“ಖಾಣ್ ಕಳಿತ್ ಆಸ್‌ಲ್ಲ್ಯಾಕ್ ಪಿಡಾ ನಾ ಆನಿ ಉಲೊಂವ್ಕ್ ಕಳಿಕ್ ಆಸ್ಚ್ಯಾಕ್ ಝಗ್ಡೆಂ ನಾ” ಮ್ಹಳ್ಳಿ ಏಕ್ ಸಾಂಗ್ಣಿ ಆಸಾ. ಖಾಣಾವಿಶಿಂ ಹರ್‍ಯೇಕಾ ಹಂತಾರ್ ಜೊಕ್ತಿ ಜಾಗ್ರುತ್ಕಾಯ್ ಸಾಂಬಾಳ್ಳ್ಯಾರ್, ಗರ್ಜೆಚಿ ಸಮ್ಜೊಣಿ ಜೊಡ್ಲ್ಯಾರ್ ಜಾಯಿತ್ತ್ಯೊ ಪಿಡಾ ಆಡಾವ್ಯೆತ್ ಆನಿ ಬರಿ ಭಲಾಯ್ಕಿ ಜೊಡ್ಯೆತ್. ದೆಕುನ್ ಪಯ್ಲ್ಯಾನ್ ಪಯ್ಲೆಂ ಖಾಣಾಚಿ ಭದ್ರತಿ ವ ಸುರಕ್ಷಾ ಗರ್ಜೆಚಿ.

ಶೆತಾ ಥಾವ್ನ್ ಪ್ಲೇಟಿ ಪರ್ಯಾಂತ್ ಖಾಣಾಚಾ ಭದ್ರತೆಚಿ ಗರ್ಜ್ ಸಮ್ಜೊನ್ ವಿಶ್ವ ಆರೋಗ್ ಸಂಸ್ಥಾನ್ ಖಾಣಾಚಾ ಸಂರಕ್ಷಣಾಕ್ ಪ್ರಮುಖ್ ಸ್ಥಾನ್ ದಿಲಾ. ಬರೆಂ ಖಾಣ್ ಬರಿ ಭಲಯ್ಕಿ ಲಾಭಯ್ತಾ. ಪಾಡ್ ಖಾಣ್ ಜಿವಾಕ್ ಭಾದಕ್ ಹಾಡ್ತಾ. ಕುಡಿಕ್ ಪೋಶಣ್ ಹಾಡ್ತಾ ತೆಂ ಖಾಣ್ ಸರ್‍ವಾಂಕ್ ಲಾಭ್ಚ್ಯಾ ಖಾತಿರ್ ವಿವಿಧ್ ಹತಾಂನಿ ಜಾಗ್ರುತ್ಕಾಯ್ ಸಾಂಬಾಳುಂಕ್ ಸರ್ಕಾರಾಚೆ ಪ್ರಯತ್ನ್ ಚಲವ್ನ್ ಆಸಾ.

ಖಾಣಾಚಾ ಸುರಕ್ಷೆಕ್ ಖಾಣ್ ಉತ್ಪದಾನ್ ವಾ ಖಾಣಾಚಾ ಸಂಸ್ಥ್ಯಾಂನಿ ವಾವ್ರ್ ಕರ್‍ತೆಲ್ಯಾಂಕ್ ವಿಶ್ವ ಆರೋಗ್ಯ್ ಸಂಸ್ಥಾನ್ ದಿಲ್ಲೆಂ ಪಾಂಚ್ ಪ್ರಮುಖ್ ವಿಷಯ್.

1. ವಯುಕ್ತಿಕ್ ಕುಡಿ/ಖಾಣಾಚ್ಯಾ ನಿತಳಾಯೆವಿಶಿಂ ಸಮ್ಜೊಣಿ.
2. ಗರ್ಜೆಪುರ್ತೆಂ ರಾಂದಾಪ್.
3. ಕುಸಾಡಾಯ್ ಆಡೊಂವ್ಚಿಂ.
4. ಖಾಣ್ ಪಾಡ್ ಜಾಯ್ನಾತ್ಲ್ಯಾ ಜಾಗ್ಯಾರ್ ಸಂಗ್ರಹಣ್.

ಪ್ರಗತೆಚ್ಯಾ ಮೆಟಾಂನಿ ಚಮ್ಕುನ್ ಆಸ್ಚ್ಯಾ ಬಾರತಾಂತ್ ಜಣಾ ಸಂಖೊ ಚಡ್ತಾನಾ ಖಾಣಾ ಉತ್ಪಾದನ್ ಸವ್ಕಾಸ್ ದೆಂವುಕ್ ಲಾಗ್ಲ್ಯಾತ್. ಜಾಯ್ತೆ ಲ್ಹಾನ್ ವ್ಹಡ್ ಸಮಸ್ಸೆ ಹ್ಯಾ ದಿಶೆನ್ ಆಡ್ಕಳ್ ಜಾಂವ್ಕ್ ಪಾವ್ಲ್ಯಾತ್. ಖಾಣಾಂ ಸಂರಕ್ಷಣ್ ಕರುಂಕ್ ಜೊಕ್ತಿ ವ್ಯವಸ್ಥಾ ನಾ ಜಾಲ್ಯಾ. ಹ್ಯೆ ವರ್ವಿ ಭಾರತಾಂತ್ 8-16 ಠಕ್ಕೆ ತಿತ್ಲ್ಯೊ ಫಳ್‌ವಸ್ತು ಕುಸೊನ್ ವೆತಾತ್. ಉತ್ಪಾದನ್ ಸುವಾತೆರ್ ಫಾವೊತೆಂ ಮೋಲ್ ಮೆಳಾನಾತ್ಲ್ಯಾ ವರ್ವಿಂ ಜೊಕ್ತಿ ಧರ್ ಮೆಳ್ಚ್ಯಾ ಸುವಾತೆಕ್ ಸಾಗ್ಸುಂಕ್ ಸಾರ್‍ಕಿ ವ್ಯವಸ್ಥಾ ನಾ. ಆಸ್ಲ್ಯಾರೀ ತಿ ಮಾರ್‍ಗಾಯೆಚಿ. ಹಾಚೆವರ್ವಿಂ ಜಾಯ್ತೆಂ ಲುಕ್ಸಾಣ್ ಜಾತೇ ಆಸಾ.

ಪ್ರಸ್ತುತ್ ಸಮಾಜೆಚೆರ್ ಜಾಯ್ರಾಂತಾಚೊ ಪ್ರಭಾವ್ ಜಾಯ್ತೊ ಆಸಾ. ಜಾಯ್ರಾತಾಂ ಮುಖಾಂತ್ರ್ ಖಾಣಾಂ ವಿಕ್ಚೊ ದಂದೊ ಚಡತ್ತ್ ಆಸಾ. ನೆಮಾಳ್ಯಾಂನಿ, ಟಿ.ವಿ. ಚೆರ್ ಮಾತ್ರ್ ನ್ಹಯ್ ಆರ್‍ವಿಲ್ಯಾ ದಿಸಾಂನಿ ಅಂತರ್‌ಜಾಳಾಚೆರ್‌ಯಿ ಹೊ ವ್ಯವಹಾರ್ ಚಲೊನ್ ಆಸಾ. ಜಾಯ್ರಾತಾಂನಿ ದಿಲ್ಲೆ ಹರ್‍ಯೇಕ್ ಸತ್ ಮ್ಹಣ್ ಪಾತ್ಯೆಂವ್ಕ್ ಅಸಾಧ್ಯ್. ಭಲಾಯ್ಕೆಚಾ ದೃಷ್ಟೆನ್ ಹರ್‍ಯೇಕ್ ಖಾಣಾವಿಶಿಂ ಜೊಕ್ತಿ ಸಮ್ಜೊಣಿ ಜೊಡ್ನ್ ತಾಚೊ ಉಪ್ಯೋಗ್ ಕೆಲೊ ತರ್ ಭಲಾಯ್ಕೆಬರಿತ್ ಜಿವಿತ್ ಜಿಯೆಂವ್ಕ್ ಸಾಧ್ಯ್.

ಖಾಣಾಚಾ ಭದ್ರತೆವಿಶಿಂ ಸಮ್ಜೊನ್ ಘೆಂವ್ಚ್ಯೊ ವಿಷಯ್ ಜಾಯ್ತ್ಯೊ ಆಸಾತ್. ಹ್ಯಾ ವಿಶ್ಯಾಂತ್ ಚಡಿತ್ ಉಜ್ವಾಡ್ ಲಾಬ್ಚ್ಯಾಕ್ ಜೊಕ್ತಿಂ ಲೇಕನಾಂ ಹ್ಯಾ ಅಂಕ್ಯಾಂತ್ ಪಾಯ್ಸ್ ಕೆಲ್ಯಾಂತ್

✍️ –ಬಾಪ್ ಐವನ್ ಸೊಜ್, ಕಾರ್‍ಮೆಲಿತ್