ಆದ್ಲ್ಯಾ ಮ್ಹಯ್ನ್ಯಾಚ್ಯಾ ಪಯ್ಲ್ಯಾ ಅರ್ಧಾಂತ್ ಸಗ್ಳ್ಯಾ ಸಂಸಾರಾಚೆಂ ಗಮನ್ ವಾತಿಕಾನಾಕುಶಿನ್ ಘುಂವ್‌ಲ್ಲೆಂ. ಕಿತ್ಯಾಕ್, ೧.೪ ಬಿಲಿಯಾ ಸಾಂದೆ ಆಸ್ಚ್ಯಾ, ಸೆಕುಲರ್ ಭಾಶೆಂತ್ ಸಾಂಗ್ಚೆಂ ತರ್, ಸಂಸಾರಾಚ್ಯಾ ಅತೀ ವ್ಹಡ್ `ಸಂಸ್ಥ್ಯಾ’ಚೊ ನವೊ ಫುಡಾರಿ ಕೋಣ್ ಜಾಯ್ತ್ ಮ್ಹಳ್ಳಿ ಆತುರಾಯ್ ಸಕ್ಡಾಂಕ್ ಆಸ್ಲಿ. ಆತಾಂ ಹ್ಯಾ ಸವಾಲಾಕ್ ಜಾಪ್ ಮೆಳ್ಳ್ಯಾ. ಪವಿತ್ರ್‌ಸಭೆಚೊ ಶ್ರೇಶ್ಟ್ ವ್ಹಡಿಲ್, ಪೆದ್ರುಚೊ ಉತ್ತರಾಧಿಕಾರಿ, ಸೆವಕಾಂಚೊ ಸೆವಕ್ ಆನಿ ಜೆಜು ಕ್ರೀಸ್ತಾಚೊ ವಿಗಾರ್ ಮ್ಹಣ್ಜೆ ತಾಚೆಂ ಸಂಸಾರಿ ಮಸ್ತಕ್ ಜಾವ್ನ್ ಆಮ್ಕಾಂ ಪಾಪಾ ಲಿಯಾಂವ್ ಚೊವ್ದಾವ್ಯಾಕ್ ಪವಿತ್ರ್ ಅತ್ಮ್ಯಾನ್ ಫಾವೊ ಕೆಲಾ. ಹ್ಯಾ ಅಂಕ್ಯಾಂತ್ ಪಾಪಾ ಸಾಯ್ಬಾಚ್ಯಾ ಹುದ್ದ್ಯಾಚ್ಯಾ ವಿವಿಧ್ ಆಯಾಮಾಂಚೆರ್ ಏಕ್ ಸುಕ್ಣ್ಯಾನದರ್ ಮಾರ್‍ಚೆಂ ಪ್ರಯತನ್ ಆಮಿ ಕೆಲಾಂ ಆಸ್ತಾಂ ಲಾತ್ಯಾ ಭಾಶೆಂತ್ `ಎಕ್ಸ್ ಕಾಥೆದ್ರಾ’, ಇಂಗ್ಲಿಶಾಂತ್ ‘infallibility’ ಆನಿ ಕೊಂಕ್ಣೆಂತ್ `ಚುಕಿವೀಣ್ ಶಿಕೊವ್ಣ್’- ಹ್ಯಾ ವಿಶಿಂ ಉಲಯ್ಜೆಚ್ ಪಡ್ತಾ.

`ಪಾಪ್ ಸಾಯ್ಬ್ ಚೂಕ್ ಕರಿನಾ’ ಮ್ಹಳ್ಳೆಂ ಉತರ್ ಆಮಿ ಖಂಯ್ ನಾ ಖಂಯ್ ಆಯ್ಕಾಲಾಂ ಆಸ್ಯೆತ್. ಜಾಯ್ತ್ಯಾ ಜಣಾಂಚ್ಯೆ ಚೂಕ್ ಸಮ್ಜಣೆಕ್ ಕಾರಣ್ ಜಾಲ್ಲೆಂ ಉತರ್ ಹೆಂ. ತಾಂತ್ಲ್ಯಾ ತಾಂತುಂ `ಬೈಬಲ್ ಮಾತ್ರ್ ಶ್ರೇಶ್ಟ್’ ಮ್ಹಣ್ ಭಾಸ್ಚ್ಯಾ ಥೊಡ್ಯಾ ಕ್ರಿಸ್ತಾಂವ್ ಪಂಗ್ಡಾಚ್ಯಾಂಕ್ ಹೆಂ ಸಮ್ಜೊಂಕ್ ತ್ರಾಸ್ ಭೊಗ್ತಾತ್. `ಚುಕಿವೀಣ್’ ಆನಿ `ಪಾತ್ಕಾವೀಣ್’ ಹ್ಯಾ ದೋನ್ ಸಬ್ದಾಂಮದೆಂ ಫರಕ್ ಪಾರ್ಕುಂಕ್ ತಾಂಕಾಂ ಕಶ್ಟ್ ಮಾರ್‍ತಾತ್. ತಾಂಚೆಪ್ರಕಾರ್, ಕಥೊಲಿಕಾಂಚಿ ಪಾತ್ಯೆಣಿ ಅಶಿ ಕೀ, `ಪಾಪ್ ಸಾಯ್ಬ್ ಪಾತಕ್ ಕರಿನಾ’ ವಾ ಆಪುಣ್ ಸಭೆಮಾಜಾರ್ ಶಿಕೊವ್ಣ್ ದಿತಾನಾ ಕಸಲ್ಯೆಗೀ `ಸಂಯ್ಬಾವರ್ತ್ಯೆ ಸಕ್ತೆಕ್ ಆಪ್ಣಾಥಂಯ್ ಹಾಡ್ನ್ ಉಲಯ್ತಾ’. ಹೆಂ ಖಂಡಿತ್ ಜಾವ್ನ್ ಸತ್ ನ್ಹಯ್. `

‘ಚುಕಿವೀಣ್ ಶಿಕೊವ್ಣ್’ ಮ್ಹಳ್ಯಾರ್ ಕಿತೆಂ?

`ಚುಕಿವೀಣ್ ಶಿಕೊವ್ಣ್’ ಮ್ಹಳ್ಯಾರ್ ಕಿತೆಂ ಮ್ಹಣ್ ಸಮ್ಜೊಂಚೆಪಯ್ಲೆಂ, ತಿ ಕಿತೆಂ ನ್ಹಯ್ ಮ್ಹಳ್ಳೆಂ ಸಮ್ಜೊಂಚೆಂ ಬರೆಂ. Infallibility ಮ್ಹಳ್ಯಾರ್ ಪಾಪಾಸಾಯ್ಬಾನ್ ಪಾತ್ಕಾವೀಣ್ ಆಸ್ಚೆಂ ನ್ಹಯ್ ವಾ ತೆಂ ಪಾಪಾ ಸಾಯ್ಬಾಕ್ ಎಕ್ಲ್ಯಾಕ್ ಮಾತ್ರ್ ಸೀಮಿತ್ ಜಾಲ್ಲೆಂ ಏಕ್ ದೆಣೆಂ ನ್ಹಯ್. ಹಿ ಪದ್ವಿ, ಪಾಪಾ ಸಾಯ್ಬಾ ಸಾಂಗಾತಾ ಮೆಳೊನ್ ಕ್ರೀಸ್ತೀ ಸತಾಂ ಶಿಕೊಂವ್ಚ್ಯಾ ಸಗ್ಳ್ಯಾ ಬಿಸ್ಪಾಂಚ್ಯಾ ಎಕ್ತಾರಾಕ್ ಆಸಾ. ತಾಣಿಂ ಸಕ್ಡಾಂನಿ ಎಕಾ ಮನಾನ್ ಮಾಂದುನ್ ಘೆವ್ನ್, ಗಂಭೀರಾಯೆನ್ ಎಕ್‌ಚ್ ಭಾವಾಡ್ತಾಚೆಂ ಸತ್ ಶಿಕಯ್ತಾನಾ ತೆಂ ಚುಕಿವೀಣ್ ಜಾತಾ. ಜೆಜುನ್‌ಚ್ ಹೆಂ ಸಾಂಗ್ಲಾಂ: “ಜೊ ಕೋಣ್ ತುಮ್ಕಾಂ ಆಯ್ಕಾತಾ, ತೊ ಮ್ಹಾಕಾ ಆಯ್ಕಾತಾ” (ಲೂಕ್ ೧೦:೧೬). ಚಡಾವತ್ ಹ್ಯಾ ಸತಾಂಚಿಂ ಸಾಳಾಂಪಾಳಾಂ ಇಗರ್ಜ್‌ಮಾತೆಚ್ಯಾ ಲಾಂಬ್ ಇತಿಹಾಸಾಂತ್, ತಿಚ್ಯಾ ಸಂಪ್ರದಾಯಾಂನಿ ಆನಿ ಭಾವಾಡ್ತಿ ಲೊಕಾಚ್ಯಾ ಚಾಲ್ತ್ಯಾ ಧರ್ಮಿಕ್ ಆಚರಣಾಂನಿ ಗೂಂಡ್ ರೊಂಬ್ಲಲಿಂ ಆಸ್ತಾತ್.

ವಾತಿಕಾನ್ ದುಸ್ರಿ ಮಹಾಸಭಾ ಆಪ್ಲ್ಯಾ ಲುಮೆನ್ ಜೆಂತ್ಸಿಯುಮ್ ಮ್ಹಳ್ಳ್ಯಾ ದಸ್ತಾವೆಜಾಂತ್ ೨೫ವ್ಯಾ ಅಂಕ್ಯಾಂತ್ ಹ್ಯಾ ವಿಶಿಂ ಅಶೆಂ ಸಾಂಗ್ತಾ: “ಜಣ್ ಎಕಾ ಬಿಸ್ಪಾಕ್ ಚುಕಿವೀಣ್ ಶಿಕೊವ್ಣೆಚಿ ಪದ್ವಿ ನಾ ತರೀ, ಜೆಜು ಕ್ರೀಸ್ತಾಚಿ ಶಿಕೊವ್ಣ್ ಇಗರ್ಜ್‌ಮಾತೆಚ್ಯೆ ಸಮ್ಜಣೆಪರ್ಮಾಣೆಂ ಶಿಕೊಂವ್ಕ್ ತಾಂಕಾಂ ಕಾಯ್ದೊ ಆಸಾ. ಪೆದ್ರುಚೊ ಉತ್ತರಾಧಿಕಾರಿ ಆನಿ ತಾಂಚ್ಯಾ ಭಾವಾಂ ಬಿಸ್ಪಾಂಚ್ಯಾ ಎಕ್ತಾರಾಂತ್ ಭಾವಾಡ್ತಾಚಿ ಆನಿ ನಯ್ತಿಕ್ ಶಿಕೊವ್ಣ್ ದಿತಾನಾ ತಾಣಿಂ ಪ್ರಾಮಾಣಿಕ್ಪಣಿಂ ಅಧಿಕೃತ್ ಇಗರ್ಜ್‌ಮಾತೆಚಿ ಸತಾಂ ಶಿಕಯ್ಜೆ”. ಜಶೆಂ ಪೆದ್ರು ಸಕ್ಕಡ್ ಆಪೊಸ್ತಲಾಂಚೊ ಮುಕೆಲಿ ಆಸ್ಲೊ, ತಶೆಂ ಹ್ಯಾ ಸಗ್ಳ್ಯಾ ಬಿಸ್ಪಾಂಚ್ಯಾ ಎಕ್ತಾರಾಚೊ ಮುಕೆಲಿ ಜಾವ್ನ್, ಸರ್ವಾಂಚ್ಯಾ ಸಹಮತೆನ್ ಆಪ್ಲ್ಯಾ ಅಧಿಕೃತ್ ಬಸ್ಕೆಥಾವ್ನ್‌ ಜೆದ್ನಾಂ ಪಾಪ್‌ಸಾಯ್ಬ್ ಭಾವಾಡ್ತಾಚಿಂ ಸತಾಂ ಆನಿ ನಯ್ತಿಕ್ ಮೊಲಾಂ ಶಿಕಯ್ತಾ ತೆದ್ನಾಂ ತೊ ಚೂಕ್ ಕರಿನಾ; ಹಾಕಾ ಮ್ಹಣ್ತಾತ್ `ಚುಕಿವೀಣ್ ಶಿಕೊವ್ಣ್’. ಪವಿತ್ರ್ ಅತ್ಮ್ಯಾಚ್ಯಾ ಸಹಕರಾನ್ ಶಿಕಯಿಲ್ಲಿಂ ಹಿಂ ಸತಾಂ ಮುಕ್ಲ್ಯಾ ದಿಸಾಂನಿ ಆನ್ಯೆಕ್ಲ್ಯಾ ಪಾಪಾನ್ ಯೇವ್ನ್ ತಿಂ ಚೂಕ್ ಮ್ಹಣ್ ಶಿಕೊಂವ್ಚೊ ಸಂಭವ್ ನಾಂಚ್ ನಾ. ತ್ಯಾ ದೆಕುನ್ ಹ್ಯೆ ಶಿಕೊವ್ಣೆಕ್ `ಎಕ್ಸ್ ಕಾಥೆದ್ರಾ’ ವಾ `ಬಸ್ಕೆಥಾವ್ನ್’ ದಿಲ್ಲಿ ಅಧಿಕೃತ್ ಶಿಕೊವ್ಣ್ ಮ್ಹಣ್ತಾತ್. ಏಕ್ ಧಾಕ್ಲೊ ದಿಂವ್ಚೊ ತರ್ ೧೯೫೦ವ್ಯಾ ವರ್‍ಸಾ ನವೆಂಬರ್ ೧ ವೆರ್ ಪಾಪಾ ಪಿಯುಸ್ ಬಾರಾವ್ಯಾನ್ ಆಪ್ಲ್ಯಾ Munificentissimus Deus ಮ್ಹಳ್ಳ್ಯಾ ಪಾಪಾಲ್ ಪತ್ರಾಮುಕಾಂತ್ರ್ ಮರಿಯೆಚ್ಯಾ ಸರ್ಗಾವ್ಹರಣಾಚೆರ್ ಎಕ್ಸ್ ಕಾಥೆದ್ರಾ ಶಿಕೊವ್ಣ್ ದಿಲ್ಲಿ. ಹೆಂ ಘಡೊನ್ ಹ್ಯಾ ವರ್‍ಸಾ ಪಾವಣ್ಶೆಂ ವರ್‍ಸಾಂ ಸಂಪ್ತಾತ್. ತ್ಯಾ ಉಪ್ರಾಂತ್ ಖಂಯ್ಚ್ಯಾಯ್ ಪಾಪಾನ್ ಎಕ್ಸ್ ಕಾಥೆದ್ರಾ ಶಿಕೊವ್ಣ್ ದಿಲ್ಲಿನಾ.

ಚುಕಿವೀಣ್ ಶಿಕೊವ್ಣೆಚೆಂ ಪರಿಕಲ್ಪನ್ ಆಯ್ಲೆಂ ಕಶೆಂ?

ಹೆಂ ಪರಿಕಲ್ಪನ್ ಇಗರ್ಜ್‌ಮಾತೆಂತ್ ಆಪ್ಶೆಂಚ್ ಉದೆಲ್ಲೆಂ ವಾ ಲಾಂಬ್ ವರ್‍ಸಾಂನಿ ಸವ್ಕಾಸ್ ವಿಕಸಿತ್ ಜಾಲ್ಲೆಂ ಬಿಲ್ಕುಲ್ ನ್ಹಯ್. ಕಾಳಾ ತೆಕೀದ್ ಹ್ಯಾ ವಿಶಿಂ ಆಮ್ಚಿ ಸಮ್ಜೊಣಿ ಚಡ್ಲ್ಯಾ ಶಿವಾಯ್ ಹ್ಯಾ ಪರಿಕಲ್ಪನಾಂತ್ ಕಿತೆಂಚ್ ಬದ್ಲಾವಣ್ ಜಾಂವ್ಕ್ ನಾ. ಜೆಜುನ್‌ಚ್ ಪೆದ್ರುಕ್ ದಿಲ್ಲಿ ಪದ್ವಿ ಹಿ. “ಪೆದ್ರು ಮ್ಹಣ್ಜೆ ಖಡಪ್, ಹ್ಯಾ ಖಡ್ಪಾಚೆರ್ ಧರ್ಮ್‌ಸಭಾ ಹಾಂವ್ ಬಾಂದ್ತೊಲೊಂ” (ಮಾತೆ ೧೬:೧೮) “ತುಜೊ ಭಾವಾಡ್ತ್ ಧಂಡಳ್ನಾ ಜಾಂವ್ಚ್ಯಾಕ್ ಹಾಂವೆಂ ತುಜೆಪಾಸತ್ ಮಾಗ್ಲಾಂ” (ಲೂಕ್ ೨೨:೩೨೩). ತೀನ್ ಪಾವ್ಟಿಂ “ತುಂ ಮ್ಹಜೊ ಮೋಗ್ ಕರ್‍ತಾಯ್‌ಗೀ?” ಮ್ಹಣ್ ವಿಚಾರ್‍ಲ್ಯಾ ಉಪ್ರಾಂತ್ “ಚರಯ್ ಮ್ಹಜ್ಯಾ ಬೊಕ್ರ್ಯಾಂಕ್” ಮ್ಹಣ್ ಜೆಜುನ್ ಪೆದ್ರುಕ್ ತಾಕೀದ್ ದಿಲಿ (ಜುವಾ ೨೧:೧೫-೧೭). ಹ್ಯಾ ತಿನೀ ಘಡಿತಾಂನಿ ಪೆದ್ರುಕ್ ಖಾಶೆಲೆಪಣಾನ್ ಜೆಜುನ್‌ಚ್ ಹಿ ಪದ್ವಿ ದಿಲ್ಯಾ. ತ್ಯಾ ದೆಕುನ್ ಸುರ್ವೆರ್ ಥಾವ್ನ್ಂಚ್ ಪೆದ್ರುಕ್ ಆಪೊಸ್ತಲಾಂಮದೆಂ ಪಯ್ಲೊ ಮ್ಹಣ್ ಲೆಕ್‌ಲ್ಲೊ ಆನಿ ತಾಚ್ಯಾ ಉಪ್ರಾಂತ್ ಆಯಿಲ್ಲ್ಯಾ ಹರ್‍ಯೆಕಾ ಪಾಪಾಕ್ ಇಗರ್ಜ್‌ಮಾತೆನ್ ತೊಚ್ ಮಾನ್ ದಿಲಾ. ಹ್ಯಾ ದಿಶೆನ್ ಸಾಂ. ಆಗುಸ್ತಿನಾನ್ ಸಾಂಗ್‌ಲ್ಲೆಂ ‘Rome has spoken; the case is concluded’ (Sermons ೧೩೧, ೧೦) ಮ್ಹಳ್ಳೆಂ ಉತರ್ ಬೊವ್ ಫಾಮಾದ್ ಜಾಲಾಂ.

ಸ್ಕಾಂದಲ್ ಕೆಲ್ಲ್ಯಾ ಪಾಪಾನ್ ವಾ ಬಿಸ್ಪಾನ್ ದಿಲ್ಲಿ ಶಿಕೊವ್ಣ್ ಮಾಂದುನ್ ಘೆವ್ಯೆತ್‌ಗಿ? ತಿ ಚುಕಿವೀಣ್ ಮ್ಹಣ್ ಕಶೆಂ ಸಾಂಗ್ಚೆಂ?

ಇಗರ್ಜ್‌ಮಾತೆಚಿ ಚರಿತ್ರಾ ಆಯ್ಬಾವೀಣ್ ಖಂಡಿತ್ ನಾ. ಚರಿತೆಂತ್ಲ್ಯಾ ಕಾಂಯ್ ಥೊಡ್ಯಾ ಪಾಪಾ ಸಾಯ್ಬಾಂಥಾವ್ನ್, ಬಿಸ್ಪಾಂಥಾವ್ನ್ ಆನಿ ಹೆರ್ ಇಗರ್ಜ್‌ಮಾತೆಚ್ಯಾ ವ್ಹಡಿಲಾಂಥಾವ್ನ್ ಜಾಯ್ತೆಂ ಖೊಟೆಂಪಣ್ ಆನಿ ಸ್ಕಾಂದಲಾಂ ಘಡ್ಲ್ಯಾಂತ್ ಆನಿ ಆಜೂನ್ ಘಡೊನ್ ಆಸಾತ್. `ಇಗರ್ಜ್‌ಮಾತೆಚೊ ಘಡ್ಣಾರ್ ಪವಿತ್ರ್, ಪುಣ್ ಇಗರ್ಜ್‌ಮಾತೆಚೆ ಮಣಿಯಾರಿ ಆನಿ ಪರ್ಜಾ ಪಾತ್ಕಿಚ್’ ಹೆಂ ಮಾನುನ್ ಘೆಜೆಚ್ ಜಾಲ್ಲೆಂ ಸತ್. ತ್ಯಾ ದೆಕುನ್ ಹಾಂಗಾಸರ್ ಪಾಪಾ ಸಾಯ್ಬಾಚ್ಯಾ ವಾ ಬಿಸ್ಪ್ ಸಾಯ್ಬಾಚ್ಯಾ ವಯಕ್ತಿಕ್ ಚುಕಿಚ್ಯಾಕೀ ಇಗರ್ಜ್‌ಮಾತೆನ್ ತಾಕಾ ದಿಲ್ಲಿ ಪದ್ವಿ ಉಂಚ್ಲೊ ಹಾತ್ ಘೆತಾ. ಕಿತ್ಯಾಕ್ ಜೆಜುಚಿ ಪದ್ವಿ ಮನ್ಶಾಚ್ಯೆ ಅಸ್ಕತ್ಕಾಯೆಕ್ ಲಾಗೊನ್ ಕುಸ್ಕೊಂಚಿ ನ್ಹಯ್. ಪುಣ್ ಜರ್ ಪಾಪ್ ಸಾಯ್ಬ್ ಅಧಿಕೃತ್ ನ್ಹಯ್ ಆಸೊನ್, ತಾಚ್ಯಾ ಭಾಶಣಾಂನಿ, ಶೆರ್ಮಾಂವಾಂನಿ ವಾ ಕೊಣಾಯ್‌ಲಾಗಿಂ ಉಲಯ್ತಾನಾ ಖಂಯ್ಚ್ಯಾಯ್ ವಿಶಯಾಚೆರ್ ತಾಚಿ ವಯಕ್ತಿಕ್ ಅಭಿಪ್ರಾಯ್ ವೆಕ್ತ್ ಕರ್‍ತಾ ಜಾಲ್ಯಾರ್ ತಿ ಚುಕಿವೀಣ್ ಶಿಕೊವ್ಣ್ ಮ್ಹಣ್ ಲೆಕುಂಕ್ ಜಾಯ್ನಾ; ತಾಣೆಂ ಅಶೆಂ ಉಲಯಿಲ್ಲೆಂ ಉತರ್ ಚೂಕ್ ಜಾವ್ನ್ ಆಸ್ಯೆತ್ ಆನಿ ಸ್ಪಶ್ಟೀಕರಣಾಕ್ ಆನಿ ಭಾಸಾಭಾಸ್ ಚಲೊಂವ್ಕ್ ಉಗ್ತೆಂ ಆಸ್ಯೆತ್. ತಾಣೆಂ ಅಧಿಕೃತ್ ಜಾವ್ನ್ `ಚುಕಿವೀಣ್ ಶಿಕೊವ್ಣ್’ ಮ್ಹಣ್ ಕೆಲ್ಲೆಂ ಘೋಶಣ್ ಮಾತ್ರ್ ಚುಕಿವೀಣ್ ಜಾತಾ.

ಮುಕಾರ್ ಕೊಣೀ ಪಾಪಾ ಚೂಕ್ ಶಿಕೊವ್ಣ್ ದೀತ್ ತರ್?

ಪವಿತ್ರ್ ಅತ್ಮೊ ಇಗರ್ಜ್‌ಮಾತಾ ಚಲಯ್ತಾ ಜಾಲ್ಲ್ಯಾನ್ ಪಾಪಾ ಸಾಯ್ಬಾನ್ ಕಸಲಿಯ್ ಚೂಕ್ ಶಿಕೊವ್ಣ್ ದಿಂವ್ಚೆಂ ತೊ ಆಡ್ತಾಯ್ತಾ. ತ್ಯಾ ದೆಕುನ್ ದೋನ್ ಹಜಾರ್ ವರ್‍ಸಾಂಚ್ಯಾ ಇಗರ್ಜ್‌ಮಾತೆಚ್ಯಾ ಇತಿಹಾಸಾಂತ್ ಎದೊಳ್ ಮ್ಹಣಾಸರ್ ಖಂಯ್ಚ್ಯಾಯ್ ಪಾಪಾನ್ ಅಧಿಕೃತ್ ಚೂಕ್ ಶಿಕೊವ್ಣ್ ದಿಲ್ಲಿಚ್ ನಾ. ಇತ್ಲೊ ಲಾಂಬ್ ಇತಿಹಾಸ್ ಆಸ್ಚ್ಯಾ ಸಂಸಾರಾಚ್ಯಾ ಹೆರ್ ಖಂಯ್ಚ್ಯಾಯ್ `ಸಂಸ್ಥಾಂತ್’ ಅಶೆಂ ಘಡೊಂಕ್ ಸಾಧ್ ನಾ. “ಪಾತಾಳಾಚ್ಯೊ ಸಕ್ತ್ಯೊ ತಿಚೆರ್ ಜಯ್ತ್ ವ್ಹರುಂಕ್ ಸಕ್ಚ್ಯೊನಾಂತ್” (ಮಾತೆ ೧೬:೧೮) ಅಶಿ ಆಸಾ ಸೊಮಿಯಾಚಿ ಭಾಸಾವ್ಣಿ. ಜರ್ ಮುಕ್ಲ್ಯಾ ದಿಸಾಂನಿ ಸತ್ ಶಿಕೊಂವ್ಚ್ಯಾ ವಿಶ್ಯಾಂತ್ ಪರ್ವಾ ಕರಿನಾತ್‌ಲ್ಲೊ, ರಾಜಕೀಯ್ ರಿತಿನ್ ಪ್ರಭಾವಿತ್ ಜಾಲ್ಲೊ ವಾ ಆಪ್ಣಾಚೊಚ್ ಫಾಯ್ದೊ ಸೊಧ್ಚೊ ಪಾಪಾ ವಿಂಚುನ್ ಯೇತ್ ತರ್ ಇಗರ್ಜ್‌ಮಾತೆಕ್ ಆನಿ ಭಾವಾಡ್ತಿ ಲೊಕಾಕ್ ತಾಚೆಥಾವ್ನ್ ಕಾಂಯ್ ಥೊಡೆಂ ಲುಕ್ಸಾಣ್ ಜಾಯ್ತ್ ತರೀ, ಖಂಡಿತ್ ಜಾವ್ನ್ ತಾಚ್ಯಾನ್ ಇಗರ್ಜ್‌ಮಾತೆಚಿ ಧೆಸ್ವಾಟ್ ಕರುಂಕ್ ಸಾಧ್ ನಾ. ಹೆಂ ಚರಿತ್ರೆಂತ್ ಘಡ್ಲಾಂ ಸಯ್ತ್. ಚರಿತ್ರೆಚಿಂ ಪಾನಾಂ ಪರ್‍ತಿತಾನಾ ಥೊಡ್ಯಾ ಸಂದರ್ಭಾಂನಿ ಸಗ್ಳೆಂ ಸತ್ತ್ಯಾನಾಸ್ ಜಾಲೆಂ ಮ್ಹಳ್ಳೆಬರಿ ದಿಸ್ಲಾಂ ತರೀ, ಜೊಕ್ತ್ಯಾ ವೆಳಾರ್ ಜೊಕ್ತ್ಯಾ ಮನ್ಶಾಂಕ್ ಧಾಡ್ನ್ ದೆವಾನ್ ಆಪ್ಲಿ ಪವಿತ್ರ್‌ಸಭಾ ಥಿರ್ ಸಾಂಬಾಳ್ಳ್ಯಾ. ಹ್ಯಾ ಕಾರಣಾಕ್ ಲಾಗೊನ್ ಚರಿತ್ರೆಂತ್ ಕೊಣೆಂಯ್ ಆಪ್ಣೆಂ ಚಿಂತ್‌ಲ್ಲೆಬರಿ ಚೂಕ್ ಶಿಕೊವ್ಣ್ ದೀವ್ನ್ ಇಗರ್ಜ್‌ಮಾತಾ ಬಾಂದ್ಲ್ಯಾ ತರ್ ತೊ ವೆಕ್ತಿ ಆನಿ ತಾಚಿ ಇಗರ್ಜ್‌ಮಾತಾ ಕ್ರೀಸ್ತಾನ್ ಘಡ್ಲಲಿ ಇಗರ್ಜ್‌ಮಾತಾ ಜಾವ್ನ್ ಉರೊಂಕ್ ನಾ. ಕಿತ್ಯಾಕ್ ಜೆಜುನ್ ಘಡ್ಲಲಿ ಇಗರ್ಜ್‌ಮಾತಾ ಆಸ್ಚಿ ಸತಾಚೆರ್ ಆನಿ ಜೆಜುಚ್ ತೆಂ ಸತ್ (ಜುವಾ ೧೪:೬).

ಸಮಾಪ್ತ್

ಆಮ್ಚೊ ಭಾವಾಡ್ತ್ ಕುರ್‍ಡೊ ನ್ಹಯ್. ಆಮಿ ಜೆಂ ಕಿತೆಂ ಪಾತ್ಯೆತಾಂವ್ ತಾಚೆಪಾಟ್ಲ್ಯಾನ್ ಏಕ್ ಕಾರಣ್ ಆಸಾ, ರಾಜಾಂವಿ ವ್ಯಾಖ್ಯಾನ್ ಆಸಾ ಆನಿ ಪವಿತ್ರ್ ಅತ್ಮ್ಯಾಚಿ ಜಾಣ್ವಾಯ್ ಆಸಾ. ತ್ಯಾ ದೆಕುನ್ ಇಗರ್ಜ್‌ಮಾತೆಂತ್ ಆಮ್ಚ್ಯೆ ಪಾತ್ಯೆಣೆಚೆರ್, ದಸ್ತುರೆಚೆರ್, ಸಂಪ್ರದಾಯಾಚೆರ್ ಆನಿ ಆಚರಣಾಂಚೆರ್ ಸವಾಲಾಂ ವಿಚಾರುಂಕ್, ತರ್ಕ್ ಕರುಂಕ್ ಆನಿ ನೀಜ್ ಸಮ್ಜಣಿ ಜೊಡುಂಕ್ ಕೊಣಾಯ್ಕಿ ಕೊಣಾಯ್ಚ್ಯಾನೀ ಆಡಾಂವ್ಕ್ ಜಾಯ್ನಾ. ಹ್ಯಾ ಕಾರಣಾಕ್ ಲಾಗೊನ್ ಆಮಿ ಕಿತೆಂ ಪಾತ್ಯೆತಾಂವ್ ತಾಚೆರ್ ವೆಳಾಕಾಳಾ ತೆಕೀದ್ ಪಾಪ್ ಸಾಯ್ಬ್ ತಾಚ್ಯಾ ಭಾವಾಂ ಬಿಸ್ಪಾಂಚ್ಯಾ ಎಕ್ತಾರಾನ್ ಆಪ್ಲ್ಯೆ ಚುಕಿವೀಣ್ ಶಿಕೊವ್ಣೆನ್ ಭಾವಾಡ್ತ್ಯಾಂಕ್ ಸತ್ ಆನಿ ಸಾರ್ಕಿ ಸಮ್ಜಣಿ ದಿತಾ. ತ್ಯಾ ದೆಕುನ್, ಖೊಟ್ಯಾ ಸಕ್ತೆಂಚೆರ್ ಝುಜೊನ್ ಆಪ್ಲ್ಯಾ ಸೊಮಿಯಾಚ್ಯಾ ಹಿಂಡಾಕ್ ಸಾಂಬಾಳ್ಚ್ಯೆ ಬೊವ್ ವ್ಹಡ್ ಜವಾಬ್ದಾರಿಯೆಕ್ ಮಾತೆಂ ಮಾರ್‌ಲ್ಲ್ಯಾ ಪಾಪಾ ಸಾಯ್ಬಾ ಪಾಸತ್ ಹರ್‍ಯೆಕಾ ಭಾವಾಡ್ತ್ಯಾನ್ ಸದಾಂನಿತ್ ಮಾಗೊಂಕ್ ಫಾವೊ.

______________

ಇಗರ್ಜ್‌ಮಾತೆಂತ್ ಆಮ್ಚ್ಯೆ ಪಾತ್ಯೆಣೆಚೆರ್, ದಸ್ತುರೆಚೆರ್, ಸಂಪ್ರದಾಯಾಚೆರ್ ಆನಿ ಆಚರಣಾಂಚೆರ್ ಸವಾಲಾಂ ವಿಚಾರುಂಕ್, ತರ್ಕ್ ಕರುಂಕ್ ಆನಿ ನೀಜ್ ಸಮ್ಜಣಿ ಜೊಡುಂಕ್ ಕೊಣಾಯ್ಕಿ ಕೊಣಾಯ್ಚ್ಯಾನೀ ಆಡಾಂವ್ಕ್ ಜಾಯ್ನಾ.

ಫ್ರಾದ್ ಆರನ್ ಬಬುಶ್, ಕಾರ್ಮೆಲಿತ್.