ಸಾಂ. ಜುವಾಂವ್ ಬೊಸ್ಕೊಕ್ ಲಾಬ್ಲಲ್ಯಾ ಎಕಾ ದರ್ಶನಾಂತ್, ಥೊಡೆ ಭುರ್ಗೆ ಖೆಳೊನ್ ಆಸ್ಚೆಂ ತೊ ಪಳೆತಾ. ತೆ ಖೆಳ್ತಾಂ ಖೆಳ್ತಾಂ ಥೊಡೆ ಭುರ್ಗೆ ದೆವಾಚಿ ನಿಂದಾ ಕರುನ್ ಉಲೊಂವ್ಚೆಂ ತೊ ಆಯ್ಕಾತಾ. ಬೊಸ್ಕೊಕ್ ವೊಗೊ ರಾವೊಂಕ್ ಜಾಲೆಂನಾ. ತುರ್ತಾನ್ ವಚೊನ್ ತ್ಯಾ ಭುರ್ಗ್ಯಾಂಕ್ ತಾಣೆಂ ಭೆಶ್ಟಾಯ್ಲೆಂ ಆನಿ ತಸಲೆಂ ಉಲೊವ್ಣೆಂ ಬಂದ್ ಕರಯ್ಲೆಂ. ಉಪ್ರಾಂತ್ ಪಾಟಿಂ ಘುಂವ್ತಾನಾ ಏಕ್ ಪರ್ಜಳಿತ್ ನ್ಹೆಸಣ್ ನ್ಹೆಸ್ಲಲಿ ಸ್ತ್ರೀ ತಾಕಾ ದಿಸ್ಲಿ. ತಿ ಮ್ಹಣಾಲಿ, “ಭೆಶ್ಟಾವ್ನ್ ಭುರ್ಗ್ಯಾಂಚಿಂ ಮನಾಂ ವ್ಹಯ್ ಕರುಂಕ್ ತುಕಾ ಸಾಧ್ ಆಸಾ? ಹೆಂಚ್ ಕಾಮ್ ಮೊಗಾನ್ ಕೆಲ್ಯಾರ್ ತುಂ ಜಿಕ್ತೊಲೊಯ್. ಆಬ್ಳೆ ಹೆಂಚ್ ತುಜೆಂ ಕಾಮ್ ಜಾಂವ್ದಿ”. ಇತ್ಲೆಂ ಸಾಂಗೊನ್ ತಿ ನಪಂಯ್ಚ್ ಜಾಲಿ. ಹೆಂ ದೃಶ್ಯ್ ಬೊಸ್ಕೊಕ್ ಧೊಸುಂಕ್ ಲಾಗ್ಲೆಂ. ತಿ ಮರಿ ಮಾಂಯ್ ಮ್ಹಣ್ ತಾಕಾ ಸಮ್ಜೊಂಕ್ ವೇಳ್ ಗೆಲೊನಾ. ಫುಡೆಂ ಬೊಸ್ಕೊನ್ ಮರಿಯೆಕ್ ಆಪ್ಲಿ ಆಧಾರಿಣ್ ಮ್ಹಣ್ ಘೆತ್ಲೆಂ. ಟ್ಯೂರಿನಾಂತ್ ‘ಮರಿ, ಕ್ರಿಸ್ತಾಂವಾಂಚೊ ಆಧಾರ್’ ಮ್ಹಣೊನ್ ತಿಚ್ಯಾ ರಕ್ಶಣೆಖಾಲ್ ತಾಚೊಚ್ ಏಕ್ ಮೇಳ್ ಘಡ್ಲೊ. ತಶೆಂಚ್, ‘ಕ್ರಿಸ್ತಾಂವಾಂಚೊ ಆಧಾರ್ ಮಾಯೆಚ್ಯೊ ಧುವೊ’ (1872) ಮ್ಹಳ್ಳೊ ಸ್ತ್ರೀಯಾಂಚೊ ಮೇಳ್ ಸುರ್ವಾತ್ಲೊ.

ಕಥೊಲಿಕಾಂಕ್ ಮರಿಯೆಚೆಂ ನಾತೆಂ ದುಬಾವಾವೀಣ್ ವಿಶೇಸ್. ಜೆಜು ಆನಿ ತಾಚ್ಯಾ ಉಪ್ರಾಂತ್ ಸುರ್ವಿಲ್ಯೆ ಪವಿತ್ರ್ ಸಭೆಂತ್ ಶಿಸಾಂ ಸಾಂಗಾತಾ ತಿಚೆಂ ಮೆತೆರ್‍ಪಣ್ ಆಮಿ ಮಾನಾನ್ ಲೆಕ್ತಾಂವ್. ತಾಚ್ಯಾ ಉಪ್ರಾಂತ್ ಲೂರ್ದ್ಸ್ ಆನಿ ಫಾತಿಮಾಂತ್ ಲಾಬ್ಲಲಿ ತಿಚಿ ದಿಸೊವ್ಣ್, ತಿ ನಿರಂತರ್ ಆಮ್ಚೆಸಂಗಿ ಸಂಪರ್ಕಾರ್ ಆಸ್ಚಿ ಆವಯ್ ಮ್ಹಣ್ ಸಾಂಗ್ತಾ. ಜುಲಾಯ್ ಮ್ಹಯ್ನೊ ಯೆತಾನಾ ಕಾರ್ಮೆಲ್ ಮಾಯೆಚೊ ಉಡಾಸ್ ಕಾಡ್ತಾಂವ್. ತಿಚ್ಯೆ ಬೆಂತಿಣೆದ್ವಾರಿಂ ಭಾಸಾಯಿಲ್ಲೆಂ ರಕ್ಶಣ್ ಆಮ್ಕಾಂ ವ್ಹಡ್ ಭರ್ವಶಾಚೆಂ. ಹ್ಯಾ ಪಾಟ್‌ಥಳಾರ್ ಮರಿ ಆಮ್ಕಾಂ ಕ್ರಿಸ್ತಾಂವಾಂಕ್, ಭರ್ವಶಾಚ್ಯೆ ವಾಟೆರ್ ಚಲೊಂಕ್ ಕಶೆಂ ಆಧಾರ್ ಜಾವ್ನ್ ರಾವ್ತಾ ಮ್ಹಣೊನ್ ಸಮ್ಜೊಂಕ್ ಜಾಯ್.

ಸಾಂ. ಲುವಿಸ್ ದೆ ಮೊಂಟ್ ಪೊರ್ಟ್ ಸಾಂಗ್ತಾಲೊ, “ಪಯ್ಲೆಂ ತುಂ ಮರಿಯೆಕ್ ಸೊಧುನ್ ವಚ್ ಆನಿ ತಿ ಮೆಳ್ತಚ್ ತುಜ್ಯಾ ಜಿವಿತಾಕ್ ನವೊ ಆಕಾರ್ ದೀಂವ್ಕ್ ತಿಕಾ ಸೊಡ್”. ಮರಿಯೆಚೊ ಸಾಂಗಾತ್ ಆನಿ ಆಧಾರ್ ಪವಿತ್ರ್ ಸಭೆಚ್ಯೆ ಆನಿ ಕ್ರಿಸ್ತಾಂವಾಂಚ್ಯೆ ಜಿಣಿಯೆಂತ್ ಖಳನಾಸ್ತಾಂ ಲಾಬ್ಲಾ. ಅಸಂಖ್ಯಾತ್ ಕ್ರಿಸ್ತಾಂವಾಂಕ್ ತಾಂಚ್ಯಾ ಜಿಣಿಯೆಪಯ್ಣಾರ್ ತಿ ಏಕ್ ಪ್ರೇರಣ್ ಮಾತ್ರ್ ನ್ಹಯ್ ಆದರ್ಶ್. ಮರಿಯೆಚೆಂ ಮಿಸಾಂವ್ ಆಮ್ಚೆಪಾಸತ್ ವಿನತಿ ಕರ್‍ಚ್ಯಾಂತ್ ಸಂಪನಾ. ಕಾನಾ ಲಗ್ನಾವೆಳಾ ಜೆಜುಲಗಿಂ ತಾಂಚೆಪಾಸತ್ ವಿನತಿ ಕರ್‍ನ್ ತಿ ವೊಗಿ ರಾವನಾ, ಬಗಾರ್ ‘ತೊ ತುಮ್ಕಾಂ ಕಿತೆಂ ಸಾಂಗ್ತಾ ತೆಂ ಕರಾ’ ಮ್ಹಣ್ ಥಂಯ್ ಆಸ್‌ಲ್ಲ್ಯಾ ಸೆವಕಾಂಕ್ ಕಳಯ್ತಾ. ಆಮ್ಚ್ಯಾ ಕಶ್ಟಾಂವೆಳಾರ್ ಮರಿಯೆನ್ ಸಾಂಗ್ಚಿಂ ಉತ್ರಾಂ ಹಿಂಚ್ ‘ತೊ ತುಮ್ಕಾಂ ಕಿತೆಂ ಸಾಂಗ್ತಾ ತೆಂ ಕರಾ’.

ಮರಿಯೆನ್ ತಿಚ್ಯಾ ಸಾಂಗಾತ್ಪಣಾಚಿ ಖುಣಾ ಕಶೆಂ ದಿಲ್ಲಿ ಪುಡಿರಂಗಾಚಿ ಬೆಂತಿಣ್ (brown scapular), ಕಾರ್ಮೆಲಿತಾಂ ಮುಕಾಂತ್ರ್ ಸಂಸಾರಾರ್ ಚಡಿತ್ ಒಳ್ಕಿಚಿ. ಕಾರ್ಮೆಲಿತ್ ಸಂಪ್ರದಯಾಪರ್ಮಾಣೆಂ ಸಾಂ. ಸಾಯ್ಮನ್ ಸ್ಟೊಕ್ ತ್ಯಾ ಕಾಳಾಚೊ ಕಾರ್ಮೆಲಿತಾಂಚೊ ಮ್ಹಾವ್ಹಡಿಲ್. ಕಶ್ಟಾಂತ್ ಆಸ್ತಾನಾ ಮರಿಯೆನ್ ತಿಚ್ಯಾ ರಾಕಣೆಚೊ ಸಂಕೇತ್ ಜಾವ್ನ್ ಇಂಗ್ಲೆಂಡಾಂತ್ ಜುಲಾಯ್ 16, 1251 ಇಸ್ವೆಂತ್ ಬೆಂತಿಣ್ ದಿಲಿ. ಅಶೆಂ ಬೆಂತಿಣೆಚೆಂ ದೆವಾಸಾಂವ್ ತ್ಯಾ ಉಪ್ರಾಂತ್ ಸುರು ಜಾಲೆಂ. ಮಂಗ್ಳುರಾಂತ್ ಹೆಂ ದೆವಾಸಾಂವ್ ಕಾರ್ಮೆಲಿತ್ ಬಿಸ್ಪ್, ‘ಆಪೊಸ್ತಲಿಕ್ ವಿಗಾರ್’ ಜಾವ್ನ್ ಆಡಳ್ತೆಂ ಚಲಯ್ತಾನಾ (1845-1873) ತಾಂಚ್ಯಾ ಮಾರ್ಗದರ್ಶನಾಖಾಲ್ ಲೊಕಾಮೊಗಾಳ್ ಜಾಲೆಂ ಮ್ಹಣ್ಯೆತ್. ಸಾಯ್ಮನ್ ಸ್ಟೊಕಾಕ್ ಬೆಂತಿಣ್ ದಿಲ್ಲಿಚ್ ನಾ ವಾ ಅಸಲೆಂ ಏಕ್ ಘಡಿತ್ ಘಡೊಂಕ್‌ಚ್ ನಾ ಮ್ಹಣ್ ವಾದ್ ಕರ್‍ಚೆಯ್ ಆಸಾತ್.

ಪುಣ್ ಉಪ್ರಾಂತ್ ಫಾತಿಮಾಚ್ಯೆ ದಿಸೊವ್ಣೆಂತ್ ಹಾಕಾ ಮರಿಚ್ ಜಾಪ್ ದಿತಾ. ಅಕ್ಟೋಬರ್ 13, 1917 ಇಸ್ವೆಂತ್ ಫಾತಿಮಾಂತ್ ಸುರ್ಯಾಚಿ ಖುಣಾ 70,000 ಲೊಕಾಂನಿ ಪಳೆಲ್ಲೆಂ ಘಡಿತ್. ತವಳ್ ಲುಸಿ, ಫ್ರಾನ್ಸಿಸ್ಕೊ ಆನಿ ಜೆಸಿಂತಾಕ್ ದಿಸ್ಲಲಿ ಮರಿ ಕಾರ್ಮೆಲ್ ಸಾಯ್ಬಿಣೆಚ್ಯಾ ನ್ಹೆಸ್ಣಾರ್ ಆಸೊನ್ ತಿಚ್ಯಾ ಹಾತಿಂ ಪುಡಿರಂಗಾಚಿ ಬೆಂತಿಣ್ (brown scapular) ಆಸ್ಲಿ. ಉಪ್ರಾಂತ್ ಕಾರ್ಮೆಲಿತ್ ಭಿತರ್‍ಲಿ ಮಾದ್ರ್ ಜಾಲ್ಲಿ ಲುಸಿ ಬರಯ್ತಾ, “ಫಾತಿಮಾಚ್ಯಾ ಶರ್ತಾಂಪಯ್ಕಿ ಏಕ್ ಮ್ಹಳ್ಯಾರ್ ಆಮಿ ದೀಸ್ ಆನಿ ರಾತ್ ಪುಡಿರಂಗಾಚಿ ಬೆಂತಿಣ್ ನ್ಹೆಸಜೆ ಮ್ಹಣೊನ್ ತಿಣೆಂ ಆಮ್ಕಾಂ ಸಾಂಗ್‌ಲ್ಲೆಂ. ಬೆಂತಿಣ್ ಮರಿಯೆಚ್ಯಾ ಖತಾವೀಣ್ ಕಾಳ್ಜಾಕ್ ಆಮಿ ಕರ್‍ಚೆಂ ಸಮರ್ಪಣ್ ಮ್ಹಣ್ ಆಮ್ಕಾಂ ತಿಣೆಂ ಸಮ್ಜಣಿ ದಿಲ್ಲಿ.”

ಹಿಂಚ್ ಸಿಂತಿಮೆಂತಾಂ ಉಚಾರುನ್ ಪಾಪಾ ಜುವಾಂವ್ ಪಾವ್ಲ್ ದುಸ್ರೊ ಸಾಂಗ್ತಾ, “ಮ್ಹಜ್ಯಾ ತರ್ನಾಟ್ಪಣಾಚ್ಯಾ ದಿಸಾಂಥಾವ್ನ್ ಹಾಂವ್ ಕಾರ್ಮೆಲ್ ಮಾಯೆಚಿ ಬೆಂತಿಣ್ ನ್ಹೆಸೊನ್ ಆಯ್ಲಾಂ. ಹ್ಯೆ ಬೆಂತಿಣೆವರ್ವಿಂ ಬೊವ್ ಸಾದ್ಯೆ ರಿತಿನ್ ತಿಚೆರ್ ಮೋಗ್ ಆಮಿ ವೆಕ್ತ್ ಕರ್‍ಯೆತ್. ಹಿ ಬೆಂತಿಣ್ ನ್ಹೆಸ್‌ಲ್ಲೆವರ್ವಿಂ ಆಮಿ ತಿಚ್ಯಾ ಖತಾವೀಣ್ ಕಾಳ್ಜಾಕ್ ಆಮ್ಚೆಂ ಸಮರ್ಪಣ್ ಕರ್‍ತಾಂವ್.” ದೆಕುನ್ ಬೆಂತಿಣ್ ನ್ಹೆಸ್ಚೆಂ ಮ್ಹಳ್ಯಾರ್ ಮರಿಯೆವಯ್ಲೊ ಮೋಗ್ ಆಮಿ ವೆಕ್ತ್ ಕರ್‍ಚೊ ಮಾತ್ರ್ ನ್ಹಯ್, ಆಮ್ಕಾಂಚ್ ತಿಚ್ಯಾ ಖತಾವೀಣ್ ಕಾಳ್ಜಾಕ್ ಸಮರ್ಪುನ್ ದಿಂವ್ಚೆಂ. ಅಶೆಂ ಕೆಲ್ಲ್ಯಾ ಆಮ್ಕಾಂ ತಿ ರಾಕಣ್ ದೀನಾಸ್ತಾಂ ಹಾತ್ ಸೊಡ್ಚಿನಾ.

*

ಸರ್ವ್ ಕಾರ್ಮೆಲಿತ್ ಫ್ರಾದ್ ಆನಿ ಸೆಕುಲರ್ ಕಾರ್ಮೆಲಿತಾಂಚ್ಯಾ ನಾಂವಿಂ ತುಮ್ಕಾಂ ಕಾರ್ಮೆಲ್ ಸಾಯ್ಬಿಣಿಚ್ಯಾ ಫೆಸ್ತಾಚೆ ಉಲ್ಲಾಸ್ ಪಾಟಯ್ತಾಂ.

ಬಾಪ್ ಐವನ್ ಸೊಜ್, ಕಾರ್ಮೆಲಿತ್