ಫೆಬ್ರವರಿ 17 ತಾರಿಕೆರ್  ಕಥೊಲಿಕ್ ಸಿಸ್ಟರ್ ಮೇಘಾಲಯ್ ಥಾವ್ನ್ ಆಸ್ಸಾಮ್ ಬಸ್ಸಾರ್ ಪಯ್ಣ್ ಕರ‍್ತಾನಾ ಟಿಕೆಟ್ ಆಸ್ಲ್ಯಾರಿ ತಿಣೆಂ ನೆಸ್’ಲ್ಲ್ಯಾ ಧರ್ಮಿಕ್ ನೆಸ್ಣಾಕ್ ಅಕ್ಮಾನ್ ಕರ‍್ನ್ ತಿಕಾ ಬಸ್ಸಾರ್ ಥಾವ್ನ್ ದೆಂವಯಿಲ್ಲೆಂ ಘಡಿತ್‌ ಝಳ್ಕೆಕ್ ಆಯ್ಲಾಂ

ರೆಲಿಜಿಯೊಸ್  ನೆಸ್ಣಾರ್ ಆಸಾ ಮ್ಹಳ್ಳ್ಯಾ ಕಾರಣಾಕ್  ಸಿಸ್ಟರಿಕ್ ಬಸ್ಸಾರ್ ಪಯ್ಣ್ ಕರ‍್ತೆಲ್ಯಾಂನಿ ಖೆಬ್ಡಾಯೊ ಕರ‍್ನ್ ಬಸ್ಸಾರ್ ಥಾವ್ನ್ ಬಳ್ ಕರ್ನ್ ದೆಂವಯ್ಲ್ಯಾಕ್  ಮೇಘಲಾಯ್ ದಿಯೆಸೆಜೆನ್ ರಾಜ್ಯ್ ಸರ್ಕಾರಾಚೆರ್ ಪ್ರತಿರೋದ್ ಉಟಯ್ಲಾ.

ಸಾಂ ಫ್ರಾನ್ಸಿಸ್ ದೆ ಸೇಲ್ಸ್ ಮೆಳಾಚಿ ಸಿ. ರೋಜ್ ಮೇರಿ ಮೇಘಾಲಯ್‌ಚಾ ದುಹೊನಿ ಥಾವ್ನ್  ಅಸ್ಸಾಂಕ್ ಪಯ್ಣ್ ಕರ‍್ನ್ ಆಸ್‌ಲ್ಲಿ. ಸುರ‍್ವೆರ್ ಕಿತೆಂಚ್ ಜಾಂವ್ಕ್ ನಾ. ಸವ್ಕಾಸ್ ಥೊಡ್ಯಾ ಪಯ್ಣಾರ‍್ಯಾಂನಿ ರೆಲಿಜಿಯೊಸ್ ನ್ಹೆಸಣ್ ನೆಸ್ಲ್ಯಾ ಮ್ಹಣ್ ತುಕ್ಲಾವ್ನ್ ಫೊಕಣಾಂ ಕರ‍್ನ್ ಉಪ್ರಾಂತ್ ಕೊಣ್‌ಂಚ್ ನಾತ್‌ಲ್ಲ್ಯಾ ಸುವಾತೆರ್ ದಬಾವ್ ಘಾಲ್ನ್ ತಿಕಾ ದೆಂವಯ್ಲೆಂ.

ಫೆಬ್ರುವರಿ 22 ತಾರಿಕೆರ್  ಮೇಘಲಾಯ್ ತುರಾಚೊ ಆಧಾರಿ ಬಿಸ್ಪ್ ಜೋಸ್ ಚೈರಾಕಲಾನ್ ಹೊ ವಿಷಯ್ ಮೇಘಾಲಯ್ಚೊ ಮುಕೆಲಿ ಮಂತ್ರಿ ಕೊನ್ರಾಡ್ ಕೆ. ಸಾಂಗ್ಮಾಚಾ ಗಮನಾಕ್ ಹಾಡ್ಲಾ ಆನಿ ಆಸ್ಸಾಂಚೊ ಮುಕೆಲ್ ಮಂತ್ರಿ ಹಿಮಂತ ಬಿಸ್ವಾಸ್ ಶರ್ಮಾಕ್  ತಿಳ್ಸುನ್ ಹ್ಯಾವಿಶಿಂ ತನ್ಕಿ ಕರುಂಕ್ ಮನವಿ ದಿಲ್ಯಾ.

ಕ್ರಿಸ್ತಾಂವ್ ಸಂಖೊ ಚಡಿತ್ ಮಾಪಾನ್ ಆಸ್ಚ್ಯಾ ಮೇಘಾಲಯಾಂತ್ ಸೆಕುಲರ್ ನ್ಯಾಶನಲ್ ಲೊಕಾಚಿ ಪಾಡ್ತ್ ಆಡಳ್ತೆಂ ಚಲಯ್ತಾ ತರ್ ಬಿಜೆಪಿ ಅಸ್ಸಾಮಾಂತ್ ಆಡಳ್ತೆಂ ಚಲಯ್ತಾ. ಥೊಡೆ ಹಿಂದು ಅಲ್ಪ್’ಸಂಖ್ಯಾಂತಾಂಚೆರ್ ನಿರಂತರ್ ಇಜಾ ದೀವ್ನ್ ಆಸಾತ್. ಥೊಡ್ಯಾ ದಿಸಾ ಆದಿಂ ಕ್ರಿಸ್ತಾಂವ್ ಇಸ್ಕೊಲಾಂತ್ಲ್ಯೊ ಸರ್ವ್ ಇಮಾಜ್ಯೊ ಕಾಡುಂಕ್ ತಾಣಿಂ ಒತ್ತಾಯ್ ಕೆಲ್ಲಿ ತಶೆಂಚ್ ಯಾಜಕಾಂನಿ ಆನಿ ಸಿಸ್ಟ್ರಾಂನಿ ರೆಲಿಜಿಯೊಸ್ ನ್ಹೆಸಣ್ ಸೊಡ್ನ್ ಸಂಪ್ರದಾಯಿಕ್ ನ್ಹೆಸಣ್ ನೆಸೊಂಕ್ ಒತ್ತಾಯ್ ಕೆಲ್ಲಿ. ಕ್ರಿಸ್ತಾಂವ್ ಮುಕೆಲ್ಯಾಂನಿ ಹ್ಯಾವಿಶಿಂ ಅದಿಕಾರಿಂಕ್ ತಿಳ್ಸಿಲ್ಯಾರಿಂ ಕಿತೆಂಚ್ ಕ್ರಮ್ ಘೆಂವ್ಕ್ ನಾ.

ಮೆಘಾಲಯ ಕ್ರಿಸ್ತಾಂವ್ ಲೊಕಾಂನಿ ಮೆಡಿಕಲ್ ಆನಿ ಪಯ್ಣಾಂಕ್ ಆನಿ ಇತರ್ ಸಂಗ್ತಿಂಕ್ ಆಸ್ಸಾಂಚೆರ್ ಹೊಂದುನ್ ರಾವಜಯ್ ಜಾಲ್ಲ್ಯಾನ್ ಹೊ ಸಮಸ್ಸೊ ಇತ್ಯರ್ಥ್ ಜಾಂವ್ಚೆಂ ಕಷ್ಟಾಂಚೆಂ ಮ್ಹಣ್ ಬಿಸ್ಪ್ ಚೈರಾಕಲಾನ್ ಬೆಜಾರಾಯ್ ಉಚಾರ್‍ಲ್ಯಾ.

ಮೇಘಾಲಯ್ ಸರ್ಕಾರಾನ್ ಹೊ ವಿಷಯ್ ಸರಾಕ್ಮತ್ ರಿತಿನ್ ಸ್ವೀಕಾರ್ ಕರ‍್ನ್ ಆಸ್ಸಾಂ ಅಧಿಕಾರಿಸವೆಂ ಮೆಳೊನ್ ಜೊಕ್ತೆಂ ಕ್ರಮ್ ಘೆತಾ ಮ್ಹಳ್ಳೊ ಭರ್ವಸೊ ದಿಲಾ.