ಶುಭ್‌ವಾರ್ತಾ ಪ್ರಸಾರಾಚೆಂ ಕಾಮ್ ಹ್ಯಾ ಕಾಳಾರ್ ಪಯ್ಲೆಂಚ್ಯಾಕೀ ಸುಲಬ್ ಜಾಲಾಂ. ಆಮ್ಕಾಂ ಜಾಯ್ ತಸಲೆ ಶೆರ್ಮಾಂವ್ ಜಾಯ್ ಜಾಲ್ಲ್ಯಾ ವೆಳಾರ್ ಆತಾಂ ಪಳವ್ಯೆತ್. ಕೊಣಾಯ್ ಪಾದ್ರ್ಯಾಬಾಚೊ ಶೆರ್ಮಾಂವ್ ಲಾಂಬ್ ಆಸಾ ತರ್ ೨x ವೆಗಾನ್ ಪಳವ್ಯೆತ್, ಬರೊ ನಾ ತರ್ ತೊ ಧಾಂಪುನ್ ಆನ್ಯೇಕ್ ಪಳವ್ಯೆತ್. ಕಾಂಯ್ ರೆತಿರೆಕ್ ವಚೊಂಕ್ ಜಾಯ್ನಾ ತರ್ ಘರಾಚ್ ಬಸೊನ್ ರೆತಿರ್ ಕರ್‍ಯೆತ್, ಮೀಸ್ ಆಯ್ಕೊವ್ಯೆತ್. ದೆವಾಚ್ಯಾ ಉತ್ರಾಂವಿಶಿಂ ಕಿತೆಂಯ್ ದುಬಾವ್ ಆಯ್ಲೊ ತರ್ ಕೊ-ಪೈಲಟ್, ಜೆಮಿನಿ, ಚ್ಯಾಟ್ ಜಿಪಿಟಿ ಅಸಲಿಂ ತಾಂತ್ರಿಕ್ ಹಾತೆರಾಂ ವಾಪಾರ್‍ನ್ ಘಡಿಯೆನ್ ಜಾಪ್ ಆಪ್ಣಾವ್ಯೆತ್. ಹ್ಯಾ ದಿಸಾಂನಿ ಸಕಾಳಿಂ ಉಟೊನ್ ವಾಟ್ಸಾಪ್ ಸ್ಟೇಟಸ್ ಪಳೆಲ್ಯಾರ್ ಜಾಯ್ತಿಂ ಕಂತಾರಾಂ, ಜೆಜುಚಿಂ, ಮರಿಯೆಚಿಂ, ಸಾಂತಾಂಚಿಂ ಪಿಂತುರಾಂ, ಬೈಬಲ್ ವೊಳಿ ಇತ್ಯಾದಿ ಪಳೆಂವ್ಕ್ ಮೆಳ್ತಾತ್. ಅಶೆಂ ಜೆಜುನ್ ದಿಲ್ಲೊ “ಸಂಸಾರಾಚ್ಯಾ ಪೊಂತಾನ್ ಪೊಂತಾ ಶುಭ್‌ವಾರ್ತಾ ಪ್ರಸಾರ್ ಕರಾ” ಮ್ಹಳ್ಳೊ ಆದೇಶ್ ಇತ್ಲ್ಯಾ ಬಳಾನ್ ಸತ್ ಜಾತಾ ತರ್, “ಪಿಡಾ ಗೂಣ್ ಕರಾ, ದೆಂವ್ಸಾರ್ ಧಾಂವ್ಡಾಯಾ” ಮ್ಹಣ್ ದಿಲ್ಲೊ ಅಧಿಕಾರ್ ಖಂಯ್‌ಗೀ ಕುಸ್ಕಾಲ್ಲೆಬರಿ ದಿಸ್ತಾ ನ್ಹಯ್‌ಗೀ ಮ್ಹಣ್ಚೆಂ ಥೊಡ್ಯಾಂಚೆಂ ಸವಾಲ್.

ಸುರ್‍ವಿಲ್ಯೆ ಇಗರ್ಜ್‌ಮಾತೆಂತ್ ಗೂಣ್ ಕರ್‍ಚಿಂ ಅಚರ್ಯಾಂ

ಲೂಕಾಚ್ಯಾ ವಾಂಜೆಲಾಂತ್ ಆಮಿ ಪಳೆತಾಂವ್ ಜೆಜು ಪಯ್ಲೆಂ ಬಾರಾ ಜಣಾಂಕ್ ಉಪ್ರಾಂತ್ ಬಾವೆಸತ್ತರ್ ಜಣಾಂಕ್ ಬರಿ ಖಬರ್ ಪರ್ಗಟುಂಕ್ ಧಾಡ್ತಾನಾ ತಾಂಕಾಂ ದೆಂವ್ಸಾರ್ ಧಾಂವ್ಡಾಂವ್ಚಿ ಆನಿ ಪಿಡಾಶಿಡಾ ಗೂಣ್ ಕರ್‍ಚಿ ಪದ್ವಿ ದಿತಾ (ಲೂಕ್ ೯:೧-೨). ತೆ ಪಾಟಿಂ ಯೆತಾತ್ ಆನಿ ಕಶೆಂ ಜೆಜುಚ್ಯಾ ನಾಂವಾನ್ ದೆಂವ್ಸಾರ್ ತಾಂಕಾಂ ಖಾಲ್ ಜಾತಾಲೆ ಮ್ಹಣ್ ವರ್ದಿ ದಿತಾತ್ (ಲೂಕ್ ೧೦: ೧೭-೧೯). ಪೆಂತೆಕೊಸ್ತಾ ಉಪ್ರಾಂತ್ ಸುಂದರ್ ದಾರ್‍ವಾಟ್ಯಾಲಾಗಿಂ ಪೆದ್ರು ಥೊಂಟ್ಯಾ ಮನ್ಶಾಕ್ ಬರೊ ಕರ್‍ತಾ (ಧ.ಕೃ. ೧:೧-೧೦). ಫಿಲಿಪ್ ದೆಂವ್ಸಾರ್ ಧಾಂವ್ಡಾಯ್ತಾ ಆನಿ ಆರಿಗಾರಾಂಕ್ ಬರೆಂ ಕರ್‍ತಾ (ಧ.ಕೃ. ೮:೭) ಪಾವ್ಲುಚ್ಯಾ ಆಂಗಾಕ್ ಲಾಗಯಿಲ್ಲೆ ಲೇಸ್ ಆನಿ ತುವಾಲೆ ಪಿಡೆಸ್ತಾಂಕ್ ಲಾಗಯಿಲ್ಲೆಚ್ ತಿಂ ಗೂಣ್ ಜಾತಾತ್ (ಧ.ಕೃ. ೧೯:೧೧-೧೨). ಅಶೆಂ, ಹೆ ಮಾತ್ ನ್ಹಯ್, ಆನಿಕೀ ಜಾಯ್ತೆ, ಮಣಿಯಾರ್‍ಯಾಂನಿ ಪಿಡಾ ಗೂಣ್ ಕೆಲ್ಲೆ ಆನಿ ದೆಂವ್ಸಾರ್ ಧಾಂವ್ಡಾಯಿಲ್ಲೆ ಧಾಕ್ಲೆ ಆಮ್ಕಾಂ ಪಳೆಂವ್ಕ್ ಮೆಳ್ತಾತ್. ತಶೆಂ ಮ್ಹಳ್ಯಾರ್ ಇಗರ್ಜ್‌ಮಾತೆಚ್ಯೆ ಸುರ್‍ವೇರ್ ಅಜ್ಯಾಂಪಾಂಚೊ ವ್ಹಾಳೊಚ್ ಆಸ್‌ಲ್ಲೊ ಮ್ಹಣ್ ಜಾಲೆಂ.

ಇಗರ್ಜ್‌ಮಾತಾ ಕಿತೆಂ ಶಿಕಯ್ತಾ?

ಜೆಜುನ್ ಆಪ್ಲ್ಯಾ ಶಿಸಾಂಕ್ ದಿಲ್ಲೊ ಹೊ ಅಧಿಕಾರ್ ಕೆದಿಂಚ್ ಪಾಟಿಂ ಕಾಣ್ಗೆಂವ್ಕ್ ನಾ. ಆಪೊಸ್ತಲಾಂ ಮುಕಾಂತ್ರ್ ಯಾಜಕ್ಪಣಾಚ್ಯಾ ಸಾಕ್ರಾಮೆಂತಾಂತ್ ಆಜೂನ್ ತೊ ದೆಂವೊನ್ ಆಯ್ಲಾ. ತೀನ್ ರಿತಿಂನಿ ಹೊ ಅಧಿಕಾರ್ ವಿವರಿಯೆತ್.

೧.ಪಿಡೆಸ್ತಾಂಚಿ ಮಾಖ್ಣಿ: ಹೊ ಸಂಸ್ಕಾರ್ ಸುರ್‍ವಿಲ್ಯೆ ಪವಿತ್ರ್ ಸಭೆಂತ್‌ಚ್ ಚಾಲ್ತೆರ್ ಆಸ್‌ಲ್ಲೊ (ಜಾಕೊ ೫:೧೪-೧೫). ಪಿಡೆಸ್ತಾಂಚ್ಯೆ ಮಾಖ್ಣೆಚೊ ಸಂಸ್ಕಾರ್ ಘೆತ್ಲ್ಯಾ ಉಪ್ರಾಂತ್ ಮರ್‍ಣಾಕ್ ತೆಂಕ್‌ಲ್ಲಿಂ ಮನ್ಶಾಂ ಬರಿಂ ಜಾಲ್ಲೆ ಜಾಯ್ತೆ ಧಾಕ್ಲೆ ಆಸಾತ್.

೨. ಎಕ್ಸೊರ್ಸಿಸಮ್ ವಾ ದೆಂವ್ಸಾರ್ ಧಾಂವ್ಡಾವ್ಚಿ ರೀತ್: ಎಕ್ಸೊರ್ಸಿಸಮ್ ಆಜೂನ್ ಇಗರ್ಜ್‌ಮಾತೆಂತ್ ಪ್ರಸ್ತುತ್ ಆಸಾ. ಆಮ್ಚ್ಯಾ ಪವಿತ್ರ್ ಸ್ನಾನಾಚ್ಯೆ ರಿತಿಂತ್ ಹೆಂ ಎಕ್ಸೊರ್ಸಿಸಮ್ ಆಸಾ. ತಾಚ್ಯಾ ಉಪ್ರಾಂತ್ ಮಾನಸಿಕ್ ಪಿಡಾ ನ್ಹಯ್ ಆಸೊನ್ ನೀಜ್ ಜಾವ್ನ್ ದೆಂವ್ಸಾರಾಚ್ಯೆ ದಾವ್ಲೆಂತ್ ಶಿರ್ಕಲ್ಲ್ಯಾಂಕ್ ಸುಟ್ಕಾ ದಿಂವ್ಚೊ ವಿಶೇಸ್ ಅಧಿಕಾರ್ ಬಿಸ್ಪ್ ಸಾಯ್ಬ್ ವಿಂಚ್ಲಲ್ಯಾ ಯಾಜಕಾಂಕ್ ಅಧಿಕೃತ್ ಜಾವ್ನ್ ದಿತಾ. ಹಿ ರೀತ್ ಆಧಾರ್‍ತಾನಾ ವಿಶೇಸ್ ರುಲಿ ಪಾಳುಂಕ್ ಆಸಾತ್ (ಕ.ಧ.ಶಿ ೧೬೭೩).

೩. ಪವಿತ್ರ್ ಅತ್ಮ್ಯಾಚಿಂ ವಿಶೇಸ್ ದೆಣಿಂ (charisms): ಥೊಡ್ಯಾ ವಿಂಚ್ಲಲ್ಯಾಂಕ್ ಪವಿತ್ರ್ ಅತ್ಮ್ಯಾಚ್ಯಾ ವಿಶೇಸ್ ದೆಣ್ಯಾಂ (charisms) ಮುಕಾಂತ್ರ್ ಸಮುದಾಯಾಚ್ಯಾ ಬರೆಪಣಾಖಾತಿರ್ ಹೆಂ ಮಿಸಾಂವ್ ಲಾಬ್ತಾ (೧ ಕೊರಿ ೧೨: ೭-೧೦). ಹೆಂ ದೆಣೆಂ ಮಣಿಯಾರ್‍ಯಾಂಕ್ ಆಪ್ಶೆಂಚ್ ಲಾಬನಾ. ತ್ಯಾ ತ್ಯಾ ಮಣಿಯಾರ್‍ಯಾಚ್ಯಾ ಮಿಸಾಂವಾಪರ್ಮಾಣೆಂ, ತಾಚ್ಯೆ ಜಿಣಿಯೆಚ್ಯಾ ಪವಿತ್ರ್‌ಪಣಾ ಪರ್ಮಾಣೆಂ ಆನಿ ತಾಣೆಂ ಸೆವಾ ಕರ್‍ಚ್ಯಾ ಸಮುದಾಯಾಚ್ಯಾ ಅತ್ಮೀಕ್ ಗರ್ಜಾಂ ಪರ್ಮಾಣೆಂ ತಾಂಚೊ ಭಾವಾಡ್ತ್ ಬಾಂದುನ್ ಹಾಡ್ಚ್ಯಾಕ್ ಲಾಬ್ತಾ. ಹಾಕಾ Grace of the Officer ಮ್ಹಣ್ಚೆ ನಾಂವ್‌ಯೀ ಆಸಾ.

ಅಚರ್ಯಾಂ ಕೆದಾಳಾ ಗರ್ಜೆಚಿಂ?

ಅಚರ್ಯಾಂ ಗರ್ಜೆಚಿಂ ಅನ್ಭಾವಾಡ್ತ್ಯಾಂಕ್ ದೆವಾಚ್ಯೆ ಪದ್ವೆಚಿ ಆನಿ ಮೊಗಾಚಿ ರೂಚ್ ದೀಂವ್ಕ್. ಏಕ್ ಪಾವ್ಟಿಂ ಸೊಮಿಯಾಚ್ಯಾ ಮೊಗಾಂತ್ ಥಿರ್ ಜಾಲ್ಲ್ಯಾ ವೆಕ್ತಿಕ್ ಅಜ್ಯಾಪಾಂಚಿ ಗರ್ಜ್ ನಾ; ತಾಕಾ ಪಿಡಾ ಗೂಣ್ ಜಾಂವ್ಚಿ ಫಿಕಿರ್ ನಾ. ಸಾಂ. ಜುವಾಂವ್ ಕ್ರಿಸೊಸ್ತೊಮ್ ಮ್ಹಣ್ತಾ: “ಇಗರ್ಜ್‌ಮಾತಾ ಆತಾಂ ವಾಡ್ಲ್ಯಾ ಆನಿ ಥಿರ್ ಜಾಲ್ಯಾ, ಆತಾಂ ಭಾವಾಡ್ತ್ಯಾಂಕ್ ಅದ್ಭುತಾಂಚಿ ಆನಿ ಅಜ್ಯಾಪಾಂಚಿ ಗರ್ಜ್ ನಾ, ಆತಾಂ ವೇಳ್ ತಾಣಿಂ ತಾಂಚ್ಯಾ ಭಾವಾಡ್ತಾನ್ ನಿತಳ್ ಜಾಂವ್ಚೊ” (Homily ೨೯ on ೧ Corinthians). ಸಾಂ. ಆಗುಸ್ತಿನ್ ಸಾಂಗ್ತಾ: “ಇಗರ್ಜ್‌ಮಾತೆಚ್ಯಾ ಜಲ್ಮಾ ವೆಳಾರ್ ಭಾವಾಡ್ತ್ ಥಿರ್ ಕರುಂಕ್, ರಾಶ್ಟ್ರಾಂಕ್ ಕನ್ವಡ್ತರ್ ಕರುಂಕ್, ಶುಭ್‌ವಾರ್ತಾ ಪರ್ಗಟ್ ಜಾಂವ್ಕ್ ಅಜ್ಯಾಪಾಂಚಿ ಗರ್ಜ್ ಆಸ್‌ಲ್ಲಿ ಪೂಣ್ ಆತಾಂ ಇಗರ್ಜ್ ಮಾತಾಚ್ ಏಕ್ ಅಜ್ಯಾಪ್” (City of God, Book ೨೨).

ಆಯ್ಚ್ಯಾ ಕಾಳಾರ್ ಮಣಿಯಾರ್‍ಯಾಂನಿ ಅಜ್ಯಾಪಾಂ ಕರ್‍ಚಿಂ ಪಳೆಂವ್ಕ್ ಮೆಳನಾಂತ್ ಕಿತ್ಯಾಕ್?

ವಯ್ರ್ ಮಾಂಡ್‌ಲ್ಲೊ ಸಕಾರಾತ್ಮಕ್ ವಾದ್ ತರ್, ಚಿಂತಿಜೆ ಜಾಲ್ಲಿಂ ಕಾರಣಾಂಯ್ ಆಸಾತ್. ತಿಂ ಕುತ್ತಾರೆಭಿತರ್ ಲಿಪೊನ್ ದವರುಂಕ್ ಜಾಯ್ನಾಂತ್.

೧. ಅಸ್ಕತ್ ಭಾವಾಡ್ತ್: ಲೊಕಾಚೊ ಭಾವಾಡ್ತ್ ಅಸ್ಕತ್ ಆಸ್‌ಲ್ಲೆಕಡೆ ಖುದ್ ಜೆಜುನ್ ಸಯ್ತ್ ಚಡ್ ಅಚರ್ಯಾಂ ಕೆಲಿಂನಾಂತ್(ಮಾರ್ಕ್ ೬:೫-೬). ಜರ್ ದೆವಾಚೆರ್ ಭಾವಾಡ್ತ್ ನಾ ತರ್ ದೇವ್ ಆಪ್ಲ್ಯಾ ಭುರ್ಗ್ಯಾಂಕ್ ಆಪ್ಣಾಚೊ ಉಡಾಸ್ ಹಾಡುಂಕ್ ಕಾಂಯ್ ತರೀ ವಾಟ್ ತಯಾರ್ ಕರ್‍ತಾ ನ್ಹಯ್? ಜಾಯ್ತಿಂ ಜಣಾಂ ಪಿಡೆಂತ್ ಪಡ್ತಾನಾ ಭಾವಾಡ್ತಾಂತ್ ಥಿರ್ ಜಾತಾತ್.

೨. ಮಾಗ್ಣೆಂ ಆನಿ ಉಪಾಸಾಚೊ ಅಭಾವ್: ಜೆಜುನ್ ದಿಲ್ಲಿ ಪದ್ವಿ ಆಸ್ಲ್ಯಾರೀ ತಾಚ್ಯಾ ಶಿಸಾಂಕ್ ಮೊರ್ಲುಕೆನ್ ವಳ್ವಳ್ಚ್ಯಾ ಚೆರ್ಕ್ಯಾಕ್ಬರೆಂ ಕರುಂಕ್ ಜಾಲೆಂನಾ. ಜೆಜು ಮ್ಹಣ್ತಾ: “ಹ್ಯೆ ಜಾತಿಚೊ ದೆಂವ್ಸಾರ್ ಭಾಯ್ರ್ ಘಾಲುಂಕ್ ಮಾಗ್ಣ್ಯಾ ಆನಿ ಉಪಾಸಾಶಿವಾಯ್ ದುಸ್ರೊ ಉಪಾವ್ ನಾ” (ಮಾರ್ಕ್ ೯:೨೯). ಅಸಲ್ಯಾ ಅತ್ಮೀಕ್ ಝುಜಾಕ್ ದೆಂವ್ಚ್ಯಾ ಮಣಿಯಾರ್‍ಯಾಂನಿ ತಾಂಚ್ಯೆ ಅತ್ಮೀಕ್ ಜಿಣಿಯೆಂತ್ ಬೇಫಿಕಿರ್ ಜಾವ್ನ್ ಆಸೊಂಕ್ ಜಾಯ್ನಾ.

೩. ಸುಶೆಗಾಚೆಂ ಜಿವಿತ್: ಪ್ರಸ್ತುತ್ ಕಾಳಾರ್ ಕುಡಿಚೆರ್ ಬೆಸೊರ್ ಪಡ್ಚೊ ಉಣೆಂ ಜಾಲ್ಲೊ ದಿಸೊನ್ ಯೆತಾ. ಸುರ್‍ವಿಲಿ ಇಗರ್ಜ್‌ಮಾತಾ ಸಂಪೂರ್ಣ್ ಜಾವ್ನ್ ದೆವಾಚೆರ್ ಭೊರ್ ಘಾಲ್ನ್ ಆಸ್‌ಲ್ಲಿ. ಪುಣ್ ಜೆದ್ನಾಂ ದಗ್ದೊವ್ಣಿ ಉಣಿ ಜಾಲಿ ಆನಿ ಇಗರ್ಜ್‌ಮಾತಾ ಥಿರ್ ಜಾಲಿ ಸವ್ಕಾಸ್ ಆರಾಮ್‌ದಾಯಕ್ ಜಿವಿತ್ ಭಿತರ್ ಸರ್‍ಲೆಂ. ಭಾವಾಡ್ತಿ ಲೋಕ್ ತಶೆಂಚ್ ಮಣಿಯಾರಿ ಸಂಸಾರಿ ಖುಶಾಲ್ಕಾಯೆ ತೆವ್ಶಿನ್ ವೊಂದಾಲಿಂ. ಅಶೆಂ ಆಸ್ತಾಂ ಭಾವಾಡ್ತ್ ಆಲ್ಬೊ ಜಾಲೊ ಆನಿ ಪವಿತ್ರ್‌ಪಣ್ ಕುಸ್ಕಾಲೆಂ. ಸಾಕ್ರಿಫಿಸ್ ಆನಿ ಧಂಡೊವ್ಣಿ ನಾತ್‌ಲ್ಲೆಂ ಜಿವಿತ್ ದೆವಾಚಿ ಕುರ್ಪಾ ವ್ಹಾಳೊಂಕ್ ಆಡೆಂ ಜಾತಾ.

ಅತ್ಮೀಕ್ ಅಧಿಕಾರ್ ದೆವಾಥಂಯ್ ಆಸ್ಚ್ಯಾ ಗೂಂಡ್ ಎಕ್ತಾರಾಥಾವ್ನ್ ವ್ಹಾಳ್ತಾ. ಆಪೊಸ್ತಲಾಂನಿ ಮಾಗ್ಣೆ-ಉಪಾಸ್ ಕೆಲೊ, ದಗ್ದೊವ್ಣಿ ಭೊಗ್ಲಿ; ಪಾದ್ರೆ ಪಿಯೊ, ಜೋನ್ ಮರಿ ವಿಯಾನ್ನಿ, ಮದರ್ ತೆರೇಜಾ ಆನಿ ಹೆರ್ ಸಾಂತಾಂನಿ ಕಠೀಣಾಯೆಚಿ ಜಿಣಿ ಆಪ್ಣಾಯ್ಲಿ ಆನಿ ಖಳ್ಮಿತ್ ನಾತ್‌ಲ್ಲ್ಯಾ ವಾವ್ರಾನ್ ಸೊಮಿಯಾಚೆಂ ಮಿಸಾಂವ್ ಕೆಲೆಂ; ಅಶೆಂ ಆಸ್ತಾಂ ಆಪ್ಶಿಂಚ್ ತಾಂಚೆಮುಕಾಂತ್ರ್ ಅಜ್ಯಾಪಾಂ ಘಡ್ಲಿಂ. ದೆಕುನ್ ಫಕತ್ ಸಾಕ್ರಾಮೆಂತ್ ಜೋಡ್ನ್ ಮಣಿಯಾರ್‍ಪಣ್ ಜೊಡ್ಲ್ಯಾರ್ ಪಾವಾನಾ, ತ್ಯಾ ವೆಕ್ತಿನ್ ಆಪ್ಣಾಚೆಂ ಜಿವಿತ್ ಖಾಲ್ತಿಕಾಯೆನ್, ಭಾವಾಡ್ತಾನ್, ಮೊಗಾನ್ ಬಾಂದುನ್ ಆನಿ ಆಪ್ಣಾಚ್ಯೆ ಸ್ವಖುಶೆಕ್ ಸೊಮಿಯಾಚ್ಯಾ ಖುರ್‍ಸಾಕ್ ಖಿಳಾಂವ್ಕ್ ಜಾಯ್. ತೆದ್ನಾಂ ಸೊಮಿಯಾಚಿ ಪದ್ವಿ ಬಳಾಧಿಕ್ ರಿತಿನ್ ವ್ಹಾಳ್ತಾ.

ಆತಾಂಚ್ಯಾ ಕಾಳಾರ್ ಅಚರ್ಯಾಂ ಕಶಿಂ ಘಡ್ತಾತ್?

ದೆವಾಚ್ಯೆ ಪದ್ವೆಕ್ ಆತಾಂಚೊ ಆನಿ ಆದ್ಲೊ ಕಾಳ್ ಮ್ಹಳ್ಳೊ ನಾ. ಜಲ್ಮಾಥಾವ್ನ್ ಕುರ್ಡೊ ಆಸ್‌ಲ್ಲ್ಯಾ ಮನ್ಶಾಕ್ ಬರೊ ಕರ್‍ತಾನಾ ಜೆಜುನ್ ಮ್ಹಳೆಂ “ದೆವಾಚಿ ಪದ್ವಿ ತಾಚೆಥಂಯ್ ಕಾರ್ಯಾನ್ ದಿಸೊನ್ ಯೆಂವ್ಚೆಖಾತಿರ್ ತೊ ಅಸೊ ಜಲ್ಮಾಲೊ” (ಜುವಾ ೯:೩). ಭಾವಾಡ್ತಾವಿಣೆಂ ಹಂಕಾರಾನ್ ಖುಣಾಂ ವಿಚಾರ್‍ಲಲ್ಯಾಂಕ್ ಜೊನಾ ಪ್ರವಾದ್ಯಾಚ್ಯಾ ಖುಣಾವಿಶ್ಯಾಂತ್ ಸಾಂಗೊನ್ ಜೆಜುನ್ತಾಂಚೆಂ ತೋಂಡ್ ಧಾಂಪಯ್ಲೆಂ (ಮಾತೆ ೧೨:೩೮-೪೨), ಪುಣ್ ಖಾಲ್ತೆಪಣಾನ್ ಜಿಣಿ ಬದ್ಲಪಾಪಾಸತ್ ಮಾಗ್ಲಲ್ಯಾಂಕ್ ತಾಣೆಂ ನಿರಾಶೆನ್ ಪಾಟಿಂ ಧಾಡುಂಕ್ ನಾ. ಅಜ್ಯಾಪಾಂ ಘಡ್ತಾತ್ ನ್ಹಯ್ ಆಮ್ಚಿ ಆಸಕ್ತ್ ಥಾಂಬೊವ್ಕ್, ಬಗಾರ್ ದೆವಾಚಿ ಮ್ಹಯ್ಮಾ ಪಾಚಾರ್‍ಚ್ಯಾಕ್ ಆನಿ ಆಮ್ಚೊ ಭಾವಾಡ್ತ್ ಘಟ್ ಕರ್‍ಚ್ಯಾಕ್. ಆಫ್ರಿಕಾಚ್ಯಾ ಗಾಂವಾಂನಿ ಆನಿ ಆಮ್ಚ್ಯಾಚ್ ದೆಶಾಚ್ಯಾ ಉತ್ತರೆಚ್ಯಾ ಗಾಂವಾಂನಿ ಖಂಯ್ಸರ್ ಭಾವಾಡ್ತ್ ನವ್ಯಾನ್ ಪಾಚಾರ್‍ತಾ ಥಂಯ್ಸರ್ ಬಳಾಧಿಕ್ ಅಜ್ಯಾಪಾಂ ಜಾಂವ್ಚಿಂ, ಪಿಡಾ ಗೂಣ್ ಜಾಂವ್ಚ್ಯೊ, ದೆಂವ್ಸಾರಾಥಾವ್ನ್ ಸುಟ್ಕಾ ಮೆಳ್ಚಿ ಆಮ್ಕಾಂ ಆಯ್ಕೊಂಕ್ ಮೆಳ್ತಾ. ಪುಣ್ ಜ್ಯಾ ಸಮುದಾಯಾಕ್ ತಿಂ ಗರ್ಜ್ ನಾಂತ್, ತಾಂಕಾಂ ದೇವ್ ತಿಂ ದೀನಾ. ಕಾರ್ಮೆಲಿತ್ ಒಡ್ಡಿಚೊ ಅತ್ಮೀಕ್ ಬಾಪಯ್ ಖುರ್‍ಸಾಚೊ ಸಾಂ. ಜುವಾಂವ್ ಮ್ಹಣ್ತಾ: “ಆಮ್ಕಾಂ ನಿತಳ್ ಕರ್‍ಚೆಖಾತಿರ್ ಆನಿ ಆಮಿ ತಾಣೆಂ ದಿಂವ್ಚ್ಯಾ ದೆಣ್ಯಾಂಚೆರ್ ಲಾಬ್ದನಾಸ್ತಾನಾ ಖರ್‍ಯಾನ್ ತಾಚೊ ಮೋಗ್ ಕರ್‍ಚೆಖಾತಿರ್ ದೇವ್ ಥೊಡೆಪಾವ್ಟಿಂ ಆಮ್ಕಾಂ ದಿಸ್ಚೆತಸಲಿಂ ಖುಣಾಂ ದೀನಾ” (The Ascent of Mount Carmel, Book II, Chapter ೧).

ನಿಮಾಣೆಂ ಉತರ್

ವ್ಹಡ್ ವ್ಹಡ್ ಅಚರ್ಯಾಂ ಕೆಲ್ಲ್ಯಾ ಪಾವ್ಲಾನ್‌ಯೀ ಅಸ್ವಸ್ಥ್ ಜಾಲ್ಲ್ಯಾ ತ್ರೋಫಿಮಾಕ್ ಗೂಣ್ ಕರ್‍ಚ್ಯಾ ಬದ್ಲಾಕ್ ಮಿಲೆತಾಂತ್‌ಚ್ ಪಾಟಿಂ ಸೊಡ್ಲೊ (೨ ತಿಮೊ ೪:೨೦). ತಿಮೊಥಿಕ್ ಬರೊವ್ನ್ ತೊ ಮ್ಹಣ್ತಾ: “ತುಕಾ ತವಳ್ ತವಳ್ ಧೊಸ್ತಾ ತ್ಯೆ ಪಿಡೆಖಾತಿರ್ ಥೊಡೊ ವಾಯ್ನ್ ಘೆ” (೧ ತಿಮೊ ೫:೨೩). ಹಾಚೊ ಅರ್ಥ್ ಸಗ್ಳಿ ಪಿಡಾ ಅಚರ್ಯಾಂನಿ ಬರಿ ಕರ್‍ಚಿ ಸೊಮಿಯಾಚಿ ಖುಶಿ ನ್ಹಯ್. ತಶೆಂ ಆಸ್‌ಲ್ಲೆಂ ತರ್ ತೊ ವಯ್ಜಾಂಕ್ ಕಿತ್ಯಾಕ್ ರಚ್ತೊ? ನೈಸರ್ಗಿಕ್ ವೊಕ್ತಾಂ ಪರಿಸರಾಂತ್ ಕಿತ್ಯಾಕ್ ಆಸಾ ಕರ್‍ತೊ? ದೆವಾಚೆಂ ಉತರ್‌ಚ್ ಬಳಾಧಿಕ್. ಮ್ಹಣಿಯಾರ್‍ಯಾಂವಿಣೆಂಯ್ ತೆಂ ಅಜ್ಯಾಪಾಂ ಕರುಂಕ್ ಸಕ್ತಾ. ದೆಕುನ್ ಆಧುನಿಕ್ ಮಾದ್ಯಮಾಂ ವಾಪಾರ್‍ನ್ ದೆವಾಚೆಂ ಉತರ್ ಪರ್ಗಟ್ ಕರ್‍ನ್ ಇಗರ್ಜ್‌ಮಾತಾ ಸಾರ್ಕ್ಯೆ ವಾಟೆರ್ ಚಮ್ಕೊನ್ ಆಸಾ. ಪಿಡಾ ಗೂಣ್ ಕರ್‍ಚೆಂ ಆನಿ ಹೆರ್ ಅಜ್ಯಾಪಾಂ ಕರ್‍ಚಿಂ ದೆವಾಚ್ಯೆ ಖುಶೆಕ್ ಆನಿ ತಾಚ್ಯಾ ವೆಳಾಕ್ ಸೊಡ್‌ಲ್ಲೆಂ.

ಫ್ರಾದ್ ಆರನ್ ಬಬುಶ್, ಕಾರ್ಮೆಲಿತ್