ಮಂಗ್ಳುರಿ ಕೊಂಕಣಿ ಕಿರಿಸ್ತಾಂವ್ ಸಮಾಜಿಚೆರ್ ಪರತ್ ಏಕ್ ಹಲ್ಲೊ ಜಾಲಾ. ಇತ್ಲ್ಯಾಕೀ ಆಮ್ಚೆ ವಯ್ರ್ ಅತಿಕ್ರಮಣ್ ಜಾಂವ್ಚೆ ಪಯ್ಲೆಂ ಪಾವ್ಟಿಂ ನ್ಹಯ್. ಬರೋಬರ್ ಸೊಳಾವ್ಯಾ ಶೆಕ್ಡಾಂತ್ ಆಮಿ ಗೊಯಾಂಥಾವ್ನ್ ಮಂಗ್ಳುರ್ ಪಾವ್ಲ್ಯಾ ಉಪ್ರಾಂತ್ ಆಮ್ಚೆ ವಯ್ರ್ ಸಬಾರ್ ಪಾವ್ಟಿಂ ಹಲ್ಲೊ ಜಾವ್ನ್ಚ್ ಆಯ್ಲಾ. ಇತಿಹಾಸ್‌ಕಾರಾಂ ಪ್ರಕಾರ್ ಕೊಂಕ್ಣಿ ಕ್ರಿಸ್ತಾಂವ್ ಸಮುದಾಯಾಚೆರ್ ವ್ಹಡ್ ಮಾಪಾನ್ ಜಾಲ್ಲೊ ಹಲ್ಲೊ ಮ್ಹಳ್ಯಾರ್ 1784 ಇಸ್ವೆಚಾ ಫೆಬ್ರೆರಾಚ್ಯಾ ನಿಮಾಣ್ಯಾ ಹಪ್ತ್ಯಾಂತ್. ತೆನ್ನಾ ಮೈಸೂರ್ ಸಂಸ್ಥಾನಾಚೊ ಅಧಿಪತಿ ಜಾವ್ನ್ ಆಸ್ಲ್ಯಾರೀ ಟಿಪ್ಪುನ್ ಕೆನರಾ ಕಥೊಲಿಕಾಚೆಂ ನಿರ್ನಾಮ್ ಕರಿಜೆ ಮ್ಹಣ್ ಹಜಾರೊಂ ಕೊಂಕಣಿ ಕ್ರಿಸ್ತಾವಾಂಕ್ ಕಯ್ದ್ ಕರ‍್ನ್ ಸಿರೆಂಗ್ ಪಟ್ನಾಕ್ (ಆತಾಂಚೆಂ ಶ್ರಿರಂಗಪಟ್ಟಣ) ವೆಲ್ಲೆಂ. ಹೊಸ್ಪೆಟ್ಚಿ ಏಕ್ ಇಗರ್ಜ್ ಸೊಡ್ನ್ ಬಾಕಿ ಕೆನರಾಂತ್ ಆಸ್’ಲ್ಲ್ಯಾ 27 ಇಗರ್ಜಾಂ ಪಯ್ಕಿ 26 ಇಗರ್ಜಾಂಚೊ ದೆಸ್ವಾಟ್ ಕೆಲೊ. ಹಜಾರೊಂ ಆಮ್ಚೆ ಮಾಲ್ಗಡೆ ಹ್ಯಾ ಅಕ್ರಮಣಾಂತ್ ಮಾಡ್ತಿರ್ ಮೆಲೆ. ಹಾಂತು ಬಚಾವ್ ಜಾಲ್ಲೆ 1799 ಇಸ್ವೆಂತ್ ಟಿಪ್ಪುಚಾ ಮರ್ಣಾ ಉಪ್ರಾಂತ್ ಸಿರೆಂಗ್ ಪಟ್ನಾ ಥಾವ್ನ್ ಪಾಟಿಂ ಆಯ್ಲ್ಯಾ ಉಪ್ರಾಂತ್ ಪರತ್ ಆಮಿ ಕೆನರಾಂತ್ ಅಸ್ತಿತ್ವ್ ಸೊಧುಂಕ್ ಸುರು ಕೆಲೆಂ. ಮಿಶನರಿಂನಿ ಸುರು ಕೆಲ್ಲ್ಯಾ ಶಿಕ್ಪಾ ಸಂಸ್ಥ್ಯಾಂದ್ವಾರಿಂ, ಬ್ರಾಹ್ಮಣ್ ಸಮಾಜೆಕ್ ಮಾತ್ರ್ ಸೀಮಿತ್ ಜಾವ್ನ್ ಅಸ್ಲಲೆಂ ಶಿಕಪ್, ಸಮಾಜೆಚ್ಯಾ ಸಕಯ್ಲ್ಯಾ ವರ್ಗಾಚ್ಯಾಂಕ್ ಸಯ್ತ್ ತೆಂ ಮೆಳ್ಳೆಂ. ಆಪ್ಣಾಂಕ್ ಖುದ್ದ್ ನಾಂವ್ ದಿಂವ್ಕ್ ಆವ್ಕಾಸ್ ನಾತ್ಲಲ್ಯಾ ಸಮುದಾಯಾನ್ ಶಿಕಪ್ ಜೊಡ್ಲೆಂ. ಧನಿಯಾಂಚ್ಯಾ ತೊಂಡಾಥಾವ್ನ್ ತುಕ್ರಾ, ಪೊಂಕ್ರಾ, ಚಿಂಗ, ಬೊಗ್ಗಿ, ನಾಯಿ ಮ್ಹಣೊನ್ ನಾಂವ್ ಜೊಡ್ಲೆಲ್ಯಾ ಲೊಕಾಕ್ ಸಮಾಜಿಕ್ ಸಮಾನತೆಚಿ ಜಾಗ್ ಹಾಡಯ್ಲೆಲಿಚ್ ಮಿಶನರಿಂನಿ.

ಜೆರೊಸಾ ಇಸ್ಕೊಲಾ ವಯ್ರ್ ಆಕ್ರಮಣ್, ಹಿಂದೂ ಸಂಘಟನಾಚಿ ಘುಟ್ಮಳ್

ಮಂಗ್ಳುರ್‍ಚ್ಯಾ ಪ್ರತಿಶ್ಟಿತ್ ಚಾರಿಟಿ ಸಿಸ್ಟರಾಂನಿ ಚಲಂವ್ಚ್ಯಾ ಜೆರೊಸಾ ಇಸ್ಕೊಲಾಂತ್ ಸಾತ್ವೆ ಕ್ಲಾಸೆಂತ್ ಇಂಗ್ಲಿಷ್ ಲಿಸಾಂವಾಂತ್ ಆಸ್ಚ್ಯಾ ರವೀಂದ್ರನಾಥ ಟಾಗೋರಾಚ್ಯಾ work is worship ಮ್ಹಳ್ಳ್ಯಾ ಕವಿತೆಚೊ ಅಸಲ್ ಸಾರಂಶ್ ದಿಲ್ಲ್ಯಾ ಶಿಕ್ಷಕಿ ಸಿಸ್ಟರ್ ಪ್ರಭಾನ್ ಹಿಂದ್ವಾAಚೊ ಧರ್ಮ್ ಅಕ್ಮಾನ್ ಕೆಲಾ ಮ್ಹಣ್ ತಿಚೆ ವಯ್ರ್ ಹಿಂದೂ ಸಂಘಟನಾಂನಿ ಆರೋಪ್ ಕೆಲಾ. ಶಿಕ್ಷಕಿನ್ ಕವಿತಾಚೊ ಆರ್ಥ್ ಭುರ್ಗ್ಯಾಂಕ್ ಗ್ರಹಿತ್ ಕರುಂಕ್ ಆನಿ ತ್ಯಾ ಕವಿತೆಚಿ ವೈಚಾರಿಕತಾ ಆಸಾ ತಶಿ ಸಮ್ಜುಂಕ್ ಮ್ಹಣ್ ಉಲಯಿಲ್ಲಿಂ ಉತ್ರಾಂ ಧರ್ಮ್ ನಿಂಧಾ ಜಾಲ್ಯಾಂತ್. ಇಸ್ಕೊಲಾಚಾ ಮುಖೆಲ್ ಶಿಕ್ಷಕಿಕ್ ಆಯಿಲ್ಲೆಂ ದೂರ್ ವಿಚಾರಣ್ ಕರ‍್ಚೆ ಆದಿಂಚ್ ಥಳೀಯ್ ಎಮ್ಮೆಲ್ಲೆ ವೇದವ್ಯಾಸ್ ಕಾಮತ್ ಆನಿ ಹಿಂದೂ ಸಂಘಟನಾಚ್ಯಾ ಪಂಗ್ಡಾನ್ ಇಸ್ಕೊಲಾ ಮುಖಾರ್ ಕೆಲ್ಲೊ ಹೈಡ್ರಾಮ ಆನಿ ಶಿಕ್ಷಕಿಂಕ್ ಕೆಲ್ಲಿ ನಿಂದಾ ಖಂಡನೀಯ್. ಎಮ್ಮೆಲ್ಲೆ ಆನಿ ಮತೀಯ್ ಪಂಗ್ಡಾಚ್ಯಾ ತಶೆಂಚ್ ಶಿಕ್ಪಾ ಅಧಿಕಾರಿಚ್ಯಾ ದಬಾವಾಕ್ ಲಾಗೊನ್ ತನ್ಖಿ ಜಾಂವ್ಚೆ ಆದಿಂಚ್ ಸಿಸ್ಟರ್ ಪ್ರಭಾಕ್ ಅಮಾನತ್ ಕರಿಜೆ ಪಡ್ಲೊ ವಿಶಯ್ ಪ್ರಜಾಪ್ರಭುತ್ವ್ ವೆವಸ್ಥೆಚಿ ಸಲ್ವಣಿ.

ಹ್ಯಾ ಸರ್ವ್ ಘಡಿತಾಂತ್ ಗುಮಾನ್ ದಿಜೆ ಜಾಲ್ಲಿ ಸಂಗತ್ ಮ್ಹಳ್ಯಾರ್ ಥಳೀಯ್ ಎಮ್ಮೆಲ್ಲೆ ವೇದವ್ಯಾಸ್ ಕಾಮತ್ ಹಾಚಿ ಗೂಂಡಾಗಿರಿ. ಆಪುಣ್ ಸರ್ವ್ ಲೊಕಾಚೊ ಪ್ರತಿನಿಧಿ ಮ್ಹಣ್ ಪ್ರಮಾಣ್ ಘೆತ್ಲಲ್ಯಾ ಹಾಣೆಂ ‘ಹಾಂವ್ ಏಕ್ ಹಿಂದೂ’ ಮ್ಹಣ್ ಹರ್ದೆಂ ಫುಲವ್ನ್ ಆಮ್ಚ್ಯಾ ಭಯ್ಣಿಂಕ್ ಮಾರ್ಗಾರ್ ಹಾಡುನ್ ತಾಂಚೆ ವಯ್ರ್ ಕೆಲ್ಲೊ ಜುಲುಮ್ ಅಕ್ಷಮ್ ಅಪ್ರಾದ್. ಮಂಗ್ಳುರ್ ದಕ್ಷಿಣಾಂತ್ ಜಾಂವ್ಚೆ ಎಮ್ಮೆಲ್ಲೆ ಗೌಡ್ ಸಾರಸ್ವತ್ ಜಾಂವ್ ವಾ ಕಥೊಲಿಕ್ ಜಾಂವ್ ತೆ ಎಕಾಚ್ ಮೂಳಾಚೆ ಜಾಲ್ಲ್ಯಾನ್ ಹ್ಯಾ ಲೊಕಾಮಧೆಂ ಎಕಾಮೆಕಾ ಸಮ್ಜಿಕಾಯ್ ಆಸ್ಲಲಿ. ದಾಕ್ಲ್ಯಾಕ್ 2007 ಇಸ್ವೆಂತ್ ಕೊಟೇಶ್ವರ್, ಕಾರ್ಮೆಲ್ ಅಶ್ರಮಾಂತ್ಲ್ಯಾ ಕಾರ್ಮೆಲಿತ್ ಬಾಪ್ ಸಿಲ್ವೆಸ್ಟರ್ ಪಿರೇರಾ ವಯ್ರ್ ಮತಾಂತರ್ ರ‍್ತಾ ಮ್ಹಣ್ ಹಲ್ಲೊ ಜಾಲ್ಲೊ. ಹೆಂ ವಿರೋಧ್ ಕರ್‍ನ್ 2007 ಇಸ್ವೆಚಾ ಜುಲಾಯ್ 2 ತಾರಿಕೆರ್ ಅಮಿ ಕಥೊಲಿಕಾಂನಿ ಮಂಗ್ಳೂರಾAತ್ ವ್ಹಡ್ ಪ್ರತಿಭಟನ್ ರ‍್ಯಾಲಿ ಕೆಲ್ಲಿ. ತ್ಯಾಚ್ ದೀಸ್ ಕುಂದಾಪುರಾಂತ್ ಹ್ಯಾ ಹಲ್ಲ್ಯಾಕ್ ಸಮರ್ಥನ್ ಕ್ರ‍ರ್‍ನ್ ಆರೆಸ್ಸೆಸ್ಸಾನ್ ಪ್ರತಿಭಟನ್ ರ‍್ಯಾಲಿ ಧರ‍್ಲಿ. ಕರಾವಳೆಚೆ ಬಿಜೆಪಿ ಎಮ್ಮೆಲ್ಲೆ ಪೂರಾ ಕುಂದಾಪರ‍್ಚಾ ರ‍್ಯಾಲಿಕ್ ಗೆಲ್ಲೆ. ಪುಣ್ ಮಂಗ್ಳುರ್ ದಕ್ಷಿಣಾಚೊ ಬಿಜೆಪಿ ಎಮ್ಮೆಲ್ಲೆ ಯೋಗಿಶ್ ಭಟ್ ಆಮ್ಚ್ಯಾ ರ‍್ಯಾಲಿಂತ್ ಭಾಗ್ ಘೆವ್ನ್ ಫಾ. ಸಿಲ್ವೆಸ್ಟರ್ ಪಿರೇರಾ ವಯ್ರ್ ಜಾಲ್ಲ್ಯಾ ಹಲ್ಲ್ಯಾಕ್ ಖಂಡನ್ ಕೆಲ್ಲೆಂ ತಾಣೆಂ! ಏಕ್ ನೀಜ್ ಜನಪ್ರತಿನಿಧಿನ್ ಕಶೆಂ ಆಚಾರ್ ಪಾಳಿಜೆ ಮ್ಹಣ್ ತಾಣೆಂ ರುಜು ಕೆಲೆಂ. ಹೆಂ ಏಕ್ ಮಾತ್ರ್ ಘಡಿತ್ ನ್ಹಯ್, ಆಪುಣ್ ಶಾಸಕ್ ಜಾಲ್ಲ್ಯಾ 20 ವರ‍್ಸಾಂನಿ ತಾಣೆಂ ಸಬಾರ್ ಪಾವ್ಟಿಂ ‘ರಾಜ್‌ಧರ್ಮ್’ ಕಶೆಂ ಪಾಲನ್ ಕರಿಜೆ ಮ್ಹಣ್ ತಾಣೆಂ ದೇಖ್ ದಿಲ್ಲಿ. ಪುಣ್ ಆತಾಂಚ್ಯಾ ಎಮ್ಮೆಲ್ಲೆಕ್ ‘ರಾಜ್‌ಧರ್ಮ್’ ಮ್ಹಳ್ಯಾರ್ ಕಿತೆಂ ಮ್ಹಣ್ ಕಳಿತ್ ನಾ ಮಳ್ಳೆಂಚ್ ವಿಪರ್ಯಾಸ್! ಖಂಯ್ ಪುಣಿ ಆಮ್ಚೊಚ್ ಮನಿಸ್ ಹಾಂಗಾ ಎಮ್ಮೆಲ್ಲೆ ಜಾವ್ನ್ ಆಸ್ಚ್ಯಾ ಕಾಳಾರ್ ಆನಿ ತಾಂಚೊಚ್ ಸರ್ಕಾರ್ ಅಧಿಕಾರಾಂತ್ ಅಸ್ತಾನಾ ವಿನಾಯಕ ಬಾಳಿಗಾಚಿ ಖುನಿ ಕೆಲ್ಲ್ಯಾ ಅಫ್ರಾದಿಂಕ್ ಶಿಕ್ಷಾ ಮೆಳ್ಚೆಬರಿ ಕೆಲ್ಲೆಂ ತರ್ ಆಜ್ ಮಂಗ್ಳುರಾಂತ್ ಅಸಲೊ ಏಕ್ ಗೂಂಡಾ ಎಮ್ಮೆಲ್ಲೆ ಭಿಲ್ಕುಲ್ ಜಾತೊ ನಾ!

ಆಮ್ಚಿ ಸಂಘಟಣಾಂ ನಿಷ್ಕ್ರೀಯ್? ಮುಖೆಲಿ ಮೌನ್!

ಆತಾಂ ಪ್ರಮುಖ್ ಜಾವ್ನ್ ಚರ್ಚೆರ್ ಆಸ್ಚೊ ವಿಶಯ್ ಮ್ಹಳ್ಯಾರ್, ಮಂಗ್ಳುರಾಂತ್ ಆಮ್ಚ್ಯಾ ಸಂಸ್ಥ್ಯಾಂ ವಯ್ರ್ ಇತ್ಲೊ ವ್ಹಡ್ ಹಲ್ಲೊ ಜಾತಾನಾ ಕಿತ್ಯಾಕ್ ಆಮ್ಚೆ ಮುಖೆಲಿ ಆನಿ ಸಂಗಟಣಾಂ ಮೌನ್ ಆಸಾತ್! ಟಿಪ್ಪುಚಾ ಕಾಳಾರ್ ಆಮ್ಚೆ ವಯ್ರ್ ಹಲ್ಲೊ ಜಾಲ್ಲ್ಯಾ ವೆಳಾರ್ ಆಮ್ಚ್ಯಾ ತರ್ನಾಟ್ಯಾಂನಿ ಕಸ್ಲೆಂ ಶೌರ್ಯ್ ದಾಖಯ್ಲೆಂ ಮ್ಹಣ್ ಇತಿಹಾಸಾಚ್ಯಾ ಪಾನಾಂನಿ ಆಸಾ. ಆಮಿ ಟಿಪ್ಪುಚ್ಯಾ ಕಾಳಾಕ್ ಚಲ್ಚೆಂ ನಾಕಾ. ೨೦೦೬ ಇಸ್ವೆಂತ್ ಕುಲ್ಶೇಕರ್ ‘ಆಶಿರ್ವಾದ್’ ಹೊಟೆಲಾಂತ್ ಭೀಪ್ ವಿಕ್ತಾತ್ ಮ್ಹಣ್ ಬಜರಂಗ್ ದಳಾಚ್ಯಾನಿ ಧಾಡ್ ಘಾಲ್ತಾನಾ, ಹಜಾರೊಂ ಆಮ್ಚ್ಯಾ ತರ್ನಾಟ್ಯಾಂನಿ ಥಂಯ್ ಜಮೊ ಜಾವ್ನ್ ಪ್ರತಿಭಟನ್ ಕೆಲ್ಲೆಂ. 2008 ಇಸ್ವೆಚಾ ಸಪ್ತೆಂಬರ್ ಮ್ಹಯ್ನ್ಯಾಂತ್ ಆಮ್ಚ್ಯಾ ಇಗರ್ಜಾಂಚೆರ್ ಹಲ್ಲೊ ಜಾತಾನಾ ಖಂಯ್ಚ್ಯಾಯ್ ಮುಕೆಲ್ಯಾಚಿ ಹುಕುಮ್ ನಾಸ್ತಾನಾ ಹಜಾರೊಂ ಲೋಕ್ ಜಮೊ ಜಾಲೊ ಆನಿ ದೋನ್ ದೀಸ್ ಮಂಗ್ಳುರ್ ಶಹರ್, ಬಿದ್ರ್ಯಾಂ ಪೇಂಟ್, ಕಾರ್ಕೊಳ್ ಪೇಂಟ್, ಬಂಟ್ವಾಳ್ ಪೇಂಟ್ ಬಂಧ್ ಕರುಂಕ್ ಸಕ್ಲೊ. ತೆನ್ನಾ ಡೆಲ್ಲಿ ಥಾವ್ನ್ ಪ್ರಧಾನಿನ್ ಕರ್ನಾಟಕಾಚಾ ಮುಖೆಲ್ ಮಂತ್ರಿಕ್ ತಶೆಂ ರಾಜ್ಯಪಾಲಕ್ ಕೊಲ್ ರ‍್ನ್ ಪರಿಸ್ಥಿತಿ ನಿಯಂತ್ರಣಾಕ್ ಹಾಡುಂಕ್ ಸಾಂಗ್ಲೆಂ. ಹಿ ರಾಶ್ಟ್ರ್ ಮಟ್ಟಾರ್ ಖಬರ್ ಜಾವ್ನ್ ಮಂಗ್ಳುರಾಂತ್ಲೊ ಕ್ರಿಸ್ತಾಂವ್ ಲೋಕ್ ಇತ್ಲೊ ಪ್ರಬಾವಿಗೀ? ಮ್ಹಣ್ ದೆಶಾಂತ್ ಚರ್ಚಾ ಜಾಲ್ಲಿ! ಇತ್ಲಿ ಕ್ಯಾಪೆಸಿಟಿ ಆಸ್ಚೊ ಆಮ್ಚೊ ಲೋಕ್, ಮುಖೆಲಿ ಹ್ಯಾ ಪಾವ್ಟಿಂ ಕಿತ್ಯಾಕ್ ಮೌನ್ ಜಾಲೆ? ಆಮ್ಚಿಂ ಸಂಗಟನಾಂ ಕಿತ್ಯಾಕ್ ನಿಷ್ಕ್ರೀಯ್ ಜಾಲಿಂ? ಮುನೀರ್ ಕಾಟಿಪಳ್ಳ, ಎಮ್‌ಜಿ ಹೆಗ್ಡೆ, ದಿನೇಶ್ ಹೆಗ್ಡೆ, ಸುದೀರ್ ಕುಮಾರ್ ಮರೋಳಿ, ಶಶಿಧರ್ ಹೆಮ್ಮಾಡಿ ತಸಲ್ಯಾ ಮಾನೆಸ್ತಾಂನಿ ಆಮ್ಚೆ ಬಾಬ್ತಿನ್ ಕಿತ್ಯಾಕ್ ಉಲಯ್ಜೆ ಪಡ್ಲೆಂ ಆನಿ ಮುಸ್ಲಿಮಾಂಚ್ಯಾ ವಾರ್ತಾಭಾರತಿ ತಸ್ಲ್ಯಾ ಮಿಡಿಯಾನ್ ಆಮ್ಕಾಂ ತೆಂಕೊ ಕಿತ್ಯಾಕ್ ದಿಜೆ ಪಡ್ಲೊ? ಅಮ್ಚಿಂಚ್ ಮ್ಹಣ್ ಆಸ್ಚಿಂ ಮಾಧ್ಯಮಾಂ ಕಣ್ಣ್’ಕಟ್ಟ್ ಖೆಳ್ತಾತ್ ಕಿತ್ಯಾಕ್? 

ಹೆಂ ಕಿತ್ಯಾಕ್ ಅಶೆಂ ಘಡ್ಲೆಂ ಮ್ಹಣ್ ವಿಶ್ಲೇಶಣ್ ಕೆಲ್ಯಾರ್ ಅದ್ಲ್ಯೊ ಯಾದಿ ಉಡಾಸಾಕ್ ಯೆತಾತ್. ಸೆಕ್ಷನ್ 144 ಆಸ್ತಾನಾ ತೆಂ ಉಲ್ಲಂಘನ್ ಕೆಲಾಂ ಮ್ಹಣ್ 2008 ಇಸ್ವೆಂತ್ ಸಭಾರ್ ತರ್ನಾಟ್ಯಾಂಚೆರ್ non bailable ಸೆಕ್ಷನ್ ಘಾಲ್ನ್ ಬಳ್ಳಾರಿ ಜೈಲಾಕ್ ದಾಡ್ಲೆಂ. ಆಮ್ಚ್ಯಾ ಜಣಾಂ ವಯ್ರ್ ವ್ಹಡ್ ಪ್ರಮಾಣಾಂತ್ ಲಾಟಿ ಚಾರ್ಜ್ ಜಾಲಿ. ಆಮ್ಚ್ಯಾ ತರ್ನಾಟ್ಯಾಂಕ್ ಕಶೆಂ ಸೊಡೊಂವ್ಚೆಂ, ತಾಂಕಾಂ ಕಶೆಂ ಕಾಯ್ದ್ಯಾಚೊ ಆಧಾರ್ ದಿಂವ್ಚೊ – ಹ್ಯೆವಿಶಿಂ ಆಮ್ಚೆಕಡೆ ಕಸ್ಲೆಂಯೀ ಪ್ಲ್ಯಾನ್ ನಾತ್ಲಲೆಂ. ತ್ಯಾ ವೆಳಾರ್ ಸೆಂಟ್ರಾಲಾಂತ್ ಕೊಂಗ್ರೆಸ್ ಸರ್ಕಾರ್ ಆಸ್ಲ್ಯಾರೀ, ರಾಜ್ಯಾಂತ್ ಬಿಜೆಪಿ ಸರ್ಕಾರ್ ಆಸ್ಲೊ. ಸೆಂಟ್ರಲಾಂತ್ ಅಮ್ಚೆಚ್ ಸಮುದಾಯೆಚೆ ಪ್ರಭಾವಿ ವೆಕ್ತಿ ಆಸ್ಲ್ಯಾರೀ ಆಮ್ಚ್ಯಾ ತರ್ನಾಟ್ಯಾಂಕ್ ಮುಕ್ತಿ ದಿಂವ್ಕ್ ತೆ ಸಕೊಂಕ್ ನಾಂತ್. ಉಪ್ರಾಂತ್ ಹಿ ಜವಾಬ್ದಾರಿ ಆಮಿ ಆಮ್ಚ್ಯಾ ಸಮಾಜೆಚಾ ಫಾಮಾದ್ ಉದ್ಯಮಿ ತಶೆಂ ‘ದಾನಿ’ ಕ್ ದಿಲಿ. ಹೊ ದಾನಿ ಕಲ್ಲಡ್ಕ ಭಟ್, ಜನಾರ್ಧನ್ ರೆಡ್ಡಿ, ಮುರುಗೇಶ್ ನಿರಾಣಿ ತಸ್ಲ್ಯಾಂ ಕಡೆ ಕೇಸ್ ಪಾಟಿಂ ಕಾಡಾ ಮ್ಹಣ್ ವಿನವ್ಣಿ ಕರ‍್ನ್ ಆಸ್ಲಲೊ. ಉಪ್ರಾಂತ್ ಕೊಂಕಣಿ ಸಮ್ಮೇಳನ್ ರ‍್ನ್ ತ್ಯಾ ಸಮ್ಮೇಳನಾಕ್ ಲಾಲ್ ಕೃಷ್ಣ ಅಡ್ವಾನಿಕ್ ಆಪೊವ್ನ್ ತಾಚೆಕಡೆಯೀ ಕೇಸ್ ಪಾಟಿಂ ಕಾಡಾ ಮ್ಹಣ್ ಭಿಕ್ ಮಾಗ್ಚಿ ವೆವಸ್ಥಾ ಜಾಲಿ. ಅಂತಿಮ್ ಜಾವ್ನ್ ಪುತ್ತೂರಾಂತ್ ಆಸ್ಚ್ಯಾ ಆಮ್ಚ್ಯಾ ಸಾಂ ಫಿಲೊಮಿನಾ ಕೊಲೆಜಿಂತ್ ಶಿಕ್ಲಲೊ ಸದಾನಂದ್ ಗೌಡ ಕರ್ನಾಟಕಾಚೊ ಮುಖೆಲ್ ಮಂತ್ರಿ ಜಾಲ್ಯಾ ಉಪ್ರಾಂತ್ ತಾಣೆಂ ಹ್ಯೊ ಕೆಜಿ ಪಾಟಿಂ ಕಾಡ್ಲ್ಯೊ. ಹಿಂ ಘಡಿತಾಂ ಪಳೆವ್ನ್ ಕಲ್ಲಡ್ಕ ಪ್ರಭಾಕರ್ ಭಟ್ ಆಮ್ಕಾಂ ಕೊಮಿಡಿ ಕರ‍್ನ್ ‘ಕೇಸ್ ಪಿರಾ ದೆಪ್ಪುಲೆ ಪಂಡದ್ ಎಂಕಲ್ನಾನೆ ಕಾರ್ ಪತ್ತದೆರ್’ ಮ್ಹಣೊನ್ ಗೆಲ್ಲೆಕಡೆ ಪೂರಾ ಸಾಂಗೊನ್ ಭಂವ್ತಾಲೊ. ಕ್ರಿಸ್ತಾವಾಂಕ್ ಕೊಂಗ್ರೆಸ್ ಮಾತ್ರ್ ವಿಂಚವ್ಣ್ ಆಸೊಂಕ್ ನಜೊ ಆನಿ ಬಿಜೆಪಿಂತ್‌ಯೀ ಆಸಾಜೆ ಮ್ಹಳ್ಳೊ ಹೊ ‘ದಾನಿ’ ಆಜ್ ಅದಾನಿ ಆನಿ ಪ್ರದಾನಿ ಸಾಂಗಾತಾ ಬಿಜ್ನೆಸ್ ರ‍್ನ್ ಆಸಾ. ಹಿಂದೂ ಸಂಗಟಣಾಂತ್ ಆಸ್ಚ್ಯಾ ತರ್ನಾಟ್ಯಾಂಕ್ ಕೆಜಿ ಝುಜೊಂಕ್ ಮ್ಹಣ್ ತಾಂಚೆಕಡೆ ವಕೀಲಾಂಚಿ ವೆವಸ್ಥಾ ಆಸಾ. ಜೈಲಾಕ್ ಗೆಲ್ಯಾರ್ ತಾಂಚಾ ಘರಾ ಕುಮೊಕ್ ಕರ‍್ಚಿ ವೆವಸ್ಥಾ ಆಸಾ. ಆಮ್ಚ್ಯಾ ತರ್ನಾಟ್ಯಾಂಕ್ ಹಿ ಸವ್ಲತ್ ನಾ. ಆಮ್ಚೆ ತರ್ನಾಟೆ ಆತಾಂ ಅಮೆರಿಕಾ, ಕೆನಡಾ, ಯುಕೆ ವಚುಂಕ್ ಮ್ಹಣ್ ಮಾತ್ರ್ ಶೆವಟ್ ಧರ‍್ನ್ ಆಸಾತ್. ಹೆಣೆಂ ಕೆಜಿ ಘಾಲ್ಯಾರ್ ಮಾಗಿರ್ ತಾಂಕಾA ದೇಶ್ ಸೊಡುಂಕ್ ಜಾಯ್ನಾ ಮ್ಹಣ್ ಭಿರಾಂತ್ ಆಸ್ತಾ. ತಶೆಂ ಜಾವ್ನ್ ಅಮ್ಕಾಂ ಹೆಂ ಕಿತ್ಯಾಕ್ ಮ್ಹಣ್ ಸಬಾರ್ ಮೌನ್ ಜಾಲೆ!

ಪುಡೆಂ ಆಮಿ ಕಸ್ಲಿ ಜಾಗ್ರುತ್ಕಾಯ್ ಘೆಜೆ?

ಹಿಂದುತ್ವವಾದಿಂಕ್ ಆಮ್ಚ್ಯಾ ಶಿಕ್ಪಾ ಸಂಸ್ಥ್ಯಾಂಚೆರ್ ವ್ಹಡ್ ದೊಳೊ ಆಸಾ. ಮಂಗ್ಳುರ್ ಜಾಂವ್, ಬೆಂಗ್ಳುರ್, ಶಹರಾಚ್ಯಾ ಪ್ರಧಾನ್ ಜಾಗ್ಯಾರ್ ಆಮ್ಚಿಂ ವ್ಹಡ್ ಬಿಲ್ಡಿಂಗಾಂ ಆನಿ ಸಂಸ್ಥೆ ಆಸಾತ್. ತೊ ತಾಂಚೊ ಜಾಗೊ ಆನಿ ಬ್ರಿಟಿಶಾಂನಿ ಆಮ್ಕಾಂ ದಿಲಾ ಮ್ಹಣ್ ತೆ ಪ್ರೊಪಾಗೆಂಡಾ ಪಾತ್ಳಾವ್ನ್ ಆಸಾತ್. ಪುಡ್ಲ್ಯಾ ದಿಸಾಂನಿ ತಾಣಿಂ ಆಮ್ಚೆ ವಯ್ರ್ ನಿಶಾನಿ ದರ‍್ಚೆಂ ಪಕ್ಕಾ. ತಶೆಂ ಜಾವ್ನ್ –

1. ಆಮಿ ಆಮ್ಚ್ಯಾ ಸಂಸ್ಥ್ಯಾAತ್ ವಿದ್ಯಾರ್ಥಿಂಕ್ ಪ್ರವೇಶ್ ದಿತಾನಾ, ಆಮ್ಚೊ ರೆಗ್ರೊ ಕಿತೆಂ ಮ್ಹಣ್ ತಾಂಕಾ ಕಳಿತ್ ಕರಿಜೆ.

2. ಕ್ಲಾಸಿಂನಿ ಸಂವೇದನಾಶೀಲ್ ವಿಶಯ್ ಬೋಧನ್ ಕರುಂಕ್ ಆಸ್ತನಾ ತೆ ಕಶೆ ಭೋಧನ್ ಕರಿಜೆ ಆನಿ ಕಸಲ್ಯಾ ಉತ್ರಾಂನಿ ವಿದ್ಯಾರ್ಥಿಂಕ್ ಸಾಂಗಿಜೆ ಮ್ಹಣ್ ಶಿಕ್ಷಕಾಂನಿಯ್ ರ‍್ಯೊ ವಾಟೊ ವಿಂಚಿಜೆ.

3. ಕ್ಲಾಸಿಂತ್ ಸಿಸಿಟಿವಿ ಕ್ಯಾಮೆರಾ ವಿಥ್ ಆಡಿಯೊ ರೆಕೊರ್ಡಿಂಗ್ ಆಮ್ಚ್ಯಾ ಹರೇಕಾ ಇಸ್ಕೊಲಾಂತ್ ಬಸಯ್ಜೆ. ಕಿತ್ಯಾಕ್ ಮ್ಹಳ್ಯಾರ್ ವಿವಾದ್ ಜಾಲ್ಯಾರ್ ಕಿತೆಂ ಭೋಧನ್ ಕೆಲಾಂ ಮ್ಹಣ್ ದುದಾಚೆಂ ದೂದ್, ಉದ್ಕಾಚೆಂ ಉದಕ್ ಲೇಕ್ ದಿವ್ಯೆತ್. ಪುನ್ಯಾನ್ ಕೊಂಗ್ರೆಸ್ ಸರ್ಕಾರ್ ಆಸ್‌ಲ್ಲಾ÷್ಯನ್ ಜಾಲೆಂ. ನಾತ್ಲ್ಯಾರ್ ಮತಾಂತರ್ ನಿಶೇದ್ ಕಾಯ್ದ್ಯಾಚೆಂ ಸೆಕ್ಷನ್ ಘಾಲ್ನ್ ಸಿಸ್ಟರಿಕ್ ಭಿತರ್ ಘಾಲ್ತೆ ಆಸ್ಲೆ.

4. ಸರ್ಕಾರ್ ಯೆತಾತ್ ಆನಿ ಸರ್ಕಾರ್ ಚಲ್ತಾತ್. ಪುಣ್ ನಿತಿ ವ್ಯವಸ್ಥಾ ಜೊಕ್ತಿ ಆಸ್ಲ್ಯಾರ್ ಪ್ರಜಾಪ್ರಭುತ್ವಾಂತ್ ಭಿಯೆಜೆ ಮ್ಹಳ್ಳಿ ಗರ್ಜ್ ನಾ. ಪುಣ್ ವಿಪರ್ಯಾಸ್ ಕಿತೆಂ ಮ್ಹಳ್ಯಾರ್ ಸಕಯ್ಲಿ ಕೋಡ್ತ್, ಹೈಕೊಡ್ತ್ ತಶೆಂಚ್ ಸುಪ್ರಿಂ ಕೊಡ್ತಿ ಮ್ಹಣಾಸರ್ ಆರೆಸ್ಸೆಸ್ ಐಡಿಯಾಲೊಜಿ ವಯ್ರ್ ಸಹನೂಭೂತಿ ಆಸ್ಚೆ ಜಡ್ಜ್ ಆಸಾತ್. ಆತಾಂ ಎಮ್ಮೆಲ್ಲೆಚೆರ್ ಕೇಜ್ ಘಾಲ್ಯಾ ಮ್ಹಳ್ಳೊ ಮ್ಹಳ್ಳೊ ವ್ಹಡ್ ವಿಶಯ್ ನ್ಹಯ್. ತುಮಿ ಪಾಟ್ಲೊ ದತ್ತಾಂಶ್ ಪಳಯ್ಲ್ಯಾರ್ ಅಸ್ಲಿಂ ಕಿತ್ಲಿಂಗೀ FIR -ಂಕ್ ಹೈಕೊಡ್ತಿನ್ ವಜಾ ಕೆಲಾಂ. ಪುಣ್ ಆಮ್ಚೆ ವಯ್ರ್ ಫಿರ್ಯಾದ್ ಆಸ್ಲ್ಯಾರ್ ಹ್ಯೊ ಕೋಡ್ತಿ ಆಮ್ಕಾಂ ಸಡಿಲಾಯ್ ದಿನಾಂತ್. ಕಲ್ಲಡ್ಕ ಪ್ರಭಾಕರ್ ಭಟ್ ವಯ್ರ್ ಕೊಡ್ತಿಂನಿA ದಾಕಂವ್ಚಿ ದಯಾ ಸ್ಟ್ಯಾನ್ ಸ್ವಾಮಿ ತಸ್ಲ್ಯಾಂ ವಯ್ರ್ ಆಸನಾ. ತಶೆಂ ಜಾವ್ನ್ ಆಮ್ಚ್ಯಾ ಸಮುದಾಯೆಕಡೆ ಇಗರ್ಜೆ ಭಾಯ್ಲೆಂ ಏಕ್ ಸಂಗಟನ್ ಆಸಾಜೆ.

ಕಥೊಲಿಕ್ ಸಭಾ ಆತಾಂ ‘ಆತ್ಮಿಕ್ ನಿರ್ದೇಶಕ್’ ಆಸೊನ್ ಫಿರ್ಗಜೆಚೊ ಭಾಗ್ ಜಾಲ್ಲ್ಯಾ. ಕೇರಳಾಂತ್ ಹ್ಯಾ ಬಜರಂಗದಳ ಬರಿ ಆಸ್ಚೆಂ ಕ್ಯಾಸಾ Christian Association & Alliance for Social Action (CASA) ಮ್ಹಳ್ಳೆಂ ಲಾಯಿಕ್ ಸಂಘಟನ್ ಆಸಾ. ಕ್ರಿಸ್ತಾಂವ್ ವಿರೋಧ್ ಸಂಗ್ತಿ ಘಡ್ತಾನಾ ತೆ ಸಕ್ರೀಯ್ ಜಾವ್ನ್ ಭಾಗ್ ಘೆತಾತ್. ಆಮ್ಚೆಕಡೆಯೀ ಅಸಲೆಂ ಏಕ್ ಸಂಘಟನ್ ಕರುಂಕ್ ಲಾಯಿಕಾಂನಿ ಪ್ರಯತ್ನ್ ಕರಿಜೆ. ತ್ಯಾ ಸಂಗಟಣಾಂತ್ ಬಲಿಶ್ಟ್ ಲೀಗಲ್ ಟೀಮ್ ಆಸಾಜೆ. ಖಂಯ್ಚೊಯ್ ಉದ್ಯಮಿ ವಾ ದಾನಿಕ್ ಪಾತ್ಯೆವ್ನ್ ಆಸ್ಚಿಂ ಸಂಗಟನಾಂ ಕೆಲ್ಯಾರ್ ತಿ ವಿಫಲ್ ಜಾತಾತ್. ಲಾಯಿಕಾನಿ ಸಾಂಗಾತಾ ಮೆಳೊನ್ ಹೆಂ ಬಾಂದಿಜೆ. ಸಾಂಗಾತಾ ಹ್ಯಾ ಸಂಗಟಣಾಕ್ ಮಿಡಿಯಾ ಮ್ಹಳ್ಳೊ ಪಾಕಾಟೊ ಆಸಾಜೆ.

5. ಅನ್ಯೇಕ್ ಸಂಗತ್ ಮ್ಹಳ್ಯಾರ್ ಪುಡ್ಲ್ಯಾ ದಿಸಾಂನಿ ಆಮ್ಚ್ಯಾ ಸಂಅಸ್ಥ್ಯಾಂತ್ ಆಮ್ಚ್ಯಾ ಲೊಕಾಕ್ ಉಣ್ಯಾ ಮೊಲಾಕ್ ಚಡಿತ್ ಬಸ್ಕಾ ಮೆಳ್ಚೆಬರಿ ಕರಿಜೆ.

ಜೆರೊಸಾಂತ್ ಜಾಲ್ಲೆಂ ಘಡಿತ್ ಏಕ್ ಟ್ರೇಲರ್ ಮಾತ್ರ್. ಹೆಂ ಘಡಿತ್ ಆಮ್ಕಾಂ ಸಬಾರ್ ಲಿಸಾಂವಾ ಶಿಕಯ್ತಾ. ಹಿಂ ಲಿಸಾಂವಾA ಶಿಕೊನ್ ಆಮಿ ಪುಡ್ಲ್ಯಾ ದಿಸಾಂಕ್ ಚತ್ರಾಯ್ ಘೆಂವ್ಚಿ ಅನಿವಾರ್ಯ್!

✍️ – ಪ್ರಮೋದ್ ರೊಡ್ರಿಗಸ್