📰 ಎಪ್ರಿಲ್ 13: ಉತ್ತರ್ ಅಬದ್ ಫಿಲಿಫೈನ್‌ ದಿಯೆಸೆಜಿಚಾ 13 ವರ್ಸಾಂಚೆ ಚಲಿಯೆಕ್ ಸಾಂತಿಪಣಾಕ್ ಉಬಾರ್ಚಿ ಪ್ರಕ್ರಿಯಾ ಸುರು ಜಾಲ್ಯಾ. ನೀನಾ ರುಹಿಜ್‌  ಧಾವ್ಯಾ ವರ್ಸಾಚಾ ಪ್ರಾಯೆರ್ ಗೂಣ್‌ ಜಾಯ್ನಾತ್ಲೆ ಕಾಳ್ಜಾಚೆ ಪಿಡೆಕ್‌ ವಳ್ವಳುನ್ 13 ವರ್ಸಾಂಚೆ ಪ್ರಾಯೆರ್ 1993 ವ್ಯಾ ವರ್ಸಾ ಮರಣ್‌ ಪಾವ್ಲಿ. ಮಟ್ವ್ಯಾ ಆವ್ದೆಚೆಂ ತಿಚೆಂ ಜಿವಿತ್  ಲೊಕಾಕ್ ವಿಜ್ಮಿತ್ ಕೆಲ್ಲೆಂ ಆಸೊನ್  ಎವ್ಕರಿಸ್ತಾ ಥಂಯ್‌ ತಿಣೆಂ ದಾಕಾಯಿಲ್ಲೊ ಮೋಗ್ ವಿಶೇಸ್ ಆಸಕ್ತೆಚೊ ವಿಶಯ್.

“ಕೋಂತ್‌, ಬೈಬಲ್, ಮಾಗ್ಣ್ಯಾಚೆ ಬೂಕ್‌, ಆನಿ ಪವಿತ್ರ್‌ ವಸ್ತು ಹೆರಾಂಕ್‌ ವಾಂಟ್ಚೊ ತಿಚೊ ಸದಾಂಚೊ ವಾವ್ರ್ ಆಸ್ಲೊ. ತಿಚೆಂ ವ್ಯಕ್ತಿತ್ವ್ ಆನಿ ತಿಣೆಂ ಕೆಲ್ಲ್ಯೊ ಭಕ್ತಿಕ್‌ ಕರ್ನ್ಯೊ ಪಳಯ್ತಾನಾ ಲ್ಹಾನ್‌ ಪ್ರಾಯೆರ್‌ಚ್ ಕ್ರಿಸ್ತಾಚಿ ಒಳಕ್‌ ಹೆರಾಂಕ್ ದಿಂವ್ಚೆ ವರ್ತೆಂ ಮಿಸಾಂವ್‌ ತಿಣೆಂ ಸಂಪೂರ್ಣ್ ಕೆಲಾಂ” ಮ್ಹಣ್‌ ಲಹೋಗಾಚೊ ಬಿಸ್ಪ್‌ ರೆನಾತೊ ಮಯೂಬಾನ್‌ ಸಾಂಗ್ಲಾಂ.

ಸೊಸ್ಣಿಕಾಯ್‌ – ತಿಚೊ ವರ್ತೊ ಗೂಣ್. ಹೊಚ್ ಗೂಣ್ ಸರ್ವ್  ಯುವಜಣಾಂಕ್‌ ಪ್ರೇರಣ್.‌  ಹ್ಯಾ ಭುರ್ಗ್ಯಾವಿಶಿಂ ಹೆರಾಂಲಾಗಿಂ ವಿಚಾರ್ಲ್ಯಾ ವೆಳಾರ್‌ ‘ತೆಂ ಕೋಂತ್‌ ನ್ಹೆಸ್ಚೆ ಭುರ್ಗೆಂ’, ‘ಮಾಗ್ಣ್ಯಾಚೆಂ ಭುರ್ಗೆಂ’, ದೆವಾಚಾ ಮೊಗಾನ್ ಭರ್ಲೆಲೆಂ ಭುರ್ಗೆಂ’ ಮ್ಹಣ್‌ ಲೋಕ್‌ ಜಾಪ್‌ ದಿತಾ.

ತೆಂ ಮೊರೊನ್‌ 30 ವರ್ಸಾ ಉಪ್ರಾಂತ್‌ 2023ಚ್ಯಾ ಜುಲಾಯ್ ಮ್ಹಯ್ನ್ಯಾಂತ್  ತಿಚಾ ಜಿವಿತಾವಿಶಿಂ ತನ್ಖಿ ಚಲಂವ್ಕ್‌ ಫಿಲಿಫೈನ್ಸಾಚಾ ಕಥೊಲಿಕ್‌ ಬಿಸ್ಪಾ ಮಂಡಳೆನ್‌ ಪರ್ವಣ್ಗಿ ದಿಲ್ಯಾ.

ಹ್ಯಾಚ್‌ 2024 ವ್ಯಾ ವರ್ಸಾ ಎಪ್ರಿಲ್‌ 4 ತಾರಿಕೆರ್ ಫಿಲಿಫೈನ್ಸಾಚಾ ಸಾಂ ವಿಲಿಯಮ್ ಕ್ಯಾಥೆಥ್ರಲಾಂತ್ ಸಾಂತ್ ಮ್ಹಣ್ ಪಾಚಾರ್ಚಿ ಪ್ರಕ್ರಿಯಾ ಸುರ್ವಾತುನ್ ಸೊಮಿಯಾಚಿ ಚಾಕರ್ನ್ ಜಾವ್ನಾಸ್ಚ್ಯಾ ನೀನಾ ರುಹಿಜಾಚಿ ತಸ್ವೀರ್ ತಶೆಂಚ್‌ ತಿಚಾ ವಸ್ತುರಾಚಿ ರೆಲಿಕ್ ಅಧಿಕೃತ್ ರಿತಿನ್‌ ಉಗ್ತಾವಣ್‌ ಕೆಲ್ಯಾ.