ಪೆದ್ರು ಮಾಸ್ಳಿ ಪಾಗ್ತಾನಾ ಜೆಜುನ್ ತಾಕಾ ಆಪಯ್ಲೊ ಆನಿ ಪವಿತ್ರ್ ಸಭೆಚೊ ಪಯ್ಲೊ ಪಾಪ್ ಸಾಯ್ಬ್ ಜಾವ್ನ್ ನೆಮ್ಲೊ. ಸುಂಕಾಕಾಟ್ಯಾರ್ ಬಸೊನ್ ಆಸ್‌ಲ್ಲ್ಯಾ ಮಾತೆವಾಕ್ ಜೆಜುನ್ ಯೇ ಮ್ಹಳೆಂ ಆನಿ ತೊ ಜೆಜುಚಿ ಸುವಾರ್ತಾ ಬರಯಿಲ್ಲ್ಯಾ ಚೊವ್ಗ್ ವಾಂಜೆಲಿಸ್ತಾಂಪಯ್ಕಿ ಎಕ್ಲೊ ಜಾಲೊ. ಸಾವ್ಲ್ ಕ್ರಿಸ್ತಾಂವಾಂಕ್ ದಗ್ದಿತಾನಾ ಜೆಜುನ್ ತಾಕಾ ಆಪಡ್ಲೆಂ ಆನಿ ತೊ ಮಿಸಾಂವಾಂಚೊ ಪಾತ್ರೊನ್ ಜಾಲೊ. ದೇವ್ ಆಪ್ಣಾಕ್ ಜಾಯ್ ಜಾಲ್ಲ್ಯಾಂಕ್ ಕೆದಾಳಾ ಆನಿ ಖಂಯ್ಸರ್ ವಿಂಚ್ತಾ ಆನಿ ಧಾಡ್ತಾ ಮ್ಹಳ್ಳ್ಯಾಕ್ ಪವಿತ್ರ್ ಪುಸ್ತಕಾಂತ್ ಜಾಯ್ತಿಂ ನಿದರ್ಶನಾಂ ಆಮ್ಕಾಂ ಮೆಳ್ತಾತ್.

ಹೆಂ ಸಗ್ಳೆಂ ತ್ಯಾ ಕಾಳಾರ್ ಮ್ಹಣ್ ಆಮಿ ಚಿಂತ್ಲ್ಯಾರ್, ಆಧುನಿಕ್ ಕಾಳಾರ್‌ಯೀ ದೇವ್ ಆಪ್ಲ್ಯಾ ಶೆತಾಂತ್ ವಾವುರ್‍ಚ್ಯಾಕ್ ಆಪ್ಣಾಕ್ ಜಾಯ್ ಜಾಲ್ಲ್ಯಾ ವಾವ್ರಾಡ್ಯಾಂಕ್ ವೆಳಾಕಾಳಾರ್ ವಿಂಚುನ್ ಕಾಡ್ತಾ. ಜಾಂವ್ಕ್ ಪುರೊ ತೊ ಇಂಜಿನಿಯರ್, ದಾಕ್ತೆರ್, ವಕೀಲ್, ಗ್ರೇಸ್ತ್ ವಾ ದುಬ್ಳೊ, ಎಕ್ಲೊಚ್ ಪೂತ್ ವಾ ಧುವ್ ಹೆಂ ಸಗ್ಳೆಂ ದೆವಾಕ್ ನಗಣ್ಯ್. ತಾಕಾ ಜಾಯ್ ಜಾತಾನಾ ತೊ ವಿಂಚ್ತಾ ಆನಿ ಹ್ಯಾ ಮುಕಾಂತ್ರ್ ತಾಚೆಂ ಸತಾ-ನಿತಿಚೆಂ ರಾಜ್ ಹ್ಯಾ ಸಂಸಾರಿಂ ಬಾಂದುನ್ ಹಾಡುಂಕ್ ತೊ ಆಪ್ಣೆಂ ವಿಂಚ್ಲಲ್ಯಾಂಕ್ ಧಾಡ್ತಾ. ಅಸಲ್ಯಾಚ್ ವರ್ಗಾಕ್ ಸೆರ್ವಾತಾ ಇಟಲಿಚೊ ‘ಬೊವ್ ಸೊಭಿತ್’ ತರ್ನಾಟೊ. ಆಪ್ಲಿ ಮೊಡೆಲಿಂಗ್ ವೃತ್ತಿ ಸಾಂಡುನ್ ಏಕ್ ಯಾಜಕ್ ಜಾಂವ್ಕ್ ತೊ ಭಾಯ್ರ್ ಸರ್‍ಲಾ.

ಎಡ್ವರ್ಡೊ ಸಾಂಟಿನಿ, 21 ವರ್‍ಸಾಂ ಪ್ರಾಯೆಚೊ ಇಟಲಿಚೊ ಬೊವ್ ರುಪೇಸ್ತ್ ಯುವಕ್. 2019 ವ್ಯಾ ವರ್‍ಸಾ ‘ಫ್ಯಾಶನ್ ಗ್ರೂಪ್ ಎಬಿ‌ಇ’ ಹಾಂಚ್ಯಾ ಪ್ರಾಯೋಜಕ್‌ಪಣಾರ್ ಆಯೋಜಿತ್ ಕೆಲ್ಲ್ಯಾ ಸೊಭಾಯೆ ಸ್ಪರ್ಧ್ಯಾ ವೆಳಾ ತಾಚ್ಯೆ 17 ವರ್‍ಸಾಂಚ್ಯೆ ಪ್ರಾಯೆರ್ ತಾಕಾ ಇಟಲಿಚೊ ಬೊವ್ ರುಪೇಸ್ತ್ ದಾದ್ಲೊ (the most handsome man) ಮ್ಹಳ್ಳೆಂ ಬಿರುದ್ ಫಾವೊ ಜಾಲೆಂ. ಸಾಂಟಿನಿ ಏಕ್ ದೆಣ್ಯಾವಂತ್ ಯುವಕ್. ನ್ಹಯ್ಚ್ ತಾಚ್ಯೆ ಸೊಭಾಯೆಕ್ ಬಗಾರ್ ತೊ ಏಕ್ ನಟ್, ನಾಚ್ಪಿ ಜಾವ್ನ್ ಪ್ರಖ್ಯಾತ್ ಜಾವ್ನ್ ಯೆತಾಲೊ. 

ತಾಚೆಮುಕಾರ್ ಹ್ಯಾ ಸಂಸಾರಾಚೆ ಸರ್ವ್ ಆವ್ಕಾಸ್ ಉಗ್ತೆ ಆಸ್‌ಲ್ಲೆ, ತಾಚ್ಯೆ ವೃತ್ತೆಂತ್ ತಾಕಾ ಜಾಯ್‌ಪುರ್‍ತೆಂ ನಾಂವ್, ದುಡು ಸಗ್ಳೆಂ ಮೆಳ್ತಾಲೆಂ. ಜಾಯ್ತೆ ಅಭಿಮಾನಿ ತಾಕಾ ಆಸ್‌ಲ್ಲೆ. ರಂಗಾಳ್ ಸಂಸಾರ್ ತಾಚೆಭೊಂವಾರಿಂ ಆಸ್‌ಲ್ಲೊ. ಪುಣ್ ಹೆಂ ಸಗ್ಳೆಂ ಸೊಡುನ್ ತೊ ಆಧ್ಯಾತ್ಮಿಕ್ ಜಿವಿತಾ ಕುಶಿನ್ ಆಕರ್ಶಿತ್ ಜಾಲೊ. ಸಂಸಾರ್ ತಾಚ್ಯಾ ಪಾಟ್ಲ್ಯಾನ್ ಯೆತಾನಾ, ತೊ ಜೆಜು ಕುಶಿನ್ ಘುಂವ್ಲೊ. ಆಪ್ಲ್ಯಾ ಮೊಡೆಲಿಂಗ್ ಸಂಸಾರಾಕ್ ಪಾಟ್ ಕರ್‍ನ್ ಆಪ್ಲೆಂ ಜಿವಿತ್ ಸೊಮಿಯಾಕ್ ಸಮರ್ಪುನ್ ಏಕ್ ಯಾಜಕ್ ಜಾಂವ್ಚ್ಯಾಕ್ ಫುಡೆಂ ಸರ್‍ಲಾ.

2022 ಇಸ್ವೆಂತ್ ಸಾಂಟಿನಿ ದೊಗಾಂ ಯಾಜಕಾಂ ಸಾಂಗಾತಾ ಜಿಯೆಂವ್ಕ್ ಗೆಲೊ. “ಹೊ ಮ್ಹಜ್ಯಾ ಜಿವಿತಾಂತ್ಲೊ ಬೊವ್ ವರ್ತೊ ಅನ್ಭೋಗ್” ಮ್ಹಣ್ ತೊ ಸಾಂಗ್ತಾ. ಹ್ಯಾ ಅನ್ಭೊಗಾ ಉಪ್ರಾಂತ್ ಆಪ್ಣೆಂ ಸೆಮಿನರಿಕ್ ಭರ್‍ತಿ ಜಾಂವ್ಚ್ಯಾಕ್ ಏಕ್ ವರ್‍ಸ್ ಪೂರ್ವ್ ತರ್ಬೆತಿ ಜೊಡುಂಕ್ ಆರ್ಚ್ ಬಿಸ್ಪಾಲಾಗಿಂ ತಾಣೆಂ ಪರ್ವಣ್ಗಿ ವಿಚಾರ್‍ಲಿ. ನವೆಂಬರ್ ೨೩, ೨೦೨೩ವೆರ್ ಸಮಾಜಿಕ್ ಜಾಳಿ ಜಾಗ್ಯಾರ್ ಮೊಕ್ಳಿಕ್ ಕೆಲ್ಲ್ಯಾ ವೀಡಿಯೋಂತ್ ಆಪ್ಣೆಂ ಯಾಜಕ್ ಜಾಂವ್ಕ್ ನಿರ್ಧಾರ್ ಘೆತ್ಲಾ ಮ್ಹಣ್ ತೊ ಕಳಯ್ತಾ. ಪೋರ್ಚುಗಲಾಂತ್ ಚಲ್ಲಲ್ಯಾ ಜಾಗತಿಕ್ ಯುವ ದಿವಸ್ ೨೦೨೩ ಹಾಂತುಂ ಭಾಗ್ ಘೆತ್‌ಲ್ಲೆವರ್ವಿಂ ಆಪ್ಣಾಚ್ಯಾ ಜಿವಿತಾಂತ್ ಏಕ್ ನವಿ ದಿಶಾ ಆಯ್ಲಿ ಮ್ಹಣ್ ತೊ ಸಾಂಗ್ತಾ.

ಮುಕಾರುನ್ ತೊ ಮ್ಹಣ್ತಾ: ಹಾಂವೆಂ ಮೊಡೆಲಿಂಗ್, ನಟನ್ ಆನಿ ನಾಚ್ ಸೊಡುಂಕ್ ನಿರ್ಧಾರ್ ಘೆತ್ಲಾ. ತಶೆಂ ಮ್ಹಣ್ ಹಿಂ ಮ್ಹಜಿಂ ದೆಣಿಂ ಹಾಂವ್ ತ್ಯಾಗ್ ಕರಿನಾ ಬಗಾರ್ ತಿಂ ದೆವಾಕ್ ಅರ್ಪುನ್ ನವ್ಯಾ ರುಪಾನ್ ಗಳ್ಸಿತಾಂ.” ಎಕಾ ಆಲ್ತಾರಿ ಮುಕಾರ್ ತಾಣೆಂ ದಿಂಬಿ ಘಾಲ್ಲಿ ತಸ್ವೀರ್ ಹ್ಯಾ ವೀಡಿಯೋಂತ್ ಪಳೆಂವ್ಕ್ ಮೆಳ್ತಾ.

‘ನ್ಯೂಯೊರ್ಕ್ ಪೋಸ್ಟ್’ ಹಾಂತುಂ ಸಾಂಟಿನಿಚಿಂ ಭೊಗ್ಣಾಂ ವಿವರಿಲ್ಯಾಂತ್. “ಮ್ಹಾಕಾ ಜಾಯ್ತ್ಯಾ ಯುವಜಣಾಂಕ್ ಭೆಟ್ಚೊ ಆವ್ಕಾಸ್ ಮೆಳ್‌ಲ್ಲೊ. ತಾಣಿಂ ಮ್ಹಾಕಾ ಮ್ಹಜ್ಯಾ ಲ್ಹಾನ್ಪಣಾಥಾವ್ನ್ ಮ್ಹಜ್ಯೆ ಮತಿಂತ್ ಆಸ್‌ಲ್ಲ್ಯಾ ದೇವ್ ಆಪೊವ್ಣ್ಯಾಚ್ಯಾ ಸವಾಲಾಕ್ ಜಾಪ್ ಸೊಧುಂಕ್ ಪ್ರೇರಣ್ ದಿಲ್ಲೆಂ ತರೀ ಕಾಂಯ್ ಥೊಡ್ಯೆ ಕಾವ್ಜೆಣೆಕ್ ಲಾಗೊನ್ ತಾಂತುಂ ಮುಕಾರ್ ವಚೊಂಕ್ ಜಾಲೆಂನಾ. ಅರ್ವಿಲ್ಯಾ ದಿಸಾಂನಿ ಹಾಂವ್ ಜಾಯ್ತ್ಯಾ ಬರ್‍ಯಾ ಮನ್ಶಾಂಕ್ ಭೆಟ್ಲಾಂ. ತಾಂಚೆಮುಕಾಂತ್ರ್ ಮ್ಹಜಿ ಕಲಾ ಅನ್ಭೋಗ್ ಕರುಂಕ್, ತಿ ಪ್ರದರ್ಶಿತ್ ಕರುಂಕ್ ಮ್ಹಾಕಾ ಪ್ರೇರಣ್ ಲಾಬ್ಲಾಂ. ಮ್ಹಜೆಥಂಯ್ ಆಸ್‌ಲ್ಲಿ ತಿ ಕಲಾ ಹಾಂವ್ ತ್ಯಾಗ್ ಕರಿನಾ ಬಗಾರ್ ನವ್ಯೆ ದಿಶೆನ್ ತಿ ಹಾಂವ್ ಗಳ್ಸಿತಲೊಂ” ಸಾಂಟಿನಿಕ್ 8,000 ವಯ್ರ್ ಇನ್ಸ್ಟಾಗ್ರಾಮ್ ಫೊಲೊವರ್‍ಸ್ ಆಸಾತ್ ಆನಿ ತಾಂಚೆಥಾವ್ನ್ ವಿವಿಧ್ ರಿತಿಚ್ಯೊ ಪ್ರತಿಕ್ರಿಯಾ ತಾಕಾ ಆಯ್ಲ್ಯಾತ್.

“ದೆವಾಚೆಂ ಕಾಳಿಜ್ ಸಂತೊಸಾನ್ ಭರ್‍ಲಾಂ. ತಾಚ್ಯಾ ಬಗ್ಲೆನ್ ಚಲ್ ಆನಿ ತೊ ತುಕಾ ಆನಿಕೀ ಚಡ್ ಸೊಭಿತ್ ವಸ್ತು ದಾಕಯ್ತೊಲೊ. ಹಾಂವ್ ತುಜೆಥಂಯ್ ಸಂತೊಸ್ ಪಾವ್ತಾಂ” ಮ್ಹಣ್ತಾ ಎಕ್ಲೊ. “ದೇವ್ ತುಕಾ ತಾಚೆಂ ಹಾತೆರ್ ಕರುಂದಿ! ಮ್ಹ್ಹಾಕಾಯ್ ಅಸಲೆಂಚ್ ಏಕ್ ಸಪಣ್ ಆಸಾ, ಆನಿ ಮ್ಹಜ್ಯಾ ಇಶ್ಟಾ, ಹಾಂವ್ ತುಜೆಖಾತಿರ್ ಮಾಗ್ತಾಂ” ಮ್ಹಣ್ತಾ ಆನ್ಯೆಕ್ಲೊ. ದೆವಾಚ್ಯೊ ವಾಟೊ ಕಿತ್ಲ್ಯೊ ವಿಚಿತ್ರ್ ನ್ಹಯ್‌ಗೀ? ಸಾಂಟಿನಿಬರಿ ದೇವ್ ತುಕಾಯ್ ಆಪಯ್ತಾ ಮ್ಹಣ್ ಭೊಗ್ತಾ ಜಾಲ್ಯಾರ್ “ಸಾಂಡ್ ಜಾಳಾಂ ತುಜಿಂ ದರ್ಯಾ ವೆಳೆರೀ…” ಆನಿ ತಾಚೊ ಪಾಟ್ಲಾವ್ ಕರ್. ತೊ ತುಜ್ಯಾ ಜಿವಿತಾಂತ್ ಆನಿಕೀ ಚಡ್ ಅದ್ಭುತಾಂ ಕರ್‍ತೊಲೊ.

✍️ –ರಿಚರ್ಡ್ ಅಲ್ವಾರಿಸ್