ಮಾರ್ಕೆಟಿ ಥಾವ್ನ್ ಶೀತಲ್ ಗೆಟಿಲಾಗಿಂ ಪಾವ್‌ಲ್ಲೆಂಚ್ ಜನೆಲಾಂತ್ಲ್ಯಾನ್ ತಿಳ್ಚ್ಯಾ ಸಾಸುಮಾಂಯ್ಕ್ ಪಳೆವ್ನ್ ಜಡಾಯೆಚಿಂ ಪಾವ್ಲಾಂ ಘೆವ್ನ್ ಭಿತರ್ ಘುಸ್ಲೆಂ. ಹೆಂ ಪಳೆಯ್ಲ್ಯಾ ಮೇರಿಬಾಯೆಕ್ ತಡ್ವೊಂಕ್ ಜಾಲೆಂ ನಾ. ಸದಾಂಯ್ ಆಪ್ಣಾನ್ ಹಾಡ್‌ಲ್ಲ್ಯೊ ವಸ್ತು ಪ್ರದರ್ಶನ್ ಕರ್‍ನ್ ಕುಡಾಕ್ ವೆಚೆಂ ಸುನ್ ಆಜ್ ಕಿತ್ಯಾಕ್ ಚಾಪ್ಪೆ ಮ್ಹಣ್ ಆಜಾಪ್ಲಿ ತಿ. ಭಿತರ್ ತೆಂ ಕಿತೆಂ ಕರ್ತಾ ಮ್ಹಣ್ ಬಾಗ್ಲಾ ಥಾವ್ನ್ ತಿಣೆಂ ತಿಳುಂವ್ಕಿ ಶೀತಲಾನ್ ‘ರಪ್’ ಕರ್‍ನ್ ಬಾಗಿಲ್ ಉಗ್ತೆಂ ಕರುಂಗೀ ಸಮಾ ಜಾತಾನಾಂ ಹಿಚೆಂ ತೋಂಡ್ ‘ಇಂಗು ತಿಂದ ಮಂಗ’ ಬರಿಂಚ್ ಜಾಲ್ಲೆಂ. ತೆಂ ದಾಖಯ್ತಾಸ್ತಾಂ ಪಾದ್ದೆವ್ನ್ “ಹೆ…ಹೆ…ತೆಂ… ಕಿತೆಂ ಜಾಲೆಂ ಶೀತಲ್? ಭಾರಿಚ್ಚ್ ಖಂತಿನ್ ಆಸಾಯ್?” ಮ್ಹಣ್ ಸೈಲಾಪ್ ಉಚಾರಿಲಾಗ್ಲಿ. ಶೀತಲಾಕ್ ತಿಚೊ ಮತ್ಲಬ್ ಸಮ್ಜಾಲ್ಯಾರೀ “ಕಾಂಯ್ ನಾ ಮಮ್ಮಿ” ಮ್ಹಣಾತ್ತ್ ಸೊಫಾಚೆರ್ ಗಳ್ಳೆಂ. “ತಶೆಂ ಮ್ಹಣಾನಾಕಾ ಶೀತಲ್. ತುಜೊ ಜಿನೊಸ್ ಪಳೆಯ್ತಾನಾ ಬೆಜಾರ್ ಜಾತಾ. ಕಿತೆಂ ಜಾಲಾಂ ಸಾಂಗ್ ?” ತಿಣೆಂ ಬೊಳಾಯ್ಲೆಂ. ತೆದ್ನಾಂ ಶೀತಲಾನ್ ಲಿಪಯ್ಲ್ಯಾರ್ ಆಪ್ಣಾಕ್ ಅಪಾಯ್ ಮ್ಹಣ್ ಮನ್ ಘಟ್ ಕೆಲ್ಯಾರೀ ರಡ್ಣೆಂ ಉಮಾಳುನ್ ಆಯ್ಲೆಂ.

ತೆಂ ಪಳೆವ್ನ್ ಮೇರಿಮಾಂಯ್ ಘಾಬರ್‍ಲಿ. ಎದೊಳ್ ಪರ್‍ಯಾನ್ ಕಿತ್ಲೆ ಸಮಸ್ಯೆ ಆಸ್ಲ್ಯಾರೀ ಧೈರಾನ್ ಫುಡ್ ಕರ್‍ಚೆಂ ಸುನ್ ಆತಾಂ ಗಳ್ಗಾಳ್ಯಾಂ ರಡ್ತಾನಾಂ ಪರ್ಗವಾಂತ್ಲ್ಯಾ ಪುತಾಕ್ ಕಿತೆಂ ತರೀ ಜಾಲೆಂಗೀ? ವಾ ಹಾಚಾ ಆಟ್-ನೆಟಾಂಕ್ ಬುಲೊನ್ ಕೊಣಿಪುಣೀ ದೊಳೊ ಮೊಡ್ಲೊಗೀ? ಕಳಿತ್ ನಾಸ್ತಾಂ ತಿ ಗಡ್ಬಡ್ಲಿ. ಹಳ್ವಾಯೆನ್ ತಾಚೆಂ ಮಾತೆಂ ಪುಸುನ್ “ಕಿತೆಂ ಜಾಲೆಂ ಶೀತಲ್?” ವಿಚಾರಿಲಾಗ್ಲಿ ಮೊಗಾನ್. ತೆದ್ವಾಂ ಶೀತಲ್, “ಮಮ್ಮಿ, ಹಾಂವ್ ಆಜ್ ಮಾರ್ಕೆಟಿಕ್ ಘಾಲ್ನ್ ಗೆಲ್ಲಿ ಭಾಂಗಾರಾಚಿ ಸರ್‍ಪಳಿ ಕೊಣೆಂಗೀ ಚೊರ್‍ಲಿ. “ತೆಂ ಸುಸ್ಕಾರ್‍ಲೆಂ. ಹೆಂ ಆಯ್ಕೊನ್ ತಿ ಸಗ್ಳಿ ಖುಬಾಳುನ್, “ಕಿತೆಂ? ಕಿತೆಂ ಉಲಯ್ತಾಯ್ ತುಂ ಶೀತಲ್? ಸರ್‍ಪಳಿ ಕೊಣೆಂ ಕಾಡ್ಲಿ? ಕಶೆಂ ಕಾಡ್ಲಿ? “ತಿಚೊ ತಾಳೊ ಯಕ್ಷಗಾನಾ ಪಾತ್ರಧಾರಿಬರಿ ಬದ್ಲಾಲ್ಲೊ. “ಮಮ್ಮಿ, ಮಾರ್ಕೆಟಿಲಾಗಿಂ ಗಾಡಿ ರಾವೊವ್ನ್ ವಸ್ತು ಕಾಣ್ಘೆವ್ನ್ ಗೆಲ್ಲಿಂ. ಪಾಟಿಂ ಯೆತಾನಾಂ ಹೋಳಿ ಫೆಸ್ತ್ ಆಚರಣ್ ಕರ್‍ಚಾ ಎಕಾ ಪಂಗ್ಡಾಂತ್ ಶಿರ್ಕಾಲಿಂ. ಕೊಣೆಂಗೀ ಸರ್‍ಪಳಿ ವೊಡ್ಲಿ ಹಾಂವ್ ಸಕ್ಲಾ ಪಡ್ಲಿಂ. ಪಾಟಿಂ ಘರಾ ಯೆತಾನಾಂಚ್ ಚೊರಿ ಜಾಲ್ಲೆವಿಶಿಂ ಕಳಿತ್ ಜಾಲೆಂ. ದಯಾಕರ್‍ನ್ ಮ್ಹಾಕಾ ಭೊಗ್ಶಿ ಮಮ್ಮಿ” ತೆಂ ಸಗ್ಳೆಂಚ್ ಗಳ್ಳೆಂ.

ಮೇರಿಬಾಯೆಕ್ ಸುನೆಚೆರ್ ಬಿರ್ಮತಿಚ್ಯಾಕೀ ಚಡಿತ್ ರಾಗ್ ಆಸ್‌ಲ್ಲೊ. ತಿಣೆಂ ಕಿತೆಂ ಸಾಂಗ್ಲ್ಯಾರೀ ಪಾಟಿಂ ಉಲಯ್ತಾಲೆಂ. ಅಪುಣ್ಂಚ್ ಬುದ್ವಂತ್ ಮ್ಹಣ್ ಚಿಂತಾಲೆಂ. ಏಕ್ ಚೂಕ್ ಹೆರಾಂ ಥಾವ್ನ್ ಘಡ್ಲ್ಯಾರೀ ಸೊಸಿನಾತ್ಲೆಂ. ಆತಾಂ ತಾಚೆ ಥಾವ್ನ್ ಚೂಕ್ ಜಾಲ್ಯಾ. ಏಕ್ ಸರ್‍ಪಳಿ ತಾಚಾ ಕುಳಾರಾಚಿ ಕಾಣಿಕ್ ಮ್ಹಣ್ ಹಂಕಾರ್ ಕರ್‍ತಾಲೆಂ. ತಿಚ್ಚ್ ಸರ್‍ಪಳಿ ಭಾಯ್ರ್ ಪಡ್ಲೊ ವಿಶಯ್ ಕುಟ್ಮಾಂಚ್ಯಾಕ್ ಕಳ್ತಾನಾಂ ಹಾಚೊ ಹಂಕಾರ್ ಜಿರ್‍ತಾ. ತಾಕಾ ಮಾತ್ಯಾರ್ ದವರ್‍ನ್ ವಾವೊಂಚ್ಯಾ ಪುತಾಲಾಗಿಂ ತಾಚೆ ವಿಶಿಂ ಇಲ್ಲೆಂ ಸಾಂಗೊಂವ್ಕ್ ಮೆಳ್ಳೆಂ ಮ್ಹಣ್ ಚಿಂತುನ್, “ಪರಾಮಶೆನ್ ಥೊಡ್ಯಾ ಪಾವ್ಟಿಂ ತಶೆಂ ಘಡ್ತಾ ಪುತಾ. ತುಂ ಖಂತ್ ಕರಿನಾಕಾ ಪೋಲಿಸ್ ಕಂಪ್ಲೆಂಟ್ ದಿವ್ಯಾಂ” ಮ್ಹಣ್ ಅಧುರ್‍ಯಾ ಮನಾಂತ್ ಭುಜೊಂವ್ಕ್ ಲಾಗ್ಲಿ ಆನಿ ಆಪ್ಣಾನ್ ತಾಕಾ ಭೊಗ್ಶಿಲಾಂ ಮ್ಹಳ್ಳ್ಯಾ ಚಿಂತ್ಪಾನ್ ತಿ ಖೂಬ್ ಖುಶಿ ಜಾಲಿ.

ತಿಚಿಂ ಉತ್ರಾಂ ಆಯ್ಕೊನ್ ಶೀತಲಾನ್ ದೀಗ್ ಸ್ವಾಸ್ ಘೆತ್ಲೊ. ನಾಂ ತರ್ ತಿಚ್ಯಾ ಕಠೋರ್ ಉತ್ರಾಂನಿ ಮನ್ ದುಕಯ್ತಾ ಮ್ಹಳ್ಳೆಂ ತಾಕಾ ಸಾರ್ಕೆ ಕಳಿತ್ ಆಸ್‌ಲ್ಲೆಂ. “ಪೋಲಿಸ್ ಕಂಪ್ಲೆಂಟ್ ದಿಲಾಂ ಮಮ್ಮಿ” ಪೂಣ್ ತುಜೊ ಪೂತ್… “ತೆಂ ಕಸ್ಕಸ್ಲೆಂ. “ಮ್ಹಜಾ ಪುತಾಕ್ ಕಿತೆಂ ಜಾಲೆಂ? ಕಿತೆಂ ವಾಯ್ಟ್ ಘಡ್ಲೆಂ? ಯೆ ದೆವಾ? ತುಂ ಕಿತ್ಯಾಕ್ ಆಮ್ಚಿ ಪರೀಕ್ಷಾ ಕರ್ತಾಯ್?” ತಿಚಿ ಬೋಬ್ ಚಡ್ಲಿ. “ಅನ್ವಾರಾಂ ಆಯ್ಲ್ಯಾರ್ ವಾದಾಳಾ ಪರಿಂಚ್ ಯೆಂವ್ಚಿಂ. ತ್ಯಾ ಚೊರಾಕ್ ಮ್ಹಜ್ಯಾ ಘರ್‍ಚಿಚ್ಚ್ ಸರ್‍ಪಳಿ ಜಾಯ್ ಆಸ್‌ಲ್ಲಿಗೀ? ಮ್ಹಜಾ ಪುತಾಕ್‌ಚ್ಚ್ ಅನ್ವಾರ್ ಯೇಜೆಗಿ?” ತಿ ಉಚಾಂಬಳ್ ಜಾತಾನಾಂ ತಿಣೆಂ ಶೀತಲಾಕ್ ಭುಜಂವ್ಚೆಂಗೀ ವಾ ತಿಚಾ ದುಕಾಂನಿ ತಾಕಾ ಭಿಜೊಂವ್ಚೆಂಗೀ ಮ್ಹಣ್ ಶೀತಲ್ ದುಬಾವ್ಲೆಂ ಆನಿ “ಮಮ್ಮಿ ಚಿಕ್ಕೆ ಥಂಡ್ ರಾವ್… ತಾಕಾ ಕಾಂಯ್ ಜಾಂವ್ಕ್ ನಾ ಮ್ಹಣಾಲೆಂ”. “ಆನಿ ಕಿತೆಂ ಜಾಲೆಂ ತರ್?” ಭಾರಿಚ್ಚ್ ಥಂಡಾಯೆಚಿ ಝಳಕ್ ತಿಚಾ ತಾಳ್ಯಾಂತ್ ದೆವ್ಲಿ. “ತಾಕಾ ಕಾಂಯ್ ಜಾಂವ್ಕ್ ನಾ ಮಮ್ಮಿ… ವಿಶಯ್ ಕಳ್ಳ್ಯಾರ್ ತೊ ರಾಗಾರ್ ಜಾಯ್ತ್ ಮ್ಹಣ್ ಭೈಂ ದಿಸ್ತಾ.” ತಾಣೆಂ ನಾಕ್ ಪುಸ್ಲೆಂ. ತಿತ್ಲೆಂಚ್‌ಗೀ? ತುಂ ಖಂತ್ ಕರಿನಾಕಾ… ಹಾಂವ್ ತಾಕಾ ಸಾಂಗ್ತಾಂ. ಭಾಂಗಾರಾ ತಸಲ್ಯಾ ಸುನೆಕ್ ಕಾಂಯ್ ಜಾಂವ್ಕ್ ನಾ. ಭಾಂಗಾರ್ ಮಾತ್ರ್ ಗೆಲೆಂ ಮ್ಹಣ್.  ತೆಂ ಆಸುಂ. ತಿ ಚೊರಿ ಜಾಲ್ಲಿ ಸರ್‍ಪಳಿ ಖಂಚಿ? ತುಜ್ಯಾ ಭಾವಾನ್ ದಿಲ್ಲಿ ವಾ ಡ್ಯಾಡಿನ್? ತಿಕಾ ವಿಶಯ್ ಸ್ಪಷ್ಟ್ ಜಾಯ್ಜಾಯ್ ಆಸ್‌ಲ್ಲೆಂ. ತಿ..ತಿ.. ತೆಂ ಪಾದ್ದೆಲೆಂ. “ತಿಚ್ಚ್, ಸಾಂಗ್ ಕಾಂಯ್ ಭಿಯೆನಾಕಾ” ತಿಣೆಂ ಧೈರ್ ದಿಲೆಂ. ತಿ… ಮಮ್ಮಿ ತುಜ್ಯಾ ಧುವೆನ್ ಅದ್ಲ್ಯಾ ಹಫ್ತ್ಯಾಂತ್ ಮ್ಹಜೆ ಲಾಗಿಂ ದವರುಂಕ್ ದಿಲ್ಲಿ ತುಜಿಚ್ಚ್ ಸರ್‍ಪಳಿ! “ತಾಣೆಂ ಉಸ್ವಾಸ್ ಭರಾನ್ ಘೆತ್ಲೊ. ಹೆಂ ಆಯ್ಕೊನ್ ಮೇರಿಬಾಯ್ ಮರಿಯೆಚಾ ಮೂರ್ತಿ ಬರಿ ರೂಕ್ ಜಾಲಿ. ಘಡ್ಗಡೊ ಝಗ್ಣಾಣೆಂ ಎಕಾಚ್ಚಾಣೆಂ ತಿಚಾ ತಳ್ಮಟ್ಯಾಕ್ ಮಾರ್‌ಲ್ಲೆಂ ಬರಿಂ ಜಾವ್ನ್ ತಿಚಿ ತಕ್ಲಿ ಗಿರ್ಗಿರ್‍ಲಿ. ತೆದ್ನಾಂ ಕುಜ್ನಾಂತ್ಲೆಂ ಲಿಲ್ಲಿ, ಬ್ರದರ್ ಪ್ರಕಾಶಾಚೆಂ ಮಾಗ್ಣೆಂ ಆಯ್ಕಾತಾಲೆಂ. “ಲೂಕ್ ೬:೩೦ ತುಜೆಲಾಗಿಂ ವಿಚಾರ್‍ತಲ್ಯಾಕ್ ವಿಚಾರ್‌ಲ್ಲೆಂ ದೀ ಆನಿ ತುಜಿ ವಸ್ತ್ ಕಾಡುನ್ ವೆಲ್ಲ್ಯಾಕ್ ತಿ ಪಾಟಿಂ ದೀ ಮ್ಹಣ್ ವಿಚಾರಿನಾಕಾ. ಹೆರಾಂನಿ ತುಕಾ ಕಶೆಂ ಚಲಯ್ಜೆ ಮ್ಹಣ್ ತುಜಿ ಖುಶಿ ತಶೆಂಚ್ ಹೆರಾಂಕೀ ತುಂ ಚಲಯ್.

✍️ –ಅನಿತಾ ಅರ್ಸುಲಯ್ನ್