📰ಬೆಂಗ್ಳುರ್, ಮೇ 11: ಅಂಧ್ ಆವಯ್-ಭಾಪಾಯ್ಚ್ಯಾಂ ಭುರ್ಗ್ಯಾಂಕ್ ಶಿಕ್ಪಾ ಕುಮೊಕ್ ದಿಂವ್ಚಿ ಯೆವ್ಜಣ್ ಬೆಂಗ್ಳುರ್ ಕ್ರೋಸ್ ರೀಜನಲ್ ಕೇಂದ್ರಾಂತ್ ‘ವಿಶನ್ ಫೊರ್ ಫ್ಯೂಚರ್’ ಬೊಂದೆರಾಖಾಲ್ ಧ್ಯಾನಜ್ಯೊತಿ ಟ್ರಸ್ಟ್, ಕಾರ್ಮೆಲಿತ್ ಸಂಸ್ಥ್ಯಾನ್ ಚಲವ್ನ್ ವ್ಹೆಲಿ. ಬಾಪ್ ಐವನ್ ಡಿ ಸೋಜಾ, ಧ್ಯಾನ ಜ್ಯೋತಿ ಟ್ರಸ್ಟಾಚೆ ದಿರೆಕ್ತೊರ್, ಹಾಂಚ್ಯಾ ಉಪಸ್ತಿತೆಂತ್ ಸುಮಾರ್ 7 ಲಾಖ್ ರುಪಯ್ 30 ಜಣಾಂ ಭುರ್ಗ್ಯಾಂಕ್ ಶಿಕ್ಪಾಕ್ ಆಧಾರ್ ಜಾವ್ನ್ ದಿಲೊ.

ಕಾರ್ಮೆಲಿತ್ ಸಂಸ್ಥೊ – ಧ್ಯಾನ ಜ್ಯೋತಿ ಟ್ರಸ್ಟ್ ಹಾಣಿಂ 2014ವ್ಯಾ ವರ್ಸಾ ಸುರ್ವಾತ್ ಕೆಲ್ಲೆಂ ‘ವಿಶನ್ ಫೊರ್ ಫ್ಯೂಚರ್’ಮಣ್ಜೆ   ಅಂಧ್ ಆವಯ್-ಭಾಪಾಯ್ಚ್ಯಾಂ ಭುರ್ಗ್ಯಾಂಕ್ ಶಿಕ್ಪಾ ಕುಮೊಕ್ ದಿಂವ್ಚಿ ಅಪೂರ್ವ್ ಯೆವ್ಜಣ್ ಅಜೂನ್ ಚಾಲು ಆಸಾ. ಧಾ ವರ್ಸಾಂ ಥಾವ್ನ್ ಹಿ ನಿರಂತರ್ ಸೆವಾ ಚಲವ್ನ್ ವ್ಹರುಂಕ್ ಜಾಯ್ತ್ಯಾಂ ದಾನಿಂನಿ ಆಧಾರ್ ದಿಲಾ. ಭುರ್ಗ್ಯಾಂಚಿ ವ್ಹಡಿಲಾಂ ಅಂಧ್ ತರೀ ತಾಂಚ್ಯಾ ಭುರ್ಗ್ಯಾಂಕ್ ಬರೊ ಫುಡಾರ್ ಲಾಬಾಜೆ ಮ್ಹಳ್ಳ್ಯಾ ಉದ್ದೇಶಾನ್ ಸುರು ಕೆಲ್ಲಿ ಹಿ ಯೆವ್ಜಣ್ ಅಜೂನ್ ಬರೊ ಫಳ್ ದೀವ್ನ್ ಆಸಾ. ಜಾಯ್ತಿಂ ವರ್ಸಾಂ ಹಿ ಯೆವ್ಜಣ್ ಸಂಯೋಜಕಿ ಶ್ರೀಮತಿ ನೆಲ್ಲಿ ಪಿಕಾರ್ಡೊ ಆನಿ ಮಾ.ಬಾಪ್ ಸ್ಟೀವನ್ ಪಿರೇರಾ ಚಲವ್ನ್ ವ್ಹರ್‍ತಾಲೆ. ಪ್ರಸ್ತುತ್ ಬಾಪ್ ಐವನ್ ಡಿಸೋಜಾ ಹ್ಯಾ ಟ್ರಸ್ಟಾಚೊ ನಿರ್ದೇಶಕ್ ಜಾವ್ನ್ ಜವಬ್ದಾರಿ ಘೆತ್ಲ್ಯಾ.

ಮಾನೆಸ್ತ್ ಬಿನೋಯ್ ರಾಫಯೆಲ್ ಮುಕೆಲ್ ಸಯ್ರೆ ಜಾವ್ನ್ ಹಾಜರ್ ಜಾವ್ನ್ ಭುರ್ಗ್ಯಾಂಕ್ ಸ್ಕೋಲರ್‌ಶಿಪ್ ವಾಂಟ್ಲೆಂ. ಸಂಯೋಜಕ್ ಶ್ರೀಮತಿ ನೆಲ್ಲಿ ಪಿಕಾರ್ಡೊನ್ ಕಾರ್ಯಕ್ರಮ್ ಮಾಂಡುನ್ ಹಾಡ್‌ಲ್ಲೆಂ.  ಬಾಪ್ ಸ್ಟೀವನ್ ಲೋಬೊ ಹಾಜರ್ ಆಸ್‌ಲ್ಲೆ.