📰 ಯುಪಿ, ಫೆಬ್ರವರಿ 05: ದುಬ್ಳ್ಯಾ ದಲಿತಾಂಕ್ ಭುಲವ್ನ್ ಮತಾಂತರ್ ಕರಯ್ಲಾಂ ಮ್ಹಳ್ಳ್ಯಾ ಆರೊಪಾಚೆರ್ ಹಿಂದೂ ಮತೀಯ್ ವಾದಿಂಚ್ಯಾ ವೊತ್ತಾಯೆಕ್ ಲಾಗೊನ್ ಉತ್ತರ್ ಪ್ರದೇಶಾಂತ್ ಎಕಾ ಕಥೊಲಿಕ್ ಯಾಜಕಾಸಾಂಗಾತಾ 6 ಕ್ರಿಸ್ತಾಂವಾಂಕ್ ಪೊಲಿಸಾಂನಿ ಕಯ್ದ್ ಕೆಲ್ಲೆಂ ಘಡಿತ್ ಫೆಬ್ರವರಿ 05 ವೆರ್ ಉಗ್ತಾಡಾಕ್ ಆಯ್ಲಾಂ. ಮಾಗ್ಣ್ಯಾಕ್ ಜಮ್ಲೆಲ್ಯಾ ಸ್ತ್ರಿಯಾಂಚೆರ್ ಹಲ್ಲೊ ಕೆಲ್ಲೊ ಮಾತ್ರ್ ನ್ಹಯ್, ಪೊಲಿಸ್ ಸ್ಟೇಶನಾಮುಕಾರ್ ಬಸೊನ್ ಕಥೊಲಿಕ್ ಯಾಜಕಾಕೀ ಕಯ್ದ್ ಕರುಂಕ್ ಹಿಂದು ಪಂಗ್ಡಾನ್ ಪೊಲಿಸಾಂಚೆರ್ ದಬಾವ್ ಘಾಲ್ಲೊ ದಿಸೊನ್ ಯೆತಾ.

ಮತಾಂತರ್ ಆರೋಪ್ ಆಸೊನ್ ಕಯ್ದ್ ಜಾಲ್ಲ್ಯಾಂ ಪಯ್ಕಿ ಬಾಪ್ ಡೊಮಿನಿಕ್ ಪಿಂಟೊ, ಮುಳಾನ್ ಮಂಗ್ಳುರಾಚ್ಯಾ ಬಜ್ಪೆಚೊ, ಲಕ್ನೊ ದಿಯೆಸೆಜಿಂತ್ ಯಾಜಕ್ ಜಾವ್ನಾಸೊನ್ ದಿಯೆಸೆಜಿಚ್ಯಾ ಗೊವ್ಳಿಕ್ ಕೇಂದ್ರಾಂತ್ ಸೆವಾ ದೀವ್ನ್ ಆಸ್ಲೊ.  ದಿಯೆಸೆಜಿಚ್ಯಾ ಗೊವ್ಳಿಕ್ ಕೇಂದ್ರಾಂತ್ ಪ್ರೊಟೆಸ್ಟಂಟ್ ಪಂಗ್ಡಾಂಕ್ ಮಾಗ್ಣ್ಯಾಕ್ ಜಾಗೊ ಕರ್‍ನ್ ದಿಂವ್ಚಿ ವ್ಯವಸ್ಥಾ ಆಸಾ ಜಾಲ್ಲ್ಯಾನ್ ಪೆಂತೆಕೊಸ್ತಲ್ ಪಂಗ್ಡಾಚೆ ಪಾಸ್ಟರ್ ತಾಂಚ್ಯಾ ಕ್ರಿಸ್ತಾಂವ್ ಪಂಗ್ಡಾ ಸಾಂಗಾತಾ ಮಾಗ್ಣ್ಯಾಖಾತಿರ್ ಗೊವ್ಳಿಕ್ ಕೇಂದ್ರಾಂತ್ ಸಾಂಗಾತಾ ಮೆಳ್’ಲ್ಲೆ. ಮಾಗ್ಣ್ಯಾಕ್ ಜಾಗೊ ದಿಲ್ಲೊ ಆಸೊನ್ ಮತಾಂತರಾಕ್ ಕುಮೊಕ್ ಕೆಲ್ಯಾ ಮ್ಹಳ್ಳೊ ಆರೋಪ್ ಬಾಪ್ ಡೊಮಿನಿಕ್ ಪಿಂಟೊಚೆರ್ ಥಾಪ್ಲಾ.

ಆಪ್ಣಾಕ್ ಕ್ರಿಸ್ತ್ ಭಕ್ತ್ ಮ್ಹಣ್ ವ್ಹಳ್ಕುಂಚೆ ಜಾಯ್ತೆ ಜಣ್ ಬಾಪ್ತಿಜ್ಮ್ ಘೆನಾಸ್ತಾನಾಂಚ್ ಕ್ರಿಸ್ತಾಕ್ ಪಾಟ್ಲಾವ್ ಕರ್‍ಚೆ ಉತ್ತರ್ ಪ್ರದೇಶಾಂತ್ ಆಸಾತ್. ತಸಲ್ಯಾಂಚೊ ಸಂಖೊ ವ್ಹಡ್ ಆಸಾ ತರೀ ತಾಂಚಿ ವ್ಹಳಕ್ ತೆ ಭಾಯ್ರ್ ಜಾಹಿರ್ ಕರಿನಾಸ್ತಾಂ ಕ್ರಿಸ್ತಾಚೊ ಪಾಟ್ಲಾವ್ ಕರ್‍ತಾತ್ ಮಾತ್ರ್ ನ್ಹಯ್ ಮಾಗ್ಣ್ಯಾಖಾತಿರ್ ತೆ ಗುಪಿತ್ ಜಾಗ್ಯಾಂನಿ ಸಾಂಗಾತಾ ಮೆಳ್ತಾತ್. “ಹಾಂಚೆರ್ ದೊಳೊ ದವರ್ನ್ ಆಸ್ಲೆಲ್ಯಾ ಹಿಂದು ಮತೀಯ್ ಪಂಗ್ಡಾಚ್ಯಾನೀ ಗೊವ್ಳಿಕ್ ಕೇಂದ್ರಾಂತ್ ಮಾಗ್ಣ್ಯಾಕ್ ಜಮ್ಲೆಲ್ಯಾಂಕ್ ಕ್ರಿಸ್ತ್ ಭಕ್ತ್ ಮ್ಹಣ್ ಸಮ್ಜೊನ್ ಎಕಾಎಕಿ ಧಾಡ್ ಘಾಲ್ನ್, ಬಾಪ್ ಡೊಮಿನಿಕಾಕ್ ಆರೆಸ್ಟ್ ಕರಂವ್ಚ್ಯಾಂಕ್ ಯಶಸ್ವಿ‌ ಜಾಲ್ಯಾತ್” ಮ್ಹಣ್ ದಿಯೆಸೆಜಿಚೆ ಚಾನ್ಸಲರ್ ಬಾಪ್ ಡೊನಾಲ್ಡ್ ಡಿ ಸೋಜಾನ್ ಕಳಯ್ಲಾಂ.

ಉತ್ತರ್ ಪ್ರದೇಶಾಂತ್ ಮತಾಂತರ್ ವಿರೋಧಿ ಕಾಯ್ದೊ‌ ಮುಕಾರ್ ದವ್ರುನ್ ಕ್ರಿಸ್ತಾಂವಾಚೆರ್ ವ್ಯವಸ್ತಿತ್ ಧಾಡ್ ಘಾಲ್ಚ್ಯಾಂತ್ ಮತೀಯ್ ವಾದಿ ಜಿಕ್ಲ್ಯಾತ್. ಹ್ಯಾಚ್ ವರ್ಸಾ ಫಕತ್ 2 ಮ್ಹಯ್ನ್ಯಾಂ ಭಿತರ್ 26 ಕ್ರಿಸ್ತಾಂವಾಂಕ್ ಮತಾಂತರ್ ವಿರೋಧಿ ಕಾಯ್ದ್ಯಾಖಾಲ್ ಕಯ್ದ್ ಕೆಲಾಂ. ಆರೋಪ್ ಚುಕಿಚೊ ಮ್ಹಣ್ ರುಜು ಕರುಂಕ್ ಚುಕ್ಲ್ಯಾರ್ 10 ವರ್ಸಾಂ ಜಯ್ಲ್ ಆನಿ‌ ಜುಲ್ಮಾನ್ ಭರ್‍ಚಿ ಪಡ್ತೆಲಿ.