ಹಾಯ್.. ಹಾಯ್.. ಕಸಲಿ ಹಿ ಧಗ್! ರೂಕ್ ಝಡಾಂ ತಟಸ್ಥ್ ಜಾಲ್ಲಿಂ ದಿಸ್ತಾತ್, ಏಕ್ ಚೂರ್ ಸಯ್ತ್ ವಾರೆಂ ಘುಂವನಾ. ಕಾವ್ಳೆ ಹೆಣೆತೆಣೆಂ ಮೆಳೆಲ್ಲ್ಯಾ ಉದ್ಕಾಂತ್ ಆಂಗ್ ಬುಡೊವ್ನ್ ಘೆತಾತ್! ಆಮ್ಚೆಂ ಆಂಗ್ ಶಿಜೊನ್ ಆಸಾ, ಬಾಜುನ್ ಆಸಾ. ಪೆಂಟೆಂತ್ ಮೆಳ್ತಾನಾ ಏಕ್‌ಚ್ ಉತರ್, “ಕಿತ್ಲಿ ಕಠೀಣ್ ದಗ್ ಸಾಯ್ಬಾ.. ದೀಸ್ ಕಾಡ್‌ಲ್ಲೆಬರಿ ನಾಂತ್!” “ಪಾವ್ಸ್ ಕೆದಳಾ ಯೆತಾಗೀ!” ದಿಸಾಕ್ ಕಾಮ್ ಕರುಂಕ್ ಜಾಯ್ನಾ, ರಾತಿಕ್ ನೀದ್ ಪಡನಾ.

ಮಾಧ್ಯಮಾಂನಿ ಯೆತಾ ಖಬರ್ ಧರ್‍ತಿ ತಾಪ್ಲ್ಯಾ! ಹೀಟ್ ವೇವ್ಸ್ ಚಡ್ಲ್ಯಾತ್! ಹೀಟ್ ವೇವ್ಸ್ ಮ್ಹಳ್ಯಾರ್ ಕಿತೆಂ? ಏಕ್ ವಿಶಾಲ್ ಲೊಂಕ್ಡಾಚೆಂ ಆಯ್ದಾನ್ ತಾಪ್ತಾನಾ ತಾಚೊ ಶಾಖ್ ಸಗ್ಳ್ಯಾ ಆಯ್ದಾನಾ ಭೊಂವಾರಿಂ ವಿಸ್ತಾರ್‍ತಾ ತಶೆಂಚ್ ಏಕ್ ನಿರ್ಧಿಷ್ಟ್ ಸುವಾತೆರ್ ಉಷ್ಣಾಂಶ್ ಚಡ್ತಾನಾ ತಾಕಾ ಹೀಟ್ ವೇವ್ಸ್ ಮ್ಹಣ್ತಾತ್. ಸಮಾತಟ್ಟ್ ಸುವಾತ್ಯಾಂನಿ ಉಷ್ಣಾಂಶ್ ೪೦ ಡಿಗ್ರಿ ಸೆಲ್ಸಿಯಸ್ ಆಸ್ತಾ. ಕರಾವಳಿ ಭಾಗಾಂನಿ ೩೭ ಡಿಗ್ರಿ ಸೆ. ಆನಿ ಗುಡೆ ದೊಂಗೊರ್ ಸುವಾತ್ಯಾಂನಿ ಉಷ್ಣಾಂಶ್ ೩೦ ಡಿಗ್ರಿ ಸೆ. ಪಾವ್ತನಾ ಹೀಟ್ ವೆವ್ಸ್ ಉತ್ಪನ್ನ್ ಜಾತಾತ್. ಹೆ ಹೀಟ್ ವೇವ್ಸ್ ಥೊಡೆ ದೀಸ್, ಹಫ್ತೆ ವಾ ಮ್ಹಯ್ನೆಭರ್ ಆಸೊಂಕೀ ಪುರೊ. ದೆಕುನ್ ಆಮಿ ಹುನ್ ವಾರೆಂ ಅನ್ಭೋಗ್ ಕರ್‍ತಾಂವ್.

ಹೀಟ್ ವೇವ್ಸಾಚೆ ಪರಿಣಾಮ್ ಕಿತೆಂ? 

ಚಡಾವತ್ ಹ್ಯಾ ದಿಸಾಂನಿ ಭಾಯ್ರ್ ಥಾವ್ನ್ ಘರಾ ಆಸ್ಲ್ಯಾರಿ ಎಕ್ಯೆ ರಿತಿಚಿ ಕಠೀಣ್ ಪುರಾಸಣ್ ಕುಡಿಕ್ ಭೊಗ್ತಾ. ಕಠೀಣ್ ಧಗಿಕ್ ಆಂಗ್ ಶಿಜೊನ್ ವೆತಾಶೆಂ ಭಗ್ತಾ. ರಕ್ತಾ ನಳಿಯಾಂನಿ ಅನಿಯಂತ್ರಿತ್ ರಿತಿನ್ ರಗತ್ ಪಾಶಾರ್ ಜಾತಾನಾ ಕಾಳ್ಜಾಕ್ ಅಪಾಯ್ ಚಡ್ತಾತ್. ಉಸ್ವಾಸ್ ಕಾಡುಂಕ್ ಇಲ್ಲಿ ಕಶ್ಟ್ ಜಾಲ್ಲೆಬರಿ ಜಾತಾ. ಹಾಚ್ಯೆಭಾಯ್ರ್ ಆಂಗ್ ವೋಳ್, ಸ್ನಾಯು ದೂಕ್, ವೋಂಕ್ ಆನಿ ಪ್ರಾಯೆಸ್ತಾಂಚಿ ಭಲಾಯ್ಕಿ ಭಿಗ್ಡೊಂಕ್ ಸಲೀಸ್ ವಾಟ್ ಜಾತಾ. ಚಡಿತ್ ಮಾಪಾನ್ ಘಾಮ್ ದೆಂವ್‌ಲ್ಲ್ಯಾನ್ ಕುಡಿಂತ್ ಸೊಡಿಯಮ್ ಸತ್ವ್ ಉಣೆಂ ಜಾವ್ನ್ ಕಠೀಣ್ ತಾನ್ ಲಾಗೊಂಕ್ ಸುರು ಜಾತಾ. 

ತರ್ ಕುಡಿಚಿ ಜತನ್ ಕಶಿ ಕರ್‍ಯೆತ್?