ಪವಿತ್ರ್ ಎಕಾ ಕುಸ್ವ್ಯಾಚ್ಯೆ ಸೊಧ್ನೆರ್ ದೇವ್ ಆಸ್‌ಲ್ಲೊ. ಸೊಭಿತ್ ಸುಂದರ್ ಗುಣಾಂನಿ ಉತ್ತೀಮ್ ಎಕೆ ರಚ್ಣೆಚೆರ್ ತಾಚಿ ನದರ್ ಪಡ್ಲಿ. ತಿಕಾ ಪಯ್ಲಿಚ್ ತಾಣೆಂ ತಯಾರ್ ದವರ್‍ಲಲಿ. ಮಾಗ್ಣ್ಯಾಚ್ಯಾ ಭೊಂವಾರಾಂತ್, ಪವಿತ್ರತಾಯೆಚ್ಯೆ ಉಬೆಂತ್, ದೆವಾಮೋಗ್ ತಿಣೆ ಚಾಕ್ಲೊ. ದಿಂಬಿಯಾಂಚೆರ್ ಆಸ್ತಾಂ ತಾಣೆಂ ತಿಕಾ ಉಲೊ ದಿಲೊ.

ದಿಂಬಿಯೆಚೆಂ ಮಹತ್ವ್

ಪೊಕ್ರಿಪಣಾಂ ಕೆಲ್ಲ್ಯಾ ಭುರ್ಗ್ಯಾಕ್ ಆವಯ್ ಆದಿಂ ದಿಂಬಿ ಘಾಲೊವ್ನ್ ನೀಟ್ ವಾಟೆಕ್ ಹಾಡ್ತಾಲಿ. ಧೊಂಪ್ರಾಂ ದುಕೊಂಕ್ ಲಾಗ್ತಾನಾ, ಚೂಕ್ ಒಳ್ಕೊಂಕ್ ಮನ್ ಒಪ್ತಾ ತೆಂ ಸತ್. ಪುಣ್ ದೆವಾನ್ ವಿಂಚ್‌ಲ್ಲಿ ನಾರಿ ಕಿತೆಂಚ್ ಚೂಕ್, ಆಯ್ಬ್ ನಾತ್ಲಲಿ ಮರಿ, ದಿಂಬಿಯೆರ್ ಪಡ್‌ಲ್ಲೊ ಉದ್ದೇಶ್‌ಚ್ ವಿಂಗಡ್. ಹೊ ಶರಣಾಗತೆಚೊ ಸಂಕೇತ್. ತರ್ ಪುತಾಪ್ರಾಸ್ ಪಯ್ಲೆಂ ತ್ಯೆ ಆಂಕ್ವಾರ್ ಆವಯ್ನ್ ಆಮ್ಚ್ಯೆ ಸೊಡ್ವಣೆಚೆಂ ಪಿಂತುರ್ ಆಪ್ಲ್ಯಾ ಕಾಳ್ಜಾಂತ್ ಪಿಂತ್ರಾಯಿಲ್ಲೆಂ ಆಸ್ಯೆತ್. ದಿಂಬಿ ದೆವಾಕ್ ಬೊವ್ ಮೆಚ್ವಣೆಚೆಂ ಆಸನ್. ಉಬೆ ರಾವ್‌ಲ್ಲ್ಯಾ ಫಾರಿಜೆವಾಚ್ಯಾ ಮಾಗ್ಣ್ಯಾಕ್ ದೇವ್ ಮೆಚ್ವೊಂಕ್ ನಾ. ತಾಣೆಂ ಆಯ್ಕಾಲ್ಲೆಂ ದಿಂಬಿಯೆರ್ ಪಡೊನ್ ಸುಸ್ಕಾರ್‌ಲ್ಲ್ಯಾ ಪುಬ್ಲಿಕಾನಾಚೆಂ ಖಾಲ್ತೆಂ ಮಾಗ್ಣೆಂ. ಮರಿ ಖಾಲ್ತಿ ಜಾಲಿ ದೆಕುನ್ ಸರ್ವ್ ಜನಾಂಗಾಂಮದೆಂ ತಿ ವರ್ತಿ ಜಾಲಿ. ತಿಚ್ಯಾ ಪವಿತ್ರ್ ಕುಸ್ವ್ಯಾಂತ್ ಆಸ್ರೊ ಘೆಂವ್ಕ್ ಆಯ್ತೊ ಜಾಲ್ಲ್ಯಾ ಬಾಳಾಕ್ ಮರಿಯೆನ್ ಅತ್ಮೀಕ್ ತಯಾರಾಯ್ ದಿಂಬಿಯೆರ್ ಪಡೊನ್ ಕೆಲ್ಲಿ. ತಿಚ್ಯೆ ದಿಂಬಿಯೆಕ್ ಗಾಬ್ರಿಯೆಲ್ ಭಡ್ವೊ ಮಾನ್ವಾಲೊ, ಆಪುಣ್ ದೆವಾಚಿ ಚರಣ್‌ದಾಸಿ ಮ್ಹಣೊನ್ ಆಪ್ಲೆಂ ಮಿಸಾಂವ್ ಸ್ವೀಕಾರ್ ಕರ್‍ತಾನಾ, ತಾಂತುಂ ಆಮಾ ಸವಾಂಚಿಂ ನಾಂವಾಂ ದಾಖಲ್ ಜಾಲ್ಲಿಂ.

ಪವಿತ್ರ್ ಕುಸ್ವ್ಯಾಂತ್ ದೇವ್‌ಬಾಳಾಚಿ ವಾಡಾವಳ್

ಮರಿಯೆ ಕುಸ್ವ್ಯಾಂತ್ ವಾಡೊನ್ ಯೆಂವ್ಚ್ಯಾ ದೇವ್‌ಬಾಳಾನ್ ಭಾಯ್ಲ್ಯಾ ಸಂಸಾರಾಚೆಂ ರೂಪ್ ನಿಯಾಳ್ಳೆಂ. ಎಲಿಜಾಬೆತಿಚ್ಯಾ ಕುಸ್ವ್ಯಾಂತ್ಲ್ಯಾ ಜುವಾಂವ್ಕ್ ತಾಣೆಂ ಸಂತೊಸಾನ್ ಉಡಿ ಮಾರಿಶೆಂ ಕೆಲೆಂ. ತರ್ ತ್ಯಾ ಬಾಳಾನ್ ಮರಿ ಜುಜೆಚಿಂ ಸಂಭಾಶಣಾಂ, ಪ್ರಾರ್ಥನಾಂ, ಬರಿಂ ಕಾಮಾಂ ಜಿಕುನ್ ಧರ್‌ಲ್ಲಿಂನಾಂತ್. ತಾಂಚೊ ಪ್ರಭಾವ್ ತಾಚೆರ್ ಪಡ್‌ಲ್ಲೊನಾ. ಎಕೆ ರಿತಿರ್ ಜೆಜು ಆಪ್ಲ್ಯೆ ಆವಯ್ಚ್ಯಾ ಕುಸ್ವ್ಯಾಂತ್‌ಚ್ ಆಪ್ಲ್ಯಾ ಮಿಸಾಂವಾಚಿ ಸುರ್ವಿಲಿ ತಯಾರಿ ಕರುನ್ ವಾಡೊನ್ ಆಯ್ಲೊ. ತಾಚೊ ವೇಳ್ ಭರ್‍ತಿ ಜಾತಾನಾ ತೊ ಭುಮಿಕ್ ಪಾವ್ಲೊ.

ಮೊನ್ಜಾತಿಂಚಿ ಖಾವೊಣ್ ಜಾಲೆಂ ತಾಚೆಂ ಶಿಂಯಾಸಣ್

ಬಾಳಾಂತ್ ಘರಾಂತ್ ಆಸ್ತಾನಾ ನಿತಳಾಯ್, ಸುಕ್ಶಿಮಾಯ್ ಚಡ್ ಗುಮಾನಾಂತ್ ಘೆತಾತ್. ಪುಣ್ ಜೆಜುಕ್ ಜಲ್ಮ್ ದಿಲ್ಲಿ ಆವಯ್ ಗೊರ್‍ವಾಂಚ್ಯೆ ಖಾವ್ಣೆರ್, ಭಾತೆಣ್, ತಣ್, ತಾಳ್ಣೆಂ, ಶೆಣ್, ಮುತಾಚ್ಯೆ ಮುರಿಂತ್ ಶಾಂತ್ ಉರ್‍ತಾ. ಪಾಟ್ ತೆಂಕುಂಕ್ ಏಕ್ ಕೊನ್ಸೊ ಥಂಯ್ ಆಸ್‌ಲ್ಲೊ ವಾ ನಾ, ಮಾತೆಂ ತೆಂಕುಂಕ್ ಉಶೆಂ ಖಂಡಿತ್ ಥಂಯ್ಸರ್ ನಾ ಆಸ್‌ಲ್ಲೆಂ. ಕುಡಿಕ್ ಜಾಲ್ಲಿ ಪುರಾಸಣ್, ಪೊಟಾಕ್ ಪುರ್‍ತೆಂ ವೊಕತ್ ಆನಿ ಖಾಣ್ ತಿಕಾ ದಿತಲೊ ಕೋಣ್? ಬಿಡಾರ್ ದೀಂವ್ಕ್ ಇನ್ಕಾರ್ ಕೆಲ್ಲೊ ಲೋಕ್, ಆವಯ್ ಭುರ್ಗ್ಯಾಕ್ ಕಿತೆಂ ದೀತ್? ಪುಣ್ ಖಾವ್ಣೆರ್ ಗೊರ್‍ವಾಂಚ್ಯಾ ಉಸ್ವಾಸಾಚ್ಯೆ ಉಬೆನ್ ಬಾಳ್ಕಾಭೊಂವ್ತಿಂ ಊಬ್ ಭರ್‍ಲಿ. ಹಿಂವಾಥಾವ್ನ್ ತಾಚ್ಯೆ ಕುಡಿಕ್ ರಾಕಣ್ ಲಾಬ್ಲಿ. ತಾಚ್ಯೆ ಕುಡಿಚ್ಯೆ ಜತ್ನಾಯೆಕ್ ಮನಿಸ್ ಲಿಪ್ಲೊ ತರ್ ಮೊನಿ ಮೊನ್ಜಾತ್ ರಾತ್‌ಭರ್ ಜಾಗಿ ಉರ್‍ಲಿ.

ಪಾಳ್ಣ್ಯಾಂತ್ ಧಲ್ಚ್ಯಾ ಬಾಳಾನ್ ಕೆಲ್ಲಿ ಸಂಸಾರಾಚಿ ಸಳಾವಳ್

ತ್ಯಾ ಲ್ಹಾನ್ ಬಿಡಾರಾ ಬಗ್ಲೆಚ್ಯಾ ಸೆಜಾರಾಂತ್ ಆಸ್‌ಲ್ಲ್ಯಾ ಸ್ತ್ರೀಯಾನಿಂ, ಭುರ್ಗ್ಯಾಚೆಂ ರಡ್ಣೆ ಆಯ್ಕೊನ್ ನಜರೆತಾಚ್ಯಾ ಘರ್‍ಚ್ಯಾ ಮೆಟಾಲಾಗಿಂ ರಾವೊನ್ ಆತುರಾಯೆನ್ ದೆಕ್‌ಲ್ಲೆಂ ಆಸ್ಯೆತ್. ನೀದ್ ಸಂಪೊನ್ ಉಟ್ತಚ್, ಆಪ್ಣಾಲಾಗಿಂ ಯೆಂವ್ಚ್ಯಾ, ಒಳೊಕ್ ಕರ್‍ನ್ ಘೆಂವ್ಚ್ಯಾಂಸಂಗಿ ಜೆಜು ವಾಡ್ಲೊ. ತಾಕಾಯ್, ಸೆಜಾರ್‍ಚಿಂ, ಈಶ್ಟ್ ಲಾಬ್ಲೆ. ಸದಾಂಚ್ಯೊ ಚಾರ್ ಗಜಾಲಿ, ಖೆಳ್, ಚಲ್ತಾನಾ ಫಾತರ್ ದಾಂಟೊನ್ ತೊಯ್ ಪಡ್ಲಾ ಆಸ್ಯೆತ್. ತ್ಯಾ ಜೆಂಜಾರ್‌ಲ್ಲ್ಯಾ ಧೊಂಪ್ರಾಕ್ ವೊಕತ್ ಲಾಯ್ತಾನಾ, ಮರಿಯೆಕ್ ತಾಣೆಂ ಪಳೆಲ್ಲ್ಯೆ ದಿಶ್ಟಿಂತ್ ಫುಡೆಂ ಘಡೊಂಕ್ ಆಸ್ಚ್ಯಾ ಸಂಗ್ತಿಂಚೊ ಹಿಶಾರೊ ದಿಲ್ಲೊ. ತಾಕಾ ಧಲೊವ್ನ್ ನಿದಾಂವ್ಚ್ಯಾ ಗಾಣಾಂನಿ ಮರಿಯೆನ್ ಕಿತೆಂ ಗಾಯ್ಲೆಂ ಆಸ್ಯೆತ್. ತ್ಯಾ ಗಾಣಾಂಕ್ ಆಯ್ಕೊನ್ ತೊ ಅತ್ಮೀಕ್ ಬಳ್ ಆಪ್ಣಾವ್ನ್ ವ್ಹಾಡ್ಲೊ ಜಾವ್ಯೆತ್.

ಘರ್ ತಾಚೆಂ ಪಯ್ಲೆಂ ಶಾಳ್ ಆನಿ ಜುಜೆ-ಮರಿ ತಾಚಿಂ ಪಯ್ಲಿಂ ಮೆಸ್ತ್ರಿ

ಬುಕಾಂಚೊ ದಾಳೊ ಘೆವುನ್ ತೊ ಶಾಳೆಕ್ ಗೆಲ್ಲೆಂ ಆಮಿ ನೆಣಾಂವ್ ತರೀ, ದೆವಾಳಾಂತ್ಲ್ಯಾ ಶಾಸ್ತ್ರಿಂಕ್ ಸವಾಲ್ ಘಾಲುಂಕ್ ತಾಕಾ ಗಿನ್ಯಾನ್ ಖಂಯ್ಚೆಂ? ಜುಜೆ-ಮರಿ ತಾಕಾ ಕುಡಿಚೆಂ ಖಾಣ್ ಮಾತ್ರ್ ದೀವ್ನ್ ವಾಡೊಂಕ್ ಕಾರಣ್ ಜಾಲ್ಲಿಂ ನ್ಹಯ್ ಬದ್ಲಾಕ್, ತಾಕಾ ಅತ್ಮೀಕ್ ರಿತಿನ್ ವಾಡೊಂಕ್ ತಾಣಿಂ ಆವ್ಕಾಸ್ ರಚ್ಲೊ. ಆಮಿ ತರ್, ತ್ಯಾ ದೆವಾಕ್ ಕಿತ್ಲೆಂ ಪುರ್ಪುರೊನ್, ದುರ್‍ಸೊನ್ ಸವಾಲಾಂ ಕರ್‍ತ್ಯಾವ್? ಪುಣ್ ತಾಣಿಂ ಹರ್ ಪರೀಕ್ಶಾ ಏಕ್ ಮಿಸಾಂವ್ ಆನಿ ದೆವಾಚಿ ಇಚ್ಛಾ ಕಶಿ ಸ್ವೀಕಾರ್ ಕೆಲಿ. ಹ್ಯಾಚ್ ಖಾಲ್ತೆಪಣಾಚ್ಯೆ ಸಾವ್ಳೆಂತ್ ಜೆಜುಯ್ ಖಾಲ್ತೊ ಜಾವ್ನ್ ವಾಡ್ಲೊ.

ಸುತಾರಿ ಆನಿ ಶಿವ್ಣೆಚ್ಯಾ ವಾವ್ರಾಂತ್ ಕಶ್ಟಾಂಚಿ ಒಳೊಕ್

ಬಾಪಯ್ ಸುತಾರ್‍ಯಾಚೆಂ ಕಾಮ್ ಕರ್‍ತಾನಾ, ಆವಯ್ ಘರ್‍ಚೆಂ ರಾಂದಪ್, ನಿತಳಾಯ್ ಪಳೆತಾನಾ ಜೆಜು ವೊಗೊಚ್ ಬಸ್‌ಲ್ಲೊನಾ. ತಾಣೆಂಯ್, ಘರ್‍ಚ್ಯಾ ವಾವ್ರಾಂತ್ ಹಾತ್ ಮೆಳಯ್ಲಾ. ಹ್ಯಾ ವರ್ವಿಂ ಏಕ್ ದಾದ್ಲೊ ಆನಿ ಏಕ್ ಸ್ತ್ರೀ ಕುಟಮ್ ಬಾಂದುನ್ ಹಾಡ್ಚ್ಯಾ ವಾವ್ರಾಂತ್ ಕಶೆಂ ಮೆತೆರ್ ಜಾತಾತ್ ತೆಂ, ಜೆಜುನ್ ಲಾಗ್ಶಿಲ್ಯಾನ್ ಪಳೆಲಾಂ. ಪಯ್ಶಿಲ್ಯೆ ಬಾಂಯ್ತ್‌ಲೆಂ ಉದಕ್ ಕೊಳ್ಶಾಂತ್ ಭರ್‍ನ್ ಖಾಂದಾರ್ ಘೆವ್ನ್ ಘರಾ ಹಾಡ್ಲಾಂ, ಅಶೆಂ ಮರಿಯೆಕ್ ಘರ್‍ಚ್ಯಾ ವಾವ್ರಾಂತ್ ಆಧಾರ್ ದಿಲಾ ಆಸ್ಯೆತ್. ತೆಣೆಂ ಬಾಪಯ್ ವಾವ್ರಾಕ್ ವೆತಾನಾ, ತಾಚ್ಯಾ ಪಾಟ್ಲ್ಯಾನ್ ಜಾಯ್ತಿ ವಾಟ್ ಚಮ್ಕೊನ್, ಲೊಂಕ್ಡಾ ಹಾತೆರಾಂಚೆಂ ಪೊತೆಂ ವ್ಹಾವೊವ್ನ್ ತೊ ಚಲ್ಲಾ ಆಸ್ಯೆತ್. ವಾವ್ರಾಕ್ ಗೆಲ್ಲೆಕಡೆ ಸಬಾರಾಂಚಿ ತಾಕಾ ಒಳೊಕ್ ಜಾಲ್ಲಿ. ದೆಕುನ್‌ಚ್ ತಾಣಿಂ ತೊ ಸುತಾರ್‍ಯಾಚೊ ಪೂತ್ ನ್ಹಯ್‌ವೇ, ತಾಕಾ ಕಶಿ ಇತ್ಲಿ ಜಾಣ್ವಾಯ್‌ಗೀ ಮ್ಹಣ್ ವಿಚಾರ್‍ಲಲೆಂ ವಾಜ್ಬಿ. ಮರಿಯೆಬರಿ ಜೆಜುನ್‌ಯೀ ಆಪ್ಲ್ಯೆ ವಾಡಾವಳೆಂತ್ ಲೊಕಾಕ್ ಪಾರ್ಕುನ್ ಜಾಯ್ತ್ಯೊ ಸಂಗ್ತಿ ಆಪ್ಣಾಭಿತರ್‌ಚ್ ಜಗೊವ್ನ್ ದವರ್‌ಲ್ಲ್ಯೊ ಮ್ಹಣ್ಚ್ಯಾಂತ್ ದುಬಾವ್ ನಾ.

ಸಾದೆಂ ಜಿವಿತ್ ತಾಚ್ಯೆ ವಾಡಾವಳೆಚಿ ಬುನ್ಯಾದ್

ಜುಜೆ ಆನಿ ಮರಿಯೆ ಸಾಂಗಾತಾಚೆಂ ಸಾದೆಂ ಕಾಮ್, ಸಾದೆಂ ಖಾಣ್, ಸಾದ್ಯೊ ಗಜಾಲಿ ತಾಚ್ಯಾ ದೇವ್‌ಪಣಾಕ್ ಲಿಪೊವ್ನ್ ಮನ್ಶಾಸಂಯ್ಬಾಚ್ಯೆ ವಾಡಾವಳಿಕ್ ಸಾಂಗಾತ್ ದೀಲಾಗ್ಲ್ಯೊ. ಆಧುನಿಕ್ ಸವ್ಲತ್ಯೊ, ಆವ್ಕಾಸ್ ತಾಚೆಲಾಗಿಂ ಆಸ್‌ಲ್ಲೆ ವಾ ನಾ ಆಮಿ ನೆಣಾಂವ್, ತರೀ ತಾಚಿ ಜಾಣ್ವಾಯ್, ಮುಕೇಲ್ಪಣ್, ಧಯ್ರ್ ವಿಶೇಸ್. ತರ್ನಾಟ್ಪಣಾಚ್ಯಾ ಹುಂಬ್ರಾರ್ ಪಾವ್ತಚ್ ವ್ಹಡ್ ವ್ಹಡ್ ಸಪ್ಣಾಂ ದೆಕೊಂಕ್ ಕೊಣೆಂಚ್ ತಾಕಾ ಅಡ್ಕಳ್ ಘಾಲ್ಲಿನಾ. ಸಗ್ಳೆಂ ತಾಣೆಂ ಸಾಂಡ್ಚೆಂ ಮನ್ ಕೆಲೆಂ, ಘರ್, ಕುಟಮ್, ಈಶ್ಟ್, ಗಾಂವ್‌ಯೀ. ಎದೊಳ್ಚ್ಯೆ ತಾಚ್ಯೆ ಬಾಹ್ಯ್ ಆನಿ ಆಂತರಿಕ್ ವಾಡಾವಳೆಂತ್, ಸಾದ್ಯಾ, ಸರಳ್, ದುಬ್ಳ್ಯಾ, ಕಿರ್ಕೊಳ್ಯಾಂಚಿ ತಾಕಾ ಒಳೊಕ್ ಜಾಲ್ಲಿ. ಗ್ರೇಸ್ತಾಂಚಿಯ್ ಜಾಲ್ಲಿ ಆಸ್ಯೆತ್. ದೆಕುನ್ ತೊ ಉಲ್ಲೇಖ್ ಕರ್‍ನ್ ಸಾಂಗ್ತಾ ಕೀ, ಗ್ರೇಸ್ತಾಂಕ್ ಸರ್ಗಾಕ್ ರಿಗೊಂಕ್ ಸಲೀಸ್ ನಾ. ತರ್ನಾಟ್ಪಣ್ ತಾಕಾ ವೆಂಗ್ತಾನಾ ಸಂಸಾರಾಚ್ಯೆ ಭುಲಿಕ್ ತೊ ಚಿಡ್ಕೊನ್ ಉರ್‍ಲೊನಾ.

ತೊ ಕುಡಿನ್ ಆನಿ ಅತ್ಮೀಕ್ ಜಾಣ್ವಾಯೆನ್ ವಾಡ್ಲೊ

ಜುಜೆನ್ ಆನಿ ಮರಿಯೆನ್ ತಾಚಿ ಖೂಬ್ ಜತನ್ ಘೆತ್‌ಲ್ಲಿ. ಪುಣ್ ಜೆಜು ಜಾಣಾಸ್ಲೊ ಕೀ, ತಾಚೆಂ ಮಿಸಾಂವ್ ಘರಾಂತ್ ರಾವೊನ್ ಕರ್‍ಚೆಂ ನ್ಹಯ್. ಕುಟ್ಮಾಂತ್ಲ್ಯಾ ಮನ್ಶಾಮೊಲಾಂಚೊ ಪ್ರಭಾವ್ ಘೆವ್ನ್, ಮಾಗ್ಣ್ಯಾಚ್ಯಾ ಬಳಾನ್ ಆನಿ ಪ್ರೇರಣಾನ್ ತೊ ವಾಡತ್ತ್ ಗೆಲೊ. ಕುಡಿಚಿ ವಾಡಾವಳ್ ದೊಳ್ಯಾಂಕ್ ದಿಸ್ಚಿ, ಪುಣ್ ಅತ್ಮೀಕ್ ಜಿ ಆಸಾ ತಿ ದೆವಾಸಂಗಿ ಎಕ್ವಟೊನ್ ಆಸ್ಚಿ. ಮರಿ ಆನಿ ಜುಜೆಸಂಗಿ ಹೊ ಅನ್ಭೋಗ್ ಜೆಜುಕ್ ಲಾಬ್ಲೊ. ಧ್ಯಾನಾಂತ್ ತೊ ಉರ್‍ತಾಲೊ ಆಸ್ಯೆತ್, ತೆಂಚ್ ತಾಣೆಂ ಉಪ್ರಾಂತ್ ಆಭ್ಯಾಸ್ ಕರ್‍ನ್ ಘೆತ್‌ಲ್ಲೆಂ ಆಮ್ಕಾಂ ವಾಚುಂಕ್ ಮೆಳ್ತಾ. ಬಾಳ್ಪಣಾಚ್ಯಾ ದಿಸಾಥಾವ್ನ್ ತರ್ನಾಟ್ಪಣಾ ಪರ್ಯಾಂತ್ ತೊ ದೆವಾಸಂಗಿ ಅನ್ಯೋನ್ಯ್ ಸಂಬಂದ್ ದವರ್‍ನ್ ವಾಡ್ಲೊ.

ಜೆಜುಚಿ ಜಿಣಿ ಸಾದಿ. ಉಲೊವ್ಣೆಂ ಸಾದೆಂ. ಸಾದ್ಯಾ ಲೊಕಾಕ್ ತೊ ಸೊಧಿತ್ ಗೆಲೊ. ಸಾದ್ಯಾಸಂಗಿ ತೊ ಆಸ್ತಾಲೊ. ಲೊಕಾಕ್ ಸಮ್ಜೊಂಚೆಬರಿ ತೊ ಉಲಯ್ಲೊ. ಸವಾಲಾಂಕ್ ತಾಣೆಂ ಜಾಪಿ ದಿಲ್ಯೊ. ಲೊಕಾಸಂಗಿ ತೊ ಜೆವ್ಲೊ, ರಾವ್ಲೊ. ಹ್ಯಾ ಸರ್ವ್ ಸನ್ನಿವೇಶಾಂನಿ ತೊ ವಾಡತ್ತ್ ಗೆಲೊ. ದೆವಾಕ್ ಮಾಂದ್ಚಿ ಜಿಣಿ ಕಿತೆಂ ಮ್ಹಣ್ ಜೆಜುನ್ ಜಿಯೆವ್ನ್ ದಾಕಯ್ಲಾಂ. ತ್ಯಾಚ್‌ಪರಿಂ ಆಮ್ಕಾಂ ಜಿಯೆಂವ್ಕ್ ಆಪಯ್ಲಾಂ. ತಾಣೆಂ ಭೊಗ್ಶಿಲಾಂ ಆನಿ ಆಮ್ಕಾಂ ಭೊಗ್ಸುಂಕ್ ಆಪಯ್ಲಾಂ. ತಾಣೆಂ ಮೋಗ್ ಕೆಲಾ ಆನಿ ಆಮ್ಕಾಂ ತಾಚ್ಯಾ ಮೊಗಾಚಿ ರೂಚ್ ದಿಲ್ಯಾ. ಆಮ್ಚ್ಯೆಯ್ ವಾಡಾವಳೆಂತ್ ತೊ ಆಮ್ಕಾಂ ಕಿತೆಂ ಸಾಂಗ್ತಾ ತೆಂ ಕರುಂಕ್ ಆಮಿ ತಯಾರ್ ಆಸಜೆ.

✍️ –ಫೆಲ್ಸಿ ಲೋಬೊ