2023 ಇಸ್ವಿ ಸಂಪ್ಲಿ ಆನಿ ಆಮಿ 2024 ಇಸ್ವೆಂತ್ ಆಸಾಂವ್. 2023ಇಸ್ವೆಂತ್ ಡಿಜಿಟಲ್ ತಂತ್ರಜ್ಞಾನ್ ಶೆತಾಂತ್ ಆರ್ಟಿಫಿಶಿಯಲ್ ಇಂಟಲಿಜೆನ್ಸ್ (AI) ತಾಂತ್ರಿಕಾಯೆನ್ ವ್ಹಡ್ ವಾದಾಳ್ ಉಟಯ್ಲಾಂ. ಚಾಟ್ ಜಿಪಿಟಿ ಥಾವ್ನ್ ಉಬ್ಜಲ್ಲೆಂ ಹೆಂ ವಾದಾಳ್ ಆತಾಂ ಸಬಾರ್ ನವಿಂ AI ಹಾತೆರಾಂ ಅಂತರ್‌ಜಾಳಿಂತ್ ಘೆವ್ನ್ ಆಯ್ಲಾಂ. ಆರ್ಟಿಫಿಶಿಯಲ್ ಇಂಟಲಿಜೆನ್ಸ್ ಶೆತ್ ವಾಡಾವಳ್ ಜಾವ್ನ್ ಯೆತಾನಾ ತಾಂತುಂ ಆಸ್ಚೆ ಉಪ್ಯೋಗ್ ಕಿತ್ಲೆ ಆನಿ ಆಪಾಯ್ ಕಿತ್ಲೆ ಮ್ಹಣ್ ಪಾಟ್ಲ್ಯಾ ವರ್‍ಸಾ ಹ್ಯಾ ಅಂಕಣಾಂತ್ ತುಮಿ ವಾಚುನ್ ಪಳಯ್ಲಾಂ. AI ಥಾವ್ನ್ ರೂಪಿತ್ ಕರ್‍ಚೆಂ ಡೀಪ್ ಫೇಕ್ ಕಿತ್ಲೆಂ ಆಪಾಯಾಚೆ ಮ್ಹಣ್ ತುಮಿ ಗೆಲೆತ್ಯಾ ಮ್ಹಯ್ನ್ಯಾಂತ್ ಸಮ್ಜೊನ್ ಘೆತ್ಲಾಂ. ಪುಣ್ ಹ್ಯಾ ದಿಸಾಂನಿ ಫಕತ್ ಡೀಪ್ ಫೇಕ್ ಮಾತ್ರ್ ನ್ಹಯ್, ಡೀಪ್ ನ್ಯೂಡ್ (Deep nude)ಯೀ ವ್ಹಡ್ ಪ್ರಮಾಣಾರ್ ಚಾಲ್ತೆರ್ ಆಸಾ.

ತರ್ ಹೆಂ ಡೀಪ್ ನ್ಯೂಡ್ ಮ್ಹಳ್ಯಾರ್ ಕಿತೆಂ? ಡೀಪ್ ಫೇಕ್ ಆನಿ ಡೀಪ್ ನ್ಯೂಡಾಕ್ ವಾ ಫೊಟೊಶೊಪಾಕ್ ಕಸ್ಲೊ ವೆತ್ತ್ಯಾಸ್ ಆಸಾ? ಡೀಪ್ ನ್ಯೂಡ್ ಕಿತೆಂ ಮ್ಹಳ್ಯಾರ್ ವಸ್ತುರ್ ಘಾಲ್ನ್ ಆಸ್‌ಲ್ಲ್ಯಾ ಎಕಾ ವೆಕ್ತಿಚಿ ತಸ್ವೀರ್ ವಸ್ತುರ್ ಕಾಡ್ಲ್ಯಾರ್ ಕಶಿ ದಿಸ್ತಾ ಮ್ಹಣ್ AI ವಾಪಾರ್‍ನ್ ರೂಪಿತ್ ಕರ್‍ಚೆಂ. ಮ್ಹಳ್ಯಾರ್ ಎಕಾ ವೆಕ್ತಿಚಿ ತಸ್ವೀರ್ ಆಸ್ಲ್ಯಾರ್, ತ್ಯಾ ವೆಕ್ತಿಚೆಂ ವಸ್ತುರ್ ತ್ಯೆ ತಸ್ವೀರೆಥಾವ್ನ್ ಕಾಡ್ಲ್ಯಾರ್ ತೊ ವೆಕ್ತಿ ಕಸೊ ದಿಸ್ತಾ ಮ್ಹಣ್ ತಾಕಾ ವಿಣ್ಗೆಂ ಕರ್‍ಚಿ ಪ್ರಕ್ರಿಯಾ. ತುಮ್ಚೆಕಡೆ ಎಕೆ ಚಲಿಯೆಚಿ ತಸ್ವೀರ್ ಆಸ್ಲ್ಯಾರ್ AI ಎಪ್ಲಿಕೇಶನ್ ವಾಪಾರ್‍ನ್ ತಿ ವಿಣ್ಗಿ ಕರ್‍ಯೆತ್. ನಿಜಾಯ್ಕಿ ಹೊ ಭಿರಾಂತಿಚೊ ವಿಶಯ್.

ಹೆಂ ಡೀಪ್ ನ್ಯೂಡ್ ಕಶೆಂ ಕಾಮ್ ಕರ್‍ತಾ? ಹೆಂ pix2pix ಮ್ಹಳ್ಳ್ಯಾ generative adversarial networks (GANs) ಆಲ್ಗೊರಿದಮಾಕ್ ವಾಪಾರ್‍ತಾ. ಹ್ಯಾ ಆಲ್ಗೊರಿದಮಾಕ್ ಸುಮಾರ್ ಲಾಖ್‌ಭರ್ ಚೆಡ್ವಾಂಚ್ಯಾ ವಾಸ್ತವಿಕ್ ವಿಣ್ಗಿ ಕೂಡ್ ತಶೆಂ ವಸ್ತುರ್ ಘಾಲ್ಲ್ಯೊ ತಸ್ವೀರ್‍ಯೊ ದತ್ತಾಂಶ್ ದೀವ್ನ್, ವಸ್ತುರ್ ಘಾಲ್ಲಿ ಕೂಡ್, ತೆಂ ವಸ್ತುರ್ ಕಾಡ್ಲ್ಯಾರ್ ಕಶಿ ಆಸ್ತಾ ಮ್ಹಣ್ ಪಾಕುಂಕ್ ತರ್ಬೆತಿ ದಿಲ್ಯಾ. ಫೊಟೊಶೊಪಾಂತ್ ವಿಣ್ಗಿ ಆಸ್‌ಲ್ಲ್ಯೆ ಕುಡಿಕ್ ಮಾಂಡ್ಡೊ ಮಾತ್ರ್ ಬಸಯ್ತಾತ್. ತೆಂ ಪರ್ನೆಂ ತಂತ್ರಜ್ಞಾನ್. ಡೀಪ್ ಫೇಕಾಂತ್ ಹೆಂ AI ವಾಪಾರ್‍ನ್ ಬದ್ಲಿತಾತ್. ಪುಣ್ ತುಮಿ ಟಾರ್ಗೆಟ್ ಕೆಲ್ಲ್ಯಾ ವೆಕ್ತಿಚೊ ಶೆಂಭೊರಾಚ್ಯಾಕೀ ವಯ್ರ್ ವಿವಿಧ್ ರಿತಿನ್ ಆಸ್ಚ್ಯೊ ತಸ್ವೀರ್‍ಯೊ ಆಸಜೆ. ಪುಣ್ ಡೀಪ್ ನ್ಯೂಡ್ ತಶೆಂ ನ್ಹಯ್. ಖಂಯ್ಚ್ಯಾಯ್ ಚಲಿಯಾಂಚಿ ಏಕ್ ತಸ್ವೀರ್ ಆಸ್ಲ್ಯಾರ್ ಪುರೊ. AI ವಾಪಾರ್‍ನ್ ತುಮ್ಚೆಂ ತೋಂಡ್ ಆನಿ ತುಮ್ಚೆಂ ವಸ್ತುರ್ ಪಾರ್ಕುನ್, ತೆಂ ವಸ್ತುರ್ ಕಾಡ್ಲ್ಯಾರ್ ತಿ ಚಲಿ ಕಶಿ ದಿಸ್ತಾ ಮ್ಹಣ್ ವಿಣ್ಗಿ ತಸ್ವೀರ್ ದಾಕಯ್ತಾ. ಮ್ಹಳ್ಯಾರ್ ವಸ್ತುರ್ ಆಸ್‌ಲ್ಲೆಕಡೆ ಮಾಸ್ ಭರುನ್ ಏಕ್ ನೀಜ್ ತಸ್ವೀರೆಬರಿ ರೂಪಿತ್ ಕರ್‍ತಾ. ಸಾಂಗ್‌ಲ್ಲೆಬರಿ ಹಿ ವಿಣ್ಗಿ ಕೂಡ್ ಖಂಯ್ಚ್ಯೇಯ್ ದುಸ್ರ್ಯೆ ಚಲಿಯೆಚಿ ನ್ಹಯ್, ತುಮ್ಚೆಂಚ್ ಮುಕಮಳ್ ಪಳೆವ್ನ್ AI ನ್ ಉಬ್ಜಯಿಲ್ಲಿ ತಸ್ವೀರ್ ತಿ. ಚಾಟ್ ಜಿಪಿಟಿ ತಸಲ್ಯಾ geಟಿeಡಿಚಿಣive AI ಕ್ ತುಮಿ ಅರ್ಧಿ ಕಾಣಿ ಬರೊವ್ನ್ ತಿ ಪೂರ್ಣ್ ಕರ್ ಮ್ಹಳ್ಯಾರ್ ಅದ್ಭುತ್ ರಿತಿನ್ ಪೂರ್ಣ್ ಕರ್‍ತಾ. ತಶೆಂಚ್ ತುಮ್ಚೆಂ ತೋಂಡ್ ವಾ ವಸ್ತುರ್ ಘಾಲಿನಾತ್ಲ್ಯಾ ಜಾಗ್ಯಾಚಿ ಕಾತ್, ಮೊಟಾಯ್ ಪಾರ್ಕುನ್ ವಸ್ತುರ್ ಆಸ್‌ಲ್ಲ್ಯಾ ಜಾಗ್ಯಾರ್ ತುಮ್ಚಿ ಕೂಡ್ ಕಶಿ ಆಸ್ತಾ ಮ್ಹಣ್ ಹಿಂ AI ಹಾತೆರಾಂ ಅದ್ಭುತ್ ರಿತಿನ್ ಪಾರ್ಕುನ್ ತುಮ್ಚಿ ವಿಣ್ಗಿ ಕೂಡ್ ರೂಪಿತ್ ಕರ್‍ತಾ.

ಹೆಂ ಡೀಪ್ ನ್ಯೂಡ್ ಮ್ಹಣ್ ಅಸ್ಲೆಂ ಏಕ್ ಒಪನ್ ಸೋರ್ಸ್ AI ಎಪ್ಲಿಕೇಶನ್ 2019 ಇಸ್ವೆಂತ್ ಆಯಿಲ್ಲೆಂ. ಪುಣ್ ಹೆಂ ಖಬ್ರೆರ್ ಟ್ರೆಂಡ್ ಜಾವ್ನ್ ಆಯ್ಲ್ಯಾ ಉಪ್ರಾಂತ್ ಥೊಡ್ಯಾಚ್ ದಿಸಾಂನಿ ಜಾಯ್ತ್ಯಾಂನಿ ವಿಮರ್ಸೊ ದಿಲ್ಲೊ. ಆಶೆಂ ಥೊಡ್ಯಾಚ್ ದಿಸಾಂನಿ ಹೆಂ ಎಪ್ಲಿಕೇಶನ್ ಸ್ಥಗಿತ್ ಜಾಲ್ಲೆಂ. ಪುಣ್ ಹೆಂ ಓಪನ್ ಸೋರ್ಸ್ ಜಾಲ್ಲ್ಯಾನ್ ಸ್ಥಗಿತ್ ಜಾಲ್ಯಾರೀ ಹಾಚೊ ಕೋಡ್ ಜಾಳಿರ್ ಇತರ್ ಲೊಕಾಂಕ್ ಮೆಳ್ಳೊ ಆನಿ ಆಜ್ ಸುಮಾರ್ ಚಾರ್ ಡಜನ್ ಹಾಚಿಂ ಪ್ರತಿರೂಪ್ ಎಪ್ಲಿಕೆಶನಾಂ ಜಾಳಿರ್ ಮೆಳ್ತಾತ್. ದಾಖ್ಲ್ಯಾಕ್ https://undress.app, https://deepnude.to, https://deep-nude.co, https://deepsukebe.io, https://deepnudenow.com. ಥೊಡಿಂ ಫುಂಕ್ಯಾಕ್ ತರ್ ಆನಿ ಥೊಡಿಂ ವರ್ಗಣಿ ಬಾಂದ್ಲ್ಯಾರ್ ಮೆಳ್ತಾತ್. ಥೊಡಿಂ ವೆಬ್ ಆಧಾರಿತ್ ತರ್ ಆನಿ ಥೊಡಿಂ ಕಂಪ್ಯೂಟರಾಂತ್ ಇನ್ಸ್ಟಾಲ್ ಕರಿಜೆ ಪಡ್ತಾ.

ಮುಕ್ಲ್ಯಾ ದಿಸಾಂನಿ ಚಲಿಯಾಂನಿ ಮೊಸ್ತ್ ಜಾಗ್ರುತ್ ಜಾಯ್ಜೆ. ತಸ್ವೀರ್‍ಯಾಂಚಿ ಸೊಭಾಯ್ ಚಡೊಂವ್ಚಿಂ ಎಪ್ಲಿಕೇಶನಾಂ ಆಯ್ಲ್ಯಾ ಉಪ್ರಾಂತ್ ಜಾಯ್ತ್ಯಾಂನಿ ಆಪ್ಲ್ಯೊ ತಸ್ವೀರ್‍ಯೊ ಇನ್ಸ್‌ಟಾಗ್ರಾಮ್ ತಸಲ್ಯಾ ಸಮಾಜಿಕ್ ಮಾದ್ಯಮಾಂತ್ ಅಪ್ಲೊಡ್ ಕರ್‍ಚೆಂ ಪಳೆಂವ್ಕ್ ಮೆಳ್ತಾ. ಮುಕ್ಲ್ಯಾ ದಿಸಾಂನಿ ಹ್ಯೊ ತುಮ್ಚ್ಯೊ ತಸ್ವೀರ್‍ಯೊ ವಿಣ್ಗ್ಯೊ ಜಾವ್ನ್ ಪೋರ್ನ್ ಸಾಯ್ಟಾಂನಿ ಆಯ್ಲ್ಯಾರ್ ಕಾಂಯ್ ಅಜ್ಯಾಪ್ ಪಾವಜೆ ಮ್ಹಣ್ ನಾ.

✍️ –ಪ್ರಮೋದ್ ರೊಡ್ರಿಗಸ್