📰 ಮಂಗ್ಳುರ್, ಫೆ. 25: ಕಥೊಲಿಕ್ ಕಾರಿಸ್ಮಾತಿಕ್ ಎಕ್ತಾರ್ ಮಂಗ್ಳುರ್ ದಿಯೆಸಿಜ್ ಆನಿ ಬೈಬಲ್ ಆಯೊಗಾನ್ ಮಂಗ್ಳುರ್, ಕೊರ್ಡೆಲ್ ಇಗರ್ಜೆಚ್ಯಾ ಉಗ್ತ್ಯಾ ಮಯ್ದಾನಾರ್ ಆಸಾ ಕೆಲ್ಲೆಂ ಚಾರ್ ದಿಸಾಂಚೊ ಮೆಗಾ ಬೈಬಲ್ ಸಮ್ಮೇಳ್ 2024, ಫೆಬ್ರವರಿ 25 ತಾರಿಕೆರ್ ಸಂಪ್ಲೊ. ಸುಮಾರ್ 10,000 ಲೊಕಾನ್ ಕುಟ್ಮಾಂ ಸಮೇತ್ ವಾಂಟೊ ಘೆವ್ನ್ ಆದ್ಯಾತ್ಮಿಕ್ ಅಭಿವೃದ್ದಿ ಆನಿ ಸಮುದಾಯಿಕ್ ನವೀಕರಣಾಕ್ ಸಾಕ್ಸ್ ದಿಲಿ.

ಕೇರಳಚಾ ಡಿವೈನ್ ರಿಟ್ರೀಟ್ ಸೆಂಟರಾ ಥಾವ್ನ್ ಬಾಪ್ ಜೋಸೆಫ್ ಎಡಟ್ಟು ವಿ.ಸಿ ಹಾಣಿಂ ಸ್ತುತಿ ಹೊಗ್ಳಾಪ್, ಸಮುದಾಯಿಕ್ ಮಾಗ್ಣೆಂ, ಮೀಸ್,  ಶಿಕೊವ್ಣ್ ಆನಿ ಆರಾಧನಾನ್ ಚಲವ್ನ್ ವ್ಹೆಲೆಂ.

ಮಂಗ್ಳುರ್ ದಿಯೆಸಿಜೆಚೆ ನಿವೃತ್ ಬಿಸ್ಪ್ ಅ. ಮಾ. ದೊ. ಅಲೋಶಿಯಸ್ ಪಾವ್ಲ್ ಡಿಸೋಜಾನ್ ಸಂಪ್ಣೆಚೆ ಮಿಸಾಚೆ ಬಲಿದಾನ್ ಭೆಟಯ್ಲೆಂ. ಕೊರ್ಡೆಲ್ಚೆ ವಿಗಾರ್ ಆನಿ MDSCಚೆಂ ಆತ್ಮೀಕ್ ನೀರ್ದೆಶಕ್ ಬಾಪ್ ಕ್ಲಿರ್ಪರ್ಡ್ ಫೆರ್ನಾಂಡಿಸಾನ್ ಆಮ್ಕಾಂ ರುಪಾಂತರ್ ಜಾಂವ್ಕ್ ರಚ್ಲಾಂ ಆನಿ ಆಪಯ್ಲಾಂ ಹ್ಯಾ ವಿಷಯಾಂಚೆರ್ ಶಿಕೊವ್ನ್ ದೀವ್ನ್ ಕುಟ್ಮಾಂತ್ ದೃಡ್ ಬಾವಾರ್ಥ್ ರೂಪಿತ್ ಕರುಂಕ್ ಆನಿ ಕುಟ್ಮಾ ಜಿಣ್ಯೆಂತ್ ನವೀಕರಣ್ ಹಾಡುಂಕ್ ಉಲೊ ದಿಲೊ.

ನಿಮಾಣೆಂ ಕುಟ್ಮಾಚಾ ನವೀಕರಣಾ ಪಾಸತ್ ವಿಶೇಷ್ ಮಾಗ್ಣ್ಯಾವಿಧಿ ಆಸಾ ಕೆಲ್ಲಿ. ಚಾರ್ ದಿಸಾಂಚ್ಯಾ ಸಮ್ಮೆಳಾಂತ್ MDSCಚೊ ಸಂಯೋಜಕ್ ಕೆವಿನ್ ಡಿಸೋಜಾಚಾ ಮುಕೇಲ್ಪಣಾರ್ ಆರ್ಗಾಂ-ಸ್ತುತಿ ಆನಿ ಆರಾಧಾನ್ ಮಾಂಡುನ್ ಹಾಡ್ಲೆಂ. ರೊನಿ ಡಿಸೋಜಾ ಆನಿ ಪಂಗ್ಡಾನ್ ಗಾಯನಾಕ್ ಸಾಂಗಾತ್ ದಿಲೊ.