ಕಾರ್ಮೆಲ್ ಮೀಡಿಯಾಕ್ 16 ವರ್ಸಾಂ ಭರ್ಲಿಂ. ನಮಾನ್ ಬಾಳೊಕ್ ಜೆಜು ಮ್ಹಯ್ನಾಳೆಂ ತಶೆಂ ಕಾರ್ಮೆಲ್ ಕಿರಣ್ ಯೂಟ್ಯೂಬ್ ಚ್ಯಾನೆಲಾ ಮುಕಾಂತ್ರ್ ಕಾರ್ಮೆಲ್ ಗುಡ್ಯಾ ವಯ್ಲ್ಯಾ ಫ್ರಾದಿಂನಿ ಆಮ್ಚ್ಯಾ ಕೊಂಕ್ಣಿ ಲೊಕಾಕ್ ಸಬಾರ್ ಬರೆ ವಿಶಯ್ ವಾಚುಂಕ್, ಪಳೆಂವ್ಕ್ ಆನಿ ನಿಯಾಳಾಕ್ ದಿಲ್ಯಾತ್. ಜಿವಿತಾಚ್ಯಾ ಪ್ರಗತೆಕ್ ಆತ್ಮಿಕ್ ದಾಯ್ಜ್ ಜಾಲ್ಲೆಂ ನಮಾನ್ ಬಾಳೊಕ್ ಜೆಜು ಪತ್ರ್ ತಶೆಂ, ಉತ್ರಾಂಚಿ ಊಬ್ ಆನಿ ತತ್ವಾಂಚಿ ಧಾವ್ ದಿಂವ್ಚೆಂ ಲಗ್ಬಗ್ 84 ಹಜಾರ್ ಜಣ್ ಸಬ್-ಸ್ರೈಬರ್ ಆಸ್ಚೆಂ ಕಾರ್ಮೆಲ್ ಕಿರಣ್ ಚ್ಯಾನೆಲ್ ಆಜ್ ಹಜಾರೊಂ ಲೊಕಾಚ್ಯಾ ಜಿಣಿಯೆಕ್ ಪ್ರೇರಣ್ ಜಾಂವ್ಕ್ ಪಾವ್ಲಾಂ. ಸಬಾರ್ ತರ್ನ್ಯಾ ತಾಲೆಂತಾಕ್ ಆವ್ಕಾಸ್ ದಿಲ್ಲೆಂ ಹೆಂ ಮಾಧ್ಯಮ್, ಫಕತ್ ಲೊಕಾಚ್ಯಾ ಆತ್ಮಿಕ್ ಗರ್ಜಾಂಕ್ ಮಾತ್ರ್ ನ್ಹಯ್ ಆಸ್ತಾಂ ಸಬಾರ್ ಬರ್‍ಯಾ ಕಾರ್ಯಕ್ರಮಾಂ ವರ್ವಿಂ ಸಮಾಜಿಕ್ ತಶೆಂ ಮಾನಸಿಕ್ ಬರೆಂಪಣ್ ಜೋಡ್ನ್ ದೀಂವ್ಕ್ ಸಕ್ಲಾಂ. ಕಾರ್ಮೆಲಿತ್ ಯಾಜಕ್ ಮಾತ್ರ್ ನ್ಹಯ್ ಲಾಯಿಕ್ ಲೊಕಾಕ್ ಸಯ್ತ್ ಹ್ಯಾ ಮಾಧ್ಯಮಾ ವರ್ವಿಂ ಆಪ್ಲಿಂ ತಾಲೆಂತಾ ಊರ್ಜಿತ್ ಕರುಂಕ್ ಏಕ್ ವೆದಿ ಮೆಳ್ಳ್ಯಾ. ಆನಿ ಹ್ಯಾಚ್ಚ್ ದಿಶೆನ್ ಥೊಡ್ಯಾಚ್ಚ್ ದಿಸಾಂ ಆದಿಂ ಸುರು ಜಾಲ್ಲೆಂ ಕೊಡ್ಯಾಳಾಂತ್ಲೆ ಪಯ್ಲೆಂ ಕೊಂಕ್ಣಿ ಪೋಡ್-ಕಾಸ್ಟ್ – ಕಾರ್ಮೆಲ್ ಕೆಫೆ.

ಪೋಡ್-ಕಾಸ್ಟ್ ಮ್ಹಳ್ಯಾರ್ ಕಿತೆಂ?

ಅಮೆರಿಕಾಂತ್ ಐ-ಪೊಡಾಚೆರ್ ಬ್ರೊಡ್-ಕಾಸ್ಟ್ ಜಾವ್ನ್ ಆಸ್ಲೆಲಿಂ ಕಾರ್ಯಾಕ್ರಮಾಂಕ್ ಪೊಡ್-ಕಾಸ್ಟ್ ಮ್ಹಳ್ಳೆಂ ನಾಂವ್ ಪಡ್ಲೆಂ. 2004 ಇಸ್ವೆಂತ್ ಬೆನ್ ಹ್ಯಾಮೆರ್ಸ್ಲಿ ಮ್ಹಳ್ಳ್ಯಾನ್ ಹೆಂ ನಾಂವ್ ದಿಲ್ಲೆಂ ಆನಿ ಕ್ರಮೇಣ್ ಹೆಂ ಸಗ್ಳ್ಯಾ ಸಂಸಾರಾಚೆರ್ ವಿಸ್ತಾರುಂಕ್ ಸುರ್ವಾತ್ಲೆಂ. ಹಾಚೊ ಮುಖ್ಯ್ ಉದ್ದೇಶ್ ಜಾವ್ನ್ ಆಸ್ಲೊಲೊ ಇಂಟರ್ನೆಟ್ ವಾಪಾರ್ನ್ ಏಕಾ ರಿತಿಚೆಂ ಸಾಂಕಳ್ ಕಾರ್ಯಕ್ರಮ್ (Podcasts are often part of a series with a specific theme and can be episodic) ರಿತಿರ್ ಪ್ರಸಾರ್ ಕರ್ಚೆಂ. ಪೊಡ್-ಕಾಸ್ಟ್ ಏಕ್ ವ್ಯಕ್ತಿನ್ ಕಾಣ್ಯೆ ರುಪಾರ್, ವಾ ಭಾಷಣಾ ರುಪಾರ್ ವಾ ಸಂವಾದ್ ಕಾರ್ಯಕ್ರಮ್ ವಾ ನಾಟಕ್ (theatrical)ಅಶೆಂ ವಿವಿಧ್ ರುಪಾಂನಿ ಪ್ರಸಾರ್ ಕರ್ಯೆತಾ. ಪ್ರೇರಣಾತ್ಮಕ್ ಕಾರ್ಯಕ್ರಮ್, ವಾ ಕೊಮೆಡಿ, ಸಾಮಾಜಿಕ್ ಚಿಂತನ್, ಸಂದರ್ಶನ್ ಅಶೆಂ ವಿವಿಧ್ ವಿಶಯಾಂಚೆರ್ ಪೊಡ್-ಕಾಸ್ಟ್ ಕರ್ಯೆತಾ.

ಕಾರ್ಮೆಲ್ ಕೆಫೆ ಕಿತ್ಯಾಕ್?

ಕಾರ್ಮೆಲ್ ಕಿರಣ್ ಯೂಟ್ಯೂಬ್ ಚ್ಯಾನೆಲ್ ಆಪ್ಲ್ಯಾ ಪ್ರೇಕ್ಷಕಾಂಕ್ ಬರ್‍ಯಾಂತ್ಲೆ ಬರೆ ವಿಶಯಾಚೆರ್ ಕಾರ್ಯಕ್ರಮಾ ದೀವ್ನ್ ಆಯ್ಲಾಂ. ಅಶೆಂ ಆಸ್ತಾಂ ಸಮಾಜೆಂತ್ ಕಿತೆಂ ತರೀ ಬರೆಂ ಜಾಯ್ಜಯ್ ಮ್ಹಳ್ಳ್ಯಾ ಉದ್ದೇಶಾನ್ ಆಮ್ಚ್ಯಾ ಕೊಂಕ್ಣಿ ಸಮಾಜೆಂತ್ಲಾ ಸಾಧಕಾಂಕ್ ಸೊಧುನ್ ಕಾಡ್ನ್ ತಾಂಚ್ಯಾ ಜಿಣ್ಯೆ ವರ್ವಿಂ ವಾ ಚಿಂತ್ಪಾವರ್ವಿಂ ಲೊಕಾಚ್ಯಾ ಚಿಂತ್ಪಾಕ್ ಈಟ್ ಘಾಲ್ಚೆಂ ಪ್ರಯತನ್ ಚಲ್ತಾನಾ ಉದೆಲ್ಲೆಂ ಕಾರ್ಯೆಂ ಜಾವ್ನಾಸಾ ಕಾರ್ಮೆಲ್ ಕೆಫೆ. ಕಾರ್ಮೆಲ್ ಕೆಫೆಚೆಂ ಮೂಳ್-ಮಂತ್ರ್ ಹೆಂ – “a sip from the cup of life”. ಮ್ಹಣ್ಜೆ ಜಿಣ್ಯೆಚ್ಯಾ ಕೊಪಾಂತ್ಲೊ ಏಕ್ ಘೊಟ್. ಕಿತ್ಯಾ, ಹ್ಯಾ ಸಂವಾದ್ ಕಾರ್ಯಾಕ್ರಮಾಕ್ ಯೆಂವ್ಚಿ ಸಯ್ರಿಂ ತಾಂಚ್ಯಾ ಜಿಣ್ಯೆಂತ್ ತಾಣಿಂ ಕೆಲ್ಲೆಂ ಸಾಧನ್ ಜರ್ ಕೊಣೀ ಎಕ್ಲ್ಯಾಕ್ ಪ್ರೇರಣ್ ಜಾಂವ್ಕ್ ಪಾವ್ಲೆಂ ತರ್, ಹೆಂ ಕಾರ್ಯಕ್ರಮ್ ಸಾರ್ಥಕ್ ಜಾಲ್ಲೆಬರಿ. ಸಾಮಾಜಿಕ್, ಧಾರ್ಮಿಕ್, ಆದ್ಯಾತ್ಮಿಕ್, ರಾಜಕೀಯ್, ಭಲಾಯ್ಕಿ ಅಸಲೆ ವಿಶಯ್ ಘೆವ್ನ್ ಚರ್ಚೆ ಚಲವ್ನ್ ಲೊಕಾಕ್ ಚಡ್ ಆನಿ ಚಡ್ ಮಾಹೆತ್ ತಶೆಂ, ಬರೆಂ ಚಿಂತಾಪ್ ರುತಾ ಕರುಂಕ್ ಹಿ ಏಕ್ ವೆದಿ ತಯಾರ್ ಕೆಲ್ಯಾ. ಹಫ್ತ್ಯಾಕ್ ಏಕ್ ಕಾಣಿ, ಸಾಧನಾಚಿ ಜಿಣಿ, ತ್ಯಾ ಸಾಧನಾ ಪಾಟ್ಲಿ ಮ್ಹಿನತ್, ಫುಡ್ ಕೆಲ್ಲಿಂ ಸವಾಲಾಂ, ನಿಸ್ರೊನ್ ಪಡ್ಲೆಲಿಂ ಘಡಿತಾಂ, ಉಟೊನ್ ಉಭೆ ರಾವೊಂಕ್ ಆಧಾರ್ ಜಾಲ್ಲಿಂ ಜಣಾಂ ಹೆಂ ಸರ್ವ್ ಹಾಂಗಾ ಅದಲ್ ಬದಲ್ ಜಾತಾ. ಸಮಾಜೆಂತ್ ಘಡ್ಚೆ ಅನ್ನ್ಯಾಯ್, ಅನಾಚಾರ್, ವಾ ಸುಧಾರಣ್ ಜಾಂವ್ಕ್ ಗರ್ಜ್ ಆಸ್ಚೊ ಸಂಗ್ತಿ ವಯ್ರ್ ಹಾಂಗಾ ಚರ್ಚಾ ಚಲ್ತಾ. ಭಲಾಯ್ಕಿ ತಶೆಂ ಕಾನುನ್ ಮಾಹೆತ್ ಜೊಕ್ತ್ಯಾ ಹೆಳ್‌ಲ್ಲ್ಯಾ ವ್ಯಕ್ತಿ ಥಾವ್ನ್ ಮೆಳ್ತಾನಾ, ಚೂಕ್ ಸಮ್ಜಣಿ ಪುಸುನ್ ಕಾಡ್ಚೆಂ ಕಾಮ್ ಹಾಂಗಾ ಘಡ್ತಾ. ವಿವಿಧ್ ಕ್ಷೇತ್ರಾಂತ್ಲ್ಯಾ ವ್ಯಕ್ತಿಂಚಿ ವಳಕ್ ಹಾಂಗಾ ಮೆಳ್ತಾ ಮಾತ್ರ್ ನ್ಹಯ್ ಭುರ್ಗ್ಯಾಂಕ್ ತಾಂಚ್ಯಾ ಫುಡಾರಾಕ್ ಕಸಲೆ ಆವ್ಕಾಸ್ ಆಸಾತ್ ಮ್ಹಳ್ಳೆಂ ಹಾಂಗಾ ಸಮ್ಜಾತಾ. ಎದೊಳ್ಚ್ಯಾಕ್ ಥೊಡೆ ಎಪಿಸೊಡ್ ಲೊಕಾಕ್ ಇತ್ಲೆ ಪಸಂದ್ ಜಾಂವ್ಕ್ ಪಾವ್ಲ್ಯಾತ್ಗೀ ಮ್ಹಳ್ಯಾರ್ ಹರ್ಯೆಕ್ ಎಪಿಸೊಡಾಚೆಂ views ಹಾಕಾ ಸಾಕ್ಸ್ ದಿತಾತ್.

ಮುಕಾರ್ ಕಿತೆಂ?

ಕಸಲೆಂಯ್ ಕಾರ್ಯಕ್ರಮ್ ಜಾಂವ್ ತಾಚಿ ಯಶಸ್ವಿ ವೀಕ್ಷಕಾಂ ವಯ್ರ್ ಹೊಂದೊನ್ ಆಸಾ. ತರ್ ವೀಕ್ಷಕಾಂಕ್ ಕಿತೆಂ ಪಸಂದ್ ಜಾಯ್ತ್? ಕಸಲ್ಯಾ ವಿಶಯಾಚೆರ್ ಸಂವಾದ್ ತಾಂಕಾ ರುಚ್ತಾ? ಕಸಲ್ಯಾ ವಿµಯಾಂಚೆರ್ ಮಾಹೆತ್ ತಾಂಕಾ ಗರ್ಜೆಚಿ ಹೆಂ ಫಕತ್ ವೀಕ್ಷಕಾಂನಿ ಆಮ್ಕಾಂ ಸಾಂಗ್ಯೆತಾ. ಜರ್ ಎದೊಳ್ ಕೊಣೆಂ ಹೆಂ ಕಾರ್ಯಾಕ್ರಮ್ ಪಳೆಲಾಂ ತಾಣಿಂ ತಾಚೊ ವಿಮರ್ಸೊ ಆಮ್ಕಾಂ ಕಳಯ್ಲೊ ತರ್ ಹೆಂ ಕಾರ್ಯಕ್ರಮ್ ಅನಿಕೀ ಬರೆಂ ಕರ್ನ್ ಚಲವ್ನ್ ವರುಂಕ್ ಆಮ್ಕಾಂ ಸಾಧ್ಯ್ ಜಾತೆಲೆಂ. ಆನಿ ಕೊಣೆಂ ಹೆಂ ಕಾರ್ಯಕ್ರಮ್ ಪಳೆವ್ನಾಂ ತಾಂಕಾ ಹಾಚೆ ವಿµಂತ್ ಕಳ್ಳೆಂ ತರ್ ತಾಂಕಾಯ್ ಬರಿ ಮಾಹೆತ್ ಮೆಳುಂಕ್ ಸಾಧ್ಯ್ ಜಾತೆಲೆಂ. ಜರ್ ಹ್ಯಾ ಕಾರ್ಯಕ್ರಮಾ ವರ್ವಿಂ ಕೊಣೀ ಪ್ರೇರಿತ್ ಜಾಯ್ತ್ ಆನಿ ಕೊಣಾಯ್ಕಿ ಮಾಹೆತ್ ಮೆಳೊನ್ ಜಿಣಿ ಸುಫಳ್ ಕರ್ಚೆಂ ಹಾತೆರ್ ಜಾಯ್ತ್ ತರ್ ಹ್ಯಾ ಕಾರ್ಯಕ್ರಮಾಚೊ ಉದ್ದೇಶ್ ಪೊಂತಾಕ್ ಪಾವ್ತಲೊ.

ಸಂಪ್ಣಿ

ಕೊಂಕ್ಣಿ ಮಾಧ್ಯಮಾಂಕ್ ಪ್ರೇಕ್ಷಕ್ ಭೋವ್ ಉಣೆಂ. ಕಿತ್ಯಾಕ್ ಕೊಂಕ್ಣಿ ಉಲಯ್ತೆಲ್ಯಾಂಚೊ ಸಂಖೊ ದೀಸ್ ವೆತಾಂ ಉಣೊ ಜಾವ್ನ್ ಆಸಾ. ಕಾರಣಾಂ ಸಬಾರ್ ಆಸೊಂಕ್ ಪುರೊ. ಕೊಂಕ್ಣೆಂತ್ ಬರ್‍ಯಾ ಕಾರ್ಯಾಕ್ರಮಾಂಚೊ ಅಭಾವ್ ಆಸಾ, ಯುವಜಣಾಂಕ್ ಆಕರ್ಶಿತ್ ಕರ್ಚಿಂ ಕೊಂಕ್ಣಿ ಕಾರ್ಯಿಂ ಉಣಿಂ ಆಸಾತ್, ಇತ್ಯಾದಿ. ಪುಣ್ ಜೆಂ ಕಿತೆಂ ಆಮ್ಚ್ಯಾ ತಾಂಕಿ ಭಿsತರ್ ಆಸಾ ತೆಂ ಸರ್ವ್ ಕೊಂಕ್ಣಿ ಮಾಧ್ಯಮಾಂ ಕರ್ನ್ ಆಸಾತ್. ದೆಕುನ್ ಪ್ರೇಕ್ಷಕಾಂನಿ ತಾಂಚೊ ಸಾಂಗಾತ್ ಆನಿ ಪಾಟಿಂಬೊ ಆಮ್ಕಾಂ ದಿಲೊ ತರ್, ಆಮ್ಚಿಂ ಮಾಧ್ಯಮಾಂ ಅನಿಕೀ ಚಡ್ ಬರಿಂ ಜಾತೆಲಿಂ ಮಾತ್ರ್ ನ್ಹಯ್ ಸವಾಂಕ್ ಪಸಂದೆಚಿ ಆನಿ ಉಪ್ಕಾರಾಕ್ ಪಡ್ಚಿಂ ಕಾರ್ಯಕ್ರಮಾಂ ಆಮ್ಚ್ಯಾ ಮಾಧ್ಯಮಾಂನಿ ಪ್ರಸಾರ್ ಜಾತೆಲಿಂ. ದೆಕುನ್ ಕಾರ್ಮೆಲ್ ಕಿರಣ್ ಯೂಟ್ಯೂಬ್ ಚ್ಯಾನೆಲ್ like ಕರಾ, share ಕರಾ, subscribe ಕರಾ, ಆನಿ ಘಾಂಟ್ ಮಾರುಂಕ್ ವಿಸ್ರಾನಾಕಾತ್. ಕಾರ್ಮೆಲ್ ಕೆಫೆಂತ್ ಪರತ್ ಮೆಳ್ತಾ ಮ್ಹಣಾಸಾರ್ ಹಾಂವ್ ತುಮ್ಚಿಂ ಹೋಸ್ಟ್ ಲೀಝಾ ರೊಡ್ರಗಸ್ ದೇವ್ ಬರೆಂ ಕರುಂ ಮ್ಹಣ್ತಾಂ. ಬಾಯ್ ಬಾಯ್.

✍️ –ಲೀಝಾ ರೊಡ್ರಿಗಸ್