1. ಬಾಳ್ಪಣ್ ಆನಿ ಕುಟ್ಮಾಚೆಂ ಜಿವಿತ್ ಕಶೆಂ ಆಸ್ಲೆಂ? ಕಿತ್ಲೆಂ ಶಿಕಪ್, ಖಂಯ್ಸರ್ ಜಾಲೆಂ?

ಬಾಳ್ಪಣಾರ್ ಘರಾ ಮಮ್ಮಿ ಮ್ಹಜಿ ಸಕಾಳಿಂ 5.30 ಕ್ ಉಟವ್ನ್ ಮಾಗ್ಣೆಂ ಕರುಂಕ್ ಲಾಯ್ತಾಲಿ ಆನಿ ಮಾಗಿರ್ ಮಿಸಾಕ್ ವೆಚೆಂ ಆಸ್ಲೆಂ. ಆಶೆಂ ಲ್ಹಾನ್ ಥಾವ್ನ್ಂಚ್ ಮಾಗ್ಣೆಂ ಆನಿ ಎವ್ಕರಿಸ್ತ್ ಮ್ಹಾಕಾ ಮಸ್ತು ಲಾಗಿಂ. ಹಾಂವ್ ಬಸ್ರೂರ್ ಸಾಂ. ಫಿಲಿಪ್ ನೆರಿ ಫಿರ್ಗಜೆಚೊ. ಧಾವಿ ಹಾಂವ್ ಶಿಕ್ಲಾಂ. ತ್ಯಾ ಉಪ್ರಾಂತ್ ಹಾಂವ್ ಮುಂಬಯ್ ಗೆಲೊಂ.

2. ಸಕ್ರೀಯ್ ಸುವಾರ್ತಾ ಪರ್ಗಟ್ಣೆಕ್ ಆಪವ್ಣೆಂ ಕಶೆಂ ಮೆಳ್ಳೆಂ? ಮಾಗ್ಣ್ಯಾ ಜಿವಿತಾಕ್ ಆನಿ ಸಕ್ರೀಯ್ ಸುವಾರ್ತಾ ಪರ್ಗಟ್ನೆಕ್ ಪ್ರೇರಣ್ ಜಾಲ್ಲೆಂ ಕಾಂಯ್ ಘಡಿತ್?

ಚೊವ್ದಾ ವರ್ಸಾಂಚೆ ಪ್ರಾಯೆರ್ ಎಕಾ ಅವ್ಘಡಾಂತ್ ಮ್ಹಜೊ ಪಾಂಯ್ ಮೊಡ್ಲೊ. ಸುಮಾರ್ ಚಾರ್ ವರ್ಸಾಂ ಪಾಂಯ್ ದುಕಿನ್ ಹಾಂವ್ ಕಶ್ಟಾಲೊಂ. ಮಾಗಿರ್ ಆಟ್ರಾ ವರ್ಸಾಂಚೆ ಪ್ರಾಯೆರ್ ಪೊಟ್ಟಾ ಡಿವೈನ್ ಸೆಂಟರಾಕ್ ರೆತಿರ್ ಗೆಲ್ಲೆವೆಳಾ ಎಕಾ ಆರಾಧನಾವೆಳಾ ಮಟ್ವೊ ಜಾಲ್ಲೊ ಮ್ಹಜೊ ಪಾಂಯ್ ಸಾರ್ಕೊ ನೀಟ್ ಜಾಲೊ. ಅಸಲ್ಯಾ ಎಕಾ ಬಳಾದೀಕ್ ಅನ್ಭವಾನ್ ಸೊಮ್ಯಾನ್ ಮ್ಹಾಕಾ ತಾಚೆಲಾಗಿಂ ಹಾಡ್ಲೊ ಮ್ಹಣ್ ಆಜ್ ಮ್ಹಾಕಾ ಭೊಗ್ತಾ.

3. ಚಡಾವತ್ ಮಾಗ್ಣ್ಯಾವಿಧಿಂನಿ ತುಮಿ ಕೀರ್ತನಾಂಚೆರ್ ಚಡಿತ್ ಧ್ಯಾನ್ ದಿತಾತ್. ಕೀರ್ತನಾಂಚೆರ್ ಚಡ್ ಮೋಗ್ ಕಿತ್ಯಾಕ್?

ಕೀರ್ತನಾಂ ಆಮ್ ಲೊಕಾಚಿಂ ಮಾಗ್ಣಿಂ ಮ್ಹಣ್ಯೆತ್. ದಾವಿದಾಚ್ಯಾ ವೆವೆಗ್ಳ್ಯಾ ಕೀರ್ತನಾಂನಿ ಆಮ್ಚೆ ತಸಲ್ಯಾಂಚಿ ಬೋಬ್ ಆಸಾ, ಆಶಾ ಆತ್ರೆಗ್ ಆಸಾತ್ ಮಾತ್ರ್ ನ್ಹಯ್ ಸರ್ವ್ ಕಶ್ಟಾಂಪ್ರಾಸ್ ವ್ಹಡ್ ಏಕ್ ದೇವ್ ಆಸಾ ಮ್ಹಣ್ ಆಮ್ಕಾಂ ಕಳ್ತಾ. ತಿಂ ಮಾಗೊಂಕ್ ಸಲೀಸ್ ದೆಕುನ್ ಕೀರ್ತನಾಂಚೆರ್ ಚಡ್ ಹಾಂವೆಂ ಫೋಕಸ್ ಕೆಲಾಂ.

4.ಕೊವಿಡ್ ಸಂದರ್ಭಾರ್ ಆನ್‌ಲೈನ್ ಮಾಗ್ಣೆಂ ಲೊಕಾಕ್ ಚಡಿತ್ ಲಾಗ್ಶಿಲೆಂ ಜಾಲೆಂ. ಹಿ ಆಲೋಚನ್ ಕಶಿ ಆಯ್ಲಿ? ಹಾಚೊ ಪ್ರಭಾವ್ ಲೊಕಾಚೆರ್ ಆನಿ ತುಮ್ಚೆರ್ ಕಿತ್ಲೊ ಜಾಲೊ?

2019 ಡಿಸೆಂಬರಾಂತ್ ಎಕ್ಯೆ ರಾತಿಂ ಇಕ್ರಾ ಥಾವ್ನ್ ಪಾಂಚ್ ವೊರಾಂ ಪಯಾಂತ್ ಆಮಿ ಪವಿತ್ರ್ ಸಾಕ್ರಾಮೆಂತಾಚೆಂ ಆರಾಧನ್ ಕರ್‍ನ್ ಆಸ್ಲ್ಯಾಂವ್. ಹೆಂ 94 ರಾತಿಂ ಆಮಿ ಮುಕಾರುನ್ ವ್ಹೆಲೆಂ. ಹಾಚೊ ಪರಿಣಾಮ್ ಜಾವ್ನ್ ಸೊಮ್ಯಾನ್ ಆಮ್ಕಾಂ ಆನ್‌ಲೈನ್ ಮಾಗ್ಣೆಂ ಕರುನ್ ಕೊವಿಡಾವವಿಂ ಬಂಧ್ ಪಡ್ಲೆಲ್ಯಾ, ಸುಕೊ ಆನಿ ನಿಸ್ತೇಜ್ ಜಾಲ್ಲ್ಯಾ ಸಂಸಾರಾಕ್ ಸಕ್ರೀಯ್ ಕರುಂಕ್ ಆಮ್ಕಾಂ ಏಕ್ ಸಂದರ್ಭ್ ದಿಲೊ. 

5. ಜಿಣ್ಯೆಂತ್ ಜಾಲ್ಲ್ಯಾ ಆವ್ಘಡಾಂತ್ ದೆವಾಚೊ ಆನ್ಭೋಗ್ ಕಸೊ ವೆಕ್ತ್ ಜಾಲೊ?

ಅವ್ಘಡಾ ಉಪ್ರಾಂತ್ ತ್ಯಾ ಎಕಾ ದಿಸಾ ಪವಿತ್ರ್ ಸಾಕ್ರಾಮೆಂತಾಚ್ಯಾ ಆರಾಧನಾಂತ್ ಎವ್ಕರಿಸ್ತಾಚಿ ಸಕತ್ ಅನ್ಭೊಗಾಕ್ ಆಯ್ಲಿ. ಹಿಚ್ ಸಕತ್ ಮ್ಹಾಕಾ ಅಜೂನ್ ಹ್ಯಾ ಮಿಸಾಂವಾಂತ್ ಮುಕಾರ್ ವ್ಹಚೊಂಕ್ ಪ್ರೇರಣ್ ದಿತೇ ಆಸಾ.

6. ದೆವಾಚೆಂ ಉತರ್ ವಾಚುಂಕ್ ವಾ ಎಕೆಕ್ ವೊಳಿ ನಿಯಾಳುಂಕ್ ತುಮಿ ಪ್ರೇರಣ್ ದಿತೇ ಆಸಾತ್. ಕಶೆಂ ಹಿ ಆಲೊಚನ್ ಆಯ್ಲಿ?

ಕೊವಿಡಾವೆಳಾ 94 ರಾತಿಂನಿ ಜೆಂ ದೆವಾಚೆಂ ಉತರ್ ಆಮಿ ವಾಚ್ಲೆಂ ಆನಿ ನಿಯಾಳ್ ಕೆಲೊ ತೆಂಚ್ ಉತರ್ ಮ್ಹಾಕಾ ಪ್ರೇರಣ್ ಆನಿ ಹೆಂ ಪ್ರೇರಣ್ ಹೆರಾಂಕೀ ಹಾಂವ್ ಸಾಂಗ್ತೇ ಆಸಾಂ.

7. ವೆವೆಗ್ಳ್ಯಾ ಜಾಗ್ಯಾಂನಿ ರೆತಿರ್ ತುಮಿ ದಿಲ್ಯಾ. ಲೊಕಾಥಂಯ್ ತುಮಿ ಪಳೆಲ್ಲಿ ವಿಶೇಸ್ ಸಂಗತ್ ಕಸಲಿ?

ಲೋಕ್ ದೆವಾಚ್ಯಾ ಉತ್ರಾಂತ್ ಬಳ್ವಂತ್ ಜಾತೇ ಆಸಾ. ಖಂಯ್ಸರ್ ಗೆಲ್ಯಾರೀ ಏಕ್ ಉತರ್ ಹಾಂವೆಂ ಸಾಂಗ್ಚೆ ಫುಡೆಂಚ್ ಲೊಕಾಚೆ ಜಿಬೆರ್ ದೆವಾಚೆಂ ಉತರ್ ತಯಾರ್ ಆಸ್ತಾ. ಲೊಕಾಂನಿ ದೆವಾಚೆಂ ಉತರ್ ಸಿರಿಯಸ್ಲಿ ಘೆತ್ಲಾಂ ಮ್ಹಳ್ಳೆಂ ಪಳೆಂವ್ಕ್ ಸಂತೊಸ್. ದೆವಾಚ್ಯಾ ಉತ್ರಾಥಾವ್ನ್ ತಾಂಕಾಂ ಬರೆಂಪಣ್ ಲಾಭ್ಲಾಂ ಮ್ಹಳ್ಳ್ಯಾಕ್ ತಿಂಚ್ ಸಾಕ್ಶಿದಾರಾಂ ಜಾವ್ನಾಸಾತ್.

8. ರೆತಿರ್ ದಿಂವ್ಚೆ ಬ್ರದರ್ ವಾ ಪಾದ್ರ್ಯಾಬ್ ಲೊಕಾಥಾವ್ನ್ ಶಾಭಾಸ್ಕಿ ಆನಿ ಇಲ್ಲೆಂ ನಾಂವ್ ಪುರಾ ಮೆಳ್ತಾನಾ ತಾಣಿಂ ವಾಟ್ ಚುಕ್ಚಿ ಆಸ್ತಾ. ದೆವಾ ಪ್ರಾಸ್ ಚಡ್ ಆಪ್ಣಾವಿಶ್ಯಾಂತ್ ಚಡ್ ಉಲಂವ್ಚೆಂ ಆಸ್ತಾ. ಅಸಲ್ಯಾ ಅಪಯಾಂವಿಶಿಂ ತುಮಿ ಕಿತೆಂ ಮ್ಹಣ್ತಾತ್?

ವಯಕ್ತಿಕ್ ಅಭಿಪ್ರಾಯ್ ಸಾಂಗ್ಚೆಂ ತರ್ ತುಮಿ ಉಚಾರ್‍ಲಲೆ ಕಸಲೆಯ್ ಅಪಾಯ್ ಮ್ಹಾಕಾ ಎದೊಳ್ ಲಾಗೊಂಕ್ ನಾಂತ್. ಕಾರಣ್ ಮ್ಹಜೆ ಧ್ಯಾನ್ ಮನ್ ಸಗ್ಳೆಂಯ್ ಸೊಮ್ಯಾಚೆರ್ ಆಸಾ. ತ್ಯಾ ದೆಕುನ್ ಲೊಕಾಮೊಗಾಳಾಯ್, ದುಡು, ಶಾಭಾಸ್ಕಿ, ಕಶ್ಟ್-ದೂಕ್, ಬೆಜಾರಾಯ್ ಆನಿ ಖಂಯ್ಚ್ಯಾಯ್ ತೆಂತೆಸಾಂವಾಂವಿಶಿಂ ಹಾಂವ್ ಚಡಿತ್ ಗುಮಾನ್ ದೀನಾ. 

10. ರೆತಿರೆಂನಿ ‘ಹಾಕಾ ಗೂಣ್ ಜಾಲೆಂ, ತಾಕಾ ಗೂಣ್ ಜಾಲೆಂ’ ಮ್ಹಣ್ ಸಾಂಗೊನ್ ಪಬ್ಲಿಸಿಟಿ ಘೆತಾತ್. ರೆತಿರ್ ಪಂಗ್ಡಾಚೆಚ್ ಆಪ್ಣಾಕ್ ಗೂಣ್ ಜಾಲ್ಲೆಬರಿ ಸಾಕ್ಸ್ ದಿತಾತ್ – ಅಸಲೆ ಅಪವಾದ್ ಮಾಂಡ್ಚೆಂ ಆಜ್ ದಿಸ್ತಾ. ಆಶೆಂ ಕರ್‍ಚೆ ಆಸಾತ್? ತುಮ್ಚ್ಯಾ ಅನ್ಭೊಗಾಪರ್ಮಾಣೆಂ ಕಿತೆಂ ಸಾಂಗ್ಶಾತ್?

ತಶೆಂ ಕರ್‍ಚಿ ಗರ್ಜ್‌ಚ್ ನಾ. ತಸಲೆಂ ಕಪಟ್ಪಣ್ ಆಧಾರ್‌ಲ್ಲೆಂ ಕಳ್ನಾಸ್ತಾನಾಯ್ ಉರನಾ. ಏಕ್ ಸತ್ ಕಿತೆಂಗಿ ಮ್ಹಳ್ಯಾರ್, ದೆವಾಚ್ಯಾ ಪ್ರೇರಕ್ ಅತ್ಮ್ಯಾನ್ ಜಾಂವ್ಚೆಂ ಕಾಮ್ ಕೊಣಾಯ್ ಮನ್ಶಾ ಥಾವ್ನ್ ಆಡಾಂವ್ಕ್ ಜಾಯ್ನಾ. ಪುಣ್ ಖೊಟ್ಯಾ ಸ್ಪಿರಿತಾನ್ ಕಿತೆಂಯ್ ಕೆಲ್ಲೆಂ ತೆಂ ಬಾಳ್ವನಾ. ದೆಕುನ್ ಹೆರಾಂವಿಶಿಂ ಚಿಂತುನ್ ವೇಳ್ ವಿಭಾಡ್ಚೆಪ್ರಾಸ್ ದೆವಾಚ್ಯಾ ಪ್ರೇರಕ್ ಅತ್ಮ್ಯಾಕ್ ಆಯ್ಕುಂಕ್ ಪ್ರಯತ್ನ್ ಕರ್‍ಯಾಂ.

✍️ –