ಜೆಜುಚೊ ಜಲ್ಮ್ ಏಕ್ ಮಿಸ್ತೆರ್. ತಾಚ್ಯಾ ಜಲ್ಮಾ ಭೊಂವಾರಿಂ ಘಡ್‌ಲ್ಲಿಂ ಘಡಿತಾಂ, ತ್ಯಾ ಖಾತಿರ್ ವಿಂಚ್ಲಲಿಂ ಮನ್ಶಾಂ, ರಾಕೊನ್ ಆಸ್‌ಲ್ಲ್ಯಾಂಕ್ ಮೆಳನಾಸ್ತಾನಾ ಸಂಸಾರಿ ದಿಶ್ಟಿನ್ ಫಾವೊ ನಾತ್‌ಲ್ಲ್ಯಾಂಕ್ ದರ್ಶನ್ ದಿಲ್ಲಿ ವಿಶೇಶತಾ; ಹೆಂ ಸಗ್ಳೆಂ ದೆವಾಚ್ಯೆ ವಿಚಿತ್ರ್ ಮಾಂಡಾವಳೆಕ್ ಆರ್ಸೊ ಧರ್‍ತಾ. ಜೆಜುಚ್ಯಾ ಜಲ್ಮಾಚಿ ಬರಿ ಖಬರ್ ದೇವ್‌ದುತಾಂನಿ ಸಕ್ಡಾಂಕ್ ದಿಲಿನಾ. ತಿ ದಿಲ್ಲಿ ಗೊವ್ಳ್ಯಾಂಕ್. ಗಾಂವಾಂತ್ ವಿವಿಧ್ ರಿತಿಂಚೊ, ವಿವಿಧ್ ಸ್ತರಾಂಚೊ ಲೋಕ್ ಆಸ್ತಾನಾ ಗೊವ್ಳ್ಯಾಂಕ್‌ಚ್ ತಿ ಕಿತ್ಯಾಕ್ ದಿಲಿ ಮ್ಹಳ್ಳೆಂ ಸವಾಲ್. ಹ್ಯಾ ಸವಾಲಾಕ್ ಥೊಡ್ಯೊ ಜಾಪಿ ಸೊಧ್ಚೆಂ ಪ್ರಯತನ್ ಆಮ್ಚೆಂ.

1. ದೆವಾಚೆಂ ಉತರ್ ಸಂಪೂರ್ಣ್ ಕರುಂಕ್ 

ಸಗ್ಳ್ಯಾ ಪರ್ನ್ಯಾ ಸೊಲ್ಲ್ಯಾಂತ್ ಗೊವ್ಳ್ಯಾಂಕ್ ಮುಕೆಲಿ ಕಶೆಂ ಪಿಂತ್ರಾಯ್ಲಾಂ. ಇಸ್ರಾಯೆಲಾಚೊ ಮಹಾನ್ ರಾಯ್ ದಾವಿದ್ ಗೊವ್ಳಿ ಜಾವ್ನಾಸ್ಲೊ. ದೇವ್‌ಯೀ ಏಕ್ ಗೊವ್ಳಿ ಮ್ಹಣ್ ಪರತ್ ಪರತ್ ಆಮ್ಕಾಂ ವಾಚುಂಕ್ ಮೆಳ್ತಾ (ಕೀ 23:1, ಎಜೆ 34:31, ಇಸಾ 40:11, ಉತ್ಪ 48:15, ಹೊಸೆ 4:16, ಮಿಕಾ 7:14, ಜೆರೆ 31:10). ಪ್ರವಾದ್ಯಾಂಚ್ಯಾ ಸಂದೇಶಾಂನಿ ಮೆಸ್ಸಿಯಾ ಆಪ್ಲ್ಯಾ ಹಿಂಡಾಕ್ ಚರೊಂವ್ಚೊ ಆನಿ ಜತನ್ ಘೆಂವ್ಚೊ ಬರೊ ಗೊವ್ಳಿ ಮ್ಹಣ್ ದಾಕಯ್ಲಾಂ. ಗೊವ್ಳ್ಯಾಂಕ್ ದಿಲ್ಲೊ ಸಂದೇಶ್ ಜೆಜು ಪರ್ನ್ಯಾ ಸೊಲ್ಲ್ಯಾ ಆನಿ ನೊವ್ಯಾ ಸೊಲ್ಲ್ಯಾಮದ್ಲೊ ಗಾಂಚ್ ಮ್ಹಳ್ಳೆಂ ಸ್ಪಶ್ಟ್ ಕರ್‍ತಾ.

2. ಖಾಲ್ತೆಪಣಾಚೆಂ ವ್ಹಡ್ಪಣ್ ದಾಕೊಂವ್ಕ್

ಪಯ್ಲ್ಯಾ ಶತಮಾನಾಚ್ಯಾ ಪಾಲೆಸ್ತಿನಾಂತ್ ಗೊವ್ಳಿ ಆನಿ ಬೊಕ್ರ್ಯಾ ಹಿಂಡ್ ಗುಡ್ಯಾ-ದೊಂಗ್ರಾಂನಿ ಆಸ್ಚೊ ಏಕ್ ಸಾಮಾನ್ಯ್ ವಿಶಯ್. ಚಡಾವತ್ ಗೊವ್ಳಿ ತಾಂಚ್ಯಾ ಹಿಂಡಾಂಸಂಗಿ ಶ್ಹೆರಾಭಾಯ್ರ್, ಲೊಕಾಚಿ ವಸ್ತಿ ನಾತ್‌ಲ್ಲ್ಯಾ ಜಾಗ್ಯಾಂನಿ ಆಸ್ತಾಲೆ. ತಾಂಕಾಂ ಸಮಾಜೆಂತ್ ವ್ಹಡ್ಲೊ ಸ್ಥಾನ್‌ಮಾನ್ ನಾತ್‌ಲ್ಲೊ. ತೆ ಶಿಕ್ಪಿ ನ್ಹಯ್. ತೆ ಆಸ್ಲೆ ಸಮಾಜೆಂತ್ ನಿಮಾಣೆ, ಖಾಲ್ತೆ. ಗೊವ್ಳ್ಯಾಂಕ್ ಬರಿ ಖಬರ್ ದಿಂವ್ಚೆಮುಕಾಂತ್ರ್ ಸಂಸಾರಾಚೊ ಸೊಡ್ವಣ್ದಾರ್ ವ್ಹಡಾ ವಯ್ಭಾವಾನ್ ನ್ಹಯ್, ಬಗಾರ್ ಖಾಲ್ತೆಪಣಾನ್ ನಿಮಾಣೊ ಜಾವ್ನ್ ಜಲ್ಮತಾ ಆನಿ ಸಮಾಜೆಚ್ಯಾ ನಿಮಾಣ್ಯಾ ಮನ್ಶಾಕ್ ಸಯ್ತ್ ನಾಸ್ ಜಾಂವ್ಕ್ ಸೊಡಿನಾ ಮ್ಹಣ್ ದೇವ್ ದಾಕೊವ್ನ್ ದಿತಾ.

3. ಧರ್ಮಿಕ್ ಮುಕೆಲ್ಯಾಂಕ್ ಲಜೆಕ್ ಘಾಲುಂಕ್

ಜೆಜುಚ್ಯಾ ಕಾಳಾರ್ ಧರ್ಮಿಕ್ ಮುಕೆಲಿ ಘಮಂಡಿ ಆಸ್ಲಲೆ ಆನಿ ಹಂಕಾರಾನ್ ಭರ್‍ಲಲೆ. ಆಪುಣ್ ಆಪ್ಣಾಚೊ ಧರ್ಮ್ ಭಾರಿ ಬರೊ ಕರ್‍ನ್ ಪಾಳ್ತಾಂವ್ ಮ್ಹಣ್ ದಾಕಯ್ತಾಲೆ ತರೀ ಭಿತರ್‍ಲ್ಯಾನ್ ಕಪಟ್‌ಪಣಾನ್ ಭರ್‌ಲ್ಲೆ. ಜೆಜುಚ್ ತಾಂಚೆವಿಶ್ಯಾಂತ್ ಸಾಂಗ್ತಾ: “ಜಡ್ ಆನಿ ವ್ಹಾವೊಂವ್ಕ್ ತಾಂಕನಾ ತಸಲೆ ಭೊರೆ ಬಾಂದುನ್ ತೆ ಖಾಂದಾರ್ ಚಡಯ್ತಾತ್, ಪುಣ್ ಆಪುಣ್‌ಚ್ ತೆಂ ಉಕ್ಲುಂಕ್ ಏಕ್ ಬೋಟ್ ಲೆಗೂನ್ ಲಾಯ್ನಾಂತ್” (ಮಾತೆ 23:4). ಆಪ್ಣಾಕ್‌ಚ್ ತೆ ‘ಆಬ್ರಾಹಾಮಾಚಿ ಸಂತತ್’ (ಜುವಾ 8:33) ಮ್ಹಣ್ ತೆ ಮಾಂದ್ತಾಲೆ. ಅಸಲ್ಯಾ ಹಂಕಾರ್‍ಯಾಂಕ್ ಲಜೆಕ್ ಘಾಲುಂಕ್ ದೇವ್ ಗೊವ್ಳ್ಯಾಂಕ್ ವಿಂಚ್ತಾ.

4. ಸಂಸಾರಾಚೆಂ ಪಾಪ್ ಕಾಡ್ಚ್ಯಾ ಆಯ್ಬಾವೀಣ್ ಶೆಳಿಯೆಚಿ ತಪಾಸ್ಣಿ ಕರುಂಕ್

ಜೆಜುಚೊ ಜಲ್ಮ್ ಕೆದ್ನಾ ಜಾಲೊ ಮ್ಹಳ್ಳೆಂ ಸಾರ್ಕೆಂ ಕಳಿತ್ ನಾ. ಪುಣ್ ಜೆಜು ಜಲ್ಮಲ್ಲೊ ಹಿಂವಾಳ್ಯಾಂತ್ ನ್ಹಯ್, ಬಗಾರ್ ವಸಂತ್ ಕಾಳಾರ್; ಮ್ಹಣ್ಜೆ ಹ್ಯಾಚ್ ಕಾಳಾರ್ ತೆಂಪ್ಲಾಂತ್ ಪಾತ್ಕಾ ಬಲಿ ಭೆಟೊಂವ್ಚಿ ದಸ್ತುರ್ ಆಸ್‌ಲ್ಲಿ. ದೇವ್‌ದುತಾಂಥಾವ್ನ್ ಬರಿ ಖಬರ್ ಘೆತ್‌ಲ್ಲೆ ಗೊವ್ಳಿ ಸಾಮಾನ್ಯ್ ಗೊವ್ಳಿ ನ್ಹಯ್ ಆಸ್ಲೆ. ತೆ ಗೊವ್ಳಿ ಜೆರುಜಲೆಮ್ ತೆಂಪ್ಲಾಚ್ಯಾ ಬೊಕ್ರ್ಯಾ ಹಿಂಡಾಕ್ ಚರೊಂವ್ಚೆ ಗೊವ್ಳಿ ಜಾವ್ನ್ ಆಸ್ಲೆ. ಹೆ ಗೊವ್ಳಿ ತೆಂಪ್ಲಾಚ್ಯಾ ಆಸ್‌ಪಾಸ್ ಆಸ್ಚ್ಯಾ ಗುಡ್ಯಾಂನಿ ತಂಬು ಮಾರ್‍ನ್ ಆಸ್‌ಲ್ಲೆ. ತ್ಯಾ ದೆಕುನ್ ದೇವ್‌ದುತಾಂನಿ ಬರಿ ಖಬರ್ ದಿತಾನಾ ವೆಗಿಂಚ್ ತೆ ದಾವಿದಾಚ್ಯಾ ಶ್ಹೆರಾಕ್ ಬೆತ್ಲೆಹೆಮಾಕ್ ಪಾವ್ತಾತ್. ಪಾತ್ಕಾಂಚ್ಯಾ ಫಾರಿಕ್ಪಣಾಖಾತಿರ್ ಬಲಿ ಜಾವ್ನ್ ಭೆಟೊಂವ್ಕ್ ಆಸ್ಚ್ಯೆ ಶೆಳಿಯೆಂಚಿ ತೆ ಜತನ್ ಕರ್‍ತಾಲೆ. ಹ್ಯಾ ಕಾಮಾಂತ್ ತಾಂಚೆ ದೊಳೆ ಇತ್ಲೆ ವೊಳ್ಸಾಲ್ಲೆಗೀ ಜರ್ ಲ್ಹಾನಾಂತ್ಲೆಂ ಲ್ಹಾನ್ ಆಯ್ಬ್ ಖಂಯ್ಚ್ಯೇಯ್ ಶೆಳಿಯೆಥಂಯ್ ಆಸ್ಲೆಂ ತರೀ ತಾಂಕಾಂ ತೆಂ ಸ್ಪಶ್ಟ್ ಕಳ್ತಾಲೆಂ. ಕಿತ್ಯಾಕ್ ಮ್ಹಳ್ಯಾರ್ ಬಲಿಯೆಚಿ ಶೆಳಿ ಆಯ್ಬಾವೀಣ್ ಆಸೊಂಕ್ ಜಾಯ್ ಆಸ್ಲಿ. ತ್ಯಾ ದೆಕುನ್ ಆಪ್ಣಾಚಿಚ್ ಬಲಿ ಭೆಟೊಂವ್ಕ್ ಜಲ್ಮಲ್ಲ್ಯೆ ಶೆಳಿಯೆಚಿ ತಪಾಸ್ಣಿ ಕರ್‍ಚ್ಯಾಕ್ ದೇವ್ ಹ್ಯಾ ಗೊವ್ಳ್ಯಾಂಕ್ ವಿಂಚ್ತಾ. ಧಾಂವಾಧಾಂವಿಂ ಆಯಿಲ್ಲೆ ಗೊವ್ಳಿ ಮನ್ಶಾ ಮಾಸಾ-ರಗ್ತಾನ್ ಆಸ್ಲಲ್ಯಾ ಆಯ್ಬ್ ನಾತ್ಲಲ್ಯಾ ಶೆಳಿಯೆಚೆರ್ ದೀಶ್ಟ್ ಘಾಲ್ತಾತ್. ಮುಕಾರ್ ಕಾಲ್ವಾರ್ ದೊಂಗ್ರಾರ್ ಬಲಿ ಭೆಟೊಂವ್ಕ್ ಆಸ್‌ಲ್ಲ್ಯೆ ದೆವಾಚ್ಯೆ ಶೆಳಿಯೆಕ್ ತಾಂಚ್ಯಾ ಭಾವಾಡ್ತಾಚ್ಯಾ ದೊಳ್ಯಾಂನಿ ತೆ ಪಳೆತಾತ್. ತಿ ಆಯ್ಬಾವೀಣ್ ಶೆಳಿ ಜಿ ತ್ಯಾ ಗೊವ್ಳ್ಯಾಂನಿ ತಪಾಸ್ಲಲಿ, ಆಯ್ಬಾವೀಣ್ ಜಾವ್ನ್ ಜಿಯೆತಾ ಆನಿ ಆಖೇರ್ ಮ್ಹಣಸರ್ ಆಯ್ಬಾವೀಣ್ ಜಾವ್ನ್ ಉರ್‍ತಾ. ಪಿಲಾತ್ ಸಮೇತ್ ಹಾಕಾ ಸಾಕ್ಸ್ ದಿತಾ – “ಹ್ಯಾ ಮನ್ಶಾಥಂಯ್ ಮ್ಹಾಕಾ ಕಸಲೊಚ್ ಗುನ್ಯಾಂವ್ ಮೆಳನಾ” (ಲೂಕ್ 23:4).

5. ಬರೊ ಗೊವ್ಳಿ ಕಸೊ ಆಸಜೆ ಮ್ಹಣ್ ದಾಕೊಂವ್ಕ್

ಗೊವ್ಳಿ ಜಾಂವ್ಚೆಂ ಮ್ಹಳ್ಯಾರ್ ಸುಲಬಾಯೆಚಿ ಗಜಾಲ್ ನ್ಹಯ್. ಹಿಂಡಾಕ್ ಸರ್ವ್ ಆನ್ವಾರಾಂತ್ಲೆಂ ಆನಿ ರಾನ್ವಟ್ ಮೊನ್ಜಾತಿಚ್ಯಾ ಘಾಸಾಂತ್ಲೆಂ ಆಪ್ಲೊ ಜೀವ್ ರಿಸ್ಕೆರ್ ಘಾಲ್ನ್ ರಾಕೊಂಕ್ ಜಾಯ್; ಹಿಂಡಾಕ್ ಜಾಯ್ ಪುರ್‍ತೊ ಚರೊವ್ ಮೆಳ್ಚೆಕಡೆ ವ್ಹರುಂಕ್ ಜಾಯ್ ಆನಿ ಎಕೆಚ್ ಎಕೆ ಶೆಳಿಯೆನ್ ಚುಕೊನ್ ವಚನಾಶೆಂ ಚತ್ರಾಯ್ ಕರುಂಕ್ ಜಾಯ್. ಜೆಜು ಬಲಿಯೆಚಿ ಶೆಳಿ ಮಾತ್ರ್ ನ್ಹಯ್ ಆಸ್ತಾಂ, ಆಪ್ಣಾಚ್ಯಾ ಹಿಂಡಾಪಾಸತ್ ಆಪ್ಲೊ ಜೀವ್ ರಿಸ್ಕೆರ್ ಘಾಲ್ಚೊ (ಜುವಾ 10:11), ನೊವಾಯ್ನೊವಾಂಕ್ ಸೊಡ್ನ್ ಎಕೆ ಶೆಳಿಯೆಕ್ ಸೊಧುನ್ ವೆಚೊ (ಲೂಕ್ 15:1-7) ಆನಿ ಆಪ್ಲ್ಯಾ ಬೊಕ್ರ್ಯಾಂಕ್ ಆಪ್ಣಾಚೊ ಪಾಟ್ಲಾವ್ ಕರುಂಕ್ ಆಪೊವ್ಣೆಂ ದಿಂವ್ಚೊ (ಜುವಾ 10:27) ಬರೊ ಗೊವ್ಳಿ.

6. ಗೊಟೊ ಆನಿ ಖಾವ್ಣೆಚಿ ಪ್ರಾಮುಕ್ಯತಾ ದಾಕೊಂವ್ಕ್

ಗೊವ್ಳ್ಯಾಂನಿ ಬಾಳ್ಶಾಕ್ ರಾವ್ಳೆರಾಂತ್ ಸೊಧ್ಲೊನಾ. ಬಗಾರ್ ಗೆಲೆ ತೆ ಗೊಟ್ಯಾಕ್ ಆನಿ ದೆಕ್ಲೆಂ ತಾಣಿಂ ಖಾವ್ಣೆರ್ ನಿದಾಯ್ಲಲ್ಯಾ ಬಾಳ್ಶ್ಯಾಕ್. ಶೆಳಿಯೆನ್ ಜಲ್ಮೊಂಚೆಂ ಗೊಟ್ಯಾಂತ್. ಗೊಟೊ ಚಡಾವತ್ ನಿತಳ್ ಆಸಾನಾ. ತಣ್, ಕಿಡಿ, ಮುಸ್ಕಾಂ ಆನಿ ಮೊನ್ಜಾತಿಂಚೆಂ ಮ್ಹೆಳೆಂ ಇತ್ಯಾದಿ ಆಸ್ತಾ. ತಶೆಂಚ್ ಪಾತಕ್ ಆಧಾರ್‍ನ್ ಮ್ಹೆಳೆಂ ಜಾಲ್ಲ್ಯಾ ಮನ್ಶಾಚೆಂ ಕಾಳಿಜ್ ದೇವ್ ಕಾಂಟಾಳನಾ ಮ್ಹಣ್ ದಾಕೊಂವ್ಕ್ ಜೆಜು ಗೊಟ್ಯಾಂತ್ ಜಲ್ಮ್ ಘೆತಾ. ಖಾವಣ್ ಮ್ಹಳ್ಯಾರ್ ಜಾಗೊ ಖಾಣ್ ಘಾಲ್ಚೊ. ದೆವಾಚಿ ಶೆಳಿ ಸಂಸಾರಾಚೆಂ ಖಾಣ್ ಜಾತಾ ಮ್ಹಣ್ ದಾಕೊಂವ್ಚ್ಯಾಕ್ ಜೆಜುಕ್ ಖಾವ್ಣೆರ್ ನಿದಾಯ್ಲಲೆಂ ತೆ ಪಳೆತಾತ್.

ಸಂಪ್ಣಿ

 ಗೊವ್ಳ್ಯಾಂಕ್ ಬರಿ ಖಬರ್ ದಿಲ್ಲೆಂ ಘಡಿತ್ ಖಾಲ್ತೆಂಪಣ್ ಆನಿ ತಾಚೆಮುಕಾಂತ್ರ್ ವರ್ತೆಂಪಣ್ ಆಮ್ಕಾಂ ಶಿಕಯ್ತಾ ಮಾತ್ರ್ ನ್ಹಯ್, ಜೆಜು ಸೊಡ್ವಣ್ದಾರ್ ನ್ಹಯ್ ಎಕಾ ಜನಾಂಗಾಚೊ ವಾ ಎಕಾ ರಾಶ್ಟ್ರಾಚೊ ವಾ ಎಕಾ ವರ್ಗಾಚ್ಯಾ ಲೊಕಾಚೊ, ಬಗಾರ್ ಸರ್ವಾಂಚೊ ಮ್ಹಣ್ ದಾಕೊವ್ನ್ ದಿತಾ. ಜಸೊ ದೇವ್ “ಆಪ್ಲೊ ಸುರ್ಯೊ ಜಶೆಂ ಬರ್‍ಯಾಂಚೆರ್ ತಶೆಂ ಖೊಟ್ಯಾಂಚೆರ್‌ಯೀ ಉದೆಸೊ ಕರ್‍ತಾ, ಆನಿ ಜಶೆಂ ಭಾಗೆವಂತಾಂಚೆರ್ ತಶೆಂ ಪಾತ್ಕ್ಯಾಂಚೆರ್‌ಯೀ ಪಾವ್ಸ್ ವೊತ್ತಾ” (ಮಾತೆ 5:45) ತಶೆಂಚ್ ದೆವಾಚೊ ಪೂತ್ ಕಸಲೊಚ್ ತಫಾವತ್ ಕರಿನಾಸ್ತಾನಾ ಸಕ್ಡಾಂಕ್ ಆಪ್ಣಾಶಿಂ ವೊಡ್ತಾ (ಜುವಾ 12:32) ಮ್ಹಳ್ಳೆಂ ದಾಕೊವ್ನ್ ದಿತಾ. ಹರ್‍ಯೆಕಾ ವರ್‍ಸಾಭಾಶೆನ್ ಪರತ್ ಆಮಿ ಕ್ರಿಸ್ಮಸ್ ಸಂಭ್ರಮ್ತಾಂವ್, ಹ್ಯಾ ಪಾವ್ಟಿಂ ಗೊವ್ಳ್ಯಾಂಚಿ ವಿಂಚವ್ಣ್ ಆಮ್ಕಾಂ ಪ್ರೇರಣ್ ಜಾಂವ್. ಭಾಗಿ ನತಾಲ್!

✍️ –ಬಾಪ್ ಆರನ್ ಬಬುಶ್, ಕಾರ್ಮೆಲಿತ್