ತ್ಯೆ ಚಲಿಯೆನ್ ಎದೊಳ್ ಸ್ನಾತಕೋತ್ತರ್ ಪದ್ವಿ ಆಪ್ಣಾಯ್ಲ್ಯಾ. ದುಬಾಯ್ ಬರ್‍ಯೆ ಕಂಪ್ಣೆಂತ್ ಉಂಚ್ಲ್ಯಾ ಹುದ್ದ್ಯಾರ್ ಆಸಾ. ವರ್‍ಸಾಕ್ ಟಿಕೆಟಿಸವೆಂ ಚಾಳಿಸ್ ದಿಸಾಂಚಿ ರಜಾ ಮೆಳ್ತಾ. ಬರಿ ನಾಚ್ಪಿಣ್, ನಟನ್ ಶಿರಾಶಿರಾಂನಿ ವ್ಹಾಳ್ತಾ. ಘರಾಂತ್ ಸರ್ವ್ ಸುವಿಧಾ ಆಸಾ, ಎಕ್ಲಿಚ್ ಧುವ್. ಕಾಂಯ್ ಸಮಸ್ಸೆ ನಾಂತ್. ತೆಂ ಗಾಂವಾಕ್ ಯೆಂವ್ಚ್ಯಾ ಪಂದ್ರಾ ದಿಸಾ ಆದಿಂ ತಿಚ್ಯಾ ಬಾಪಾಯ್ನ್ ಮ್ಹಾಕಾ ಫೋನ್ ಕೆಲೆಂ. ಪಾಟ್ಲ್ಯಾ ಧಾವರ್‍ಸಾಂ ಥಾವ್ನ್ ತಾಚಿ ಎಕ್‌ಚ್ ಲದಿನ್ ಮ್ಹಜೆಕಡೆ, “ತುಂ ಭಾಶಣಾಂ ದಿತಾಯ್, ಬರಯ್ತಾಯ್, ಶಿಕಯ್ತಾಯ್. ಆಳೆ ಮ್ಹಜೆಂ ಧುವ್ ಪೊರ್‍ವಾಂ ಗಾಂವಾಕ್ ಯೆತಾ. ತಾಕಾ ಇಲ್ಲಿ ಬೂದ್ ಸಾಂಗ್, ಕಾಜಾರ್ ಜಾಂವ್ಕ್! ಹ್ಯಾ ಪಾವ್ಟಿಂ ಪುಣೀ ತಾಣೆಂ ಮನ್ ಬದ್ಲುನ್ ಕಾಜಾರ್ ಜಾಂವ್ಚೆಬರಿ ಪಳೆ.” ಗಾಂವಾಕ್ ಆಯಿಲ್ಲೆಂ ಚೆಡುಂ ಆಮ್ಗೆರ್ ಆಯ್ಲೆಂ, ವಿಶಯ್ ಪ್ರಸ್ತಾಪ್ ಕರಿಜೆ ತರ್ ತಾಚಿ ಎಕ್‌ಚ್ ಜಾಪ್ “ಮುಕ್ಲ್ಯಾ ವರ್‍ಸಾ ಪಳೆಯಾಂ.” ಆಪುಣ್ ಲಗ್ನ್ ಜಾಯ್ನಾ ಮ್ಹಣ್ ಸಾಂಗೊನಾ, ತೆಂಚ್ ಸಮಾಧಾನ್ ಆಮ್ಕಾಂ.

ಹ್ಯಾ ಚೆಡ್ವಾಚ್ಯಾಕೀ ದೋನ್ ವರ್‍ಸಾಂ ವ್ಹಡ್, ಮ್ಹಜಿ ವಿದ್ಯಾರ್ಥಿಣ್ ಎಕ್ಲೆಂ ಆಸಾ, ನರ್ಸಿಂಗ್ ಕೊಲೆಜಿಂತ್ ಆತಾಂ ಉಪನ್ಯಾಸಕಿ. ವಾಡ್ಯಾ ಜಮತೆಕ್ ಗೆಲ್ಲೊಂ ಹಾಂವ್, ತಾಚ್ಯೆ ಆವಯ್ನ್ ಮ್ಹಾಕಾ ಸಾಂಗೊನ್ ದಿಲ್ಲೆ ಪರ್ಮಾಣೆಂ, `ಬರೊ ಚೆಡೊ ಪಳೆವ್ನ್ ಹ್ಯಾ ಪಾವ್ಟಿಂ ಕಾಜಾರ್ ಜಾಗೋ’ ಮ್ಹಣ್ ಕಾನಾಂತ್ ಪುಸ್ಪುಸ್ಲೊಂ. ತಾಣೆಂ ಕಾಡ್‌ಲ್ಲ್ಯಾ ಉತ್ರಾಕ್ ಜಾಪ್ ದಿಲಿ, “ತಿ ಏಕ್ ಜವಾಬ್ದಾರಿ ಮ್ಹಾಕಾ ನಾಕಾ, ಸರ್.” ಹಾಂವ್ ತಾಚ್ಯಾ ಆಂಗ್ಣಾಂತ್ಲೊ ದಸ್ಮಿಚೊ ಏಕ್ ಫಾಂಟೊ ಘೆವ್ನ್ ಘರಾ ಚಲ್ಲೊಂ.

ಬ್ರಾಯಾನ್ ಏಕ್ ಇಜ್ನೆರ್, ತಾಚೊ ಬಾಪಯ್ ಮ್ಹಜೊ ದೋಸ್ತ್. ಬಾಪಾಯ್ನ್ ಆನಿ ಪುತಾನ್ ಸುಟಾವೆಂ ಉಲಂವ್ಚೆಂ ಹಾಂವೆಂ ಎದೊಳ್ ಪಳೆಂವ್ಕ್ ನಾ. ಪೂತ್ `ಜೋಲಿ ಗುಡ್ ಫೆಲೊ’, ಬಾಪಯ್ ಸಿದ್ದಂತಾಂ ಪಾಳ್ಚೊ ಗ್ರಾಯ್ಕ್. ಹಾಂವ್ ತಾಂಚೆ ಮಧೆಂ ಏಕ್ ಪೋಸ್ಟ್‌ಮ್ಯಾನ್. ಪುತಾಕ್ ಕಿತೆಂ ಜಾಯ್ ತೆಂ ತೊ ಮ್ಹಜೆ ಕಡೆ ಸಾಂಗ್ತಾಲೊ. ಬಾಪಯ್ ಮ್ಹಜೆಂ ಉತರ್ ಆಯ್ಕೊನ್ ತಾಕಾ ಜಾಯ್ ಜಾಲ್ಲೆಂ ದಿತಾಲೊ? ಅಶೆಂ ತಾಂಚೆಂ ಜಿವಿತ್ ಮುಕಾರ್ ವೆತಾಲೆಂ. ಆತಾಂ ಬಾಪಯ್ ಗಾಂವಾಂತ್ ಉರ್‍ಲಾ, ಪೂತ್ ಯುರೊಪಾಂತ್. ಕಿತ್ಲೆಂ ಸಾಂಗ್ಲ್ಯಾರೀ ತೊ ಕಾಜಾರ್ ಜಾಯ್ನಾಂಚ್ ಮ್ಹಣ್ ರಾವ್ಲಾ! ಮ್ಹಾಕಾ ಕಳಿತ್ ಆಸ್ಚೆಪರ್ಮಾಣೆಂ, ಬ್ರಾಯನಾಕ್ ಎಕಾ ಚಲಿಯೆಚೆರ್ `ವನ್ ಸೈಡೆಡ್’ ಲವ್ ಆಸ್ಲೊ. ತೆಂ ಚೆಡುಂ ದುಸ್ರ್ಯಾ ಲಾಗಿಂ ಇಶ್ಟಾಗತೆಂತ್ ಆಸ್ಲೆಂ. ಪುಣ್ ಹೊ ಆನಿ ತೆಂ ಕುವೈಟ್ ವಾವ್ರಾರ್ ಆಸ್ಲಿ. ಏಕ್ ದೀಸ್ ಚಲಿಯೆನ್ ತಾಚ್ಯಾ ಕಾಜಾರಾಚೆಂ ಇನ್ವಿಟೇಶನ್ ಹಾಕಾ ವಾಟ್ಸಾಪಾರ್ ಧಾಡ್‌ಲ್ಲೆಂಚ್, ಸ ಮಯ್ನ್ಯಾಂನಿ ಬ್ರಾಯನ್ ಯುರೊಪ್ ಉಬ್ಲೊ. ಆತಾಂ ಕಾಜಾರ್ ನಾಕಾ ಮ್ಹಣ್ ಬಸ್ಲಾ.

ಅಸಲಿಂ ನೀಜ್ ಘಡಿತಾಂ ಆಮ್ಚ್ಯೆ ಸಮಾಜೆಂತ್ ತಶೆಂಚ್ ಸಮುದಾಯಾಂತ್ ಜಾಯ್ತಿಂ ಆಸಾತ್. ಪಯ್ಲೆಂ ದೋತ್, ಕಾಮ್, ಮಟ್ಟ್, ಸೊಭಾಯ್, ಗಿರೇಸ್ತ್‌ಕಾಯ್ ಮ್ಹಣ್ ಚೆಡ್ವಾಂ ಕಾಜಾರಾಚಿ ಪ್ರಾಯ್ ಉತ್ರೊನ್ ದುಕಾಂನಿ ದೀಸ್ ಸಾರ್‍ತಾಲಿಂ, ಆತಾಂಚಿಂ, ದೆವಾನ್ ಸಕ್ಕಡ್ ದಿಲ್ಯಾರಿ ಅಪುಣ್ ಆಂಕ್ವಾರ್‌ಚ್ ಉರ್‍ತಾಂ ಮ್ಹಣ್ತಾತ್. ಹೆವ್ಶಿನ್ ಚಲೆ ಆಪ್ಣಾಕ್ ಸಾರ್ಕಿಂ ಚೆಡ್ವಾಂಚ್ ಮೆಳನಾಂತ್ ಮ್ಹಣ್ ಉತ್ತರ್ ಕರ್ನಾಟಕಾಚ್ಯಾ ಚೆಡ್ವಾಂಕ್ ಘಾಟಿ ದೆಂವವ್ನ್ ಹಾಡ್ತಾತ್! ತಿಂಯ್ ಆತಾತಾಂ ಮೆಳಾನಾಂತ್!

ಅಶೆಂ ಏಕ್ ಟ್ರೆಂಡ್ ಚಾಲ್ತೆರ್ ಆಸಾ – ಜರ್ ಚಲಿಯೆಲಾಗಿಂ ಶಿಕಪ್ ಆಸೊನ್, ಬರೆಂ ಜೊಡುಂಕ್ ಲಾಗ್ಲೆಂ – ಮಾಗಿರ್ ತಾಕಾ ಕೊಣ್‌ಚ್ ನಾಕಾ. ಪುಣ್ ತೆಂಚ್ ಎಕಾ ಚೆಡ್ಯಾಕಡೆ ಪಯ್ಶೆ ಜಾತಿತ್ ತರ್ ತಾಣೆಂ ಕುಟ್ಮಾಚ್ಯಾ ಹಜಾರ್ ರಾಟಾವಳಿಂಕ್ ಮಾತೆಂ ಮಾರಿಜೆ ಪಡ್ತಾ; ಭಯ್ಣಿಕ್ ಕಾಜಾರ್, ಘರ್ ನವೀಕರಣ್, ಇಶ್ಟಾಂಚ್ಯಾ ಭುರ್ಗ್ಯಾಂಕ್ ಶಿಕ್ಪಾ ಆಧಾರ್, ಶಹರಾಚ್ಯಾ ಉಂಚ್ಲ್ಯಾ ವಯ್ಜಾ ಲಾಗ್ಗಿಂ ಆವಯ್ ಬಾಪಾಯ್ಕ್ ಚಿಕಿತ್ಸಾ ಅಶೆಂ. ಹ್ಯಾ ಮ್ಹಜ್ಯಾ ವಾಕ್ಮೂಲಾಕ್ ಚಲಿಯಾಂಚೊ ಆಕ್ಷೇಪ್ ಆಸ್ತಲೊಚ್. ಥೊಡ್ಯೊ ಸಂಗ್ತಿ ಸಾಂಗ್ತಾನಾ ಬೆಜಾರ್ ಜಾತಿತ್, ಪುಣ್ ಮ್ಹಜ್ಯಾ ವರ್ತುಲಾಂತ್ ಹಾಂವೆಂ ಪಳೆವ್ನ್ ಪಾರ್ಕಿಲ್ಲ್ಯೊ ಸಂಗ್ತಿ ಮಾತ್ರ್ ಹಾಂವ್ ಉಲ್ಲೇಕ್ ಕರ್‍ತಾಂ.

೨೦೨೨ ಇಸ್ವೆಂತ್ ಸೌರಾಷ್ಟ್ರ ಯುನಿವರ್ಸಿಟಿಚ್ಯಾ ದಿಯಾ ಪೂಜಾ ಆನಿ ನ್ಯಾನ್ಸಿ ರಾಥೋಡ್ ಹಾಣಿಂ ೧,೨೪೨ ಚಲಿಯಾಂಲಾಗಿಂ `ಕಾಜಾರ್ ಕಿತ್ಯಾಕ್ ನಾಕಾ ಮ್ಹಳ್ಳಿ’ ಏಕ್ ಸಮೀಕ್ಷಾ ಕೆಲಿ. ಹಾಂತುಂ ತಾಂಕಾಂ ಕಳೊನ್ ಆಯ್ಲೊ ನವೊ ಸಬ್ದ್- `ಗ್ಲ್ಯಾಮೋಫೋಬಿಯಾ!’ ಆಪ್ಣಾಕ್ ಸೊಭಾಯ್ ಪಯ್ಲಿ, ಬಾಕಿಚೆಂ ಮಾಗಿರ್, ಮ್ಹಣುನ್ ಸಾಂಗ್ಚೆಂ ತಾಂಕಾಂ ಆಯ್ಕುಂಕ್ ಮೆಳ್ಳೆಂ. ಗ್ಲ್ಯಾಮೋಫೋಬಿಯಾ, ಏಕ್ ಮಾನಸಿಕ್ ಸ್ಥಿತಿ ಜಾಂವ್ಕ್ ಪುರೊ. ಪುಣ್ ಹೆರ್ ಕಾರಣಾಂಯ್ ಆಸಾತ್.

೧.      ಕುಟ್ಮಾಚಿ ಜವಾಬ್ದಾರಿ ನಾಕಾ

ಕುಟಮ್ ಮ್ಹಳ್ಯಾರ್ ಜವಾಬ್ದಾರಿ ವ್ಹಯ್. ಕುಟಮ್ ಭಾಂದ್ಚೆಂ ಏಕ್ ದೇವ್ ಆಪವ್ಣೆಂಯ್ ವ್ಹಯ್. ಕಾಜಾರ್ ಜಾಲ್ಲೆಂಚ್ ಘೊವಾಚೆಂ ಘರ್, ತಾಂಚಿ ಆವಯ್-ಬಾಪಯ್, ಭಾವೊ-ಬಾವೊಜ್, ದೇರ್- ನಣಂದ್ – ಹಾಂಕಾಂ ತಾಳ್ ಪಡಾಶೆಂ ಚಲಾಜೆ, ತಾಂಚ್ಯೊಯ್ ಗರ್ಜೊ `ಬಾಯ್ಲ್’ ವಾ `ಪತಿಣ್’ ಜಾವ್ನ್ ಗೆಲ್ಲ್ಯಾನ್ ಪಳೆಜೆ, ತ್ಯಾ ಘರಾಕ್ ಮಾನ್ವೊಂಚೆಂ ನೆಸಾಜೆ, ತಾಂಕಾಂ ಪಸಂದಾಯೆಚೆಂ ರಾಂದಿಜೆ, ಆಪ್ಲೆ ಅತ್ರೆಗ್, ಭೊಂವ್ಡಿ, ಹವ್ಯಾಸ್ ದೆಗೆಕ್ ದವ್ರಿಜೆ ವಾಸೊಡಿಜೆ.. ಅಸಲಿಂ ಅಲಿಖಿತ್ ನಿಯಮಾಂ ಆಸ್ತಿತ್. ಹಿ ಆಯ್ಚಿ ರೀತ್ ನ್ಹಯ್. ಆಮ್ಚ್ಯಾ ಆವಯ್ ಬಾಪಾಯ್ನ್ ಹಿ ವಾಟ್ ಘುಡ್ಡಾಯ್ಲ್ಯಾ, ಜವಾಬ್ದಾರಿ ವಾವೊಯ್ಲ್ಯಾ, ಕುಟಮ್ ರಚ್ಲಾಂ, ಶಿಕಪ್ ದಿಲಾಂ ಆನಿ ಆತಾಂ ಜೆನ್-ಝಿ ಪಿಳ್ಗಿ ಹೆಂ ಅಸಾಧ್ಯ್ ಕಾಮ್ ಮ್ಹಳ್ಳೆ ಭೃಮಿದೆಂತ್ ಜಿಯೆತಾ! ಹಾಂಗಾ ಮುಕೆಲ್ ಕಾರಣ್, ಜವಾಬ್ದಾರಿ ಘೆಂವ್ಕ್ ಭ್ಯೆಂ ಆನಿ ಜಿಣಿ ಫುಡ್ ಕರುಂಕ್ ಜಾಯ್ ಆಸ್ಚಿ ಪರಿಪಿಕಾಯ್ ನಾತ್ಲಲಿ. ಕುಟ್ಮಾಚೊ ಭಾಂದ್ ದಿಸಾನ್ದೀಸ್ ಉತಳ್ ಜಾಂವ್ಚೊಯ್ ಹಾಕಾ ಕಾರಣ್ ಮ್ಹಣ್ಯೆತ್. ಕಾಜಾರ್ ಜಾಯ್ನಾಸ್ತಾಂ ಭುರ್ಗ್ಯಾಂಚಿ ಜವಾಬ್ದಾರಿ ಘೆತ್‌ಲ್ಲಿಂ ಆಸಾತ್. ನೀನಾ ಗುಪ್ತಾ, ಕ್ರಿಕೆಟರ್ ವಿವಿಯನ್ ರಿಚರ್ಡ್ಸಾಲಾಗಿಂ ಸಂಬಂಧ್ ಜೊಡುನ್ ಚಲಿ ಭುರ್ಗ್ಯಾಕ್ ಜಲ್ಮ್ ದಿತಾ. ತೆಂ ಆಸಾ ಮಸಬಾ ಗುಪ್ತಾ, ಜಲ್ಮಲ್ಲೆಂ ೧೯೮೯ ಇಸ್ವೆಂತ್. ಪುಣ್ ತಾಚಿ ಆವಯ್ನ್ ನೀನಾ ೨೦೦೮ ಇಸ್ವೆಂತ್ ವಿವೇಕ್ ಮೆಹ್ರಾಲಾಗಿಂ ಕಾಜಾರ್ ಜಾತಾ. ಫುಡೆಂ, ಮಿಸ್ ಯುನಿವರ್ಸ್ ಸುಶ್ಮಿತಾ ಸೇನ್ ಕಾಜಾರ್ ಜಾಯ್ನಾ, ಪುಣ್ ಆಂಕ್ವಾರ್ ಆಸೊನ್‌ಯೀ ದೊಗಾಂ ಚಲಿಯಾಂ ಭುರ್ಗ್ಯಾಂಕ್ ಪೊಸ್ಕೆಂ ಘೆತಾ. ಅಸಲಿಂ ಸಿನೆಮಾ ಶೆತಾಚಿಂ ಥೊಡಿಂ ನಿದರ್ಶನಾಂ ಘೆವ್ನ್ ಆಪ್ಣಾಕೀ ಕಾಜಾರ್ ನಾಕಾ, ಅಶೆಂಚ್ ಜಿಯೆಂವ್ಕ್ ಜಾತಾ, ಮ್ಹಳ್ಳೆಂ ಲೋಜಿಕ್ ಆಯ್ಚಿ ಪಿಳ್ಗಿ ಉಲಯ್ತಾ; ತಾಂಚಿ ಆನಿ ಆಪ್ಣಾಚಿ ಹಕೀಕತ್ ಸಮ್ಜಾನಾಸ್ತಾನಾ.

೨.      ವೃತ್ತಿ ಪಯ್ಲಿ, ಲಗೀನ್ ಉಪ್ರಾಂತ್

ಆತಾಂಚೆಂ ಶಿಕಾಪ್, ಪೂರಕ್ ಶಿಕಾಪ್ ಆನಿ ಸಂಬಂಧಿತ್ ಕೋರ್ಸ್ ಸಂಪಯ್ತಾನಾ ಯುವಜಣಾಂಚಿ ಪ್ರಾಯ್ ೨೮ ಜಾತಾ. ತ್ಯಾ ಉಪ್ರಾಂತ್ ಕಾಮಾಚಿಂ ಸೊಧ್ನಾಂ. ಅಂ, UPSಇ, IಂS, IPS, ಓ‌ಇ‌ಇಖಿ, ಎ‌ಇ‌ಇ ಪರೀಕ್ಷಾ ಪಯ್ಲ್ಯಾ ಹಂತಾರ್‌ಚ್ ಕ್ಲೀಯರ್ ಜಾಯ್ನಾಂತ್, ಚಾರ್-ಪಾಂಚ್ ಪ್ರಯತ್ನಾಂ ಕರಿಜೆ ಪಡ್ತಾತ್. ಖಾಸ್ಗಿ ವಾ ಸರ್ಕಾರಿ ಕಾಮ್ ಮೆಳ್‌ಲ್ಲೆ ಕೂಡ್ಲೆ ಕಾಮ್ ಖಾಯಾಮ್ ಜಾಯ್ನಾ. ಪ್ರೊಬೇಶನರಿ ಆವ್ದಿ ಉತ್ರೊನ್ ಖಾಯಾಮ್ ಜಾತಾ ವರೇಗ್ ಪ್ರಾಯ್ ೩೦-೩೨ ಜಾತಾತ್. ಮಾಗಿರ್ ಭಡ್ತಿ ಮೆಳಾಜೆ ವ್ಹಯ್ಲ್ಯಾ ಹುದ್ದ್ಯಾಕ್ ಪಾವಾಜೆ ಮ್ಹಳ್ಳಿ ವೋಡ್ ಆಸ್ತಾ. ಹೆರಾಂಪ್ರಾಸ್ ಮುಕಾರ್ ಪಾವಾಜೆ ಮ್ಹಳ್ಳೊ ಅವ್ಯಕ್ತ್ ಸ್ಪರ್ಧೊ ಸುರು ಜಾತಾ. ಘರ್, ಜಾಗೊ, ಫ್ಲ್ಯಾಟ್, ಬ್ಯಾಂಕ್ ಬ್ಯಾಲೆನ್ಸ್, ರೀಣ್ ಸಂಪವ್ನ್ ಮಾಗಿರ್ ಲಗ್ನಾವಿಶಿಂ ಚಿಂತ್ಯಾಂ, ಪಯ್ಲೆಂ ಆಪ್ಲ್ಯಾ ಶೆವೊಟಾಥಂಯ್ ಪಾವ್ಯಾಂ ಮ್ಹಣ್ ಆತಾಂಚಿಂ ಯುವಜಣಾಂ ಚಿಂತಾತ್. ೭೩% ಯುವಜಣಾಂಕ್ ಕಾಮಾಚಿ ಭದ್ರತಿ ಆನಿ ಭಡ್ತಿ ಪಯ್ಲಿ ಶಿವಾಯ್ ಲಗ್ನ್ ಪಯ್ಲೆಂ ನ್ಹಯ್.

ಆಜ್ ಭುರ್ಗ್ಯಾಂಚಿ ವಾಡಾವಳ್ ವೆಗಿಂಚ್ ಸುರು ಜಾತಾ. ಕುಡಿಂತ್ ಬದ್ಲಾವಣ್ ಪ್ರಾಯೆಪ್ರಾಸ್ ವೆಗಿಂಚ್ ಜಾತಾ. ಹೈಸ್ಕೂಲಾಂತ್‌ಚ್ ಅತರ್ವಣಾಂ ಸುರು ಜಾತಾತ್. ಆರ್ದ್ಯಾಕ್ ಆರ್ದಿಂ ಯುವಜಣಾಂ ಸೊಶಿಯಲ್ ಮಿಡಿಯಾಚ್ಯಾ ಪ್ರಭಾವಾನ್ ಚೂಕ್ ಸಂಬಂಧ್ ಜೊಡ್ತಾತ್ ಆನಿ ಜಿವಿತ್ ಸುರ್‍ವೆರ್‌ಚ್ ಯೆಮ್ಕೊಂಡ್ ಕರ್‍ನ್ ಘೆತಾತ್. ತ್ಯಾ ಮಾಗಿರ್ ಶಿಕಪ್ ಮುಗ್ದೊನ್ ಕಾಮಾಕ್ ಲಾಗ್‌ಲ್ಲೆಂಚ್ ಸಾಂಗಾತ್ಪಣ್, ಕಾಜಾರ್, ಕುಟಮ್ – ಹಾಚೆಂ ಮೋಲ್ ಹೊಗ್ಡಾವ್ನ್ ಆಪುಣ್, ಆಪ್ಣಾಚೆಂ ಸುಖ್ ಶಿವಾಯ್ ಹೆರ್ ಕೊಣಾಯ್ಚಿ ಉಸಾಬರಿ ನಾಕಾಚ್ ಮ್ಹಳ್ಳ್ಯಾ ನಿರ್ಧಾರಾಕ್ ಪಾವ್ತಾತ್. ಕಾಮಾ ಥಳಾಥಾವ್ನ್ ಯೇವ್ನ್ ನಿದ್ತಾ ವರೇಗ್ ಪುರ್ಸೊತ್ ಮ್ಹಳ್ಳಿ ನಾ. ಅಶೆಂ ಆಸ್ತಾಂ ಕಾಮಾಚೊ ಖುರಿಸ್ ಜಡ್ ಜಾತಾನಾ ಸಾತ್ವ್ಯಾ ಸಾಕ್ರಾಮೆಂತಾವಿಶಿಂ ಚಿಂತುಂಕ್ ಆಸ್ಪದ್‌ಚ್ ನಾ.

೩.      ಸೂಕ್ತ್ ಸಾಂಗಾತಿ ಮೆಳನಾ

ಘರ್‍ಚ್ಯಾಂನಿ, ಮ್ಹಾಲ್ಯಾನ್ ಸಯ್ರಿಕ್ ಪಳೆವ್ನ್ ಕಾಜಾರ್ ಜಾಂವ್ಚೆಂ ಆಜ್ ಉಣೆಂ, ಲವ್ ಮ್ಯಾರೆಜ್ ಸಯ್ತ್ ಮೆಜ್ಯೆತ್ ತಿತ್ಲೆಂ. ಆನಿ ಸಕ್ಕಡ್ ಮ್ಯಾಚಿಂಗ್ ಜಾಯ್ಜೆ ಮ್ಹಣ್ ಸೊಧುಂಕ್ ಕೆಲ್ಯಾರ್ ಪೆಟುನ್ ದವರ್‍ಲಲೆಂ ಕೊಣೀ ಮೆಳನಾ. ಅಂತರ್ – ಧರ್ಮೀಯ್ ಕಾಜಾರ್ ಜಾಂವ್ಚೆಂ ಪ್ರಸ್ತುತ್ ಕಾಳಾರ್ ರಿಸ್ಕೆಚೆಂ. ಪವಿತ್ರ್ ಸಭೆಚಿಂ ಥೊಡಿಂ ನಿಯಮಾಂ ಥೊಡ್ಯಾಂಕ್ ಆಡ್ಕಳ್ ಜಾತಾತ್. ಮಟ್ಟಾಚೆಂ ಸೊಧುಂಕ್ ಗೆಲ್ಯಾರೀ ಎಕ್ಕಿ ಮೆಳನಾ. ತ್ಯಾ ಭಾಯ್ರ್ ಭುರ್ಗ್ಯಾಂನಿ ತರ್‍ನೆ ಪ್ರಾಯೆರ್ ಕೆಲ್ಲಿಂ ಥೊಡಿಂ ಆತರ್ವಣಾಂ ಆತಾಂ ಲೊಕಾಜಿಬೆರ್ ಜಿವಿಂಚ್ ಉರ್‍ಲೆಲ್ಯಾನ್ ಸದ್ದ್ಯಾಕ್ ಸಯ್ರಿಕ್ ಲಾಗನಾ ಮ್ಹಳ್ಳಿ ಪರಿಸ್ಥಿತಿಯ್ ಆಸಾ. ಆನಿಕೀ ಥೊಡಿಂ ರೀಲ್ಸ್ ಸಂಸ್ಕ್ರತೆಂತ್ ವಾಡೊನ್, ಕೊರಿಯನ್ ಡ್ರಾಮಾಕ್ ಆಡಿಕ್ಟ್ ಜಾವ್ನ್ ತಾಂತುಂ ದಿಸ್ಚೆಚ್ ಚಲೆ ಜಾಯ್ ಮ್ಹಣುನ್ ಬಸ್ಲ್ಯಾರ್ ವಾಸ್ತವ್ ಫುಡ್ ಕರುಂಕ್ ಕಳನಾ. ಲಗ್ನಾ ಆದಿಂಚ್ ಚಡಾವತ್ ಸಳಾವಳ್ ಮುಗ್ದೊನ್ ಫುಡೆಂ ಎಕಾಮೆಕಾ ಆಸಕ್ತ್‌ಚ್ ಉರೊಂಕ್ ನಾ ಮ್ಹಳ್ಳೆ ಸ್ಥಿತೆಕ್ ಪಾವ್ತಾತ್.

೪.      ಮೊಡ್‌ಲ್ಲಿಂ ಕಾಜಾರಾಂ

ಫಿಲ್ಮಿತಾರಾಂ, ರಾಜಕೀಯ್ ನಕ್ತಿರಾಂ, ಖೆಳಾ ತಾಲೆಂತಾಂಚಿ ನೀಜ್ ಜಿಣಿ, ತಾಂಚೆ ಸಾಂಗಾತಿ, ತಾಂಚೊ ವೆಗ್ಳಾಚಾರ್ ಆಯ್ಕೊನ್ ಪಳೆವ್ನ್ ವ್ಹಡ್ ಜಾಲ್ಲಿ ಜೆನ್‌ಝೀ ಸಮುದಾಯ್ ಆಪ್ಣಾ ಭೊಂವ್ತಣಿ – ಫಿರ್ಗಜೆಂತ್, ವಾಡ್ಯಾಂತ್ ಆನಿ ಸ್ವಂತ್ ಘರಾಂತ್ ತುಟೊನ್ ಪಡ್ಲೆಲಿಂ ಕಾಜಾರಾಂ ಪಳೆತಾ. `ಬಾಯೆನ್ ಸೊಸ್ಚೆಂ ಪುರೊ, ಮ್ಹಾಕಾ ನಾಕಾ ಕಾಜಾರ್’ ಮ್ಹಣ್ ಧಾಕ್ಟಿ ಭಯ್ಣ್ ಮ್ಹಣ್ತಾ ತರ್, `ಮ್ಹಜೆ ವೊನಿಯೆನ್ ದಾಟ್ಟುಕ್ ದಿಲ್ಲೆ ಕಶ್ಟ್ ಪುರೊ ಮ್ಹಾಕಾ ಲಗ್ನಾಚೊ ಸಹವಾಸ್ ನಾಕಾ’ ಮ್ಹಣ್ ಧಾಕ್ಟೊ ಭಾವ್ ನಿರ್ಧಾರಾಕ್ ಯೆತಾ. ಮಾಧ್ಯಮಾಂ, ಸಮಾಜ್ ಆನಿ ಕಾಯ್ದ್ಯಾಚಿ ವ್ಯವಸ್ತಾ ಸಗ್ಳಿಯ್ ಸ್ತ್ರೀಯಾಂ ಕೇಂದ್ರಿತ್ ಆಸಾ. ದಾದ್ಲ್ಯಾಚೆರ್ ಬೋಟ್ ಜೊಕುನ್ ತಾಕಾ ಭಿತರ್ ಕುಡಾಂವ್ಕ್ ವಾಟೊ ಜಾಯ್ತ್ಯೊ ಆಸಾತ್. ಅಸಲಿ ಪರಿಸ್ಥಿತಿ ಆಸ್ತಾನಾ ವ್ಹಡಿಲಾಂ ಸಯ್ತ್ ಖುಶೆವಿರೋಧ್ ಕಾಜಾರ್ ನಾಕಾ ಮ್ಹಣ್ ವಗಿಂ ಜಾಂವ್ಚೆಂಯ್ ಆಸಾ. ಜಾಲ್ಲೆಂ ಜಾತಾ, ಫುಡೆಂ ಪ್ರಾಯ್ ಜಾತಾನಾ ಆಸ್ರ್ಯಾಂತ್ ರಾವ್ಯಾಂ ಮ್ಹಣ್ ಘಟ್ಟ್ ನಿರ್ಧಾರ್ ಕೆಲ್ಲಿಂಯ್ ಆಸಾತ್.

೫.     ಲಿವ್ ಇನ್ ಸಂಸ್ಕೃತಿ

ಸಂಸಾರ್ ಕಿತ್ಲೊ ಮುಕಾರ್ ಪಾವ್ಲಾ ಮ್ಹಳ್ಯಾರ್ ಗೇ ಕಾಜಾರಾಂ (ಚಲೆ-ಚಲೆ), ಲಿಸ್ಬಿಯನ್ (ಚೆಡ್ವಾಂ-ಚೆಡ್ವಾಂ) ಕಾಜಾರಾಂ ಜಾವ್ನ್ ಕಪಲ್ ಸ್ವಾಪ್, ಕಾಕ್‌ಹೋಲ್ಡ್ ಕಪಲ್ಸ್ ಜಾವ್ನ್ ಆತಾಂ ಲಿವ್‌ಇನ್ ಪರ್ಯಾಂತ್ ಪಾವ್ಲಾಂ. `ಲಿವ್‌ಇನ್’ ಮ್ಹಳ್ಯಾರ್ ಲಗ್ನ್ ಜಾಯ್ನಾಸ್ತಾನಾ ಚಲ್ಯಾನ್ ಆನಿ ಚಲಿಯೆನ್ ಎಕಾಚ್ ಪಾಕ್ಯಾ ಪಂದಾ ರಾಂವ್ಚೆಂ, ರಾಂದ್ಚೆಂ, ಜೆಂವ್ಚೆಂ, ನಿದ್ಚೆಂ ಸಾಂಗಾತಾ. ಕೆದ್ನಾ ಆನಿ ಪುರೊ ಮ್ಹಣ್ ಭೊಗ್ತಾ ತೆದ್ನಾ ವಿಂಗಡ್ ಜಾಂವ್ಚೆಂ ವಾ ಅನ್ಯೇಕಾ ಸಾಂಗಾತಿಕ್ ಸೊದ್ಚೆಂ. ಆಮ್ಚಿಂ ಭುರ್ಗಿಂ ದೇಶ್-ವಿದೇಶ್, ಶಹರಾನಿ ರಾವ್ತಾತ್, ಪಿಜಿಂತ್ ಆಸಾತ್ ಮ್ಹಣ್ತಾತ್. ಪುಣ್ ಖಂಯ್, ಕಶೆಂ, ಕೊಣಾ ಸಾಂಗಾತಾ? ಘರ್‍ಚ್ಯಾಂಕ್ ಕಳಿತ್ ಆಸಾನಾ. ಹಿ ಖಬರ್ ಜಾಂವ್ಚಿ ಚಲಿಯೆಚಿ ಕೂಡ್ ಕಾತರ್‍ನ್ ಫ್ರಿಡ್ಜಾಂತ್ ದವರ್‍ತಾನಾ, ಡ್ರಮ್ಮಾಂತ್ ಘಾಲ್ನ್ ಸಿಮೆಂಟ್ ಥಾಪ್ತಾನಾ ವಾ ಪೆಟ್ರೊಲ್ ಘಾಲ್ನ್ ಹುಲ್ಪಯ್ತಾನಾ!

ಆತಾಂ ಲಗ್ನಾ ಪುರ್ವಿಲೆ ಲಂಯ್ಗಿಕ್ ಸಂಬಂಧ್, ಲಗ್ನಾ ಉಪ್ರಾಂತ್ಲೆ ಲಗ್ನಾ ಸಂಬಂಧ್ ಸಯ್ತ್ ಲಿವ್‌ಇನ್ ಸಂಸ್ಕೃತೆಕ್ ಪರಿವರ್ತನ್ ಜಾಲ್ಯಾತ್. ಲಿವ್‌ಇನ್ ಸಂಬಂಧ್ ಫಕತ್ ಆಂಕ್ವಾರ್‍ಯಾ ಮಧೆಂ ಮಾತ್ರ್ ನ್ಹಯ್ ವೆಗ್ಳಾಚಾರ್ ಜಾಲ್ಲ್ಯಾ ತಶೆಂಚ್ ಕಾಜಾರಿ ವೆಕ್ತಿಂಸಂಗಿಂಯ್ ಆಸ್ತಾತ್. ಹ್ಯೊಚ್ ಕಾಣಿಯೊ ವೆಬ್ ಸೀರಿಸ್ ಜಾವ್ನ್ ಆಮ್ಚೆಮುಕಾರ್ ಯೆತಾತ್ ಆನಿ ಕಾಳೊಕೀ ಕುಡಾಂತ್ ಆಮ್ಚಿಂ ಧಾಕ್ಟುಲಿಂ ಬಸೊನ್ ವೊರಾಂಗಟ್ಲ್ಯಾನ್ ಪಳೆತಾತ್! ಜೊ ದಿಕ್ತಾ ಹೆ, ವಹೀ ಬಿಕ್ತಾ ಹೇ, ಜೆಂ ಟ್ರೆಂಡಾರ್ ಆಸಾ, ತಶೆಂಚ್ ಕರುಂಕ್ ಪ್ರೇರಣ್ ಮೆಳ್ತಾ.

ಜೆನ್ ಝೀ ಪಿಳ್ಗಿ ಆಜ್ ಸಾತ್ವ್ಯಾ ಸಾಕ್ರಾಮೆಂತಾಥಾವ್ನ್ ಪಯ್ಸ್ ಉರೊಂಕ್ ಹಾಂಗಾ ದಿಲ್ಲ್ಯಾ ಕಾರಣಾಂಭಾಯ್ರ್ ಹೆರ್ ಸಭಾರ್ ಕಾರಣಾಂ ಆಸ್ತಿತ್. ಪುಣ್ ಸಕ್ಡಾಕೀ ಮೂಳ್ ಕಾರಣ್ – `ಜವಾಬ್ದಾರೆ ಥಾವ್ನ್ ಸುಟ್ಕಾ.’ ಆಮ್ಚ್ಯಾ ಭುರ್ಗ್ಯಾಂಕ್ ದೋನ್ ಮಾತ್ರ್ ಕಳಿತ್ ಆಸ್ಚೆಂ- ಏಕ್ ತೋಂಡ್ ಧುಂವ್ಕ್, ಆನ್ಯೇಕ್ ಗಾಂಡ್! ಆಮ್ಚ್ಯಾ ಘರಾಂನಿ ಭುರ್ಗ್ಯಾಂಚಿಂ ಸಕ್ಕಡ್ ಕಾಮಾಂ ಆವಯ್ ವಾ ಕಾಮಾಚಿ ಕರ್‍ತಾ. ಜೆವ್‌ಲ್ಲಿ ಬೊಶಿ, ಪಿಯೆಲ್ಲೊ ಗೊಬ್ಳೊ ಕಾಡ್ಚೆಂಥಾವ್ನ್ ಧರ್‍ನ್ ಭಿತರ್‍ಲಿಂ ವಸ್ತುರಾಂ ಸಯ್ತ್ ಆವಯ್ನ್ ಧುಯ್ಜೆ. ನಿದ್‌ಲ್ಲೆಂ ಬೆಡ್, ಆಂಗ್ ಪುಸುಲ್ಲೊ ತುವಾಲೊ, ಘರಾ ಘಾಲ್ಚಿಂ ವಸ್ತುರಾಂ ಕಾಡ್ನ್ ನಿತಳ್ ಕರುಂಕ್ ಆವಯ್. ಯುಕೆಜಿ-ಎಲ್‌ಕೆಜಿ ಭುರ್ಗ್ಯಾಂಚಿ ಗಜಾಲ್ ನ್ಹಯ್ ಹಿ, ಯುಜಿ-ಪಿಜಿಚ್ಯಾ ತರ್ನಾಟ್ಯಾಂಚಿ ಗಜಾಲ್ ಹಿ. ಹೋಮ್ ವರ್ಕ್, ಶಾಳೆಚೆ ಬ್ಯಾಗಾಚೊ ಲೋಡ್ ಆವಯ್ನ್ ವಾವಂವ್ಚೊ ಜಾಲ್ಯಾರ್, ಹಿಂ ಮೊಬಾಯ್ಲಾರ್ ಗೇಮ್ಸ್ ಆನಿ ಡರ್ಟಿ ಪಿಕ್ಚರ್ ಮಾತ್ರ್ ಡೌನ್‌ಲೋಡ್ ಕರುಂಕ್ ಹುಶಾರ್.

ಘರಾಂತ್ ಕಾಮಾಚಿ, ಮಾಗ್ಣ್ಯಾಚಿ, ನಿತಳಾಯೆಚಿ ಆನಿ ಶಿಸ್ತೆಚಿ ಜವಾಬ್ದಾರಿ ಲ್ಹಾನ್ ಥಾವ್ನ್ ಭುರ್ಗ್ಯಾಂಕ್ ಸಮಾನ್ ರಿತಿನ್ ವಾಂಟುನ್ ದೀಜೆ. ಹಿ ಮುಳಾವಿ ತರ್ಭೆತಿ ನಾ ತರ್ ಕುಟ್ಮಾ ಜಿವಿತ್ ಕಶೆಂ ರಾವತ್? ಜೆನ್ ಝೀ ಪಿಳ್ಗಿ ಹ್ಯಾ ಹಂತಾರ್ ಆಸಾ ತರ್ ಆನಿ ಆಲ್ಫಾ ಪಿಳ್ಗಿ ಕಶಿ ರಾವತ್?

_______________________

ಜರ್ ಚಲಿಯೆಲಾಗಿಂ ಶಿಕಪ್ ಆಸೊನ್, ಬರೆಂ ಜೊಡುಂಕ್ ಲಾಗ್ಲೆಂ – ಮಾಗಿರ್ ತಾಕಾ ಕೊಣ್‌ಚ್ ನಾಕಾ. ಪುಣ್ ತೆಂಚ್ ಎಕಾ ಚೆಡ್ಯಾಕಡೆ ಪಯ್ಶೆ ಜಾತಿತ್ ತರ್ ತಾಣೆಂ ಕುಟ್ಮಾಚ್ಯಾ ಹಜಾರ್ ರಾಟಾವಳಿಂಕ್ ಮಾತೆಂ ಮಾರಿಜೆ ಪಡ್ತಾ.

_______________

ಆಲ್ವಿನ್ ದಾಂತಿ, ಪೆರ್ನಾಲ್