ತ್ಯಾ ಮಜ್ಬೂತ್ ವಿಶಾಲ್ ಘರಾಂತ್
ತಿ ಆವಯ್ ಸದಾಂನಿತ್ ಸೊಧ್ತಾ..
ಪರತ್ ಪರತ್ ಸೊಧ್ತಾ.. 

ಆದ್ಲ್ಯಾ ಫೊಟೊ ಆಲ್ಬಮಾಂನಿ
ಮಾಜ್ವೊನ್ ಗೆಲ್ಲ್ಯಾ ಫೊಟ್ಯಾಂ ಮದೆಂ..
ಪುತಾ-ನಾತಿಚ್ಯಾ ವಾಟ್ಸಾಪ್ ಸ್ಟೇಟಸಾಚೆರ್
ತಿ ಸೊಧ್ತಾ..

ಘರಾಂತ್ ಉಲೊಣೆಂ ಜಾತಾ
ಕಿಟ್ಕಿಟ್ಯೊ ಆಯ್ಕತಾತ್
ನಾತಿಚೆ ಫ್ರೆಂಡ್ಸ್ ಯೆತಾತ್-ವೆತಾತ್
ಹಿ ಮ್ಹಾತಾರಿ ವೋಕ್ಲ್ ಸಾಸ್ಪೊನ್
ತಾಂಚೆಥಂಯ್ ಸೊಧ್ತಾ..

ಘರಾಂತ್ ಬರ್ತ್ ಡೇ ಪಾರ್ಟಿ,
ಎನಿವರ್ಸರಿ ಜಾತಾತ್
ತಾಂತುಂಯ್ ಮದರ್ಸ್ ಡೇ ಜಾವ್ನ್ ವೆತಾ!
ತರೀ ತಿಣೆಂ ಸೊಧ್ಚೆಂ ತಿಕಾ ಮೆಳನಾ!

ವ್ಹಳೂ ಉಟೊನ್ ಬಾಲ್ಕನಿಕ್ 
ಆಯಿಲ್ಲ್ಯೆ ತಿಕಾ 
ಮಾಗ್ತಲಿಂ ಚೆಡ್ವಾಂ ವೆಚಿಂ ದಿಸ್ತಾತ್
ಅಚಾನಕ್
ತಿಂ ಹಿಕಾ ಪಳೆತಾತ್
ಹಿ ತಾಂಕಾಂ ಪಳೆತಾ
ದೊಳೆ ಮೆಳ್ತಾತ್, ನದರ್ ಜಮ್ತಾ
ಹಾಸೊ ಫುಲ್ತಾತ್..

ತಿ ಆತಾಂ ಸದಾಂಯ್ 
ತ್ಯಾಚ್ ವೆಳಾರ್
ಬಾಲ್ಕನಿಂತ್ ಆಸ್ತಾ!