ಹೊ ಸಗ್ಳೊ ಮ್ಹಯ್ನೊ ಕರೆಜ್ಮಾಂತ್ ವೆತಾ. ಹ್ಯಾ ದಿಸಾಂನಿ ಲಿತುರ್ಜೆಂತ್ ಆನಿ ರೆತಿರೆಂನಿ ಆಮ್ಕಾಂ ತವಳ್ ತವಳ್ ಆಯ್ಕೊಂಕ್ ಮೆಳ್ಚೊ ಉಲೊ “ಪಾತಕ್ ರಡಾ ಆನಿ ಜಿಣಿ ಬದಲಾ.” ಆಮ್ಕಾಂ ಸಕ್ಡಾಂಕ್ ಪಾತಕ್ ಮ್ಹಳ್ಯಾರ್ ಕಿತೆಂ ಮ್ಹಳ್ಳಿ ಕಾಂಯ್ ಪುಣೀ ಸಮ್ಜೊಣಿ ಆಸಾ; ದೊತೊರ್ನಿಂತ್ ಆಮಿ ಹ್ಯಾ ವಿಶಿಂ ಶಿಕ್ಲ್ಯಾಂವ್. ತರೀಪುಣ್ ಮ್ಹಾಪಾತಕ್ ಮ್ಹಳ್ಯಾರ್ ಕಿತೆಂ ಆನಿ ತಾಚೊ ಪ್ರಭಾವ್ ಕಿತೆಂ ಮ್ಹಣ್ ಜಾಯ್ತ್ಯಾಂಚ್ಯೆ ಮತಿಂತ್ ಗೊಂದೊಳ್ ಆಸಾ. ಬೊವ್ ಸೊಂಪ್ಯೆ ರಿತಿನ್ ಹ್ಯಾ ವಿಶಿಂ ಸಮ್ಜೊಂಚೆಂ ಪ್ರಯತನ್ ಕರ್‍ಯಾಂ.

ಪಾತಕ್ ಮ್ಹಳ್ಯಾರ್ ಕಿತೆಂ?

ಪಾತಕ್ ಮ್ಹಳ್ಯಾರ್ ರುಲಿ-ರೆಗ್ರೊ ಮೊಡ್ಚೆಂ ಮ್ಹಣ್ ಅರ್ಥ್ ನ್ಹಯ್. ಸೊಂಪ್ಯಾನ್ ಸಾಂಗ್ಚೆಂ ಜಾಲ್ಯಾರ್ ಪಾತಕ್ ಮ್ಹಳ್ಯಾರ್ ದೆವಾಲಾಗಿಂ, ಪೆಲ್ಯಾಲಾಗಿಂ ಆನಿ ಆಪ್ಣಾಲಾಗಿಂಚ್ ಸಂಬಂದ್ ಮೊಡ್ಚೊ. ಕಥೊಲಿಕ್ ಪವಿತ್ರ್ ಸಭೆಚಿ ಶಿಕೊವ್ಣ್ ಪಾತ್ಕಾಚೆಂ ವ್ಯಾಖ್ಯಾನ್ ಅಶೆಂ ದಿತಾ: “ಪಾತಕ್ ಮ್ಹಳ್ಯಾರ್ ರಾಜಾಂವಾ, ಸತಾ ಆನಿ ಸಾರ್ಕ್ಯಾ ಕೊಶೆಡ್ದಾವಿರೋಧ್ ಕೆಲ್ಲೊ ಗುನ್ಯಾಂವ್; ಸಾಂಗಾತಾಚ್ ದೆವಾ ಆನಿ ಪೆಲ್ಯಾವಿರೋಧ್ ಖರ್‍ಯಾ ಮೊಗಾಚೆಂ ಉಣೆಂಪಣ್” (ಕ.ಧ.ಶಿ. ೧೮೪೯). ದೆಕುನ್ ಪಾತ್ಕಾಚಿ ಮೊಲಾಮಾಪ್ಣಿ ರುಲಿ, ರೆಗ್ರೊ ಆನಿ ನಿಯಮಾಂಚ್ಯಾಕೀ ವಯ್ಲ್ಯಾ ಸ್ಥರಾರ್ ಮೊಗಾಚೆರ್ ಹೊಂದೊನ್ ಆಸಾ.

ಸಕ್ಕಡ್ ಪಾತ್ಕಾಂ ಎಕೆಚ್ ರಿತಿಚಿಂಗೀ?

ನ್ಹಯ್. ಮಾರೆಕಾರ್ ಆನಿ ಮಾರೆಕಾರ್ ನ್ಹಯ್ ಜಾಲ್ಲೆತಸಲಿಂ ಪಾತ್ಕಾಂ ಆಸಾತ್ ಮ್ಹಣ್ ಜುವಾಂವ್ಚ್ಯಾ ಪಯ್ಲ್ಯಾ ಪತ್ರಾಂತ್ (೫:೧೬-೧೭) ಆಮ್ಕಾಂ ವಾಚುಂಕ್ ಮೆಳ್ತಾ. ಜೆಜು ಪಿಲಾತಾಲಾಗಿಂ ಉಲೊವ್ನ್ ಮ್ಹಣ್ತಾ: “ಜಾಣೆಂ ಮ್ಹಾಕಾ ತುಜ್ಯಾ ಅಧೀನ್ ಕೆಲಾ ತಾಣೆಂ ಆನಿಕೀ ವ್ಹಡ್ ಗುನ್ಯಾಂವ್ ಆಧಾರ್‍ಲಾ” (ಜುವಾ ೧೯:೧೧). ಸಾಂಗಾತಾಚ್, ಪಾತಕ್ ತೆಂಚ್ ತರೀ ಕೊಣೆಂ ತೆಂ ಆಧಾರ್‍ಲಾಂ ಮ್ಹಳ್ಳ್ಯಾಚೆರ್‌ಯೀ ಹೊಂದೊನ್ ಆಸಾ. ಜೆಜು ಹ್ಯಾ ವಿಶಿಂ ಸಾಂಗ್ತಾ: “ಆಪ್ಲ್ಯಾ ಧನಿಯಾಚಿ ಖುಶಿ ಜಾಣಾ ಆಸೊನ್ ಶಿಕ್ಶಾ ಫಾವೊ ಜಾಂವ್ಚೆತಸಲಿ ಕರ್‍ನಿ ಕೆಲ್ಲ್ಯಾಕ್, ಧನಿಯಾಚಿ ಖುಶಿ ನೆಣಾ ಆಸೊನ್ ಕೆಲ್ಲ್ಯಾಚ್ಯಾಕೀ ಚಡ್ ಮಾರ್ ಪಡ್ತೆಲೆ” (ಲೂಕ್ ೧೨:೪೭-೪೮). ಹಾಚೆರ್ ಹೊಂದೊನ್ ಮ್ಹಾಪಾತಕ್ ಆನಿ ಲ್ಹಾನ್ (ಹೂಂ) ಪಾತಕ್ ಮ್ಹಣ್ ದೋನ್ ವರ್ಗ್ ಆಸಾತ್.

ಮ್ಹಾಪಾತಕ್ ಮ್ಹಳ್ಯಾರ್ ಕಿತೆಂ?

ಇಂಗ್ಲಿಶಾಂತ್ ಮ್ಹಾಪಾತ್ಕಾಕ್ Mortal sin ಮ್ಹಣ್ತಾತ್. ಹೊ Mortal ಮ್ಹಳ್ಳೊ ಸಬ್ದ್ ಲಾತ್ಯಾ ಭಾಶೆಚ್ಯಾ ‘ಮೊರ್ತಾಲಿಸ್’ ಮ್ಹಣ್ಜೆ ‘ಮರಣ್ ಫಾವೊ ತಸಲೆಂ’ ಮ್ಹಣ್ ಅರ್ಥ್ ಜಾಂವ್ಚ್ಯಾ ಸಬ್ದಾಥಾವ್ನ್ ಯೆತಾ. ಕಿತ್ಯಾಕ್ ಮ್ಹಳ್ಯಾರ್ ಮ್ಹಾಪಾತಕ್ ಅತ್ಮ್ಯಾಚ್ಯಾ ಸಾಂತಿಪಣಾಕ್ ಘಾಯ್ ಕರ್‍ನ್ ಅತ್ಮೀಕ್ ಮರ್‍ಣಾಕ್ ಕಾರಣ್ ಜಾತಾ.

ಏಕ್ ಪಾತಕ್ ಮ್ಹಾಪಾತಕ್ ಜಾಯ್ಜೆ ಜಾಲ್ಯಾರ್ ಹಿಂ ತೀನ್ ಶರ್ತಾಂ ಆಸೊಂಕ್ ಜಾಯ್

೧. ಗಂಭೀರ್ ವಿಶಯ್ – Grave matter

೨. ಪುರ್‍ತಿ ಸಮ್ಜೊಣಿ – Full knowledge

೩. ಸಂಪೂರ್ಣ್ ಕಬ್ಲಾತ್- Deliberate consent

ಹ್ಯಾ ತಿನಾಂಪಯ್ಕಿ ಏಕ್ ಚುಕ್ಲ್ಯಾರ್‌ಯೀ ತೆಂ ಮ್ಹಾಪಾತಕ್ ಜಾಯ್ನಾ.

ಧಾಕ್ಲ್ಯಾಕ್, ಲ್ಹಾನ್ ಥಾವ್ನ್ ಹೆರಾಂಕ್ ಅನ್ನ್ಯಾಯ್ ಕರ್‍ನ್‌ಚ್ ಜಿಯೆಂವ್ಚ್ಯಾ ಪರಿಸರಾಂತ್ ವಾಡೊನ್, ಅನ್ನ್ಯಾಯ್ ಕರ್‍ಚೆಂ ಏಕ್ ಪಾತಕ್ ಮ್ಹಳ್ಳಿ ಸಮ್ಜೊಣಿಂಚ್ ನಾತ್‌ಲ್ಲೊ ಏಕ್ ವೆಕ್ತಿ ಅನ್ನ್ಯಾಯ್ ಕರ್‍ತಾ ಜಾಲ್ಯಾರ್ ಪುರ್‍ತಿ ಸಮ್ಜೊಣಿ ನಾ ಮ್ಹಳ್ಳ್ಯಾ ಕಾರಣಾಕ್ ತಾಚೆಂ ಪಾತಕ್ ಮ್ಹಾಪಾತಕ್ ಜಾಯ್ನಾ. ಪುಣ್ ತೊಚ್ ಆಪ್ರಾಧ್ ತೆಂ ಪಾತಕ್ ಮ್ಹಳ್ಳೆಂ ಕಳಿತ್ ಆಸೊನ್‌ಯೀ ಆಪ್ಲ್ಯೆ ಸಂಪೂರ್ಣ್ ಕಬ್ಲಾತೆನ್ ಎಕ್ಲೊ ಆಧಾರ್‍ತಾ ಜಾಲ್ಯಾರ್ ತೆಂ ಮ್ಹಾಪಾತಕ್ ಜಾತಾ.

೧. ಗಂಭೀರ್ ವಿಶಯ್ ಕಸಲೆ?

ಸ್ವಾಭಾವಿಕ್ ನಿಯಮ್ (natural law) ಆನಿ ದೈವಿಕ್ ನಿಯಮಾಂಚೆರ್ (divine law) ಹೊಂದೊನ್ ಗಂಭೀರ್ ವಿಶಯ್ ಕಸಲೊ ಮ್ಹಣ್ ನಿರ್ಧಾರ್ ಕರ್‍ಯೆತಾ. ಹೆ ಗಂಭೀರ್ ವಿಶಯ್ ಗಿನ್ಯಾನ್ ಆನಿ ರಾಜಾಂವ್ ಆಸ್‌ಲ್ಲ್ಯಾ ಮನ್ಶಾಕ್ ಸಂಯ್ಬಿಕ್ ರಿತಿನ್ ಸಮ್ಜತಾತ್. ಹಾಕಾ ವಿಶೇಸ್ ಶಿಕಪ್ ಗರ್ಜ್ ನಾ. ಧಾ ಉಪಾದೆಸಾಂಚ್ಯಾ ಪಾಟ್‌ಥಳಾರ್ ಉಲ್ಲೇಖ್ ಕರ್‍ಯೆತ್ ಜಾಲ್ಲೆ ಗಂಭೀರ್ ವಿಶಯ್ ಹೆ: ದೇವ್‌ನಿಂದಾ, ಬೊಂಬ್ಯಾಪುಜಾ, ಮಾಟ್-ಮಂತ್ರಾಂ, ಆಯ್ತಾರಾಚೆಂ ಮೀಸ್ ಖಳ್ಚೆಂ, ಆವಯ್-ಬಾಪಾಯ್ಕ್ ಸಾಂಡುನ್ ಘಾಲ್ಚೆಂ, ಖುನಿ, ಪ್ರದ್ವಾರ್, ಅತ್ತ್ಯಾಚ್ಯಾರ್, ಗರ್ಬಾಪಾತ್, ಸಲಿಂಗ್‌ಕಾಮ್, ಪಯ್ಶ್ಯಾಂಚೊ ಅವೆವ್ಹಾರ್, ಚೊರಿ, ಫಟ್ ಸಾಕ್ಸ್, ಘಡ್ಪಾಂ ಕರ್‍ನ್ ಸಾಂಗ್‌ಲ್ಲ್ಯಾನ್ ಜಾಂವ್ಚಿ ಲುಕ್ಸಾಣ್, ಹೆರಾಂಕ್ ಮಾರೆಕಾರ್ ಜಾಂವ್ಚೆತಸಲೊ ಅನ್ನ್ಯಾಯ್ – ಹೆ ಆನಿ ಅಸಲೆ ಹೆರ್ ಥೊಡೆ. ಮಾತೆವಾಚ್ಯಾ ವಾಂಜೆಲಾಂತ್ಲ್ಯಾ ದೊಂಗ್ರಾವಯ್ಲ್ಯಾ ಪ್ರಸಂಗಾಂತ್ (ಅಧ್ಯಾಯ್ ೫-೭) ಜೆಜುಚ್ ಹ್ಯಾ ವಿಶಿಂ ಸವಿಸ್ತಾರ್ ವಿವರ್ ದಿತಾ.

೨. ಪುರ್‍ತಿ ಸಮ್ಜೊಣಿ ಮ್ಹಳ್ಯಾರ್ ಕಿತೆಂ?

ಆಪ್ಣೆಂ ಕರ್‍ಚೊ ಅನ್ನ್ಯಾಯ್ ಚೂಕ್ ಮ್ಹಳ್ಳಿ ಸಮ್ಜೊಣಿ, ತೊ ಆಧಾರ್‌ಲ್ಲ್ಯಾನ್ ಹೆರಾಂಕ್ ಜಾಂವ್ಚಿ ಲುಕ್ಸಾಣ್, ಆಪ್ಣಾಕ್‌ಚ್ ತಾಚೆಥಾವ್ನ್ ಜಾಂವ್ಚೊ ಆಂತರಿಕ್ ಘಾಯ್ ಆನಿ ನಿಮಾಣೆಂ ದೆವಾಥಾವ್ನ್ ಆಪುಣ್ ಪಯ್ಸ್ ಸರ್‍ತಾಂ ಮ್ಹಳ್ಳೆಂ ಕಳಿತ್ ಆಸ್ಚೆಂಚ್ ಸಂಪೂರ್ಣ್ ಸಮ್ಜೊಣಿ. ಹಾಂಗಾಸರ್‌ಯೀ ಚಡಾವತ್ ಜಾವ್ನ್ ಗಿನ್ಯಾನ್ ಆನಿ ರಾಜಾಂವ್ ಆಸ್‌ಲ್ಲೊ ಮನಿಸ್ ಸ್ವಾಭಾವಿಕ್ ಜಾವ್ನ್ ಕಿತೆಂ ಸಾರ್ಕೆಂ ಆನಿ ಕಿತೆಂ ಚೂಕ್ ಮ್ಹಳ್ಳೆ ಸಮ್ಜೊಂಕ್ ಸಕ್ತಾ.

೩. ಸಂಪೂರ್ಣ್ ಕಬ್ಲಾತ್ ಮ್ಹಳ್ಯಾರ್ ಕಿತೆಂ?

ಹಾಂಗಾಸರ್ ಇಲ್ಲಿಶಿ ಜಾಗ್ರುತ್ಕಾಯ್ ಗರ್ಜೆಚಿ. ಸಂಪೂರ್ಣ್ ಸ್ವತಂತ್ರ್ ಆಸೊನ್, ಕಸಲೊಚ್ ದಬಾವ್ ನಾಸ್ತಾನಾ ಆಪ್ಣಾಚ್ಯೆ ಸ್ವಖುಶೆನ್ ಕೆಲ್ಲೆಂ ಪಾತಕ್ ಮಾತ್ರ್ ಹ್ಯಾ ವರ್ಗಾಂತ್ ಯೆತಾ. ಭಿರಾಂತ್, ಬಾಹ್ಯ್ ದಬಾವ್, ಮಾನಸಿಕ್ ಅಸ್ವಸ್ಥತಾ ಆನಿ ವೆಸನಾಕ್ ಲಾಗೊನ್ ಕೆಲ್ಲೆಂ ಪಾತಕ್ ಗಂಭೀರ್ ತರೀ ಆನಿ ತೆಂ ಪಾತಕ್ ಮ್ಹಣ್ ಕಳಿತ್ ಆಸ್ಲ್ಯಾರ್‌ಯೀ ಸಂಪೂರ್ಣ್ ಕಬ್ಲಾತ್ ನಾತ್‌ಲ್ಲೆವರ್ವಿಂ ತ್ಯಾ ಮ್ಹಾಪಾತ್ಕಾಚಿ ಗಂಭೀರತಾ ಮಾತ್ಶಿ ತಗ್ಸತಾ. ತ್ಯಾ ದೆಕುನ್ ಅಸಲ್ಯಾ ಸಂದರ್ಭಾಂನಿ ಜಾಯ್ತಿಂ ಜಣಾಂ, ದಬಾವಾಕ್ ಲಾಗೊನ್ ಆಧಾರ್‌ಲ್ಲ್ಯಾ ಪಾತ್ಕಾಖಾತಿರ್ ಆಂತರಿಕ್ ರಿತಿನ್ ಬೊವ್ ಚಡ್ ಕಶ್ಟತಾತ್. ಭಾಯ್ಲ್ಯೆ ದಿಶ್ಟಿನ್ ತೆಂ ಪಾತಕ್ ಬೊವ್ ಗಂಭೀರ್ ಮ್ಹಣ್ ದಿಸ್ತಾ ತರೀ ಆಂತರಿಕ್ ಸ್ವಾತಂತ್ರ್ಯ್ ನಾತ್‌ಲ್ಲ್ಯಾನ್ ಫರಕ್ ಉಬ್ಜತಾ. ದೇವ್ ಮನ್ಶಾಚೆಂ ಕಾಳಿಜ್ ಜಾಣಾ ಆಸಾ ದೆಕುನ್ ತ್ಯಾ ಪರ್ಮಾಣೆಂ ಮುನ್ಸುಬಿ ಕರ್‍ತಾ.

ಮ್ಹಾಪಾತಕ್ ಆನಿ ಲ್ಹಾನ್ ಪಾತ್ಕಾಮದ್ಲೊ ಫರಕ್ ಕಿತೆಂ?

ವಯ್ರ್ ಸಾಂಗ್‌ಲ್ಲ್ಯೊ ತೀನ್ ಸಂಗ್ತಿ ಎಕಾಚ್ ಪಾತ್ಕಾಂತ್ ನಾಂತ್ ತರ್ ತೆಂ ಮ್ಹಾಪಾತಕ್ ಜಾಯ್ನಾ. ಪುಣ್ ತೆಂ ಲ್ಹಾನ್ ಪಾತಕ್ ಮ್ಹಣೊಂಕ್‌ಯೀ ಜಾಯ್ನಾ. ಲ್ಹಾನ್ (ಹೂಂ) ಪಾತಕ್ ಸಂಪೂರ್ಣ್‌ಪಣಿಂ ಅತ್ಮ್ಯಾಕ್ ಆಪಾಯ್ ಹಾಡಿನಾ ತರೀ, ತೆಂ ಸವಯೆಚೆಂ ಜಾಲ್ಯಾರ್ ಮ್ಹಾಪಾತ್ಕಾಕ್ ಕಾರಣ್ ಜಾಂವ್ಚ್ಯಾ ಜಾಯ್ತ್ಯಾ ಸಂಗ್ತಿಂಕ್ ಆಪ್ಣಾಚಿ ದೇಣ್ಗಿ ದಿತಾ.

ಧಾಕ್ಲ್ಯಾಕ್, ಎಕಾಮೆಕಾಚೊ ಸಂಪೂರ್ಣ್‌ಪಣಿಂ ಮೋಗ್ ಕರ್‍ಚ್ಯಾ ಘೊವಾ ಆನಿ ಬಾಯ್ಲೆಮದೆಂ ಲ್ಹಾನ್ ಲ್ಹಾನ್ ಝಗ್ಡಿಂ ಜಾಂವ್ಚೆಂ ಸಹಜ್. ಹಾಚೆಥಾವ್ನ್ ತಾಂಚೆಮದ್ಲೊ ಸಂಬಂದ್ ತುಟಾನಾ. ಪುಣ್ ತೆಂಚ್ ಝಗ್ಡೆಂ ಸದಾಂಚೆಂ ಜಾವ್ನ್, ಮನಸ್ತಾಪ್ ಉಬ್ಜೊನ್, ಎಕಾಮೆಕಾಕ್ ಖೆಂಡ್ಚೆಂ, ಪಾಟ್ಲೆಂ ಉಸ್ತುಂಚೆಂ, ಎಕಾಮೆಕಾಕ್ ಸಕಯ್ಲ್ ಘಾಲುಂಕ್ ಪಳೆಂವ್ಚೆಂ ಅಶೆಂ ಪಟ್ಟಿ ಲಾಂಬತ್ ವೆತಾ ತರ್, ವಿಶಯ್ ಲ್ಹಾನ್ ಆಸ್‌ಲ್ಲೊ ವ್ಹಡ್ ಜಾತಾ ಆನಿ ಅಶೆಂ ಎಕಾಕ್ ಏಕ್ ಕುಡ್ಸುನ್ ನಿಮಾಣೆಂ ತಾಂಚೆಂಮದ್ಲೊ ಪವಿತ್ರ್ ಸಂಬಂದ್ ತುಟ್ಚ್ಯಾ ಹಂತಾಕ್ ಪಾವ್ತಾ. ಪುಣ್ ಲ್ಹಾನ್ ಲ್ಹಾನ್ ಝಗ್ಡಿಂ ಚಡ್ ಜಾಂವ್ಚೆಂ ಸುಚನ್ ಮೆಳ್ತಾನಾ, ಕಿತ್ಯಾಕ್ ಅಶೆಂ ಘಡ್ತಾ ಮ್ಹಣ್ ಸಮ್ಜೊನ್ ಪರಿಹಾರ್ ಕೆಲ್ಯಾರ್ ಸಂಬಂದ್ ಆನಿಕೀ ಘಟ್ ಜಾತಾ. ದೆಕುನ್, ಲ್ಹಾನಾಂತ್ಲೆಂ ಲ್ಹಾನ್ ಪಾತಕ್ ಜರ್ ಮ್ಹಜ್ಯೆ ಸಮ್ಜೊಣೆಕ್ ಯೆತಾ ತರ್ ತಾಕಾ ಪಯ್ಲೆಂಚ್ ಗಮನ್ ದಿಂವ್ಚೆಂ ಗರ್ಜೆಚೆಂ.

ಮ್ಹಾಪಾತಕ್ ಕಿತ್ಯಾಕ್ ಅತ್ಮ್ಯಾಚೊ ನಾಸ್ ಕರ್‍ತಾ?

ಕುಡಿಕ್ ಜಶೆಂ ಉಸ್ವಾಸ್ ಗರ್ಜೆಚೊಗೀ ತಶೆಂಚ್ ಅತ್ಮ್ಯಾಕ್ ದೆವಾಥಂಯ್ ಸಳಾವಳ್ ಗರ್ಜೆಚಿ. ಮ್ಹಾಪಾತಕ್ ದೆವಾಥಂಯ್ ಸಂಬಂದ್ ಜೊಡ್ಚ್ಯಾಕ್ ಏಕ್ ಆಡೆಂ ಜಾತಾ. ತಶೆಂ ಮ್ಹಣೊನ್ ದೇವ್ ಎಕಾ ಪಾತ್ಕ್ಯಾಚೊ ಮೋಗ್ ಕರ್‍ಚೊ ಕೆದಿಂಚ್ ರಾವಯ್ನಾ. ತೊ ಸುರ್ಯಾನ್ ಉಜ್ವಾಡ್ ದಿಂವ್ಚೆಬರಿ ಸದಾಂಚ್ ಮೋಗ್ ಕರ್‍ತಾ. ಪುಣ್ ಮ್ಹಾಪಾತಕ್ ಆಧಾರ್‍ನ್ ತೆಂ ಪಾತಕ್ ರಡಾನಾತ್‌ಲ್ಲೊ ಮನಿಸ್ ತ್ಯಾ ಸುರ್ಯಾಚೊ ಉಜ್ವಾಡ್ ಆಪ್ಣಾಕ್ ಲಾಗಾನಾಶೆಂ ಆಪ್ಲ್ಯಾ ಅತ್ಮ್ಯಾಚೆಂ ಜನೆಲ್ ಧಾಂಪ್ತಾ. ವೆಚಿಕ್ ಪುತಾಕ್ ತಾಚ್ಯಾ ಬಾಪಾಯ್ನ್ ಘರಾಥಾವ್ನ್ ಭಾಯ್ರ್ ಘಾಲ್ಲೊ ನ್ಹಯ್; ತೊ ಜಾವ್ನ್ ಗೆಲ್ಲೊ. ಆನಿ ದೇವ್ ಎಕಾ ವೆಕ್ತಿಚ್ಯೆ ಸ್ವಖುಶೆವಿರೋಧ್ ಆಪ್ಣಾಚೊ ಮೋಗ್ ಕರುಂಕ್ ಕೆದಿಂಚ್ ಬಳ್ ಕರಿನಾ.

ಕೊಣೀ ಮನಿಸ್ ಮ್ಹಾಪಾತ್ಕಾಂತ್ ಆಸೊನ್ ಮೆಲ್ಯಾರ್ ಕಿತೆಂ ಜಾತಾ?

ಹೆಂ ಬೊವ್ ಪ್ರಮುಕ್ ಸವಾಲ್. “ಜೊ ಅತ್ಮೊ ಆಪ್ಣೆಂ ಮ್ಹಾಪಾತಕ್ ಆಧಾರ್‍ಲಾಂ ಮ್ಹಳ್ಳೆಂ ಕಳಿತ್ ಆಸೊನ್‌ಯೀ, ತಾಚಿ ದೂಕ್ ಧರಿನಾಸ್ತಾನಾ ಮರ್‍ತಾ ತರ್ ತೊ ಸಾಸ್ಣಾಕ್ ದೆವಾಥಾವ್ನ್ ಪಯ್ಸ್ ಜಾಂವ್ಕ್ ಆಪುಣ್ ಜಾವ್ನ್ ವಿಂಚ್ತಾ” (ಕ.ಧ.ಶಿ. ೧೦೩೩). ಯೆಮ್ಕೊಂಡ್ ಮ್ಹಳ್ಯಾರ್ ಸಾಸ್ಣಾಚ್ಯಾ ಸಾಸ್ಣಾಕ್ ಕೆದಿಂಚ್ ದೆವಾಥಂಯ್ ಪಾಟಿಂ ಪರ್‍ತೊಂಕ್ ಜಾಯ್ನಾತ್‌ಲ್ಲೆತಸಲಿ ವಿಂಚವ್ಣ್. ದೇವ್ ಕೊಣಾಕ್‌ಚ್ ಯೆಮ್ಕೊಂಡಾಕ್ ಲೊಟಿನಾ. ಅಶೆಂ ಜಾಲ್ಲ್ಯಾನ್ ಕೊಣೀ ಮನಿಸ್ ಆಪ್ಣೆಂ ಕಿತೆಂ ವಾಯ್ಟ್ ಕೆಲಾಂ ಮ್ಹಳ್ಳೆಂ ಕಳಿತ್ ಆಸೊನ್, ನೀಜ್ ಜಾವ್ನ್ ಮರ್‍ಣಾಚ್ಯೆ ತಣಿರ್ ಆಸ್ತಾನಾ ಕಾಳ್ಜಾಥಾವ್ನ್ ಆನಿ ಮೊಗಾನ್ ದೆವಾಲಾಗಿಂ ಪರತ್ ಏಕ್ ಜಾಂವ್ಚೆಂ ಮನ್ ಕರ್‍ತಾ ತರ್, ತೊ ಸಾಸ್ಣಾಕ್ ನಾಸ್ ಜಾಯ್ನಾ.

ತಶೆಂ ತರ್ ನಿಮಾಣ್ಯೆ ಘಡಿಯೆ ಪಾತಕ್ ರಡೊನ್ ಸಾಲ್ವಾರ್ ಜಾವ್ಯೆತ್‌ನೇ? ತಾಚ್ಯಾ ಆದಿಂ ಕುಮ್ಸಾರ್ ಜಾಂವ್ಚಿ ಗರ್ಜ್ ಕಿತೆಂ ಆಸಾ?

ಚಡಾವತ್ ಜಣಾಂಚ್ಯೆ ಮತಿಂತ್ ಆಸ್ಚೆಂ ಸವಾಲ್ ಹೆಂ. ಕುಮ್ಸಾರಾಚೊ ಸಾಕ್ರಾಮೆಂತ್ ಆಸ್ಚೊ ಆಮ್ಚೆಖಾತಿರ್ ಶಿವಾಯ್ ದೆವಾಖಾತಿರ್ ನ್ಹಯ್. ದೆವಾನ್ ಕೊಣಾಕ್ ಭೊಗ್ಶಿಜೆ ಆನಿ ಕೊಣಾಕ್ ಶಿಕ್ಶಾ ದೀಜೆ ಮ್ಹಣ್ ಕೊಣೆಂ ಸಾಂಗ್ಯೆತ್? ಪುಣ್ ದೆವಾನ್ ತಾಚ್ಯೆ ಅಪರಿಮಿತ್ ಕಾಕುಳ್ತಿನ್ ಆಪ್ಲ್ಯಾ ಪುತಾಮುಕಾಂತ್ರ್ ಕುಮ್ಸಾರಾಚೊ ಸಾಕ್ರಾಮೆಂತ್ ಆಮ್ಕಾಂ ದಿಲಾ. ಜರ್ ಕೊಣೀ ಮನಿಸ್ “ಹಾಂವ್ ಮ್ಹಾಕಾ ಜಾಯ್ ತಶೆಂ ಜಿಯೆತಾಂ, ಆನಿ ನಿಮಾಣ್ಯೆ ಘಡಿಯೆ ಪಾತಕ್ ರಡ್ತಾಂ” ಮ್ಹಣ್ತಾ ಜಾಲ್ಯಾರ್ ತಾಚೆಥಂಯ್ ನೀಜ್ ಪಶ್ಚಾತ್ತಾಪ್ ನಾ, ದೆವಾಚೊ ತೊ ಮೋಗ್ ಕರಿನಾ. ಅಶೆಂ ನಿಮಾಣ್ಯೆ ಘಡಿಯೆ ತಾಕಾ ಆವ್ಕಾಸ್ ಆಸಾ ತರೀ ಪಾತಕ್ ರಡೊಂಕ್ ತಾಚೆಂ ಧಾರುಣ್ ಜಾಲ್ಲೆಂ ಕಾಳಿಜ್ ತಾಕಾ ಸೊಡಿನಾ. ಅಸಲೆ ಮನಿಸ್, ನಿಮಾಣ್ಯೆ ಘಡಿಯೆ ಸರ್ಗ್ ಜೊಡ್‌ಲ್ಲ್ಯಾ ಚೊರಾಚೊ ಉಲ್ಲೇಖ್ ಕರ್‍ತಾತ್. ಪುಣ್ ತ್ಯೆ ಘಡಿಯೆಯ್ ಕಾಳಿಜ್ ಧಾರುಣ್ ಕರ್‍ನ್ ಘೆತ್‌ಲ್ಲ್ಯಾ ದಾವ್ಯೆ ಕುಶಿಚ್ಯಾ ಚೊರಾವಿಶ್ಯಾಂತ್ ಉಲಯ್ನಾಂತ್. ಹ್ಯಾ ದೊಗಾಂಯ್ ಚೊರಾಂಚೆಂ ಪಾತಕ್ ಎಕೆಚ್ ರಿತಿಚೆಂ, ಶಿಕ್ಶಾಯ್ ಎಕೆಚ್ ರಿತಿಚಿ, ಪಾತಕ್ ರಡೊಂಕ್ ಆಸ್‌ಲ್ಲೊ ವೇಳ್ ಆನಿ ಸಂದರ್ಭ್‌ಯೀ ಎಕೆಚ್ ರಿತಿಚೊ. ಉಜ್ವ್ಯೆ ಕುಶಿಚೊ ಚೋರ್ ನಿಮಾಣ್ಯೆ ಘಡಿಯೆ ಸೊಮಿಯಾಲಾಗಿಂ ಉಲಯ್ಲೊ ತರೀ, ತಾಚ್ಯಾ ಕಾಳ್ಜಾಂತ್ ಬೊವ್ ಆದಿಂಚ್ ತೊ ರಡ್‌ಲ್ಲೊ, ಆನ್ಯೇಕ್ ಆವ್ಕಾಸ್ ಮೆಳ್ಚ್ಯಾಕ್ ಆಶೆಲ್ಲೊ. ಪುಣ್ ತ್ಯಾಚ್ ವೆಳಾರ್ ದಾವ್ಯೆ ಕುಶಿಚ್ಯಾ ಚೊರಾನ್ ಆಪ್ಣಾಚೆಂ ಕಾಳಿಜ್ ಆನಿಕೀ ಧಾರುಣ್ ಕರ್‍ನ್ ಘೆತ್‌ಲ್ಲೆಂ!

ಆನ್ಯೇಕ್ ಪ್ರಮುಕ್ ವಿಶಯ್ ಕಿತೆಂಗೀ ಮ್ಹಳ್ಯಾರ್ ಮರ್‍ಣಾಚಿ ಘಡಿ ಕೆದಾಳಾ ಯೆತಾ ಮ್ಹಳ್ಳೆಂ ಕಳಿತ್ ಆಸ್ಚೊ ಮನಿಸ್ ಕೊಣೀ ನಾ. ಮರಣ್ ಎಕಾ ಚೊರಾಬರಿ ಯೆತಾ ಮ್ಹಣ್ ಪವಿತ್ರ್ ಪುಸ್ತಕ್‌ಚ್ ಸಾಂಗ್ತಾ. ತರ್ ನಿಮಾಣ್ಯೆ ಘಡಿಯೆ ಮ್ಹಣಾಸರ್ ರಾಕೊಂಕ್ ಕೋಣ್ ಧಯ್ರ್ ಘೆತ್? ದೇವ್ ಸದಾಂಚ್ ಭೊಗ್ಸುಂಕ್ ತಯಾರ್, ಪುಣ್ ಭೊಗ್ಸಾಣೆಂ ಮಾಗೊಂಕ್ ಕಾಳಿಜ್ ತಯಾರ್ ನಾ ತರ್?

ಪವಿತ್ರ್ ಅತ್ಮ್ಯಾವಿರೋಧ್ ಉಚಾರ್‍ಲಲ್ಯೆ ನಿಂದೆಕ್ ಭೊಗ್ಸಾಣೆಂ ನಾ ಮ್ಹಣ್ತಾನೆ ಜೆಜು?

ಚಡಾವತ್ ಜಣಾಂನಿ ಚೂಕ್ ಸಮ್ಜೊಂಚೆಂ ದೆವಾಚೆಂ ಉತರ್ ಹೆಂ. ಮಾತೆವ್ ೧೨:೩೧-೨ ಆನಿ ಮಾರ್ಕ್ ೩:೨೯- ದೋನ್ ಕಡೆ ಆಮ್ಕಾಂ ಹೆಂ ವಾಚುಂಕ್ ಮೆಳ್ತಾ. ಜೆಜುನ್ ಹಿಂ ಉತ್ರಾಂ ಕೆದಾಳಾ ಸಾಂಗ್‌ಲ್ಲಿಂ ಮ್ಹಳ್ಳೆಂ ಗರ್ಜೆಚೆಂ. ಜೆಜುನ್ ಎಕಾ ಕುರ್ಡ್ಯಾ ಮೊನ್ಯಾ ದೆಂವ್ಸಾರ್ ಲಾಗ್ ಲ್ಲ್ಯಾಚೊ ದೆಂವ್ಸಾರ್ ಸುಟಯಿಲ್ಲೊ. ತ್ಯೆ ಘಡಿಯೆ ಹೆಂ ಮನ್ಶಾಚೆಂ ಕಾಮ್ ನ್ಹಯ್ ದೆವಾಚೆಂ ಕಾಮ್ ಮ್ಹಳ್ಳೆಂ ಸ್ಪಶ್ಟ್ ದಿಸ್ತಾಲೆಂ ತರೀ, ಥಂಯ್ಸರ್ ಆಸ್‌ಲ್ಲೆ ಫಾರಿಜೆವ್ ಬೆಲ್ಜೆಬುಲಾಚ್ಯೆ ಪದ್ವೆನ್ ತೊ ತೆಂ ಕರ್‍ತಾ ಮ್ಹಣಾಲೆ. ಅಶೆಂ ಮ್ಹಳ್ಳೆ ತೆ ಕಾಂಯ್ ಸಾಧಾರಣ್ ಮನಿಸ್ ನ್ಹಯ್; ಧರ್ಮ್‌ಶಾಸ್ತ್ರ್ ಬರ್‍ಯಾನ್ ಕಳಿತ್ ಆಸ್‌ಲ್ಲೆ, ಕಿತೆಂ ಸತ್ ಕಿತೆಂ ಫಟ್ ಮ್ಹಣ್ಚೆಂ ಪಾರ್ಕುಂಚೆಂ ಗಿನ್ಯಾನ್ ಆಸ್‌ಲ್ಲೆ ಶಿಕ್ಪಿ ಮನಿಸ್. ತಾಂಚ್ಯಾ ಮೊಸ್ರಾನ್ ತಾಂಚೆಂ ಕಾಳಿಜ್ ಇತ್ಲೆಂ ಧಾರುಣ್ ಕೆಲ್ಲೆಂಗೀ ಮ್ಹಳ್ಯಾರ್, ರೂಪ್ ರೂಪ್ ದಿಸ್ಚೆಂ ಪವಿತ್ರ್ ಅತ್ಮ್ಯಾಚೆಂ ಕಾಮ್ ಪಳೆನಾಸ್ತಾನಾ ರಾವೊಂಕ್ ತಾಣಿಂ ವಿಂಚ್ಲೆಂ. ಹ್ಯಾ ಪಾಟ್‌ಥಳಾರ್ ‘ಪವಿತ್ರ್ ಅತ್ಮ್ಯಾವಿರೋಧ್ ಪಾತಕ್’ ಆಮಿ ಸಮ್ಜೊಂಕ್ ಪ್ರಯತನ್ ಕೆಲ್ಯಾರ್ ಆಮ್ಕಾಂ ಕಳ್ತಾ ಕೀ, ತೆಂ ನೆಣಾರ್‍ಪಣಾನ್, ರಾಗಾಚ್ಯಾ ಭೊರಾರ್ ವಾ ಆಪ್ಣಾಕ್ ವಾಯ್ಟ್ ಘಡ್‌ಲ್ಲ್ಯಾ ವೆಳಾರ್ ದೆವಾವಿರೋಧ್ ಉಚಾರ್‍ಚೊ ಶಿಣ್ ನ್ಹಯ್; ಬಗಾರ್ ಜಾಣಾ ಆಸೊನ್ ದೆವಾಚ್ಯೆ ಕುರ್ಪೆಕ್ ಸಾಸ್ಣಾಕ್ ನಾಕಾರ್‍ಚೆಂ.

ಅಸಲೆ ವೆಕ್ತಿ ಪಾತಕ್ ರಡೊಂಕ್ ಆನಿ ಭೊಗ್ಸಾಣೆಂ ಮಾಗೊಂಕ್ ಸಕಾನಾಂತ್. ಕಿತ್ಯಾಕ್, ಎಕಾ ಮನ್ಶಾಕ್ ತಾಚ್ಯಾ ಪಾತ್ಕಾಚಿ ಸಮ್ಜೊಣಿ ದಿಂವ್ಚಿ, ತಾಚೆಂ ಕಾಳಿಜ್ ಮೊವಾಳ್ ಕರ್‍ನ್ ತಾಕಾ ಪಾತಕ್ ರಡೊಂಕ್ ಕುರ್ಪಾ ದಿಂವ್ಚಿ ಪವಿತ್ರ್ ಅತ್ಮ್ಯಾನ್; ಆನಿ ಕುಮ್ಸಾರಿಂತ್ ಎಕಾ ಯಾಜಕಾನ್ ಜೆಜುಚೆಂ ಭೊಗ್ಸಾಣೆಂ ದೀವ್ನ್ ಬಾಪಾಲಾಗಿಂ ಏಕ್ ಕರ್‍ಚೆಂ ತ್ಯಾಚ್ ಪವಿತ್ರ್ ಅತ್ಮ್ಯಾಥಾವ್ನ್ ತಾಕಾ ಲಾಬ್ಲಲ್ಯೆ ಪದ್ವೆನ್. ದೆಕುನ್ ಪವಿತ್ರ್ ಅತ್ಮ್ಯಾವಿರೋಧ್ ಪಾತಕ್ ಕರ್‍ಚೆಂ ಮ್ಹಳ್ಯಾರ್ ಹ್ಯಾ ಸಕ್ಡಾಥಾವ್ನ್ ಪಾಟ್ ಕರ್‍ಚೆಂ, ದೆವಾಥಾವ್ನ್ ಮೆಳ್ಚಿ ಅಪರಿಮಿತ್ ಕಾಕುಳ್ತ್ ಸ್ವಖುಶೆನ್ ಚಿಲ್ಲುನ್ ಉಡೊಂವ್ಚಿ. ತ್ಯಾ ದೆಕುನ್ ಕಿತ್ಲೆಂ ವ್ಹಡ್ ಪಾತಕ್ ಆಸಾ ತರೀ, ಜರ್ ಏಕ್ ಮನಿಸ್ ತೆಂ ಒಳ್ಕೊನ್ ತೆಂ ರಡ್ತಾ ತರ್, ತ್ಯಾ ಮನ್ಶಾನ್ ಎದೊಳ್‌ಚ್ ಪವಿತ್ರ್ ಅತ್ಮ್ಯಾಕ್ ಆಪ್ಣಾಚೆಂ ಮನ್ ಉಗ್ತೆಂ ಕೆಲಾಂ ಮ್ಹಣ್ ಜಾಲೆಂ. ಎಕಾಚ್ ಉತ್ರಾನ್ ಸಾಂಗ್ಚೆಂ ತರ್: ಜೊ ಮನಿಸ್ ಆಪ್ಣಾಚೆಂ ಪಾತಕ್ ರಡ್ತಾ ತೊ ಪವಿತ್ರ್ ಅತ್ಮ್ಯಾವಿರೋಧ್ ಪಾತಕ್ ಕರಿನಾ ಆನಿ ಜೊ ಮನಿಸ್ ಸ್ವಖುಶೆನ್ ಆಪ್ಲೆಂ ಕಾಳಿಜ್ ಧಾರುಣ್ ಕರ್‍ತಾ ತೊ ಪವಿತ್ರ್ ಅತ್ಮ್ಯಾವಿರೋಧ್ ಪಾತಕ್ ಆಧಾರ್‍ತಾ. ಅಸಲ್ಯಾ ಮನ್ಶಾಕ್ ಭೊಗ್ಸುಂಕ್ ದೆವಾಕ್ ಜಾಯ್ ತರೀ, ತೊ ಮನಿಸ್ ತೆಂ ಘೆಂವ್ಕ್ ನೆಗಾರ್‍ತಾ.

ಮ್ಹಾಪಾತಕ್ ಆಡಾಂವ್ಚೆಂ ಕಶೆಂ?

ಮಾಗ್ಣ್ಯಾಮುಕಾಂತ್ರ್ ನಿರಂತರ್ ದೆವಾಲಾಗಿಂ ಸಳಾವಳ್ ಕರ್‍ಚಿ, ದೆವಾಚೆಂ ಉತರ್ ವಾಚ್ಚೆಂ, ತವಳ್ ತವಳ್ ಕುಮ್ಸಾರಾಚೊ ಸಾಕ್ರಾಮೆಂತ್ ಜೊಡ್ಚೊ, ಹರ್‍ಯೇಕ್ ದೀಸ್ ಅಂತಸ್ಕರ್ನಾಚಿ ಝಡ್ತಿ ಕರ್‍ಚಿ, ಆಯ್ತಾರಾಚೊ ಕಾಯ್ದೊ ಮೊಗಾನ್ ಕರ್‍ನ್ ಕಾಯ್ದ್ಯಾಭಾಯ್ಲ್ಯಾ ದಿಸಾಂನಿ ಮಿಸಾಚ್ಯಾ ಬಲಿದಾನಾಂತ್ ಆನಿ ಎವ್ಕರಿಸ್ತಾಚ್ಯಾ ಆರಾಧನಾಂತ್ ವಾಂಟೊ ಘೆಂವ್ಚೊ, ಲ್ಹಾನ್ ಪಾತ್ಕಾಂಚಿ ಅಲಕ್ಶಾ ಕರಿನಾಸ್ತಾನಾ ಜಾತಾ ತಿತ್ಲೆಂ ಆಡಾಂವ್ಕ್ ಪಳೆಂವ್ಚೆಂ ಆನಿ ಆಮಿ ದುಕಿಚ್ಯಾ ವಿಧಾನಾಂತ್ ಸಾಂಗ್ಚೆಬರಿ ಪಾತ್ಕಾಚ್ಯೆ ಸವಯೆ ವಾ ಪಾತ್ಕಾಕ್ ಕಾರಣ್ ಜಾತಾತ್ ತೆ ಸಂದರ್ಭ್ ಚುಕೊಂವ್ಚೆ.

ಸಮಾಪ್ತ್

ಸಗ್ಳೊ ಸಂಸಾರ್ ರಂಗ್‌ರಂಗಾಳ್ ಸಂಗ್ತಿ ಆಮ್ಕಾಂ ದಾಕೊವ್ನ್ ‘#ತುಕಾ ಜಾಯ್ ತಶೆಂ ಕರ್, #ತುಜೆಂ ಜಿವಿತ್ ತುಜ್ಯಾ ಹಾತಾಂತ್, #self-love’ ಅಶೆಂ ಸ್ವಕೇಂದ್ರಿತ್ ಜಾಂವ್ಕ್ ಆಪೊವ್ಣೆಂ ದಿತಾನಾ ಪವಿತ್ರ್ ಸಭಾ ಆಮ್ಕಾಂ ಕಿತ್ಯಾಕ್ ಮ್ಹಾಪಾತ್ಕಾವಿಶ್ಯಾಂತ್ ಚತ್ರಾಯ್ ದಿತಾ? ಕಿತ್ಯಾಕ್ ಮ್ಹಳ್ಯಾರ್ ಸರ್ಗ್ ಆನಿ ಯೆಮ್ಕೊಂಡ್ ಏಕ್ ಐಡಿಯಾ ನ್ಹಯ್ ತೆಂ ಸತ್; ಆಮ್ಕಾಂ ದಿಲ್ಲೆಂ ಸ್ವಖುಶೆನ್ ವಿಂಚ್ಚೆಂ ದೆಣೆಂ ಸತ್; ಆನಿ ಸಕ್ಡಾವರ್ನಿ ವರ್ತೊ ದೆವಾಚೊ ಆನಿ ಪೆಲ್ಯಾಚೊ ಮೋಗ್ ಸತ್. ಜರ್ ದೆವಾಥಂಯ್ ಸಾಸ್ಣಾಕ್ ಎಕ್ತಾರ್ ಸಾಧ್ ಆಸಾ, ತರ್ ಸಾಸ್ಣಾಚಿ ಖ್ಯಾಸ್ತ್‌ಯೀ ಸಾಧ್ ಆಸಾ. ಆಮ್ಚೆಂ ಶಿಕಪ್, ಆಮ್ಚಿಂ ಫ್ರೆಂಡ್ಸಾ, ಆಯ್ಚೆಂ ತಂತ್ರ್‌ಜ್ಞಾನ್ ಆನಿ AI ಆಮ್ಕಾಂ ಸಂಸಾರಾಂತ್ಲೆಂ ಕಿತೆಂಯ್ ಶಿಕಯ್ತಾ ಜಾಂವ್ಕ್ ಪುರೊ, ಪುಣ್ ಮೊಗಾಚ್ಯೆ ವೆಂಗೆಂತ್ ಮಾಮ್ಮಿನ್ ಶಿಕಯ್ಜೆ ಜಾಲ್ಲೆಂ ಮಾಮ್ಮಿನ್‌ಚ್ ಶಿಕಯ್ಜೆ. ದೆಕುನ್ ಪವಿತ್ರ್ ಸಭಾ ಆಮ್ಚ್ಯೆ ಮಾಮ್ಮಿಬರಿ ವೆಂಗೆಂತ್ ಧರ್‍ನ್ ಆಮಿ ಶಿಕಯ್ಜೆಚ್ ಜಾಲ್ಲಿ ಆಮ್ಚ್ಯಾ ಅತ್ಮ್ಯಾಚಿ ಜಾಗ್ರುತ್ಕಾಯ್ ಆಮ್ಕಾಂ ನಾಕಾ ಜಾಲ್ಯಾರೀ ಶಿಕಯ್ತಾಚ್.

ಫ್ರಾದ್ ಆರನ್ ಬಬುಶ್, ಕಾರ್ಮೆಲಿತ್