📰 ಮಾರ್ಚ್ 27: ಕರ್ನಾಟಕ್ ಗೋಂಯ್ ಪ್ರಾಂತ್ಯಾಚ್ಯಾ ಕಾರ್ಮೆಲಿತಾಂನಿ ಚಲಂವ್ಚ್ಯಾ ತಾಂಜಾನಿಯಾ ಮಿಸಾಂವ್ ಗಾಂವಾಂತ್ ಅಪರಿಮಿತ್ ಸೆವಾ ದೀವ್ನ್ ಥಂಯ್ಚ್ಯಾ ಲೊಕಾಚಿಂ ಮನಾಂ ಜಿಕ್ಲಲೊ ಉರ್ಭೆಸ್ತ್ ಕಾರ್ಮಿಲಿತ್ ಫ್ರಾದ್, ಬಾಪ್ ವಾಲ್ಟರ್ ಲೋಬೊ(78) ಮಾರ್ಚ್ 27, 2024 ವೆರ್ ಸಕಾಳಿಂ 10.00 ವೊರಾರ್ ಫಾ. ಮುಲ್ಲರ್ಸ್ ಆಸ್ಪತ್ರೆಂತ್ ಅಂತರ‍್ಲೊ. ಜಾಯ್ತಿ ವರ್ಸಾಂ ಆಫ್ರಿಕಾಚ್ಯಾ ಟಾಂಜಾನಿಯಾಂತ್ ತಶೆಂಚ್ ಭಂವ್ತಣಿಚ್ಯಾ ಗ್ರಾಮೀಣ್ ಪ್ರದೆಶಾಂನಿ ದುಬ್ಳ್ಯಾ ಲೊಕಾಕ್ ಆನಿ ಆಸ್ಕತ್ ಜನಾಂಗಾಂಕ್ ಆಪ್ಲ್ಯಾ ನಿಶ್ಕಳಂಕ್ ಮೊಗಾನ್ ಪಳೆವ್ನ್ ತಾಂಚೆಖಾತಿರ್ ಕಸಲೊಯ್ ಸಾಕ್ರಿಫಿಸ್ ಕರುಂಕ್’ಯೀ ಪಾಟಿಂ ಸರಾನಾತ್ಲೊ ಮಿಶನರಿ ಆಜ್ ಸಾಸ್ಣಾಚ್ಯಾ ವಿಶೆವಾಕ್ ಪಾವ್ಲಾ.

1981 ಇಸ್ವೆಂತ್ ಆಫ್ರಿಕಾಚ್ಯಾ ತಾಂಜಾನಿಯಾಕ್ ಮಿಶನರಿ ಜಾವ್ನ್ ಗೆಲ್ಲೊ ತೊ 100-200 ಕಿ.ಮೀ ಲೊಕಾಕ್ ಆಸ್ಪತ್ರ್ ನಾತ್ಲೆಲಿ ಪಳೆವ್ನ್ ಸರ್ಕಾರಾನ್ ಕರಿಜೆ ಜಾಲ್ಲೆಂ ಕಾಮ್ ಆಪ್ಣೆಂ ಖಾಂದಾರ್ ಘೆವುನ್ ಏಕ್ ಡಿಸ್ಪೆನ್ಸರಿ ಉಗಡ್ತಾ. ಲೊಕಾನ್ ಪಿಯೆಂವ್ಚೆಂ ಉದಕ್ ಹಾಡುಂಕ್ ಮಯ್ಲಾಂಗಟ್ಲ್ಯಾನ್ ಚಲುನ್ ವಚುನ್ ಯೆಂವ್ಚೆಂ ಪಳೆವ್ನ್ ಪೈಪ್ ಲೈನ್ ಘಾಲವ್ನ್ ಸಗ್ಳ್ಯಾ ಗಾಂವಾಕ್ ಘರಾ ಬಾಗ್ಲಾರ್ ಉದಕ್ ಯೆಂವ್ಚೆ ಬರಿ ಕರ್‍ತಾ. ಉದ್ಕಾಕ್ ಲಾಗುನ್ ಕಶ್ಟೊಂಚೆಂ ಆಡಾಂವ್ಕ್ ತ್ಯಾ ಗಾಂವಾಂತ್ ಉದ್ಕಾ ಟಾಂಕಿ ಭಾಂದ್ಚೆಂಯ್ ಶಿಕವ್ನ್ ದಿತಾ. ಕಂಟೈನರಾಂನಿ ಅಮೇರಿಕಾ ಆನಿ ಜರ್ಮನಿ ಥಾವ್ನ್ ಆಯಿಲ್ಲಿ ಖಾಣಾ ವೊರ್ವಿ ದುಬ್ಳ್ಯಾ ಲೊಕಾಕ್ ವಾಂಟ್ಚೆಂ ಕಾಮ್ ಅನ್ಯೇಕ್ಲೊ ಕಾರ್ಮೆಲಿತ್ ಮಿಶನರಿ ಬಾಪ್ ಫೆಲಿಕ್ಸ್ ಮೊರಾಸಾಚೆ ಮಜತಿನ್ ಸಾಂಬಾಳ್ತಾ. ಗರ್ಭೆಸ್ತ್ ಸ್ತ್ರಿಯಾಂಕ್ ಆನಿ ಜಾನ್ವಾರಾಂಕ್ ನಂಯೊ, ವ್ಹಾಳ್ ಉತ್ರೊಂಕ್ ಜಾಯ್ನಾತ್ಲ್ಯಾ ವೆಳಾರ್ ಸಾಂಕೊವ್ ಭಾಂದ್ಚೆಂಯ್ ಕಾಮ್ ಕರ್‍ತಾ. ತೊ ಇಂಜಿನಿಯರ್ ನ್ಹಯ್, ತಾಂತ್ರಿಕ್ ಶಿಕಪ್ ಜೊಡ್ಲಲೊಯ್ ನ್ಹಯ್, ಪುಣ್ ದೆವಾಚೆ ಕುರ್ಪೆನ್ ಹಿಂ ಕಾಮಾಂ ನಾಜೂಕಾಯೆಕ್ ಸಂಪವ್ನ್ ತಾಂಜಾನಿಯಾ ಸರ್ಕಾರಾಚೆಂ ಮನ್ ವೊಡ್ತಾ ಮಾತ್ರ್ ನ್ಹಯ್ ಸರ್ಕಾರಾ ಥಾವ್ನ್ ಶಾಭಾಸ್ಕೆಕ್ ವಳಗ್ ಜಾತಾ!

ಮಾಗ್ಣ್ಯಾಂತ್ ಆಸಕ್ತ್ ವಿಶೇಸ್. ಮಾಗ್ಣೆಂ ಕಶೆಂ, ಕಿತೆಂ ಮ್ಹಣ್ ಸಮ್ಜುಂಕ್ ಪುಸ್ತಕಾಂಚೆ ಅಧ್ಯಾಯನ್ ಕರ್‍ತಾ. ಜಾಪಿ ಮೆಳ್ತಾನಾ ಹೆರಾಂಕೀ ಮಾಗ್ಣ್ಯಾಂತ್ ಗುಂಡಾಯೆಕ್ ದೆವೊಂಕ್ ಉರ್ಭಾ ದಿತಾ. ತಾಚ್ಯಾ ವಿರಾಮಾಚ್ಯಾ ವೆಳಾರ್ ವಾ ಕಾಮಾಚ್ಯಾ ಜಾಗ್ಯಾರ್ ತೊ ವಿಲ್ಫಿ ರೆಬಿಂಬಸಾಚಿಂ ಕಿತ್ಲಿಶಿಂ ಪೊರ್ನಿಂ ಪದಾಂ ಗಾಯ್ತಾಲೊ ಮ್ಹಳ್ಳೆಂಯ್ ವಿಶೇಸ್.

ತಾಚೆಂ ಮಾಗ್ಣೆಂ ಆನಿ ಮಿಸಾಂವ್ ವಾವ್ರ್ ಕಾರ್ಮೆಲಿತಾಂ ತರ್ಫೆನ್ ತಾಂಜಾನಿಯಾಚ್ಯಾ ದುಬ್ಳ್ಯಾ ಲೊಕಾಕ್ ದಿಲ್ಲಿ ವ್ಹಡ್ ದೆಣ್ಗಿ ಮ್ಹಣ್ಯೆತ್. ಪಾಟ್ಲ್ಯಾ ಸುಮಾರ್ ಏಕ್ ವರ್ಸಾ ಥಾವ್ನ್ ಕ್ಯಾನ್ಸರಾನ್ ವ್ಹಳ್ವಳುನ್ ಆಸ್ಲ್ಯಾರೀ ತರ್ನಾಟ್ಯಾಂನಿ ಮಾಗ್ಣ್ಯಾಂತ್ ಬಳ್ ಜಾಯ್ಜೆ, ತವಳ್ ಸರ್ವ್ ಸಂಗ್ತಿ ತಾಂಚ್ಯಾನ್ ಕರುಂಕ್ ಸಾಧ್ಯ್ ಮ್ಹಣ್ ಆಪ್ಲ್ಯಾ ಜಿವಿತಾಚ್ಯಾ ಯಶಸ್ವೆಚೊ ಘುಟ್ ತೊ ಉಚಾರ್‍ತಾಲೊ.

---

ಫ್ರಾದ್ ವಾಲ್ಟರ್ ಲೋಬೊನ್ ದಿಲ್ಲಿ ಸೆವಾ –
• ಜಲ್ಮ್: 24 ಡಿಸೆಂಬರ್ 1946
• ಫಿರ್ಗಜ್: ಸಾಂ ಆನ್ನಾಚಿ ಫಿರ್ಗಜ್ ಕೆಲರಾಯ್
• ಅವಯ್ ಬಾಪಯ್: ದೆ. ಬೊನಿಫಾಸ್ ಆನಿ ದೆ. ಮೇರಿ ಲೋಬೊ
• 1963 – ಕೇರಳಾಚ್ಯಾ ಆಲ್ವೆ ಸೆಮಿನರಿಂತ್ ಕಾರ್ಮೆಲ್ ಒಡ್ದಿಕ್ ಆಪೊವ್ಣೆಂ
• 1966 – ಕಾರ್ಮೆಲ್ ಒಡ್ದಿಂತ್ ಪಯ್ಲಿ ಆಂಗೊವ್ಣ್
• 1969 – ಕಾರ್ಮೆಲ್ ಒಡ್ದಿಂತ್ ಶಾಶ್ವಿತ್ ಆಂಗೊವ್ಣ್
• 1972 – ಯಾಜಕೀ ದೀಕ್ಷಾ (ಹೊಲಿ ರೊಜರಿ ಕಾಥೆದ್ರಲ್, ಮಂಗ್ಳುರ್)
• 1973 – 1974 ಮಂಜುಮೆಲ್ ಆನಿ ಕೇರಳಾಂತ್ ಸೆವಾ
• 1975 – ಕಾರ್ಮೆಲ್ ಗುಡ್ಯಾರ್ ಸೆವಾ
• 1976 – ಮೈಸೂರ್, ಪುಶ್ಪಾಶ್ರಮಾಂತ್ ವ್ಹಡಿಲ್ ಜಾವ್ನ್ ಸೆವಾ
• 1981 ಟಂಜಾನಿಯಾ ಮಿಸಾಂವ್ ಗಾಂವಾಕ್ ಪಯ್ಣ್ ( ಫಿರ್ಗಜ್ ವಿಗಾರ್ ಜಾವ್ನ್ ಮಿಕುಮಿ, ಮೊರೊಗೊರೊ, ಇರಾಂಬೊ, ಬೇಯಾ ಮೊಲೊಲೊ ತಶೆಂಚ್ ಕೊವೆಂತಾಚೆ ವ್ಹಡಿಲ್ ಜಾವ್ನ್ ಮಿಕುಮಿ, ಇಗೊಮಾಂತ್ ಸೆವಾ)
• 2000 ವರ್ಸಾ ಗಾಂವಾಕ್ ಪಾಟಿಂ ಆಯಿಲ್ಲ್ಯಾ ಉಪ್ರಾಂತ್ ತಪೋವನ, ಕುಶಾಲ್‌ನಗರಾಂತ್ ನೊವಿಸ್ ಮಾಸ್ಟರ್ ಜಾವ್ನ್, ಬೆಂಗ್ಳುರ್, ವಿಜಯನಗರ್ ಫಿರ್ಗಜೆಚೊ ವಿಗಾರ್ ಜಾವ್ನ್ ತಶೆಂಚ್ ಬೆಳ್ಗಾಂವ್ಚ್ಯಾ ಲೊಂಡಾಂತ್, ಮೈಸೂರ್, ಪುಶ್ಪಾಶ್ರಮಾಂತ್ ಆನಿ ಧ್ಯಾನವನಂತ್, ಬೆಂಗ್ಳುರ್, ಗೆದ್ದಲಹಳ್ಳೆಂತ್ ಸೆವಾ.
• ನಿಮಾಣೆಂ ವ್ಹಡಿಲ್ ಜಾವ್ನ್ ಗುಲ್ಬರ್ಗಾಚಾ ಕಡಗಂಜಿಂತ್ ಸೆವಾ.

ಮಾ.ಬಾ. ವಾಲ್ಟರ್ ಲೋಬೊಚಿ ಮರ್ಣಾಚಿ ರೀತ್ ಎಪ್ರಿಲ್ 1, 2024ವೆರ್ ಸೊಮಾರಾ, ಸಾಂಜೆರ್ 3.00 ವೊರಾರ್ ಬಾಳೊಕ್ ಜೆಜುಚಾ ಪೂನ್ ಶೆತಾಂತ್ ಚಲ್ತಲಿ.