📰 ಎಪ್ರಿಲ್ 09: ಕಿನ್ನಿಗೋಳಿ: ಹಾಂಗಾಸರ್’ಚ್ಯಾ ’ಸರ್ವಧರ್ಮ ಸಂಗಮ ಪುನರ್’ವಸತಿ ಕೇಂದ್ರಾಚ್ಯಾ ಆಶ್ರ್ಯಾಖಾಲ್ ’ಆನ್ನಾ’ಸ್ ಕಿಚನ್’ ನಾಂವಾಚ್ಯಾ ಇಂಗ್ಲಿಶ್ ರಾಂದ್ಪಾಪುಸ್ತಕಾಚೆಂ ವಿಮೋಚನ್ ಎಪ್ರಿಲ್ 6 ತಾರಿಕೆರ್ ಚಲ್ಲೆಂ.

ಕ್ರತಿ ವಿಮೋಚನ್ ಕೆಲ್ಲ್ಯಾ ಫಾಂಕಿವಂತ್ ಇಂಗ್ಲಿಶ್ ಕಾದಂಬರಿಕಾರ್ನ್ ಶ್ರೀಮತಿ ಜಿಸೆಲ್ ಮೆಹ್ತಾನ್ ಸಾಂಗ್ಲೆಂ ಕೀ – “ಅಂತರಾಸ್ಟ್ರೀಯ್ ಸ್ಥರಾರ್ ಭಾರತಾಚ್ಯೊ ಸ್ತ್ರೀಯೊ ರಾಂದ್ಪಾಕ್ಶೇತ್ರಾಂತ್ ಅವ್ವಲ್ ಮ್ಹಣ್ ಯೆದೊಳ್’ಚ್ ಥಿರಾಯ್ಲಾಂ. ದೆವಾದೀನ್ ಆನ್ನಾ ಮಸ್ಕರೇನ್ಹಸ್ ಹಿಚೆಂ ರಾಂದ್ಪಾಪುಸ್ತಕ್’ಯಿ ತ್ಯಾ ವಾಟೆನ್ ಅಂತರಾಶ್ಟ್ರೀಯ್ ಸ್ಥರಾಚ್ಯಾ ರಾಂದ್ಪಾಪುಸ್ತಕಾಂಕ್ ಪಾಟಿಂ ಸೊಡಿನಾ, ಬಗಾರ್ ಮುಖಾರ್ ವೆತಾ. ಹ್ಯಾ ಪುಸ್ತಕಾಕ್ ಹಾಂವ್ ಅಪೂರ್ವ್ ಜಯ್ತ್ ಮಾಗ್ತಾಂ.”

ಮುಖೇಲ್ ಭಾಶಣ್ ಕೆಲ್ಲೊ ದಾಯ್ಜಿವರ್ಲ್ಡ್ ಮಿಡಿಯಾ ಸಂಸ್ಥ್ಯಾಚೊ ವ್ಹಡಿಲ್ ವಾಲ್ಟರ್ ನಂದಳಿಕೆ ದೆವಾದಿನ್ ಆನ್ನಾ ಮಸ್ಕರೇನ್ಹಸ್ ಆನಿ ತಾಚಾ ಖಾಸ್ಗಿ ಸಂಭಂದಾವಿಶ್ಯಾಂತ್ ಉಲವ್ನ್ ಮ್ಹಣಾಲೊ ಕೀ ಆನ್ನಾಬಾಯೆಕ್ ಪೆಲ್ಯಾಥಂಯ್ ಧಯಾ, ಮೋಗ್ ಆನಿ ಭಿರ್ಮತ್ ಜಾಯ್ತಿ ಆಸ್ಲೆಲಿ ತೆಂ ತಾಣೆಂ ತಿಚೆಲಾಗಿಂ ದವರ್ಲೆಲ್ಯಾ 30 ವರ್ಸಾಂಚ್ಯಾ ಲಾಂಬ್ ಸಂಪರ್ಕಾವೆಳಾರ್ ಪಾರ್ಕಿಲಾಂ. ತಿಣೆಂ ದುಬಾಯಾಂತ್ ಆಸ್ತಾನಾ, ದಾಯ್ಜಿವರ್ಲ್ಡ್ ಅಂತರ್ ಜಾಳಿಚೆರ್ 2001ವ್ಯಾ ವರ್ಸಾ ಪಯ್ಲೆಪಾವ್ಟಿಂ ರಾಂದ್ಪಾವಿಭಾಗ್ ಸುರ್ವಾತಿಲ್ಲೊ ಆನಿ ತೊ ವಿಭಾಗ್ ಸಂಸಾರ್’ಭರ್ ಪ್ರಖ್ಯಾತ್ ಜಾಲ್ಲೊ, ನಹಿಂಚ್ ಆಪ್ಲ್ಯೊ ಖಾಶೆಲ್ಯೊ ಖಾಣಾ ಜೆವ್ಣಾಚ್ಯೊ ರೆಸೆಪಿ ಬಗಾರ್ ಸಂಸಾರ್ ಭರ್ ಆಸ್ಚ್ಯಾಂಚ್ಯೊ ಬರ್’ಯಾಂತ್ಲ್ಯೊ ಬರ್’ಯೊ ರೆಸಿಪಿ ತಿ ವಿಂಚ್ತಾಲಿ ಆನಿ ಪ್ರಕಟ್ತಾಲಿ ತ್ಯಾ ವರ್ವಿಂ ಆಮ್ಚೆಂ ಅಂತರ್ ಜಾಳ್ ವೆಗಿಂಚ್ ಲೊಕಾಮೊಗಾಳ್ ಜಾಂವ್ಕ್ ಪಾವ್ಲೆಂ. ತ್ಯಾ ಉಪ್ರಾಂತ್ ತಿ ದಾಯ್ಜಿವರ್ಲ್ಡ್ ಕುಟ್ಮಾಂತ್ ಮೊಗಾಚಿ ಜಾಲಿ ಆನಿ ’ದಾಯ್ಜಿವರ್ಲ್ಡ್ ವೀಕ್ಲಿ’ಸುರ್ವಾತ್ ಕರ್ಚ್ಯಾ ವಗ್ತಾ ತಿ ಎಕ್ ಸಾಂದೊ ಜಾವ್ನ್ ಆಮ್ಚೆ ಮಧೆಂ ಕಾಮ್ ಕರುಂಕ್ ಲಾಗ್ಲಿ ಪುಣ್ ದೆವಾಚೆಂ ನಿರ್ಮೊಣೆಂ ಆಮಿ ನೆಣಾಂವ್. ತಿಚೊ ಪುತ್ ಇಯಾನ್ ತಿತ್ಲ್ಯಾ ವೆಗಿಂ ಸಂಸಾರ್ ಸಾಂಡುನ್ ವಚೊಂಕ್ ನಾತ್ಲೊ ತರ್ ತಿ ಕೆನ್ಸರ್ ಆಸೊನ್’ಯಿ  ಬರಿ ಜಾತಿ ಕೊಣ್ಣಾ, ಆಶೆಂ ಮ್ಹಾಕಾ ಭಗ್ತಾ.”

ಮಾನಾಚೆ ಸೈರೆ ಜಾವ್ನಾಸ್ಲೆಲೆ ಬೊಂದೆಲ್ ಸಾಂ ಲೊರೆನ್ಸ್ ಫಿರ್ಗಜೆಚೆ ವಿಗಾರ್ ಮಾ/ಬಾ/ಆಂಡ್ರು ಲಿಯೊ ಡಿ’ಸೊಜಾ ತಾಂಚೆ ಆನಿ  ದೆವಾದಿನ್ ಆನ್ನಾ ಮಸ್ಕರೇನಸ್ ಮಧೆಂ ಆಸ್ಲೆಲ್ಯಾ ಸಂಬಂಧಾ ವಿಶ್ಯಾಂತ್ ಉಲವ್ನ್ ಮಣಾಲೆ – “ಆನ್ನಾ ಬಾಯ್ ಬೊಂದೆಲ್ ಫಿರ್ಗಜೆಚಿ ಎಕ್ ಕಾರ್ಯಾಳ್ ವ್ಯಕ್ತಿ ಜಾವ್ನಾಸ್ಲೆಲಿ ಮಾತ್ರ್ ನಹಿಂ ಹಾಂವ್ ತಿಚೊ ಆತ್ಮಿಕ್ ವ್ಹಡಿಲ್ ಆಸ್ಲೊಂ. ತಿ ಬರ್’ಯಾ ಭಲಾಯ್ಕೆಂತ್ ನಾ ಆಸ್ಲೆಲ್ಯಾ ವೆಳಾರ್ ಹಾಂವೆ ಜಾಯ್ತೆ ಪಾವ್ಟಿಂ ತಿಚಿ ಭೆಟ್ ಕೆಲ್ಯಾ ಆನಿ ತಿಚ್ಯಾ ಮೊರ್ನಾ ಉಪರಾಂತ್ ಜಾಲ್ಯಾರ್’ಯಿ ತೊ ಕೊವಿಡಾಚೊ ವೇಳ್ ಜಾವ್ನಾಸ್ಲೊ ತರ್’ಯಿ ತಿಚ್ಯಾ ಅಂತಿಮ್ ಪಯ್ಣಾಚಿ  ಮಾಗ್ಣ್ಯಾ ವಿಧಿ ಹಾಂವೆ ಚಲವ್ನ್ ವೆಲ್ಲಿ. ತಿಚೆಂ ಪುಸ್ತಕ್ ಹರ್ ಘರಾಕ್ ಪಾವೊಂದಿ ಆನಿ ಹ್ಯಾ ವರ್ವಿಂ ತಿಚ್ಯಾ ’ಇಯಾನ್ ಕೇರ್ಸ್ ಪೌಂಡೇಶನ”ಕ್ ಬಳ್ ಲಾಬೊಂದಿ’ಮ್ಹಣ್ ಹಾಂವ್ ಆಶೆತಾಂ.”

ಕಾರ್ಯಾಚೆ ಅಧ್ಯಕ್ಶ್ ಜಾವ್ನ್ ಕಿನ್ನಿಗೋಳಿ ಕೊಶೆಸಾಂವ್ ಸಾಯ್ಜಿಣಿಚ್ಯಾ ಫಿರ್ಗಜೆಚೆ ವಿಗಾರ್ ಮಾ/ಬಾ/ಫಾವೊಸ್ತಿನ್ ಲೋಬೊ ಆಸ್ಲೆ ಆನಿ ತಾಣಿಂ ಇಯಾನ್ ಕೇರ್ಸ್ ಪೌಂಡೆಶನಾನ್ ಚಲವ್ನ್ ವರ್ಚ್ಯಾ ಕಾಮಾಂಥಂಯ್ ಆಪ್ಲಿ ಶಾಭಾಸ್ಕಿ ಉಚಾರ್ಲಿ. ಆನ್ನಾ ಬಾಯೆಕ್ ಮೆಳೊನ್ ಹಾಂವ್ ನೆಣಾ ಪುಣ್ ತಿಚ್ಯಾ ಉಗ್ಡಾಸಾಕ್ ಹಾಂಗಾಸರ್ ಜಾಂವ್ಚ್ಯಾ ಕಾಮಾಂತ್ ಹಾಂವ್’ಯಿ ಭಾಗಿಧಾರ್ ಜಾವ್ನಾಸಾಂ, ಮ್ಹಳೆಂ ತಾಣಿಂ.

ಇನಾ ಮಸ್ಕರೇನ್ಹಸ್, ದೆವಾದೀನ್ ಆನ್ನಾ ಮಸ್ಕರೇನ್ಹಸ್  ಹಿಚಿ ಧುವ್ ಆನಿ ಸಂಸ್ಥ್ಯಾಚಿ ಟ್ರಸ್ಟಿ ಹಿಣೆಂ ಸ್ವಾಗತ್ ಮಾಗ್ಲೊ ಆನಿ ಆನ್ನಾ ಮಸ್ಕರೇನ್ಹಸ್ ಹಿಚೊ ಪತಿ, ಸಂಸ್ಥ್ಯಾಚೊ ಮ್ಯಾನೆಜಿಂಗ್ ಟ್ರಸ್ಟಿ ಹೇಮಾಚಾರ್ಯ ಹಾಣಿಂ ಸೈರ್’ಯಾಂಕ್ ಉಗ್ಡಾಸಾಚಿ ಕಾಣಿಕ್ ದೀವ್ನ್ ಸಕ್ಡಾಂಚೊ ಉಪ್ಕಾರ್ ಆಟಯ್ಲೊ. ಕಾರ್ಯಾವೆಳಿಂ ದೆವಾದೀನ್ ಆನ್ನಾ ಮಸ್ಕರೇನ್ಹಸ್ ಹಿಚೊ ಜನ್ಮಾದೀಸ್ ಆಚರ್ಸಿಲೊ.

ಲೊಕಾಮೊಗಾಳ್ ಕಾರ್ಯೆಂ ನಿರ್ವಾಹಕಿ ಹೇರಾ ಪಿಂಟೊ’ನ್ ಸೊಭಿತ್ ರಿತಿನ್ ಕಾರ್ಯೆಂ ಚಲವ್ನ್ ವೆಲೆಂ.