚ್ಯಾ ಆಯ್ತಾರಾಚ್ಯಾ ಮಿಸಾಕ್ ಗೆಲ್ಲೊ ತರ್ ಆಮ್ಚ್ಯೊ ‘ಕಳವ್ಣ್ಯೊ’ ಕಳಂವ್ಕ್ ಘೆಂವ್ಚೊ ವೇಳ್ ಪಳೆವ್ನ್ ಆನಿ ಕಾನ್ ನೀಟ್ ಕರ್‍ನ್ ಏಕ್ ನಾಂವ್ ಚುಕೊನ್ ಗೆಲ್ಯಾರ್ ‘ಕ್ಯಾಚ್’ ಕರ್‍ಚ್ಯಾ ಆಮ್ಚಿ ಭಕ್ತ್ ಪಳೆವ್ನ್ ‘ಆನಿ ಮುಕಾರ್ ಮಂಗ್ಳುರಾಂತ್ ಶೆರ್ಮಾಂವ್ ಕ್ಯಾನ್ಸಲ್, ಕಳೊವ್ಣೆಂತ್‌ಚ್ ಶೆರ್ಮಾಂವ್ ದಿಯಾ’ ಮ್ಹಣತ್. 

ಹೆಂ ‘ಆಟ್ ಮಿಂಟಾಚೆಂ’ ಲೊಜಿಕ್ ಮ್ಹಾಕಾ ಸಮ್ಜಾನಾ. ಶೆರ್ಮಾಂವ್ ಮ್ಹಳ್ಯಾರ್ ಕಥೊಲಿಕ್ ಸಭೆಚ್ಯಾ ಭುರ್ಗ್ಯಾಂಚೊ ಭಾಶಣ್ ಸ್ಪರ್ಧೊಗೀ ಕಿತೆಂ? ಪಾಪಾನ್ ‘ಆಟ್ ಮಿಂಟಾಂಚೆಂ’ ಫಾರ್ಮುಲಾ ವೆವೆಗ್ಳ್ಯಾ ಸಂದರ್ಭಾಂನಿ ಉಲ್ಲೇಖ್ ಕೆಲಾಂ. ಏಕ್ ಪಾವ್ಟಿಂ ಕಠೀಣ್ ದಗಿನ್ ಮಿಸಾಕ್ ಬಸ್ಲಲ್ಯೊ ಇಟಾಲಿಯನ್ ಮದಾಮ್ಯೊ ಸಾಸೂ.. ಉಸ್ಸಪ್ಪಾ ಮ್ಹಣ್ ಸುಸ್ಕಾರ್‍ಚ್ಯೊ ಪಳೆವ್ನ್ ಪಾಪಾನ್ ಶೆರ್ಮಾಂವ್ ಇಲ್ಲೊ ಮಟ್ವೊ ಕರ್‍ಯಾಂ ಮ್ಹಳ್ಳ್ಯಾ ಅರ್ಥಾರ್ ಸಾಂಗ್‌ಲ್ಲೆಂ ತರ್ ಆನ್ಯೇಕ್ ಕಡೆ ಪಾದ್ರಿಬಾಬಾಂನಿ ಸಾಂ. ಲೊರೆಸಾಕ್ ಏಕ್ ಕೂಸ್ ಭಾಜುನ್ ಜಾಲ್ಯಾರ್ ಉಪ್ರಾಂತ್ ಆನ್ಯೇಕ್ ಕೂಸ್ ಪರ್‍ತುನ್ ಭಾಜುನ್ ಕರ್‍ಪಯಿಲ್ಲೆಬರಿ ಶೆರ್ಮಾಂವ್ ಡೀಪ್ ಫ್ರೈ ಕೆಲ್ಲೊ ಘಾಟ್ ಯೇವ್ನ್ ‘ಮಟ್ವೊ ಕರಾರೆ ಬಾಬಾ’ ಮ್ಹಳ್ಳೆಂ. ಸಂದರ್ಭ್ ಸೊಡ್ಲೊ, ವಿಶಯ್ ಮಾತ್ರ್ ಧರ್‍ಲೊ ಆನಿ ತಾಕಾ ಪ್ರಚಾರ್ ದಿಲೊ. ಹೊ ಪ್ರಚಾರ್ ಸೆಮಿನರಿಕ್ ಪಾವ್ಲೊ.

ಎಕ್ಲೊ ಪಿಲ್ಕಾಟೊ ಬ್ರದರ್ ಸೆಮಿನರಿ ಥಾವ್ನ್ ಆಯಿಲ್ಲೊಚ್, “ಪಾಪಾನ್ ಶೆರ್ಮಾಂವ್ ಆಟ್ ಮಿಂಟಾಂಚ್ ದೀಜೆ” ಮ್ಹಳಾಂ ಮ್ಹಣ್ ಕೊಚ್ಚಿಲಾಗ್ಲೊ. “ತುಕಾ ಕೆದಾಳಾ ಫೊನ್ ಆಯಿಲ್ಲೆಂರೆ?” ಹಾಂವೆಂ ವಿಚಾರ್‍ಲೆಂ. “ನ್ಹಯ್, ಸೆಮಿನರಿಂತ್ ಡಿಸ್ಕಶನ್ ಜಾತಾಲೆಂ”. “ಪಾಪಾನ್ ಆಯ್ಲೆವಾರ್ ಏಕ್ ವಿಶ್ವಪತ್ರ್ ಬರಯ್ಲಾಂ, ತಾಚೆಂ ನಾಂವ್ ಪುಣೀ ಗೊತ್ತಾಯೆರೆ ತುಕಾ?”. “ಬ್ರದರ್ ಆತ್ತಾಂ ಯೆತಾಂ” ಮ್ಹಣ್ ಶೀದಾ ಗೆಲೊ. ಪಾಪಾನ್ ಪಾನಾಂಗಟ್ಲ್ಯಾನ್ ಪತ್ರಾಂ ಬರೊವ್ನ್ ಸಂಸಾರಾಕ್ ‘ಕೊರಿಯರ್’ ಕರ್‍ನ್ ‘ವಾಚಾ.. ವಾಚಾ’ ಮ್ಹಳ್ಯಾರೀ ತಾಚಿ ಕೊಣಾಯ್ಕಿ ಖಬರ್ ಆಸನಾ. ತಾಣೆಂ ಲಾತಿನಾಂತ್ ದಿಲ್ಲೆಂ ಕೊಂಕ್ಣೆಕ್ ತರ್ಜುಮೊ ಕರ್‍ಚೊ ಜಣ್ ನಾ. ಪುಣ್ ಶೆರ್ಮಾಂವ್ ‘ಆಟ್ ಮಿಂಟಾಂಚೊ’ ಹರ್‍ಯೆಕ್ಲ್ಯಾಚ್ಯಾ ಕಾನಾಂಕ್ ರಿಗ್ಲಾ!

ಶೀದಾ ಗೆಲ್ಲೊ ಬ್ರದರ್ ಪಾಟಿಂ ಘುಂವೊನ್ ಆಯ್ಲೊ. ಖಂಯ್ಚೊಗೀ ಏಕ್ ಪೊಂಯ್ಟ್ ಝಳ್ಕಲೊ ದಿಸ್ತಾ. “ಲಾಂಬ್ ಶೆರ್ಮಾಂವ್ ದಿಲ್ಯಾರ್ ಆಯ್ಕೊಂಕ್ ಆಮ್ಚೆಂ ಗಮನ್ ಪಾವನಾ, ಕೊನ್ಸಂಟ್ರೇಶನ್ ಚುಕ್ತಾ. ಸರ್ವೇ ಪ್ರಕಾರ್ ಆಮ್ಚ್ಯಾ ಅಕ್ವೇರಿಯಮಾಂತ್ ಆಸ್ಚ್ಯಾ ಗೋಲ್ಡ್ ಫಿಶ್ಶಾಚಿ ಗುಮನ್ ದಿಂವ್ಚಿ ಆವ್ದಿ ಪಾಂಚ್ ಸೆಕುಂದಾಂ ಆನಿ ಮನ್ಶಾನ್ ಗುಮಾನ್ ದಿಂವ್ಚಿ ಆವ್ದಿ ಫಕತ್ ಸಾತ್ ಸೆಕುಂದಾಂ!”.

“ವ್ಹಾರೆವ್ಹಾ ಬರೇಂ ರೀಸರ್ಚ್ ಕೆಲಾಂಯ್”, ಬ್ರದರ್ ಫುಗ್ಲೊ.

“ಇನ್ಸ್ಟಾಗ್ರಾಮಾರ್, ಮೊಬಾಯ್ಲಾರ್ ವೊರಾಂಗಾಟ್ಲ್ಯಾನ್ ವೇಳ್ ಖರ್ಚಿತಲ್ಯಾಂನಿ ಆಪ್ಲಿ ಕೆಪಾಸಿಟಿ ಕಿತ್ಲಿ ಮ್ಹಣ್ ಡಿಕ್ಲೇರ್ ಕರಿಜೆ. ತುಮ್ಚಿ ಆಯ್ಕೊಂಚಿ ಕೆಪಾಸಿಟಿ ಉಣಿ ಜಾಲ್ಯಾ ತರ್ ತಿ ಸುದ್ರಾಯ್ಜೆ ಶಿವಾಯ್ ತುಮ್ಚಿ ಅಸ್ಕತ್ಕಾಯ್ ತುಮ್ಚಿ ಕೆಪಾಸಿಟಿ ಮ್ಹಣ್ ಕೊಚ್ಚಿಲ್ಯಾರ್ ಜಾತಾ?”  

ತಾಚ್ಯಾ ಇಡ್ಯಾಂತ್ ಹೊಟೆಲಾಂತ್ ‘ಇಡ್ಲಿ ದಿಲ್ಯಾರ್ ಸಾಂಬಾರ್ ದೀ, ಸಾಂಬಾರ್ ದಿಲ್ಯಾರ್ ಚೆಟ್ಣಿ ದೀ’ ಮ್ಹಣ್ ಡಿಮಾಂಡ್ ದವರ್‍ಚೆಬರಿ ಶೆರ್ಮಾಂವಾಂತ್ ಕಾಣಿ ಜಾಯ್, ಜ್ಯೋಕ್ಸ್ ಜಾಯ್, ಸಾಂತಾಂಚಿ ಜಿಣಿ ಜಾಯ್, ಪವಿತ್ರ್ ಸಭೆಚಿ ಶಿಕೊವ್ಣ್ ಜಾಯ್, ವಾಂಜೆಲಾಚಿ ಸರ್ ಜಾಯ್ ಮ್ಹಣೊನ್ ಎಕೆಕ್ಲೆ ಎಕೇಕ್ ಡಿಮಾಂಡ್ ಕರ್‍ತಿತ್ ತರ್ ಆಟ್ ಮಿಂಟಾಂಚೊ ಶೆರ್ಮಾಂವ್ ಕಸೊ ದಿಂವ್ಚೊ?

ಹಾಕಾಯ್ ಏಕ್ ಉಪಾಯ್ ಸೊಧುನ್ ಕಾಡ್ಲಾ ಆಮ್ಚ್ಯಾ ಬೊಟ್ಲೆರಾನ್. ತೊ ಮ್ಹಣಾ –

“ಫಾದರ್, ತುಮ್ಚೆಕಡೆ ಸಕ್ಕಡ್ ವಾಡ್ಯಾಚಿಂ, ವಾಡ್ಯಾಂತ್ಲ್ಯಾ ಸಕ್ಕಡ್ ಸಾಂದ್ಯಾಂಚಿಂ ವಾಟ್ಸಾಪ್ ನಂಬ್ರಾಂ ಗ್ರೂಪಾಂತ್ ಆಸಾತ್‌ಮು?”

“ವ್ಹಯ್ ಆಸಾತ್”

“ತರ್ ಕಾಣಿ, ಜ್ಯೋಕ್ಸ್, ಶಿಕೊವ್ಣ್, ಲಿಸಾಂವ್ ಪುರಾ ಮಿಕ್ಸ್ ಕರ್‍ನ್ ಸನ್ವಾರಾ ಸಾಂಜೆರ್ ವಾಟ್ಸಾಪ್ ಕರಾ. ಮಾಗಿರ್ ಮಿಸಾರ್ ಖಾಲಿ ಸಾತ್ ಸೆಕುಂದಾಂಚೊ ಶೆರ್ಮಾಂವ್ ದಿಲ್ಯಾರ್ ಪುರೊ”

“ಕಿತೆಂ ಮ್ಹಣ್?”

“ಶೆರ್ಮಾಂವ್ ವಾಟ್ಸಾಪಾರ್ ವಾಚಾ!”