📽️ ‘ಲಕ್ಕಿ ಡ್ರಾ 777’

2023 ಸಪ್ಟೆಂಬರಾಂತ್ ಮೊಕ್ಳಿಕ್ ಜಾಲ್ಲೆಂ ರಾಯನ್ ಮ್ಯಾಗ್ನಿಟೊಚೆಂ ಪಯ್ಲೆಂ ಕೊಂಕ್ಣಿ ಫಿಲ್ಮ್ ‘ಲಕ್ಕಿ ಡ್ರಾ 777’ ಆಯ್ಲೆವಾರ್ ಕೆನಡಾಂತ್ ಪ್ರದರ್ಶನ್ ಜಾವ್ನ್ ಪಯ್ಲ್ಯಾ ಜಾಗತಿಕ್ ಪ್ರದರ್ಶನಾಕ್ ಸಾಕ್ಸ್ ಜಾಲೆಂ. ಆಪ್ಲೆ ಅಮಿಗ್ ಕೆಲ್ವಿನ್ ಸಲ್ಡನ್ಹಾ ಆನಿ ಜೊಯೆಲ್ ರೊಡ್ರಿಗಸ್ ಸವೆಂ ‘ಟ್ರೆಂಡಿಂಗ್ ಶೀಲ್ಡ್ ಟಿವಿ’ ಯೂಟ್ಯೂಬ್ ಚ್ಯಾನೆಲ್ ಸಾತ್ ವರ್ಸಾಂ ಆದಿ ಸುರ್ವಾತ್ ಕರುನ್ ಲ್ಹಾನ್ ವ್ಹಡ್ ಹಾಸ್ಕುಳೆ ವಿಡಿಯೋ ಲೊಕಾಕ್ ಫುಂಕ್ಯಾಕ್ ಪಳೆಂವ್ಕ್ ದೀವ್ನ್ ಜೊಡ್ಲೆಲ್ಯಾ ಅನ್ಭೋಗಾನ್, ಆಪ್ಲೆಂ ಪಯ್ಲೆಂ ಪ್ರೇತನ್; ಸ್ವಂತ್ ಬರವ್ನ್ ನಿರ್ದೇಶನ್ ದೀವ್ನ್ ಎಡಿಟಿಂಗ್’ಯ್ ಕರ್ನ್ ಧೊವ್ಯಾ ಪಡ್ದ್ಯಾರ್ ಪರ್ಜಳಾಯ್ಲೆಂ ಫಿಲ್ಮ್ಂಚ್ ‘ಲಕ್ಕಿ ಡ್ರಾ 777’.

ಕೊಂಕ್ಣಿ ಫಿಲ್ಮ್ ಕರಿಜಾಯ್ ಮ್ಹಳ್ಳೆಂ ರಾಯನಾಚೆಂ ಸ್ವಪಾಣ್ ಆಸ್ಲೆಂ ಆನಿ ಬರ‍್ಯಾ ಫುಡಾರಾಖಾತಿರ್ ಜೊಯೆಲ್ ಪರ್ಗಾಂವಾಂಕ್ ಗೆಲ್ಯಾರೀ ಆಶಾ ಸಾಂಡಿನಾಸ್ತನಾ, ಏಕ್ ತಾಲೆಂತ್ವಂತ್ ತರ್ನಾಟ್ಯಾಂಚೆ ಟೀಮ್ ಭಾಂದುನ್ ಭೋವ್’ಚ್ ಲ್ಹಾನ್ ಬಜೆಟಿರ್ ಏಕ್ ಅಪುರ್ಬಾಯೆಚೆಂ ಫಿಲ್ಮ್ ಉಭಾರ್ಲೆಲಿ ಕೀರ್ತ್ ರಾಯನಾಕ್ ಫಾವೊ ಜಾತಾ. ಅಂತರಾಶ್ಟ್ರೀಯ್ ಲೊಕಾಮೊಗಾಳ್ ನಟಿ ಮಾನೇಸ್ತೀಣ್ ಲೂಸಿ ಲೋಬೊ ಆರಾನ್ಹಾ ಸವೆಂ ಬರ್ಪಿ ಆನಿ ಕಾರ್ಯೆಂ ನಿರ್ವಾಹಕ್ ಜಾವ್ನಾಸ್ಚೊ ಮೆಲ್ವಿನ್ ಪೆರ್ನಾಲ್ ಹಾಂಚೊ ಪಾಟಿಂಬೊ ಘೆವ್ನ್ ಆಪ್ಲ್ಯಾ ಸ್ವಂತ್ ಆದಾಯ್ ಆನಿ ಥೊಡ್ಯಾ ಬರ‍್ಯಾ ಮನಾಚ್ಯಾ ವ್ಯಕ್ತಿಂಚ್ಯಾ ಆಧಾರಾನ್ ರಾಯನಾನ್ ಹೆಂ ಫಿಲ್ಮ್ ಉಭೆಂ ಕೆಲಾಂ.

ರಾಯನ್ ಮ್ಯಾಗ್ನೆಟೊನ್ ಕಾಣಿ ಬರವ್ನ್, ನಿರ್ದೇಶನ್ ಆನಿ ಏಡಿಟಿಂಗ್ ಸವೆಂ ಏಕ್ ಮುಖೇಲ್ ಪಾತ್ರ್ ಕೆಲಾ ಮಾತ್ರ್ ನ್ಹಯ್ ಆಸ್ತಾಂ, ತಾಚೊ ಸಾಂಗಾತಿ ಕೆಲ್ವಿನ್ ಸಲ್ಡನ್ಹಾನ್’ಯ್ ತಾಚ್ಯಾ ಪಾತ್ರಾಕ್ ಬರ‍್ಯಾನ್ ಜೀವ್ ದಿಲಾ. ಉದೆವ್ನ್ ಯೆಂವ್ಚೊ ನಟ್ ಲೆಸ್ಟನ್-ಯ್ ಭೋವ್ ಅಪುರ್ಬಾಯೆಚೆಂ ನಟನ್ ಕರ್ನ್ ಜಾಯ್ತ್ಯಾ ಅಭಿಮಾನಿಂಕ್ ಜೋಡ್ನ್ ಘೆಂವ್ಕ್ ಪಾವ್ಲಾ. ಬರಯ್ಣಾರ್, ಕಾರ್ಯೆಂ-ನಿರ್ವಾಹಕ್ ಆನಿ ನಟ್ ಜಾವ್ನಾಸ್ಚೆ ಆಲ್ವಿನ್ ದಾಂತಿ ಪೆರ್ನಾಲ್, ಪ್ರೀತಮ್ ಫಜೀರ್ ಆನಿ ಮೆಲ್ವಿನ್ ಪೆರ್ನಾಲ್‌ಯ್ ಹ್ಯಾ ಫಿಲ್ಮಾಚೆಂ ಪ್ರಮುಖ್ ಆಕರ್ಷಣ್. ರಿಶಲ್ ಪೆರ್ಮನ್ನೂರ್, ಜೊಯ್ಲಿನ್ ಡಿಸೋಜಾ ನಿಡ್ಡೊಡಿ, ಆರೋನ್ ಪ್ರಿನ್ಸ್, ಜೊನೀಶಾ ಡಿಸೋಜಾ, ಲುಯಿಸ್ ಪಿಂಟೊ ಕಟೀಲ್, ಪ್ರಿನ್ಸನ್ ಮಥಾಯಸ್ ಕಿರೆಂ, ವಿನ್ಸನ್ ಮಥಾಯಸ್ ಕಿರೆಂ, ಪ್ರೀತಿ ಮಥಾಯಸ್ ಕಿರೆಂ ಆನಿ ಕಾರ್ಮಿಣ್ ಸಿಕ್ವೇರಾ – ಹಾಣಿಂಯ್ ನಟನ್ ಕೆಲಾಂ. ಹಾಂಚೆ ಸಾಂಗಾತಾ ಫಾಮಾದ್ ಗಾವ್ಪಿಣ್ ವೆಲಿಟಾ ಲೋಬೊಯ್ ಮೆಳ್ಳ್ಯಾ.  ಸಿನೆಮಾಟೊಗ್ರಾಫಿ ಸ್ಟ್ಯಾನಿ  ನಿಡ್ಡೋಡಿ ಆನಿ ಆಲ್ವಿನ್ ಸಿಕ್ವೇರಾ ಹಾಣಿಂ ಕೆಲ್ಯಾ ತರ್ ಡ್ರೋನ್ ನೈಜಿಲ್ ರೊಡ್ರಿಗಸ್, ಜೀವನ್ ಡಿಕೊಸ್ಟಾ ಆನಿ ಹ್ಯಾನ್ಸನ್ ರೊಡ್ರಿಗಸ್ ಹಾಣಿಂ ಸಾಂಬಾಳ್ಳಾಂ.

ಬ್ಯಾಕ್-ಗ್ರಾಂವ್ಡ್ ಸಂಗೀತ್ ರಸ್ಸೆಲ್ ರೊಡ್ರಿಗಸಾನ್ ದಿಲಾಂ ಆನಿ ಡಬ್ಬಿಂಗ್ ಕೊಂಕ್ಣಿ ಕವಿ ಜೈಸನ್ ಸಿಕ್ವೇರಾಚ್ಯಾ ಡೆನ್ನನಾ ಸ್ಟುಡಿಯೋ-ಂತ್ ಚಲ್ಲಾಂ. ಸಗ್ಳೆಂ ಪಿಂತುರ್ ಕಿರೆಂ ಆನಿ ಮಂಗ್ಳುರ್ ಅಸ್-ಪಾಸ್ಚ್ಯಾ ಜಾಗ್ಯಾಂನಿ ಶೂಟ್ ಕೆಲ್ಲೆಂ ಆಸಾ. ಹ್ಯಾ ಪಿಂತುರಾಚಿ ಪ್ರಮುಖ್ ವಿಶೇಷತಾ ಮ್ಹಳ್ಯಾರ್ ಪ್ರೇಕ್ಷಕಾಕ್ ಹಾಸ್ಯಾಂಚ್ಯಾ ಲ್ಹಾರಾಂನಿ ಧಲವ್ನ್, ಮುಖ್ಲ್ಯಾ ಘಡಿಯಾಂನಿ ಕಿತೆಂ ಘಡ್ತಾ ಮ್ಹಳ್ಳಿ ಆತುರಾಯ್ ಚಡವ್ನ್ಂಚ್ ವೆತಾ ಆನಿ ಅಬ್ಳೆ ಆಖ್ರೇಕ್ ಚಿಂತಿನಾತ್ಲೆ ಘುಂವ್ಡೆರ್ ಸಂಪ್ತಾ ಏಕ್ ಅರ್ಥಾಭರಿತ್ ಸಂದೇಶ್ ದೀವ್ನ್. ಹ್ಯಾ ಫಿಲ್ಮಾಂತ್ ತೆಗಾಂ ಈಷ್ಟಾಂಕ್ ಏಕ್ ಲಕ್ಕಿ ಡಿಪ್ ಉಟ್ತಾ ಆನಿ ತಾಚೊ ಐವಜ್ ಅಪ್ಣಾಂವ್ಚೆ ಖಾತಿರ್ ಜಾಂವ್ಚಿ ಉಡ್ಡಾಉಡ್ಡಿಚ್ ‘ಲಕ್ಕಿ ಡ್ರಾ 777’. ಎಕ್ಯೆ ಲ್ಹಾನ್ಶೆ ಹಳ್ಳೆಂತ್ ಕಸೊ ಸಾಧೊ ಲೋಕ್ ಜಿಯೆತಾ ಆನಿ ಪಯ್ಶ್ಯಾಂಚ್ಯಾ  ಹೊರ್ಬೊಸಾಕ್ ಕಿತೆಂ ಸಕ್ಕಡ್ ಕರ್ತಾ ಮ್ಹಳ್ಳಿ ಮಾರ್ಮಿಕ್ ವಿಷಯ್ ಹಾಸ್ಯಾಂರುಪಿಂ ಪಡ್ದ್ಯಾರ್ ದಾಕಯ್ಲಾಂ. ಆಶೆಂ ಪಯ್ಶ್ಯಾಂ ಪಾಟ್ಲ್ಯಾನ್ ಧಾಂವ್ಲೆಲ್ಯಾ ಕೊಣಾಕ್ ಕಿತ್ಲೆ ಮೆಳ್ತಾತ್ ಆನಿ ಮೆಳ್ಳ್ಯಾ ಉಪ್ರಾಂತ್ ಕಿತೆಂ ಜಾತಾ ಮ್ಹಳ್ಳೆಂಚ್ ಭೋವ್ ಅತುರಾಯೆಚೆಂ ಕ್ಲೈಮಾಕ್ಸ್ ಹ್ಯಾ ಫಿಲ್ಮಾಚೆಂ.

ಹ್ಯಾ ಫಿಲ್ಮಾಚೊ ಪ್ರಿಮಿಯರ್ ಶೋ ಸಪ್ಟೆಂಬರ್ 2 ತಾರಿಕೆರ್ ಕೊಡ್ಯಾಳ್ಚ್ಯಾ ಭಾರತ್ ಸಿನೆಮಾಂತ್ ಜಾಲ್ಲೊ ಆಸೊನ್, ದುಸ್ರೊ ಶೋ ಕಿರ್‍ಯಾಂತ್ ಸಪ್ಟೆಂಬರ್ 10-ವೆರ್ ಚಲ್ಲೊ. ಆಪ್ಣಾಚ್ಯಾ ಯೂಟ್ಯೂಬ್ ಚಾನೆಲಾ ಖಾತಿರ್ ಮ್ಹಣ್ ಹೆಂ ಫಿಲ್ಮ್ ತಯಾರ್ ಕೆಲ್ಲೆಂ ತರೀ, ಪಳೆಲ್ಲ್ಯಾ ಲೊಕಾಂಚೆ ಉದ್ಗಾರ್ ಪಳೆವ್ನ್, ಕೊಡ್ಯಾಳ್ ಆನಿ ಉಡುಪಿ ದಿಯೆಸೆಜಿಂಚ್ಯಾ ಫಿರ್ಗಜಾಂನಿ ಶೋ ಘಾಲುಂಕ್ ಪ್ರೇತನ್ ಕೆಲೆಂ ಆನಿ ಆಶೆಂ ಪಾಟ್ಲ್ಯಾ 4 ಮ್ಹಯ್ನ್ಯಾಂನಿ 16  ಶೋಂನಿ ಲಗ್ಭಗ್ 6000 ಲೊಕಾಂನಿ ಹೆಂ ಫಿಲ್ಮ್ ಪಳೆವ್ನ್ ಹೊಗ್ಳಿಕ್ ಉಚಾರ್ಲೆಲಿ ಆಸೊನ್, ಕೆನಡಾಚ್ಯಾ ಅಂತರಾಶ್ಟ್ರೀಯ್ ಪ್ರದರ್ಶನಾನ್ ಹಾಂಚ್ಯಾ ಹುಮೆದಿಕ್ ಆನಿಕೀ ಚಡ್ ಉತ್ತೇಜನ್ ದಿಲಾಂ. ಎದೋಳ್ಚೆ ಸಕ್ಕಡ್ ಶೋ ‘ಹೌಸ್‌ಫುಲ್’ ಜಾಲ್ಲೆಂಚ್ ಹ್ಯಾ ಫಿಲ್ಮಾಚಿ ತಾಂಕ್ ದಾಕಯ್ತಾ. ಸರ್ವ್ ಕೊಂಕ್ಣಿ ಫಿಲ್ಮ್ ಮೊಗಿಂನಿ ಪಳಯ್ಜೆಚ್ ಜಾಲ್ಲೆಂ; ಉಣ್ಯಾ ಬಜೆಟಿರ್ ಪೋಟ್‌ಭರ್ ಹಾಸಂವ್ಚೆಂ ಪಯ್ಲೆಂ ಕೊಂಕ್ಣಿ ಫಿಲ್ಮ್ ಮ್ಹಣ್ ಫಿಲ್ಮ್ ಪಳಯ್ಲೆಲ್ಯಾ ಲಾಯಿಕ್ ಆನಿ ಧಾರ್ಮಿಕಾಂನಿ ಅಭಿಪ್ರಾಯ್ ಉಚಾರ್‍ಲ್ಯಾ.

ಫುಡ್ಲ್ಯಾ ದಿಸಾಂನಿ ಆನಿ ಥೊಡ್ಯಾ ಫಿರ್ಗಜಾಂನಿಯ್ ಶೋ ಬುಕ್ ಜಾಲ್ಲೆ ಆಸೊನ್, ತುಮಿಯ್ ಹೆಂ ಫಿಲ್ಮ್ ಪಳೆಯ್ಜಾಯ್ ತರ್ ತುಮ್ಚ್ಯಾ ಫಿರ್ಗಜಾಂನಿ ದಾಕಂವ್ಚ್ಯಾಕ್ ರಾಯನ್ ಆನಿ ಪಂಗಡ್ ಆಯ್ತೊ ಆಸಾ. ತುಮಿ ತಾಂಕಾಂ ದಿಂವ್ಚೊ ಸಹಕಾರ್ ಫುಡೆಂ ತಾಂಕಾಂ ಕೊಂಕ್ಣಿ  ಫಿಲ್ಮ್  ಶೆತಾಂತ್ ಕಾಂಯ್ ಪುಣ್ ವ್ಹಡ್ ಸಾಧನ್ ಕರುಂಕ್ ಭೆಸಾಂವ್ ಜಾಯ್ತ್, ಮ್ಹಣ್ ಮ್ಹಜಿ ಪಾತ್ಯೆಣಿ.

✍️ – ಮೆಲ್ವಿನ್ ಪೆರ್ನಾಲ್