ಜೆಜು ದೆವಾಚೊ ಪೂತ್ ಹ್ಯಾ ಸಂಸಾರಿಂ ಬಾಪಾಚಿ ಶಾಂತಿ ಘೆವ್ನ್ ಆಯ್ಲೊ. ಜೆಜುಚ್ಯಾ ಜಲ್ಮಾವೆಳಿಂ ದೇವ್‌ದುತಾಂನಿ ಸ್ತುತಿ ಕರಿತ್ ಗಾಯ್ಲೆಂ: “ಮ್ಹಯ್ಮಾ ದೆವಾಕ್ ಅತೀ ಉನ್ನತಿ ಆನಿ ಶಾಂತಿ ದೆವಾಕ್ ಮಾನ್ವಲ್ಯಾಂತ್ ತ್ಯಾ ಮನ್ಶಾಂಕ್ ಸಂಸಾರಿಂ”(ಲೂಕ್ ೨:೧೪). ಆಮ್ಕಾಂ ಪಾತ್ಕಾಥಾವ್ನ್ ಸುಟೊಂವ್ಚ್ಯಾ ಖಾತಿರ್, ಮನ್ಶಾಕುಳಾಕ್ ಬಾಪಾಚ್ಯೆ ವೆಂಗೆಂತ್ ಪರತ್ ಹಾಡ್ಚ್ಯಾ ಖಾತಿರ್ ಜೆಜು ಮನಿಸ್ ಜಾವ್ನ್ ಆಯ್ಲೊ. ತಾಣೆಂ ದುಸ್ಮನ್ಕಾಯ್ ಪಯ್ಸ್ ಕರುನ್ ದೆವಾ ಆನಿ ಮನ್ಶಾಮದೆಂ ಶಾಂತಿ ಹಾಡ್ಲಿ. ದೆಕುನ್ ಜೆಜು, ಇಮ್ಮಾನುವೆಲ್-ಶಾಂತಿಚೊ ಕುಂವರ್.

ಪವಿತ್ರ್ ಪುಸ್ತಕಾಪ್ರಕಾರ್ ಶಾಂತಿ ಮ್ಹಳ್ಯಾರ್ ಸಮೃದ್ಧ್ ಜಿಣಿ. ಅತ್ಮ್ಯಾಚಿ ಪ್ರಶಾಂತತಾಯ್. ಏಕ್ ವೆಕ್ತಿ ಕಶ್ಟಾಂತ್ ಆಸ್ಲ್ಯಾರೀ, ಸಮಸ್ಸ್ಯಾಂಕ್ ವೊಳಗ್ ಜಾಲ್ಯಾರೀ ಶಾಂತಿನ್ ಜಿಯೆಂವ್ಕ್ ಸಕ್ತಾ. ಶಾಂತಿ ಸಂಸಾರಿ ವಸ್ತುಂಥಾವ್ನ್ ಮೆಳ್ಚಿ ನ್ಹಯ್, ಬಗಾರ್ ಸಗ್ಳ್ಯಾ ಸಂಗ್ತಿಂಥಾವ್ನ್ ಮೆಕ್ಳೆಂ ಜಾತಾನಾ ಮೆಳ್ಚಿ. ಸಂಸಾರಾಚಿ ಶಾಂತಿ ನಿರರ್ಥಕ್, ಕ್ಶಣಿಕ್. ಜೆಜುನ್ ಆಪ್ಣೆಂ ಮರೊಂಕ್ ವೆಚ್ಯಾ ಆದಿಂ ಆಪ್ಲ್ಯಾ ಶಿಸಾಂಕ್ ಲಾಗಿಂ ಆಪೊವ್ನ್ ಮ್ಹಳ್ಳೆಂ, “ಶಾಂತಿ ತುಮ್ಚೆಸವೆಂ ಹಾಂವ್ ದವರ್‍ನ್ ವೆತಾಂ ಆನಿ ಮ್ಹಜಿ ಶಾಂತಿ ತುಮ್ಕಾಂ ದಿತಾಂ. ಸಂಸಾರ್ ಅಸಲೆಂ ಸಮಾಧಾನ್ ದೀಂವ್ಕ್ ಸಕನಾ”. ಹಿ ಶಾಂತಿ ಆಮ್ಚ್ಯಾ ಕಶ್ಟಾಂ-ಸಂಕಶ್ಟಾಂತ್‌ಯೀ ದೆವಾಚಿ ಸ್ತುತಿ ಕರುಂಕ್ ಹುಮೆದ್ ದಿತಾ, ಸಕತ್ ದಿತಾ.

ಪ್ರಸ್ತುತ್ ಸಂಸಾರಾರ್ ಆಮಿ ದೀಶ್ಟ್ ಘಾಲಿ ತರ್ ಪಾಟ್ಲ್ಯಾ ಪಂದ್ರಾ ವರ್‍ಸಾಂಥಾವ್ನ್ ಸಂಸಾರ್‌ಭರ್ ಅಶಾಂತಿಚಿಂ ಘಡಿತಾಂ ಚಡೊನ್ ಆಸಾತ್ ಶಿವಾಯ್ ಉಣಿಂ ಜಾಂವ್ಕ್ ನಾಂತ್. 163 ದೆಶಾಂನಿ ಕೆಲ್ಲ್ಯೆ ಸಮೀಕ್ಶೆಪರ್ಮಾಣೆಂ 95 ದೆಶಾಂನಿ ಶಾಂತಿ ಭಿಗಡ್ಲಲಿ ದಿಸೊನ್ ಯೆತಾ. ರಶ್ಯಾ-ಯುಕ್ರೇನ್ ತಶೆಂಚ್ ಪಾಲೆಸ್ತಿನ್-ಇಸ್ರಾಯೆಲ್ ಮದ್ಲ್ಯಾ ಝಜಾವರ್ವಿಂ ತ್ಯಾ ದೆಶಾಂಕ್ ಮಾತ್ರ್ ನ್ಹಯ್, ಹೆರ್ ದೆಶಾಂಕ್‌ಯೀ ಜಾಯ್ತೊ ನಶ್ಟ್ ಜಾಲಾ. ಹಿಂ ಝಜಾಂ ಸೊಂಪ್ಚ್ಯೆ ಸ್ಥಿತೆರ್ ಆಸ್ಲೆಬರಿ ದಿಸನಾ. ಪಾಟ್ಲ್ಯಾ ದಿಸಾಂನಿ ಜಾಲ್ಲ್ಯಾ ಝುಜಾವರ್ವಿಂ ಜಾಯ್ತೊ ಲೋಕ್ ಮೆಲಾ, ಘಾಯೆಲಾ, ನಿರ್ಗತಿಕ್ ಜಾಲಾ. ನೀಜ್ ಮೊಗಾಥಾವ್ನ್ ಜಾಯ್ತೊ ಲೋಕ್ ವಂಚಿತ್ ಜಾಲಾ. ಸಮಾಧಾನ್ ಹಾಡುಂಕ್ ವಾವ್ರ್ ಕರಿಜೆ ಮ್ಹಣ್ ಉಲೊಂವ್ಚೆ ಮುಕೆಲಿಚ್ ಹಿಂಸಾ ತಶೆಂಚ್ ಅನಿತಿಚಿ ವಾಟ್ ಧರ್‍ನ್ ಆಸಾತ್.

ಜೆಜು ಶಾಂತಿ ಹಾಡ್ನ್ ಆಯಿಲ್ಲ್ಯಾ ಜಾಗ್ಯಾರ್‌ಚ್ ಶಾಂತಿಚೆಂ ವಾತಾವರಣ್ ಭಶ್ಟಲಾಂ. ಕಿತ್ಯಾ ಖಾತಿರ್ ಆಜೂನೀ ಹರ್‍ಯೇಕ್ ದೀಸ್ ರೊಕೆಟಾಂ ಉಬ್ತಾತ್! ಹತ್ತ್ಯಾ, ಭಯೋತ್ಪದಕಾಂಚಿಂ ನಿಶ್ಟುರ್ ಕೃತ್ತ್ಯಾಂ ಘಡೊನ್ ಆಸಾತ್. ತರ್ ಜೆಜು ಆಮ್ಚೆಥಾವ್ನ್ ಪಯ್ಸ್ ಗೆಲಾಗಿ? ನಾ. ಬಾಹ್ಯ್ ರಿತಿನ್ ಪಳೆತಾನಾ ದೆವಾನ್ ಆಮ್ಕಾಂ ಸಾಂಡುನ್ ವಾಯ್ಟ್ ಸಕ್ತೆಕ್ ಬಳಾಧಿಕ್ ಜಾಂವ್ಕ್ ಸೊಡ್ಲಾಂ ತಶೆಂ ದಿಸ್ತಾ. ತೊ ಇಮ್ಮಾನುವೆಲ್ ಆಮ್ಚ್ಯಾ ಸಾಂಗಾತಾ ಸದಾಂಚ್ ಆಸಾ ಪುಣ್ ಆಮಿ ದೆವಾಚೊ ಸಾಂಗಾತ್ ಸೊಡುನ್ ಪಯ್ಸ್ ರಾವೊನ್ ಆಸಾಂವ್. ಕಿತೆಂ ಸಕ್ಡಾಂಕ್ ಬರೆಂ, ಸಮಾಧಾನಾಚೆಂ ತೆಂ ವಿಂಚಿನಾಸ್ತಾಂ, ಸ್ವಾರ್ಥಾಚ್ಯೆ ಗಡಿರ್ ರಾವೊನ್ ಝುಜ್ ಕರ್‍ತೇ ಆಸಾಂವ್. 

ಇಮ್ಮಾನುವೆಲಾಕ್ ಒಳ್ಕಲ್ಲ್ಯಾ ಶಿವಾಯ್ ನೀಜ್ ಶಾಂತಿ ಲಾಬೊಂಕ್ ಸಾಧ್ ನಾ. ಆಜ್ ಮನ್ಶಾನ್ ದೆವಾಕ್ ಒಳ್ಕೊನ್, ಕ್ರೀಸ್ತಾನ್ ದಾಕಯಿಲ್ಲಿ ಸತಾನಿತಿಚಿ, ಮಾಯಾಮೊಗಾಚಿ, ಶಾಂತಿ-ಸಮಾಧಾನಾಚಿ ವಾಟ್ ಧರ್‍ಲಿ ತರ್ ಹರ್‍ಯೆಕಾ ಜಾಗ್ಯಾರ್ ಶಾಂತಿ ರೂಪಿತ್ ಜಾಂವ್ಕ್ ಸಾಧ್ ಆಸಾ. ಅಸ್ಕತ್ ಸಮಾಜ್ ಬರ್‍ಯಾ ನಾಗರಿಕಾಂಕ್ ರೂಪಿತ್ ಕರುಂಕ್ ಸಕನಾ. ಶಾಂತಿ ಸಮಾಧಾನ್ ನಾ ತರ್ ಎಕಾಮೆಕಾಕ್ ದುಬಾವಿ ಮನೋಭಾವನ್ ಆಮಿ ಪಳಯ್ತಾಂವ್. ಆಮಿ ಸರ್ವ್ ಏಕ್ ಮ್ಹಳ್ಳೊ ಮನೋಭಾವ್ ಆಸಾ ತರ್ ಎಕಾಮೆಕಾಚ್ಯಾ ಬರೆಪಣಾಖಾತಿರ್ ಆಮಿ ವಾವುರ್‍ಯೆತ್. ಅಶೆಂ ಭಲಾಯ್ಕೆಭರಿತ್ ಬರಿ ಸಮಾಜ್ ರೂಪಿತ್ ಕರುಂಕ್ ಸಾಧ್ ಜಾತಾ.

ದೇವ್ ಮನಿಸ್ ಜಾವ್ನ್ ಆಮ್ಚೆಮದೆಂ ಶಾಂತ್ ಸಮಾಧಾನ್ ಹಾಡ್‌ಲ್ಲೆಂ ಘಡಿತ್ ಪರತ್ ಆಮಿ ಉಗ್ಡಾಸ್ ಕಾಡ್ತಾಂವ್. ತಿರ್ಕುಟ್ ಜಾವ್ನ್ ಯೆಂವ್ಚ್ಯಾ ಆತಾಂಚ್ಯಾ ಸಂಸಾರಾಂತ್ ದೆವಾಚೊ ಪೂತ್, ದೇವ್‌ಪಣ್ ಸಾಂಡುನ್, ಗರ್ದಾನಾಚ್ಯಾ ಗೊಟ್ಯಾಂತ್ ಮನ್ಶಾಕ್ ಸಮಾಸಮ್ ಜಾಲ್ಲ್ಯಾ ಜೆಜು ಕ್ರೀಸ್ತಾಕ್ ಆಮ್ಚ್ಯಾ ಜಿವಿತಾಂತ್ ಮೊಗಾಚೊ ಯೆವ್ಕಾರ್ ದಿವ್ಯಾಂ. ಜೆಜು ಕ್ರೀಸ್ತ್ ಆಮ್ಚೆಸಂಗಿ ಆಸಾ ತರ್ ಜಿವಿತ್ ಬದಲ್ತೆಲೆಂ. ಜರ್ ದೇವ್ ಆಮ್ಚೆಸಂಗಿ ಆಸಾ, ತರ್ ಕೋಣ್ ಆಮ್ಚೆವಿರೋಧ್ ರಾವ್ತಲೊ? ಆಮಿ ಹರ್‍ಯೆಕ್ಲೊ ಶಾಂತಿಚೆ ದುತ್ ಜಾವ್ನ್ ಶಾಂತಿ ರುತಾ ಕರ್‍ಚ್ಯಾ ವಾವ್ರಾಂತ್, ಹೆರಾಂಕ್ ಭರ್ವಸೊ ದಿಂವ್ಚ್ಯಾಕ್ ಆಮ್ಚ್ಯೆ ತಾಂಕಿಭಿತರ್ ವಾವುರ್‍ಯಾಂ.

2023ವೆಂ ವರಸ್ ಆಖೇರ್ ಜಾವ್ನ್ ಆಯ್ಲೆಂ. ಅಖ್ಖ್ಯಾ ವರ್‍ಸಾ ಪತ್ರಾಚ್ಯೆ ಯಶಸ್ವೆಕ್ ಜಾಯ್ತ್ಯಾಂನಿ ಸಾಂಗಾತ್ ಆನಿ ಮೋಗ್ ದಿಲಾ ಮ್ಹಳ್ಳಿಚ್ ದಾದೊಸ್ಕಾಯೆಚಿ ಗಜಾಲ್. ಬರ್‍ಯಾಂತ್ಲೆಂ ಬರೆಂ ವಾಚಪ್ ತುಮ್ಕಾಂ ಪಾವೊಂವ್ಕ್ ಆಮಿ ಕಾಡ್‌ಲ್ಲ್ಯೆ ವಾಂವ್ಟಿಕ್ ತುಮ್ಚೊ ಪ್ರೋತ್ಸಾಹ್ ಲಾಬ್ಲಾ. ಫುಡೆಂಯ್ ತುಮ್ಚೆರ್ ಆಮಿ ಭರ್ವಸ್ತಾಂವ್ ಆನಿ ನವ್ಯೆ ಹುಮೆದಿನ್ ನವ್ಯಾ ವರ್‍ಸಾಕ್ ಮೇಟ್ ಕಾಡ್ತಾಂವ್. ಜನೆರಾಂತ್ ಕಾರ್ಮೆಲ್ ಗುಡ್ಯಾರ್ ಬಾಳೊಕ್ ಜೆಜುಚಿ ವಾರ್ಶಿಕ್ ಪರಬ್ ಆಸಾ. ನೊವೆನಾಂಕ್ ಆನಿ ಫೆಸ್ತಾಕ್ ತುಮ್ಕಾಂ ಆಮಿ, ಕಾರ್ಮೆಲ್ ಗುಡ್ಯಾವಯ್ಲೆ ಕಾರ್ಮೆಲಿತ್ ಫ್ರಾದ್, ಮೊಗಾಚೆಂ ಆಪವ್ಣೆಂ ಪಾಟಯ್ತಾಂವ್. ಫೆಸ್ತಾಕ್ ಯೆತಾನಾ ಆಮ್ಚ್ಯಾ ಪತ್ರಾಕ್ ವರ್ಗಣಿ ಭರುಂಕ್ ವಾ ನವೀಕೃತ್ ಕರುಂಕ್ ವಿಸ್ರನಾಕಾತ್. ತುಮ್ಕಾಂ ಸಮೇಸ್ತಾಂಕ್ ಸಂತೊಸ್‌ಭರಿತ್ ನತಾಲ್ ಮಾಗ್ತಾಂವ್. 

✍️ – ಬಾಪ್ ಐವನ್ ಸೊಜ್, ಕಾರ್ಮೆಲಿತ್