📰ಜೂನ್.30: ಸಾಂಜೆರ್ 4 ವರಾಂಚೆರ್ ಕಿರೆಂ ಇಸ್ಕೊಲಾಚ್ಯಾ ಹಾಲಾಂತ್ ರಾಯನ್ ಮ್ಯಾಗ್ನಿಟೊಚ್ಯಾ ನವ್ಯಾ ಕೊಂಕ್ಣಿ ಫಿಲ್ಮಾಚೆಂ ನಾಂವ್ ಆನಾವರಣ್ ಕಾರ್ಯೆಂ ಮಾಂಡುನ್ ಹಾಡ್’ಲ್ಲೆಂ. ಕಾರ್‍ಯಾಚೆ ಮುಖೇಲ್ ಸಯ್ರೆ ಆನಿ ಉದ್ಘಾಟಕ್ ಜಾವ್ನ್ ಕಿರೆಂ ಫಿರ್ಗಜಿಚೆ ವಿಗಾರ್ ಮಾನಾಧಿಕ್ ಬಾಪ್ ಓಜ್ವಾಲ್ಡ್ ಮೋಂತೆರೊ ಹಾಜರ್ ಆಸ್’ಲ್ಲೆ. ರಾಯನಾನ್ ಜಮ್’ಲ್ಲ್ಯಾ ಸಮೇಸ್ತಾಂಕ್ ಸ್ವಾಗತ್ ಕೆಲೊ. ವಿಗಾರ್ ಬಾಪಾಂನಿ ಮಾಗ್ಣೆಂ ಭೆಟವ್ನ್, ನವ್ಯಾ ಫಿಲ್ಮಾಕ್ ಸರ್ವ್ ಬರೆಂ ಮಾಗ್ಲೆಂ. ನಾಂವ್ ಅನಾವರಣಾಚೆಂ ಕಾರ್ಯೆಂ ಏಕ್ ವೆಗ್ಳ್ಯಾಚ್ ರುಪಾರ್ ಚಲ್ಲೆಂ. ಬ್ಯಾನರಾ ಮುಖಾರ್ ಭಾಂಧ್’ಲ್ಲೆ ಫುಗ್ಗೆ ಸಕ್ಡಾಂನಿ ಮೆಳೊನ್ ಫುಟವ್ನ್ ನಾಂವ್ ಅನಾವರಣ್ ಕೆಲೆಂ.

ಲಗ್ಭಗ್ 30 ಜಣ್ ಫಿಲ್ಮಾಂತ್ಲಿಂ ಕಲಾಕಾರಾಂ ಹಾಜರ್ ಆಸೊನ್, ಆಲ್ವಿನ್ ದಾಂತಿನ್ ಸಮೇಸ್ತಾಂಚೊ ಆಭಾರ್ ಮಾಂದ್ಲೊ. ಡಾ. ಮೆಲ್ವಿನ್ ಪೆರ್ನಾಲ್ ಹಾಣೆಂ ಕಾರ್ಯೆಂ ಚಲವ್ನ್ ವೆಲೆಂ. ರಾಯನಾಚೆಂ ಹೆಂ ದುಸ್ರೆಂ ಫಿಲ್ಮ್ ಜಾವ್ನಾಸೊನ್, ಫಿರ್ಗಜ್, ಸಮುದಾಯ್, ಮರಣ್ ಆನಿ ಕುಮ್ಸಾರಾವಿಶಿಂ ಚಡಿತ್ ಪ್ರಕಾಸ್ ಫಾಂಕವ್ಚ್ಯಾ ಹ್ಯಾ ಫಿಲ್ಮಾಚೆಂ ನಾಂವ್ “ಫೊಂಡಾಚೊ ಮಿಸ್ತೆರ್” ಜಾವ್ನಾಸಾ. ರಾಯನಾಚ್ಯಾ ಫುಡ್ಲದ್ ಫಿಲ್ಮ್ ಲಕ್ಕಿ ಡ್ರಾ 777 -ಚ್ಯಾಕೀ ಚಡಿತ್ ಮಾಪಾನ್ ಹೆಂ ಫಿಲ್ಮ್ ಲೊಕಾಕ್ ಮನೋರಂಜನ್ ದಿತೆಲೆಂ ಮ್ಹಣ್ ಸಹ-ಬರವ್ಪಿ ಆನಿ ನಟ್ ಜಾವ್ನಾಸ್ಚ್ಯಾ ಡಾ. ಮೆಲ್ವಿನ್ ಪೆರ್ನಾಲ್ ಹಾಣೆಂ ಅಭಿಪ್ರಾಯ್ ಉಚಾರ್ಲಿ. ತಶೆಂಚ್ ಹೆಂ ಫಿಲ್ಮ್ ಸಕ್ಕಡ್ ಕೊಂಕ್ಣಿ ಫಿಲ್ಮ್ ಮೊಗಿ ಪರ್ಯಾಂತ್ ಪಾವಂವ್ಚ್ಯಾಂತ್ ಸರ್ವ್ ಕಲಾಕಾರಾಂನಿ ಸಹಕಾರ್ ದೀಜಾಯ್ ಮ್ಹಣ್ ಉಪ್ಕಾರ್ ಮಾಗ್ಲೊ. ಆಲ್ವಿನ್ ಸಿಕ್ವೇರಾನ್ ಕ್ಯಾಮೆರಾ ಸಾಂಬಾಳ್ಳಾ ತರ್, ಪ್ರಜೋತ್ ಡೇಸಾ ಹ್ಯಾ ಫಿಲ್ಮಾಕ್ ಸಂಗೀತ್ ದಿತೆಲೊ ಆನಿ ಹ್ಯಾ ಫಿಲ್ಮಾಚೆಂ ಶೂಟಿಂಗ್ ಸಂಪಲ್ಲೆಂ ಆಸೊನ್, ಅಕ್ಟೋಬರ್ – ನವೆಂಬರ್ ಮಯ್ನ್ಯಾಂತ್ ಹೆಂ ಫಿಲ್ಮ್ ಲೊಕಾಮೆರೆರ್ ಪಾವ್ತೆಲೆಂ ಮ್ಹಣ್ ಬರಯ್ಣಾರ್ ಆನಿ ನಿರ್ದೇಶಕ್ ರಾಯನ್ ಮ್ಯಾಗ್ನಿಟೊನ್  ತಿಳ್ಸಿಲೆಂ.

For more information about the event and the movie, please contact Rayan Magneto at [+91 81479 14458].