2002 ಇಸ್ವೆಂತ್ ಫಾಮಾದ್ ನಟ್ ರವಿಚಂದ್ರನಾಚೆಂ ‘ಏಕಾಂಗಿ’ ಥಿಲ್ಲರ್ ಕನ್ನಡ ಫಿಲ್ಮ್ ರಿಲೀಜ್ ಜಾಲೆಂ. ಎಕ್ಸುರ್‍ಪಣಾಚ್ಯಾ ಜಿವಿತಾಂತ್ ಸಂತೊಸ್ ಆನಿ ಸಮಾಧಾನ್ ಮೆಳ್ತಾ ಮ್ಹಳ್ಳೊ ಹ್ಯಾ ಫಿಲ್ಮಾಚೊ ಪ್ರಮುಕ್ ವಿಶಯ್. ಹ್ಯಾ ಫಿಲ್ಮಾಂತ್ ರವಿ ಮ್ಹಳ್ಳೊ ಮದ್ಯಮ್ ಪ್ರಾಯೆಚೊ ವ್ಹಡ್ಲ್ಯಾ ಘರಾಂತ್ ಎಕ್ಲೊಚ್ ಆಸ್ತಾ ಆನಿ ಆಪ್ಲ್ಯಾ ಬಾಪಾಯ್ಚ್ಯಾ ಉತ್ರಾಂಪ್ರಕಾರ್ ಜಿಯೆಂವ್ಕ್ ಪೆಚಾಡ್ತಾ. “ಎಕ್ಸುರೊ ರಾವೊನ್ ಸಂತೊಸ್ ಪಾವ್, ಸಂತೊಸ್ ಜೊಡುಂಕ್ ಎಕ್ಸುರೊ ರಾವ್” (Be happy to be alone, Be alone to be happy). ಪುಣ್ ಸವ್ಕಾಸ್ ಎಕಾ ಚೆಡ್ವಾಚೆರ್ ತೊ ಮೊಗಾರ್ ಪಡ್ತಾ ಆನಿ ತಾಚ್ಯಾ ಜಿವಿತಾಚಿ ಘುಂವ್ಡಿ ಬದಲ್ತಾ.

ಪ್ರಸ್ತುತ್ ಸಮಾಜೆಂತ್ ಬದ್ಲಾವಣೆಚೆಂ ವಾರೆಂ ಭರಾನ್ ವ್ಹಾಳೊನ್ ಆಸಾ. ಎಕೆ ಕುಶಿನ್ ಪ್ರಾಯೆಕ್ ಪಾವ್‌ಲ್ಲಿಂ ಕೊಣಾಯ್ಚೊ ಸಾಂಗಾತ್ ನಾಸ್ತಾಂ ಎಕ್ಸುರ್‍ಪಣಾಂತ್ ಜಿಯೆವ್ನ್ ಆಸಾತ್ ತರ್ ಆನ್ಯೆಕೆ ಕುಶಿನ್ ಲ್ಹಾನ್ ಪ್ರಾಯೆರ್ ಎಕ್ಸುರ್‍ಪಣಾಚ್ಯಾ ಜಿವಿತಾಕ್ ವೇಂಗ್ ಮಾರ್‍ಚೊ ಸಂಖೊ ಚಡೊನ್‌ಚ್ ಆಸಾ. World Health Organization (WHO) ವರ್ದೆಪ್ರಕಾರ್, ಸಂಸಾರಾಂತ್ ಚಾರ್ ಜಣಾಂತ್ ಎಕ್ಲೊ ಆನಿ ಸುಮಾರು 15% ಯುವಜಣಾಂ ಎಕ್ಸುರ್‍ಪಣಾಚ್ಯಾ ಜಿವಿತಾಕ್ ವೇಂಗ್ ಮಾರುನ್ ಆಸಾತ್. 25-29 ತಶೆಂಚ್ 50-54 ವರ್‍ಸಾಂ ಭಿತರ್‍ಲ್ಯಾ ಎಕ್ಸುರ್‍ಪಣಾಕ್ ವೆಂಗ್ಚ್ಯಾ ದಾದ್ಲ್ಯಾಂಚೊ ಸಂಖೊ ಸ್ತ್ರೀಯಾಂಚ್ಯಾಕೀ ಚಡ್ ಆಸಾ. ಥೊಡ್ಯಾ ದೆಶಾಂನಿ ಸ್ತ್ರೀಯಾಂಚೊ ಸಂಖೊ ಚಡ್ ಆಸಾ.

ಮ್ಹಜೆಂ ಜಿವಿತ್ ಆನಿ ಮ್ಹಜೆಂ ಸ್ವಾತಂತ್ರ್ಯ್. ಮ್ಹಜೆಲಾಗಿಂ ಸಕ್ಕಡ್ ಆಸಾ ಆನಿ ಮ್ಹಜೆ‌ಇತ್ಲ್ಯಾಕ್ ಜಿಯೆತಾಂ – ಅಸಲ್ಯಾ ವಯಕ್ತಿಕ್ ಚಿಂತ್ಪಾನ್ ಎಕ್ಲ್ಯಾನ್ ಅಶೆಂ ಸಾಂಗ್ಚೆಂ ಸಾರ್ಕೆಂ ಮ್ಹಣ್ ಭೊಗ್ಲ್ಯಾರೀ ಹಾಂತುಂ ಜಾಂವ್ಚೊ ವಾಯ್ಟ್ ಪರಿಣಾಮ್ ಚಡ್ ಆಸಾ. 

ಮನಿಸ್ ಎಕ್ಸುರ್‍ಪಣಾಕ್ ಕಿತ್ಯಾಕ್ ಆಶೆತಾ? ಕಾರಣಾಂ ಜಾಯ್ತಿಂ ಆಸಾತ್. ಪಯ್ಲೆಂ ಜಾವ್ನ್ ವೈಜ್ಞಾನಿಕ್ ಆನಿ ತಂತ್ರಜ್ಞಾನಾಂತ್ ಜಾಲ್ಲಿ ಪ್ರಗತಿ. ಮಾದ್ಯಮಾನ್ ಸಕ್ಡಾಂಕ್ ಎಕ್ಸುರ್‍ಯಾ ಜಿವಿತಾಚಿ ಆಶಾ ದಾಕಯ್ಲ್ಯಾ. ಮಾದ್ಯಮಾಚೊ ನಕಾರಾತ್ಮಕ್ ಪ್ರಭಾವ್ ಕುಟ್ಮಾಂಚೆರ್ ಆನಿ ಸಮಾಜೆಚೆರ್ ಪಡ್ಲಾ. ಎದೊಳ್ ರಿಲೀಜ್ ಜಾಲ್ಲ್ಯಾ ಫಿಲ್ಮಾಂನಿ ಎಕ್ಸುರ್‍ಪಣಾಚ್ಯಾ ಜಿವಿತಾಕ್ ಚಡಿತ್ ಮಹತ್ವ್ ದಿಲಾ. ಎಕ್ಸುರ್‍ಪಣಾಚ್ಯಾ ಜಿವಿತಾಚಿ ವೊಡ್ಣಿ ಲ್ಹಾನ್‌ಥಾವ್ನ್‌ಚ್ ಉದೆಂವ್ಚೆಬರಿ ಕೆಲ್ಯಾ. ಮೊಬಾಯ್ಲಾನ್ ಜಾಯ್ತ್ಯಾಂಕ್ ಎಕ್ಸುರ್‍ಪಣಾಚ್ಯಾ ಜಿವಿತಾಕ್ ಲೊಟ್ಲಾಂ.

ದುಸ್ರ್ಯಾನ್ ಶಿಕಪ್! ಶಿಕ್ತಾ ತಿತ್ಲೆಂಯ್ ಪಾವನಾ. ಥೊಡ್ಯಾಂಕ್ ಉಂಚ್ಲೆಂ ಶಿಕಪ್ ಜೊಡ್ಚೊಚ್ ತಾಂಚ್ಯಾ ಜಿವಿತಾಚೊ ಪ್ರಮುಕ್ ಶೆವೊಟ್. ೩೫ ವರ್‍ಸಾಂ ಪರ್ಯಾಂತ್ ಶಿಕ್ಪಾಂತ್ ಮಗ್ನ್ ಜಾತಾತ್. ಉಪ್ರಾಂತ್ ಕಾಜಾರಿ ಭೆಸಾವಿಶಿಂ ಚಿಂತ್ತಾತ್ ಆನಿ ತ್ಯಾ ವೆಳಾರ್ ತಾಂಚ್ಯಾ ಶಿಕ್ಪಾಕ್ ಆನಿ ಅಂತಸ್ತೆಕ್ ಸರಿ ಜಾಲ್ಲೊ ಸಾಂಗಾತಿ ಮೆಳನಾತ್ಲ್ಯಾ ವೆಳಾರ್ ಎಕ್ಸುರ್‍ಪಣಾಚ್ಯಾ ಜಿವಿತಾಕ್ ವೇಂಗ್ ಮಾರ್‍ತಾತ್. ಸುರ್‍ವೇರ್ ಥೊಡ್ಯಾಂಕ್ ಹೆಂ ಜಿವಿತ್ ಕಶ್ಟಾಂಚೆಂ ತರೀ ಸವ್ಕಾಸ್ ಹೆಂ ಜಿವಿತ್ ಸವಯೆಚೆಂ ಜಾಂವ್ಚಿ ಸಾಧ್ಯತಾ ಆಸಾ.

ತಿಸ್ರ್ಯಾನ್, ಸ್ವಾತಂತ್ರ್ಯ್. ಎಕ್ಲ್ಯಾನ್ ತಾಕಾ ಜಾಯ್ ಜಾಲ್ಲೆಬರಿ ಜಿಯೆವ್ಯೆತ್. ಕೊಣಾಯ್ಚೊ ದಬಾವ್ ನಾ. ಕೊಣಾಯ್ಚೆಂ ಆಯ್ಕೊನ್ ನಿರ್ಧಾರ್ ಘೆಜೆ ಮ್ಹಣ್ ನಾ. ಖಂಯ್ಚ್ಯೇಯ್ ರಿತಿಚ್ಯೊ ಕುಟ್ಮಾಚ್ಯೊ ಜವಾಬ್ದಾರಿ ನಾಂತ್. ಹರ್‍ಯೇಕ್ ದೀಸ್ ಆಪ್ಣಾಚಿಚ್ ಮ್ಹಳ್ಳಿ ಜಿಣಿಯೆರೀತ್ ಜಿಯೆಂವ್ಕ್ ಆವ್ಕಾಸ್ ಲಾಬ್ತಾ.

ಎಕ್ಸುರ್‍ಪಣಾಚೆಂ ಜಿವಿತ್ ವೆಂಗುಂಕ್ ಆನಿಕೀ ಜಾಯ್ತಿಂ ಕಾರಣಾಂ ಆಸಾತ್. ಹ್ಯಾ ಅಂಕ್ಯಾಂತ್ ಹ್ಯಾ ವಿಶಯಾಕ್ ಸಂಬಂದ್ ಜಾಲ್ಲಿಂ ಥೊಡಿಂ ಲೇಖನಾಂ ಆಮ್ಚ್ಯೆ ಮತಿಕ್ ಉಜ್ವಾಡ್ ದಿತೆಲಿಂ. ಹಾಂಗಾಸರ್ ಎಕ್ಸುರ್‍ಪಣಾಚೆಂ ಜಿವಿತ್ ಸಾರ್ಕೆಂ ವಾ ಚೂಕ್ ಮ್ಹಳ್ಳೊ ವಾದ್ ನ್ಹಯ್. ಪುಣ್ ಮನ್ಶಾಂಚ್ಯೆ ಬುದ್ವಂತ್ಕಾಯೆನ್ ಮನಿಸ್ ಖಂಯ್ ಥಾವ್ನ್ ಖಂಯ್ ಪಾವ್ಲಾ ಮ್ಹಳ್ಳ್ಯಾ ವಿಶಯಾಂಚೆರ್ ಚಿಂತಪ್ ಆಟೊಂವ್ಚೆಂ ಗರ್ಜೆಚೆಂ. ಮನಿಸ್ ಸಮಾಜ್ ಜೀವಿ. ಮನಿಸ್ ಎಕ್ಲೊ ಜಿಯೆಂವ್ಕ್ ಸಕನಾ. ಸುರ್‍ವೇರ್ ದಿಲ್ಲ್ಯಾ ಘಡಿತಾಭಾಶೆನ್ ವಿವಿಧ್ ಕಾರಣಾಕ್ ಲಾಗೊನ್, ಸಮಸ್ಸ್ಯಾಂತ್ ಶಿರ್ಕೊನ್, ಕುಟ್ಮಾಥಾವ್ನ್ ಲಾಬ್‌ಲ್ಲ್ಯೆ ಪಾಡ್ ದೆಕಿಕ್ ಲಾಗೊನ್ ಎಕ್ಲ್ಯಾನ್ ಎಕ್ಸುರ್‍ಪಣಾಚ್ಯೆ ಜಿಣಿಯೆಕ್ ವೇಂಗ್ ಮಾರ್‍ಲ್ಯಾ ಜಾಂವ್ಕ್ ಪುರೊ ಆನಿ ತಿಚ್ ಜಿಣಿಯೆರೀತ್ ಜಾಲ್ಯಾ ಜಾಂವ್ಕ್ ಪುರೊ. ಪುಣ್ ಆಮ್ಚೆಂ ಜಿವಿತ್ ಕುಟ್ಮಾಚ್ಯಾ ಆನಿ ಸಮಾಜೆಚ್ಯಾ ಜಿವಿತಾಕ್ ಪೂರಕ್ ಮ್ಹಳ್ಳೆಂ ವಿಸ್ರೊಂಕ್ ಜಾಯ್ನಾ.

ಆಮ್ಚೊ ದೇಶ್ ಆತಾಂ ಲೋಕ್‌ಸಭಾ ಎಲಿಸಾಂವಾಚ್ಯಾ ಹುಂಬ್ರಾರ್ ಆಸಾ. ಎಲಿಸಾಂವಾಚೆ ದೀಸ್ ಎದೊಳ್‌ಚ್ ಘೋಶಿತ್ ಕೆಲ್ಯಾತ್. ದೆಶಾಂತ್ ೭ ಹಂತಾಂನಿ ಹೊ ಚುನಾವ್ ಚಲ್ತೊಲೊ ಆನಿ ಕರ್ನಾಟಕಾಂಕ್ ಎಪ್ರಿಲ್ ೨೬ ಆನಿ ಮೇ ೭ ತಾರಿಕೆರ್ ಚಲ್ತೊಲೊ. ಅಟ್ರಾ ವರ್‍ಸಾಂವಯ್ಲ್ಯಾ ಹರ್‍ಯೆಕಾ ನಾಗರಿಕಾಕ್ ಮತ್ ಚಲೊಂವ್ಚೆಂ ಹಕ್ಕ್ ಆಸಾ. ಮತ್ ಚಲೊಂವ್ಚ್ಯೆ ಜವಾಬ್ದಾರೆಥಾವ್ನ್ ಚುಕಾರಿ ಮಾರ್‍ಚಿ ನಾಕಾ. ಮತ್ ಚಲೊಂವ್ಚೊ ಆಮ್ಚ್ಯಾ ದೆಶಾಥಂಯ್ ಆಮ್ಕಾಂ ಆಸ್ಚೊ ಪವಿತ್ರ್ ಕಾಯ್ದೊ ಮ್ಹಣ್ ಸಮ್ಜೊನ್ ಘೆವ್ಯಾಂ. ಹ್ಯಾ ವರ್ವಿಂ ಆಮಿ ಆಮ್ಚ್ಯಾ ದೆಶಾಚಿ ದಿಶಾ ಬರಿ ಕರ್‍ಚ್ಯಾ ವಾವ್ರಾಂತ್ ಆಮ್ಕಾಂಚ್ ಆಮಿ ವಾಂಟೆಲಿ ಕರ್‍ಯಾಂ. ತಶೆಂಚ್ ಸಂವಿಧಾನಾಚಿಂ ತತ್ವಾಂ ಉಕ್ಲುನ್ ಧರ್‍ಚೊ ಬರೊ ಸರ್ಕಾರ್ ಆಮ್ಕಾಂ ಲಾಬೊಂದಿ ಮ್ಹಣ್ ಮಾಗ್ಯಾಂ. ದೆವಾಚೆಂ ಬೆಸಾಂವ್ ಭಾರತಾಚೆರ್ ಪಡೊಂ.

✍️ – ಬಾಪ್ ಐವನ್ ಸೊಜ್, ಕಾರ್ಮೆಲಿತ್